Mataupu 4

Faamalosia e ala i le Mana o le Agaga Paia

“Ia e filifili e ola i le lotomaualalo, ma i se auala o le a e maua ai le Agaga o le Alii e avea ma au uo.”

Mai le Soifuaga o Lorenzo Snow

I lana uluai saunoaga i se konafesi aoao, i le avea ai ma Peresitene o le Ekalesia, na aoao mai ai Peresitene Lorenzo Snow, “Tatou te faalagolago i le Agaga o le Alii e fesoasoani ia i tatou, ma faaali mai ia i tatou mai lea taimi i lea taimi mea na e taua mo i tatou ina ia ausia i tulaga ese atonu e siosiomia ai tatou.”¹ Atonu e le o toe soifua mai Peresitene Snow e tuuina atu lena faamatalaga, pe afai o le toalua o ni ana uo na le i faalagolago i le Agaga o le Alii, i se tulaga uiga ese i le 34 tausaga mulimuli ane ai.

I le 1864, na malaga ai Elders Lorenzo Snow ma Ezra T. Benson o le Korama a Aposetolo e Toasefululua, i se misiona i Motu o Hawaii. Sa faatasi ma i laua nisi faifeautalai se toatolu: o Elders Iosefa F. Samita, William Cluff, ma Alema L. Samita. Ina ua taula mamao ese lo latou vaa mai le talafatai o le motu o Maui, na tulioso tagata uma i se tamai vaa e malaga ai i le motu, vagana ai Iosefa F. Samita. A o latou latalata atu i le motu, na taia e ni galu maualuluga le vaa, ma sa le mafai ai e le avevaa ona faatonutonu le vaa. Sa sa’e le vaa, ma na lafoina tagata uma sa i totonu o le vaa i le sami. Na vave ona manu a’e i luga tagata uma, vagana ai Elder Snow. Na faanatinati atu se vaega o tagata o le motu e fesoasoani, ma aveina atu ai William Cluff ma Alema L. Samita i se vaa faaola e saili la laua uo. Na faamatala e Elder Cluff:

“O le vaega muamua o Uso Snow na ou vaaia, o lona lauulu na opeopea i luga o le sami i tafatafa o se tasi itu o le vaa na sa’e. O le taimi lava na matou aumaia ai o ia i luga o le vaa, na matou fai atu ai i le auvaa e alo faatopetope atu i le pa’umatū i le vave latou te mafaia. Na malo lona tino, ma foliga mai ua uma lona ola.

“Sa ou nofo i autafa o Uso A. L. Samita. Na ma faataatiaina Uso Snow i luga o o ma vae, ma, i lo matou agai atu i le pa’umatū, na ma faauuina ma le filemu o ia, ma ole atu i le Alii ina ia faasaoina lona soifua, ina ia mafai ona toe foi atu o ia i lona aiga.

“Ina ua taunuu i le pa’umatū, na matou si’iina o ia i ni paelo lapopo’a i luga o le faga oneone. Na matou faataatia o ia ma faaū i lalo lona ulu i luga o se tasi paelo, ma tosoina o ia agai i luma ma tua, seia faamanuiaina i lo matou aveeseina o le suasami na ia inumia …

“Ina ua mavae a matou taumafaiga laveai mo se taimi, ma le leai o se foliga mai o le a toe maua lona ola, na faapea mai tagata na tutū latalata ane, e le toe i ai se isi mea e mafai ona faia ia te ia. Ae, sa matou lē lagonaina se lagona o le fiu, ma sa tatalo ma galulue pea mo ia, ma se faamautinoaga o le a faafofogaina ma tali mai le Alii i a matou tatalo.

