Mataupu 16

“Ina Ia Tasi I Tatou”

“O le siufofoga o le Silisili Ese ua valaau ia i tatou mai le totonugalemu o le lē mautonu … ina ia fausia se tuufaatasiga ma se faale-usoga matagofie, lea e tatau ai ona tatou alolofa le tasi i le isi, e pei ona tatou alolofa ia i tatou lava.”

Mai le Soifuaga o Lorenzo Snow

A o le’i tutuli esea le Au Paia mai Navū, sa fono ai le Usoga taitai o le Ekalesia, i le malumalu. Sa latou osi feagaiga o le a latou “le tuua lava lo [latou] galulue, e ala i mea uma ma aafiaga e mafai ona [latou] mauaina, seia mafai e le Au Paia uma, o e ua naunau e tuua Navū, ona faataunuu i se nofoaga mo le faapotopotoina o le Au Paia.”¹ I le naunau ai e tausia lenei feagaiga, sa faavaeina ai e Peresitene Polika Iaga le Tupe Faaagaga mo Femalagaaiga i le 1849. I lalo o lenei polokalama, sa faaune atu ai e le Ekalesia tupe i le Au Paia e malaga mai fafo, faatasi ma le malamalamaaga o le a toe totogi mai e tagata a latou faaunegatupe, pe a taunuu i Iuta ma maua galuega.

Sa valaauina e Peresitene Iaga ia Elder Lorenzo Snow ma isi e sailia tupe mo lenei taumafaiga. Sa faigata ia Elder Snow ona fesili atu i le Au Paia mo ni foai—sa matitiva foi i latou, ona sa tulituli mai lea nofoaga i lea nofoaga, a o le’i nofoia ai i le Vanu o Sate Leki. Sa ia tusia i lana tusi o talaaga: “I le faatinoina ai o le misiona o le faamaopoopoina o mea mai le Au Paia, o ē, sa gaoia ma vetea a latou meatotino, faatino se malaga e silia i le tasi le afe maila, ma faatoa faamautū i se nofoaga e leai se vai ma tuufua i le ‘Toafa Tele o Amerika,’ sa ou feagai ai ma se galuega faigata tele. Faatasi ma nai mea laiti na ese mai ai, sa laitiiti lava ni nai mea na i ai i tagata, po o le leai lava o se mea sa mafai ona latou tuuina mai.” Ae ui i lea, o mea uma sa alu i ai Elder Snow, sa tuuina atu ai e tagata mea uma sa mafai ona latou tuuina atu. Sa ia lipotia faapea: “O taumafaiga ma le naunautaiga, sa faaalia i soo se mea, o le aveesea mai se tulaga sili ona faigata o sina tupe itiiti—o le lagona o le agaalofa ma le alofa sili o le agaga, lea sa ou fetaiai i le totonugalemu o le mativa, o faafeiloaiga fiafia sa ou mauaina e o’o lava i le tulaga mativa sa i ai uma tagata, na faatumulia ai lo’u loto i le olioli ua matuā tele nauā. O se tasi alii sa tausisi lava e tatau ona ou aveina lana povi e tasi sa i ai, i lona faapea mai sa laveaiina o ia e le Alii, ma faamanuiaina o ia i lona tuua ai o lona atunuu, ma sau i se laueleele filemu; ma, i le tuuina mai ai o lana povi e tasi, sa ia lagonaina ai ua ia faia lona tiute ua faapea ona manaomia, ma le mea ua ia faamoemoeina mai i isi, pe a toe faafoi i tua le tulaga.

Ina ua mae’a le aoina o foa’i i Iuta i matū, sa matauina ai e Elder Snow, “Sa tatalaina loto o le Au Paia, ma, i le manatu ai i ō latou tulaga sa i ai, sa latou foa’ia le anoanoai o mea ma le naunautai, ma e moni lava, sa faia foi ma le fiafia.”²

E ui lava sa itiiti se mea na tuuina mai e tagata taitoatasi, ae o a latou taumafaiga tuufaatasi sa faamanuiaina ai le tele o olaga. O le Tupe Faaagaga mo Femalagaaiga, sa faasalafa i tua atu o lona faamoemoega autu, sa fesoasoani ai i le sili atu nai lo na o tagata o le Ekalesia sa i ai i Navū. Sa faaauauina mo le 38 tausaga, e fesoasoani ai i le fiasefulu afe o tagata liliu mai, mai le tele o laueleele, na faapotopoto faatasi ma o latou uso o le Au Paia. [Tagai fautuaga 1 i le itulau 219.]

