Mataupu 5

O Le Taunuuga Sili o e Faatuatua

“O se fiafiaga sili le talanoa atu e uiga i mea silisili ua folafola mai e le Atua o le a tuuina ifo i luga o Ona atalii ma afafine, ma, o le a tatou mauaina pe afai tatou te faatuatua.”

Mai le Soifuaga o Lorenzo Snow

I le tautotogo o le 1840, sa i ai Lorenzo Snow i Navu, Ilinoi, e saunia ai mo le alu atu i se misiona i Egelani. Sa ia asiasi atu i le fale o lana uo o Henry G. Sherwood, ma sa ia fesili ia Uso Sherwood e faamalamalama atu se fuaitau o se mau. “A o faalogo atu ma le toto’a i lana faamalamalamaga,” na manatua ai mulimuli ane e Peresitene Snow, “na matuā malosi le o’o ifo o le Agaga o le Alii ma nofo i o’u luga—na matala lo’u malamalama, ma sa ou vaaia i le manino e pei o le la i le aoauli, faatasi ma le maofa ma le ofo tele, le ala i le va o le Atua ma le tagata. Sa ou tusiaina ai nei laina e lua o se solo e faamatala ai le faaaliga, e pei ona sa faaali mai ai ia te a’u …

“O le tulaga ua i ai nei le tagata, sa i ai foi le Atua:

“O le tulaga ua i ai nei le Atua, o le a faapena ona avea ai le tagata.”¹

I le lagonaina ai ua ia mauaina “se fesootaiga paia” lea e tatau ona ia puipuia ma le faaeteete, sa le i aoaoina atu ai e Lorenzo Snow le mataupu faalauaitele, seia o’o ina ia iloaina e faapea na aoaoina e le Perofeta o Iosefa Samita le mataupu.² O le taimi lava na ia iloaina ai ua lauiloa e le toatele, sa ia molimau soo atu ai loa e uiga i le mataupu.

E le gata ina avea lenei upu moni ma autu o le tele o ana lauga, ae sa ia faaaogaina foi e avea ma autu mo lona soifuaga. Na fai mai lona atalii o LeRoi, “O lenei upu moni faaalia na sili atu ona faafiafiaina ai Lorenzo Snow nai lo soo se isi lava tulaga; sa matuā gotouga ifo i lona loto, ma i’u ai ina avea ma uunaiga o lona soifuaga ma tuuina atu ai ia te ia lana galuega lautele o lona lava lumanai sili, ma le misiona maoae ma le galuega a le Ekalesia.”³ Sa avea ma ona “sulu ma taiala tumau” ma “o se fetu pupula ma malamalama i ona luma i taimi uma—i lona loto, i totonu o lona agaga, ma lona tino atoa.”⁴

I lenei mataupu, ua a’oa’o mai ai e Peresitene Snow le mataupu faapea e mafai ona avea tatou faapei o lo tatou Tama Faalelagi. I le mataupu e 6, ua ia tuuina mai ai fautuaga patino i auala e mafai ai ona tatou faaaogaina lenei mataupu i o tatou olaga.

Aoaoga a Lorenzo Snow

Talu ai ona ua i totonu ia i tatou se mana paia, e mafai ona avea i tatou e faapei o lo tatou Tama o i le Lagi.

Sa tatou fananau mai i le faatusa o le Atua lo tatou Tama; na ia faia i tatou e faapei o ia. O loo i ai le natura o le Atua i le faatulagaga o lo tatou mamanu faaleagaga; i lo tatou fananau mai faaleagaga, na tuuina mai ai e lo tatou Tama uiga, mana ma tomai uma o loo ia umiaina, e faapei ona mauaina e se tamaitiiti ia lava tulaga mai lona tina, e ui o se tulaga lē atoatoa, o tomai, mana, ma lagona uma o ona matua.⁵

