Aoaoga a Peresitene
Mataupu 3: O Le Liuaina i le Olaga Atoa: Faaauau Pea i le Agai i Luma i Mataupu Faavae o le Upu Moni

Mataupu 3

O Le Liuaina i le Olaga Atoa: Faaauau Pea i le Agai i Luma i Mataupu Faavae o le Upu Moni

“O la tatou lotu e tatau ona avea ma se vaega o tatou, o se vaega o o tatou tagata e le mafai ona tuu esea.”

Mai le Soifuaga o Lorenzo Snow

Na papatisoina Lorenzo Snow ma faamauina ia Iuni 1836. I le manatuaina ai o lana molimau tauatia’e, na ia ta’ua ai, i se taimi mulimuli ane: “Na ou talitonu o i latou [le Au Paia o Aso e Gata Ai] na ia i latou le lotu moni, ma o lea na ou auai ai i le Ekalesia. I le manatu atu i ai, o lo’u liua, sa na o se tulaga o le mafaufau lelei.”1 Na ia manatuaina, “Sa matua faamalieina a’u ua ou faia le mea sa ou iloaina o le poto e faia e tusa ma tulaga o lea taimi.”2 E ui sa faamalieina mo sina taimi ona o lenei malamalamaaga, ae na ia moomoo mo se faailoga faapitoa a le Agaga Paia. Na ia saunoa mai, “Ou te le’i mauaina se faaaliga, ae na ou faamoemoe ou te maua se tasi.”3

“O lenei faaaliga e le i vave ona o’o mai i le taimi na mae’a ai lo’u papatisoga, e pei ona ou faamoemoeina,” na ia manatua ai. “Peitai, e ui sa maua i se taimi mulimuli ane, ina ua ou mauaina, o lona tulaga moni sa sili atu ona atoatoa, faaalitino ma ofoofogia nai lo o’u faamoemoega sili ona malolosi na ou tulimataia. I se tasi aso, a o o’u suesue, pe tusa ma le lua i le tolu vaiaso talu ona ou papatiso, na amata ona ou toe mafaufau i le mea moni e faapea ou te le i mauaina se malamalamaaga o le moni o le galuega—e faapea ou te le i iloaina le faataunuuga o le folafolaga: ‘Ai se tasi e fia fai lona finagalo, e iloa ai e ia le mataupu;’ [tagai Ioane 7:17] ma, na amata ona lē lelei o’u lagona.

“Sa ou tuu esea a’u tusi, alu ese mai le fale ma savalivali solo i le fanua i lalo o le aafiaga malosi ona o se agaga faanenefu ma faanoanoa, a o foliga mai ua siomia a’u i se ao pogisa lē mafaamatalaina. Sa ou masani, i le faaiuga o le aso, ou te alu atu ai mo le tatalo faalilolilo i se togalaau, e le mamao mai lo’u fale, ae i le taimi lea, sa ou lē lagonaina se manao e faia lena mea.

“Sa alu ese le agaga o le tatalo, ma na foliga mai ua tapunia le lagi i o’u luga a’e. Mulimuli ane, i le iloa ai ua o’o mai le taimi masani mo le tatalo faalilolilo, na ou faapea ifo ai, o le a ou le faagaloina la’u sauniga o le afiafi, ma, i se tulaga e tatau ai, na ou tootuli ai e pei ona masani ai, ma, i lo’u nofoaga e masani ona ou malolo ai, ae sa le mauaina se lagona e pei ona masani ai.

“Sa le i pine ona ou tatalaina ou laugutu i se taumafaiga e tatalo, ae o’u faalogoina se pa’o, i luga tonu lava o lo’u ulu, e pei o le gasē o ni ofu talaloa silika, ma na faafuase’i ona afio ifo le Agaga o le Atua i o’u luga, ma siomia atoa ai lo’u tino atoa, ma faatumulia a’u mai le tumua’i e o’o i o’u alofivae, ma e maeu, le olioli ma le fiafia na ou lagonaina! E le mafai e se gagana ona faamatalaina le suiga faafuasei mai se ao pogisa faalemafaufau ma le pogisa faaleagaga i se susulu uiga ese o le malamalama ma le poto, e pei ona sa tuuina mai ai i lena taimi i lo’u malamalama. Ona ou maua ai lea o se malamalama atoatoa e faapea o loo soifua le Atua, o Iesu Keriso o le Alo o le Atua, ma le toefuataiga o le Perisitua Paia, ma le atoatoaga o le talalelei.

