Mataupu 11

“Ou Te lē Sailia Lo’u lava Loto, a’o le Finagalo o le Tamā”

“E tatau ona tatou aumaia o tatou loto i lalo o le finagalo o le Tamā, ma faapea ifo, o le a le finagalo o lo tatou Tamā, o Lē ua tatou i ai i lenei lalolagi e auauna i ai? Ona avea lea o gaoioiga taitasi tatou te faatinoina ma se tulaga faamanuiaina.”

Mai le Soifuaga o Lorenzo Snow

I le aso 31 o Mati, 1899, sa malaga atu ai Peresitene Lorenzo Snow i le Brigham Young Academy (lea ua igoa nei o le Iunivesite o Polika Iaga), lea sa faapotopoto ai se vaega tele o le Au Paia o Aso e Gata Ai, e faailogaina lona aso soifua lona 85. I le taeao, sa ia tuuina atu ai se lauga i alii o le faapotopotoga, i se sauniga lotu puupuu. I lea lava foi taimi, sa faia ai se fonotaga faapena a tamaitai, sa taitaia e faletua o sui o le Au Peresitene Sili ma le Korama a Aposetolo e Toasefululua. I le aoauli, sa fono faatasi uma ai.

I le avea ai o se vaega o le fonotaga i le aoauli, e 23 tamaiti na “savavali faamalō atu i luga o le tulaga, ma faasasaga ia Peresitene Snow, usuina ni pese se lua … , ina ua mae’a, ona tuuina ai lea e tamaiti taitasi i le Peresitene se teufugalaau.” Ona sosoo ai lea ma le auaua’i taitoatasi mai o tamaiti aoga e toavalu a le Brigham Young Academy i luga o le tulaga. E tofu lava i latou ma le faalapotopotoga a le a’oga na ia sui ai, ma tuuina atu ma le faaeteete mea na saunia mo lo latou perofeta. I le tali atu ai i nei upu agaalofa ma le agaga fiafia, na saunoa atu ai Peresitene Snow:

“O lenei, uso e ma tuafafine, ua ou lē iloa nei le upu a fai atu e tusa ma nei mea uma. Ou te mana’o ou te alu atu i le fale ma manatunatu e uiga i nei mea, peitai, ou te manatu o loo faamoemoeina mai ni nai upu laiti, ma ou te manatu e tatau ona fai atu sa’u faamatalaga, ae, o le mea moni, ua ou lē iloaina le upu o le a fai atu. Peitai, ou te fia faapea atu. Ou te malamalama lelei ua outou lē faia lenei faaaloaloga mo a’u o Lorenzo Snow, ae, ona o le tofiga lea ou te sui ai i le va feagai ai ma le usoga, o o’u fesoasoani ma sui o le Korama a le Toasefululua. … Ou te lagonaina faapea, o le a lava se mea ua ou ausiaina, e lē faapea ona o Lorenzo Snow, ma mea na tutupu na aumaia ai a’u i lenei tofiga o le avea ma Peresitene o le Ekalesia—e le o Lorenzo Snow, ae o le Alii na faia. A o i ai Iesu i luga o le fogaeleele, sa Ia faia lenei faamatalaga matagofie tele; Ou te mafaufau lava i ai, ma e tula’i mai pea i lo’u mafaufau i taimi uma lava o la’u auaunaga: ‘Ou te lē mafaia ona fai o se mea e tasi, na o a’u; e faatatau la’u faamasinoga i lo’u faalogo; ua tonu lava la’u faamasinoga.’ O lenei, aisea na Ia fetalai mai ai o Lana faamasinoga ua tonu? Na ia fetalai faapea, aua ‘ou te lē usiusitai i lo’u lava loto, a o le finagalo o le Tamā, o le na auina mai a’u.’ [Tagai Ioane 5:30.] O le aoaoga faavae lena, ou uso e ma tuafafine, lea na ou saili e faataunuuina talu mai lena taimi na faaali mai ai ia te a’u faapea, o lo’u Tama oi le lagi, ma lo outou Tama oi le lagi, o loo soifua. Ua ou saili e faia Lona finagalo. …