Ou te talitonu o i tatou o atalii ma afafine o le Atua, ma ua Ia tuuina ifo i o tatou luga le mana mo le poto ma le malamalama e lē i’u, aua ua Ia tuuina mai ia i tatou se vaega o Ia lava. Ua ta’uina mai ia i tatou na faia i tatou i Lona lava faatusa, ma ua tatou iloaina o loo i ai se uiga o le tino ola pea i le agaga o le tagata. O loo i ai se tagata faaleagaga i totonu o lenei tapeneko [le tino faaletino], ma o lena agaga e i ai sona tulaga paia ia te ia lava, e ui lava o se tulaga faatamaitiiti; ae o loo i ai i totonu ia te ia le agavaa mana e faaatoatoa ma agai ai i luma, o se tamaitiiti ua mauaina le meaai mai lona tina. E ui ina faapea o le tamaitiiti atonu e matuā le iloaina se mea, peitai, e i ai avanoa ia te ia e faapea e ala i le pasiaina o faigata eseese o le olaga faatamaitiiti e o’o i le matua, e mafai ai e ia ona siitia i se tulaga silisili e faapea ona taua atoatoa, pe a faatusatusa i lona lē iloaina o se mea i le taimi o le tamaitiiti.⁶

Ua i totonu ia i tatou lava le tulaga e paia; ua i totonu ia i tatou lava le tino ola pea; o lo tatou agaga e ola pea; e lē mafai ona faataumaoia; e le mafai ona faaumatiaina. O le a tatou ola mai le vavau e oo atu i le faavavau.⁷

O se fiafiaga sili le talanoa atu e uiga i mea silisili ua folafola mai e le Atua e tuuina ifo i luga o Ona atalii ma afafine, ma o le a tatou mauaina pe a tatou faamaoni. … O la tatou faigamalaga i lenei ala o le faaeaga, o le a aumaia ia i tatou le atoatoaga o lo tatou Alii o Iesu Keriso, ia tutū i le afioaga o lo tatou Tama, e maua Lona atoatoa, ina ia mauaina le fiafia i le faateleina o a tatou fanau i lalolagi e lē uma, ina ia olioli i fegalegaleaiga lelei sa tatou mauaina i lenei olaga, ina ia faatasi ma o tatou atalii ma afafine, o a tatou tane ma tatou avā, e siomia i tatou faatasi ai ma le oliolisaga uma e mafai ona tuuina mai e le lagi, o o tatou tino o le a faamamaluina e pei o le Faaola, e aunoa ma ma’i ma mea leaga uma o le olaga, ma saoloto mai tulaga lē manuia ma popolega ma osigataulaga lē lelei o loo tatou faia iinei.⁸

Na ala i se auala faifaipea o le alualu i luma, na maua ai e lo tatou Tama Faalelagi le faaeaga ma le mamalu, ma faasino i tatou i le ala lava e tasi, ma, e tusa ai ma le tulaga o le faaofuina i le mana, pule ma le mamalu, ua ia faapea mai ai, “ina tu ia i luga ma sau ina ia e mauaina le mamalu ma le fiafia lava lea ua ia te a’u.”⁹

E taua tagata o le Atua i Lana silafaga; o Lona alofa mo i latou e tumau i taimi uma, ma i Lona naunautaiga, malosi ma le finagalo alofa, o le a latou manumalo ai ma aumaia ai e sili atu nai lo le na ona faatoilaloina. O i latou o Ana fanau, na faia i Lona faatusa ma faamoemoe atu, e ala i le usiusitai i Ana tulafono, ia avea faapei o Ia …

… O lenei le taunuuga maualuga o atalii o le Atua, o i latou o e faatoilaloina, o e ua usiusitai i Ana poloaiga, o e ua faamamāina i latou lava, e pei ona mamā o ia. E ao ona avea i latou faapei o Ia; o le a latou vaaia o Ia faapei ona i ai o Ia; o le a latou vaaia Ona fofoga ma nofotupu faatasi ma Ia i Lona mamalu, ma avea faapei o Ia i soo se tulaga.¹⁰ [Tagai fautuaga 1 i le itulau 97.]

