O Le Soifuaga ma le Galuega a Lorenzo Snow

Ina ua malaga ese atu Lorenzo Snow, i le 21 o ona tausaga, i luga o lana solofanua, mai le fale o ona matua i se tasi o aso i le 1835, sa ia faatūtū atu mo le Kolisi o Oberlin i Oberlin, Ohio. Na te le’i iloaina faapea i lenei malaga puupuu, o le a ia maua ai se aafiaga o le a suia ai le ala o lona soifuaga.

I le tietie atu ai i lana solofanua i le auala i lona nuu o Mantua, Ohio, sa ia feiloai ai i se alii, o lē sa tietie mai foi i lana solofanua. O lenei alii, e suafa ia David W. Patten, faatoa maea ona faauuina o se Aposetolo a le Alii o Iesu Keriso. O loo toe foi atu o ia i le Au Paia o Aso e Gata Ai i Katelani, Ohio, ina ua mae’a sana misiona. Sa malaga faatasi nei alii e toalua mo le tusa o le 30 maila (50 kilomita). Sa tusia e Lorenzo Snow mulimuli ane:

“Na liliu atu la ma’ua talanoaga i mataupu tau lotu ma filosofia, ma talu ai sa ou talavou ma aoaoina lelei, i le taimi muamua sa ou le faatauaina ai ona manatu, aemaise lava, sa tele ina le sa’o lelei lona faaaogaina o le kalama o le gagana; ae peitai, a o ia faaauau ai i lana ala faatauanau ma le lotomaualalo e faamalamalama le ata o le faaolataga, sa foliga mai sa lē mafai ona ou teenaina le malamalama faapea o ia o se tagata o le Atua, ma e moni lana molimau.”¹

Sa le’i avea Lorenzo Snow ma se tagata o Le Ekalesia a Iesu Keriso o le Au Paia o Aso e Gata Ai, i le taimi na feiloai ai ma Elder Patten, ae sa ia iloaina nisi o aoaoga a le Ekalesia. O le mea moni, sa asiasia e le Perofeta o Iosefa Samita le fale o le aiga o Snow, ma sa papatisoina le tina o Lorenzo ma ona tuafafine o Leonora ma Eliza, ma faamauina o ni tagata o le Ekalesia. Peitai ane, o Lorenzo sa ia, e pei ona ia saunoa ai, “pisi i le faia o isi mea” i lena taimi, ma o mea faapea sa “lē i ai atoatoa i lona mafaufau.”² Sa amata ona suia lena mea, ina ua maea ona ia talanoa ia Elder Patten. I le talanoa ai i le mea na tupu, na ia saunoa ai, “O le mea lenei na suia ai lo’u olaga.”³ Na ia faamatalaina lona lagona i le taimi o le talanoaga:

“Sa ou lagonaina le tuia o lo’u loto. O le mea lenei sa ia vaaia ma le mautinoa, aua na toetoe lava o le mea mulimuli na ia saunoa mai ai ia te a’u, ina ua uma ona ia tuuina mai lana molimau, o le faapea mai lea e tatau ona ou alu i le Alii, ae ou te le’i moe i lena po, ma fesili atu ia te Ia mo a’u lava. O le mea lenei na ou faia, ma faatasi ma le taunuuga mai lena aso na ou feiloai ai i lenei Aposetolo sili, sa faateleina ma lē mafuatiaina o’u faanaunauga uma.”

O “lagona faamaoni a’ia’i, o ona faanaunauga ma le malosiaga faaleagaga” o Elder Patten⁴ sa i ai se uunaiga tumau i le alii talavou, o lē o le a i ai se aso e avea ai o ia o se Aposetolo. Ma o lena talanoaga filemu sa taitai atu ai i isi aafiaga, lea o le a saunia ai Lorenzo Snow e avea ma Peresitene o Le Ekalesia a Iesu Keriso o le Au Paia o Aso e Gata Ai, le fofoga o le Atua i le lalolagi.

O Le Tuputupu A’e ai i totonu o se Aiga o le Faatuatua ma le Galulue Malosi

O ni aiga malolosi e lua, sa mauoa i le faatuatua ma tu ma aga faalelotu, sa soofaatasi ina ua faaipoipo atu Oliver Snow ia Rosetta Leonora Pettibone i le aso 6 Me, 1800. O le faatoafaiava ma le faatoanofotane, o ni suli o nisi o uluai tagata mai Europa na aina ai le Iunaite Setete—o tagata sulufai faalelotu mai Egelani, o e sa sopoia le Vasa Atelani i le 1600 ina ia sosola ese ai mai sauaga faalelotu. Sa faaaluina e Oliver ma Rosetta nai tausaga muamua o lo la soifuaga faaipoipo i le setete o Massachusetts, lea na fananau ai o la’ua afafine o Leonora Abigail ma Eliza Roxcy. Ona latou malaga atu lea i Mantua, Ohio, lea sa avea i lena taimi ma se tasi o nuu sili ona mamao ese i sisifo o le Iunaite Setete. O i latou le aiga lona sefulutasi na malaga atu i lea nofoaga. I Mantua, e toalua isi afafine, o Amanda Percy ma Melissa, na fananau i totonu o le aiga. O Lorenzo, le tamaitiiti lona lima ma le atalii muamua o Oliver ma Rosetta, sa fanau i Mantua i le aso 3 Aperila, 1814. Mulimuli ane, sa maua ai isi uso laiti e toalua o: Lucius Augustus ma Samuel Pearce.⁵

Mai i tu ma aga masani a o laua aiga, sa aoao ai e Oliva ma Roseta a laua fanau i le taua o le faatuatua, galue malosi, ma aoaoga. A o latou fefaasoaai tala o faigata na latou feagai, e faavae ai lo laua aiga, na aoaoina e la laua fanau e faatoilalo le lotovaivai ma faafetaia faamanuiaga a le Atua i o latou olaga. Na tusia e Eliza: “E mafai ona matou fai atu moni lava e uiga i o matou matua, o lo laua faamaoni sa mama aiai, ma sa faatuatuaina i laua i sootaga ma isi tagata ma feutagaiga faapisinisi o le olaga; ma sa aoaoina ma le faaeteete a laua fanau ina ia i ai mausa o le galue malosi, tamaoaiga, ma le ola mama aiai.”⁶ Sa faaalia e Lorenzo le agaga faafetai aua sa laua tausia o ia, i taimi uma, ma le faapelepele ma le agalelei.”⁷

A o tuputupu a’e Lorenzo, sa ia galue ma le filiga i gaoioiga faaletino ma faalemafaufau. Sa tele taimi e leai ai lona tama mai le aiga, ona o loo auauna atu i le nuu “i mea mo le manuia lautele.” I le toesea ai o Oliva, o Lorenzo, i le avea ai ma atalii matua, sa tuua e vaaia le faatoaga—o se tiutetauave sa ia tauaveina ma le loto atoa ma sa faamanuiaina. Pe a le o galue Lorenzo, sa masani lava ona ia faitau tusi. “O lana tusi,” na saunoa ai Eliza, “o lana soa tumau lea.”⁸

I le toe manatua ai o uiga tuputupu a’e o Lorenzo, sa matauina ai e Eliza, “A o avea o se tamaitiiti sa [ia] faaalia ai le malosi ma le lelei o lana faatofalaiga, lea sa vaaia foi i lona olaga atoa.”⁹

Faatoilaloina o Naunauga Faatamaitiiti

Sa uunaia e Oliva ma Roseta suesuega faamaoni e uiga i mataupu faalelotu. Sa laua faatagaina la laua fanau e aoao e uiga i ekalesia eseese, i le tatalaina ai o lo latou fale mo “tagata lelei ma popoto o lotu uma.” E ui lava i lenei uunaiga, o Lorenzo, sa “itiiti lava, po o le leai lava foi o sona mafaufau i mataupu tau lotu, e oo lava i le manao e auai i soo se lotu.”¹⁰ O lana miti ia avea ma taitaiau i le vaegaau, ma o lenei miti sa sili atu lona malosi nai lo isi aafiaga uma i lona olaga, “e le faapea sa fiafia o ia i taua,” na tusia ai e le tusitalafaasolopito o Orson F. Whitney, ae ona sa ia fiafia i le manatu o le mauaina o le mamalu i galuega faavaegaau.”¹¹ Peitai, na le pine ae suia lenei manao i se isi. Sa ia tuua lona aiga ma lesitala i le Kolisi na latalata ane o Oberlin, ina ia mafai ai ona tulituliloaina se “aoaoga i le kolisi.^”12

A o aoga Lorenzo i Oberlin, sa ia atiina ae se manaoga fou i mataupu faalelotu. I le tumau ai o le aafiaga mai la laua talanoaga ma Elder Patten, sa ia lē gata ina mafaufau loloto i mataupu autu o le talalelei toefuataiina, ae sa ia faasoaina atu i isi tagata i Oberlin—e oo lava ia i latou o e sa aooga e avea ma faifeau. I se tusi i lona tuafafine o Eliza, o le sa potopoto faatasi ma le Au Paia i Katelani, sa ia tusia faapea: “I faifeau ma i latou ua faamoemoe e avea ma faifeau, ua faamanuiaina ai lava a’u taumafaiga, o le a ou faamautinoa atu ia te oe, i le lagolagoina ai o le Faa-Mamona. E moni ou te le’i faaosofiaina ni tagata se toatele e auai i le Ekalesia, ona ou te le’i auai foi a’u ia, peitai, ua toeitiiti lava tautino mai e nisi ua latou vaaia le [poto] i a outou mataupu. Ina ia aveesea le manatu faitioina o le Faa-Mamona mai le mafaufau o se tama a’oga a Oberlin, o se mea e le’i faigofie ona faatinoina.”

I le tusi lava lea e tasi, sa tali atu ai Lorenzo i se valaaulia na ia maua mai ia Eliza. Sa ia fuafuaina mo ia ina ia nonofo ma Eliza i Katelani ma suesue ai le gagana Eperu i se vasega na i ai foi le Perofeta o Iosefa Samita ma nisi o sui o le Korama a Aposetolo e Toasefululua. Sa ia saunoa: “Ua faagaeetia lava a’u i le iloa ai o loo e maua le fiafia tele i Katelani; e ui lava o le taimi nei ou te le o manao e siitia atu i le mea o loo e i ai; peitai, afai o avanoa e maua ai se aoaoga iina e tutusa lava, ou te manatu o le a toeitiiti lava o’u manao e siitia atu iina. Aua, afai e leai lava se isi mea sili atu, atonu o le a ou maua ai se mea aoga mai le faalogo i na mataupu autu o talaiina, lea sa ou taumafai e puipuia ma lagolagoina iinei i Oberlin.”

E ui lava sa faagaeetia ia Lorenzo i aoaoga faavae a Le Ekalesia a Iesu Keriso o le Au Paia o Aso e Gata Ai, ae sa faalotolotolua o ia e auai i le Ekalesia. Peitai, sa ia fiafia i ai. I lana tusi ia Eliza, na ia fesili atu ai ni fesili eseese e uiga i le Ekalesia. Sa ia faapea mai o tamaiti aoga i Oberlin, o e sa sauniuni e avea ma faifeau, sa manaomia e “tuuina atu le fitu tausaga po o le sili atu i suesuega faigata ae le’i faatagaina i latou e ta’u atu i tagata lē talitonu, faapea e i ai se Atua i le lagi, faapei o le loia, o lē e tatau ona umia ni agavaa patino ae le’i mafai ona maua le faatagaga e tautala ai.” I le faatusatusa atu i ai, na ia saunoa atu ai i lona tuafafine, “Ou te talitonu o outou tagata e faalagolago tele i fesoasoaniga faaleatua nai lo le mea e mafai ona aoaoina i kolisi, pe a talaiina a outou aoaoga faavae.” Sa ia faailoa mai se manao e malamalama ai i galuega a le Agaga, i le fesiligia ai pe mafai ona faaeeina le Agaga Paia i luga o tagata “i lenei vaitaimi o le lalolagi.” Afai e mafai e tagata ona maua le Agaga Paia, na ia fesili ai, “e tuuina mai ea e le Atua, i taimi uma, e ala mai i se isi tagata?”¹³ I se isi faaupuga, sa ia manao e fia iloa pe sa tatau ona i ai le pule o le perisitua ina ia mafai ai ona maua le Agaga Paia.