“O le Alii ua outou faamamaluina, pe a outou faamamaluina a’u ma o’u fesoasoani ma le Korama a le Toasefululua. Ua tatou iloaina faapea mo se taimi umi talu ai, o i tatou uma taitoatasi, faapea pe a na o i tatou, tatou te lē mafaia se mea. Seiloga tatou te mulimulitaia lena aoaoga faavae, lea na mulimuli ai Iesu, a o i ai o Ia i le lalolagi, ona faamanuiaina lea o a tatou taumafaiga; ma o le a faapena foi mo outou.”¹

Aoaoga a Lorenzo Snow

Pe a tatou sailia le finagalo o le Atua, tatou te mulimulitaia se ala lea o le a lē faaletonu lava.

O loo i ai se ala lea e mafai ona tulituliloaina e alii ma tamaitai, lea o le a leai ai se faaletonu. O a lava ni tulaga lē fiafia e tula’i mai, po o ni faaletonu atonu e foliga mai e ono tutupu, o le a leai moni lava se faaletonu, i le avea ai ma se tulaga lautele. … Sa i ai taimi sa foliga mai ai ua tatou solomuli i tua; e pei ona i ai ia i latou o e sa le’i atoatoa ona faamalamalamaina e tusa ma le manatu ma le finagalo o le Atua. Sa feagai le Ekalesia ma ni mea tutupu uiga ese, ma na faia e tagata ni osigataulaga sili. … Peitai, ua tatou mafaia ona tatalia nei osigataulaga, ma, i le avea ai ma se nuu, sa le’i i ai lava se faaletonu. Aisea sa leai ai se faaletonu? Aua, o le nuu, i le avea ai ma nuu atoa, sa i ai o latou manatu tonu i aoaoga faavae moni o le olaga, ma sa latou usitaia lo latou tiute. … Sa maua e le nuu atoa le Agaga o le Alii, ma sa mulimulitaia. O le mea lena, sa leai ai se faaletonu. E mafai foi ona faapena mo tagata taitoatasi. O loo i ai se ala mo tagata taitasi ina ia tulituliloaina, lea o le a leai ai se faaletonu. O le a faatatau i mea faaletino, faapei foi o mea faaleagaga. Ua tuuina mai ia i tatou e le Alii le upu autu i totonu o nei fuaiupu na ou faitauina atu mai le tusi o Mataupu Faavae ma Feagaiga:

“Ma afai e tau-tasi o outou mata i lo’u mamalu, o le a faatumulia o outou tino atoa i le malamalama, ma o le a leai se pouliuli e ia te outou; ma o lena tino ua faatumulia i le malamalama e malamalama i mea uma. O lea, ia outou faapaia outou lava ina ia tau-tasi o outou mafaufau i le Atua.” [MF&F 88:67–68.]

O le ki lena e mafai ai e se tagata ona faamanuiaina i taimi uma. Na saunoa mai Paulo:

“Ou te tausisi atu i le faailoga, ia maua ai le taui na valaauina ai a’u mai luga e le Atua ia Keriso Iesu.” [Filipi 3:14.]

O se sini autu aupito sili e ao i tagata taitasi o le [Au Paia] o Aso e Gata Ai ona i ai i ona luma i taimi uma. O le a lena taui? … “O mea uma ua i ai i lo’u Tama o le a tuu atu ia te ia.” [MF&F 84:38.]

O le Faaola, i se tasi o tulaga, na tuuina mai se faamatalaga tulaga ese. O lo’o i le mataupu e 5 o le Evagelia a Ioane, e pei ona tuuina atu i lalo:

“Ou te lē mafaia ona fai o se mea e tasi, na o a’u.” [Ioane 5:30.]

E maeu lava le Atua, o lē na fausiaina lalolagi, o lē na afio mai i lalo nei ma faaofuina i le tino aano, faatino vavega silisili, ma ositaulagaina lona soifua i luga o le Mauga o Kalevaria mo le faaolataga o le aiga o le tagata—ma faapea ona Ia fetalai, “Ou te lē mafaia ona fai o se mea e tasi, na o a’u.” Ma Ia faaauau ai ona faapea mai:

“E faatatau la’u faamasinoga i lo’u faalogo; ua tonu lava la’u faamasinoga; aua ou te lē usiusitai i lo’u lava loto, a o le finagalo o le Tama, o le na auina mai a’u.” [Ioane 5:30.]