Aoaoga a Lorenzo Snow

Pe a tatou lotogatasi i le talalelei, e faaalia e le Alii i le lalolagi Lona uiga, e ala ia i tatou.

Sa tatalo Iesu i Lona Tamā, faapea o i latou ua tuuina atu ia te ia mai le lalolagi, ina ia tasi e pei o Ia ma le Tama ua tasi, ma sa faapea mai o ia, Ou te tatalo ina ia e tuuina atu ia i latou le alofa lava e tasi lea ua i ai ia te Oe mo a’u, ina ia ou i ai i totonu ia i latou faapei o oe le Tamā o i totonu ia te a’u, ina ia tasi i latou i totonu ia te i taua. O loo i ai se mea sili ona taua i lenei, ma ua tatau ona tatou faatinoina e i tatou lava, seia faapei i tatou o le Tama ma le Atalii, ua tasi i mea uma.³

Mai fuaiupu sa ou faitauina [Ioane 17:19–21] o le taua ma le alagatatau ona lotogatasi o Aposetolo, sa faaalia, ina ia mafai ai ona faataunuuina ma le manuia faamoemoega o le Alii i le lalolagi. Auā, se’i vagana ua lotogatasi ia Aposetolo, ma i latou na talitonu ia latou upu, atonu o le a lē mafai ona talitonu le lalolagi i le misiona ma faamoemoega o le Faaola. O le mea lena, na tatalo ai Iesu i le Tamā ina ia mafai e i latou uma o e na tuuina atu e le Tamā ia te Ia, ona tasi e pei ona tasi o Ia ma le Tamā, ina ia talitonu le lalolagi i le Tamā na auina mai o Ia. O le mea moni, o le mea lea na fuafuaina e le Alii ia faia ia Isaraelu, i le taitaiina ese mai o i latou mai le nofopologa i Aikupito; sa finagalo o Ia e faia i latou o se nuu lotogatasi, o se malō uiga ese, o se malō o tagata o e na mafai e le Atua ona faamamaluina ma faaaloalogia, ina ia talitonu ai le lalolagi, ma ia mafai ona latou maua faamanuiaga na Ia finagalo e tuuina mai i o latou luga, e faapei ona avea le lalolagi uma ma fanau a le Atua; ma afai e faataunuuina e Isaraelu ana tuutuuga, o le a le taumateina le faamanuiaina tele o le lalolagi, ma o le a faamanuiaina ma le atoatoa faamoemoega uma o le Atua. Sa finagalo le Alii e faaali Lona uiga, ma le uiga o le lagi, ma finagalo ia o’o atu Lona alofa ma faamanuiaga e ala ia Isaraelu i le aiga atoa o le tagata; peitai, sa lē usitai Isaraelu ma ua le faalogo i Lona siufofoga. …

Afai o i ai le fevaevaea’i i totonu ia i tatou; afai tatou te fevaevaeai faaleagaga po o le faaletino, o le a lē mafai lava ona avea i tatou ma nuu ua fuafuaina e le Atua ina ia avea ai, po o le lē mafai lava ona avea o i tatou ma meafaigaluega i Ona aao, i le faatalitonuina o le lalolagi faapea o le Perisitua paia ua uma ona toefuataiina mai, ma ua ia i tatou le talalelei e faavavau. Ina ia mafai e i tatou ona faataunuuina faamoemoega o le Atua, e ao ona tatou faia e pei ona sa faia e Iesu—ia tuuina atu o tatou loto taitoatasi i le finagalo o le Atua, ia lē gata i le mea e tasi, a o mea uma, ma ia ola ina ia i ai i totonu o i tatou le finagalo o le Atua.⁴ [Tagai fautuaga 2 i le itulau 219.]

E matuā moomia le lotogatasi i totonu o le Ekalesia faapea i o tatou aiga.