“Na avea o se papatisoga atoatoa—o se faatofuina faitino i le mataupu faavae faalelagi, po o se elemene, o le Agaga Paia; ma e sili atu lona moni ma faaletino i lona aafiaga i vaega taitasi o lou tino nai lo le faatofuina i le vai; aveesea mo le faavavau, e tusa ma le umi e mafai e le mafaufau ma le manatua ona o’o i ai, o tulaga uma o le masalosalo po o le fefe e tusa ai ma le mea moni ua tuuina mai ia i tatou faale-talafaasolopito, e faapea o le ‘Pepe o Peteleema’ o le Alo moni o le Atua; e faapea foi, le mea moni e faapea o Ia ua faaalia mai i le fanauga a tagata, ma tuuina mai le malamalama, e pei ona sa i ai i ona po o aposetolo. Sa matua faamalieina a’u, e pei ona atonu ou te o’o i ai, aua ua sili atu ona faataunuuina o’u faamoemoega, ou te manatu e mafai ona ou faapea atu, i se tulaga e le gata.

“E le mafai ona ou ta’uina atu le umi na ou i ai i le gasologa atoatoa o lenei fiafiaga sili ma le malamalama paia, ae, na o ni nai minute a o le i o’o mai le lagona faaselesitila, e faatumuina ma siomia ai a’u, ua amata ona mou malie atu. Ina ua ou tulai a’e mai o’u tulivae, faatasi ma lo’u loto ua faatumulia i le agaga faafetai i le Atua i tua atu o le malosiaga o faaaliga, na ou lagonaina—na ou iloa na ia tuuina mai i o’u luga le mea e na o se Mana Silisiliese e mafai ona tuuina mai—le mea lena e sili atu lona taua nai lo oa ma mamalu uma e mafai e lalolagi ona tuuina mai.”4

Na tumau le faamaoni o Lorenzo Snow i le molimau na ia mauaina i lena aso, ma na ia galue malosi ina ia faateleina lona malamalama faaleagaga ma fesoasoani i isi ina ia faia le mea lava lea e tasi. “Mai lena taimi,” na ia faapea mai ai, “na ou taumafai ai e ola i se auala ina ia le faagaloina ai Lona Agaga Paia, peitai, ina ia faaauau ona taitaiina e le Agaga, na taumafai e tuua lo’u manatu faapito ma soo se faanaunauga sese, ma le taumafaiga malosi e galue e faia Ona faamoemoega.”5 Na ia tautino mai, “Po o le a lava le umi e faaauau ai ona manatua ma manatunatu i Lona nofoalii, e le mafai ona ou faatagaina le molimau malosi ma le malamalama na tuuina mai ia te a’u, ma tumau i le lē magagana.”6 [Tagai i fautuaga 1 i le itulau 73.]

Aoaoga a Lorenzo Snow

O le mauaina o se molimau, o se amataga lelei lea mo le Au Paia o Aso e Gata Ai.

O le faavae ua faapea ona i ai lo tatou faatuatua, e maoa’e ma mamalu. Ua ou iloa lenei mea mo a’u lava. E le i leva ona ou i ai i lenei Ekalesia, ae faamanuiaina a’u i le mauaina o le malamalama sili ona atoatoa e faapea sa i ai se Atua, sa faapea ona i ai se Atalii, o Iesu Keriso, ma o Iosefa Samita sa faailoa mai e le Atua e avea ma Ana perofeta. Sa avea o se malamalamaaga e faapea e leai se tagata e mafai ona tau maia lena mea. Na o’o mai e ala i se faaaliga mai le Silisili Ese. O se amataga sili lena ona lelei mo se Au Paia o Aso e Gata Ai, ma o se mea e manaomia e tagata taitasi i nisi taimi, o e ua i ai soo se faanaunauga o lena ituaiga, e agai ai i luma i lenei ala. O tagata taitasi o le a o’o i tulaga faapea, o le a ia manaomia ai le malosi, ma o lena malosiaga o le a sau mai se malamalamaaga i mea moni, e faapea o le ala ua ia malaga ai, o le a taitai atu ai o ia i le mauaina o ona manaoga sili ona maualuga ma lelei.7