Sa faafetaia e Lorenzo faauoga ma le aoaoga sa ia mauaina mai i le Kolisi i Oberlin, ae sa faateleina lona le faamalieina i aoaoga faalelotu sa maua ai iina. Sa iu ina ia tuua le kolisi ma talia le valaaulia a lona tuafafine e aoao le gagana Eperu i Katelani. Na ia saunoa faapea, na pau lava le mafuaaga na ia auai ai i le vasega Eperu, ina ia mafai ona ia saunia e auai i se kolisi i le itu i sasae o le Iunaite Setete.¹⁴ Ae ui o lea, sa vaaia e Eliza faapea i le faaopoopo ai i le aoaoina o le gagana Eperu, sa ia aoaoina foi le tele o mea, ma o lona loto sa tumu i le faatuatua i mea o le talalelei e faavavau.”¹⁵ Sa le’i pine ae ia mauaina tali o fesili sa ia fesiligia i le kolisi o Oberlin, ma ia Iuni 1836, sa papatisoina ai o ia e Elder John Boynton, o se tasi o sui faavae o le Korama a Aposetolo i lenei tisipenisione. Sa faamauina foi o ia o se tagata o Le Ekalesia a Iesu Keriso o le Au Paia o Aso e Gata Ai.

Pe tusa o le lua vaiaso mulimuli ane, sa fesiligia ai o ia e se uo, “Uso Snow, ua e maua ea le Agaga Paia talu ona uma ona papatisoina oe?” Sa ia toe manatua ai, “O lena fesili na toetoe lava faatumulia ai a’u i le lē mautonu ma le lē fiafia. O le mea moni, e ui atonu sa ou mauaina mea uma sa ou manaomia, sa ou le mauaina le mea lena sa ou naunau i ai”—o lona uiga, e ui ua uma ona faamauina o se tagata o le ekalesia, ae na te le’i mauaina se faaaliga faapitoa a le Agaga Paia. “Sa ou lagonaina le lē faamalieina,” na ia saunoa ai, “e le mo le mea ua ou faia, ae e uiga ia te a’u lava. A o i ai lena lagona, sa ou alu atu i se nofoaga lea sa ou fiafia e tatalo ai i le Alii.” Sa ia tootuli e tatalo ma sa faafuasei lava ona maua se tali o ana tatalo. “O lena mea, o le a le mafai lava ona aveesea mai lo’u manatuaina, e tusa ma le umi ou te manatua ai mea,” sa ia tautino mai ai mulimuli ane. “… Sa ou mauaina se malamalamaaga atoatoa faapea sa i ai se Atua, o Iesu, o le na maliu i luga o Kalevaria, o Lona Alo, ma o Iosefa le Perofeta sa mauaina le pule lea na ia faapea mai sa ia te ia. O le tulaga faamalieina ma le mamalu o le mauaina o lena molimau, e lē mafai ona faamatalaina! Sa ou toe foi atu i lo’u aiga. Ua mafai nei ona ou molimau atu i le lalolagi atoa faapea ua ou iloa, e ala i le iloa mautinoa, o le talalelei a le Alo o le Atua ua toefuataiina, ma o Iosefa o se Perofeta a le Atua, sa faatagaina e tautala i Lona suafa.”¹⁶

I le faamalosia ai e lenei mea na tupu, sa saunia e Lorenzo ia lava e avea o se faifeautalai. E pei ona saunoa mai lona tuafafine o Eliza, o lona liuaina sa taitai atu ai i se suiga i ona faanaunauga ma “tatalaina ai se lalolagi fou i ona luma.” Na ia saunoa, “Nai lo le tautaua i vaegaau faalelalolagi, ua ia ulufale atu nei i le nofoaga o le taua mo se siamupini i vaegaau o le lagi.”¹⁷

O Le Faafetaiaia o Luitau, i le Avea ai o se Faifeautalai Faamisiona

Sa amata e Lorenzo Snow lana auaunaga faafaifeautalai i le setete o Ohio, i le tautotogo o le 1837. E faapei o lana faaiuga e auai i le Ekalesia, o lana faaiuga e auauna o se faifeautalai faamisiona sa manaomia ai o ia e suia ona manatu ma ana fuafuaga. Sa ia tusia i lana api talaaga, “I le tausaga e 1837, sa [ou] faateaina ese manatu uma sa ou fiafia i ai.”¹⁸ Sa ia faatea esea lana fuafuaga e sailia se “aoaoga masani” i se kolisi i le itu i sasae o le Iunaite Setete.¹⁹ Sa ia finagalo malie foi e malaga e aunoa ma se tupe po o se taga—i se isi faaupuga, o le alu lea e aunoa ma se tupe, e faalagolago i le agalelei o isi e saunia meaai ma fale. Sa sili ona faigata lenei tulaga mo ia, aua i lona talavou, sa ia lagonaina i taimi uma le taua o le totogiina e ia lava o lona ala, i le faaaogaina ai o tupe na ia fesoasoani ai i lona tama e mauaina i le faatoaga a le aiga. Na ia saunoa: “Sa ou le masani e faalagolago i soo se isi lava tagata mo meaai po o fale. A faapea ou te malaga mo soo se umi lava, e faamautinoa e lo’u tama ua lava se tupe ou te alu ma a’u mo a’u tupe faaalu. Ma o lenei, i le alu atu ai ma fesili mo se meaai ma se mea ou te moe ai, o se tulaga sa matua faigata tele mo a’u, talu ai o se faiga sa ese mai mea sa ou masani ai.”²⁰ Sa ia “finagalo malie e faia,” ae na pau lava le mafuaaga ona sa ia mauaina “se malamalamaaga lelei faapea ua manaomia ai e le Atua.”²¹

O nisi o uso ma tuagane o matua o Elder Snow, o ona tausoga, ma uo, sa auai i fonotaga muamua sa ia taitaiina, i le avea ai o se faifeautalai. I le manatua ai o le taimi muamua na ia talai atu ai, na ia saunoa: “Sa matuai o’u matamuli lava i lena taimi, ma … sa avea ma se mea sa sili ona faigata mo a’u le tu atu i luma ma talai atu i o’u lava aiga ma tuaoi, o e na o mai. Ou te manatua na ou tatalo i le toetoe lava o le aso atoa, lea na sosoo ma le po na tatau ai ona ou lauga atu. Sa ou alu atu i fafo na o a’u ma tatalo i le Alii ina ia tuu mai ia te a’u se mataupu e tauina atu. Sa fai mai le tasi o tuafafine o lo’u tama mulimuli ane, na toeitiiti lava gatete ina ua ia vaai mai ua ou tu i luga e lauga atu, ae sa ou tatalaina lo’u gutu, ma o le mataupu na ou fai atu ai, sa matua ou le iloaina lava, ae sa fai mai le tuafafine o lo’u tama, sa lelei la’u talanoa atu mo le toeitiiti tolu kuata o le itula.”²² Faatasi ma le agaga faafetai, na ia toe manatua ai: “Sa ou talitonu ai ma lagonaina se faamautinoaga faapea, o se Agaga o musumusuga o le a uunaia ma tuuina mai ia te a’u upu e tautala atu ai. Sa ou sailia e ala i le tatalo ma le anapogi—Sa ou faamaulaloina a’u lava i luma o le Alii, i le valaau atu ai ia te Ia i le tatalo faatauanau, ina ia tuuina mai le mana ma le musumusuga a le Perisitua paia; ma ina ua ou tulai i luma o lena faapotopotoga, e ui ina sa ou lē iloaina se upu ou te tautala atu ai, o le taimi lava na ou tatalaina ai lo’u gutu e lauga atu, sa oo mai ai ma le malosi i o’u luga le Agaga Paia, ma faatumulia lo’u mafaufau i le malamalama ma manatu e fesootai atu ai ma le gagana e tatau ai, lea na mafai ai ona tuuina atu.”²³ E oo ane i le taimi e tuua ai e ia le nofoaga, ua ia papatisoina ma faamauina se tuagane o lona tina, se tuafafine o lona tama, o ni tausoga, ma ni nai uo.²⁴

I le maea ai ona faasoa atu o le talalelei i lona aiga ma uo, sa faaauau ai loa e Elder Snow ana auaunaga faafaifeautalai i isi aai ma taulaga, mo le tusa o le tasi le tausaga. Na ia lipotia faapea, “A o i ai i lenei misiona, sa ou malaga i vaega eseese o le Setete o Ohio, ma i lena taimi, sa ia papatisoina ai le toatele o tagata, o e sa tumau lo latou faamaoni i le upu moni.”²⁵

E le’i leva ona i ai Lorenzo Snow i lona aiga mai lenei uluai misiona, ae toe lagona e ia se manao e toe alu e talai le talalelei. “O le agaga o lo’u valaauga faafaifeautalai sa malosi mai tele i lo’u mafaufau,” na ia saunoa ai, “na ou manao ai e toe foi i ai.”²⁶ O le taimi lenei, sa ia talai atu ai le talalelei toefuataiina i le setete o Misuri, Kentucky, ma Ilinoi, faapea foi i Ohio.

Sa i ai nisi tagata na tetee ia Elder Snow ma le savali sa ia faasoaina atu. Mo se faataitaiga, sa ia faamatalaina se mea na tupu ia te ia i Kentucky, ina ua faapotopoto se vaega o tagata i le fale o se tasi o i latou, ina ia faalogo atu a’o ia aoao mai. Ina ua maea lana aoaoga, sa ia iloaina ai nisi o tagata na fuafua e osofaia o ia i le taimi lava e tuua ai le fale. Sa ia toe manatuaina faapea “a o feofoofoai tagata sa i totonu o le fale, o se tasi o alii na “le’i mafaufauina le pa’i mai o lona lima i le tasi o taga o lo’u peleue, ma sa taia ai o ia i se lapataiga faafuasei.” Ina ua tau atu lona lima i se mea malo i le taga a Elder Snow, sa faanatinati loa lona lapataia o ana uo faapea o le faifeautalai o loo faaaupegaina i se tamai fana. Na tusia mulimuli ane e Elder Snow faapea, “Sa lava lena—na faaleaogaina ai e le vaega na fuafua e faatupu le vevesi, a latou fuafuaga faatiapolo.” Faatasi ma sina mea malie, na faaopoopo mai ai Elder Snow, “O le mea na faapea o se tamai fana lea na mafua ai lo latou lapataiga ma lo’u puipuiga, o se tamai Tusi Paia e tuu i le taga, o se meaalofa taua ia te au mai i le Peteriaka sili ona pele, o Tamā Iosefa Samita [Le Matua.]”²⁷

O isi tagata sa fiafia e talia Elder Snow, ma taliaina le savali na ia faasoaina atu. I se tasi o nuu i Misuri sa ia aoaoina ai ni tagata se toalima, o e na papatisoina i le ogatotonu o le taumalulu. O Elder Snow ma isi, na latou ta’eina ese le aisa mai se vaitafe, ina ia mafai ai ona ia faatinoina le sauniga. E ui i le malulu, o nisi o tagata liliu mai “na o mai nai le vai, ma patipati o latou lima, ma vivii atu i le Atua.”²⁸