O se faaupuga matagofie tele lena, ma e tele sona taua. O lenei, o le mea matou te manana’o i ai, o le mauaina lea o lena agaga i gaoioiga uma taitasi o ō tatou olaga, ma soo se mea tatou te faia, pe faaletino pe faaleagaga, ma aua le manatu faapito ia te oe lava. E tatau ona tatou taumafai e faamautinoa pe faapefea ona tatou faaaogaina le tupe ma faamatalaga ua tuuina mai e le Atua ia i tatou. E faigofie le tali—mo le mamalu o le Atua. E tatau ona taulai atu la tatou vaai i le mamalu o le Atua. O le mafuaaga lena na tatou tuua ai le isi olaga, ae [o mai] i lenei. E tatau ona tatou saili e faatupulaia le fiafia o le Atua Pule Aoao, ma ia lagona e pei na sa lagonaina e Iesu, “Ou te lē mafaia ona fai o se mea e tasi, na o a’u.” I le mafai ai ona tatou faia i le asō ma taeao, o lenei vaiaso ma le vaiaso e soso’o ai, i le finagalo o le Atua, ma taulai atu la tatou vaai i Lona mamalu, o le a lē mafai ona i ai se faaletonu.² [Tagai fautuaga 1 i le itulau 166.]

A o tatou usitaia le finagalo o le Atua, e Na te tuuina mai le mana ia i tatou e faamanuiaina ai i Lana galuega.

Pe a na o i tatou, tatou te lē mafaia se mea e tasi. E pei ona fetalai Iesu: “E moni, e moni, ou te fai atu ia te outou, e lē mafai e le Atalii ona fai o se mea, na o ia lava, a o mea na te vaai atu i le Tamā o faia; o mea foi o faia e ia, o loo faia ia lava mea e le Atalii.” [Ioane 5:19.] Sa ia afio mai i lenei olaga, e faia le finagalo o Lona Tama, ae lē o lona lava loto. O lo tatou mana’o ma le naunautaiga e tatau ona faapena foi. Pe a o’o mai mea e manaomia ai se faatinoga malosi mai ia i tatou, e tatau ona tatou tuuina atu o tatou loto i le finagalo o le Tamā, ma lagona e faapea atu, o le a le finagalo o lo tatou Tama, o le ua tatou o mai i lenei lalolagi e auauna atu i ai? Ona faamanuiaina lea o soo se gaoioiga tatou te faatinoina. Atonu tatou te le vaaia lona tulaga manuia i le asō, po o a taeao, ae ui o lea, o le a taunuu lava i le manuia.³

“Ona fai atu lea o Mose i le Atua, O ai ea a’u nei, ou te alu atu ai ia Farao, ma a’u aumaia le fanauga a Isaraelu mai Aikupito?” [Tagai Esoto 3:11.] …

“Ona fai atu lea o Mose ia Ieova, A e alofa, le Alii e, o a’u o le tagata e lē iloa fai lauga, talu anamua, ma ona po nei ua e fetalai mai ai i lau auauna; ua lē matala lo’u gutu, ua lē matala foi lo’u laulaufaiva.” [Tagai i le Esoto 4:10.] …

Ua tatou vaaia i nei faamatalaga na ou faitauina, na valaau le Atua ia Mose ina ia faataunuuina se galuega patino; na lagonaina e Mose lona le agavaa ma le faatauvaa e faia ai le mea na faamoemoeina mai ia te ia. Sa sili ona tele o le galuega. Sa matuā loloto i lona natura ma uiga, ma sa manaomia ai le mea lena na lagonaina e Mose e le o ia te ia, i le mana ma le agavaa e tatau ai, ma sa ia lagonaina lona vaivai, ma sa ia valaau atu i le Atua e silasila i isi. … Sa ia teenaina i ona lagona, ma sa faapea ona talanoa atu ai i le Alii e ala i le faapea atu: O ai ea a’u nei ua e auina atu e faataunuuina lenei galuega tele,—aua e faigata ona mafai ona faataunuuina e ala i se agavaa faapea ua ou mauaina. …

