Mataupu 8

“Le Atua e, ia E Su’esu’e mai ia te A’u, ma ia E Silafia Lo’u Loto”

O Au Paia o Aso e Gata Ai amiotonu, e tuivi e “fausia se uiga i luma o le Atua, lea e mafai ona faalagolago i ai i le taimi o tofotofoga.”

Mai le Soifuaga o Lorenzo Snow

I le aso 15 o Tesema, 1899, o Peresitene Lorenzo Snow, o le Peresitene o le Ekalesia i lena taimi, na saunoa i le falelauasiga o Franklin D. Richards, o lē sa avea ma Peresitene o le Korama a Aposetolo e Toasefululua. Ina ua latalata i le faaiuga o lana saunoaga, na faapea mai ai Peresitene Snow, “Ou te tatalo i le Alii o Isaraelu e faamanuia le Au Paia o Aso e Gata Ai, ma ia tatou saunia mo mea e tutupu i le lumanai, ma o tatou loto ia sa’o i luma o le Alii.”

I le faapupulaina o le manaomia e tausisia “o tatou loto ia sa’o i luma o le Alii,” na faamatalaina ai e Peresitene Snow se mea na tupu ia te ia ma Peresitene Richards i le vaitaimi o le 1850, ina ua avea i laua ma ni Aposetolo fou. I lena taimi, na taitaiina ai e Peresitene Polika Iaga se toe fanaufouina i le Ekalesia, i le valaau atu i le Au Paia o Aso e Gata Ai i soo se mea, ina ia salamo ma ia toe faafouina la latou tautinoga e ola amiotonu.

“Ina ua tulai Peresitene Iaga e valaau atu i tagata ina ia salamo ma toe fanaufouina,” na manatua ai e Peresitene Snow, “sa ia saunoa ma le matuā malosi lava e uiga i mea e ao ona faia i nisi tagata—faapea e ao ona aveesea mai o latou Perisitua mai ia i latou, ona o lo latou lē mafaia ona faalauteleina o le perisitua, e pei ona sa tatau ai ona latou faia. O le usoga na ola ai i na aso, o le a manatuaina le matuā malosi lava na ia saunoa ai e uiga i lenei faatonuga. Ia, na aafia ai le loto o Uso Franklin, ma aafia ai foi a’u; ma, na ma talanoaina ai e i ma’ua lava le mataupu. Sa ma faia se faaiuga, o le a ma o atu ia Peresitene Iaga ma ofoina atu ia te ia o maua Perisitua. Afai sa ia lagonaina, e ala i le suafa o le Alii faapea sa le’i faalauteleina o maua Perisitua, o le a ma toe faafoiina atu. Sa ma o ia te ia, ina ua ma vaaia ua na o ia, ma ta’uina atu i ai lea tulaga. Ou te matea, sa i ai loimata i ona fofoga a o ia faapea mai, ‘Uso Lorenzo, Uso Franklin, ua oulua faalauteleina o oulua Perisitua ma le faamalieloto i le Alii. Ia faamanuia oulua e le Atua.’”¹

I lona soifuaga atoa, na mana’o ai Peresitene Snow, i lona loto, ina ia sa’o i luma o le Alii, ma sa ia uunaia foi le Au Paia e iloiloina lo latou lava agavaa. Sa ia saunoa ma “se agaga ina ia faateleina ai lo tatou malamalama” le manaomia e faatuina “se uiga tatau, i le avea ai ma Au Paia o Aso e Gata Ai, i luma o le Atua lo tatou Tamā.”² [Tagai fautuaga 1 i le itulau 134.]

Aoaoga a Lorenzo Snow

Afai ua tatou fausiaina se uiga tatau, e mafai ona tatou valaaulia ma le loto atoa le Atua e sailia o tatou loto.

Ua o’o mai ia te a’u se lagona malosi, faapea, o le mea sili ona taua e mafaufau i ai, ma, lena o le a sili i le auaunaga, pe a tatou toe foi atu i le lalolagi o agaga, o le fausiaina lea o se uiga matuā tatau ma manino, i le avea ai ma Au Paia o Aso e Gata Ai faamaoni ma tumau i lenei olaga faataitai.

