Mataupu 21

Ia Sili Atu Lo Tatou Alofa i le Atua, Nai Lo Le Lalolagi

“Ua tatau ona tatou ausia … se tulaga maualuga atu: ua tatau ona tatou alolofa i le Atua, ia sili atu nai lo le tatou alolofa i le lalolagi.”

Mai le Soifuaga o Lorenzo Snow

E lei leva ona papatisoina ma faamauina Lorenzo Snow i Katelani, Ohio, ae tetee faasaga loa se vaega o le Au Paia o Aso e Gata Ai, e aofia ai nisi o taitai o le Ekalesia, i le Perofeta o Iosefa Samita. E tusa ai ma se faamatalaga a Lorenzo Snow, o lenei liliuese sa mafua ona o fefaatauaiga matapeapea, po o, i se isi faaupuga, o tulaga lamatia tau pisinisi sa le’i masani ai ona o faamoemoega ia vave ona mauoa. I le faatauasoina ai e se manao mo mea lē tumau o le lalolagi, na liliuese ai tagata mai faamanuiaga e faavavau o le talalelei.

Pe tusa o le 50 tausaga mulimuli ane, na saunoa ai Peresitene Snow, a o avea ma Peresitene o le Korama a Aposetolo e Toasefululua, i se vaega o le Au Paia o Aso e Gata Ai i Logan, Iuta. Sa ia tauina atu ia i latou faigata na ia molimauina i Katelani ma lapataia i latou faapea, o le a latou feagai ma ni tofotofoga faapea i se taimi lata mai. “E i ai se mea o le a oo vave mai, o le a avea ma se tofotofoga mo outou, atonu o le a sili atu le tele nai lo se isi lava mea na tupu muamua ia te outou,” sa ia saunoa atu ai. “Ae ui o lea, pau le mea e manaomia ona tatou faia i le taimi nei, o le vaai lea po o fea o i ai o tatou sese ma vaivaiga, pe afai o i ai. Afai sa tatou le faamaoni i aso ua sola, i na tatou toe faafouina ia a tatou feagaiga ma le Atua ma filifili, e ala i le anapogi ma le tatalo, faapea o le a tatou mauaina le faamagaloga o a tatou agasala, ina ia i ai le Agaga o le Silisili Ese i o tatou luga, ma atonu o le a mafai ai ona tatou aloese mai na faaosoosoga malolosi lea o loo fou mai. E i ai faaosoosoga tetele o loo agai mai. Ua outou vaai i taunuuga o lenei fefaatauaiga matapeapea i Katelani. O le mea lea, talia le lapataiga.”¹

Talu ai ona o le lapataiga a Peresitene Snow ua faaauau pea ona faatatau i le Au Paia o Aso e Gata Ai i aso nei, o le tele o lana lauga i le Au Paia i Logan, o loo aofia i totonu i lenei mataupu. Sa ia saunoa, “Atonu o nai upu laiti e tusa ma lo tatou tulaga i lena taimi [i Katelani] o le a faamaonia sona taua mo i tatou i le lumanai—pe, o le a aumaia mo i tatou ni lesona aoga.”² [Tagai fautuaga 1 i le itulau 276.]

Aoaoga a Lorenzo Snow

Pe a faatagaina e tagata mea o le lalolagi e salalau atu i o latou mafaufau ma loto, ua latou fulitua i aoaoga faavae faavavau.

