Mataupu 18

O Le Taitaiga ma Auaunaga Lē Faapito i le Ekalesia

“O i matou o a outou auauna i le Alii, ma ua naunau mo lo outou manuia ma le manuia o tagata uma.”

Mai le Soifuaga o Lorenzo Snow

Mai ia Oketopa 1840 e o’o ia Ianuari 1843, sa pulefaamalumalu ai Lorenzo Snow i le Ekalesia i Lonetona, Egelani, ma nofoaga lata ane. Sa ia vaaia ai taitai perisitua iina, o nisi taimi sa aoaoina ai i latou faafesagai, ma o nisi taimi e ala i le tusia o tusi e ofo atu ai fautuaga. Ina ua toeitiiti mae’a lana misiona i Egelani, sa ia tusi atu ai i le toalua o “Toeaina Pulefaamalumalu o Paranesi i Lonetona,” o e sa auauna e pei ona faia e peresitene o paranesi i aso nei. I lana tusi, sa ia tauina atu ai se mea na tupu ia i laua ma se tasi o taitai o se paranesi i lea eria.

Sa faamatalaina e Elder Snow lenei taitai faapea e leai ni ona “sese i le vaai atu i fafo.” O le alii sa “galue malosi e faataunuu le misiona a le Ekalesia” ma sa i ai le agavaa e faamautinoa ai “ua i ai tagata taitasi i o latou tulaga, ma faia lona tiute.” Sa filigā, ma “auauna i le galuega ia lava ma le maelega sili atu nai lo i latou uma.” Ae ui i le foliga mai ai i fafo o le faatuatua o lenei alii, sa faifai pea le i ai o faafitauli i le paranesi na foliga mai e taulai atu ia te ia. Sa taumafai Elder Snow mo se taimi e saili le mafuaaga o faafitauli, ma sa ia aoaiina lemu tagata o le paranesi mo le lē lagolagoina o lo latou taitai. Ona amata lea ona ia tuufesili, pe le o le taitai “atonu o i ai ia te ia ni nai mea lilo, se uiga i totonu, [sa] ia le iloaina, lea [sa] le i faaalia mai i fafo” ae o lena mea, na taitaiina atu ai i faigata i totonu o le paranesi. Sa toe manatua ai e Elder Snow:

“Sa ou tatalo e tusa ai, ina ia tuuina mai e le Alii ia te a’u se agaga e iloatino ai le mea o loo tupu. Sa tali mai la’u tatalo; sa ou iloaina ua i ai i le uso se uiga tau le iloa, o se agaga natia o le faamamaluina o ia lava, lea ua taitaiina ai le tele o ana gaoioiga. E na te auina atu se uso e faataunuu se tofiga, ae i ai lona manao lilo ina ia maua e ia le mamalu; afai e le faataunuuina le tofiga, ona ia aoaiina lea o le tagata ua sesē, e lē faapea ona ua le faia le galuega a le Alii, pe ona ua lē mauaina e le uso se faamanuiaga, ae ona ua ia le fiafia tele, i le lē usitaia o lana faatonuga. I [se] taimi na papatisoina ai se vaega o tagata e se uso, sa olioli lona loto, e le faapea ona ua aumaia tagata i totonu o le feagaiga, ae ona ua faia lea tulaga i lalo o lana vaavaaiga, ma le manaonao faalilolilo e leai se isi tagata e mauaina se mamalu vagana ua faapipii atu i ai ma lona igoa.”

Sa matauina e Elder Snow faapea, pe a faamanuiaina se tagata o le paranesi i le faatinoina o se galuega, ae sa le i mulimulitaia le fautuaga a le taitai i vaega taitasi, o le a i ai i le taitai “se uiga o le lotoleaga … e natia i tua atu o le faamaoniga sa faaleoina.” Sa ia faaauau faapea: “O lenei uiga sa natiaina; o ona fua sa lē mafai ona vaaia, ae, o le a i ai pe afai e le faasa’oina, o se uiga i totonu faatiapolo lea o le a faatamaia ai lona tulaga aogā. Sa aumaia ai i ona luga faafitauli lē manaomia, a o faatinoina e ia lona valaauga; ma faapena ona avea ma puna o mea le lelei i lona lava mafaufau. E naunau ai e faaalualu i luma le galuega a le Atua, ae i se auala e faaalia ai o ia lava i taimi uma. Sa filigā e tuuina atu faatonuga lelei, peitai, sa faaeteete ina ia tuu ai lona igoa atoa i mea uma.”

