Mataupu 9

O Sootaga Paia Faaleaiga

“Afai tatou te faamaoni, o le a tatou faifai mea faatasi, o le tasi ma le isi, i se tulaga ola pea ma faamamaluina. … O na sootaga e fausiaina iinei, lena e sili ona tumau lona uiga, e tatau ona i ai i le faavavau.”

Mai le Soifuaga o Lorenzo Snow

I le alo atu ai mo le faamanatuina o lona 70 tausaga, sa valaaulia ai e Lorenzo Snow ana fanau uma ma o latou aiga ina ia faapotopoto faatasi i Brigham City, Utah, mo se “faatasiga faale-aiga ma se fiafiaga o le aso faamanatu sili ona maoa’e.” Sa ia faatulagaina o latou fale e nonofo ai ma meaai ma polokalama, ina ia fiafia ai tagata uma, e aofia ai ma fanau laiti. “O le tele lava o lo’u mafaufau e uiga i lenei mataupu [o se faatasiga faaleaiga],” na ia tusia ai, “o le tele foi lena o o’u popolega ma manaoga mo se faapotopotoga faaleaiga, ina ia mafai ona ou vaai atu ia te outou uma mo le taimi mulimuli i lo’u olaga, ma tuuina atu ia te outou se faamanuiaga faa-tamā.” Sa ia uunaia i latou ina ia aua ne’i i ai se mea e taofia ai lo latou auai “vagana ai o ni toatugā sili ona ogaoga pe faigata ona alofia.”¹

Sa faapotopoto le aiga o Snow mai le aso 7 o Me e o’o i le aso 9, 1884, ma fiafia i musika, tala faakonaseti, tautalaga, solo, taaloga, taumafa, ma talanoaga faale-uo.² O le tuafafine o Peresitene Snow o Eliza, na lipotia faapea i le gasologa atoa o le gaoioiga, sa ia auai i “fonotaga eseese a le aiga, ma i le avea ai ma peteriaka, … sa ia faasaga e faae’e atu faamanuiaga i tagata o le aiga” ma tuuina atu “le tele o fautuaga faatamā, faatonuga ma aoaiga.” A o lata ina tapunia le faatasiga, na o mai faatasi uma le aiga e faalogologo atu ia te ia, a o saunoa mai. E tusa ai ma le faamaumauga a Eliza, sa ia faaalia “lona fiafia ma le agaga faafetai i le Atua ua ia fiafia nei i le vaai atu i foliga mata ataata ma le mananaia o lona auaiga toatele, ma le lelei na ia tulimataia o le a tupu mai i lenei faatasiga.” I le vaai atu ai i lona aiga, sa saunoa atu ai Peresitene Snow ma le malosi: “Ua faatumulia lo’u loto i lagona mafanafana o le faafetai i lo’u Tama Faalelagi. … Ua le lava upu o le gagana e faaali atu ai lagona loloto o lo’u loto mo lenei avanoa paia ma mamalu i lenei faamanatuga o lo’u fitusefulu tausaga o lo’u ola, e tu atu ai iinei ma olioli i lenei tulaga mataina musuia faalelagi ma mamalu.”

Sa faaauau faapea Peresitene Snow: “O le faatasiga faaleaiga mulimuli lenei, ua talafeagai lo tatou faamoemoe i lenei olaga. Tau ina ia fesoasoani mai le Atua o ō tatou tama ia i tatou ina ia tausia Ana tulafono, ola i ni olaga faamamaluina, faasaoina ma le lē motusiaina o tatou uiga mamā ma faamaoni, faalogo atu i musumusuga a le Agaga Paia, ma saili ma le filigā e faamamāina i tatou lava, ina ia leai se tasi o lenei aiga e leiloa e ala i le alu ese ai mai le ala sa’o ma le lauitiiti, ae tau ina ia tatou faamaonia atu i tatou lava e agavaa e tulai mai i le taeao o le ulua’i toetutu, faapaleina i mamalu, faaauau le faatasiga faaleaiga i le tino ola pea, ma faaauau e tuputupu atili seia oo lava i augatupulaga e le iu o le faavavau.”³ [Tagai fautuaga 1 i le itulau 144.]

Aoaoga a Lorenzo Snow

O sootaga faaleaiga e paia, ma e mafai ona faateleina le malosi e tuputupu ai i le faavavau.