Uso e ma tuafafine, e i ai nisi o mea e ao ia te outou ma a’u ona mafaufau i ai. Ua o’o mai le taimi, ua tatau ai i alii taitasi, ma tamaitai taitasi ona iloa mo i latou lava, e tusa ma le faavae lea ua tatou tutū ai. E tatau ia i tatou uma ona tauivi ina ia latalata atu i le Alii. Ua alagatatau mo i tatou ona agai teisi atu i luma ma maua se malamalama atoatoa o na mea, lea e tatau ona tatou matua malamalama i ai. O se avanoa mo Au Paia o Aso e Gata Ai taitasi.8 [Tagai fautuaga 2 i le itulau 73.]

E mafai ona faateleina lo tatou faatuatua ma le malamalama faaleagaga.

E mafai e alii ma tamaitai ona faateleina lo latou malamalama faaleagaga; e mafai ona sili atu lo latou tuputupu a’e, a o faasolo ina matutua.9

Ua ou lagona ua agaigai i luma le Au Paia o Aso e Gata Ai; ua latou mauaina se aoaoga. O loo faateleina lo tatou maualuga. O loo tatou agai i luma i se tulaga ma se lalolagi maualuga atu, atoa ai ma se fogāmea maualuga atu, ma o loo tatou mauaina sea aoaoga e faapea, o le a lē mafai lava e le poto o le lalolagi, faatasi ma mea uma e maua ai ma mataupu autu ma aoaoga faavae sese, ona i ai se aafiaga i le Au Paia o Aso e Gata Ai, aua ua siitia i latou i luga atu o teori ma taumatematega o fausaga a tagata, ma ua siitia maualuga atu i mea o le upumoni ia e siitiaina le mafaufau, faaeaina le malamalama, ma faamautuina atili ai i latou [lava] i mataupu faavae moni o le olaga ma le mamalu. Ua faatumulia o tatou loto i nei upu moni, ma e le mafai ona tatou iloa le aso po o le itula, o le a faateleina ai lo tatou faatuatua ma i le malamalama o le faatuatua ma le mana o le Atua; tatou te iloa ai ua tatou latalata atu i lo tatou Atua, ma tatou lagona ai ua vavalalata lo tatou sootaga ma le Atua, lo tatou Tama.10 [Tagai fautuaga 3 i le itulau 73.]

Afai tatou te mananao e faateleina lo tatou faatuatua ma le malamalama faaleagaga, e tatau ona tatou matua galulue malosi.

Ua tatau i tagata taitasi ona aoao e tu i lona lava malamalama; e le mafai ona ia faalagolago i lona tuaoi; o tagata taitasi e tatau ona tutoatasi; e tatau ona ia faalagolago i lona Atua mo ia lava. E faalagolago ia te ia lava, ina ia vaai pe mafai ona ia faatoilaloina le tai o faalavelave ma faatoilalo ni mea lē lelei o loo salalau i le ala o le olaga e taofia ai lona alualu i luma. E mafai e se tagata ona maua faamatalaga e ala i le galuega a le Agaga Paia, ma e alu atu o ia i le Atua ma faateleina lona faatuatua, e tusa ma lona filiga.11