Sa le i tusia e Elder Snow lenei tusi e faitioina ai le taitai i le lotoifale. O lona faamoemoega na tusi atu ai, o le fesoasoani lea i isi taitai—ina ia mafai ai ona “vaaia, iloa, ma aveesea” le uiga faamaualuga na ia faamatalaina mai ia i latou. Sa ia lapataiaina faapea e toatele tagata “o e talitonu ma le loto atoa ia i latou lava ua saoloto mai lenei uiga o le sailia o lona lava mamalu, o le a iloaina, pe a vaavaai toto’a i o latou faamoemoega lea na musuia i latou ia latou amioga, iloa ai ma le te’i, o le Agaga Paia lenei na uunaiina ai i latou e faatino le tele o a latou gaoioiga.”

I le faasoaina atu ai o lenei lapataiga, sa ia fautua mai ai: “Ina ia avea faapei ona finagalo ai le Atua mo tatou, e ao ona faamasani o tatou mafaufau e fiafia i le vaai atu ua faamanuiaina isi e pei foi o tatou; ia fiafia i le vaai atu i le galuega a Siona ua siitia i luga, e ala i soo se auala e finagalo ai le Atua; ma aua le faatagaina le lotoleaga e o’o mai i o tatou loto pe a maua e se tagata e vaivai atu nai lo tatou le mamalu sili atu; ia fiafia e faalauteleina se tofi maualalo ifo seia valaauina i se tofiga maualuga atu; ia fiafia i le faia o mea laiti ma aua le manao e maua le mamalu mo le faia o mea silisili.” Sa ia faatusaina le Ekalesia i se fale tele, faatasi ma tagata taitoatasi o le Au Paia, o vaega o lena fale, i le faapea mai ai e le tatau ona tatou “lagonaina le faamaualuga tele lea e faigata ai i nisi taimi ona tipi i lalo, faatusaliaina, tinaina, ma faalamolemole ina ia fetaui ai i tulaga e ao ona tatou faatumuina i le fale faaleagaga.”

Sa faaiuina e Elder Snow le tusi i upu nei: “Pe a na o le saili atu o se toeaina pulefaamalumalu ia avea ma tagata e pei o le a avea ai, ma tatau ona avea ai, aveeseina mai ia te ia aoaoga faavae o le manatu faapito, ma galue i taimi uma mo le lelei o ona tagata, ma lotomaulalo, ma le saili e faia mea e tele i sina taimi itiiti, pe avea ma tagata sili e aunoa ma le tuputupu ae, o le a lē mafai lava ona lē lelei lona faalauteleina o lona valaauga ma le tatau, pe faapea, o le a lē mauaina lava le mana o le Atua e faataunuuina ai Ona faamoemoega poto.”¹ [Tagai fautuaga 1 i le itulau 240.]

Aoaoga a Lorenzo Snow

Ua tuuina mai e le Alii i taitai o Lana Ekalesia se tiutetauave paia: “Fafaga i A’u Mamoe.”