“Mulimuli ane, na uunaia i matou e tuu o matou gutu i luga o lona fofoga, ma fai se taumafaiga e feula atu le ea i ona māmā, e feauaua’i e feula i totonu ma aumai i fafo le ea, e tau faataitai ai i le mea matou te mafaia, le faagasologa masani o le mānava. O le mea lea na matou onosai e fai seia faamanuiaina lo matou feulaina atu o le ea i ona māmā. Ina ua mavae sina taimi, na matou vaaia ni nai faailoga iti o le toe faafoisia mai o le ola. O sina emo itiiti o le mata, lea, na o’o mai lava i lena taimi, na matala ma foliga o se tagata ua maliu, atoa ma sina gogolo itiiti o le faaī, o ulua’i faailoga ia o le toe foi o le ola. O nei uiga na faaauau pea ona tino mai, seia toe faafoisia atoatoa lona malamalama.”

I le toe tepa ai i tua i lenei mea na tupu, na iloa ai e Elder William Cluff ma Elder Alema L. Samita le mafuaaga na mafai ai ona laua faasaoina le soifua o Elder Snow. “E le gata sa ma faia le mea e masani ona faia i ituaiga tulaga faapea,” na ia saunoa ai, “ae faapea foi le mea na foliga mai na musuia ai ma’ua e le Agaga.”² [Tagai fautuaga 1 i le itulau 86.]

Aoaoga a Lorenzo Snow

E ala i le meaalofa a le Agaga Paia, ua taitaiina ai i tatou i le upu moni uma ma faamalolosia i lo tatou faatuatua.

E [i ai] se faamanuiaga faapitoa e fesootai ma le na o le usiusitai i le talalelei, o le meaalofa [lena] o le Agaga Paia. … O le Faaola, o lē, e le taumateina, le sili o lona silafia e uiga i le natura ma le uiga o lenei meaalofa, na fetalai mai e tatau ona taitai atu ai i latou o e taliaina le meaalofa i le upu moni uma, ma faasino atu ia i latou mea uma o le a o’o mai [tagai Ioane 16:13]. O le meaalofa o le Agaga Paia, e tatau ona sili atu nai lo lena agaga, lea e sau mai le Atua, ma faatumulia ai le atulaulau uma ma faamalamalamaina ai tagata taitasi e o mai i le lalolagi [tagai MF&F 84:46]; o le meaalofa o le Agaga Paia e tatau ona taitai atu ai i le upu moni uma, ma faasino i latou i mea o le a o’o mai.

E le gata i lea, i le saunoa ai e uiga i ona aafiaga, na faapea mai ai le Aposetolo o Paulo: “Ua foaiina taitasi i tagata le faaaliga o le Agaga e aoga ai. E i le tasi le taofi tonu.” [Tagai i le 1 Korinito 12:7, 9.] E le o se faatuatua masani ma taatele, lea e faafoliga ai nisi tagata i aso nei; ae o le faatuatua lea e mafai ai e i latou ua mauaina lenei faatuatua malosi ina ia vaevaeesea i ili, ina ia lafoina i lua o leona, o ogaumu aasa, ma faatigaina i tiga e le mafaamatalaina. O le ituaiga faatuatua lenei, na faae’e ifo e le Agaga Paia i luga o e mauaina, e mafai ai e i latou ua mauaina, ona tu i le totonugalemū o faigata taitasi, faaleaogaina ai tetee taitasi ma tuuina atu ai lona lava soifua, pe a tatau ai, mo le galuega ua ia taliaina. Sa i ai se mana musuia silisili ese i lenei faatuatua, ua tuuina mai e le Alii e ala i le Agaga Paia, lea e leai se isi mataupu faavae e mafai ona tuuina mai. Ua tuuina mai i le tasi le upu o le poto, i le tasi le upu o le malamalama [tagai 1 Korinito12:8], e le o le poto lea e maua mai i le na o le faitauina o tusi, ae o le malamalama mai le Silisili Ese. O se mataupu faavae musuia faale-tagata lava ia na i o latou luga, lea e mafai ona pa’i atu i ai, na tuuina atu ai le malamalama o le galuega na latou taliaina. Sa latou iloaina e ala i faaaliga mai le Atua e faapea o le galuega na latou usitaia e moni, na faaali atu ia i latou i se auala na le mafai ona latou teena, ma na latou iloaina mo i latou lava. O lea na faavaeina ai i latou … i luga o le papa o faaaliga.³