O uluai misiona e lua a Elder Snow, na sosolo mo se umi mai le tautotogo o le 1837, e oo ia Me 1840. O nisi o vaega mai ana tusi ua faamatalaina ai lenei taimi i le galuega a le Alii faapea: “Sa ou faaaluina le faaiuga o le taumalulu [o le 1838–39] i le femalagaai ai ma le talaiga, … faatasi ma nai tulaga eseese o le faamanuiaina, ma le tausiga lelei—o nisi o taimi sa taliaina ai a’u e tagata i se auala sili ona faaaloalo ma faalogologo ma le fiafia i la’u savali, ma, i nisi taimi, sa sauaina ai a’u e tagata ma tauemu mai ia te a’u; peitai, sa leai lava se tulaga na faia ai a’u e sili atu ona leaga nai lo Iesu, lea ua ou tautino atu ou te mulimuli ai.”²⁹ “Pe a ou toe tepa ai nei i tua i mea na valaauina a’u ou te uia, … ou te matua maofa lava ma matuai ofo tele i totonu ia te a’u.”³⁰ “Sa faatasi le Alii ma a’u, ma sa faamanuiaina tele a’u, a o faatinoina a’u auaunaga faigata.”³¹

Misiona i Egelani

I le amataga o Me 1840, na faatasi atu ai Lorenzo Snow ma le Au Paia i Navu, Ilinoi, peitai, sa le’i umi se taimi na nofo ai o ia iina. Sa valaauina o ia e sopoia le Vasa Atelani ma auauna ai i se misiona i Egelani, ma sa ia tuua Navu i lena lava masina. A o le’i malaga ese atu, sa ia faaaluina se taimi e asia ai aiga o nisi o Aposetolo e toaiva, o e sa auauna i Egelani i lena taimi.

Ina ua ia asia le aiga o Polika Iaga, sa ia vaaia lo latou tamai fale ogalaau, sa le’i i ai le mea e faamau ai pupu i le va o ogalaau, ma tuua ai latou e “feagai ma matagi ma afa.” Sa vaivai ia Tuafafine Iaga, aua faatoa foi mai i le sailiga o le povi taususu a le aiga, ae lei faamanuiaina. E ui i ona tulaga faigata, sa ia faapea atu ia Elder Snow, “Ua e tagai mai i lo’u tulaga, ae ta’u atu ia te ia [lo’u toalua] e aua le faapopoleina, pe i ai lava sina ona popole mai ia te au—ou te manao ia te ia e tumau i lana auaunaga seia faamaeaina ma le manuia lana misiona.” I le faapopoleina ai i le “tulaga mativa tele” o Tuafafine Iaga, sa manao ai Elder Snow e fesoasoani atu: “Sa na o sina tupe itiiti sa ia te a’u—sa lē lava, e oo lava i le aveina atu ai o a’u i le tasi vaesefulu o le mamao o la’u misiona, e aunoa ma se faamoemoega e maua uma le tupe manaomia, ma ua ou i ai i le po e sosoo ma le aso ou te malaga ese ai. Sa ou aumaia i fafo o la’u taga sina vaega o la’u tupe, … ae sa ia musu e taliaina; a o o’u taumafai malosi atu ina ia ona taliaina le tupe, sa ia faaauau foi ona teenaina—o se tasi mafuaaga ona sa fuafuaina, ae o le isi ona ua faafuasei, na pa’ū le tupe i luga o le fola, ma taavale atu ai i le avanoa i le va o laau e le o mau ona faamaumauina, lea na uma ai le feteenaiga, ma sa ou faatofa atu ai ia te ia, ma ou tuua ai o ia e pikiina i luga i sona taimi avanoa.”³²

Mai Ilinoi, sa malaga atu ai loa Elder Snow i Niu Ioka, lea na ia tietie ai i se vaa e folau atu ai i le Vasa Atelani. I le malaga ai i le vasa mo le umi e 42 aso, e tolu afa malolosi na faafetaiaia le vaa. I le siomia ai e uso a pasese fefefe ma fetagisi, sa tumau le to’a o Elder Snow, i lona faatuatua o le a puipuia e le Atua o ia. Ina ua taula le vaa i Liverpool, Egelani, sa “faatumulia le loto o Elder Snow i le agaga faafetai tele ia te Ia, o le na te faasaoina ma lagolagoina i latou, o e na te valaauina ma auina atu o ni faifeau o le faaolataga i atunuu o le lalolagi.”³³

Ina ua mae’a ona avea o se faifeautalai i Egelani mo le tusa o le fa masina, sa maua ai e Elder Snow se isi tiutetauave faaopoopo. Sa tofiaina o ia e avea o se peresitene o le Itu a Lonetona, o se valaauga e tali tutusa ma le peresitene o le itu i aso nei. Sa ia faaauau le talaiina o le talalelei, ma sa ia vaavaaia foi le galuega a taitai perisitua, e pei o peresitene o paranesi i le eria. A o ia auauna ai i lenei tulaga faataitai, sa masani ona ia lipoti atu ia Elder Parley P. Pratt, o se sui o le Korama a le Toasefululua ma le peresitene o le misiona. Sa ia tusia e uiga i le toatele o tagata, o e na “tuufesili pe faapefea ona maua le faaolataga,” Sa ia tusia foi e uiga i se potu “na matua faatumulia ma ua le mafai ona auai uma tagata sa mananao e auai” mo se fonotaga o le Aso Sa, atoa ai ma le “fiafia e papatisoina [tagata liliu mai] i totonu o le lafu a lo tatou Alii ma le Faaola o Iesu Keriso.” I le sagisagi fiafia ma le talitonu e uiga i le galuega, na ia saunoa ai faapea, “E ui ina siosiomia e le amio leaga tele, e aunoa ma le manatu mo isi tagata o soo se ituaiga, ua faapea ona vave mai Siona, ma, ou te talitonu e le o toe umi ae susulu mai se malamalama i lenei aai.”³⁴

Sa faafiafiaina le Itu a Lonetona i le tuputupu a’e tele faatasi ai ma Elder Snow, a o avea ma peresitene. E ui sa faafiafiaina Elder Snow i lenei tulaga faamanuiaina, sa ia feagai foi ma luitau o tiutetauave faataitai. I se tusi ia Elder Heber C. Kimball o le Korama a le Toasefululua, na ia faailoa ai faapea o nei luitau sa taitaia ai o ia e “uia se ala ese i le taitaiga nai lo se isi lava ala na ou uia muamua.”³⁵ Sa ia tauina atu ia Elder Kimball: “O oe, ma Elder [Uilifoti] Uitilafi na saunoa mai e tatau ona avea ma se aoga o le aoaoina, lea ua avea ma tulaga moni. … Talu lava ona ou sau iinei, ua i ai se mea fou ua masani lava ona tulai mai i le Au Paia. E le umi ona mavae atu lea mea ae tulai mai se isi.” Sa ia faasoa atu se mea moni sa vave ona ia aoaoina i ona tiutetauave fou: “Atonu o le a ou lē mafai ona faafetaiaia faigata, [vagana] le Atua sa fesoasoani mai ia te a’u i se tulaga sili lava.”³⁶ Sa ia faaalia foi se lagona faapea i se tusi ia Elder Siaosi A. Samita o le Korama a le Toasefululua: “O le mea faatauvaa na ou faia e le ona o a’u lava, ae o le Atua. E tasi le mea ua ou aoaoina atoatoa i lo’u aafiaga, a o tauivi e faalautele lo’u tofi o se faiaoga o Isaraelu, o lena mea o le, pe a na o a’u, ou te lē mafai ona ou iloa pe faia soo se mea: Ua ou vaai foi ma le manino, e leai se Au Paia e mafai ona faamanuiaina se’i vagana ua usiusitai o ia i faatonuga ma fautuaga a i latou o e ua tuuina e pulefaamalumalu i le Ekalesia. Ua ou mautinoa, o le umi lava ou te tausia ai Ana tulafono, o le a tausiaina ma lagolagoina a’u i lo’u tofiga e le Alii lo’u Atua. … A o o’u savali ai i le lotomaualalo i Ona luma, o le a Ia tuuina mai ia te a’u le mana e fautua ai i le amiotonu ma le agaga o faaaliga.”³⁷

E le gata i le talaiina o le talalelei ma le avea ai o se peresitene o le Itu a Lonetona, sa tusia e Elder Snow se tusiga faalelotu, po o se tamai tusi, e fesoasoani ai i faifeautalai e faamalamalama le talalelei toefuataiina. O lenei tusiga, sa ta’ua o le The Only Way to Be Saved [Na o le Pau lea o le Auala e Faaolaina Ai], sa faaliliuina mulimuli ane i gagana eseese ma faaaogaina i le afa atoa lona lua o le seneturi lona sefuluiva.

Sa auauna Elder Snow i Egelani seia oo ia Ianuari 1843. A o le’i malaga ese o ia, sa ia faataunuuina se tofiga na ia mauaina mai ia Peresitene Polika Iaga. I le avanoa i luma o le laina o le itulau o lana api talaaga, na ia tusia ai mo le na o le pau lea o le taimi, lenei tofiga: “Tuuina atu Tusi Mamona e lua i le Tupu Tamaitai o Vitoria ma Perenise Alapati, ona o le talosaga mai a Peresitene B. Iaga.”³⁸

Ina ua tuua e Elder Snow Egelani, sa ia taitaiina se vaega o le Au Paia o Aso e Gata Ai mai Peretania na malaga atu i Navu. Sa ia tusia i lana api talaaga: “Sa ou taitaia se vaega e lua selau limasefulu, o le toatele o i latou, o a’u uo lelei, o e na osia feagaiga o se taunuuga o la’u aoaoga. O le tulaga ua ou i ai nei i le toe sopoiaina o le vasa, a o siomia ai e uo, o se tulaga faafiafia loto tele pe a faatusatusa atu i le malaga toatasi na ou i ai i le lua ma le afa tausaga ua mavae atu.”³⁹ O Aafiaga o Elder Snow i luga o le vaa o le Swanton na faaalia ai ona tomai faataitai ma lona faatuatua i le Atua. O le tala lenei na sii mai lana api talaaga:

“Sa ou faapotopotoina [le Au Paia] faatasi ma i le malilie faatasi ai, na ou tuuina i latou i vaega ma vaega toalaiti, i le tofiaina ai o taitai tatau mo vaega taitasi, ma faatutuina tulafono mo le puleaina o le aumalaga. Sa ou iloaina sa i ai ni faitaulaga sili eseese, ma nai toeaina sa faatasi ma i matou, ma, i le iloaina ai o le manao faanatura faapea e toatele toeaina, sa tatau ona tofu ma sina mea e fai e faaleleia atili ai o latou tulaga, ma afai e le mafai ona faia lena mea i se tasi auala, e ao ona faia i se isi, o le mea lea sa tonu ai ia te a’u o le a lelei pe a ou faataatiaina le tulaga e galulue ai i latou taitoatasi; o le mea lea na ou tofia ai i latou, i le tele e mafai ai, i sina tofiga ma tofu ai lava i latou ma sina tiutetauave e faatinoina. Sa potopoto faatasi le aumalaga atoa i afiafi taitasi o le vaiaso [mo] faigalotu. Sa faia a matou talaiga ta’i faalua i le vaiaso; o fonotaga i Aso Sa, ma aai ma feinu i le faamanatuga.

