Mataupu 19

Galuega Faafaifeautalai: “Ina Ia Pai Atu I Agaga o Tagata Uma”

“E i ai se auala e mafai ai ona pai atu i agaga o tagata taitasi, ma o lau matafaioi o le sailia o le auala mo agaga o tagata o e ua valaauina i ai oe.”

Mai le Soifuaga o Lorenzo Snow

Sa papatisoina Lorenzo Snow i Katelani, Ohio, lea sa ia aoaoina ai le gagana Eperu i se vasega faatasi ma le Perofeta o Iosefa Samita ma isi taitai o le Ekalesia. Sa faamoemoe o ia e faaauauina se “aoaoga masani”, i se kolisi i le itu i sasae o le Iunaite Setete.¹ Peitai, a o ia galue agai i lenei sini, sa amata ona ia lagonaina se malosiaga e toso o ia i se isi faamoemoega. Sa ia toe manatua ai mulimuli ane:

“Sa ou taliaina [upu moni o le talalelei] faatasi ma se agaga fiafia, ma sa ou naunau ia le gata ai iina. … Sa amata ona ou popole laitiiti i lo’u mafaufau pe faamata, i le maea ai ona maua o lenei malamalama matagofie, ua tatau mo a’u le nofonofo e aunoa ma le molimau atu e uiga i lenei mea. O alii talavou, o e sa auina atu i misiona sa toe foi mai ma molimau e uiga i faamanuiaga na latou mauaina … , ma sa amata ona ou mafaufau faapea, nai lo le saunia o a’u mo se kolisi po o se iunivesite i sasae, ua tatau ona ou alu ma molimau atu e uiga i le mea ua tuuina mai e le Alii mo a’u se malamalama e uiga i ai. I le taimi lava foi lea, sa ou le manao e tuua o’u faamoemoega mo se aoaoga, ona sa faapea ona i ai i lo’u mafaufau mo se taimi umi lava, ma sa i ai ia te au le avanoa ma tupe e faataunuuina ai.”

I le tauiviga ma ona lagona, sa ia fesili ai i se uo faatuatuaina mo se fautuaga: “Sa ou ta’uina atu ia te ia le mea sa ou manao i ai, ma sa ia faapea mai, ‘Le uso e Snow, o le a ou le tuuina atu i se isi lava tagata le fautuaga lea ua ou lagona e tuu atu ia te oe, e tusa ai ma nei tulaga. A na faapea o loo o’u i ai i lou tulaga, o le a ou faia le mea e tusa ma o’u faamoemoega ma ou alu ou te a’oga.’ O le mea tonu lava lena sa ou manao ia te ia e fai mai ai, ma sa faafiafiaina ai a’u. Sa faamalieina a’u mo se taimi; peitai, i le taimi o le taumalulu, i le faalogo atu i nei alii talai talavou o molimau e uiga i lo latou faamanuiaina i le talaiga o le Talalelei, sa amata ona faaauau pea ona ou mafaufau i ai. Ua tuuina mai e le Alii ia te au se malamalama faapea o le a Ia afio mai i le lalolagi, ma e i ai se sauniuniga e tatau ona faia: Ua Ia tuuina mai ia te au mea uma na ou ole atu ai, ma sili atu; mo le papatisoga lea na ou mauaina ai le Agaga Paia ma o le malamalama atoatoa lea na tuuina mai ia te au, na sili atu ona moni ma faafiafia loto nai lo lo’u papatisoga; ma sa ou lagonaina faapea o loo i ai se tiutetauave ua tuuina mai i o’u luga. O le mea lea, sa ou tapunia ai a’u tusi [ma] faataatia ese la’u faa-Latina ma le faa-Eleni.”²

Ina ua mae’a ona faia o lenei faaiuga, sa auauna atu loa Lorenzo Snow i se misiona i le setete o Ohio i le 1837. Sa ia faia foi nisi misiona mulimuli ane—muamua i setete o Misuri, Ilinoi, Kentucky, ma Ohio, ona sosoo ai lea ma Egelani, Italia, Atumotu o Hawaii, matu sisifo o le Iunaite Setete, ma le setete o Wyoming. A o i ai o ia i Egelani, sa ia tusia se tusi i le uso o lona tina, e faamatala ai le mafuaaga na ia naunau ai e tuua lona aiga ae auauna atu o se faifeautalai: “O le manatu ai faapea ua ou i ai i le va o le fa ma le lima afe maila mai le aiga o lo’u tamaitiiti ma fegalegaleaiga matagofie uma o le taimi o le tamaitiiti, ua tupu mai ai, e aunoa ma le mafaufau moni i ai, le fesili, Aisea ua ou i ai iinei? Ua ou i ai iinei, ona ua fetalai mai le Atua, ma faatuina se Perofeta, lea ua Ia toefuataiina mai ai le atoatoaga o le Talalelei e faavavau, faatasi ma meaalofa uma, mana, sauniga, ma faamanuiaga; faatasi ma se folafolaga mo tagata uma, Salamo, aua ua latalata mai le malo o le Atua. I le taitaiga mamana a le Atua, ua valaauina ai au o se sui, e aveina atu lenei savali i malo o le lalolagi, lea ua ou iloaina ua tuuina mai ia te au se tiutetauave sili lea e le mafai ona ou faataunuuina e aunoa ma le fesoasoani a le Silisili Ese.”³