Uunaia faaipoipoga, … ma faaosofia i manatu o [isi] le paia o lena sootaga ma le matafaioi ua ia i latou e usitaia lena poloaiga sili, lea na tuuina mai e le Atua i o tatou ulua’i matua, ina ia uluola ma faatumulia ai le lalolagi [tagai Kenese 1:28]. Ua matuā talafeagai lava lenei tulaga, i le vaaiga ua i ai nei le lalolagi e lē amanaia lena tulafono ma lē faamamaluina le feagaiga o le faaipoipoga. O se tulaga faanoanoa le vaai atu i le faatupulaia o faaipoipoga ua tatala i le laueleele ma le faateleina o le vaai atu i fanau o se avega mamafa, nai lo le avea ma se tofi taua mai le Alii.⁴

Ua faaali mai e le [Alii] ia i tatou faapea, afai tatou te faatuatua, o le a tatou faifai mea faatasi o le tasi ma le isi, i se tulaga faamamaluina ma ola pea; faapea o na sootaga e fausiaina iinei, lea o se amioga sili ona tumau ma faamamaluina, o le a i ai i le faavavau.⁵

O fegalegaleaiga o le a fausiaina iinei, o le a faaauauina e i [tatou] i lalolagi e faavavau. O tamā, tinā, tuafafine, uso—ioe, o tinā, o e vaai atu i a latou fanau pele ua maliliu i o latou autafa, e iloa o le a avea ma a latou fanau i le lalolagi o agaga, ma, o le a latou mauaina i latou, i le tulaga lava e tasi na latou tuua ai lenei lalolagi. O le avā, pe a vaai atu i lana tane ua maliu, pe a alu ese malie le ola mai ia te ia, ua ia iloaina o le a ia toe mauaina o ia, ma o le a ia maua le mafanafana, faamalosiauga ma le olioli, lea e aumaia e faaaliga a le Silisili Ese, e faapea o le a ia toe mauaina lana tane i lalolagi e faavavau. O ituaiga o sootaga ia e fausiaina iinei, o le a i ai foi i tua atu o le veli; o noataga e fausiaina iinei, o le a faamalosia i le isi olaga lea o le a o’o mai. Ma, o le Au Paia o Aso e Gata Ai o le a lagonaina se faamautinoaga, aua ua uma ona tuuina mai e le Atua ia i latou.⁶ [Tagai fautuaga 2 i le itulau 144.]

O tagata faatuatua o le Au Paia o Aso e Gata Ai, o e lē mafai ona faaipoipo pe maua fanau i lenei olaga, o le a mafai ona maua faamanuiaga uma o le faaolataga i le olaga a sau.

Na sau se tamaitai i totonu o lo matou ofisa i se tasi o aso, ma manao e vaai a’u i se mataupu patino. Sa ia faailoa mai ia te a’u faapea sa ia lagonaina le lē fiafia, ona o ona avanoa mo le mauaina o se tane, sa le tulai mai i se tulaga lelei. … Sa ia mana’o e fia iloa pe faapefea tulaga o le i ai o ia i le isi olaga, pe afai ua lē faamanuiaina o ia e maua se tane i lenei olaga. Ou te manatu o lenei fesili ua tula’i mai i loto o a tatou talavou. … Ou te mana’o e tuuina atu sina faamatalaga itiiti mo le faamafanafanaga ma le faamalosiauina o tagata ua i ai i lenei tulaga. E leai se tagata o le Au Paia o Aso e Gata Ai, o lē maliu i le mae’a ai ona soifua i se olaga faamaoni, o le a lē mauaina se mea e tasi, ona o le lē mafaia ona fai o nisi mea patino, ina ua lē mauaina avanoa mo i latou. I se isi faaupuga, afai o se alii talavou, po o se tamaitai talavou ua le mauaina se avanoa e faaipoipo ai, ma sa ola faamaoni e o’o lava i le oti, o le a latou mauaina faamanuiaga uma, faaolataga ma mamalu e mafai ona maua e soo se alii po o se tamaitai, sa maua lenei avanoa ma faaleleia atili ai. E mautinoa ma lelei lena tulaga. …