Ou te manatuaina ma le manino atoatoa taimi o faigata na o’o i ai i Katelani … , i le mea sa afio ai le perofeta a le Atua, o le mea foi sa afio mai ai le Atua lava Ia, o Iesu, le Alo o le Atua, ma faaalia o Ia lava i Lona mamalu. Sa tu o Ia i le si’ofatafata o le pulelaa o le Malumalu, lea sa fausiaina e ala i se poloaiga. Sa i ai i lalo o ona aao se mea sa teuteuina i le auro mao’i, ma i le lanu e pei e mūmū sesega. O lona lauao sa paepae e pei o le kiona sisina. Sa susulu ona fofoga e sili atu i lo le pupula o le la. O lona siufofoga foi sa pei o le leo o le tafe taalili o vai tetele. [Tagai i le MF&F 110.] O lenei faaaliga matagofie sa tupu i totonu o le malumalu, lea sa fausiaina mo Lona mamalu. Sa ou i ai i Katelani i lena taimi, lea sa matou feagai ai ma mea na tutupu, ou te manatu i nisi taimi, lea ua amata ona tatou toe o’o i ai i le taimi nei. O tulaga o mea sa siosiomia ai le Au Paia o Aso e Gata Ai i lena taimi sa tulaga ese; i se tulaga faatauvaa, o aafiaga i luga o tagata sa ese o latou foliga mai. … I lena taimi, sa faatumulia mafaufau o tagata i le agaga o le faatauina atu o mea ma le faamoemoe e maua mai ai se faasiliga tele mo le tagata lava ia. Sa i ai taumatematega i tupe, taumatematega i faletupe, taumatematega i fanua, taumatematega i fasi fanua i aai, ma taumatematega i le anoanoai o isi itu. Na tulai mai lena agaga o taumatematega mai le lalolagi, ma sosolo atu ai i loto o le Au Paia e pei o se auma tele ma aave, po o vai tetele, ma e toatele na pauu, ma liliuese ai.³

O nisi o i latou [le Au Paia i Katelani] sa amata ona fematea’i; sa galo ia i latou la latou tapuaiga, sa galo ia i latou aoaoga faavae sa faaalia ia i latou, ma le toatele o i latou na taliaina le talitonuga o lena taimi ma amata ona aveesea i le fematea’i. Sa tulai mai faigata—o le lotoleaga ma le matau’a—ma ona o le toatamai o le Alii ia i latou, sa aumaia ai le faafanoga ia i latou ma sa nutipalaina ai.⁴

Ae le i o’o mai lenei liliuese tele, sa sasaaina mai e le Alii faamanuiaga matagofie i luga o le nuu. Sa liligiina mai meaalofa o le Talalelei i se tulaga matua tele—o oa o le faavavau. Sa asiasi mai agelu ia i latou. O le Alo o le Atua, e pei ona sa ou ta’ua muamua, sa fetautalatalaa’i ma Ana auauna. I le faapaiaga o le Malumalu, sa maeu le ofoofogia o faamanuiaga na maua e tagata. I lena taimi o le tamaoaiga ona o le alofa o le Atua, sa ou auai foi i fonotaga eseese ia sa faia i le malumalu. Sa matou faia lotu tatalo, ma lotu molimau, ma o nā molimau sa mafai e uso ma tuafafine ona tuuina mai sa matagofie. Sa latou vavalo, sa latou tautatala i gagana, ma sa mafai ona latou faamatalaina gagana i se tulaga maoae tele. O nei faamanuiaga sa toetoe lava maua e tagata uma i Katelani. Sa faapea ona tuuina atu o latou loto, sa latou lagonaina e pei ua mafai ona latou ositaulagaina soo se mea sa latou mauaina. Sa latou lagona e pei lava ua latou nonofo i le afioaga o le Atua, ma sa talafeagai lo latou mauaina o ia ituaiga lagona, ona o aafiaga ofoofogia sa latou i ai.

O nei faamanuiaga uma, ma le tele o isi lea e le lava lo’u taimi e faamatala ai, sa fiafia ai le Au Paia o Aso e Gata Ai, ae le i o’o mai i le taimi lea na amata ona sosolo ai le agaga o le fematea’i i loto o tagata. E ono manatu se tasi a uma ona maua o nei faaaliga ofoofogia ona leai lea o se tofotofoga e mafai ona faatoilaloina le Au Paia. Peitai sa i ai, ma sa faataapeapeina ai i latou, e pei ona sa i ai, i matamatagi e fa.

I le tulaga ese sa foliga mai ai, o lenei uiga o le fematea’i sa sosolo atu i le korama a Aposetolo e Toasefululua ma le korama a Peresitene e Toafitu o Fitugafulu; o le mea moni, sa leai ma se korama i le Ekalesia, sa le i aafia i lenei agaga o le fematea’i. A o faateleina lena agaga, sa mulimuli mai le lē lotogatasi. Sa amata ona fai tala taufaaleaga ma fefinauai uso ma tuafafine o le tasi ma le isi, ona sa lē ogatasi o latou manao.