E faigata lava ona agaigai i luma i mataupu faavae o le upu moni, ina ia faateleina le malamalama faalelagi, [vagana] ua tatou faaaogaina o tatou agavaa e mafaufau ai ma matua galulue malosi i le tulaga tatau ai. O loo i ai se faataitaiga ua faamauina i le Mataupu Faavae ma Feagaiga, e uiga i se lē malamalama na i ai ia Oliva Kaotui, e aafia ai lenei mataupu faavae. Na folafola atu ia te ia e le Alii le meaalofa e faaliliu ai faamaumauga anamua. E pei o le toatele o tatou i aso nei, na i ai ni fenumiaiga e faatatau i le faaaogaina o le meaalofa. Na ia manatu na o le pau le mea ua tatau ona ia faia, e pei ona sa folafola atu ai ia te ia e le Atua lenei meaalofa, o le nofo faatali mo sina taimi, e aunoa ma se taumafaiga, seia o’o ina galue lava ia. Peitai, ina ua tuuina atu na faamaumauga i ona luma, sa le’i i ai se malamalama na tuuina ifo, sa tumau lo latou faamaufaailogaina, e pei ona sa i ai, aua sa ia le mauaina se mana e faaliliuina ai.

E ui ina sa faaeeina atu le meaalofa e faaliliu ai, sa le i mafai ona ia faamaeaina le galuega, ona sa ia lē tuuina atoa atu o ia lava i luma o le Atua, faatasi ma le vaaiga o le atiina ae o le meaalofa i totonu ia te ia; ma sa o’o ina matua le fiafia ai o ia, ma o le Alii, i lona agalelei ma le alofa tunoa, na faailoa atu ai ia te ia lona sesē, e faaaogaina ai le gagana lenei.—

“Faauta, sa e lē malamalama; sa e manatu o le a Ou tuu atu ia te oe lena mea, ae e te le i mafaufau i ai ae na o lou ole mai ai ia te a’u; ae faauta, Ou te fai atu ia te oe, e ao ina e suesue i ai i lou mafaufau; ona ao lea ona e ole mai ia te a’u pe ua sa’o, o le a Ou faia ia mu lou loto i totonu ia te oe,” ma isi mea. [Tagai MF&F 9.]

O le mea lea e tusa ma i tatou, ia faaaloalo i mea o loo tatou taulimaina. Afai tatou te faamoemoe e faaleleia atili, ina ia agai i luma i le galuega ua i o tatou luma, ma mulimuli ai mauaina na meaalofa ma mamalu, seia o’o i lena tulaga o le faaeaina ua tatou tulimatai i ai, e ao ona tatou manatunatu ma mafaufau loloto, e ao ona tatou galulue malosi, i le mea e gata ai lo tatou mafai.12

E ao ona tatou … maua le Agaga mo i tatou lava, ma aua nei faamalieina i le savali ai i le malamalama o isi; e tatau ona tatou faaaogaina faatasi ma o tatou agaga. …

O se tagata ua faasaga e aoao le iliina o se fagufagu, o le a feagai ma se faigata o le aoaoina o nota, ma ina ia mafai ona sa’o le taina o se pese, e i ai se taumafaiga sili o le filiga ma le onosai e manaomia ai. E ao ina faifai pea, malolo, toe liliu i tua ma toe amata, ae a mavae sina taimi o le a mafai e ia, e ala i se taumafaiga sili o le galue malosi ina ia poto i le taina o lena pese. Pe a valaaulia e ili lena pese i se taimi mulimuli ane, o le a leai se tau mafaufau po o fea e tuu ai tamatamailima, ae o le a ia iliina e aunoa ma se faafitauli. Sa le i faigofie muamua, sa manaomia le tele o le onosai ma le galue, a o le i avea ma se mea faigofie le iliina o le pese.

E faapena foi le tulaga o mataupu tau i mea a le Atua. E ao ina tuuina atu atoa o tatou tagata, mai lea alofa tunoa i lea alofa tunoa, ina ia maua le tulafono o le galue ia mauaa i o tatou tagata, ina ia avea o se vaega o lo tatou natura le faia o na mea ua faamoemoeina mai ia i tatou.13 [Tagai fautuaga 4 i le itulau 73.]

A o tatou suesue atili i mea a le Atua ma tumau faamaoni ai, o le a avea la tatou tapuaiga ma vaega o o tatou tagata.