O lagona nei ma manatu sa ia Mose, ma sa ia mana’o e faailoa atu i le Atua ia lava lagona ma manatu. O le mea lea, sa i ai lava mai le amataga; pe a valaau le Alii i tagata taitoatasi, latou te lagonaina lo latou le agavaa, ma e faapena foi pe a valaauina toeaina e lauga atu ia te outou. E faapena foi i toeaina, o e valaaulia e o atu i malo uma o le lalolagi, i le avea ai ma a’oa’o o le talalelei. Latou te lagonaina lo latou faatauvaa. Latou te lagonaina lo latou lē atoatoa. …

O lenei, ina ua valaauina Ieremia, na ia lagonaina foi lea lava lagona na ia Mose. Sa ia faapea mai sa valaauina o ia e le Alii e avea ma perofeta, e le gata i le aiga o Isaraelu, ae faapea foi malo uma e lata ane. O ia lava ua na o se tamaitiiti, faapei o Iosefa Samita, ina ua faatoa faaali atu le Atua ia te ia. Sa na o le 14 tausaga le matua o Iosefa—ae o se tamaitiiti e pei ona sa i ai—e lē tautaua, e tusa ma le poto ma le aoaoina faale-lalolagi—sa faapena foi ia Ieremia, ina ua faatoa valaau le Atua ia te ia—na ia faapea mai: “Aua o a’u o le tamaitiiti. E faapefea ona ou faataunuuina lenei galuega tele ua e faamoemoeina mai ia te a’u, ina ia ou faatinoina nei tiutetauave sili ua e tuuina mai i o’u tauau?” Sa ia tuuina atu lona loto ma ona lagona i le manatu e faia lenei galuega tele. Peitai, na ta’uina atu e le Atua ia te ia, … mo lona faamafanafanaina, “Na a’u iloa oe a o le’i faia oe e a’u i le manava.” Sa Ia fetalai na Ia silafiaina o ia i le [muai olaga] lalolagi o agaga, ina ia mafai ona ia faataunuuina le mea na faamoemoeina e le Alii mai ia te ia; “na a‘u faapaiaina oe a o le’i fanau mai oe, na a’u tofia oe e fai ma perofeta i nuu.” [Tagai Ieremia 1:5–6.] Sa ia alu atu, ma e ala i le mana o le Silisili Ese, na mafai ai e Ieremia ona faataunuuina le mea na faamoemoeina e le Alii mai ia te ia. …

O lenei, e ese lava le faatinoga a le Alii mai faiga a tagata. E ese auala e galue ai o Ia. Na saunoa mai ai le Aposetolo o Paulo. Na ia faapea mai: “Ua valaauina outou. E le o le au popoto lea ua valaauina, ae peitai ua filifilia e le Atua mea valea a le lalolagi e faamāina ai e popoto.” [Tagai i le 1 Korinito 1:25–27.] Ma [o] aposetolo na valaauina e le Atua, lea na valaaulia e Iesu, le Alo o le Atua, ma faae’e ona aao i o latou luga ma tuuina atu ia i latou le perisitua ma lana pule e faataunuu ai Lana galuega, sa le i aoaoina lelei i latou; sa le i malamalama i latou i le faasaienisi, latou te le’i umiaina ni tofiga maualuluga i Iutaia—sa matitiva i latou ma lē iloa tusitusi, e tusa ma tofiga maualalo o le olaga. … O le mea lea, i lena taimi, e ese lava le Alii. Sa ese le faatinoina o ana tofiga mai na tofiga e faia e tagata. Ma o tagata e vave ona [faaseseina] e tusa ma le faagaoioiga a le Atua o ana tofiga; o tagata sili ona lelei, o tagata sili ona popoto, e masani ona [faaseseina]. Na [faaseseina] Mose, e tusa ma le auala na faaagavaaina ai o ia e le Alii ina ia faataunuuina ai le mea sa faamoemoeina mai ia te ia, ae sa faailoa atu mulimuli ane. Sa fesoasoani le Alii ma taitaiina o ia i se auala ofoofogia, i le faatalitonuina o ona uso, o Isaraelu, ina ua vaaia o ia e le Ieova silisili. Sa fautua atu ia i latou ma ta’u atu ia i latou lana misiona, ma sa mulimuli ane o latou taliaina. Sa latou taliaina ma mauaina ana fautuaga ma lana taitaiga, ma sa ia aumaia i latou mai le nofoaga o lo latou pologa i Aikupito. Sa faamanuiaina o ia, e le o le faamanuiaina i lona lava atamai; ae sa ia faatatauina uma lona manuia i le Atua Silisili Ese, o le na valaauina o ia. Ma, e faapena foi i tatou.. …