Na fai atu Peteru a o talai atu i tagata: “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala, ona maua lea e outou o le mea foai fua mai, o le Agaga Paia lea. Auā o ia te outou ma a outou fanau le mea ua folafolaina mai, atoa ma e o mamao uma lava, o i latou uma e valaauina e le Alii lo tatou Atua.” [Galuega 2:38–39.] O lenei meaalofa o le Agaga Paia, o se mataupu faavae ese mai soo se isi mea ua tatou vaai ua faaali mai i le lalolagi faalelotu. O se mataupu faavae o le malamalama, ma faaaliga. O se mataupu faavae e faaalia ai mea ua tuanai, taimi nei ma mea e o’o mai, ma o nei meaalofa a le Agaga Paia, e tatau ona maua e ala i le usiusitai i tulaga tatau ai o le talalelei, e pei ona sa folafolaina mai i aso na, ma faapea ona folafolaina mai e toeaina o le Ekalesia a Iesu Keriso o le Au Paia o Aso e Gata Ai i nei aso. O luga o lenei papa na faavaeina ai lo latou faatuatua; mai lenei nofoaga e tatau ona latou mauaina ai se malamalama o le mataupu autu na latou taliaina, ma ua tau mai ia i tatou e le Faaola “ma o le a lē manumalo faitotoa o seoli e faasaga ia te i latou.” [Tagai 3 Nifae 11:39.] ….

… O le faavae lena ua fausia ai le Ekalesia a Iesu Keriso o le Au Paia o Aso e Gata Ai, o le papa o faaaliga—i luga o le papa lea na fetalai Iesu o le a Ia fausiaina ai Lana ekalesia, e le mafaia foi e faitotoa o seoli ona manumalo i ai [tagai Mataio 16:17–18]. Tatou te le i mauaina lenei malamalama e ala i le aano ma le toto, tatou te le i mauaina lenei molimau mai tagata, tatou te le i mauaina e ala i le faitau o le Tusi Paia … po o le Tusi a Mamona, ae ua tatou mauaina e ala i le galuega a le Agaga Paia, lea e aoao mai e uiga i mea a le Atua, mea ua tuanai, taimi nei, ma mea o le a o’o mai, ma o lena taliaina o mea a le Atua, ua manino le faaali mai ia i tatou. E le mafai ona e aveesea lenei malamalama mai ia i matou e ala i le faafalepuipuiina, po o soo se ituaiga o sauaga. O le a matou tumau ai e o’o i le oti.⁴ [Tagai fautuaga 2 i le itulau 86.]

E mafai e tagata taitasi o le Au Paia o Aso e Gata Ai ona avea le Agaga Paia o sana uo e maua mai ai fautuaga.

E i ai se auala e mafai ai e tagata ona faatumauina o latou lotofuatiaifo i le manino i luma o le Atua ma tagata, o lena mea o le faatumauina lea i totonu o i latou o le Agaga o le Atua, o le agaga lea o faaaliga i alii ma tamaitai taitasi. O le a faaali atu ia i latou, e o’o lava i mea sili ona faigofie, le mea e tatau ona latou faia, e ala i le tuuina atu o fautuaga ia i latou. E tatau ona tatou taumafai e aoaoina le natura o le Agaga, ina ia mafai ai ona tatou malamalama i ana fautuaga, ma o le a mafai ai ona tatou faia le mea sa’o i taimi uma. O le avanoa sili lea mo Au Paia o Aso e Gata Ai taitasi. Ua tatou iloaina, o la tatou aia tatau le mauaina o faaaliga a le Agaga i o tatou olaga i aso taitasi.