E tatau ona i ai le auaufaatasi sili atu i totonu ia i tatou, nai lō lea o loo i ai i le aso nei. E i ai se auaufaatasiga atoatoa i totonu o le korama a le Toasefululua. Pe lē tatau ea ona i ai se auaufaatasiga atoatoa i lena korama? E lē taumatea lava, o tagata taitasi o le a fai mai Ioe, o se auaufaatasiga atoatoa i le korama a Aposetolo e Toasefululua. … Ma, e i ai foi se auaufaatasiga atoatoa i le Au Peresitene Sili, ma, pe le tatau ea ona i ai? O tagata taitasi o le a faapea mai, e moni lava, e tatau ona i ai. E faapena foi, pe lē tatau ea ona i ai se auaufaatasiga atoatoa i le toafitu o peresitene o Fitugafulu? E matuā mautinoa lava le tatau ai; tatou te faapea atu, Ioe. Pe lē tatau ea ona i ai se auaufaatasiga atoatoa i Aufono a Fautua Maualuga a siteki eseese o Siona? E moni lava, e tatau ona i ai, ma e i ai se auala e ausia ai lena auaufaatasiga. Ma, o le auala lava lea e tasi mo isi faalapotopotoga eseese ma korama. Pe lē tatau ea ona i ai se auaufaatasiga atoatoa i au peresitene o Siteki? E moni lava, ma, a na faapea o a’u o se peresitene o se siteki, o le a ou le malolō lava i le ao ma le po, seia ou mauaina le auaufaatasi ma o’u fesoasoani. Pe lē tatau ea ona i ai se auaufaatasiga i le Epikopo ma ona Fesoasoani? E mautinoa lava e tatau ona i ai.

Ia, o le a la le mea sili atu ona taua? Pe lē tatau ea ona i ai le tulaga o le auaufaatasi i totonu o le aiga? … E le taumatea lava, le tatau ona i ai. Ma, aisea e tatau ai ona faamalieina soo se alii, aisea e tatau ai i soo se tane ma tamā o se aiga ona nofo ma le faamalieina seia aumaia se auaufaatasiga atoatoa, o lona uiga, i le mamao e mafai ona i ai se auaufaatasiga atoatoa? Ma, i lenei auala, e tatau ai i le tamā ona avea o ia lava, i le mea e mafai ai, ia atoatoa i lenei olaga i le vaaiga a lona aiga. Faapea foi le tina ona avea o ia, i le mea e gata ai lona mafai, ma se tina atoatoa. Ona faapea lea ona saunia i laua e faia a lā fanau ia atoatoa e tusa ai ma lo latou naunautaiga ma agavaa mo le avea ma tagata atoatoa. Ma, e tatau ona matuā faaeteete le tamā ma le tinā. E le tatau lava i le tinā, i luma o lana fanau, ona tautala lē faaaloalo e uiga i lana tane. Afai ua ia manatu ua sesē lana tane (atonu na te faia), e lē tatau lava ona ia talanoa ai i luma o lana fanau. E tatau ona ia ave ese lana tane mai luma o lana fanau, ma faapea ona ta’u atu ai ia te ia iina ona sesē, i se auala lelei, ae ia aua lava ne’i talanoa lē faaaloalo i le tamā, i luma o lana fanau. Ma, e faapena foi le tamā. E leai sana aia e tautala le faaaloalo ai i lana avā, i luma o lana fanau. Ma, ou te tatalo i le Atua, ia tuu atu le agaga ma le malamalama e faasa’oina ai i laua i tulaga faapea. Ou te iloa o le tele o faigata lea e foliga mai i le taimi nei, ma le lē faaaloalo ua tatou vaaia, e tusa o le Perisitua, i le va o tagata talavou, e tupu mai lenei mea moni, faapea sa i ai faigata i le li’o o le aiga, ma sa i ai le lē faaaloalo na faaalia i o latou luma, o le tamā mai le tinā, pe o le tinā mai le tamā. O lenei, ou te iloa o loo i ai nei mea.⁵ [Tagai fautuaga 3 i le itulau 219.]

Tatou te maua le lotogatasi, a o tatou fesoasoani le tasi i le isi ia maua le filemū ma le fiafia.

Ua matuā tele nauā lo tatou talanoa e uiga i le a’oa’oga faavae o le alofa i o tatou tuaoi, e faapei ona tatou alolofa ia i tatou lava; tatou te talanoa i ai ma o nisi taimi tatou te mafaufau ai i ai, ae, o le a le tele o lo tatou faatinoina moni o nei mea, ma vaaia ai le faigata ua i totonu ia i tatou? E ao ona tatou malamalama e tatau ona tatou galulue e tusa ma aoaoga faavae patino, lea e mafai ai ona fusia faatasi i tatou o se nuu, ina ia noatia o tatou lagona ina ia tasi i tatou, ma o lenei mea, o le a lē mafai lava ona ausia, vagana ua faia ni mea patino, ma mea e manaomia ai se taumafaiga matuā tele mai ia i tatou.