O tagata e lē maua se avanoa e faaipoipoina ai i lenei olaga, afai e maliliu i latou i le Alii, o le a i ai auala e tuuina atu ia i latou e mafai ai ona latou mauaina faamanuiaga uma e manaomia mo tagata i le tulaga faaipoipoina. E alofa ma agalelei le Alii, ma e tonu lava Lana faamasinoga. E leai se le faamaoni i Lana faamasinoga; peitai, e faigata ona tatou vaai atu ia te Ia i lena tulaga, pe a maliu se tamaitai po o se alii e aunoa ma le mauaina o le avanoa e faaipoipoina ai, pe afai e lē mafai ona foiaina i le isi olaga. O le a i ai le lē tonu i lena tulaga, ma ua tatou iloa o le Alii o se tagata e tonu lana faamasinoga. O lo’u tuafafine o Eliza R. Snow, ou te talitonu, sa tutusa lona lelei e pei o soo se isi tamaitai o le Au Paia o Aso e Gata Ai na soifua muamua, ma sa ia soifua i se tulaga lē faaipoipoina, seia o’o ina te’a atu ma le tulaga e mafai ai ona ia maua se fanau. … E lē mafai ona ou mafaufau mo se taimi, faapea o le a le mauaina e ia se mea se tasi o lena tala. O le a maua e ia i le isi olaga, ma o le a tutusa lava le sili o se malō na te mauaina, e pei ona sa tatau ona ia maua, pe ana maua e ia se avanoa e tausia ai se aiga i lenei olaga.⁷

Pe a olioli le tane ma le ava i le lagonaina o le lotogatasi, o le a la uunaia le alofa ma le agalelei i totonu o le aiga.

Ia mautinoa o nai feeseeseaiga laiti faalētaua tele i mea tau le aiga, o le a lē faaleagaina ai lo outou fiafia.⁸

Avā, ia faamaoni i a outou tane. Ou te iloa e tele mea lē lelei tou te feagai, ma, o a outou tane e feagai foi ma nisi o mea faapena. E le taumate, o nisi taimi e tofotofoina ai foi outou e a outou tane, atonu o nisi taimi o le lē magafagafa o a outou tane, pe atonu o nisi taimi, ona o lo outou lava le magafagafa. …

… E na ona ou fai atu faapea o a outou tane e leaga—e pei foi o lo outou leaga, ma e masalo o nisi o i latou e sili atu ona leaga; peitai, aua le amanaiaina: taumafai e onosaia mea lē lelei e tulai mai i nisi taimi, ma, a outou feiloai o le tasi ma le isi, i le olaga e sosoo ai, o le a outou lagonaina le fiafia faapea sa outou onosaia na mea.

Mo tane, ou te fai atu: O le toatele o outou, ua outou lē faatauaina a outou avā, e pei ona tatau ai. … Ia agalelei ia i latou. Pe a ō i latou i fonotaga, ia e siiina le pepe e le itiiti ifo i le afa o le taimi. Pe a manaomia ona luelue le pepe, ma e le o tele ni au mea o fai, tago e luelue. Ia agalelei, pe a o nisi taimi e manaomia ai sina osigataulaga e faia ai lena mea; ia lagonaina le agalelei, e tusa lava pe o le a le osigataulaga e tatau ona fai.⁹

E ao i alii ona sili atu le tulaga faatamā i le aiga, mauaina lagona sili atu ona lelei e tusa ma a latou avā ma fanau, tuaoi ma uo, sili atu ona agalelei ma faaleatua. Pe a ou alu i totonu o se aiga, ou te fiafia e vaai atu i le ulu o lena aiga o taitai e faapei o se tagata o le Atua, agalelei ma agamalū, faatumulia i le Agaga Paia faatasi ma le atamai ma le malamalama o le Lagi.¹⁰

Afai tou te faamautinoaina se faatasiga i soo se aiga i Siona, afai tou te mauaina lena tuufaatasiga faalelagi, lea e manaomia ona i ai iina, e tatau ona e fusia faatasi lena aiga ia tasi, ma e tatau ona i ai le Agaga o le Alii i le ulu o lena aiga, ma e tatau ona mauaina lena malamalama ma lena poto, lea e tauaveina i le olaga i aso taitasi ma le soifuaga o na tagata, o le a faamaonia ai le faaolataga o lena aiga, aua ua ia umiaina lo latou faaolataga i ona aao.

E alu o ia i le galuega, ma faaogatusa ona lagona ma uiga alofa ma i latou, e tusa ai ma le mana ua ia te ia, ma faasaga e faamausalī mea uma e manaomia mo lo latou saogalemu ma le manuia, ma, o i latou i se isi itu, e tatau ona liliu mai ma faaalia lea lava lagona e tasi, lea lava agalelei ma lea faatulagaga e tasi, ma i le mea e gata ai lo latou mafai, faaalia lagona o le faafetai mo faamanuiaga ua latou maua.