Ua a’oa’o mai tusitusiga paia e uiga i o tatou gafatia paia.

Ua faatutuina e le Alii i o tatou luma mea e faaosofia ai o tatou uiga maoa’e. I faaaliga na tuuina mai e le Atua, tatou te maua ai mea e mafai ona fesoasoani ai i se tagata e maua le tulaga o le tagata o le a faimalaga i lenei ala o le malamalama ma taitaia e ala i le Agaga o le Atua. E le i leva ona avea a’u ma tagata o lenei Ekalesia [le i umi tele] ae faaalia manino mai ia te a’u mea e mafai ona ausia e se tagata e ala i le usiusitai faifaipea i le Talalelei a le Alo o le Atua. O lena malamalama ua avea o se fetu faifai pea i o’u luma, ma ua faaosofia ai a’u ina ia patino i a’u taumafaiga e fai mea na ua sa’o ma taliaina e le Atua. … E foliga mai, i le mavae ai o le a’oa’oga uma ua tatou mauaina e faatatau i lalolagi faaselesitila, e faapea e i ai nisi Au Paia o Aso e Gata Ai, o e ua matuā faamalieina i le na o le iloaina e moni le galuega, e faapea a e talanoa atu ia i latou e uiga i lo tatou lumanai sili, e foliga o le a faateia i latou, ma latou mafaufau e leai se mea patino e afaina ai i latou. O Ioane le tali faaaliga, i totonu o le mataupu lona tolu o lana ulua’i tusi, na faapea mai:

“O le fanau i tatou a le Atua i nei ona po.” [1 Ioane 3:2.]

… Ma sa ia faaauau faapea:

“A e le’i faaalia mai nei le uiga o i tatou a amulī; a ua tatou iloa, pe a faaali mai o ia, ona foliga ai lea o i tatou ia te ia, auā tatou te iloa tino ai lava o Ia.

“O i latou uma foi o i ai lenei faamoemoe ia te i latou, ua taitasi ma faamamāina o ia e ia, faapei ona mamā o ia.” [Tagai i le 1 Ioane 3:2–3.]

… Na faailoa mai e le Agaga o le Atua ia i tatou e faapea, e i ai upu moni maumaututū ma mamalu i ia ituaiga faailoaga. O Paulo, i le saunoa atu ai i tagata i Filipi, na fautua atu ina ia latou faafaileleina se naunauga lea e matuā tulaga ese lava i tagata o aso nei, e ui e lē faapena i le Au Paia o Aso e Gata Ai, aemaise i latou o e lē faamalieina e avea o tama ninii i mea tau le Atua. Na ia faapea mai:

“Ia ia te outou foi lea lava manatu sa ia Keriso Iesu:

“O ia, sa uiga faatasi ma le Atua, e le’i manatu ia o se mea faoa ina ia tusa lava o ia ma le Atua.” [Filipi 2:5–6.]

… O lenei [le mataupu] sa a’oa’o atu e Paulo, ma sa ia malamalama e uiga i le mea sa ia talanoa i ai. Sa aveina atu o ia i le lagi tuatolu ma faalogoina mea, ma ta’uina mai ia i tatou, faapea e lē faatagaina ona faia e le tagata o se upu [tagai 2 Korinito 12:1–7]. … Faamata ua sesē mo i tatou e fai atu i tagata iinei e faafaileleina se naunauga o lenei uiga? E i ai ni faaupuga i le Tusi Paia, aemaise i le Feagaiga Fou, e foliga e tulaga ese i tagata e lē mauaina le Agaga o le Alii.

“O lē manumalo e maua e ia mea uma.” [Faaaliga 21:7.]