I taimi e tusi talosaga ai se tagata fou mo se galuega, po o se tofiga faatuatuaina, e masani ona manaomia lona tuuina atu o pepa e faamaonia ai lona agavaa, mai tagata faatuatuaina, o tusi e faamaonia mai ai, ma o se faalauiloaga, lea e matuā aogā lava i o latou tulaga, e fesoasoani i le mauaina o faamaoniga ma avanoa, lea atonu o le a faigata ona maua. O le mea lea, atonu e faigofie, ona mauaina se faamaoniga tusitusia, e pei ona faaigoaina ai, se tusi faamaonia lea e mafai ona tuuina i totonu o lana taga; ma, e moni lava, e tusa ma la’u matau, e le faapea e lē masani ona tupu lena mea, faapea o tagata ua umia na tusi faamaonia, e lē o ō latou uiga moni ia e pei ona faamaonia mai ai.

E i ai i latou o loo faatasi ma i tatou, o e ua ta’ua o tagata o lenei Ekalesia, o e faatinoina taumafaiga e tele ina ia fiafia ai tagata ua siomia ai i latou, ae o ō latou uiga moni, po o le tagata i totonu, e pei ona taua ai, o ia ituaiga tagata, ua natiaina, pe ua faafoligaeseina. … O lenei tatalo ua ou taua—“Le Atua e, ia e suesue mai ia te a’u, ma ia e silafia lo’u loto; tofotofo mai ia ia te a’u, ma ia e silafia o’u manatunatu; ma ia e silafia po o ia te a’u se ala e tiga ai; ma ia e taitaiina mai a’u i le ala o le faavavau” [Salamo 139:23–24]—e matuā taua tele; o se tatalo na faia e Tavita, i le taimi autu o lona olaga, na mafai ona ia tuuina atu ma le agaga lelei ma le loto atoa, i le Alii. Peitai, sa i ai taimi na ia lagonaina ai le tautevateva, ma lagona o le gatete ona o vaivaiga, a o ia ofoina atu se tatalo faapea.

Ua ia te a’u se talitonuga faapea o le toatele o le Au Paia o Aso e Gata Ai, i le tele o taimi o ō latou olaga, e mafai ona o atu i le Alii ma le loto atoa ma faia lenei lava tatalo e tasi—“Le Atua e, ia e su’esu’e mai ia te a’u, ma ia e silafia lo’u loto, ma ia e silafia po o ia te a’u se ala e tiga ai;” peitai, afai o i tatou, i le avea ai ma se nuu, ona ola ina ia mafai ai i taimi uma ona ifo i luma o le Alii ma ofoina atu se tatalo faapenei, e maeu le matagofie o lena mea, o se mea matagofie tele lena i le amiotonu ma galuega lelei! … Ou te fautuaina ina ia faaaogaina e [tagata taitasi] lenei tatalo a Tavita, ma vaai pe o le a le latalata e mafai ai e ia ona ola e tusa ma le malamalama ua ia mauaina, ina ia faapea ona faia i le loto atoa, o se vaega o ana auaunaga i le Atua. E toatele e lē gafatia le o’o mai i lenei tulaga o le lelei atoatoa, ona latou te faia mea i le faalilolilo, i le mea e lē mafai ona vaaia e mata, o e i ai le agaga e faaesea i latou mai le Silisili Ese, ma tulei esea ai le Agaga o le Atua. O tagata faapea, e lē mafai ona faaaogaina lenei tatalo pe a na o i latou; latou te lē mafaia, se i vagana ua salamo i a latou agasala ma faasa’oina se sesē atonu na latou faia, ma naunau ina ia sili atu i le lumanai nai lo le mea na latou faia i le tuanai, ma fausiaina se uiga i luma o le Atua, e mafai ona faalagolago i ai i le taimi o tofotofoga, ma agavaa ai i latou e faifai mea faatasi ma tagata paia ma le Tamā lava ia, pe a latou o’o atu i le lalolagi o agaga.