O loo i ai se tulaga matautia i lo tatou tulaga faamalieina i se agaigai i luma papa’u, faatasi ma le na o se agai i luma opeopea. Tatou te talanoa e uiga i le savavali i le malamalama o le Agaga ma le lagonaina i o tatou luga, ae tatou te faia ea ia mea? E ao ina tatou saili loloto i mea a le Atua, faataatia lo tatou faavae i le papa, seia tatou o’o atu i lena vai, lea e tatau ona i totonu o i tatou e avea o se vaipuna tumau o le ola e faavavau.14

Ua i ai ni alii ua faatasi ma i tatou, o e na i ai le Agaga o le Silisili Ese mo se taimi, o o latou faamoemoega sa lelei ma mamā e pei o agelu, ma, na osia feagaiga ma le Atua o le a latou auauna ia te Ia ma tausia Ana poloaiga i tulaga uma lava. … Ae, o faapefea mai ea i le taimi nei nisi o na toeaina? Ua le o toe i ai lena lava molimau i le asō. O o latou loto ua naunau atu i mea o lenei lalolagi, lea na mafai ona fesoasoani le Alii ia latou mauaina, ua latou faatalitali nei seia valaauina i latou, ma i le tele o tulaga pe a valaauina, latou te usiusitai ona o lo latou mananao e faatumauina o latou tulaga ma tofiga, nai lo se alofa loloto moni o le galue i le tofiga ua valaauina ai i latou.

O lenei le tulaga o tagata uma, e tusa pe o le a le lelei na amata mai ai, o e faatagaina o latou manatu ma lagona e mulimuli i le lalolagi ma ona ala, ma o se faamaoniga manino ma lē finauina, pe a tupu lenei tulaga i tagata, e sili atu lo latou alolofa i le lalolagi nai lo le alofa i le Alii ma Lana galuega i luga o le fogaelele. I le maea ai ona mauaina le malamalama o le Talalelei faavavau, ma fetagofi atu i mea lelei o le malo, ma avea ma fanau a Isaraelu ma suli mo folafolaga sili ma mamalu, e tatau ona tatou galulue ma le faamaoni ma le filigā ia ausia mea na fuafuaina e le Atua e ala ia i tatou; e tatau ona avea i tatou ma alii ma tamaitai o le faatuatua ma le mana, e faapea foi galuega lelei, ma, pe a tatou iloaina ua tatou faatamala pe faalēano i se tulaga faatauvaa, ua tatau ona lava mo i tatou ona iloa, ina ia salamo ma toe foi i le ala o le tiute.15

E leai se mea e sili atu ona faavalevalea nai lo le manatu o se tagata e tuu ese lana tapuaiga e pei o se peleue po o se ofu. E leai se mea faapena, o se tagata e tuu ese lana tapuaiga vagana ua ia faataatia ese ia lava. O la tatou tapuaiga, e tatau ona tuufaatasia i totonu o i tatou lava, o se vaega o o tatou tagata, lea e le mafai ona faataatia ese. Afai e i ai se mea faapena, e pei o se tagata e tuu ese lana tapuaiga, o le taimi lava na te faia ai, o le a o’o ai o ia i nofoaga e leai ma sona silafia i ai, na te tuuina atu o ia lava i mana o le pouliuli, ua le o toe i ai o ia i lona lava nofoaga, e leai foi sana pisinisi iina. O le manatu e uiga i toeaina o Isaraelu o e laulauvavale, pepelo ma onanā, ua tuuina maualalo i latou i na mea, e tatau ona sili atu i latou i luga o mea faapena. Se i tatou faate’aina ese mai ia i tatou mea leaga taitasi ma ola e ala i upu uma e tulei mai i le fofoga o le Atua [tagai MF&F 98:11]. Se i tatou u’umau i tiute taitasi ua tofia ai i tatou, ma le naunautai ma le malosi, ina ia mafai ona tatou maua le agaga o lo tatou Atua, le malamalama o le upu moni ma faaaliga a Iesu Keriso, i totonu o i tatou e le aunoa.16