E o mai tagata ia te a’u ma le naunautai ia maua se fautuaga i se mataupu po o se isi mea. E le manaomia lo latou o mai soo ia te a’u (i nisi tulaga, e moni lava, atonu e matuā alagatatau), aua o le Agaga ua i totonu ia i latou e aumai ai le lelei ma faataunuuina faamoemoega o le Atua. … E le o se mea tatau lo latou o mai i taimi uma i le Peresitene o le Ekalesia, po o le Toasefululua, pe o le o i Toeaina o Isaraelu, ina ia maua ai fautuaga, e mafai lava e i latou ona mauaina mo i latou, o loo i ai se uo e silafia lelei le mea e ta’u atu ia i latou. Mai le taimi tatou te taliaina ai le Talalelei, ma o ifo i totonu o le vai o le papatisoga, ma faae’e mai lima i o tatou luga mulimuli ane, mo le meaalofa a le Agaga Paia, ua tatou maua se uo, pe afai tatou te le tuli esea faamalosi o ia mai ia i tatou e ala i le faia o mea sesē. O lena uo o le Agaga Paia, lea e taliaina mea a le Atua, ma faasino mai ia i tatou. O le auala sili lenei ua tuuina mai e le Alii mo i tatou, ina ia tatou iloa le malamalama, ma lē faamalieina ai pea lava i le pogisa.⁵ [Tagai fautuaga 5 i le itulau 86.]

O le Agaga Paia e mafai ona aumai ai ia i tatou le fiafia ma le filemu o le mafaufau.

Ua faatutuina e le Alii manaoga ma lagona faale-natura patino i o tatou fatafata, ma e faapena i tagata ola uma, i le aiga uma o le tagata. E i ai manaoga ma agavaa patino mo le fiafia ua totoina ma lalagaina i o latou tagata, manaoga mo mea patino na e tusa ma lo latou natura, ua fuafuaina e siitia ai lo tatou filemu ma le soifua manuia, lea e taliina o latou lagona ma siitia lo latou fiafia, ae pe faapefea ona latou mauaina le faamalieina o na agavaa ma manaoga [e lē] manao le lalolagi latou te iloa, pe malamalama ai, ae ua silafia e le Alii le talafeagai ina ia tuu ai tatou i le tulaga, ma i le ala o le malamalama o na mea, e ala i le faatuatua ma le savavali i le malamalama o le Agaga Paia ma le mauaina o le upu moni.⁶

O le avanoa paia o le Au Paia o Aso e Gata Ai le ola i le Talalelei, i se auala latou te lagonaina ai le taliaina o i latou e le Atua. E moni, tatou te faia mea i nisi taimi, lea tatou te matamumuli ai pe a tatou mafaufau lelei i ai, ae tatou te salamo i na mea i o tatou loto ma naunau e le toe faia lava na sesē. Na o le pau lena o le mea ua finagalo le Alii tatou te faia; ma o alii ma tamaitai ua faapea ona soifua ai, o le a ola e aunoa ma le ta’usalaina. Latou te maua le amiotonu ma le olioli i le Agaga Paia.⁷

Afai tatou te faatumauina le malamalama o le Agaga i totonu ia i tatou, e mafai ona tatou savavali ai faapena i le talalelei, ma e mafai ona tatou maua ai le olioli ma le fiafia e le mafaatusalia i lenei lalolagi; ma, a o tatou malaga agai atu i luma, ma filigā mo le filemu ma le fiafia o loo i ai i o tatou ala, i luma teisi atu, o le a tatou maua se filemu o le mafaufau, lea e lē mauaina lava e se tasi, ae na o i latou o e ua faatumulia e le Agaga Paia.⁸ [Tagai fautuaga 3 i le itulau 86.]

Tatou te manaomia le fesoasoani a le Agaga Paia, a o tatou feagai ma tofotofoga, faataunuuina o o tatou tiute, ma saunia mo le mamalu faaselesitila.