O le a lena ituaiga faaupuga? O ai e talitonu i ai? Afai e fai atu se tamā i lona atalii, “Lo’u atalii e, ia faamaoni, ma mulimuli i a’u fautuaga, ma a o’o ina e matua, o le a e mauaina mea uma ua ia te a’u,” o le a i ai sona uiga, e lē sa’o? Afai ua ta’uina atu e le tamā le mea moni, o lena atalii o le a mauaina se mea e faaosofia ai o ia e faamaoni. Pe na finagalo ea Iesu e olegia tatou, ina ua Ia faaaogaina lenei faaupuga? O le a ou faamautuina atu ia te outou, e faapea e leai se taufaasese i le gagana. E moni lava le mea sa Ia fetalai ai. O lenei, na fetalai Iesu:

“O lē manumalo ou te avatua ia te ia ma te nonofo faatasi ma a’u i lo’u nofoalii, e pei o a’u foi ona ou manumalo, ua ma nonofo foi faatasi ma lo’u Tama i lona nofoalii.” [Faaaliga 3:21.]

O se faaupuga matagofie lena. O i ai ea se tulaga moni o i ai? E moni atoatoa. O le Alii Silisili Ese na fetalai mai ai. Ua ta’uina mai e le Aposetolo o Paulo ia i tatou, i totonu o tusitusiga paia:

“Auā ua matou iloa afai e lepetia lo matou fale apitaga faalelalolagi, ua ia te i matou le fale mai le Atua, o le fale e le’i faia e lima, e faavavau i le lagi.” [2 Korinito 5:1.]

Ou te talitonu i lena mea. Ma, a faapea mai o Iesu “na te liua o tatou nei tino ua leaga, ina ia faia ia faatatau i lona tino matagofie” [Filipi 3:21] Ou te talitonu foi i lena mea. E talitonu ea le Au Paia o Aso e Gata Ai i nei mea ou te talanoa atu ai? O le mea moni, e tatau ona outou talitonu i ai. O lenei foi:

“Aua o ia o lē talia a’u auauna ua ia talia a’u;

“Ma o ia o lē talia a’u ua ia talia lo’u Tamā;

“Ma o ia o lē e talia lo’u Tamā e maua e ia le malo o lo’u Tamā; o lea, o mea uma ua i ai i lo’u Tamā o le a tu’u atu ia te ia.” [MF&F 84:36–38.]

E mafai ea ona manatunatu se tasi i se isi mea e sili atu e mafai ona tuuina mai? … Na malamalama lelei Paulo i nei mea, aua na ia faapea mai na te “tausisi atu i le faailoga, ia maua ai le taui na valaauina ai a’u mai lugā e le Atua ia Keriso Iesu.” [Tagai Filipi 3:14.]

I nei tautalaga ua ou tuuina atu, atonu tatou te vaaia ai se mea e tusa ma le natura o lenei valaauga maualuga ia Keriso Iesu. …

… Ou te le iloa pe toafia o loo i ai iinei, o e ua mauaina se malamalama moni o nei mea i o latou loto. Afai ua e mauaina, o le a ou ta’uina atu o latou aafiaga. E pei ona fai mai Ioane:

“O i latou uma foi o i ai lenei faamoemoe ia te i latou, ua taitasi ma faamamāina o ia e ia, faapei ona mamā o ia.” [Tagai 1 Ioane 3:3.]

… Ua faasino mai e le Atua taunuuga o le malaga ai i lenei auala agai i le mamalu ma le faaeaga, ma o folafolaga e mautinoa lava. Ua silafia lelei e le Alii le mea o le a Ia faia. Ua Ia silafia mea faigaluega e tatau ona ia faaaoga, ma e Na te silafia le mea tonu na ia fetalai ai. Afai tatou te faia le vaega ua Ia faatonuina ai i tatou, ma tausia lo tatou tofi lona lua, o le a mautinoa lava le faataunuuina o nei folafolaga, i o latou tulaga patino, ma sili atu nai lo mea e mafai e oe ma a’u ona malamalama i ai.¹¹ [Tagai fautuaga 2 i le itulau 97.]

A o tatou manatuaina faamanuiaga ua saunia e le Alii mo i tatou, tatou te maua le olioli e ui i popolega ma tigā o le olaga.