O le a faapefea ona e galue ia fusia faatasi outou? O le a faapefea ona alu atu se alii ma galue e tuufaatasia o ia ma lona tuaoi? Afai e toalua alii ua galulue faatasi, o e le’i masani lava muamua, o le a faapefea ona galulue ia maua faigauo o le tasi ma le isi, noataga ma uiga agaalofa o le tasi i le isi? Aisea, sa tatau ai ona faia se mea, ma e le faapea e faia e na o le toatasi o i laua, ae ia faia e le tasi faapea foi le isi. O le a lē tali le toatasi e fai na o ia le galuega; o le a lē fetaui mo se tasi e faia le galuega na o ia, ae ina ia mafai ona avea ia tasi i a laua mea e fai ma uiga agaalofa—o le a manaomia uma la la’ua faatinoga. …

… E i ai le mea e ao ona faia e tagata [taitasi], ina ia mafai ai ona maua e i laua uma le faigauo ma fusia ai tatou faatasi o se nuu. …

… Ia faamalamalamaina o outou mafaufau ina ia mafai ona malamalama ma vaai atu ai i mea e fiafia i ai au uo o lo’o siomia ai oe, ma, i le tulaga lea ua mafai ai e oe ona maua faamanuiaga mo au uo, ia faapea ona faia, ma i lou faia ai o lena mea, o le a e iloaina ai o na mea e te manaomia, o le a vave o’o mai i ou aao nai lo lou galue atoa ia mauaina i latou mo oe lava, e aunoa ma le mafaufau i mea manaomia e au uo. Ou te iloa o se aoaoga faavae lelei ma le taua lenei. …

… Ua manaomia ona tatou iloaina, o la tatou matafaioi o le a’oa’o ia maua le filemu ma le fiafia o i latou ua siomia ai i tatou, ma aua lava ne’i faatagaina oe lava e faatiga i lagona ma aiā tatau a ou tuaoi. Se’i tuu la se tagata e alu ma faatiga i sona uso, ma, se’i vaai po o le a le umi na te faia ai lena mea o le faaleagaina o lena lagona o le faatuatuaina sa i ai muamua i lo la’ua va? Ma, o le taimi lava e faaleagaina ai, o le a le umi o se taimi e toe tau aumaia ai lena lagona sa i ai muamua i lo la va? O le a umi se taimi e faaalu ai. O le mea lea, e ao ona taula’i atu ai la tatou vaai; ou te lagona o le mea lea e tatau ona fai; i mea uma tatou te mafaufau i ai, i a tatou gaoioiga uma ma o tatou manatunatuga loloto lilo, tatou te mananao e mafaufau i manaoga o i latou uma ua siomia ai i tatou; ma mafaufau faapea, e i ai a latou aiā tatau ma avanoa faapei o i tatou; e ao ona tatou talitonu atoatoa i ai i lenei mataupu.

O lenei la, se’i e mafaufau i se tagata o lē e vaai atu pea lava mo le manuia o tagata ua siomia ai o ia, ma ia tuu ia te ia e faamanuia soo se mea ma mea uma a lona uso, ma, i lenei auala, o le a ia faavaeina ai le fiafia ia te ia lava ma i latou ua siomia ai o ia. Se’i vaai la i se tagata e ese le auala na te ui ai, ma, nai lo le faamanuia ma galue mo le manuia o isi, o le a saili masei ma toso i lalo tagata, faamata o le a ia maua le tulaga lelei e tasi? E mautinoa lava e leai..

… Afai tatou te lagonaina faapea o lo tatou tiute o le galue mo lo tatou lava lelei sili atu, nai lo le mea ua tatou faia e maua ai le faatuatuaina, o le a tatou o atu, pe afai ua ia i tatou le malosiaga e maua ai faamanuiaga faaletino ma mea lelei e faamautu ai faauooga ma i latou ua siomia ai i tatou. I lenei auala, ma e leai se isi auala, e mafai ai ona fusia faatasi i tatou ma faailoa atu le i ai ia i tatou o se lagona o le agalelei ma le faale-uso.—E ao ona tatou faaalia lenei lagona e ala i a tatou galuega … nai lo le faatalofa atu i se tasi ma faapea, Ia faamanuia le Atua ia te oe la’u uo lelei, ma, i le aso e sosoo ai, ua [e] lē popole i le mea sa tatou fai atu ai muamua, ae, faatigā i ona lagona lelei.⁶

Pe a lē naunau se alii e ositaulaga mo le manuia o lona uso a tagata, ma, pe a ia iloaina faapea ua ia faatigā i lagona o lona uso, … o lena alii ua lē tonu i luma o le Alii, ma, o fea le alofa o lena tagata mo lona uso?