“O lo matou alii kapeteni, lea sa ou manao e amatalia se masaniga faaleuo ma ia, sa foliga mai sa le fia faauo ma sa taofiofi i ona lagona. … E mafai ona ou vaaia i lona mafaufau, ua i ai le tulaga o le faailoga tagata ia i matou.—Ua tusa nei ma le lua vaiaso talu ona matou i ai i le vasa, i lena taimi atoa, e leai lava se mea matua ogaoga ua tupu, nai lo le mea e pei ona masani ai i luga o le vasa, ae faapea loa ona tulai mai lenei tulaga.

“O le alii ofisa a le kapeteni, o se taulealea talavou Siamani, sa fetaiai ma se faalavelave lea na faamata’uina ai lona ola. Talu ai o se alii amio lelei tele, faamaoni, ma faatuatuaina, i le faatasi ai ma le kapeteni [i] malaga e tele, sa ia manumalo ai i le mauaina mo ia, o le agaga alofa o le kapeteni, o taitai, ma le auvaa; o le Au Paia sa faapea foi ona latalata atu ia te ia. O le mea lea, o le foliga mai o lona maliu … na fausiaina ai se lagona faanoanoa tele ma le lotomomomo i le vaa atoa lava.

“Sa sau le palapala i lona gutu, ma sa tiga tele ona musele ma sa lili. O le mea mulimuli, ina ua maea ona taumafai soo se ituaiga o vaifofo ae lē faamanuiaina, sa aveesea mai mafaufau le faamoemoe o le a ola o ia. A o le’i momoe le auvaa, sa talosagaina e le kapeteni ina ia taitoatasi ma o atu i lona potu, e faamavae atu ia te ia; ma sa faia faapena e aunoa ma sina faamoemoega itiiti o le toe vaaia o ola pea o ia, i le taeao e sosoo ai. E toatele na fetagisi, a o latou toe foi mai mai le potu.

“O Tuafafine Matini [o se tasi o le Au Paia o Aso e Gata Ai sa i luga o le vaa] a o ia nofo toatasi ai i autafa o lona moega, na faaali atu ia te ia lona manao, ina ia valaauina a’u ou te faatinoina se faamanuiaga faaleperisitua mo ia, ma atonu o le a ia toe malosi ai. I lenei tulaga, sa ia malie atoatoa i ai. Sa ou moe i lo’u potu, ina ua oo mai le feau, pe tusa o le sefululua i le po. Sa faavave ona ou tu i luga ma agai atu loa i le potu, [ma] i le auala sa ma feiloai ai ma le taitai lona lua o le vaa, o le sa faatoa foi mai lava i le vaaiga o le taulealea ma’i. O le taimi lava na ma fepasia’i ai, sa ia feiloai ai foi ma Uso Staines, ma sa ta’u atu ia te ia, o Snow lea ua alu e faaee ona lima i luga o le taulealea. ‘Peitai’ sa ia faapea atu ai (i se leo faanoanoa), e leai lava se aoga; ua le o toe i ai se mea e mafai mo si alii i le taimi nei.’ ‘O lea,’ sa faapea atu ai Elder Staines, ‘e mafai e le Alii ona toe faaolaina o ia e ala i le faaeega o lima.’ ‘… E te manatu e mafai?’ na toe tali mai ai le alii seila i le mama aiai o lona loto.

“A o o’u agai atu ai pea, sa ma feiloai ma le kapeteni i le faitotoa o le potu, o le sa foliga mai sa tagi. ‘Ua ou fiafia ua e sau, Snow,’ na ia saunoa mai ai, ‘e ui ua leai se aoga, aua ua le o toe umi ae uma le ola o si alii.’ Sa ou laa atu i totonu o le potu ma nofo i lalo i tafatafa o lona moega. Sa topetope lana manava ma foliga mai o se tagata ua oti. Sa faigata ona tautala leotele, ae sa faailoa mai lona manao [ina ia] ou faamanuia ia te ia. Sa foliga mai sa i ai sana ava ma se fanau e toalua i Hamburg, Siamani, o e sa faalagolago ia te ia mo lo latou tausiga. Sa foliga popole tele o ia e uiga ia i latou.

“Sa ou tuuina o’u lima i luga o lona ulu, ma sa le’i pine ona maea le faamanuiaga, ae nofo a’e i luga, patipati ona lima, vivii atu i le Alii mo le toe faamaloloina o ia; sa le’i umi ona tupu lenei mea, ae tu i luga mai lona moega [ma] alu atu i fafo o le potu ma savalia le fogavaa.

“O le taeao na sosoo ai, sa maofa tagata uma ina ua vaai ua toe ola le alii ofisa, ma sa taufaiofo i le vaai ai ia te ia ua mafai ona toe faatinoina ana galuega e pei ona masani ai. Na fai mai tagata taitasi o le auvaa, o se vavega; sa silafia e le Au Paia lena mea, na olioli ma viia le Alii; na talitonu malosi i ai le kapeteni, ma lagonaina le faafetai tele, ma o lona loto sa tuufaatasia ma i matou mai lena taimi ma le agai ai i luma. Sa ia taliaina o matou manaoga taitasi ma manaoga faapitoa, na i ai i lona malosiaga e tuuina mai, ma sa popole i o matou manaoga uma ma mea e mananao i ai; sa auai ia matou fonotaga uma, faatauina ma faitau a matou tusi. Sa faapea foi ona fai e le auvaa, ma ina ua ou tuua i latou i New Orleans [Luisiana] sa latou tuuina mai ia te a’u se folafolaga faapea, o le a papatisoina i latou. Sa ou mauaina se tusi, pe tusa o le tasi le tausaga mulimuli ane, mai le ofisa sili, o le sa faailoa mai ia te a’u ua latou … faataunuuina la latou folafolaga. Sa faaalia foi e le alii kapeteni lona faamoemoega mo le taliaina o le talalelei i se taimi i le lumanai ma [ola] faatasi ma le Au Paia. Na papatisoina le alii ofisa, ina ua matou taunuu i New Orleans; ma ina ua faamavae atu ai ia te ia, sa ia tuuina mai se meaalofa mo a’u o le Tusi Paia, lea o loo o’u tausia pea i le aso nei.”⁴⁰

Sa tusia e Elder Snow: “O le toatele o le auvaa sa fetagisi ina ua matou tuua leSwanton. O le mea moni, o i matou uma sa i ai lagona paia loloto.”⁴¹ Mai New Orleans, na feosofi ai Elder Snow ma ana uo o le Au Paia i se vaa ma malaga atu agai i luga i le Vaitafe o le Misisipi. Sa latou taunuu i Navu i le aso 12 Aperila, 1843.

O Le Tuuto Faifai Pea i le Galuega a le Alii

Ina ua mae’a ona auauna o se faifeautalai faamisiona mo le vaega tele o le fitu tausaga, sa vaaia e Lorenzo Snow ona avanoa mo suiga i auaunaga mo se taimi. I le taumalulu o le 1843–44, na ofoina atu ai e le komiti e taitaia se aoga i le lotoifale se galuega faafaiaoga. Sa ia taliaina le ofo, e ui lava sa ia silafia o le toatele o tamaiti aoga “sa latou femitai i lo latou mafai ona sauaina faiaoga ma faaleaga faleaoga.” Sa tonu ia te ia, o le auala e maua mai ai le faaaloalo o tamaiti aoga, o le faaalia lea o le faaaloalo mo i latou. Sa tusia e lona tuafafine o Eliza: “Sa ia valaauina na tama talavou, e pei lava o i latou o ni tamalii faaaloalogia tele. … Sa ia matua galue malosi lava e tuuina atu ia i latou se lagona o lona manao e faia mea lelei mo i latou” ma lona manao e “fesoasoani ia i latou ia faaauau a latou suesuega. … I lenei auala, e ala i le agalelei ma le faatauanau, na faamaluluina ai o latou lagona—sa ia mauaina lo latou faatuatuaga, ma faatasi ma le onosai ma galuega faifaipea, sa suia alii talavou ulavavale ma avea o ni tamaiti aoga faaaloalo; ma, ae le’i faaiuina le kuata, faatasi ma le maofa tele i le alualu ai i luma, sa latou aoao e suesue malosi.”⁴²

I le 1844, na ia maua ai se tofiga fou i le Ekalesia. Sa tofia o ia e malaga atu i Ohio ma vaavaaia se taumafaiga o faatosinaga ina ia filifilia Iosefa Samita, e avea ma peresitene o le Iunaite Setete. Sa lē fiafia le Perofeta i le auala na faia ai le Au Paia e le malo o le Iunaite Setete, ma sa ia tusi atu i sui faatutu sa i ai i lena taimi, mo le tofi peresitene, ina ia suia lo latou uiga agai i le Ekalesia. I le lē faamalieina ai ia latou tali, sa tonu ai loa ia te ia e tauva mo le tofi peresitene.

Sa tofia e le Korama a le Toasefululua Lorenzo Snow ma isi e “faatuina se faalapotopotoga faa-polotiki i le setete o Ohio atoa, mo le lagolagoina o Iosefa mo le tofi Peresitene.”⁴³ I le faia o lena mea, na siitiaina ai lo latou silafia i auala na solia ai aia tatau faaletulafono o le Au Paia. Sa saunoa Lorenzo faapea, na ia te ia “se taimi sili ona manaia.”⁴⁴ O nisi o tagata na latou teena malosi le faatuina o le Perofeta, ae o isi sa lagonaina e mafai e Iosefa Samita ona taitaia le atunuu i se tulaga manuia ma lelei.

“I le taimi o nei manatu feteenai,” na manatua ai e Lorenzo Snow, “o lo’u alualu i luma sa faafuasei ona faamutaina, e ala i se lipoti ua faamautuina e uiga i le tagatavaleina o le Perofeta ma lona uso o Ailama.”⁴⁵ Sa ia toe foi atu i Navu “ma le loto faanoanoa.”⁴⁶

E ui lava i lenei taimi o le faanoanoa, sa galulue pea ma le filiga le Au Paia e fausia le malo o le Atua. E pei ona sa matauina ai e Lorenzo mulimuli ane, “I lalo o le taitaiga a le Silisili Ese, sa agai pea i luma le malo.”⁴⁷ Sa latou faaauau e talai le talalelei ma faamalosia e le tasi le isi, ma sa latou galulue faatasi e faamaea le fausiaina o le malumalusa i totonu o lo latou aai.

Ina ua faatasi Lorenzo Snow ma le Au Paia i Navu, sa tonu i lona manatu o le a ia lē faaipoipo lava, ae filifili nai lo lena e tuuina atu lona soifua i le talaiina o le talalelei. Na matauina e lona tuafafine o Eliza, mulimuli ane faapea, “Ia tuuina atu lona taimi, o ana taleni, o ana mea uma i le galuega, o lona manao atoa lea.” Sa ia lagonaina faapea o le olaga faaleaiga, atonu o le a “faaitiitia ai lona aoga” i le galuega a le Alii.⁴⁸

O manatu o Lorenzo e uiga i le faaipoipoga ma le aiga sa amata ona suia i le 1843, ina ua ia talanoa na o i laua ma le Perofeta o Iosefa Samita, i le auvai o le Vaitafe o le Misisipi. Sa molimau atu le Perofeta e uiga i le faaaliga na ia mauaina e faatatau i le faaipoipoga i ava e toatele. Sa ia tauina atu ia Lorenzo, “O le a tatalaina e le Alii lou ala ina ia talia ma usitaia ai le tulafono o le Faaipoipoga Faaselesitila.”⁴⁹ O lenei fautuaga, na amata ai loa ona malamalama Lorenzo, o le faaipoipoga o se poloaiga mai le Alii ma o se vaega manaomia o le Fuafuaga o le Fiafia a le Tama Faalelagi.

