Mataupu 15

Faatuatua, Tautua Malosi i le Malo o le Atua

“O le iloaina o le moni o la tatou tapuaiga, e ao ai ona avea i tatou ma tagata i le lalolagi atoa, e sili ona tuuto atu i le galuega ua tatou taliaina.”

Mai le Soifuaga o Lorenzo Snow

I le aga’i atu i le faai’uga o le 1851, na lomia ai e le Au Peresitene Sili se tusi, lea sa latou talosagaina ai sui uma o le Korama a Aposetolo e Toasefululua ina ia “faamae’aina mataupu o a latou misiona eseese” ma toe foi atu i le Aai o Sate Leki ia Aperila 1853.¹ O lea, na amata ai ona faai’ui’u le misiona a Elder Lorenzo Snow i Italia. Ia Fepuari 1852, sa ia tuuina atu ai le galuega o le talaiga iina, i lalo o le taitaiga a Uso John Daniel Malan, o se uso faatoa liliu mai, ae malaga faatasi ma Elder Jabez Woodard i le atumotu o Malata. Mai Malata, sa faamoemoe Elder Snow e malaga ai i se vaa i Initia. O ulua’i faifeautalai faamisiona i lena atunuu, sa galulue i lalo o lana vaavaaiga, ma sa ia te ia se manao sili e faatasi ma i latou. Mai iina, sa ia fuafua “ia soo le lalolagi,” i le toe taliu atu lea i lona atunuu, e ala i le ui atu i le Vasa Pasefika i le itu i sisifo o le Iunaite Setete.²

Sa suia fuafuaga a Elder Snow, ina ua la taunuu ma Elder Woodard i Malata. Sa ia iloaina o le a i ai sina faatuai o lana malaga, i le motu mo nai vaiaso, ona o se vaa la’u oloa sa faaletonu i le Sami Ulaula. Nai lo le faitioina o le faatuai o le malaga, sa tonu ia te ia e alu ma galue. I se tusi na tusia i le aso 10 o Mati, 1852, sa ia tusia ai faapea, “Ua ou lagonaina o le a tele ni mea lelei e mafai ona tupu mai i le auala atonu e taitaiina ai e le Alii le faaaogaina o le taimi ua ou mauaina i le taimi nei, a o siosiomia a’u e se nuu matagofie, faatasi ma se galuega sili ona taua, lea o le a mafai ona faataunuuina ai se galuega sili, o le faaopoopo atu lea i malo lata mai.” Sa ia lipotia, na ia talosagaina Elder Thomas Obray, o se faifeautalai faamisiona i Italia, “ia sau vave, ma aumai ia lava se sapalai o tamaitusi ma tusitusiga paia.” E ui e le’i silafiaina e Elder Snow le mea o le a faia e ia ma ana soa i Malata, sa ia faaalia se mana’o e faatū se paranesi a le Ekalesia iina. O lenei gaoioiga, sa ia saunoa ai, “o le a matagataga ai noataga faaleagaga o le tele o malō, faapei o tagata Malata i a latou sootaga o fefaatauaiga, ona sosolo atu ai lea i talafatai o Europa, Asia, ma Aferika.”³

I le aso 1 o Me, 1852, sa auina atu ai e Elder Snow se tusi e lipotia ai le alualu i luma o le galuega i Malata. Sa ia tusia: “Ua amata nei ona faalausoso’o ona valaau mai tagata e fesiligia lenei ‘lotu uiga ese;” mo nai afiafi talu ona amata, sa matou faatasi i se tasi taimi, i o matou fale, ma ni alii mai malo eseese e valu, i le o mai ai mai vaega eseese o le aai ina ia faia ni talanoaga e faatatau i a matou aoaoga faavae: faatasi ai i lena aofaiga, o nisi mai Polani ma Eleni, o ē o loo ua faitauina nei a matou galuega ma le fiafia uiga ese. E toalua ni alii talavou atamamai ma sogasogā, o ulua’i fua ia o la matou a’oa’oga i lenei motu, o le a fesoasoani malosi i le faaaluina i luma o le galuega lea ua tatou auai; o se tasi o nei alii ua matou faau’uina o se toeaina, o le ē tautala ma le poto tele i ni gagana eseese.”⁴