E manaomia lenei tulaga ina ia i ai le tasi o lagona, po o le tasi o lagona ma se alofa fesootai, ina ia avea ai i latou ua tasi, ina ia mafai ona fusia faatasi ai i latou i lenei auala.¹¹

Pe a tatalo [alii] i luma o ā latou avā ma fanau, e ao ona musuia i latou e le meaalofa ma le mana o le Agaga Paia, ina ia mafai e le tane ona avea ai o sē faamamaluina e se avā lelei, ma o le meaalofa ma le mana o le Atua, o le a i o latou luga i taimi uma. E ao ona faatasia i latou i o latou aiga, ina ia faapea ona alu ifo le Agaga Paia i o latou luga, ma, e ao ona latou ola ina ia mafai e le avā, e ala i le tatalo, ona faapaiaina, ina ia mafai ona ia vaaia le manaomia o le faapaiaina o ia lava i luma o lana tane ma i luma o lana fanau, ina ia tasi i latou, ina ia mafai ona avea le alii ma le avā ua matuā faatasia, ua agavaa e faatumulia se nofoaga i le faatuina ma le fausiaina o le malo o le Atua, ina ia mafai ona latou manavaina se agaga mamā, ma tuuina atu faatonuga mamā i a la’ua fanau, ma i fanau a a la’ua fanau.¹² [Tagai fautuaga 3 i le itulau 144.]

E sili ona lelei le a’oa’oina e fanau o le talalelei, pe a sailia e o latou matua le musumusuga ma faatuina faataitaiga lelei.

E lē o sa tatou galuega lenei ua tatou auai, o le galuega a le Atua. Ua faatonuina i tatou i a tatou gaoioiga e se tagata silisili ese. … O le lumanai o lenei malō, o le a faalagolago i a tatou fanau; ma o lona malosiaga ma le tulaga manumalō a’ia’i, i luga o lo latou a’oa’oina ma a’oa’oga tatau. Afai tatou te manana’o ia i ai se aafiaga lelei i luga o ō tatou aiga, e ao ona tatou faaalia ia i latou faataitaiga lelei, e o’o lava i le tuuina atu ia i latou o mataupu lelei. E tatau ona mafai ona tatou faapea atu, fai e pei ona ou faia, e faapea foi ona faapea atu, fai e pei ona ou fai atu ai.¹³

Tauivi e a’oa’o lau fanau i se auala, e le gata i faataitaiga a o mataupu, ina ia latou mulimuli ai ma le leai o se faatuai, i au faataitaiga ma avea ai ma se tagata faamaoni mo le upu moni e pei ona sa avea ai oe.¹⁴

O alii e mananao e faatumauina lo latou tulaga i luma o le Atua, i le perisitua paia, e ao ona i ai le agaga o valoaga, ma ia agavaa e taitaiina olaga ma le faaolataga o tagata; ma [e tusa] pe afai latou te lē mafai ona faia i le lalolagi, e ao ona latou faia i le aiga, i o latou aiga, i o latou falefaigaluega ma magaala, ina ia musuia o latou loto i upu o le ola i a latou faeasaite, i le a’oa’oina o le talalelei i a latou fanau, ma o latou tuaoi, i le malosi e tatau ai, ina ia mafai ai pe a latou saunoa atu i o latou uso mai lenei tulaga. O lenei, i le maua ai o sina vaega itiiti o le Agaga, pe a tutū atu i luma o tagata, ona toe faataatia ese lea o le Agaga, o le a lē taliaina. O nisi alii o le a lauga atu i le nuu, ona toe o lea i aiga … , ma, nai lo le i ai o upu o le ola ia i latou, e matuā oti lava faaleagaga, ae o lenei mea o le a lē taliaina lava.