Tumau i le vaa o Siona. Afai e o mai vaa i autafa, faaali mai lanu matagofie ma fai mai folafolaga mananaia, aua nei e alu ese mai le vaa, ina ia alu atu ai i le laueleele matutu i luga o se isi vaa; ae ia tumau i luga o le vaa. Afai ua le lelei ona faaaogaina oe e nisi o i latou o i luga o le vaa, o e ua le mauaina le agaga e tatau ai, manatua o le vaa lava ia o loo lelei. E le tatau ona tatou faatagaina o tatou mafaufau ia lagona le ita, ona o soo se mea lava atonu ua faia e se tasi i luga o le vaa ia i tatou; o loo lelei lava le vaa, ma o loo lelei foi le auvaa, ma o le a lelei tatou pe afai tatou te tumau i le vaa. Ou te faamautinoa atu ia te oe, o le a aveina atu oe e le vaa o Siona i le laueleele o le mamalu.17

O le a ou [tuuina atu se] faataitaiga e tusa ma le aumaia ma le mauaina o lenei agaga i totonu o i tatou, ma matuā tuutō atu e faapea o tatou i le taimi o faaosoosoga, o le a lē felafoaiina solo. Ia tuu se kukama i totonu o se paelo vineka ma o le a e iloa ai e itiiti se aafiaga e tulai mai i le itula muamua, e faapea foi i le 12 itula muamua. Toe vaavaai i ai, ma o le a e iloaina, o le mea ua tupu ua na o le pa’u ua aafia, aua e manaomia se taimi umi e faasaoina ai meaai e le vineka. O se tagata ua papatisoina i le ekalesia ua i ai se aafiaga ia te ia, ae lē o le aafiaga e faasaoina ai loa lava o ia. E le faatuina ai le tulafono o le aia tatau ma le tiute mo ia i le 12 po o le 24 itula muamua, e ao ona ia tumau i le ekalesia, e pei o le kukama i totonu o le vineka, seia mafai ona faatumuina o ia e le agaga sa’o, seia o’o ina faasaoina o ia i le ‘faa-Mamona,’ i le tulafono a le Atua; e tatau ona tatou mauaina na mea ua aofia ai i totonu ia i tatou.

… Uso e ma tuafafine, ou te … tuuina atu le mataupu i la outou faautautaga lelei, faatatauga, ma manatunatuga loloto, ma le tatalo i le Alii, le Atua o o tatou tama e liligi ifo Lona Agaga i luga o Ona tagata. O outou na o e ua filifilia e le Alii e faamamaluina o Ia i Lona afioaga, ma, tau ina ia faamanuia e le Alii outou ma faatumuina outou e Lona Agaga, ma, tau ina ia manino o outou mata e iloa ai mea e tatau mo lo outou faaolataga. Ma, afai e i ai se alii po o se tamaitai e le i matua ala mai, tau ina ia vave ona o’o mai le taimi, atonu e o’o mai ai le Agaga ma le mana o le Agaga Paia ia te i latou, ina ia aoaoina i latou i mea ua tuanai, taimi nei, ma o le a o’o mai, ma e ala i le fesoasoaniga a le Alii, totoina le amiotonu ma le mataupu faavae o le upu moni i totonu o i latou, ina ia mafai ona saunia i latou mo afa o loo fotuai mai.18 [Tagai fautuaga 5 i le itulau 73.]

Fautuaga mo Suesuega ma le Aoaoina Atu

Mafaufau i manatu nei, a o e suesueina le mataupu, pe, a o e sauni e a’oa’o atu. Mo nisi fesoasoaniga, tagai itulau v–vii.

  1. Iloilo mea na tutupu ia Lorenzo Snow ua tusia i itulau 53, 65–66. Na faapefea ona moni lau molimau mo oe? Mafaufau e faasoa atu i se tagata o le aiga se mea na tupu ia te oe, po o se uo, e pei o se tasi na e auauna atu i ai, i le avea ai ma se faiaoga o aiga, po o se faiaoga asiasi.

  2. Na saunoa mai Peresitene Snow, o le mauaina o se molimau o “se amataga lelei tele lea mo se Au Paia o Aso e Gata Ai” (itulau 67). Aisea ua na o se amataga ai le molimau—ae le o se taunuuga mulimuli?