Sa le’i faataunuuina le miti a Elder Snow o le auauna ai i Initia ma ia so’o lana taamilosaga i le lalolagi. Nai lo lena, sa ia mulimuli ma le filigā i le finagalo o le Alii, i le taimi o lana asiasiga e le’i fuafuaina i Malata, i le fausiaina o se faavae mo le talaiga iina. Ina ua o’o i le taimi e malaga ese ai le vaa ia Me 1852, sa ia malaga agai i sisifo ae le o sasa’e, i le mulimuli ai i faatonuga a ona ta’ita’i ina ia fo’i atu i le Aai o Sate Leki. Pe tusa ma le lua masina mulimuli ane, sa faatulagaina ai e Elders Woodard ma Obray se paranesi a le Ekalesia i Malata.⁵ [Tagai fautuaga 1 i le itulau 207–8.]

Aoaoga a Lorenzo Snow

Talu ai ua tatou mauaina le atoatoaga o le talalelei, ua avea i tatou o ni amepasa a Keriso.

Tatou te molimau atu i le lalolagi atoa ua tatou iloaina, e ala i faaaliga mamana, e o’o lava i asiasiga a le Agaga Paia, o Iesu o le Keriso, le Alo o le Atua soifua, ma, sa ia faaalia o ia lava ia Iosefa Samita faapei ona sa ia faaali i ana aposetolo anamua, ina ua mavae lona toetu mai le tuugamau, ma sa ia faailoa atu ia te ia upu moni faalelagi, lea e mafai ai ona faaolaina le tagata. O lenei … i le tauaveina ai o se tofiga sili ona taua ma manaomia, ma le iloaina, e pei ona tatou iloa, o le a fesiligia i tatou e le Atua mo le faatinoga ua tatou faia, e tusa o lenei tofiga paia ua ia tofia i ai i tatou.

E faapei ona sa o atu le au aposetolo i le lalolagi, ina ua mae’a ona maua lo latou tofiga mai le Faaola toetu, e tala’i atu le talalelei o le malō i atunuu uma, i le folafola atu ai ia i latou uma o e talitonu i la latou upu, le meaalofa o le Agaga Paia e ala i le faaeega o lima, e faapena foi ona tatou o atu. E pei ona sa latou tautino atu ma le mautinoa, e ala i lo latou tofiga, e ui i sauaga ma faitioga, le talalelei e avea ma mana o le Atua mo le faaolataga o i latou uma o e talitonu ma usiusitai, e faapena foi ona tatou tautino atu. E pei ona sa latou tala’i atu le faatuatua i le Alii o Iesu Keriso, papatisoga mo le faamagaloina o agasala, ma le faaeega o lima, e i latou ua faatagaina ma le tatau ai, mo le mauaina o le Agaga Paia, o se vaega taua mo le faaolataga, e faapena foi ona tatou tala’i atu. E pei ona sa avea i latou ma molimau a le Alii o Iesu Keriso, e ala i le mana o le Agaga Paia, ma auauna faamaoni o le savali o lana talalelei i le lalolagi atoa o Nuu Ese, e faapena, e ala i le Agaga Paia lava lea e tasi, ua avea ai i tatou ma molimau mo ia, ma, i le valaauina ai, e ala i le valaauga paia ma mamana lava e tasi, ua faapena ai foi ona tatou tauaveina lea lava tulaga e tasi.

O lea, i le mauaina ai o lenei tofiga, tatou te tauaveina ai tiutetauave uma o sui o Keriso, tatou te agavaa ai e tali atu mo a tatou gaoioiga taitasi, ma le auala na tatou faaaogaina ai taleni ma agavaa ua tuuina mai e le Alii ia i tatou.⁶ [Tagai fautuaga 2 i le itulau 208.]

O le avea ai ma tagata o le Ekalesia, o se valaaulia lea e fesoasoani i isi e maua le faaolataga.

Pe a valaauina e le Alii se tagata, po o se vaega o tagata mai le lalolagi, e lē masani lava ona faia ma se faamoemoega ina ia aogā mo lena tagata, po o se vaega o tagata. E le’i silasila lava le Alii na o le faaolataga o ni nai tagata toaitiiti ua ta’ua o le Au Paia o Aso e Gata Ai … , ae o le faaolataga o tagata uma, o ē o loo ola faapea i latou ua maliliu. Ina ua valaauina e le Alii Aperaamo, sa ia faia ni folafolaga patino e faatatau i le mamalu o le a o’o mai ia te ia ma ana fanau, ma i nei folafolaga, tatou te maua ai lenei faaupuga matagofie: e ala mai ia te ia ma lana fanau, o malo uma o le lalolagi o le a faamanuiaina ai [tagai Kenese 22:15–18; Aperaamo 2:9–11]. … O le fuafuaga a le Alii o le faamanuiaina, e le gata o ia [Aperaamo] ma lana fanau, a o aiga uma o le lalolagi. …