Ia taitasi le tagata, o lē ua umia se tofiga faapitoa, lea ua tuuina mai i ai e le Atua lana perisitua paia ma mamalu, ona manatunatu i le mea na fetalai ai le Faaola i Aposetolo e Toasefululua, a o le i afio o Ia i le afioaga o Lona Tama—“Fafaga i A’u Mamoe.” [Ioane 21:16–17.] Ma sa Ia faaauau ona fetalai atu i lenei mataupu seia o’o ina lagona e ana aposetolo le faanoanoa ona o le faaauau pea ona ia talanoa atu ia i latou i lenei tulaga. Peitai, na Ia fetalai—“Fafaga i A’u Mamoe.” O le uiga o lena mea, “Ia o atu ma o outou loto atoa, ia tuutō atoatoa atu i La’u galuega. O nei tagata oi le lalolagi o o’u uso ma tuafafine. Ou te matuā lagonaina le alofa mo i latou. Ia tausi i lo’u nuu. Fafaga i La’u lafu. Ia o atu ma talai le talalelei. O le a ou tauia outou mo a outou osigataulaga uma. Aua ne’i outou manatu e mafai ona outou faia se osigataulaga silisili i le faataunuuina o lenei galuega.” Sa Ia valaau ia i latou i se auala malosi ma le loto atoa e faia lenei galuega. Ma, o lenei, ou te valaau atu ia i latou uma ua umia lenei perisitua, le au pulefaamalumalu o [l]e siteki, ma Epikopo, ma le Aufono a Fautua Maualuga, ina ia o atu ma fafaga le lafu. Ia vaavaaia lelei i latou. … Galulue mo i latou, ma aua nei gata o outou manatu ma lagona i o outou lava manaoga ma mamalu faaletagata. Ona tuuina mai ai lea e le Atua ia te outou o lea faaaliga ma lea faaaliga, o lea musumusuga ma lea musumusuga, ma aoao outou i auala e maua ai faamanuiaga mo le Au Paia i mea tau lo latou manuia faaletino ma faaleagaga.² [Tagai fautuaga 2 i le itulau 240.]

O taitai ma faiaoga ua valaauina e mulimuli i le faataitaiga a le Faaola ma auauna atu ma le alofa, ae lē ina ia faamamaluina ai i latou lava.

Aisea e valaauina ai [se] alii e galue o se peresitene o se nuu? Pe ina ia maua ai se malosiaga, ona faaaogaina lea o lena malosiaga mo lona lava viiga? E leai, ae i le isi itu, ua valaauina o ia e galue i se tofiga lea e ogatasi ma le aoaoga faavae, lea e pei ona sa faia e le Alo o le Atua ina ua tuuina atu le perisitua ia te Ia, e tatau ai ona Ia faia osigataulaga. Mo ia lava? E leai, ae mo le manuia o tagata lea ua ia pulefaamalumalu ai. Pe o le a manaomia ea le ofoina atu o ia lava i luga o le satauro e pei ona sa faia e le Faaola? E leai, ae ia avea ma auauna mo ona uso, e lē o lo latou matai, ae ia galue mo lo latou lelei ma le manuia. E lē ina ia faaaoga ai le malosiaga ua ia maua e faamanuia ai ia lava, o lona aiga ma auaiga ma ana uo, ae ia manatu i tagata uma o ona uso, ua i ai aia tatau tutusa faapei o ia, ma, o le mea lena, e saili ai e faamanuia ma aogā tutusa ai mo tagata uma, e tusa ma taleni ma le agavaa ua latou mauaina, ma faapea ai ona atiina ae i totonu ia te ia lava lena lagona faatamā, lea e i ai i taimi uma i le finagalo o le Tama. …

… Ia mafaufau i latou, o ē o loo talai atu i [le] Au Paia, i le mafuaaga na tuuina atu ai le perisitua ia i latou; ia latou iloa ma malamalama atoatoa i le mafuaaga na tofia ai i latou e faatumuina lea tofiga ma lea tofiga, i le faatatau atu la i ai, e tatau ona latou galulue i le agaga o lo tatou Matai, o se auauna mo tagata uma, ina ia latou aoao e mafaufau ma faaeaina i le agaga alofa e tasi, le manuia o tagata uma, e pei ona latou faia mo i latou lava. … Ona mafai lea ona latou maua le agaga o poloaiga sili e lua, lea na fetalai ai le Faaola, “ua autu ai le tulafono uma ma le au perofeta,” lea ua faaigoaina, o le alofa i le Alii ma lou loto atoa, mafaufau atoa ma le malosi atoa, ma o tatou tuaoi e pei o i tatou lava [tagai Mataio 22:37–40].³

Ia faia se tatalo a o le’i aoao atu, ma o le tatalo lenei: Ole atu i le Alii ina ia e ta’ua i lau saunoaga se mea o le a aoga ia i latou o e o loo e aoaoina. Aua le popole pe a faapea o se mea o le a faaopoopo ai lou lava mamalu, ae ia na ona teu i le mafaufau, ua valaauina oe e lauga atu i le aofia, ma o loo latou mananao e maua se mea o le a aoga ia i latou. E na o le Alii lava e mafai ona sau ai lenei mea. Aua le popole i le manatu ai faapea … o i latou o e faalogologo o le a talanoa mai i le manaia o lau tautalaga. Aua nei popole i lena tulaga, ae aveese le manatu faapito uma lea atonu o loo i lou mafaufau ina ia mafai ai ona ta’u atu e le Alii ia te oe, se mea lea o le a aoga mo tagata.⁴ [Tagai fautuaga 3 i le itulau 240–41.]