… E ao ina avea i tatou ma alii faamaoni ma tamaitai faamaoni; e ao ina i ai ia i tatou le faatuatua ua atiina ae lelei, ma e ao ona agavaa i tatou mo le mafutaga ma le Agaga Paia ina ia fesoasoani ia i tatou i galuega o le amiotonu i taimi uma, ina ia mafai ai e i tatou ona ositaulagaina lo tatou loto i le finagalo o le Atua, ina ia faafetauia lo tatou tulaga pa’ū, ma faia le mea sa’o mo le mana’o e faia le sa’o, ma faatumauina la tatou vaai ia taulai atu i le mamalu ma le matagofie o le Atua. Ina ia faia lenei mea, e ao ona i ai se lagona i totonu o le mafaufau, lea e ogatasi ma le tiutetauave lea ua tuuina mai ia i tatou, lea e iloa le mea moni faapea o le silafaga a le Atua o loo i ai i o tatou luga ma o a tatou gaoioiga taitasi ma faamoemoega lea e uunaia ai a tatou gaoioiga taitasi, e ao ina tatou tali atu ai; ma e ao ona ogatasi [au faatasi] ma le Agaga o le Alii.³ [Tagai fautuaga 2 i le itulau 134.]

O faataitaiga i totonu o tusitusiga paia, ua a’oa’o ai i tatou i auala e faaleleia atili ai o tatou uiga.

E tele mea ou te fiafia ai i uiga o perofeta, aemaise lava i uiga o Mose. Ou te fiafia i lona naunautaiga e faatino le afioga ma le finagalo o le Atua e faatatau ia Isaraelu, ma lona saunia e faia mea uma na i ai i le malosi o le tagata soifua, ma lagolagoina e le Silisili Ese; ma i le tumutumuga o mea uma, ou te fiafia i lona faamaoni ma le tuutō atu i le Alii. …

E fiafia le Atua i alii ma tamaitai o aso nei, o e tulituliloaina se ala o le faasa’oina o sesē, ma, o e faafetaiaia mana o Satani o loo faasagatau atu ia i latou, e mafai ona faapea atu, Satani e, ina alu ese ia oe i o’u tua [Luka 4:8], ma, o e ola i se olaga amiotonu, se olaga faale-Atua, ma o ia ituaiga tagata ua i ai se aafiaga o le Atua, ma, o a latou tatalo o le a taliina mai [tagai Iakopo 5:16]. O Mose, mo se faataitaiga, sa i ai lea ituaiga mana faatasi ma le Silisili Ese, na suia ai Lona [O le Atua] faamoemoega i se tasi o tulaga patino. O le a manatuaina e faapea na o’o ina toatama’i le Alii ia Isaraelu ma tautino atu ia Mose faapea o le a Ia faaumatiaina i latou, ma o le a Ia aveina a’e Mose ma faia o ia ma nuu sili, ma o le a tuuina ifo i luga ia te ia ma lana fanau, le mea sa Ia folafolaina atu ia Isaraelu. Peitai, o lenei taitai ma faitulafono sili, sa faamaoni i lona tiute na tuuina atu, sa tū i le va o le Atua ma le nuu, ma augani atu i le Alii mo ona tagata; e ala i le mana sa mafai ona ia faataunuuina, ma na ia faataunuuina lava, sa avea o ia ma auala na faaolaina ai le nuu mai le faaumatiaga na tuu e o’o i ai. [Tagai Esoto 32:9–11; Faaliliuga a Iosefa Samita; Esoto 32:12.] E maeu le faamamaluina ma le matagofie o Mose i le silafaga a le Alii, ma e maeu se faamalieina o Lona finagalo i lona silafia ai o Lona nuu filifilia, i lo latou tulaga faalogogatatā ma valea, ua i ai se tagata faapea e taitaia i latou.