  3. I le vaega o loo amata i le pito i lalo o le itulau 67, ua faatusatusa ai e Peresitene Snow le aoaoga a le lalolagi i le aoaoga “maualuga atu” ua ofoina mai e le Alii. E mafai faapefea ona tatou tulitulimata’ia lenei “aoaoga maualuga atu”? O a faamanuiaga ua o’o mai ia te oe, a o e faia lena mea?

  4. Faitau le vaega o loo amata i le pito i lalo o le itulau 68. O anafea na e manaomia ai e “tu i luga o [lou] lava malamalama”? O a mea e mafai e matua ma faiaoga ona faia e fesoasoani ai i fanau ma talavou e tutu i luga o o latou lava malamalama?

  5. Iloilo le fautuaga a Peresitene Snow i le vaega mulimuli o le mataupu (itulau 70–73). O le a lou manatu i le uiga o le “suesue loloto i mea a le Atua”? O le a lou manatu i le uiga o le avea o la tatou tapuaiga ia “aofia ai i totonu o i tatou”?

Mau Talafeagai: 2 Nifae 31:20; Mosaea 5:1–4, 15; Alema 12:9–10; 3 Nifae 9:20; Moronae 10:5; MF&F 50:24

Fesoasoaniga mo le Aoao Atu: “O le tele o se vaega o le a’oa’o atu i totonu o le Ekalesia, ua faia i se tulaga ua faigata ona suia, o le lauga atu. Tatou te lē talia lelei tautalaga i totonu o potu aoga. Tatou te faia i sauniga faamanatuga ma konafesi, ae o le a’oa’o atu e mafai ona itu-lua, ina ia mafai ai ona e faia ni fesili. E mafai ona faigofie ona e taliina fesili i totonu o se vasega” (Boyd K. Packer, “Principles of Teaching and Learning,” Ensign June 2007, 87).

Faamatalaga

  1. I le Frank G. Carpenter, “A Chat with President Snow,” sii mai le Deseret Semi-Weekly News, 5 Ian., 1900, 12.

  2. “The Grand Destiny of Man,” Deseret Evening News 20 Iulai, 1901, 22.

  3. I le “A Chat with President Snow,” 12.

  4. Juvenile Instructor, 15 Ian., 1887, 22–23.

  5. “The Object of This Probation,” Deseret Semi-Weekly News, 4 Me, 1894, 7.

  6. Millennial Star, 18 Ape., 1887, 242.

  7. “Glory Awaiting the Saints,” Deseret Semi-Weekly News, 30 Oke., 1894, 1.

  8. Millennial Star, 18 Ape., 1887, 244.

  9. Deseret News: Semi-Weekly, 31 Mat., 1868, 2.

  10. Salt Lake Daily Herald, 11 Oke., 1887, 2.

  11. Deseret News, 11 Ape., 1888, 200; mai se toe faaupuina auiliili o se lauga na tuuina mai e Lorenzo Snow i le konafesi aoao ia Aperila 1888.

  12. Deseret News, 13 Iuni, 1877, 290.

  13. Deseret News, 28 Ian., 1857, 371.

  14. Deseret News, 28 Ian., 1857, 371.

  15. Deseret News: Semi-Weekly, 15 Aok., 1882, 1.

  16. Deseret News: Semi-Weekly, 31 Mat., 1868, 2.

  17. Deseret Semi-Weekly News, 30 Mat., 1897, 1.

  18. Deseret News, 28 Ian., 1857, 371.

“E ao ina tatou saili loloto i mea a le Atua, faataatia lo tatou faavae i luga o le papa, seia tatou o’o atu i lena vai, lea e tatau ona i totonu o i tatou o se vaipuna tumau o le ola e faavavau.”

E lei pine ona uma ona papatiso ma faamauina, ae maua e Lorenzo Snow se asiasiga filemu, ma suia ai le olaga, mai le Agaga Paia.

“E mafai e alii ma tamaitai ona faateleina lo latou malamalama faaleagaga; e mafai ona sili atu lo latou tuputupu a’e, a o faasolo ina matutua.”