Pe a lē naunau se alii e mafatia mo lona uso, e faapefea i lona malosiaga, ona faailoa o i ai ia te ia se alofa mo lona uso? Ou te ta’u atu ia te outou, o lo tatou faavalevalea ma le vaivai, lea o le a tatou lē onosaia ai o tatou uso, ae afai latou te solia a tatou aia tatau, e vave lava ona tatou tali atu, ma, a latou solia o tatou tamatamaivae, e vave lava foi ona tatou tutū i o latou tamatamaivae. … Pe a ou vaaia se uso ua faatigā i ai se tasi, ma ua ia liliu atu ma faatigā foi i le na faatigā mai, ona ou faapea lea, o le a le mamao o lena uso mai le ala o lona tiute, ma, ou te fai atu ia te ia, e tatau ona e a’oa’o e pulea oe lava, pe, o le a lē mafai lava ona faaolaina oe i le malo o le Atua.⁷

O le a ou faitauina ni nai palakalafa mai le tusi o Mataupu Faavae ma Feagaiga:

“O o’u soo, i aso anamua, sa latou saili ni mea e faasaga i le tasi ma lē faamagalo i le isi i o latou loto; ma o lenei mea leaga na faapuapuagatia ma aoai mamafa tele ai i latou.

“O le mea lea, Ou te fai atu ai ia te outou, e tatau ona outou faamagalo i le tasi; ona o ia o lē e le faamagalo atu i lona uso i ana agasala, e tu ta’usalaina o ia i luma o le Alii; aua e tumau ia te ia le agasala tele atu.” [MF&F 64:8–9.] …

E pei ona sa ou faitauina nei, e i ai le mea e tasi sa le’i ausiaina e le au soo o le Faaola—sa le’i faamanuiaina i latou i le faavaeina o lena tuufaatasiga o le agaga ma le lagona lea sa tatau ona latou mauaina, ma sa aoa’iina ai e le Alii i latou mo lena tulaga. E finagalo le Alii ina ia faamagalo e le tasi tagata le isi, e o’o lava i le faafitugafulu ni fitu. Ma, e tusa lava pe lē fesiligia e le isi tagata le faamagaloga, e ao ona tatou faamagalo atu. … O lē e le faamagalo i lona uso, ua ta’uina mai ia i tatou, o le a tumau ia te ia le agasala sili atu—o le uiga o lena mea, o ia o le tagata sili atu ona agasala, nai lo le tagata na faatigā ia te ia. E finagalo le Alii mo i tatou e alolofa i o tatou tuaoi, e pei ona tatou alolofa ia i tatou lava—o se mataupu faigata tele i le tele o taimi; ae, e tatau ona tatou ausia lena vaega o le atoatoa, ma o le a tatou ausiaina.⁸ [Tagai fautuaga 4 i le itulau 220.]

A o tatou auaufaatasi i le talalelei, o le a faatupulaia lo tatou malamalama ma le poto, ma saunia e mau i le afioaga o le Atua.

E tatau ona fusia faatasi i tatou ma galulue faapei o Tavita ma Ionatana ua tasi le loto [tagai 1 Samuelu 18:1], ma e sili atu ona tipi ese o tatou lima, nai lo le faatigā e le tasi o le isi. E maeu se nuu malosi o le a avea ai tatou, pe afai tatou te maua lea tulaga, ma e ao ina tatou mauaina, e tusa po o le a le itiiti o le lagona faaleuo ua tatou faatinoina i le taimi nei. E mafai ona ou faapea atu, o le a i ai le aso, o le a maua ai e i tatou le lotogatasi, pe afai tatou te vaaia le afioaga o le Atua. E ao ina tatou a’oa’o e alolofa i o tatou tuaoi, e pei ona tatou alolofa ia i tatou lava. E ao ina tatou o atu, e tusa pe o le a le mamao ese o tatou i ai i le taimi nei, peitai, pe o le a lava le tulaga, e ao ina tatou a’oa’oina nei aoaoga faavae ma faatumauina i latou i o tatou loto. O le mea lenei ua manino i la’u vaai, ma o le mafuaaga lena ua ou talanoa atu ai e uiga i nei mataupu i le auala ua ou faia ai, aua ua ou mana’o e totōina i latou i mafaufau o le Au Paia, ma ia latou lagonaina i o latou olaga i aso faisoo.⁹