Pe o le a faapea ea le tulaga i le Au Paia o Aso e Gata Ai, lea ua ou talanoa atu i ai? Ou te popole o le a o’o mai, ae po o le a le tele o le a aafia ai outou, ua le o sa’u lea e fai atu ai. Peitai, o le a outou mauaina lena aafiaga, ma, atonu e matua moomia lava le tatau ai mo outou.

… O le afa o le korama a Aposetolo, i le taimi o Katelani, sa pauu i nei uunaiga leaga. Sa avea lenei fefaatauaiga matapeapea, lenei manao mo le auro—le atua o le lalolagi—sa fua mai ai lenei aafiaga faanoanoa. Ma, afai sa i ai lenei aafiaga i luga o i latou o e sa umiaina le perisitua sili ona maualuga i luga o le fogaeleele, o le a faapefea ona aafia ai tatou, o e atonu, e le i mauaina le poto, ma faamatalaga ma le poto masani na ia te i latou? …

O lenei, o outou o ni tagata lelei. … E alofa le Atua ia te outou. E fiafia o Ia i lo outou ola amiotonu, ma o le a lē fiafia o Ia e silasila mai ua toe faaluaina vaaiga … ia na i ai i Katelani. E le manaomia lena mea. Ua tatou umia i o tatou lima le mana e faasaoina ai i tatou lava mai na mea sa faaeseeseina ai le Au Paia i Katelani ma faatoilalo ai le ’afa o le Toasefululua. E le finagalo le Alii e toe molimauina nei vaaiga i nei aso amulī.⁵

O le Au Paia o Aso e Gata Ai, e ao ona matua popoto ma atamamai, ina ia aua nei pauu i nei ituaiga mailei. E le aoga i se tagata. O le a le aoga i se tagata ona fulitua i nei aoaoga faavae faamamaluina, ma mea na ua maua mai lalolagi faavavau—e le aoga ona tatou fulitua i nei mea ma lē mautonu ai ma tuuto atu i tatou lava i mea lē aoga a le lalolagi. O le a le aoga ia i tatou. Po o le a le tofotofoga atonu e o’o mai i o tatou luga, po o lea ua tatou mauaina, e tatau ona tatou faalogo i le talafaasolopito o le taimi ua tuanai, ma aua nei faatagaina i tatou lava ina ia faatoilaloina, pe, o le a tatou matua faanoanoa ai.⁶ [Tagai fautuaga 2 i le itulau 276.]

Ua tatou osi feagaiga e faaesea mai i tatou lava mai mea o le lalolagi, ma tuuto atu i tatou lava i le malo o le Atua.

O le atua o le lalolagi, o le tupe. E tapuai le lalolagi i lenei atua. Ua i ai le mana uma mo i latou, e ui atonu latou te le naunau e ioeina. O lenei, ua mamanuina, i le taitaiga paia a le Atua, e tatau i le Au Paia o Aso e Gata Ai, ona maua se malamalama sili, poto, ma le mana o le Atua, lea o le a lē mafai ai ona faatoilaloina i latou e le atua o le lalolagi. E ao ona tatou o’o i lena tulaga. Ua tatau foi ona tatou ola i se olaga e sili atu ona tamalii: e tatau ona tatou alolofa i le Atua, e sili atu nai lo lo tatou alolofa i le lalolagi, e sili atu nai lo lo tatou alolofa i tupe, ma alolofa i o tatou tuaoi e pei o i tatou lava.⁷

Pe a tatou … le tausiaina feagaiga sa tatou osia, e pei o nei, faaaoga o tatou taimi, taleni ma agavaa mo le fausiaina o le malo o le Atua i luga o le fogaeleele, pe mafai faapefea ona tatou faamoemoe atoatoa e toetutu i le taeao o le uluai toetu, e iloga faatasi ma le galuega tele o le faaolataga? Afai tatou te faataitai i le … lalolagi, i o tatou uiga, o mausa ma fegalegaleaiga, ona ilo faatasi lea o i tatou ma le lalolagi, pe tou te manatu, o’u uso e, o le a tuuina mai e le Atua i o tatou luga faamanuiaga lea tatou te mananao ia maua? Ou te ta’u atu ia te outou, e leai, o le a Ia le faia faapena! … E ao ona tatou fausiaina i tatou lava i le amiotonu o le lagi, ma totoina i o tatou loto le amiotonu a le Atua. Na fetalai mai le Alii, e ala i le perofeta o Ieremia, “Ou te tuuina atu la’u tulafono i totonu ia te i latou, ma ou tusi ai i o latou loto, e fai foi a’u mo latou Atua, o i latou foi e fai mo’u nuu.” [Ieremia 31:33.] O le mea lenei ua finagalo le Alii e faia, ma o le mea lenei o le a Ia faataunuuina i totonu ia i tatou, pe a tatou usitaia lona finagalo.⁸