I le tala ia Iona, tatou te maua ai foi se uiga malie o amioga. A o i ai i luga o le sami sousou, ma ua faaalia le matata’u o le auva’a, e faatatau i lo latou agavaa e faasaoina le vaa, o Iona, i le lagonaina o lona sesē i le lē alu i Nineva e pei ona sa poloaiina ai e le Alii, na ia faailoa atu ai o ia lava o le mafuaaga o le mala sa fou e o’o mai i o latou luga, ma sa ia ofo atu e ositaulagaina o ia mo le saogalemu o i latou sa i luga o le vaa. [Tagai Iona 1:4–12.] E faapena foi isi perofeta ma tagata o le Atua, e ui ina foliga mai i nisi o taimi, e pei o Iona, e faaalia vaivaiga, e i ai se mea matuā maoa’e ma faafiafia loto i o latou uiga.⁴ [Tagai fautuaga 3 i le itulau 134.]

O uiga amiotonu, e atiina ae i totonu ia i tatou i se tulaga faifaimalie, a o tatou faaalia le faatuatua ma salamō i a tatou mea sesē.

O ia ituaiga o uiga, e pei ona tatou mauaina i tagata agavaa sa soifua ai anamua, e le o ni mea e tutupu fua pe ona ua fetaui ma le taimi, e lē faapea foi o ni mea e mafai ona mauaina i se aso se tasi, o se vaiaso, se masina, po o se tausaga, ae o ni atina’e faifaimalie, o taunuuga o le faatuatua faifaipea i le Atua ma le upu moni, e tutoatasi lava mai le taliaina ma faitioga a tagata.

… E taua mo i tatou, i le avea ai ma Au Paia o Aso e Gata Ai, ona malamalama ma manatuaina faapea o le faaolataga e sau mai le alofa tunoa o le Atua, ma e ala mai le atiina a’e i totonu o i tatou o na aoaoga faavae na pulea ai na tagata amiotonu na ta’ua muamua. O le mea, e lē faapea tatou te faia le lelei ona o viiga mai tagata; ae ia faia le lelei ona o le faia o le lelei, e atiina ae ai i totonu ia i tatou le uiga faale-Atua, ma talu ai o lena tulaga, e tatau ai ona avea i tatou ma au faatasi ma le faale-Atua, lea o le a avea ma vaega ma sina luuga o ō tatou tagata, i le taimi tatau ai. …

E tatou te lē faia ea, i nisi taimi, mea tatou te toe salamo ai mulimuli? Atonu e lelei mea uma pe a tatou taofia le faia o ia mea, ina ua tatou iloaina lo latou sesē; pe a tatou vaaia le mea leaga ma suia, na pau lava lena o le mea e mafai ona tatou faia, ma, na pau lena o le mea e manaomia mai soo se tasi. Peitai, e lē taumatea, e matua faigata lava mo nisi tagata, faapea e sili atu lo latou mafaufau ma matata’u i le faalauaiteleina o le mea sesē na latou faatinoina, nai lo le faatinoina o le sesē lava ia, latou te mafaufau pe o le a le tala a tagata o le a fai, pe a latou faalogo i ai, ma isi mea faapena. Ma, i se isi itu, e i ai nisi ua faaosofia e faia ni mea patino ina ia talia ai e a latou uo, ma afai o a latou gaoioiga ua le aumaia ai ni faamatalaga lelei, pe ua le amanaiaina, latou te lagona faapea o a latou galuega ua maimau, ma, po o a lelei na latou faia i le tuanai, ua matuā maimau lava.

