Mataupu 17

O Le Perisitua—“mo le Faaolataga o le Aiga o Tagata”

“O le perisitua ua tatou umia, ua faaalia mai mo le faaolataga o le aiga o tagata. E ao ina tatou mataala i o tatou mafaufau e tusa ai ma lena tulaga.”

Mai le Soifuaga o Lorenzo Snow

Sa faauuina Elder Lorenzo Snow o se Aposetolo i le aso 12 Fepuari, 1849. I le valu masina mulimuli ane, sa valaauina ai o ia e faatuina se misiona i Italia. Faatasi ai ma isi uso, o e sa valaauina e talai, sa ia malaga ese loa mo lenei misiona i le aso 19 Oketopa, 1849. Sa faia e ia ma ana soa le malaga umi e ala i le savavali, tietie i solofanua, ma le vaa.

Ina ua taunuu i Italia ia Iuni 1850, sa latou iloaina ai ma ana soa o tagata i aai tetele o Italia, sa le’i saunia e talia le talalelei. Ae, o se nuu e ta’ua o Waldenses, sa tosina atu i ai lona mafaufau, ma sa musuia o ia e galulue ma i latou. Sa soifua tagata Waldenses mo le faitau seneturi i le vaega mamao ese o Piedmont—o se vanu e i le itu i saute o le tuaoi o Italia ma Suitiselani, ma e i le tuaoi i sasae o Italia ma Farani. Ina ua maea ona fausia lo latou nuu, ona o se mana’o mo suiga fou o mataupu faalelotu, sa latou tuutō atu loa i le su’esu’eina o le Tusi Paia, ma mulimuli ai i Aposetolo a le Faaola.

Sa saunoa mai Elder Snow faapea, ina ua ia mafaufau e tala’i le talalelei i tagata Waldenses, “sa foliga ua oo mai i lo’u mafaufau se aofaiga tele o le malamalama.”¹ Peitai, e ui i nei faamautinoaga, sa ia lagonaina ua le o se tulaga poto le amata o le talaiga i lena lava taimi, ona o fili o le Ekalesia ua latou tufatufaina tusitusiga i tagata, ma faasalalauina tala sesē e uiga i le Ekalesia.² Sa lipotia faapea e Elder Snow, “Ina ua ou lagona ua ta’u mai e le Agaga ua tatau ona matou amata loa, muamua, e ala i ni laasaga faifai malie ma le faaeteete, sa ou gauai atu loa i le finagalo o le lagi.”³

E ui sa le’i amataina i le taimi lava lena le talaiga a faifeautalai, ae sa vaavaaia e Elder Snow le lolomiina o lautusi i le gagana Italia ma Farani. E le gata i lea, sa faauo atu ai o ia ma ana soa i tagata na siomia ai i latou. “Sa matou faasaga ma le malosi e faataatia se faavae mo se faamoemoega aoga i le lumanai,” sa ia faapea mai, “i le sauniaina ma le lē leoa o mafaufau o tagata mo le taliaina o le Talalelei, e ala i le galueaiina o lagona faaleuo i loto o i latou, o ē sa siosiomia ai i matou. Peitai, sa ou lagonaina se tulaga ese, sa o’o mai se suega tele o lo’u onosa’i, i vaiaso ma masina, i le totonugalemu o se nuu mata’ina, e aunoa ma le auai malosi ma faalauaitele i le faamatalaina atu o a’oa’oga faavae sili lea na ou sau e tala’i atu.”⁴

O lagona o tagata Waldenses e uiga i le Ekalesia, na amata ona matuā suia ina ua mae’a ona faatinoina e Elder Snow se faamanuiaga faaleperisitua i se tamaitiiti, o lē sa tigaina lona ma’i. Sa tusia e Elder Snow i totonu o lana api talaaga:

“6 Sete.—I le taeao nei, sa taula’i atu ai la’u vaai ia Joseph Guy, o se tamaitiiti e tolu tausaga le matua, o le uii a le aiga lea sa matou nonofo ai. E toatele uo na o mai e vaai i le tamaitiiti, e pei ona foliga mai ai i le vaaiga faaletagata, ua latalata mai lona oti. Sa ou alu e vaai o ia i le aoauli: ua faataumaoia e le oti lona tino; o lona tino sa maloloina ua na o se auivi, ma sa na o le vaavaai toto’a atu i ai, na mafai ai ona matou iloaina o loo ola pea o ia.”