Ou te faafetai i le Atua, aua i nei aso o le lē faamaoni ma le amioleaga i le lalolagi, ua i ai alii ma tamaitai paia ma amiotonu, o e e mafai ona tuuina atu na taleni silisili ua tuuina mai e le Atua ia i tatou mo Lona viiga ma mamalu. Ma ou te fia faaopoopo atu, faapea e i ai le faitau afe o alii ma tamaitai amio lelei ma mamalu, o e ua faapotopotoina mai e le Alii mai atunuu, lea e naunau foi e tuuina atu o latou taimi ma taleni e fesoasoani ai i le faataunuuina o le galuega a le Atua mo le manuia o Ana fanau.⁹ [Tagai fautuaga 3 i le itulau 276.]

Tatou te mulimuli i le faataitaiga a le Faaola, pe a tatou mumusu e faafesuia’i mamalu o le faavavau, mo oa o le lalolagi.

Atonu tou te faamoemoe … e fetaiai ma toatuga i le ala o le olaga, lea o le a tofotofoina ai la outou faautautaga poto, ma o nisi o outou o le a faaosoosoina e o ese mai le ala o le upu moni ma le mamalu, ma, faapei o Esau, ua manao e lafoai mamalu o le faavavau mo nai taimi pupuu o le faamalieina e tuinanau ma fiafiaga [tagai Kenese 25:29–34]; ona … aveesea ai lea o outou avanoa, e faaa’oa’o ai i le faataitaiga a lo tatou Faaola, pe a ofoina mai le mamalu o lenei lalolagi, afai o le a ia faia se mea faavalevalea; o le a ia tali atu i lē na faaosoosoina o ia, “Satani e, ina alu ese ia oe i o’u tua!” [Tagai Luka 4:5–8.]¹⁰

Ua ou iloa i le mafaufau ai i le olaga, o lenei lalolagi e puupuu lava i le faatusatusa ai i le faavavau; o lo tatou poto, le paia i totonu ia i tatou, sa i ai i taimi uma, sa le’i foafoaina lava, ma o le a i ai pea lava i le faavavau atoa [tagai MF&F 93:29]. I le vaai atu ai i nei mea moni, o le a lelei mo i tatou, i le avea ai ma tagata popoto, le iloa ai e le o toe umi ni aso ona muta lea o lenei olaga, ona o’o mai ai lea o le olaga lea e faavavau; ma ua sili atu i tatou pe a faatusatusa atu i lo tatou tausiaina o poloaiga, nai lo i latou na le mafai ona faaleleia na itu.¹¹

E fusia faatasi e le talalelei loto o ona tagata tapuai, e leai se eseesega, na te le iloaina se eseesega i le va o le mativa ma le mauoa; ua fusia faatasi i tatou uma e pei o se tagata e tasi, e faatino tiute ia ua tuuina mai ia i tatou. … O lenei, se i ou fesili atu le fesili, O ai o ia te ia se mea, e mafai ona ta’ua moni lava soo se oa o lenei lalolagi o ana meatotino? Ou te le mafaufauina foi, o a’u ua na o se tausimea mo nai mea itiiti, ma ou te tali atu i le Atua mo lona faaaogaina ma le auala sa faia ai mea. Ua uma ona mauaina e le Au Paia o Aso e Gata Ai le tulafono e ala i faaaliga mai le Atua, ma ua matua manino lava ona tusia ina ia mafai e tagata uma ona malamalama ai. Ma, afai ua tatou malamalama ma manino i tautinoga sa tatou faia, ina ua tatou ulu atu i ona feagaiga, e ala i le papatisoga mo le faamagaloga o agasala, e ao lava ona tatou nofouta i le mea moni faapea o lena tulafono e manaomia ai tatou e saili muamua le malo o le Atua, ma o o tatou taimi, taleni ma agavaa e ao ona mafaufau i ai e le sili atu lo latou taua nai lo le malo o le Atua [tagai Mataio 6:33; 3 Nifae 13:33]. A na le faapea, e faapefea ona tatou faamoemoe i le lumanai, lea o le a avea ai lenei lalolagi ma nofoaga e afio ai le Atua ma lona Alo, e fai ai ma tofi le ola e faavavau, ma ola ma pule ai faatasi ma ia?