O tagata taitasi o le Au Paia o Aso e Gata Ai, o mafai ona lagonaina mai lo’u leo, o le a i ai le agavaa e tula’i ai i le taeao o le ulua’i toetu, ma, i le tulaga faamamaluina, e faaeaina i le afioaga o le Atua, ma maua le avanoa e talanoa ai ma lo tatou Tamā, faapei ona tatou talanoa ma lo tatou tamā faalelalolagi.¹²

Atonu e leai se isi avanoa e mafai ona tuuina atu i tagata, e sili atu le faamamaluina, nai lo avanoa ua tuuina mai mo le Au Paia. E leai se tagata soifua e mafai ona mo’omo’o mo se isi mea sili atu, pe o le a faamaonia a’ia’i lona sili atu ona faamalieina. O mea uma e faatatau i le filemu atoatoa, fiafia, mamalu ma le faaeaga, ua tuuina mai i le Au Paia o Aso e Gata Ai. E tatau ona tatou olioli i le uiga o lenei vaega o avanoa, ma faatumauina i o tatou mafaufau i taimi uma. E lē tatau ona tatou faatagaina o tatou avanoa e faapogisaina i ni mea faatauvaa, e ala i le faia o mea e le taliaina i luma o le Alii.¹³

O o’u faamoemoega, e faatatau i le olaga i le lumana’i, e matuā maoa’e ma mamalu, ma ou te taumafai e tausia nei avanoa ia faaauau pea ona susulu malosi; ma o le avanoa ma le tiute lena o tagata taitasi o le Au Paia o Aso e Gata Ai.¹⁴

O i tatou uma lava, tatou te lē malamalama atoatoa i faamanuiaga ma avanoa ua uma ona saunia i totonu o le talalelei mo i tatou ina ia mauaina. Tatou te lē malamalama atoatoa, ma e lē o mafai ona tatou vaaia mea ia o loo faatalitali mo i tatou i lalolagi e faavavau, e oo lava fo’i i mea o loo faatalitali mai mo i tatou i lenei olaga, ma ua faamoemoeina e siitia ai lo tatou filemū ma le fiafia ma tali i manaoga o o tatou loto. …

I le siomia ai e le anoanoa’i o popolega, e masani ona tatou, lē manatuaina mea nei o loo i ai i o tatou luma, ona tatou lē malamalama ai lea ua mamanuina ma faamoemoeina le talalelei i lona natura e tuuina ifo i o tatou luga na mea o le a aumaia ai le tauleleia, mamalu ma le faaeaga, lena o le a aumaia le fiafia, filemu ma le mamalu. E foliga mai ua tatou faagaloina nei mea i le lotolotoi o popolega ma tigā o le olaga, ma e tatou te lē malamalama atoatoa ai e faapea o lo tatou avanoa, ma, ua tuuina e le Alii mo i tatou ina ia tatou tulituliloaina lena talalelei, e mafai ai ona tatou maua le filemu i totonu ia i tatou i aso uma. …

Pe i ai ea se mafuaaga e faavauvau ai? Pe i ai ea se mafuaaga mo le Au Paia e faanoanoa ai? Pe i ai ea se mafuaaga mo le tagiauē, po o le lē faamalieina? E leai se mafuaaga; ae o le ola po o le oti ua faatuina mo i tatou; o malō ma mana e a tatou ia, pe afai tatou te tumau i le faamaoni; faanoanoaga ma le faaaunuua, pe afai tatou te lē amanaiaina le talalelei.

O le a se isi mea sili atu tatou te mo’omo’o i ai, nai lo lenā ua aofia ai i totonu o la tatou tapuaiga? Afai tatou te tutū mausalī i luga o le papa, ma mulimuli i le Agaga lenā ua tuuina i o tatou fatafata, o le a tatou galulue sa’o i le ala o o tatou tiute, o le a tatou galulue sa’o i luma o i latou ua taitaia i tatou, o le a tatou galulue sa’o e tusa lava po o le malamalama po o le pouliuli.