I le 1845, na faia ai e Lorenzo Snow se faaipoipoga faaautaunonofo, e pei ona sa faia ai i le Ekalesia i lena taimi, e ala lea i le faaipoipo atu ia Charlotte Squires ma Mary Adaline Goddard. Sa faamauina o ia, mulimuli ane, i isi ava faaopoopo. O lona tuuto atu i ana ava ma fanau, sa avea ma vaega o lona tuuto atu i le galuega a le Alii.

Sa faaauau pea ona fausia e le Au Paia le malo o le Atua i Navu, ae sa faaauau foi sauaga. Ia Fepuari 1846, i le malulu o le taumalulu, o tagata faomea na faamalosia i latou e tuua o latou fale ma lo latou malumalusa. Sa latou amataina se malaga umi i sisifo i lo latou aiga fou.

Fesoasoani i le Au Paia e Faapotopoto i le Vanu o Sate Leki

E ui sa tuua e Lorenzo Snow ma lona aiga Navu, faatasi ma le isi vaega o le Au Paia, sa le’i taunuu latou i le Vanu i Sate Leki, seia silia ma le tausaga talu ona taunuu le vaega muamua o paionia. E faapei o le toatele o uluai paionia o le Au Paia o Aso e Gata Ai, sa latou nonofo i nai nuu lē tumau i le ala. O Lorenzo ma lona aiga sa nonofo, mo se taimi puupuu i se nuu i Iowa, sa faaigoaina o Garden Grove, lea na latou fausia ai tamai fale ogalaau mo le Au Paia, o e o le a mulimuli mai ia i latou. Mai iina, sa latou malaga atu ai i se nuu e taua o Mauga Peseka, i Iowa foi.

I Mauga Peseka, na toe galulue ai Lorenzo ma lona aiga ma isi o le Au Paia, e sauniuni mo o latou manaoga ma manaoga o i latou, o e o le a mulimuli mai ia i latou, i le ala agai atu i le Vanu o Sate Leki. Sa latou fausia fale ogalaau ma totoina ma tausiaina togalaau, i le iloaina ai o le a seleseleina e isi. I sina vaega o lo latou taimi i Mauga Peseka, sa valaauina ai Lorenzo e taitai i le nuu. A o feagai le nuu ma mafatiaga o le faanoanoa, faama’i, ma le maliu, e aofia ai lona lava aiga, sa ia galue ma le filiga e fesoasoani i tagata ia maua le faamoemoe, faamalosia e le tasi le isi, ma tumau i le usiusitai i poloaiga a le Alii.⁵⁰

I le tautotogo o le 1848, na faatonuina ai e Peresitene Polika Iaga ia Lorenzo Snow ina ia tuua Mauga Peseka ae malaga atu i le Vanu i Sate Leki, sa toe tuuina atu foi ia Lorenzo se tulaga faataitai, o le taimi la lenei, sa avea o se kapeteni i vaega o paionia. Na taunuu ia vaega i le Vanu o Sate Leki ia Setema 1848.

Auaunaga o se Sui o le Korama a le Toasefululua

I le aso 12 Fepuari, 1849, sa mauaina ai e Lorenzo se savali e tatau ona ia auai i se fonotaga a le Korama a Aposetolo e Toasefululua. Sa faanatinati ona ia tuua mea uma sa ia faia, ae malaga i le fonotaga, lea ua amataina. I le ala, sa ia tuufesili ai i lona mafaufau pe aisea ua valaauina ai o ia i luma o le Korama a le Toasefululua. Sa le mautonu o ia—pe i ai ea se mea sese ua ia faia? I le iloaina ai sa ia faamaoni i le faatinoina o ona tiute, sa ia faateaeseina ai lena popolega. Ae, sa le mafai ona ia iloaina le mea sa fuafuaina mai mo ia. Ina ua ia taunuu, sa faateia o ia i le iloaina ai, ua valaauina o ia e avea o se sui o le korama. I lena lava fonotaga, sa faauuina ai o ia ma isi e toatolu o—Elder Charles C. Rich, Elder Franklin D. Richards, ma Elder Erastus Snow, o se tausoga o Lorenzo—e avea ma Aposetolo.⁵¹

O le faauuina o Lorenzo Snow i le tofi aposetolo, sa faamaninoina ai le vaega o totoe o lona soifuaga. O lona valaauga e avea o se tasi o “molimau faapitoa o le suafa o Keriso” (MF&F 107:23) sa uunaia ai mea uma sa ia faia. Mulimuli ane, na ia faaalia ai ona lagona e uiga i tiutetauave taitasi o se Aposetolo:

“Muamua, o se Aposetolo e ao ona mauaina se malamalamaaga Paia, e ala i le faaaliga mai le Atua, faapea o loo soifua Iesu—faapea o Ia o le Alo o le Atua soifua.

“Lona Lua, e ao ona faatagaina mai le lagi e folafola atu le Agaga Paia; o se aoaoga faavae paia, lea e faaalia mea a le Atua, i le faailoaina o Lona finagalo ma faamoemoega, i le taitaiina atu i upu moni uma, ma le faaalia o mea e oo mai, e pei ona tautino mai e le Faaola.

“Lona Tolu, ua tuuina atu ia te ia le pule, e ala i le mana o le Atua e taitai ai sauniga paia o le Talalelei, lea e faamaoniaina i tagata taitasi e ala i se molimau paia. O le faitau afe o tagata ia ua nonofo i nei vanu i atumauga, o e ua maua nei sauniga o se taunuuga o a’u talaiga, o ni molimau ola i le moni o lenei faamatalaga.”⁵²

E le gata i le tiutetauave patino o lona valaauga, sa ia Elder Snow se talitonuga malosi o le uiga o le avea ai ma se sui o le Korama a le Toasefululua: “O i matou, le Toasefululua, ua naunau e tuua mea uma na o le a aveesea o matou mafaufau mai le ala o le tiute, ina ia tasi i matou e pei o le Au Peresitene [Sili] ua tasi, ma ia fusia faatasi e ala i le aoaoga faavae o le alofa, lea e fusia ai le Alo o le Atua faatasi ma le Tama.”⁵³

Faatasi ma lenei malamalamaaga o lona valaauga patino ma le misiona a le Korama a le Toasefululua, na faapaiaina ai e Elder Snow lona soifuaga e fesoasoani ai e fausia le malo o le Atua i luga o le fogaeleele. Sa ia tali atu i le valaau e auauna i le tele o auala eseese ma le tele o nofoaga eseese.

O Le Misiona i Italia

I le konafesi aoao ia Oketopa 1849, sa valaauina ai Elder Snow e faatu se misiona i Italia. E ui sa le masani o ia i le atunuu ma ana aganuu ma gagana, sa le’i faatali o ia e talia le valaauga. E lei atoa le lua vaiaso, ina ua maea le konafesi, a ua saunia o ia e alu atu, ina ua mae’a ona faia o le mea sili na te mafaia, e fuafuaina fesoasoaniga mo ona faletua ma fanau i le taimi o lona toesea ai.

A o ia malaga atu faatasi ma isi faifeautalai, i le itu i sasae o le Iunaite Setete, lea o le a latou feosofi ai i se vaa e sopoia ai le Vasa Atelani, na taulai atu ona manatu i lona aiga faapea tagata o le a le pine, ae ia auauna atu i ai. I se tusi i lona tuafafine o Eliza, na ia tusia faapea: “E tele lagona feteenai ua faatumulia ai lo’u mafaufau. … Sa vave ona faateleina lo matou mamao ese mai lena maneta mausali o le—AIGA! Ae sa matou iloaina o le galuega lea ua matou auai, o le aveina atu o le malamalama ia i latou, o e o nonofo i le pouliuli, ma, i le Vanu o le Ata o le Oti, ma o o matou loto sa faatumulia i le alofa, ma sa soloiesea o matou loimata.”⁵⁴

Sa taunuu Elder Snow ma ana soa i Genoa, Italia, ia Iulai 1850. Sa mafai ona latou vaaia o le a alualu malie i luma le galuega a le Alii. Sa tusia e Elder Snow: “O a’u o se tagata ese, ma tuua toatasi i lenei aai tele, e valu afe maila mai si o’u aiga pele, ua siomia e tagata [o e] o o latou uiga ma amioga ou te le masani ai. Ua ou sau e faamalamalamaina o latou mafaufau, ma aoao i latou i mataupu o le amiotonu; ae, ou te le o vaai atu i se tulaga e mafai ona faataunuuina ai lenei sini. E leai se foliga mai o le a tupu lena mea.” Ua ou popole ia latou “amioga faavalevalea, … o le amio leaga, o le pogisa tele, ma mea faataulaitu” a tagata sa valaauina o ia e auauna atu i ai, sa ia tusia: “Ou te ole i lo’u Tama Faalelagi ina ia silasila alofa mai i luga o lenei nuu. Le Alii e, ia avea i latou ma taulaiga o Lou alofa mutimutivale, ina ia le fano i latou. Faamagalo a latou agasala, ma ia avea a’u ma se tagata latou te fiafia i ai, ina ia latou iloa Oe, ma iloa o Lau Afio na auina mai a’u e faatu Lou Malo. … Pe le o i ai ea nisi o le a e filifilia mai ia i latou, o e ua auina mai i ai a’u? Taitai atu a’u ia i latou, ma o Lou suafa o le a i ai le viiga e ala ia Iesu Lou Alo.”⁵⁵

Sa maua e Elder Snow nei “tagata filifilia” i se vaega o tagata sa ta’ua o Waldenses. O tagata Waldenses, sa nonofo i se vanu i le atumauga, i le itulagi o Piedmont, i le itu i saute o le tuaoi o Italia ma Suitiselani, ma le itu i sasae o le tuaoi o Italia ma Farani. O o latou augatuaa sa sauaina ma tuliesea mai lea nofoaga ma lea nofoaga, ona sa latou talitonu i le pule a Aposetolo anamua, ma mananao e mulimuli i aoaoga a Aposetolo, nai lo le auai atu i lotu sa i ai i na aso.

I se tusi ia Peresitene Polika Iaga, sa tusi atu ai Elder Snow faapea o tagata Waldenses sa mafatia i le tele o tausaga ona o le “pouliuli ma sauaga” ma “sa tutu ma le le mafaagaeetia, e toetoe lava pei o le papa ua taia e galu i le vasa sousou.” Peitai, ae le’i taunuu faifeautalai a le Au Paia o Aso e Gata Ai i Italia, sa amata ona fiafia tagata Waldenses “i sina vaitaimi o le filemu loloto,” ma sa foliga mai ua latou mauaina se saolotoga faalelotu sili atu nai lo isi i Italia. “O le mea lea,” na ia matauina ai, “sa matala mai le avanoa mo na o sina taimi puupuu lava a o le’i amataina le misiona, ma e leai se isi vaega o Italia o pulea i ia ituaiga tulafono lelei.”