O le siufofoga o le Silisili Ese ua valaau ia i tatou mai le totonugalemu o le lē mautonu, o Papelonia lea, ina ia fausiaina se tuufaatasiga ma se faale-usoga matagofie, lea e tatau ai ona tatou alolofa le tasi i le isi, e pei ona tatou alolofa ia i tatou lava. O le taimi lava tatou te o ese ai mai lenei faamoemoega, o le a alu ese le Agaga o le Atua mai ia i tatou, e tusa ma le mamao o lo tatou o ese. Peitai, afai tatou te tumau i na feagaiga na tatou osia ina ua tatou taliaina le Talalelei, e i ai se faateleina fesootai o le malamalama ma le poto, ma, e i ai se sauniuniga sili ona malosi mo le mea o le a o’o mai. Ma, talu ai o lo tatou faatuatua ma lo tatou taliaina o feagaiga na tatou osia, o le faavae ua faapea ona tatou tutū ai, o le a avea faapei o poutū o le talalelei—e lē maluelue.¹⁰ [Tagai fautuaga 5 i le itulau 220.]

Fautuaga mo Suesuega ma le Aoaoina Atu

Mafaufau i nei manatu a’o e su’esu’eina le mataupu, pe, a’o e sauni e a’oa’o atu. Mo nisi fesoasoaniga, tagai i itulau v–vii.

Toe iloilo le mea na tupu ia Lorenzo Snow e uiga i le Tupe Faaagaga mo Femalagaaiga (itulau 211–2). I le Ekalesia i aso nei, o a avanoa ua tatou maua e tuuina atu ai tupe po o oloa e fesoasoani ai i isi? O a auala e mafai ai e nei taumafaiga ona fesoasoani ia i tatou ina ia tasi?
Mafaufau loloto i a’oa’oga a Peresitene Snow e uiga i le mafuaaga e finagalo ai le Alii mo i tatou ina ia auaufaatasi (itulau 212–3). Aisea e te manatu ai o le a sili ona fia manana’o isi tagata e mauaina se molimau o le Alii ma Lana Ekalesia toefuataiina, pe a vaai ua tatou auaufaatasi? E faapefea ona suia o latou lagona, pe a vaai ua tatou fevaevaeai?
Iloilo le vaega lea e amata i le faaiuga o le itulau 213–4. E faapefea ona faaaogaina lenei fautuaga i o tatou aiga? Mafaufau i mea e mafai ona e faia e uunaia ai le lotogatasi sili atu i a outou sootaga faaleaiga.
E faapefea ona tatou mauaina le lotogatasi i totonu o la tatou Aualofa ma korama o le perisitua, e tusa lava pe ia i tatou manaoga ma manatu eseese? (Mo ni faataitaiga, tagai i itulau 215–8.) O a auala ua faamanuiaina ai oe mai le lotogatasi i lou aiga? i le Ekalesia? i le nuu?
Aisea e te manatu ai o le alofa o le tasi mo le isi, e mafai ona avea ai tatou “ma se nuu malosi”? E faapefea e le alofa mo isi ona aafia ai le auala tatou te ola ai? A o e mafaufau loloto, pe talanoa i nei fesili, iloilo palakalafa mulimuli e lua i totonu o le mataupu (itulau 218–9).

Mau Talafeagai: Salamo 133; Ioane 13:34–35; Roma 12:5; Mosaea 18:21; 4 Nifae 1:15–17; MF&F 51:9; Mose 7:18

Fesoasoaniga mo le Aoao Atu: “O le mana faapaleina, faatalitonuina, faaliliuina, o le a’oa’oina o le talalelei ua faaalia pe a faapea mai se faiaoga musuia, ‘Ou te iloa e ala i le mana o le Agaga Paia, e ala i faaaliga a le Agaga Paia i lo’u agaga, faapea o mataupu autu sa ou a’oa’o atu ua moni’” (Bruce R. McConkie, sii mai le O Le Aoao Atu, E Leai se Isi Valaauga e Sili Ai, 43).

A o le’i tuua Navu e le Au Paia, sa osi feagaiga taitai perisitua e fesoasoani i le Au Paia uma, o e mananao e auai faatasi i le malaga.

“Pe le tatau ea ona i ai le auaufaatasi i le aiga? … E mautinoa lava e tatau ai.”