E tele mea taua ua manaomia mai ia i tatou, ma e tele mea e mafai ona tatou faia, pe a fesoasoani mai le Agaga o le Alii, lea atonu i nisi taimi e foliga mai e toetoe lava a lē mafai ona ausiaina.⁹

Ou te manao e faamanatu i o’u uso ma tuafafine … e tatou te faalagolago i le Agaga o le Atua mo faamatalaga ma le malamalama, lea atonu o loo i totonu o i tatou, afai e lelei ona faafaileleina, o se agaga o le musumusuga, o faaaliga, ina ia faaalia manino i lo tatou malamalama, le mafaufau ma le finagalo o le Atua, i le aoaoina o o tatou tiute ma matafaioi, faatasi ma mea ua manaomia mai ia i tatou. … Tatou te manaomia le fesoasoaniga. Tatou te ono faia mea na e taitaiina atu ai tatou i le faaletonu ma le pogisā, ma mea na e le maua ai so tatou lelei, ae, faatasi ma le fesoasoaniga a lena Agaga lea na folafola mai e le Alii i Lana Au Paia, afai tatou te faalogo atu ma le faaeteete i ana musumusuga, ma malamalama i le natura o lana gagana, o le a mafai ona tatou aloese mai faafitauli ma faigata matuiā.¹⁰

Tatou te faalagolago atoatoa atu i le agaga o musumusuga, ma, afai na i ai se isi taimi muamua, amata mai le taimi na i ai Atamu i le Faatoaga o Etena, na sili ai ona manaomia le Agaga o le Atua, nai lo le taimi nei, ou te lē iloaina lena taimi. O faailoga o taimi, ma le o’o mai faatopetope o mea tutupu lea o le a tofotofoina loto o le Au Paia o Aso e Gata Ai ma lo latou faamaoni, poloa’i ina ia tatou matuā sailia i le taimineile Agaga o le Atua, ma le fesoasoaniga paia, aua o le a mautinoa le manaomia i vaaiga ia ua o’o mai faatopetope i le taimi nei. Ua tatou iloa na tatou manaomiaina i le taimi ua tuanai. E faigofie ona tatou vaaia, e faapea ana lē ia i tatou le Agaga o le Atua, e taitaiina i tatou i le tele o vaaiga lea na tatou pasiaina, atonu tatou te le mauaina le olioliga o o tatou faamoemoega ma mamalu i le taimi nei, ma o o tatou tulaga atonu o le a itiiti so latou tulaga lelei. Ma, afai sa tatou manaomiaina le Agaga Paia i le taimi ua tuanai, atonu tatou te matuā malamalama o le a manaomia foi i le lumanai.¹¹

E tatau ona tatou malamalama—ma ou te talitonu ua tele ina tatou faia—faapea o le galuega ua tatou o mai i lenei olaga e faataunuu, e le mafai ona faia mo le mamalu o le Atua, po o le faamalieina o i tatou lava, e ala i le na o lo tatou lava poto faalenatura. Tatou te faalagolago i le Agaga o le Alii e fesoasoani ia i tatou, ma faaali mai ia i tatou, mai lea taimi i lea taimi, le mea ua tatou manaomia e faataunuu ai, i lalo o tulaga ese atonu e siomia ai tatou.¹²

Atonu o se tulaga faavalevalea lava le faamoemoeina o le Au Paia o Aso e Gata Ai i nei aso, e faaogatusa ma le tulafono faaselesitila, ma le tulafono mai le Atua, ma ana mamanu e siitia ai tagata i lona afioaga, vagana ua lagolagoina e se mana ofoofogia [faalelagi]. Ua folafola mai e le talalelei lenei mea. Ua folafola mai le meaalofa o le Agaga Paia, lea e paia i lona uiga, ma e le maua e se isi lava ituaiga o tagata, ma lea na ta’uina mai ia i tatou e le Faaola, e tatau ona taitaiina atu i upu moni uma, ma musuia i latou o e mauaina, ma tuuina atu ia i latou le malamalama o Iesu, o se malamalama o le Tama, ma mea e faatatau i le lalolagi selesitila; lea e tatau ona musuia i latou o e mauaina faatasi ma le malamalama o mea e o’o mai, ma mea ua tuanai, ma musuia i latou e o’o i se tulaga e tatau ona olioli ai i meaalofa faalelagi—le meaalofa o gagana ma valoaga, e faae’e ai lima i luga o e mama’i lea e faamaloloina ai i latou.