I le manao ai e fia iloa atili e uiga i nei tagata, na alu atu ai Elder Snow i se faletusi e saili ai se tusi e uiga ia i latou. Na ia tusia: “Na faailoa mai e le tagata faigaluega i le potu tusi na ou fesili i ai, sa i ai le tusi lea o loo ou manaomia, ae faatoa aveese lava e se tasi tagata. E le’i maea lelei ifo lana fuaiupu, ae ulufale mai se tamaitai ma le tusi. ‘Oi’ na ia fai mai ai, ‘o se tulaga maoa’e tele lenei, o lea faatoa fesili mai lava lenei alii mo le tusi lena.’ Sa le pine ae faaosofia a’u faapea o lenei nuu ua agavaa e avea ma tagata muamua i Italia e aoaoina i le talalelei.”⁵⁶

Sa naunau Elder Snow ma ana soa e talai le talalelei i le itulagi o Piedmont, peitai, sa latou lagonaina e tatau ona latou o atu ma le faaeteete, e atiina ae faauoga ma faaali atu i tagata e mafai ona faatuatuaina i latou. Ina ua latou lagonaina ua latou faavaeina sootaga lelei ma tagata, sa latou aea se mauga lata ane, pepese “viiga i le Atua o le lagi,” ma ofoina atu se tatalo, ma faapaiaina le laueleele o Italia mo galuega faafaifeautalai. Sa latou faaalia foi a latou tautinoga taitoatasi i le galuega, ma sa tuuina atu e Elder Snow faamanuiaga faaleperisitua i ana soa ina ia fesoasoani ia i latou, i o latou tiutetauave. I le musuia ai i lo latou aafiaga i luga o le mauga, sa faaigoaina ai loa e Elder Snow le mea tonu lea, o Mauga Polika.⁵⁷

E ui lava i lenei mea na tupu, ae toeitiiti uma le lua masina, ae le’i faailoa mai lava e se tasi se manao e auai i le Ekalesia. I le aso 27 Oketopa, 1850, sa fiafia ai faifeautalai, i le vaaia ai i le taimi muamua le uluai papatisoga ma le faamauga i totonu o Italia.⁵⁸ Sa lipotia mulimuli ane e Elder Snow: “O le galuega iinei e tuai ma lē manaia. … Ae ui o lea, ua faatuina le ekalesia. Ua totoina le laau, ma ua sosolo atu ona a’a.”⁵⁹

I se tasi o po, na faia ai e Elder Snow se miti, lea na fesoasoani ia te ia e malamalama ai i le natura o lana misiona i Italia. I le miti, sa latou fagogota ai ma ana uo. “Sa matou fiafia e matamata i i’a lapopo’a ma matagofie i le vai, ua siomia ai matou uma, e oo atu lava i se mamao ese tele,” na ia saunoa ai. Sa matou vaaia foi le toatele o tagata o lafoina a latou upega ma afa; ae sa foliga mai na le minoi; ae foliga mai, sa faaauau pea ona matou gaoioi. A o pasiaina se tasi o i latou, sa ou iloaina se i’a ua mau i la’u matau, ma sa ou manatu atonu, masalo ua ou faatiga i lagona o lenei alii, i le mauaina ai, e pei ona sa i ai, mai luma o ona lima; peitai ane, sa matou faasolosolo pea, ma o mai i le matafaga. Sa faapea loa ona ou tosoina mai la’u afa, ma sa ou ofo tele ma matamuli i le laitiiti tele o la’u i’a na maua. Sa ou manatu o se mea uiga ese tele faapea, i le tele o i’a lapopoa ma foliga matagofie sa i ai, a o lea ua ou mauaina se tamai i’a. Ae o o’u faanoanoaga uma na mou ese atu, ina ua ou iloaina o ona uiga lelei, o ni uiga sa sili ona tulaga ese.”⁶⁰

O le miti a Elder Snow o se valoaga faaperofeta. Sa le’i vaaia e ia se numera tele o tagata liliu mai i Italia, ma, e pei ona matauina e se isi faifeautalai mulimuli ane, o i latou na taliaina le talalelei sa “le o ni tagata mauoa ma taualoa.”⁶¹ Peitai ane, o Elder Snow ma ana soa, sa avea ma meafaigaluega i aao o le Alii i le aumaia o tagata lelei ma faamaoni i le malo o le Atua—tagata ua faaalia le agaga faafetai ua latou “amata ona savavali i le ala o se olaga fou ma faavavau.”⁶² Ma o le taunuuga o le taitaiga a Elder Snow, sa faaliliuina le Tusi a Mamona i le gagana Italia.

Na toeitiiti o se seneturi ma le afa mulimuli ane, sa i ai se tasi Aposetolo, o Elder James E. Faust, na saunoa e uiga i alii ma tamaitai o e na auai i le Ekalesia ona o le galuega a Elder Snow ma ana soa: “O nisi sa i le vaega muamua o taavaletoso i lima na o mai i le Vanu o Sate Leki. … O le toatele o o latou suli, na tausia tovine o le ekalesia toefuataiina fou, ma o aso nei, o loo latou faia saofaga tele lava i le ekalesia i le lalolagi atoa, i le talitonu ai, e pei ona sa faia e o latou tuaa, faapea o Aposetolo e umiaina ki e lē elea lava.”⁶³

O Le Atiina Ae o le Ekalesia

Sa faataunuuina e Elder Snow isi misiona mulimuli ane, i le faalauteleina o lona valaauga o se sui o le Korama a le Toasefululua ina ia galue “i lalo o le taitaiga a le Au Peresitene [Sili] o le Ekalesia … e atia’e le ekalesia, ma pulea mataupu uma o lea lava ekalesia i atunuu uma” (MF&F 107:33).

I le 1853, na valaauina ai Lorenzo Snow e Peresitene Polika Iaga e taitaia se vaega o aiga agai atu i se nuu i le itumalo i matu o Iuta, o Box Elder. O le nuu lea sa i ai muamua, sa laitiiti, e le’i faatulagaina lelei, ma sa amata ona vaivai. Sa faavave atu Elder Snow e galue, i le faatulagaina o tagata e tusa ma aoaoga faavae o le tulafono o le faapaiaga, e pei ona sa aoaoina ai e le Perofeta o Iosefa Samita. Sa faatuina e tagata se aai uluuluola, lea na faaigoaina e Elder Snow o Brigham City, e faamamaluina ai Peresitene Iaga. I le galulue faatasi ai ma lagolagoina e le tasi le isi, sa fausia e tagatanuu se ofisa o aoga, falegaosimea, o se faiga e maua ai le suavai, o se faalapotopotoga mo fefaatauaiga, ma e oo lava i se sosaiete o faafiafiaga faakonaseti. E ui lava latou te le’i ola atoatoa i le tulafono o le faapaiaga, sa taitaia i latou i ona aoaoga faavae, ma sa latou faaalia le mea e mafai e se nuu ona ausia, faatasi ai ma le galulue faatasi ma le galue malosi. “Sa leai ni tagata paie i Brigham City,” sa tusia ai e le afafine o Peresitene Snow o Leslie. “O se vaitaimi o gaoioiga ma le tamaoaiga na maua ai iina, lea atonu e leai lava se isi nuu e faatusalia i ai, i le talafaasolopito o soo se isi lava nuu i totonu o le setete.”⁶⁴

Sa nonofo Elder Snow ma lona aiga i Brigham City mo le tele o tausaga. Sa ia pulefaamalumalu ai i le Au Paia iina, i le tuua ai, mai lea taimi i lea taimi, e auauna i ni misiona pupuu i isi nofoaga. I le 1864, sa malaga ai o ia mo le umi e tusa ma le tolu masina, i le auauna ai i se misiona puupuu i le Atumotu o Hawaii. Sa ia malaga faatasi ma Elder Ezra T. Benson, o le sa avea foi ma sui o le Korama a le Toasefululua, ma Elders Iosefa F. Samita, Alema Samita, ma William W. Cluff.⁶⁵ I le 1872–73, sa faafeao ai e Elder Snow ma isi, ia Peresitene Siaosi A. Samita, o le Fesoasoani Muamua i le Au Peresitene Sili, i se malaga e iva masina le umi i vaega o Europa ma Sasae Tutotonu, e aofia ai se asiasiga i le Aai Paia. Sa latou o atu ona o se talosaga mai ia Peresitene Polika Iaga, o lē sa faamoemoe faapea o a latou uunaiga amiotonu o le a fesoasoani e saunia isi atunuu e talia le talalelei toefuataiina.⁶⁶ I le 1885, sa valaauina ai Elder Snow e asia ni vaega eseese o Initia Amerika i matu-sisifo o le Iunaite Setete, ma le setete o Wyoming. I le amata ai ia Aokuso ma faaiuina ia Oketopa, na ia faatutuina misiona iina ma faatulagaina taitai o le Ekalesia e fesoasoani ia i latou o e sa papatisoina ma faamauina.

Galuega Faalemalumalu

O Peresitene Heber J. Grant, le Peresitene lona fitu o le Ekalesia, na matauina faapea o Peresitene Lorenzo Snow “sa tuuto atu lona soifuaga mo tausaga e tele e auauna ai i le malumalu.”⁶⁷ O lenei fiafia i galuega faalemalumalusa, na amataina i uluai aso o le liuaina o Peresitene Snow, ma sa faalolotoina i le taimi o lana auaunaga o se Aposetolo. Sa ia auai i fonotaga i totonu o le malumalusa i Katelani, ina ua faatoa maea ona papatisoina ma faamauina o ia. Mulimuli ane, sa ia taliaina ma le fiafia tele se valaauga e aoina foai e fausia ai le malumalu i Navu. O le taimi lava na uma ai ona fausia le Malumalu i Navu, sa ia auauna ai loa o se tagata fai sauniga iina, i le fesoasoani ai i le Au Paia o Aso e Gata Ai, ia maua sauniga o le faaeega paia ma faamauga, a o le’i alu la latou malaga agai i Sisifo. O ona tiutetauave i totonu o le malumalu, sa faaauau ma faalauteleina, ina ua valaauina o ia e auauna o se Aposetolo. Sa ia saunoa i sauniga o le faapaiaga i totonu o le Malumalu o Logan, Iuta. Ina ua maea ona faapaiaina e Peresitene Uilifoti Uitilafi le malumalu o Manti, Iuta, na faitauina ai e Peresitene Snow le tatalo o le faapaiaga i sauniga i aso na sosoo ai. Ina ua tuuina le maa aupitoaluga i luga o le tumutumu aupito maualuga o le Malumalu o Sate Leki, sa ia taitaiina le faapotopotoga i le Alaga o le Osana. Ina ua uma ona faapaiaina le Malumalu o Sate Leki, sa avea ai loa o ia o le peresitene muamua o le malumalu iina.

I le aso fanau lona 80 o Peresitene Snow, sa faaaofia ai e nusipepa i le lotoifale lenei faaaloaloga: “I le tauafiafi o ona aso, [o loo ia] pisi pea lava ma naunautai i le galuega tele lea na ia tuuina atu ai ona uluai tausaga, o loo ia faaauau pea i totonu o puipui paia o le malumalu se auaunaga mamalu, lea sa faapaiaina e ia ma ana uo, i latou lava—auaunaga silisili ona taua i lenei lalolagi agasala ma faaleagaina e le oti.”⁶⁸

Auaunaga Atu i Tagata Taitoatasi

A o femalagaa’i Peresitene Snow mai lea nofoaga i lea nofoaga, i le aoaoina o vaega toatele o tagata, sa ia faaaluina taimi e auauna ai i tagata taitoatasi ma aiga. Mo se faataitaiga, ia Mati 1891, a o avea o ia ma Peresitene o le Korama a le Toasefululua, sa ia lauga i se konafesi i Brigham City. I le ogatotonu o lana aoaoga, sa tuuina mai ai se tamai faamatalaga tusitusia i luga o le pulelaa. Fai mai se molimau na vaaitino i ai na ia “taofi lana lauga, faitau le faamatalaga, ona faamalamalama lea i le Au Paia faapea, o se valaau e asiasi i nisi o tagata, o e o loo matua faanoanoa lava.” Sa ia faanoi ina ia faataga mai o ia, ma sa ia savali ese mai loa mai le pulelaa.

O le tusi puupuu, na aumai i se tagatanuu o Brigham City, e suafa ia Jacob Jensen. Sa faapea mai o le afafine o Jacob, o Ella na maliu i lena aso, ina ua mavae ni vaiaso uumi o tauivi ma se ma’i tugā. Sa tusia e Uso Jensen lea lautusi, tau lava ina faailoa ai ia Peresitene Snow le maliu, ma talosagaina o ia, e fuafua mo le falelauasiga. Peitai, na finagalo Peresitene Snow e asia le aiga i le taimi lava lena, e ui lava o lena mea sa manaomia ai o ia e tipi lana lauga faapuupuu ma tuua le fonotaga sa ia pulefaamalumalu ai. A o le’i tuua e Peresitene Snow le fonotaga, sa ia valaau atu mo Rudger Clawson, o le sa avea i lena taimi ma peresitene o le siteki a Box Elder, la te o.