Ua avea ma tiute o tamā o Isaraelu, le ala mai ma avea ma faaola o tagata, ina ia mafai ona savavali i luma o le Alii, i lena malosi o le faatuatua ma lena mana’o, lena o le a faamautinoa ai mo i latou le musumusuga a le Silisili Ese, e a’oa’o atu upu o le ola i o latou aiga. …

I lenei tulaga, o le a tatou vaaia ai se agaga o le naunautaiga lea o le a mafai ai e i tatou ona tasi, ina ia tatou a’oa’o ai e alofa le tasi i le isi, ma ou te tatalo i le Alii, ina ia tuuina mai le alofa i o tatou loto taitasi, lea na Ia tuuina ifo ia Iesu lona Alo, ma, ina ia faaauau ona Ia faasoa mai se malamalama o lena mea lelei.¹⁵

O le tiute o le tamā, o le ola ia agavaa e a’oa’o ma faatonu lana fanau, ma ia a’oa’o i latou i a’oa’oga faavae, ina ia mafai ai e i latou, e ala i le usiusitai i na faatonuga, ona avea ma tagata sili ona fiafia e mafai ona avea ai, a o laiti i latou, i le taimi lava e tasi, latou te a’oa’o ai foi a’oa’oga faavae lea e mafai ai ona latou maua le fiafia ma le olioli silisili i se tulaga faatagata matua.¹⁶

O a tatou fanau, pe afai tatou te filigā e atiina ae i totonu ia i tatou lava o a’oa’oga faavae mamā o le olaga ma le faaolataga, o le a tuputupu a’e i le malamalama i nei mea, ma mafai, e ala i le faigofie sili atu nai lo i tatou, ona uunaia le atiina ae o se malo faalelagi ma faatuina le fiafia ma le filemu i o latou siosiomaga.¹⁷ [Tagai fautuaga 4 ma le 5 i le itulau 144.]

Fautuaga mo Suesuega ma le Aoaoina Atu

Mafaufau i manatu nei a o e su’esu’eina le mataupu, pe, a o e sauni e a’oa’o atu. Mo nisi fesoasoaniga, tagai i itulau v–vii.

Iloilo lagona o Peresitene Snow e uiga i le aumaia faatasi o lona auaiga atoa (itulau 137–8). O a nisi o taunuuga lelei e mafai ona o’o mai, pe a tatou aumaia faatasi o tatou auaiga? E faapefea ona tatou fesoasoani i o tatou aiga ina ia tumau i le lotogatasi?
O a auala ua avea ai le parakalafa lona lua i le itulau 138 ma tulaga fetaui i aso nei? O a mea e mafai ona tatou faia e fesoasoani ai i le autalavou a le Ekalesia ia malamalama ai i le paia o le feagaiga o le faaipoipoga? O le a se mea e mafai ona tatou faia e fesoasoani ai ia i latou e tulimatai atu i le faaipoipoga ma le avea ai ma matua?
Na saunoa mai Peresitene Snow faapea “o nai feeseeseaiga laiti faalētaua tele” e mafai ona “faaleagaina ai lo [tatou] fiafia” i le aiga (itulau 140). O a nisi o manatu patino e mafai ona fesoasoani ia i tatou e aloese ai mai lenei tulaga “faaleagaina”? (Mo nisi o faataitaiga, tagai i itulau 140–4.)
Su’esu’e le vaega o loo amata i le itulau 141. Aisea e te manatu e manaomia e matua ona faapea atu “fai e pei ona ou faia” e faaopoopo atu i le “fai e pei ona ou fai atu ai”? O a auala e mafai ai e matua ona a’oa’o atu e ala i faataitaiga? O a nisi o aoaoga faavae ua e aoaoina ona o faataitaiga lelei a ou matua?
Sa faaalia e Peresitene Snow lona atugaluga e uiga i matua, o e aoao atu ma le malosi i le ekalesia, ae le faapena i le aiga (itulau 142–4). Manatunatu e uiga i mea e mafai ona e faia e faasoa atu ai “upu o le ola” i lou aiga.

Mau Talafeagai: 1 Nifae 8:10–12; Helamana 5:12; MF&F 68:25–28; 93:40–50; 132:19–20

Fesoasoaniga mo le Aoao Atu: “E tatau ona e faaeteete ina ia lē tele atu lau talanoa nai lo le tulaga manaomia, pe, o le faaalia soo o ou manatu. O nei gaoioiga e mafai ona lē maua ai e le tagata aoao le fiafia i le mataupu…. O lou popolega autu e tatau ona i ai, o le fesoasoani lea i isi e aoao le talalelei, ae le o le faia o se lesona manaia. O lenei mea, e aofia ai le tuuina atu o avanoa mo tagata aoao e aoaoina ai e le tasi le isi” O Le Aoao Atu, E Leai se Isi Valaauga e Sili Ai, 64).

O fanau o “se tofi taua mai le Alii.”

E tatau ona tauivi matua e “fusia faatasi o [latou] aiga ina ia tasi.”