… Ina ua afio mai Iesu, sa Ia afio mai o se osigataulaga e lē mo na o le lelei o Isaraelu, po o le fanau a Aperaamo, Isaako, ma Iakopo, a o le lelei o le aiga uma o le tagata, ina ia ala mai ia te Ia, o le a faamanuiaina ai tagata uma, ina ia ala mai ia te Ia, o le a faaolaina uma ai tagata; ma, o Lana misiona o le saunia o le ala ina ia mafai ai e le aiga uma o le tagata ona maua faamanuiaga o le Talalelei e faavavau, e lē, e pei ona ou fai atu, mo na o Isaraelu, a o le aiga uma o le tagata soifua; ma e lē gata i e nonofo i luga o le fogaeleele, a o i latou fo’i i le lalolagi o agaga. …

… Ua ia i tatou le Perisitua lava e tasi lea sa ia Iesu, ma ua tatau ona tatou faia e pei ona sa Ia faia, ia ositaulagaina ō tatou lava manaoga ma lagona e pei ona sa Ia faia, atonu e lē faapea ia feoti faamaturo i tatou, e pei ona sa Ia faia, ae, e tatau ona tatou faia osigataulaga ina ia mafai ona faataunuuina faamoemoega o le Atua, a leai o le a lē agavaa i tatou mo lenei Perisitua paia, ma avea ma faaola o le lalolagi. E finagalo le Atua ina ia avea tatou ma faaola, e le gata mo le toatele lea ua i ai i le lalolagi, ae, o le a Ia faia i tatou ia agavaa e fesoasoani i le faaolataga o le toatele o fanau a le Silisili Ese.⁷ [Tagai fautuaga 3 i le itulau 208.]

O valaauga ma tiutetauave taitasi, e taua i le galuega a le Alii.

O lenei le fesili, o tatou lagona ea lo tatou tofiga, o tatou malamalama atoa i le natura o le galuega, ua tatou faasaga e faataunuu? Ua taitaiina a’u i nisi taimi, e talitonu o nisi o ō tatou uso, o toeaina i Isaraelu, ua matuā saunia ma naunau e faatino matafaioi ua latou maua, e ala i a latou feagaiga, o le faatuatua ua latou mauaina ua foliga e matua faavaivaia ai lava, ma ua foliga mai ua lava ia i latou le na ona avea ma tagata o le Ekalesia.

O loo i ai isi, o e manatu ona o ō latou suafa ua lē lauiloa tele, ona atonu … o loo latou faatumuina ni tofiga faatauvaa, o lea e lē afaina tele ai po o a mausa ua latou mauaina, pe, o a ituaiga faataitaiga latou te faia i luma o ō latou uso. Peitai, o le mea lea, afai latou te umia tofiga taua, e pei o le Peresitene o le Ekalesia, po o le Fesoasoani i le Peresitene, pe, afai latou te i ai i le Korama a le Toasefululua, pe ana faapea o i latou o Peresitene o le Aufono Maualuga, po o le Au Faitaulaga Sili, po o Fitugafulu, ona latou manatu lea ua taua le auala e taitaiina ai o latou tagata. I totonu o lenei faiga, ua latou faailoa ai se vaivaiga tele, po o le matuā faavalevalea, o la latou lamepa ua faasolosolo ina mate atu, pe, latou te lē lagonaina lava o le tofiga ua latou tauaveina i o latou luga, o tiutetauave o le talalelei.