I le faapopoleina ai ona o tagata sa teenaina le talaiga o le talalelei, ma le popole e uiga ia Joseph Guy le itiiti, sa liliu atu ai Elder Snow i le Alii mo se fesoasoani i lena afiafi. Sa ia toe manatuaina mulimuli ane: “Mo ni nai itula, ae ou te le’i alu ou te moe, sa ou valaau atu ai i le Alii ina ia fesoasoani mai ia i matou i lenei taimi. O o’u lagona i lenei tulaga, o le a lē vave ona faagaloina.

“7 Sete.—I le taeao nei, sa ou fautuaina ai … ina ia matou anapopogi, ma mapu atu i mauga, ma tatalo ai. A o matou malaga ese atu, sa matou asiasi atu ai i le tamaitiiti; o ona mata sa o agai i luga: o ona laumata ua pauu i lalo ma moeiini: o ona foliga ma taliga ua manifinifi, ma ua lanumoana vaivai, e foliga mai ua lata ona oti. Sa afu malulu lona tino atoa, ma ua toetoe ina uma atu lona ola. Sa fetagisi Madame Guy ma isi tamaitai, ae sa faagaugau le ulu o Monsieur Guy.” Sa musumusu atu Monsieur Guy ia Elder Snow ma isi faifeautalai, ma faapea atu, “Ua oti o ia. Ua oti o ia.”

Sa faaauau faapea Elder Snow: “Ina ua mavae sina malologa puupuu i le atumauga, i se mea ua leai se isi tulaga e faalavelaveina ai, sa matou valaau atu ai i le Alii iina, i le tatalo faatauanau, ina ia faasaoina le ola o le tamaitiiti. A o o’u mafaufau loloto i le mea e tatau ona matou fai, o mea e le o toe mamao ona matou molimau atu ai lea i le lalolagi, sa ou manatu ai o se mea taua tele lenei. Ou te lē iloaina se isi lava osigataulaga, lea sa mafai ona ou faia, sa ou lē naunau e ofoina atu, ina ia mafai ai e le Alii ona tali mai i a matou talosaga.”

Ina ua latou toe foi atu i le aiga o Guy i lena aoauli, sa tuuina atu ai e Elder Snow ia Iosefa se faamanuiaga faaleperisitua. I nai itula mulimuli ane, na latou o ai e vaai le aiga, ma sa ta’u atu e le tamā o Iosefa, “faatasi ma se foliga ataata o le loto faafetai,” ua faasolosolo manuia le tamaitiiti.

“8 Sete.—Ua manuia le tamaitiiti, o le mea lea na mafai ai e ona matua ona faia se malologa, lea sa lē mafai ona maua muamua. O le asō, sa mafai ai e i laua ona tuua o ia, ma o atu e faia nisi mea.” Ina ua faaalia e le tina o Iosefa lona olioli i le toe malosi ai o le tamaitiiti, sa tali atu ai Elder Snow, “O le Atua o le lagi ua faia lenei mea mo oulua.”

“Mai lena taimi, sa amata ona faasolosolo manuia o ia,” sa tusia ai e Elder Snow, “ma, faatasi ma se loto ua faatumulia i le agaga faafetai i lo tatou Tama Faalelagi, ou te fiafia e faapea atu, i ni nai aso, sa ia tuua ai lona moega, ae faatasia ma ana uo.”⁵

Ina ua mavae lenei mea na tupu, sa lagonaina e Elder Snow o tulaga o mea na i ai sa “matuā lelei lava e pei ona sa faamoemoeina ai” mo le galuega a le Alii ina ia alualu i luma i le nuu. I le aso 19 Setema, 1850, na atoa lelei i ai le 11 masina talu ona ia tuua lona aiga e auauna ai i Italia, na ia ta’uina atu ai i ana soa ua tatau ona latou “amata [la latou] galuega faalauaitele.” Sa latou toe aea se mauga, lea sa faapaiaina ai e Elder Snow le laueleele mo le talaiina o le talalelei toefuataiina.⁶

O upu a Elder Snow ia Madame Guy—“o le Atua o le lagi ua faia lenei mea mo oulua”—sa toe faaalia ai ana a’oa’oga o le olaga atoa e uiga i le perisitua. Sa ia faamanatu i le Au Paia faapea e ala i le galuega a i latou e umia le perisitua, “o le mamalu ma le mana o le Atua [o le a] faaalia” mo le manuia o isi.⁷ [Tagai fautuaga 1 i le itulau 231.]