O taitai atamamai latou te talisapaia taleni a isi ma tuu atu avanoa i tagata e auauna ai.

Mai le mea moni o [se taitai] ua alofagiaina o ia lava e tagata, ma le tulaga o le iloa lelei e i latou o lona faatuatuaina ma le faamaoni, ma lona naunau e galue mo le mea e finagalo ai le Atua faapea ma tagata, naunau e fai soo se osigataulaga lea atonu e manaomia mai ia te ia, ua ia te ia lo latou talitonuga, ma o le taimi lava e i ai ai se talitonuga paia faapea, o le a la se isi mea atonu o le a ia faia e faamalieina ai manatu o tagata, lea ua tele pe itiiti, naunau ina ia alualu i luma? Ia faia e lea ituaiga tagata, le valaau atu mo se fesoasoaniga mai ona uso, o e ua sili ona agavaa, ina ia faasoa atu ia i latou ona tiutetauave. Talu ai ona o le a e iloaina, i le avea ai ma se tulaga taatele, o lena taleni ua faasoaina i tagata e toatele, ma e seāseā ona maua mai i tagata taitoatasi; ma ua na ona manaomia o se avanoa ina ia mafai ai ona atiina ae. Atonu na te faapea atu i le tasi, “O lea, Uso Tui ma Seve, ua sili atu le faigofie ona e faatinoina lenei, pe taulimaina lena tofiga nai lo a’u;” po o le, faapea atu i le isi, “O oe le tagata tonu mo lenei matagaluega;” ma faapea ai lava seia mafai ona ia aumaia faatasi taleni manaomia uma, ma, nai lo le aveeseina o le talitonuga o tagata ia te ia, o lena ituaiga o auala o le a faaopoopo atu i ai.⁵ [Tagai fautuaga 4 i le itulau 241.]

O le auala tatau e taitai ai, o le faia lea i le lotomaualalo, faataitaiga lelei, ma le tuutō atu mo le manuia o isi.

O le pule malosi e le o le pulega sao lea e taitai ai le Au Paia, ae ia saili e taitai i le agaga o le lotomaualalo, poto, ma uiga lelei, i le aoao atu ia lē tele i le upu ae o le faatinoga. E ui ina aoao se tasi ma le agaga o se agelu, peitai, o faatinoga lelei a se tasi, faataitaiga lelei, o galuega, i le faaaliga faifai pea ma le loto atoa mo le manuia o tagata, aoao atu ma le agaga, o le a sili atu ona aoga.⁶

Pe afai o le a outou faatuatua ma lotogatasi, e pei o le Au Peresitene Sili ma le Toasefululua le faatuatua ma lotogatasi, ma mulimuli mai ia i matou e pei ona matou mulimuli ia Keriso, o le a lelei mea uma mo outou. Ua matou naunau e faatino o matou tiute ma auauna i le Alii ma auauna mo le manuia o Ona tagata, ma le faataunuuina o Lana galuega. O i matou o a outou auauna i le Alii ma, matou te naunau mo lo outou manuia ma le manuia o tagata uma.

Ua lē filifilia e le Alii tagata sili ma atamamai o le lalolagi e faatino Lana galuega i luga o le fogaeleele. E le o i latou, o e ua aoaoina ma aooga lelei i kolisi ma aoga faafaifeau, ae o alii lotomaulalo ma tuutō atu i Lana galuega, o e ua ia filifilia e faatinoina mataupu o Lana Ekalesia, o alii o e naunau ina ia taitaiina ma faatonutonuina e le Agaga Paia, ma, o e i le tulaga tatau ai, latou te tuuina atu le mamalu ia te Ia, i le iloaina ai afai e na o i latou, e leai se mea latou te mafaia. E mafai ona ou faamautinoa atu ia te outou, uso e ma tuafafine, sa leai so’u manao e tauaveina le tiutetauave lea ua i o’u luga. A na mafai ona ou aloese mai ai ma le tatau ai, semanu ou te le o i ai i lenei tofiga i le taimi nei. Ou te le’i manao lava i ai, pe faapea na ou fesiligia le fesoasoani a soo se tasi o o’u uso, ina ia ou mauaina ai lenei tofiga, ae sa faaalia e le Alii ia te a’u ma o’u uso, o Lona finagalo lenei, ma e leai lava se naunauga o ia te a’u e aloese mai soo se tiutetauave, pe ou te teenaina soo se tofiga e finagalo le Alii mo a’u ou te faataunuuina.⁷