Ua ta’uina mai ia i tatou i le faataoto a le Faaola faapea, o le malo o le lagi ua faatusaina i se matai o lē na tuuina atu ana oloa i ana auauna, ina ua sauni e alu malaga i se atunuu mamao. I le tasi sa tuu i ai taleni e lima, i le isi e lua, ma le isi e tasi. O lē na maua taleni e lima, sa alu ma faatau atu ma maua ai isi taleni e lima, ua faaluaina ai le vaega na tuuina atu ia te ia, ma, o le tasi na mauaina taleni e lua, na alu ma maua mai ai le isi lua. A o lē na i ai le tasi, na alu ma eli i le eleele, ma nanā le tupe a lona matai. Sa ia masalosalo ma manatu o lana tiutetauave ua faatauvaa tele, ua le mafai ai ona faia e ia o ni mea se tele, ma ua alagatatau ai lona lē faaaogaina o se taleni faatauvaa tele. [Tagai i le Mataio 25:14–30.] E faatatau tonu ea lenei mea i le tulaga o nisi o ō tatou toeaina? Na faapea mai se tasi, “Ua na o a’u o se kamuta, po o se su’i ofu, pe ua na o se la’u sima [se fesoasoani i se lei piliki], o le mea lea e lē mafai ai ona taua tele pe faapefea la’u amio, pe ou te faamaoni pe leai i le faatinoina o o’u tiute i si o’u tama’i lalolagi maualalo. Peitai, o le a matuā ese lava pe afai o loo o’u faatinoina se isi tofiga taua ma maualuga.”

Ia tu’u loa, lo’u uso e; aua ne’i faatagaina oe ina ia faasesēina e ia manatu taufaasesē. E moni atonu o oe ua na o se la’u simā, ae ia manatua o oe o se toeaina i Isaraelu, o oe o se sui o le Alii o Iesu Keriso, ma afai ua e i ai i le faatinoina o lou tiute, ua e mauaina le mea lena e lē mafai e le lalolagi ona tuuina atu pe aveesea; ma ua tulituliloaina oe e le Atua, i le faaaogaina tatau o le taleni lea na tuuina atu ia te oe, po o le a le tele po o le laitiiti.

Ma le isi, e te faatinoina sina vaega o aafiaga, ma, pe o le a le itiiti e aafia ai se tagata po o ni tagata, ma, mo ni taunuuga o le aafiaga na e faatinoina, e tulituliloa lava oe. O le mea lea, o oe, pe e te faailoaina pe leai, ua e tauaveina se igoa taua i luma o le Atua ma tagata, lea e lē mafai ona lē amanaiaina, lea e lē mafai ona faamaloloina mai ai oe, pe a e manao e faatumauina le igoa ua e maua.

Ma, o a faamoemoega o lena tagata? Ou te faapea atu, afai na te faamamaluina lona valaauga, ma ua maua o faamaoni i le tofiga ua ia maua, o ona faamoemoega mo le faaolataga ma le faaeaga i le malo o le Atua, e tutusa lava le lelei e pei o soo se isi tagata. Afai na te malamalama i lona tofiga ma ola e tusa ma ona faatulagaga, o ona faamoemoega ua tutusa lava le lelei ma se isi tagata na soifua mai i le taimi o le tama o Atamu e o’o mai i le taimi nei; ma, e tutusa lava le taua o lona faaaunuua ma le tatau o ia lava i le vaega o lona aafiaga lea ua ia savalia, e pei ona faia e soo se isi lava tagata, o lē ua valaaulia e galue i se tofiga maualuga atu; po o, i se isi faaupuga, o lē ua avea ma tausimea i se aofaiga sili atu o taleni. …

… E lē manaomia mai e le Alii se vaega tele naua mai se tagata o lē ua umia na o le tasi le taleni, e pei ona manaomia mai lē ua mauaina taleni e sili atu ma le tasi; ae, ia tusa ma le mea ua ia maua, ona tatau ai lea ona manaomia mai ia te ia. O le mea lea, ia uunaia tagata uma, ma saili e faaleleia atili taleni ua latou mauaina; ma ia fai atu ia te ia, o lē atonu ua i ai le taleni e tasi e faaaoga, ma ia aua le natiaina i le eleele; o lona uiga, ia fai atu ia te ia, o lē atonu ua faapaiaina faatasi ma sina agavaa e faaleleia atili ai ia lava, ma ia aua le faitio ona atonu e le i agalelei atu le tulaga o le natura ia te ia, e pei ona i ai lona uso e sili atu lona tulaga. Ia tatou fiafia i o tatou olaga, ma, pe a tusa ai ma ō tatou manaoga e pei ona tatou manana’o ai, e tatau ona tatou saili faatasi ma le filigā e faaleleia, ma ia lagonaina pea le agaga faafetai mo lō tatou i ai i le lalolagi, aemaise lava, o le Agaga o le Atua ua tatou mauaina e ala i le usiusitai i le Talalelei. …