Aoaoga a Lorenzo Snow

O uso ua umia le perisitua o avefeau a le Silisili Ese, faatasi ma le pule ua faamatuu mai le lagi e faatino ai sauniga paia.

O i tatou, le Au Paia o Aso e Gata Ai, ua molimau atu ua tatou maua mai le Atua le atoaga o le talalelei e faavavau; tatou te molimau atu ua ia i tatou le Perisitua paia—le pule ua tuuina mai e le Atua i tagata, lea ua mafai ai ona tatou faatinoina ona sauniga i se ala na te taliaina.⁸

O soo se tagata o le a faamaulaloina o ia lava i luma o le Atua, ma o le a faalilofiaina i le vai, pe a uma ona salamō, mo le faamagaloga o ana agasala, o le a mauaina, e ala i le faaeega o lima, le meaalofa o le Agaga Paia. E mafai ea ona ou tuuina atu lenei mea ia te ia? E leai, o a’u, i le avea ai na o se avefeau a le Silisili Ese, lea ua tuuina mai i ai le pule, e faatinoina ai le faatofuina mo le faamagaloina o agasala; na pau le mea ou te faia o le faatofu o ia i le vai, i le i ai lea o le pule e faia ai. E na o lo’u faaeeina foi o o’u lima i ona luga mo le mauaina o le Agaga Paia, ona faia lea e le Atua, mai lona afioaga, faamaonia la’u pule, faamaonia faapea o a’u o lana avefeau, ma tuu atu le Agaga Paia i luga o le tagata.⁹

Ina ua [ou] papatisoina tagata ma faatinoina sauniga o le perisitua paia, sa faamaonia e le Atua na faatinoga e ala i le auina mai o le Agaga Paia, i le tuuina atu o se malamalama i tagata taitoatasi o e na ou faatinoina i ai sauniga, faatalitonuina i latou faapea o le pule sa tuuina mai le lagi. Ma o soo se toeaina, o ē na muamua atu e talai lenei Talalelei e faavavau, ma galue i le agaga o lona valaauga, e mafai ona tuuina atu lea lava molimau e tasi, faapea e ala i lo latou faatinoga o nei sauniga paia, o le mamalu ma le mana o le Atua ua faaalia i se faiga faatalitonuina i luga o ulu o i latou o ē ua latou faamanuiaina. O la matou molimau lenei; o le molimau lea [i le 1830] a se tagata patino, o lē sa sau ma faailoa mai sa faatagaina o ia e le Atua e papatiso tagata mo le faamagaloga o agasala, ma faae’e aao i luga o i latou mo le mauaina o le Agaga Paia, lea e tatau ona tuuina atu i o latou luga se malamalama mai lalolagi e faavavau faapea na ia te ia lenei pule. O lenei tagata o Iosefa Samita; ma sa ia faae’eina lenei pule, lea sa tuuina atu ia te ia e agelu paia, i luga o isi o ē sa auina atu e molimau i le lalolagi faapea o i latou o ē o le a mauaina na sauniga paia, e tatau ona maua le molimau mai le Silisili Ese faapea sa faatagaina i latou ina ia faatinoina. Ma o la matou molimau lenei; ma o la’u molimau lenei i luma o lenei nuu ma luma o le lalolagi.¹⁰

O fea i le lalolagi atoa e mafai ai ona e maua ai se vaega o faiaoga faalelotu e mafai ona latou tauaveina tulaga e pei ona faia e o tatou toeaina? O fea se alii po o se vaega o alii, e mafai ona maua, e mafai ona tuuina atu i latou lava i le lalolagi ma faapea atu ua faatagaina i latou e le Atua e faatino sauniga patino i tagata e ala i le mea lena atonu na latou maua mai se faaaliga mai le Atua? Soo se tasi e faalauiloaina se mataupu o lenei ituaiga, o le a le pine ae iloa o ia o se tagata faafoliga—o le a ia tuuina o ia lava i se tulaga sili ona matautia, ma o le a le pine, ae iloa ai pe na te umiaina sea ituaiga o pule. Ae ui i lea, o ō tatou toeaina, ua tautino atu lenei tulaga. … Ua auina mai e le Atua ana agelu paia mai le lagi ma toefuataiina le pule i tagata ina ia faatino ai sauniga o le talalelei.¹¹ [Tagai fautuaga 2 i le itulau 231.]