O i latou ua taliaina lenei talalelei sa folafola atu i ai nei mana faalelagi ma meaalofa, ma se malamalama mo i latou lava, ina ia aua ne’i faalagolago ai i se isi tagata, po o vaega o tagata, e tusa ma le upu moni o le tapuaiga ua latou mauaina, ae tatau ona latou mauaina se malamalama mai le Tama e faapea o le tapuaiga na sau mai ia te Ia, faapea o le talalelei na sau mai ia te Ia, ma o Lana auauna sa i ai le aia tatau ma le pule e faataunuu ai na sauniga, ina ia leai se matagi o mataupu e luluina ai i latou pe aveesea mai i latou mai le ala na latou savalia; ina ia latou saunia mo le mamalu e ao ona faaalia mai, ma ia avea ma sui auai i le mamalu; ina ia mafai ona latou manumalo i soo se tofotofoga po o se faigata, e tatau ona avea ma finagalo o le Atua ina o’o mai i o latou luga, ina ia saunia atoatoa i latou mo le mamalu faaselesitila; ina ia aua ne’i o latou savavali i le pouliuli, a o le malamalama ma le mana o le Atua, ma ia siitia i luga a’e o mea a le lalolagi, ma sili atu nai lo mea ua siomia ai i latou, ina ia latou savavali i latou lava i lalo ifo o le lalolagi faaselesitila, ma, i le silafaga a le Atua ma le lagi, e pei o tagata saoloto, i le tulituliloaina o lena auala e tatau ona faailogaina atu mo i latou e le Agaga Paia, le auala lena e mafai ai ona latou siitiaina i latou lava i le malamalama ma le mana, ma faapea ona saunia ai i latou lava e mauaina le mamalu ua folafola mai e le Atua e faae’eina i o latou luga, ma faatumuina ai le tulaga faaeaina lea ua saunia e le Atua e siitia i ai i latou.¹³

E tatau ona faapea ona tatou ola ai, ina ia tatou iloa e talia e le Atua lo tatou ala e ola ai. E tatau ona tatou malamalama i le siufofoga ma musumusuga a le Agaga Paia. I le aso, pe a lē punitia ai le lagi e ao, tatou te vaaia ai mea o loo siosiomia i tatou, o lo latou matagofie ma le faamoemoega. E faapena lo tatou faalagolago i le Agaga o le Atua mo le malamalama e uiga i mataupu faavae o le upu moni ma le faaolataga. E leai se tagata e faapea mai o ia o se Au Paia o Aso e Gata Ai, e mafai ona olioli i sina tikeri sili o le fiafia seia vagana ua ola ai faapea, ma faapea ona tuuina ia lava i lalo o le taitaiga mamana.¹⁴ [Tagai fautuaga 4 i le itulau 86.]

Pe a tatou ola i le lotomaualalo, e fesoasoani mai le Agaga Paia i lo tatou ala agai i luma.

Ia filifili nei loa e ola lotomaualalo, ma i se auala o le a e mauaina ai le Agaga o le Alii i taimi uma e avea ma au uo, e tuuina atu na fautuaga ia te oe mai lea taimi i lea taimi, e pei ona manaomia ai i tulaga ese o le a e o’o i ai. …