O lenei, afai tatou te manana’o moni lava e faalatalata atu i le Atua; afai tatou te moomoo e faatutusa i tatou lava ia pei o agaga lelei i lalolagi e faavavau; afai tatou te moomoo e faatuina i totonu o i tatou lava lena faatuatua ua tatou faitau ai, ma lena na faia ai e le Au Paia anamua ia galuega matagofie, e ao ona tatou, pe a mavae ona tatou maua o le Agaga Paia, faalogo i ana musumusuga ma usitaia ana fautuaga, ma e le mafai e se isi lava mea i o tatou olaga ona faamalosia mai ia i tatou: E moni lava o i tatou o tagata vaivai ma agasala, o e ono faatiga i le Agaga o le Atua; peitai, e vave ona tatou iloa ua tatou faia se sesē, ona tatau lea ona tatou salamō mo lena mea sesē, ma i le mea e gata ai lo tatou mafai, toe faaleleia po o le toe faasa’oina o le sesē atonu na tatou faatinoina. E ala i le uia o lenei ala, tatou te faamalolosia ai o tatou uiga, tatou te alualu i luma i lo tatou lava faamoemoega, ma tatou faamalolosia i tatou lava e tete’e atu i faaosoosoga; ma i le taimi e tatau ai, o le a tatou matuā faatoilaloina, ma matuā faafiafiaina i tatou lava i le alualu i luma ua mafai ona tatou faia i pulega faaletagata lava ia, ma le faateleina o le lelei.⁵ [Tagai fautuaga 4 i le itulau 134.]

A o tatou faatumauina o tatou uiga amiotonu, o le a tatou faalatalata atili atu i le Alii.

Ua tatou mauaina le Talalelei e ofoofogia lona faagaoioiga: e ala i le usiusitai i ona tulaga manaomia, tatou te maua ai faamanuiaga silisili na folafolaina mai pe na tuuina ifo i luga o tagata soifua i soo se tupulaga o le lalolagi. Peitai, e pei o le tamaitiiti ma lana meataalo, po o le taaloga, o i tatou foi e masani ona tatou faamalieina i tatou lava i mea lē aogā o lenei vaitaimi, ma faagaloina avanoa ua tatou maua o le atiina ae i totonu ia i tatou o aoaoga faavae sili ma faavavau o le ola ma le upu moni. E finagalo le Alii ia faatuina se sootaga sili atu ona vavalalata ma loloto i le va o Ia ma i tatou; e finagalo o Ia ina ia tatou alualu i luma o ni tagata soifua, ma faateleina lo tatou malamalama, ma, na pau le auala e mafai ona faia ai lenei mea, o le Talalelei faavavau lea ua saunia faapitoa mo lenei faamoemoega. Ua faapea mai le Aposetolo o Ioane: “O i latou uma foi o i ai lenei faamoemoe ia te i latou, ua taitasi ma faamamā o ia e ia, faapei ona mamā o Ia (Keriso).” [1 Ioane 3:3.] O faaaogaina ea e le Au Paia o Aso e Gata Ai aoaoga faavae o le Talalelei i o latou olaga, ma faataunuu ai le fuafuaga a le Atua?

… O a mea e mafai ona tatou faia, e tusa ma tulaga ua tatou i ai, e siitia maualuga atu ai i tatou lava i le amiotonu a lo tatou Atua? O a tulaga lelei, faamanuiaga ma avanoa o lenei faatulagaga o le faaolataga, lea ua tatou usitaia, ofoina mai, ma, o a auala e tatau ona faaaogāina ina ia ausia ai? Afai e tatau ona i ai sina osigataulaga manaomia, o le a avea ma se avanoa matuā lelei mo i latou uma o e mananao e avea la latou tapuaiga o se suesuega, ma, e ua naunautai e usitaia ona tulaga manaomia, e ala i le ola ai i o latou olaga i aso taitasi, ina ia faaalia lo latou naunautaiga e ifo atu i le finagalo o Ieova, ma faailoaina Lona aao i taimi o faigata, e pei foi o taimi o le solo lelei.

… Atonu e lelei ona iloiloina i tatou lava, faalilolilo i o tatou fale na o i tatou, ina ia faamautinoa lo tatou tulaga … i luma o le Alii, ma afai e tatau ai, atonu tatou te faafouina lo tatou filigā ma le faatuatua, ma faateleina a tatou galuega lelei.