O le a ou tauivi ina ia tuuina atu atoa lo’u loto mo lo outou manuia ma le manuia o le malo o le Atua. O le a ou auauna ia te outou, i le mea e gata ai lo’u poto ma lo’u malamalama, ina ia faaalualu ai i luma o outou manaoga, e tusa ma le finagalo o le Silisili Ese. O le a ou faia lenei mea, ma o le Alii o lo’u fesoasoani lea.⁸ [Tagai fautuaga 5 o loo i lalo.]

Fautuaga mo Suesuega ma le Aoaoina Atu

Mafaufau i nei manatu, a o e suesueina le mataupu, pe, a o e sauni e aoao atu. Mo nisi fesoasoaniga, tagai i itulau v–vii.

E mafai faapefea ona aoga ia i tatou le tusi a Lorenzo Snow i taitai i Egelani (itulau 233, 234–6)? Mo se faataitaiga, faamata o le a se mea e tupu pe a ia i tatou se “uiga o le faamamaluina o i tatou lava” i o tatou valaauga i le Ekalesia? E faapefea ona tatou faalauteleina o tatou valaauga, e aunoa ma le faalauteleina o i tatou lava?
Suesue le vaega lea e amata i le itulau 236. O a auala e mafai ai e taitai ona “fafaga le lafu” a Keriso? O a ni mea ua faia e taitai o le Ekalesia e “fafagaina ai” outou? O a ni uiga faaalia o nei taitai tou te fiafia i ai?
Faitau lapataiga a Peresitene Snow e uiga i le faamamaluina o le tagata lava ia (itulau 237–8). Ona toe iloilo lea o le palakalafa atoa lona lua i le itulau 235. Aisea e tatau ai ona tatou iloiloina o tatou faamoemoega, a o tatou tuuina atu auaunaga? Mafaufau ma le tatalo i ou faamoemoega i le auauna ai i le Ekalesia.
Mafaufau loloto i le palakalafa lea e amata i le pito i lalo o le itulau 238–9. E faapefea ona aafia se uarota po o se paranesi, pe a fefaasoaa’i e taitai nisi o tiutetauave ma isi tagata o le Au Paia? O a taunuuga ua outou vaaia, ina ua galulue faatasi tagata o le Ekalesia ua i ai taleni ma agavaa eseese, agai i se sini autu e tasi?
Sa fautua mai Peresitene Snow, “O le taitaiga pule malosi, e le o le pulega talafeagai lea e taitai ai le Au Paia” (itulau 239). O a ni taunuuga atonu e ono tutupu, i le i ai o le pulega malosi i taitai o le Ekalesia? i matua? O a ni taunuuga o taitaiga lotomaualalo?

Mau Talafeagai: Mataio 6:24; 20:25–28; 23:5; Mareko 10:42–45; Ioane 13:13–17; 2 Nifae 26:29; 28:30–31; Mosaea 2:11–19; 3 Nifae 27:27; MF&F 46:7–11; 50:26; 121:34–46

Fesoasoaniga mo le Aoao Atu: “O fesili e tusi i luga o le laupapa a o lei amataina le vasega, o le a fesoasoani i le au a’oa’o e amata ai ona mafaufau i autu a o le’i amataina le lesona” (O Le Aoao Atu, E Leai Se Isi Valaauga E Sili Ai, 93).

O taitai faatuatua o le Ekalesia, e mulimuli i le apoapoaiga a le Alii ia Peteru: “Fafaga i A’u Mamoe” (Ioane 21:16–17).

“O le a e iloaina, i le avea ai ma se tulaga taatele, o lena taleni ua faasoaina i tagata e toatele, ma e seāseā ona maua mai i tagata taitoatasi.”