Ou te manatua lo’u faitauina o se tala puupuu … o se tagata o lē, na ala i lona atamai ma le lotonuu, na ia mauaina ai le tulaga lauiloa silisili, ae, na ala i lona mana’ona’o, sa tofia i se tofiga sa faapea ua sili ona maualalo. I le amata ai ona faatino ona tiute, sa faapea ona ia faia ai lenei faamatalaga taua: “Afai e le faamamaluina e le tofiga a’u, o le a ou faamamaluina le tofiga.” E tele se faigata o le a mafai ona alofia, ma o lo tatou tulaga o le a sili atu ona faafiafialoto, pe afai o le a faamamaluina e i tatou uma le tofiga lea ua valaauina i tatou e faatino. Ua ta’uina mai ia i tatou na faia e le Alii lava ia ofu mo ō tatou ulua’i matua, pe, i se isi faaupuga, i lena tulaga, na galue ai o se su’i ofu; sa faapena foi ona avea Iesu Keriso o se kamuta. O lenei, e mautinoa lava sa avea le Faaola ma se kamuta mamalu ma faamaoni, semanu ua le mafai e Ia ona mauaina le tofiga lea na Ia faatumuina mulimuli ane. Ana mafai ona tatou faia ia vaai uso ma tuafafine i le taua o le faatinoina ma le faamaoni ma le faatuatua o ō latou valaauga taitasi, o le tele o tigā ma faafitauli lea ua feagai ma i tatou i le taimi nei, o le a taofia, ma o le a alualu pea i luma le galuega a le Atua faatasi ma le televave faaluaina, ma, o Ona faamoemoega uma o le a sili atu ona faalauteleina ma vave ona faataunuuina; ma le isi, i le avea ai ma nuu, o le a sili atu ona tatou saunia, nai lō lo tatou saunia i le taimi nei, mo le faatinoina o lona finagalo. …

Tau ina ia faamanuia le Atua ia te outou, o’u uso e ma tuafafine, ma faaagavaa outou ina ia outou galulue i taimi uma o ni tausimea atamamai i le tausiaina o na mea ua tuuina atu ia te outou.⁸ [Tagai fautuaga 4 i le itulau 208.]

Pe a tatou auauna i le Atua ma le faamaoni, malosi, ma le fiafia, Na te faamalosia i tatou ma fesoasoani ia i tatou ia faamanuiaina.

Ou te faapea atu, ia auauna atu tagata i le Atua ma le faamaoni ma le malosi, ma ia fiafia. … E i ai taimi, pe a o’o tagata i tulaga lea o le a faigata ai, pe o le lē mafai lava, ina ia maua se tulaga fiafia. Peitai, o ia ituaiga taimi e seāseā lava maua.⁹

O le iloaina o la tatou tapuaiga, e ao ona avea i tatou ma tagata, i luga o le fogaeleele, ia sili ona tuuto atu i le galuega ua tatou taliaina. O le iloa ai, e pei ona tatou faia, po o le tatau ona tatou iloa, faapea o le talalelei ua tatou taliaina, ona folafola mai mea uma e moomoo ma manaonao i ai o tatou loto, pe afai tatou te faatuatua, e ao ona tatou matuā faamaoni, tuuto atu, malosi ma faananau i le faataunuuina o fuafuaga ma le finagalo o le Alii, e pei ona Ia faaalia mai lea taimi i lea taimi e ala i Ana auauna. E tatau ona aua ne’i o tatou faavaivai pe faale-ano i le faataunuuina o ō tatou tiute, ae, faatasi ma lo tatou manatu atoa, malosi ma agaga, e tatau ona tatou taumafai ia malamalama i le agaga o ō tatou valaauga ma le natura o le galuega lea ua tatou punouai ai.