Sa tusia e Jacob Jensen le mea na tupu, ina ua taunuu Peresitene Snow ma Peresitene Clawson i lona aiga:

“Ina ua maea ona tu o ia i autafa o le moega o Ella, mo se minute se tasi pe lua, sa fesili Peresitene Snow pe i ai se suauu paia i le fale. Sa matua faateia lava a’u, ae, sa tali atu o loo i ai, ma sa aumaia loa mo ia. Sa ia tuuina atu le fagu suauu ia Uso Clawson, ma fai atu ia te ia e faauu Ella. [O Peresitene Snow] sa ia faamauina le faauuga, ma tuuina atu folafolaga.

“I le taimi o le faauuga, sa matua faagaeetia lava a’u i nisi o upu na ia faaaogaina, ma e mafai ona ou manatuaina lelei i le taimi nei. Sa ia saunoa: ‘Le afafine Ella, ou te poloai atu ia te oe, i le suafa o le Alii, o Iesu Keriso, ina ia e toe foi mai ma ola pea, e le’i mae’a lau misiona. O le a e ola pea e faataunuu se misiona tele.’

“Sa ia saunoa, o le a tatau pea ona ola o ia e tausia se aiga toatele, ma ia avea ma faamafanafanaga i ona matua ma uo. Ou te manatuaina lelei nei lava upu. …

“… Ina ua uma ona faia e Peresitene Snow le faamanuiaga, sa ia liliu mai i lo’u toalua ma a’u ma faapea mai: ‘Ia, aua le toe faanoanoa pe faavauvau. O le a lelei mea uma. O loo pisi i ma’ua ma Uso Clawson, ma e ao ona ma tuumuli, e le mafai ona ma nonofo, ae ia tau lava o lo outou onosai ma faatali, ma aua le faanoanoa, aua o le a lelei mea uma.’ …

“Sa tumau ai lava Ella i lenei tulaga, mo le silia i le itula, ina ua uma ona faamanuia Peresitene Snow ia te ia, po o le silia i le tolu itula i le tuufaatasiga uma, talu ona maliu o ia. Sa matou nonofo ai ma vaavaai i autafa o lona moega, o lona tina faapea a’u, ina ua faafuasei ona matala ona mata. Sa ia vaavaai solo i le potu, sa vaaia i ma’ua o nonofo ai iina, ae sa vaavaai pea mo se isi tagata, ma o le upu muamua sa ia fai mai ai o le: ‘O fea o i ai o ia? O fea o i ai o ia? Sa ma fesili atu, ‘O ai? O fea o i ai, ia ai?’ ‘Aisea, O Uso Snow,’ na ia tali mai ai. ‘Sa valaau atu o ia ou te foi mai.’”⁶⁹

A o i ai Ella i le lalolagi o agaga, sa ia lagonaina se filemu ma le fiafia lea na ia lē manao ai e toe foi mai. Ae sa ia usitaia le siufofoga o Peresitene Snow. Mai lava i lena aso, sa ia faamafanafana i auaiga ma uo, i le fesoasoani ai ia i latou e malamalama faapea sa le manaomia ona latou faanoanoa mo o latou tagata e pele ia i latou, o e maliliu.⁷⁰ Mulimuli ane, sa ia faaipoipo ai, maua fanau e toavalu, ma auauna ma le faamaoni i ona valaauga i le Ekalesia.⁷¹

Taitaiina o le Ekalesia, i le avea ai ma Perofeta a le Alii, Tagatavaai, ma Talifaaaliga

I le aso 2 Setema, 1898, sa maliu ai Peresitene Uilifoti Uitilafi, ina ua maea le avea ai o le Peresitene o le Ekalesia mo le silia i le iva tausaga. O Peresitene Lorenzo Snow, o le sa avea ai i lena taimi o le Peresitene o le Korama a Aposetolo e Toasefululua, sa i ai i Brigham City, ina ua ia maua le tala o le mea ua tupu. Sa ia malaga mai loa i se nofoaafi i le Aai o Sate Leki, i le vave na ia mafaia, i lona iloaina ai o le tiutetauave o le taitaiga o le Ekalesia, lea ua i ai nei i luga o le Korama a le Toasefululua.

I le lagonaina ai o le faatauvaa, ae ua saunia e mulimuli i le finagalo o le Alii, sa alu atu ai Peresitene Snow i le Malumalu o Sate Leki ma tatalo ai. I le tali ai mo lana tatalo, sa asiasia o ia e le Alii lava Ia. Sa molimau mulimuli ane Peresitene Snow faapea sa ia “vaai tino lava i le Faaola … i totonu o le Malumalu, ma sa talanoa faafesagai lava ma Ia.” Sa ta’u atu e le Alii ia te ia e alu atu faavave mo le toe faatulagaga o le Au Peresitene Sili, ma ia aua le faatali e pei ona sa faia ai, ina ua maliliu Peresitene o le Ekalesia na muamua atu.⁷² Sa lagolagoina Peresitene Snow e le Korama a le Toasefululua e avea ma Peresitene o le Ekalesia i le aso 13 Setema, 1898, ina ua mavae lena, sa amata loa ona ia auauna o se Peresitene. Sa lagolagoina o ia e le Ekalesia aoao i le aso 9 o Oketopa, ma vaetofia o le Peresitene lona lima o le Ekalesia i le aso 10 o Oketopa.

E ala i le faataitaiga a Peresitene Snow, ma e ala i faaaliga na ia mauaina, sa oo ai ina iloa e le Au Paia o Aso e Gata Ai o ia, o lo latou perofeta. O i latou o isi faatuatuaga, sa latou faamamaluina o ia, o se tamalii moni lava o le Atua.

Fegalegaleaiga ma le Au Paia o Aso e Gata Ai

Sa masani ona pulefaamalumalu Peresitene Snow i konafesi faalesiteki, a o avea o ia ma Peresitene o le Ekalesia. A o latou feiloai ma le Au Paia, na te faaali atu lona alofa ma le faaaloalo mo i latou. O ana upu ma gaoioiga sa faaalia ai faapea, e ui sa ia aloaiaina le paia o lona valaauga, ae sa le’i tuuina ai e ia o ia lava, ia sili atu i luga o tagata sa ia auauna i ai.

I le konafesi a se tasi o siteki, sa auai atu ai Peresitene Snow i se sauniga faapitoa mo tamaiti o le siteki. Sa valaaulia tamaiti e faia se laina faatulagaina lelei, ina ia mafai ona latou o atu auaua’i i le perofeta ma faatalofa atu ia te ia. Ae latou te le’i faia ai faapea, sa ia tulai ma saunoa atu: “Pe a ou faatalofa atu ia te outou, ou te manao ia te outou ia vaai mai i o’u mata, ina ia outou manatuaina a’u i taimi uma. O le mea lenei, ua le sili atu a’u nai lo isi alii e toatele, ae ua tuuina mai e le Alii tiutetauave e tele i o’u luga. Talu mai le taimi na faaali mai ai le Alii ia te a’u, i le tulaga atoatoa e pei ona sa Ia faia ai, ua ou faasaga e faatino soo se tiute ua tuuina mai i o’u luga. Talu ai ona o le tofiga maualuga ua ou faatumuina, lea ou te manao ai ia te outou e manatua, ia manatua ua e faatalofa i le Peresitene o le Ekalesia a Iesu Keriso. Ou te faamoemoe o le a le galo ia te outou ona tatalo mo a’u faapea o’u fesoasoani, Peresitene Cannon ma Samita, ma, mo Aposetolo.”⁷³

O le atalii o Peresitene Snow, o LeRoi, na faasoaina mai lenei tala mai se konafesi faalesiteki i Richfield, Iuta: “O Peresitene Snow ma Francis M. Lyman [o le Korama a le Toasefululua] sa auai i se konafesi faalesiteki i Richfield. Ina ua uma le pese amata, sa fesili atu le peresitene o le siteki ia Uso Lyman, po o ai e tatau ona ia fai atu i ai e faia le tatalo amata. Na saunoa atu Uso Lyman: ‘Fesili ia Peresitene Snow,’ o lona uiga, o le fesili atu ia Peresitene Snow, po o ai e tatau ona faia le tatalo. Nai lo lena, peitai ane, sa talosaga e le peresitene o le siteki Peresitene Snow e faia le tatalo. Sa talia ma le agaga fiafia e Peresitene Snow, ma, a o le’i amataina le tatalo, sa faaalia lona fiafia i le valaaulia ai, ma sa faapea mai, ua leva tele faatoa ia toe maua lea o se avanoa matagofie e pei o lenei. Fai mai tagata, sa ia ofoina atu se tatalo amata matagofie.”⁷⁴

Fegalegaleaiga ma i Latou o Isi Faatuatuaga

O le uunaiga a Peresitene Snow sa faalautele i tala atu o ona uso o le Au Paia o Aso e Gata Ai. Pe a ia feiloai ma tagata o isi faatuatuaga, sa oo ina latou faaaloalogia o ia ma le Ekalesia sa avea ai o ia ma sui. O Reverend W. D. Cornell, o se faifeau i se isi ekalesia, sa asiasia le Aai o Sate Leki ma maua le avanoa e faaalu ai se taimi ma Peresitene Snow. Sa ia tusia:

“Sa aveina atu a’u i totonu o lona potu saunia lelei e lana failautusi aga tamalii ma ua i ai le poto masani, ma ou iloa ai mo a’u lava, le lūlū lima ai ma se tasi o alii sili ona fiafia ma alofagia ua ou feiloai i ai—o se alii, o le sa i ai le agavaa uiga ese, e vave ona alu ese ai lagona le mautonu uma i le faatasi ai ma ia—o se alii tomai i le tulaga o feofoofoaiga, faatasi ai ma se atamai mauagatā, e mafai ai e ia ona faia ia e lagonaina se faafeiloaiga sili ona filemu i ona luma.