… Pe o le a le umi e mafai ona ou ola ai, ou te le iloaina se mea e tasi i ai, ma ou te le popole lava i ai. Ae, ou te mana’o, ma o se mea e tatau ona e mana’o i ai, ina ia maua lena lotomaualalo, ma lena agamalu, ma lena agamalu e olioli ai i le agaga o faaaliga. O lou avanoa, outou taitoatasi uma, ina ia mauaina le agaga o faaaliga e iloa moni ai le mea e tatau mo oe ona faia. O lou avanoa, ina ia mauaina, e pei lava ona avea ma o’u avanoa ia iloa le mea e faia a taeao, pe a o’o mai taeao, mo le mea sili ona lelei mo le Ekalesia aoao.¹⁵

E tatau ona tatou taumafai, i le mea e gata ai lo tatou mafai, e faagalo mea faalelalolagi uma e faanoanoa ma atuatuvale ai i tatou, ma taula’i atu o tatou mafaufau i le Alii, ina ia lava Lona Agaga Paia lea atonu e mafai ona mauaina ai lena malamalama ma fautuaga e pei ona o le a fesoasoani ia i tatou i lo tatou ala agai i luma.¹⁶ [Tagai fautuaga 5 o loo i lalo.]

Fautuaga mo Suesuega ma le Aoaoina Atu

Mafaufau i manatu nei, a o e su’esu’eina le mataupu, pe a o e sauni e a’oa’o atu. Mo nisi fesoasoaniga, tagai i itulau v–vii.

A o e iloiloina le tala o loo i itulau 75–77, manatunatu i taimi na faamanuiaina ai oe, ona na mulimuli se tasi tagata i uunaiga a le Agaga Paia. Ia mafaufau foi, i taimi na e mulimuli ai i se uunaiga e fesoasoani i se isi tagata.
Faitau le vaega o loo amata i le itulau 79. O le a sou manatu i le uiga o le “faatuina … i luga o le papa o faaaliga”? (Mo nisi o faataitaiga, tagai i itulau 78–81.) E faapefea ona tuuina mai ia i tatou e faaaliga faaletagata lava ia, le malosi e “tu ai i le totonugalemu o faigata taitasi” ma “teena mea faafeagai taitasi”?
Na saunoa mai Peresitene Snow o le Agaga Paia e mafai ona fesoasoani ia i tatou “e olioli i le filemu ma le fiafia i lenei lalolagi” (itulau 82). O le a se taimi na fesoasoani ai le Agaga Paia ia te oe ia lagona le fiafia ma le filemu? O a nisi auala e mafai ai e le Agaga Paia ona fesoasoani ia i tatou? (Mo nisi o faataitaiga, tagai i itulau 83–85.)
A o e su’esu’eina le vaega o loo amata i le itulau 83, manatunatu e uiga i le auala na e a’oa’oina ai ia iloa uunaiga mai le Agaga Paia. Faamata e faapefea ona e fesoasoani i se tagata o le aiga, po o se uo, e a’oa’o e iloa uunaiga a le Agaga?
O lenei mataupu ua aofia ai vaega e lua ua taua ai le Agaga Paia o se uo (itulau 81 ma le 85). Aisea e te manatu ai tatou te manaomia le lotomaualalo ma le manino ina ia avea ai le Agaga Paia o sa tatou uo?

Mau Talafeagai: Luka 12:12; Ioane 14:26–27; Romans 14:17; 1 Korinito 12:4–11; Kalatia 5:22–25; 1 Nifae 10:17–19; 2 Nifae 32:5

Fesoasoaniga mo le Aoao Atu: “Ina ia uunaia le talanoaga, faaaoga fesili o loo i totonu o mataupu taitasi. … Atonu foi e mafai ona e faia a oe lava fesili, aemaise lava mo i latou o loo e aoaoina” (mai le itulau vi o lenei tusi).

O ulua’i galuega faafaifeautalai i Motu o Hawaii

A o auauna atu Lorenzo Snow i se misiona i Motu o Hawaii, na faasaoina lona soifua e ala i le taitaiga musuia a ana soa.

“O la tatou aia tatau le mauaina o faaaliga a le Agaga i aso taitasi o o tatou olaga.”