E mautinoa lava, i le talanoa ai e uiga i tagata, o se vaega atoa, faapea ua faaleleia silisili i tatou i luma o le silafaga a le Atua. Peitai, e ui e le taumateina o le tulaga lea e i ai, ua ou talitonu e i ai tagata o loo faatasi ma i tatou o e ua faapaiaina i meaalofa faaleagaga ma faigofie ona galueaiina, lea e mafai ona faatinoina, pe a latou filifilia, i se tulaga sili atu nai lo i latou, ma mafai ona vave atu a latou gaoioiga i ala o le faapaiaina ma faalatalata atili atu ai i le Alii. Peitai, o le agaga e faataunuuina ai mea o lenei lalolagi o loo faagaoioina i luga o na mea i le tulaga e gata mai ai, latou te lē faateleina na mana faaleagaga ma faamanuiaga; latou te lē tuuina i latou i lena sootaga vavalalata i le Alii lea ua avea ma o latou avanoa.⁶

O a tatou amioga, i le avea ai ma Au Paia o Aso e Gata Ai, e tatau ona faatumauina lona paia, i le a lava le tau po o osigataulaga. O amioga, e taliaina e le Atua, e tatau ona faamausaliina, e tusa lava po o le a lona tau o se olaga atoa o le faafitia o oe lava ia.

A o ola ai i lenei tulaga, atonu tatou te vaai atu i luma … , faatasi ma le faamautinoaga atoatoa faapea … e ao ona faapaleina i tatou, faatasi ma atalii ma afafine o le Atua, ma mauaina le tamaoaiga ma le mamalu o se malo Selesitila.⁷ [Tagai fautuaga 5 o loo i lalo.]

Fautuaga mo Suesuega ma le Aoaoina Atu

Mafaufau i manatu nei, a o e su’esu’eina le mataupu, pe, a o e sauni e a’oa’o atu. Mo nisi fesoasoaniga, tagai i itulau v–vii.

A o e iloiloina le tala o loo i itulau 127 ma 130, o a mea o le a e aoaoina mai gaoioiga a Elder Lorenzo Snow ma Elder Franklin D. Richards? Mafaufau pe faapefea ona e faasoaina nei aoaoga faavae faatasi ma auaiga ma isi.
Na saunoa mai Peresitene Snow, “E ao ona avea i tatou ma alii faamaoni ma tamaitai faamaoni” (itulau 129). O le a sou manatu o le uiga o le avea ma alii faamaoni ma tamaitai faamaoni?
Mafaufau i mea na matauina e Peresitene Snow e uiga i faataitaiga a Mose ma Iona (itulau 130–1). O le a se mea ua e vaaia i nei tala taitasi, e mafai ona fesoasoani ia i tatou e faaleleia ai a tatou amioga?
Mafaufau loloto i le parakalafa lona lua atoa o loo i le itulau 132. Aisea e te manatu ai e manaomia lo tatou iloaina o tatou sesē, ina ia faamalosia ai a tatou amioga? E faapefea ona tatou faatagaina i tatou lava ia iloa o tatou lava lē atoatoa, e aunoa ma le loto vaivai?
Iloilo le fautuaga a Peresitene Snow o loo i le vaega faaiu o le mataupu (itulau 133–4). Mafaufau e faaavanoa se taimi e iloilo ai oe lava, ma fuafua po o faapefea lou tulaga i luma o le Alii.

Mau Talafeagai: Salamo 24:3–5; 2 Peteru 1:2–11; Mosaea 3:19; Alema 48:11–13, 17; Eteru 12:25–28; MF&F 11:12–14; 88:63–68

Fesoasoaniga mo le Aoao Atu:{ Fai atu i sui auai e filifili se vaega se tasi mai totonu o le mataupu, ma faitau e aunoa ma se leo. Valaaulia i latou e faapotopoto i vaega taitoalua po o le taitoatolu, o e na filifilia le vaega lava e tasi ma talanoaina mea na latou a’oa’oina.

President Franklin D. Richards

E ui lava o Iona “na faaalia ni ona vaivaiga,” e mafai ona tatou a’oa’o mai ona uiga “maoa’e ma moomia”.