O lenei, atonu ua lava le faapea atu e valaauina e le Atua i tatou. Tatou te lē tala’i atu [vagana] ua manaomia ai e le Atua. E toeitiiti lava o alii uma taitasi, o e filifilia mai toeaina o Isaraelu, na te lagonaina lona faatauvaa, pe a valaauina e tala’i atu le talalelei, ina ia faatinoina tiute ma matafaioi ua tuuina atu i o latou luga. Ua ou matauina o nisi o failauga sili ona lelei ua saunoa atu mai lenei tulaga, pe a valaauina i latou, latou te fefefe, latou te lagona e tatau ona fesili atu mo le faatuatua ma le talisapaia e le faapotopotoga. Ma, ua latou tutū atu faatasi ma le mana o Ieova ma folafola atu lona finagalo i le mata’u ma le gatete; peitai, e lē o so latou malosi ma le atamai na mafai ai ona latou lauga atu i le Au Paia o Aso e Gata Ai. E ui lava atonu latou te le’i mauaina lava faamanuiaga o se aoaoga mai se kolisi, ae sa mafai, ona latou tutū atu, e aunoa ma le faalagolago i o latou lava malosi, ae i le malosi ma le mana o le talalelei.⁴

E lē mafai ona tatou faia i taimi uma mea tatou te mananao e faia, ae tatau ona tatou maua le mana e faia ai mea na e ao ona tatou faia. O le a tuuina mai e le Alii le mana e faia ai lenei mea.⁵ [Tagai fautuaga 2 i le itulau 166.]

Ua valaauina i tatou e galulue i le suafa o le Atua, ma tatou te faailoaina Lona aao i mea lelei uma tatou te faia.

O mea tatou te faia, tatou te faatinoina i le suafa o le Alii le Atua o Isaraelu, ma ua tatou naunau e faailoa le aao o le Silisili Ese i mea uma tatou te faia. Ina ua tula’i atu Mose, o se lavea’i mo le fanauga a Isaraelu mai lo latou nofopologa i Aikupito, sa le’i alu atu o ia i le auala o se lavea’i masani ai, ae sa ia alu atu i le suafa o le Alii le Atua o Isaraelu, ina ua poloaiina e faataunuu lo latou faaolataga e ala i le mana ma le pule, na ia mauaina mai le Atua. Ma, mai lava i le taimi na ia alu atu ai i o latou luma i lenei tulaga, seia o’o ina ua ia faataunuuina lana galuega, sa ia galue ai, ma e ala i le suafa o le Alii, ae lē o lona lava poto po o le atamai, pe o’o lava foi i le faapea, sa ia te ia se atamai sili atu nai lo le toatele o tagata soifua. Sa faaali atu le Alii ia te ia i totonu o le laau talatala, ma poloaiina o ia e alu atu ma faataunuuina se galuega patino, lea e faatatau i le filemu, le fiafia ma le faaolataga o se nuu sili; ma o lona tulaga faamanuiaina ma le tamaoaiga, na faalagolago i luga o le faatinoina i le faatulagaga o mea na faaali atu ia te ia e le Atua o le Lagi. O lona faamanuiaina ma le tamaoaiga na matuā faamautinoaina e ala i le mea moni faapea o le galuega na tofia i ai o ia, e le o se mea na fauina e ia lava, ae sa maua mai ia Ieova. …

E faapena foi ona faatatau ia i tatou lava. O le galuega tele ua faataunuuina nei—le faapotopotoina o tagata mai malo o le lalolagi, e le’i tupu mai i se mafaufau o soo se tagata, po o se vaega o tagata; ae na tupuga mai i le Alii Silisili Ese.⁶