O le perisitua e fesoasoani ia i tatou ia maua le fiafia i lenei olaga, faapea le faavavau atoa.

Ua uma ona toefuata’i mai le perisitua; sa toe tuuina mai i luga o tagata, faapea e ala i lena perisitua, o i latou uma o e o le a mananao ia lelei ma fiafia, o le a mauaina le avanoa. E ta’u mai e le talalelei ia i tatou le auala e avea ai ma tagata sili, lelei ma fiafia. O le agaga o le talalelei a Keriso e a’oa’oina mea uma, lea e manaomia mo lo tatou olaga manuia i le taimi nei ma le lumanai.

Ua ia i tatou nei sini faamoemoeina o le mafaufau i le aso nei, ma e tatau ona faifai pea ona tatou tausia i latou. Mafaufau i tua mo le luasefululima tausaga, pe toe mafaufau mo na o le sefulu tausaga, ma o se fuaitau tele o tagata ua i ai i le ekalesia i lena taimi umi, ma vaai po o a mea ua tatou ausia. O le a mamao atu la tatou vaai ma sili atu ona malamalama i mea, o le mea lea, ua sili atu ona tatou saunia lelei mo mea ua o’o mai i le lalolagi nai lo le sefulu, sefululima, luasefulu, po o le luasefululima tausaga talu ai, ina ia iloa ai pe faapefea ona aoga, ina ia iloa pe faapefea ona faia mea e pei ona sa tatau ai ona faia. …

… O le faamoemoega autu o le perisitua o le faia ia fiafia [tagata] uma, ia faasalalauina atu faamatalaga, ia faia tagata uma ia maua faamanuiaga tutusa, pe a o’o i o latou taimi e tatau ai.¹²

Mo lenei lava faamoemoega, o le Perisitua Paia, ua toe tuuina mai i le taimi lenei, e taiala ma faaatoatoaina ai le Au Paia a le Atua iinei, o le a tutusa lava lona tele e pei o le tele o le galuega tatou te faataunuuina e maua ai le malamalama i lenei lalolagi ma le amiosa’o, ma le faatuatua … , ma e faapena foi i le tulaga faaeaina tatou te foliga mai ai i le isi itu o le veli.¹³

Ua fetalai mai le Alii o le a Ia tuuina mai ia i tatou mea uma ua ia te Ia—ma e tusa ma le tautoga ma le feagaiga lea e faatatau i le Perisitua [tagai MF&F 84:33–44]. E lē tatau ona i ai se tasi e masalosalo i le mea na fetalai ai Iesu, ma ua Ia tautino mai, e pei ona faamauina i le Faaaliga a Ioane, “O lē manumalo ou te avatua ia te ia ma te nonofo faatasi ma a’u i lo’u nofoalii, e pei o a’u foi ona ou manumalo, ua ma nonofo foi faatasi ma lo’u Tamā i lona nofoalii.” [Faaaliga 3:21.] E i ai ea se isi mea e mafai ona ta’u atu e sili atu i lo lena? E le ua lava ea lena e faamalamalama ai mea uma?¹⁴

O lenei talalelei ua tatou mauaina, sa faaalia mai le lagi, ma o le perisitua ua tatou umia sa faaalia mai mo le faaolataga o le aiga o tagata. E ao ona tatou mataala i o tatou mafaufau e tusa ma lena mea.¹⁵ [Tagai fautuaga 3 i le itulau 231.]

O le au perisitua amiotonu latou te saili atu ma le filigā, ma le malosi mo meaalofa faaleagaga ina ia fesoasoani ia i latou e auauna ai i isi.