A o i ai Iesu i le lalolagi, sa Ia poloaiina Ona so’o ina ia o atu ma talai le talalelei e aunoa ma se tupe po o se ato, ma aua ne’i popole i se meaai po o se mea inu, po o mea e ofu ai; ae ia o atu ma molimau atu i na mea ua faaalia ia i latou. I le faia o lenei mea, na latou mauaina ai faamanuiaga a le Silisili Ese, ma, sa i ai le manuia i a latou galuega uma. Sa tatau ona faamanuiaina i latou; sa leai se mana e mafai ona taofia i latou mai le seleseleina o faamanuiaga silisili, aua sa latou o atu i luma i le malosi o le Silisili Ese e faatino Lona finagalo, ma o Lana galuega ia lagolagoina ma sapasapaia i latou ma ia tuuina atu ia i latou tulaga uma o le manuia. E ala i le usiusitai i poloaiga a le Alii, sa latou maua ai mo i latou lava faamanuiaga o le ola faatasi, ma le avanoa e tula’i mai ai i le taeao o le ulua’i toetu, ma sa ia i latou le faamautinoaga faapea, i a latou auaunaga, e leai se mana i le lalolagi e mafai ona faamanuiaina i le teenaina o i latou. O ituaiga nei o faamoemoega ou te fia mana’o e maua, pe ana faapea o o’u i ai i ō latou tulaga, po o se isi lava tulaga, aua i le mafaufau loloto atu i ai, o le manatu o le manuia a’ia’i i soo se taumafaiga, e matuā faafiafialoto lava.

O lenei, a na mafaufau aposetolo, nai lo le faia o le mea sa poloaiina ai i latou, faapea o le faia o se isi mea, atonu o le a mafai ai ona latou tali atu i le faamoemoega lava e tasi, atonu o le a lē faamanuiaina atoatoa i a latou gaoioiga, pe, o le a lē mauaina lena faamautinoaga o le manuia lea, i lalo o tofotofoga ma sauaga uma, lea o le a latou o’o i ai, sa taumateina i o latou mafaufau, o se pogai o le fiafia ma le faamalieina faifaipea.

… A na mafaufauina e aposetolo po o fitugafulu i aso o Iesu, faapea o le a latou faataunuuina misiona ua tuuina atu ia i latou, e ala i le fausiaina o se vaa, e pei ona sa faia e Noa, po o le fausiaina o fale teuoloa ma le teuina o le saito, e pei ona sa faia e Iosefa, atonu o le a matuā faasesēina ai lava i latou.

I le i ai o Iosefa i le laueleele o Aikupito, sa valaauina e faatino se ituaiga o tiute patino, lea na manaomia mai ia te ia. Sa le i valaauina o ia e tala’i le talalelei e aunoa ma se tupe po o se ato; ae ia fausia fale teu saito, ma faaaogaina uma lana uunaiga mo le tupu, tagata maualuluga ma tagata o Aikupito e faaputu la latou saito aua le oge. … O lenei, a na faapea e alu Iosefa ma fau se vaa, atonu o le a lē taliaina o ia e le Alii, ia, pe o le a lē mafai ona ia laveaiina le nuu o Aikupito, faapea le aiga o lona tama. Ina ua poloaiina Noa e fau se vaa, a na faapea sa alu atu o ia ma faatutū ni fale teu saito, atonu o le a lē faasaoina o ia ma lona aiga. E faapena foi la mo i tatou, pe a manaomia tatou e faatino ni tiute, … po o le a lava le mea o le a manaomia tatou e faataunuu, i totonu o tuaoi o le malo o le Silisili Ese, e ao ina tatou savavali i le agaga o nei tuutuuga ma faatinoina, pe afai ua tatou mauaina le mana ma le uunaiga mai lo tatou Atua.¹⁰ [Tagai fautuaga 5 i le itulau 208.]

O le galuega a le Alii e faigata i nisi taimi, ae, e aumai ai le olioli sili.

Tatou te fetaia’i ma le tele o mea, e o mai faatasi ma lenei auaunaga, lea e lē lelei, ae, e i ai se fiafiaga sili e fesootai ma lena mea. Pe a tatou toe tepa i tua, i o tatou naunautaiga e tuuto atu i tatou lava i le galuega o le upu moni ma tausia a tatou feagaiga, tatou te maua le olioli sili, aua o le taua o ō tatou valaauga, ua matua taua lava ia i tatou, a aunoa ma lena agaga, e lē mafai ona tatou ō faatasi ma le malo o le Atua.¹¹