O ai le tagata o le a ia liliu ese ma lafoai na avanoa ua lagolagoina i totonu o le talalelei ua tatou mauaina? I totonu o le talalelei, e i ai le faamalieina, e i ai se oliolisaga, e i ai le faatumauina, e i ai se nofoaga e malōlō ai, e i ai se faavae mausalī e fausia ai, ma i luga iinā, e tuuina atu ai mea ua faamoemoeina mai ia i tatou.¹⁵

Ia aua lava ne’i o tatou faatagaina o tatou avanoa e faavaivaia ai; ia faafouina lava i o tatou luma i le ao ma le po, ma ou te faamautinoa atu ia te outou, afai o le a tatou faia faapea, o lo tatou tuputupu a’e mai lea aso i lea aso, ma mai lea tausaga i lea tausaga, o le a matagofie.¹⁶

O loo tatou taumafai uma lava mo le mamalu faaselesitila, ma o le maoa’e o avanoa ua i o tatou luma, e lē mafai ona faamatalaina i gagana a tagata soifua. Afai o le a outou tumau i le faamaoni i le galuega ua outou auai ai, o le a outou mauaina lenei mamalu, ma olioli e faavavau i le afioaga o le Atua ma le Tamai Mamoe. O le mea lenei e taua le tausiniō i ai; e taua le ositaulaga ia maua, ma amuia le alii po o le tamaitai, o lē faamaoni seia oo ina maua.¹⁷ [Tagai fautuaga 3 i le itulau 97.]

Fautuaga mo Suesuega ma le Aoaoina Atu

Mafaufau i manatu nei, a o e su’esu’eina le mataupu, pe, a o e sauni e a’oa’o atu. Mo nisi fesoasoaniga, tagai i itulau v–vii.

Sa masani ona a’oa’o mai Peresitene Lorenzo Snow faapea o tatou o fanau a le Atua (itulau 90–92). E faapefea ona uunaia e lenei upumoni o tatou lagona e uiga ia i tatou lava ma isi? E mafai faapefea ona tatou fesoasoani i fanau ma le autalavou e manatua o i latou o atalii ma afafine o le Atua?
O a ni ou manatu e uiga i mau sa sii mai e Peresitene Snow, e a’oa’o atu ai e uiga i lo tatou agavaa paia? (Tagai itulau 92–95.)
Faitau le vaega o loo amata i le itulau 95. E mafai faapefea e “popolega ma tigā o le olaga” ona taitaiina atu tatou e faagalo faamanuiaga e faavavau o le talalelei? O le a se mea e mafai ona tatou faia e faatumauina ai lo tatou avanoa “ia fou” ma “tumau i o tatou mafaufau i taimi uma”? O a ni auala atonu e avea ai le manatuaina o lo tatou taunuuga, ma aafiaga i le tulaga tatou te ola ai?
A o e su’esu’eina lenei mataupu, o le a se mea ua e a’oa’oina e uiga i lou Tama Faalelagi? O le a se mea ua e a’oa’oina e uiga i lou taunuuga, i le avea ai o se afafine po o se atalii o le Atua?

Mau Talafeagai: Roma 8:16–17; 1 Korinito 2:9–10; Alema 5:15–16; Moronae 7:48; MF&F 58:3–4; 78:17–22; 132:19–24

Fesoasoaniga mo le Aoao Atu: “Ia molimau atu, i soo se taimi lava e uunaia ai oe e le Agaga e tuuina atu, e le na o le faaiuga o lesona taitasi. Ia tuuina atu avanoa mo i latou tou te a’oa’oina e tuuina atu ai a latou molimau” (O Le A’oa’o Atu, E leai se isi Valaauga e Sili Ai, 45).

“O se fiafiaga sili le talanoa atu e uiga i mea silisili ua folafola mai e le Atua e tuuina ifo i luga o Ona atalii ma afafine.”

A tatou su’esu’e i tusitusiga paia, tatou te iloa ai lo tatou natura paia.

I totonu o ana tusi, na molimau ai le Aposetolo o Paulo e uiga i lo tatou agavaa e avea ai faapei o le Tama Faalelagi ma Iesu Keriso.