“O Peresitene Snow, o se alii sa aoaoina lelei, i le mafaufau ma le agaga ma le tino. O ana upu e lelei tele, e lē oso ai ni lagona ita, e faauo, poto. O ona uiga e faaalia ai lona aoaoina i aoga sili ona lelei. O le uiga faavae o lona agaga, e malū e pei o se tamaitiiti. O lena ua faailoa atu o ia ia te oe. O lena ua e fiafia ia te ia. Ua oulua talanoa ma ia, ua e fiafia ia te ia. Afai e umi ona oulua faatasi ma ia, o le a e alofa ia te ia.” I le lauga atu ai i lana au faitau, o ē iloagofie lava le i ai o manatu lē lelei e uiga i le Ekalesia, na saunoa ai Reverend Cornell: “Ae peitai, o ia o se ‘Mamona’! O lea, afai e tatau ona faamanuiaina le ‘Faa-Mamona’ i le faia ai o se alii e ulavale, ma sauā mai i a Peresitene Snow, o le a matua tele lava se mea e ao ona faia. Afai o le ‘Faa-Mamona’ sa avea ma malosiaga e fauina ai, lea ua mafai ona tuuina atu i le lalolagi se alii filemu i le agaga, e matua pulea lelei, ma faamanuiaina i le poto, o lona uiga o loo i ai moni lava se mea i le ‘Faa-Mamona’ e lelei.”⁷⁵

O se tasi faifeau, o le Susuga ia Prentis, sa ia tusi foi e uiga i se fonotaga ma Peresitene Snow: “O le foliga lea e faaali mai ai o le Alii o le Filemu o loo pule, o lana molimau sili lea. I lea taimi ma lea taimi, i se olaga sa faaaluina i le suesueina o tagata, sa ou mauaina lea ituaiga o molimau. O le ituaiga foliga lena na ou vaaia i le asō. … Sa ou faamoemoe e vaaia le poto, agalelei, mamalu, toafimalie, ma le malosi o faailoa mai i foliga o le Peresitene o le Ekalesia a Iesu Keriso o le Au Paia o Aso e Gata Ai; ae ina ua ou feiloai atu ia Peresitene Snow, mo sina sekone, sa faateia a’u. … O lona foliga o se mana o le filemu; o lona faatasi ai o se tatalo mo le filemu. I le filemu loloto o ona mata, sa le gata o le ‘nofoaga o le tatalo le leoa,’ ae o le apitaga o le malosi faaleagaga. A o ia talanoa e uiga i le ‘upu o valoaga e sili lona mausali’ ma le mautinoa o le faamoemoe lea sa ia te ia, ma le faatuatua tumau, lea sa faatoilaloina ai tofotofoga ma faigata o le olaga faanoanoa, sa ou vaaia le oo mai o lagona i ona fofoga, ma suesue ma le toto’a ataata tauleiloa o faamatalaga lea e tautala manino i galuega o lona agaga; ma le lagona ese na segia ai a’u, faapea sa ou ‘tu i luga o nofoaga paia;’ faapea o lenei alii sa le galue mai faamoemoega masani o tulafono, manaoga, po o le faanatinati, ae sa ia ‘galue mai se nofoaga autu e mamao ese.’ … Afai e mafai e le Ekalesia Mamona ona fausiaina ia ituaiga molimau, o le a lē tau manaomia le agavaa o se tusitala lelei, po o le tomai faafailauga o le aoao sili.”⁷⁶

Faaaliga e uiga i le Sefulua’i

O Peresitene Snow atonu ua sili ona lauiloa ona o se faaaliga na ia mauaina e uiga i le tulafono o le sefuluai. Ia Me 1899, sa ia lagona le uunaiga e malaga i St. George, Iuta, faatasi ma isi taitai o le Ekalesia. E ui lava sa ia le silafiaina pe aisea e manaomia ai latou e o atu, ae sa vave ona tali atu o ia ma ona uso i le uunaiga, ma i totonu o le lua vaiaso, ua latou i ai i St. George. I le aso 17 o Me, i le mavae ai ona taunuu i St. George, na maua ai e Peresitene Snow se faaaliga, e tatau ona ia talai atu le tulafono o le sefuluai. O le aso na sosoo ai, na ia faia ai le folafolaga lenei i le Au Paia: “O le afioga a le Alii ia te outou, e le o se mea fou; na pau lava o lenei: UA OO MAI LE TAIMI MO TAGATA TAITASI O LE AU PAIA O ASO E GATA AI, O LĒ E MANAO IA SAUNIA MO LE LUMANAI, MA TUTU MAUSALI ONA VAE I LUGA O SE FAAVAE TALAFEAGAI, INA IA FAIA LE FINAGALO O LE ALII MA TOTOGI LANA SEFULUAI I LE ATOATOA. O le afioga lena a le Alii ia te outou, ma o le afioga lena a le Alii mo nuu taitasi i le laueleele atoa o Siona.”⁷⁷

Ina ua uma ona tuuina atu lenei savali i St. George, sa faasoa atu ai loa e Peresitene Snow ma ana soa le savali lava lea e tasi i taulaga i Iuta i saute, atoa ai ma isi nuu i le va o St. George ma le Aai o Sate Leki. E oo ane i le taimi na latou toe foi ane ai, i le aso 27 o Me, ua 24 fonotaga ua latou faia, lea na tuuina atu ai e Peresitene Snow tautalaga e 26, ma lulu aao ma le 4,417 o tamaiti. Sa latou malaga i le 420 maila, e ala i le nofoaafi, ma le 307 maila i solofanua ma taavaletoso.⁷⁸ Sa toe faateleina le malosi o Peresitene Snow mai lea mea na tupu, ma sa naunau e faaauau le talaiina atu o le tulafono o le sefuluai i le Ekalesia atoa. “Ua ou fiafia tele i le taunuuga o lenei asiasiga,” na ia saunoa ai, “lea ua ou manao ai e malaga atu i siteki uma lava i Siona, i se taimi lata mai.”⁷⁹ Sa ia pulefaamalumalu i le tele o konafesi faalesiteki, lea na ia folafola atu ai i le Au Paia faapea o le usiusitai i lenei tulafono, o le a saunia ai tagata o le Ekalesia e maua faamanuiaga faaletino ma faaleagaga.⁸⁰ Sa ia folafola atu foi faapea, o le usiusitai i le tulafono o le sefuluai, o le a mafai ai e le Ekalesia ona alu ese mai le nofo aitalafu.⁸¹

I le Ekalesia atoa lava, sa tali atu ai tagata auai i le fautuaga a Peresitene Snow, faatasi ai ma se naunauga toefaafouina. I le 1904, o le tusitalafaasolopito o Orson F. Whitney, o lē sa auauna mulimuli ane o se sui o le Korama a le Toasefululua, na tusiaina: “O le aafiaga o le gaoioiga sa vave lava. O sefuluai ma taulaga na faapea ona sasaa mai i se taimi vave ma le agaalofa sa le’i iloaina mo le tele o tausaga, ma i le tele o auala, sa faaleleia tulaga o le Ekalesia ma sa manuia ona faamoemoega. Sa i ai muamua le alofa ma le faatuatuaga o tagata ia Peresitene Snow, ma o le taimi nei, o nei lagona lelei sa faateleina ma faamalosia.”⁸² O Peresitene Heber J. Grant, o le sa avea ma sui o le Korama a le Toasefululua, ina ua maua e Peresitene Snow le faaaliga e uiga i le sefuluai, sa ia tautino mai mulimuli ane: “O Lorenzo Snow, sa avea ma sui o le Au Peresitene o le Ekalesia, ina ua valu sefululima tausaga o lona soifua, ma o mea na ia faataunuuina i le isi tolu tausaga o lona soifuaga, e matua taua lava i le mafaufau atu i ai. … I le na o le tolu tausaga, sa manatu le lalolagi ua matua tele lenei alii ma ua lē toe mafaia se mea, o lē sa le’i auai lava i ni mataupu tautupe, o le sa tuuto atu lona soifuaga mo tausaga e tele i auaunaga i totonu o le malumalusa, na faatautaia mea tautupe a le Ekalesia a Keriso, i lalo o le musumusuga a le Atua soifua, ma i nā tausaga e tolu, na suia mea uma, mea tau tupe, mai le pouliuli i le malamalama.”⁸³

Tuuina Atu o le Molimau i Aso Mulimuli o Lana Auaunaga

I le aso 1 o Ianuari, 1901, na auai ai Peresitene Snow i se fonotaga faapitoa i le Tapeneko i Sate Leki, e faafeiloai ai le seneturi e 20. Sa valaaulia tagata mai lotu uma e auai. Sa sauniaina e Peresitene Snow se savali mo le faatasiga, peitai, sa le mafai ona ia faitauina ona sa matuā mamafa lava lona isu. Ina ua uma se viiga amata, o se tatalo amata, ma se vii na lagiina e le Aufaipese a le Tapeneko, sa tulai le atalii o Peresitene Snow, o LeRoi, ma faitau le savali, na faaulutalaina “Faatalofa atu i le Lalolagi mai ia Peresitene Lorenzo Snow.”⁸⁴ O upu faaiu o le savali na faaalia ai lagona o Peresitene Snow e uiga i le galuega a le Alii:

“I le lona valu-sefulu fitu tausaga o lo’u matua i luga o le fogaeleele, ua ou lagonaina ai le faatumulia i se faanaunauga malosi mo le manuia o tagata. … E sisii o’u lima ma talosagaina faamanuiaga o le lagi i luga o tagata o nonofo i le lalolagi. Tau ina ia susulu mai le la i o outou luga. Tau ina ia outou maua oa natia o le laueleele, ma fua o le eleele ia maua fua mai mo lo outou lelei. Tau ina ia tuliesea e le malamalama o le upu moni le pouliuli mai o outou agaga. Tau ina ia faateleina le amiotonu, ma ia faaumatia le amioleaga. … Tau ina ia manumalo le faamasinoga tonu, ma ia aveesea le lē faamaoni. Ma, tau ina ia i ai le amio lelei, amio mama, ma le mamalu, seia faatoilaloina le tiapolo ma faamamaina le lalolagi mai le amio leaga. Ia avea nei lagona, e fai ma leo o ‘Tagata Mamona’ i atumauga o Iuta, ia alu atu i le lalolagi atoa, ma ia faailoa atu i tagata uma lava faapea, o lo tatou manao ma la tatou misiona, e mo le faamanuiaina ma le faaolataga o le aiga atoa o le tagata. … Tau ina ia faamamaluina le Atua i le manumalo, lea ua oo mai i luga o le agasala ma le faanoanoa ma le leaga ma le oti. Ia i ai le filemu ia te outou uma!”⁸⁵

I le aso 6 Oketopa, 1901, sa tulai ai Peresitene Snow e saunoa atu i lona au uso, le Au Paia, i le sauniga faaiu o le konafesi aoao. Sa matua gasegase tigaina o ia mo le tele o aso, ma, ina ua ia taunuu atu i le pulelaa, na ia faapea mai, “Ou uso e ma tuafafine, ou te maofa lava i lou taumafai ou te talanoa atu ia te outou i lenei aoauli.” Sa ia faasoa atu se savali puupuu e uiga i le taitaiga i le Ekalesia. Ona ia saunoa mai loa lea o upu faaiu, na mafai ona faafofoga i ai le lautele o le Ekalesia mai ia te ia: “Ia faamanuia outou e le Atua. Amene.”⁸⁶

I le fa o aso mulimuli ane, na maliu ai loa Peresitene Snow i le niumonia. Ina ua mae’a se sauniga o le falelauasiga i le Tapeneko i Sate Leki, na falelauasi ai loa o ia i se fanua maliu i lona nuu pele, o Brigham City.

O le tama o Lorenzo Snow, o Oliver Snow

O Lorenzo Snow, sa papatisoina ma faamauina i Katelani, Ohio, ia Iuni 1836, lua masina talu ona faapaiaina le Malumalusa o Katelani, lea ua faaalia i le ata lenei.

Elder Lorenzo Snow

E toatele uluai tagata o le Au Paia na siitia mai Europa ina ia faatasi ma le Au Paia i le Iunaite Setete o Amerika.

I luga o le vaa o le Swanton, o se alii sa manu’a tigaina, na vave ona faamaloloina ina ua maea se faamanuiaga faaleperisitua na faia e Elder Lorenzo Snow.

Na auauna Lorenzo Snow o se taitai i vaega o paionia na taunuu i le Vanu o Sate Leki i le 1848.

O seevae uumi, seevae, o faagutu, ma pulou sa gaosia i totonu o lenei fale i Brigham City, Iuta.

O le Au Peresitene Sili ma le Korama a Aposetolo e Toasefululua i le 1898. Laina i luga, mai le itu agavale i le itu taumatau: Anthon H. Lund, John W. Taylor, John Henry Smith, Heber J. Grant, Brigham Young Jr., George Teasdale, Rudger Clawson, Marriner W. Merrill. Laina ogatotonu: Francis M. Lyman, George Q. Cannon, Lorenzo Snow, Joseph F. Smith, Franklin D. Richards. Laina i lalo: Matthias F. Cowley, Abraham O. Woodruff.