Mo o’u uso i le Perisitua, ou te mana’o e ofoina atu ni nai upu faafautuaga, faatonuga ma apoapoaiga. I o outou luga ua i ai tiutetauave maualuluga ma paia, lea e fesootai, e le gata i le faaolataga o lenei augatupulaga, ae o le tele o augatupulaga ua mavae, ma le tele o le a o’o mai. O le tagavai faamamaluina o le malo o Emanuelu, lea ua toe faatuina i le lalolagi, e ao ona faailoa atu i atunuu taitasi, malō, ma pulega; le leo o le lapataiga … e ao ona aveina atu i nuu uma; o outou o e ua filifilia e le Alii mo lenei faamoemoega, e o’o lava i le ulumatua a Iosefa, ina ia tuufaatasia le nuu [tagai Teuteronome 33:13–17]. E moni lava, e lē mafai ona outou auai ma le naunautai sili, po o le maelegā silisili, i le sailia o se auala sili, le faiga sili ona aogā mo outou ma tagata soifua, e faalautele ai o outou tofi paia ma mamalu.¹⁶

E i ai alii i lenei Ekalesia, o e tusa ona lelei i o latou loto ma lagona e pei o nisi lava alii na i ai muamua, ae leai se faatuatua ma se malosiaga, ma ua le maua tonu ai le mea ua avea ma o latou avanoa e talia ai. Afai o lo latou faatuatua, lo latou malosiaga ma naunautaiga ua tutusa ma o latou lagona ma manaoga lelei, lo latou faamaoni ma uiga lelei, o le a avea moni lava i latou ma alii sili ona malolosi i Isaraelu; ma o ma’i ma faama’i, ma le mana o le tiapolo o le a sola ese i o latou luma e pei o aputi saito ua lelea i le matagi. Ae ui i lea, tatou te faapea ifo o i tatou o se nuu lelei, ma faapea, e le gata ina tatou faapea ua tutusa lava la tatou faatinoga ma isi, ae o loo faia ni tulaga agai i luma tele o le amiotonu i luma o le Atua; ma e le taumateina, o loo tatou faia. Ae, ou te fia faamamafa atu ia te outou, o’u uso e ma tuafafine, o loo i ai toeaina ia te i tatou, ua faapaiaina i meaalofa faaleagaga, lea atonu e mafai ona faaaogaina e ala i le fesoasoani mai o le Agaga Paia. O meaalofa o le talalelei, e ao ona galueaiina e ala i le filigā ma le sogasogā. O perofeta anamua, pe a manana’o i ni faamanuiaga uiga ese, po o se malamalama taua, faaaliga po o faaaliga vaaia, e anapopogi i nisi o taimi ma tatalo mo aso ma vaiaso mo lena faamoemoega.¹⁷

O’u uso talavou e, pe a lē lelei mai mea mo outou, pe a foliga pogisa mai mea uma, ia fai lou tiute, ma o le a avea outou ma alii malolosi, alii sili ona malolosi; o tagata mama’i o le a faamaloloina i lalo o la outou faamanuiaga; o agaga leaga o le a sosola ese mai ia te outou; o le a toe faatuina tagata oti; ma mea uma lava sa mafai ona faia e tagata mai aso o Atamu, o le a mafai ona e faia e ala i le mana o le Atua ma se naunautaiga tonu.¹⁸

O le mama, amioga mama, faamaoni, amioatua, e ao ona sailia ma le naunautaiga sili, pe o le a le mafai ona maua le pale. O na aoaoga faavae, e ao ona faaaogaina [i totonu] ia i tatou, lalagaina i totonu o ō tatou tino faaletino, avea ma vaega o tatou, ia fai i tatou ma ogatotonu, o se vaipuna o le upu moni, o le tulaga tutusa, faamasinoga, ma le alofa tunoa, o mea uma e lelei ma sili, ina ia alu atu mai ia i tatou le malamalama, le ola, le mana, ma le tulafono e faatonu, e pulea ma fesoasoani ai e laveaiina se lalolagi femoumouai; avea ma atalii o le Atua, ma e avea ma sui o lo tatou Tama o i le lagi. Tatou te faamoemoe faapea i le toetutu o le a tatou faaaoga ai mana o ō tatou perisitua—lea e na o le pau le taimi e mafai ona tatou faaaogaina, o lona tulaga faatusatusa ma lo tatou mauaina o lana amiotonu ma atoatoaga; o nei tulaga agavaa e na o le pau le taimi e maua ai o le sailia ma mauaina, ina ia o’o ai i le amataga o le toetu, o le a tatou mauaina ai na mea na mafai ona tatou mauaina i lenei lalolagi! O le amioatua e lē mafai ona tuuina mai ae ao ona mauaina, o se mea moni lea e foliga ese ma faanoanoa i le lalolagi faalelotu. Saili ina ia faamanuiaina isi, ma o le a saili foi isi e faamanuia outou; ma o lē o le a sili, ia fai o ia ma tagata lelei, i le vaai atu mo manaoga o le vaega atoa, i le avea ai ma auauna o tagata uma.¹⁹