O ai o le a fai mai faapea o le mauoa, po o, i latou o e umia taleni e tele, e i ai se faamoemoega sili atu pe fuafua e maua nei faamanuiaga nai lo e matitiva, pe, o i latou o e ua i ai na o le tasi le taleni? E tusa ai ma lo’u malamalama i ai, o le tagata e faigaluega i le fale faigaluega, pe o se su’i ofu, kamuta, fai seevae, po o, i soo se isi lava fale gaosimea, ma ua ola e tusa ma le tulafono o le Talalelei, ma ua faamaoni ma faatuatua i lona valaauga, o lena tagata ua tutusa lava lona agavaa mo le mauaina o nei ma faamanuiaga uma o le Feagaiga Fou e Faavavau, e pei o soo se isi lava tagata; e ala i lona faamaoni, o le a ia mauaina ai nofoalii, itumalo ma mana, o lana fanau foi ua faatoateleina e pei o fetu i le vanimonimo, po o le oneone i luga o le matafaga. O ai, ou te fesili atu ai, ua i ai se faamoemoega sili atu nai lo lenei?¹² [Tagai fautuaga 3 ma le 4 o loo i lalo.]

Fautuaga mo Suesuega ma le Aoaoina Atu

Mafaufau i nei manatu, a o e suesueina le mataupu, pe, a o e sauni e aoao atu. Mo nisi fesoasoaniga, tagai i itulau v–vii.

Mafaufau i le tala i itulau 269–70. O le a le mea e uiga i mea faalelalolagi, lea e taitaiina tagata e faagalo la latou tapuaiga? E faapefea ona tatou faatautaia o tatou manaoga faaletino, e aunoa ma le faatoilaloina e mea faalelalolagi?
Mafaufau loloto i le vaega o loo amata i le itulau 270. E faapefea ona mafai e lo tatou alofa mo le Atua, ona fesoasoani ia i tatou e aloese mai le faatoilaloina e mea faalelalolagi?
Sa aoao mai Peresitene Snow faapea ua uma ona tatou osi feagaiga e “faaaoga o tatou taimi, taleni ma agavaa mo le fausiaina o le malo o le Atua i luga o le fogaeleele” (itulau 272–3). Manatunatu e uiga i mea e mafai ona e faia e tausia ai lenei feagaiga.
Toe iloilo le vaega faaiu i totonu o le mataupu. O a auala e mafai ai e nei upu moni ona fesoasoani ia i tatou e tausia a tatou feagaiga? “O lenei lalolagi e puupuu lava i le faatusatusa ai i le faavavau.” E leai se tasi e mafai ona “tauina moni ma faamaoni soo se oa o lenei lalolagi o ana meatotino.”

Mau Talafeagai: Mataio 6:19–24; Ioane 17:15; 1 Ioane 2:15–17; Iakopo 2:13–19; Mamona 8:35–39; MF&F 38:39; 63:47–48; 104:13–18

Fesoasoaniga mo le Aoao Atu: Talanoaga i vaega laiti “tuu atu i se vaega tele o tagata le avanoa e auai ai i le faatinoina o se lesona. O tagata taitoatasi o e masani ona mumusu e auai atonu e faasoa mai manatu i vaega laiti, lea o le a latou le faailoaina mai i luma o le vaega atoa” (O Le Aoao Atu, E Leai Se Isi Valaauga e Sili Ai, 161).

E ui ina mavae ni faaaliga maoae i le Malumalu i Katelani, ae toatele le Au Paia i Katelani sa pauu atu i le liliuese.

E faapei o le alii mauoa talavou, o le sa talanoa ma le Faaola (tagai Mataio 19:16–22 o nisi tagata i aso nei, ua faaosoosoina e liliuese mai ia i latou e manaomia le fesoasoani.