Tatou te faalagolago i le Atua; e faapena i a tatou galuega ma auaunaga uma, ma i tulaga faamanuiaina uma tatou te mauaina mai a tatou auaunaga, tatou te lagonaina o le Atua na faataunuuina.⁷

Ua tatou o mai i le lalolagi mo se faamoemoega sili, e faapei o Iesu, lo tatou uso matua, ina ia faia le finagalo ma galuega a lo tatou Tamā; i lenei mea ua i ai le filemu, olioli ma le fiafia, o se faateleina o le poto, malamalama ma le mana o le Atua; i fafo atu o lenei, ua leai ni faamanuiaga folafolaina. O le mea lea, se i tuutō atu i tatou lava i le amiotonu, fesoasoani i tagata uma ina ia sili atu le lelei ma le fiafia; faia le lelei i tagata uma, ma aua ne’i faia le leaga i se tasi; ava i le Atua ma usitaia Lana Perisitua; galueaiina ma faasaoina se lotofuatiaifo o le malamalama ma mulimuli i le Agaga Paia; aua le faavaivai, ia u’umau i le mea ua lelei, tumau e o’o i le iuga, ma o le a taumasuasua lau ipu o le olioli, aua e maeu le silisili o lou taui mo ou tofotofoga ma puapuaga e tusa ma faaosoosoga, o ou mafatiaga, o manaoga uma o lou loto ma faanoanoaga; e moni, o lou Atua o le a tuuina atu ia te oe se taui o le mamalu e lē uma. [Tagai fautuaga 3 o loo i lalo.]

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu, pe a o e sauni e aoao atu. Mo nisi fesoasoaniga, tagai i itulau v–vii.

Suesue le vaega o lo’o amata i le itulau 159. E faapefea ona e iloaina ua tasi lou manatu i le mamalu o le Atua? Faatasi ma le tele o faatosinaga i le lalolagi, e faapefea ona fesoasoani matua i a latou fanau ina ia faatumauina o latou manatu ina ia tasi i le mamalu o le Atua?
Toe iloilo faamatalaga a Peresitene Snow e uiga ia Mose ma Ieremia (itulau 159–61). E faapefea ona fesoasoani nei tala ia i tatou, i a tatou taumafaiga e auauna i totonu o korama o le perisitua, le Aualofa, ma isi faalapotopotoga a le Ekalesia?
Na a’oa’o mai Peresitene Snow e tatau ona tatou auauna atu “e ala i le suafa o le Alii” (itulau 162). E faapefea ona e faamatalaina se tagata o loo galue e ala i le suafa o le Alii? Manatunatu i avanoa ua e maua e auauna ai e ala i le suafa o le Alii.
O loo faaaogaina e Peresitene Snow upu o le manuia ma le faamanuiaina i le tele o taimi i totonu o lenei mataupu. E faapefea ona ese le faauigaga a le Atua o le manuia, mai le faauigaga a le lalolagi? Aisea e mafai ai ona faamalosiauina i tatou e uiga i le manuia, pe a tatou mulimuli i le finagalo o le Atua?

Mau Talafeagai: Filipi 4:13; 2 Nifae 10:24; Mosaea 3:19; Helamana 3:35; 10:4–5; 3 Nifae 11:10–11; 13:19–24; MF&F 20:77, 79; Mose 4:2

Fesoasoaniga mo le Aoao Atu: “Aua ne’i popole i le leai o se tali e tuuina mai. E masani ona manaomia e tagata se taimi e manatunatu ai, ma tali ai i fesili, pe faaali ai mea ua latou lagonaina. Atonu e te faatali mo sina taimi, pe a mae’a ona e tuuina atu se fesili, pe a mae’a ona faasoaina atu se mea na tupu faaleagaga, pe, a faigata ona faaali mai se mea o mafaufau i ai se tasi” O Le Aoao Atu, E leai Se Isi Valaauga e Sili Ai, 67).

I le faatoaga i Ketesemane, na faapea ai le Faaola, “Aua le faia lo’u loto, a o lou finagalo” ( Luka 22:42).

O Mose na “faatatauina uma lona manuia i le Atua Silisili Ese, o le na valaauina o ia. Ma, e faapena foi i tatou.”