I le avea ai ma Au Paia a le Atua, Toeaina o Isaraelu, e tatau ona tatou naunau e tuuina atu taimi ma auaunaga, i le faia ai o osigataulaga taitasi e tatau ai ina ia maua ai le agavaa faaleagaga tonu e matuā aoga i le tele o ō tatou valaauga eseese. Ma, tau ina ia musuia e le Alii loto taitasi i le taua o nei mataupu, ina ia mafai ona tatou saili ma le filiga ma le malosi e tatau ai mo meaalofa ma mana folafolaina i totonu o le talalelei ua tatou usitaia.²⁰ [Tagai fautuaga 4 o loo i lalo.]

Fautuaga mo Suesuega ma le Aoaoina Atu

Mafaufau i nei manatu, a’o e suesueina le mataupu, pe, a’o e sauni e a’oa’o atu. Mo nisi fesoasoaniga, tagai i itulau v–vii.

Toe iloilo le tala o i le itulau 221-5. O a ni auala e mafai ai e le Au Perisitua Mekisateko ona saunia i latou lava e tuuina atu faamanuiaga faaleperisitua? O a mea e mafai e i tatou uma ona faia, e saunia ai i tatou lava ina ia maua faamanuiaga faaleperisitua?
Faitau le palakalafa i le pito i lalo o le itulau 225. O a auala e faaalia ai i sauniga faaleperisitua, le mana o le Atua i o tatou olaga?
O a auala e fesoasoani ai sauniga ma faamanuiaga faaleperisitua, ia i tatou uma e maua ai le fiafia i lenei olaga? E faapefea ona fesoasoani ia i tatou, ina ia maua le fiafia e faavavau? I le fesootaiga ma nei fesili, ia mafaufau loloto i aoaoga a Peresitene Snow i le itulau 227–8.
I itulau 229–30, iloilo meaalofa faaleagaga ia na uunaia e Peresitene Snow le au perisitua e atiina ae. O le a sou manatu i le uiga o le galueaiina o se meaalofa faaleagaga? E faapefea ona fesootai lenei fautuaga i taumafaiga a tagata uma o le Ekalesia?

Mau Talafeagai: Iakopo 5:14–15; Alema 13:2–16; MF&F 84:19–22; 128:8–14; Mataupu Faavae o le Faatuatua 1:3, 5

Fesoasoaniga mo le Aoao Atu: “Ina ia fesoasoani i le vasega e saunia e tali fesili, atonu e te manao e ta’u atu ia i latou, a o le i faitauina pe tuuina atu se mataupu, o le a e fesiligia i latou mo ni a latou tali. … Mo se faataitaiga, e mafai ona e faapea atu, ‘Faalogo a o o’u faitauina lenei fuaitau, ina ia mafai ai ona e faasoa mai mea na sili ona e fiafia i ai e uiga i le tala’ po o le ‘A o faitauina lenei mau, vaai pe mafai ona e malamalama i le mea o loo tauina mai e le Alii ia i tatou e uiga i le faatuatua’” (O Le Aoao Atu, E Leai Se Isi Valaauga e Sili Ai, 69).

O se ata o aso nei o le itulagi o Piedmont i Italia, lea sa auauna ai Elder Lorenzo Snow o se faifeautalai faamisiona i le amataga o le 1850.

O tagata auai uma faatuatua o le Ekalesia, ua faamanuiaina e ala i sauniga ma feagaiga faaleperisitua.

O Aposetolo anamua o Peteru, Iakopo, ma Ioane na faae’eina le Perisitua Mekisateko i luga o Iosefa Samita ma Oliva Kaotui.