E tatau ona faafouina a tatou feagaiga i luma o le Atua ma agelu paia, faapea o le a tatou, faatasi ma le Atua e avea ma o tatou fesoasoani, auauna ia te ia ma le faatuatua sili atu, i le tausaga o lumanai, faapea o ō tatou olaga i le vaai mai o tagata faapea i le faalilolilo, o a tatou gaoioiga ma le agaga ma aafiaga tatou te tuuina atu, atonu o le a o gatasi ma le mau tauloto, “O le Malo o le Atua, po o le leai o se mea.” Ou te talitonu … o le a tuuto atu i tatou uma i le galuega a lo tatou Atua, i le faatuina o Lana Siona i le lalolagi, i le auauna malosi ai mo faamoemoega o le upu moni ma le amiotonu i luga o le fogaeleele, seia o’o ina avea ma fiafiaga mo i tatou i le auai ai faapena, ina ia avea ai o se vaega o i tatou e auauna i le Atua ma tausia ana poloaiga, ma tausia le tulafono faaselesitila, ma ia tatou fiafia ai i le Agaga Paia i totonu o ō tatou loto, ina ia mafai ona tatou faatoilaloina le lalolagi ma faatuina le tulafono faaselesitila i o tatou mafaufau, ma faailoaina i a tatou mea e fai; ina ia mafai ona tatou matuā malamalama ai ia i tatou lava ma o tatou avanoa, ina ia mafai ai e i tatou i lenei olaga, ona maua se vaega tele o faamanuiaga, lea e faatatau i le tulafono faaselesitila, ma lea e tatau ona olioli ai i le mamalu faaselesitila.¹² [Tagai fautuaga 6 i le itulau 208.]

Fautuaga mo Suesuega ma le Aoaoina Atu

Mafaufau i manatu nei, a o e su’esu’eina le mataupu, pe, a o e sauni e a’oa’o atu. Mo nisi fesoasoaniga, tagai i itulau v–vii.

Toe iloilo le tala o loo i itulau 97–9. O a ni upu atonu e te faaaogaina e faamatala ai le uiga o Lorenzo Snow, e faatatau i le auauna ai i le Alii? Manatunatu i mea e mafai ona e faia e mulimuli ai i lana faataitaiga.
Mafaufau i le vaega o loo amata i le itulau 199–200. Aisea e te manatu ai o le auai i le Ekalesia, e aumaia ai ni tiutetauave sili? O le a le uiga ia te oe, o le avea ma sui o Keriso?
Sa a’oa’o mai Peresitene Snow faapea o o tatou valaauga i le Ekalesia o ni avanoa e “fesoasoani ai i le faaolataga” o fanau a le Atua (itulau 200–01). E faapefea ona aafia le auala tatou te auauna ai i le Ekalesia, ona o lenei malamalamaaga?
Sa saunoa mai Peresitene Snow e tatau ona tatou auauna ma le filigā, e tusa lava pe o le a le faatauvaa atonu e foliga mai ai lo tatou tiutetauave (itulau 201–05). O anafea na e vaaia ai se tasi o faamamaluina se valaauga po o se tofiga, na foliga mai e faatauvaa?
Faitau le vaega o loo amata i le itulau 205. O a auala e mafai ai e le faatuatua, malosi, ma le fiafia ona uunaia la tatou tautua?
Faitau le vaega faai’u i totonu o le mataupu (itulau 207). O anafea na e lagonaina ai le olioli, i le auauna ai i le malo o le Alii? E faapefea ona tatou maua le fiafia i la tatou tautua, e tusa lava pe o le a le faalemanuia o a tatou matafaioi? O a mea e mafai ona tatou faia e fesoasoani ai i fanau ma le autalavou ina ia auauna ma le faamaoni i le Alii?

Mau Talafeagai: Salamo 100:2; 1 Korinito 12:12–31; Iakopo 1:6–7; 2:3; Mosaea 4:26–27; MF&F 64:33–34; 72:3; 76:5–6; 107:99–100; 121:34–36

Fesoasoaniga mo le Aoao Atu: “Faalogo ma le toto’a i faamatalaga a tamaiti a’oga. O lau faataitaiga o le a uunaia ai i latou e faalogo ma le faaeteete le tasi i le isi. Afai e te lē malamalama i se faamatalaga a se tasi, ia fesili. Atonu e te faapea atu, ‘Ou te le o mautinoa pe ua ou malamalama. E mafai ona e toe faamalamalamaina lena mea?’ Po o le ‘E mafai ona e tuuina mai se faataitaiga o le uiga o lau tala?’” (O Le A’oa’o Atu, E leai se Isi Valaauga e Sili Ai, 64).

Elder Lorenzo Snow

“Afai ua e i ai i le faatinoga o lou tiute, ua e mauaina le mea lena e le mafai e le lalolagi ona tuuina atu pe aveesea.”