Sa faafetaia i taimi uma e Peresitene Snow le faaiuga na ia faia, e auauna i le Alii o se faifeautalai. Ia Setema 1901, i le 87 tausaga o le matua, sa ia saunoa: “Ua ou olioli e o’o mai lava i le taimi nei i le mafaufau ai i aso o a’u auaunaga faafaifeautalai. O lagona na maua e ala i nei mea na tutupu uiga ese, ua avea ma vaega taua o lo’u nei tagata.”⁴ [Tagai fautuaga 1 i le itulau 252.]

Aoaoga a Lorenzo Snow

I le mauaina ai o le atoatoaga o le talalelei, tatou te mananao ai e fesoasoani i isi e olioli i ia faamanuiaga e tasi.

Pe a maua e se tagata le malamalama, o le a uunaia o ia e faasoa atu i isi; pe a o’o ina fiafia se tagata, o le agaga ua siomia ai ia, o le a aoao ai o ia e tauivi ina ia fiafia isi. … E i ai ea se avanoa e maua ai e se tasi le fiafia, e aunoa ma le i ai o se malamalama o le talalelei a Keriso? … E ui lava i le lalolagi, e taumafai [tagata] e faafiafia ia i latou lava, peitai, e le faamanuiaina lava i latou i le mea o loo latou tauivi e ausia. E le mafai ona latou fiafia, sei vagana le aoaoga faavae e tasi, ma o lena mea o le uumauina o le atoatoaga o le talalelei, lea e aoaoina i tatou ina ia le faatali se’i tatou o’o i le faavavau, ona faatoa amata lea ona tatou taumafai e faafiafiaina i tatou, ae aoaoina i tatou ina ia tauivi iinei e faafiafiaina i tatou lava ma i latou ua siomia i tatou, i faamanuiaga a le Silisili Ese.

O le mea la lenei, e tatau ona avea ma o tatou faamoemoega ma sini autu: ina ia aoao e faia i tatou ia ta’uaogaina; ina ia avea ma faaola i o tatou uso a tagata; ina ia aoao i auala e faaolaina ai i latou; ia faailoa atu ia i latou se malamalama o nei aoaoga faavae lea e manaomia e siitia ai i latou i luga i le tulaga tutusa o le malamalama lea ua tatou mauaina.⁵

O atu ma faauo ma tagata taitoatasi ua siosiomia ai outou; pe, filifili se toatasi ma taumafai e amata uunaia ona lagona, lona faatuatua, o ona tulaga o i ai ma lona mafaufau, ma taumafai e faamalamalamaina i latou, ma a faapea o i latou o tagata ua agasala, galue e laveai i latou mai a latou agasala, ma aumaia i latou mai le nofopologa lea ua latou i ai, ina ia auai i le malamalama ma le saolotoga lea ua e mauaina, aua o le faia o lenei mea, e mafai ai ona e faia galuega lelei e ala i le faamatalaga ua tuuina atu e le Alii ia te oe.⁶ [Tagai fautuaga 2 i le itulau 252.]

E naunau faifeautalai e faia osigataulaga, ina ia fesoasoani ai i isi ia maua se malamalama o le upu moni.

E le i umi ona tau solo lelei le nonofo ai o le Au Paia i nei vanu [i Iuta] ae toe faasaga atu mafaufau o auauna a le Alii i le galuega tele faafaifeautalai, lea ua tuuina mai i luga o le Ekalesia.

Sa matou i ai i le totonugalemu o le mativa ma le pologa e tau faato’a le laueleele, peitai, sa le mafai ona matou faagaloina le matafaioi na tuuina mai ia i matou e faaoo atu le Talalelei i nuu mamao; aua na tuuina mai e le Alii le poloaiga e ao ona talai atu i le lalolagi uma. O se tasi lenei o faamaoniga o le paia o lenei galuega, lea e ui i le tulieseina ma sauaga, sa saili ma le faatuatua le Au Paia o Aso e Gata Ai e faatino lenei poloaiga a le Alii.

I le konafesi aoao a le Ekalesia na faia ia Oketopa, 1849—na o le lua tausaga talu ona ulufale atu paionia i le vanu [o Sate Leki]—ae valaauina se vaega o toeaina e tatalaina misiona i vaega eseese o le lalolagi. O le toafa mai Aposetolo e Toasefululua, sa tofia e taitaia. O Aposetolo Erastus Snow sa valaauina e alu atu i Scandinavia, o Aposetolo Ioane Teila sa alu atu i Farani, o a’u i Italia, ma Aposetolo Franklin D. Richards i Egelani, lea sa i ai se misiona ua uma ona faatuina ai. I le tulaga mativa sa matou i ai, faatasi ma o matou aiga ua toe ina a leai ni mea e ola ai, o se galuega faigata tele lenei mo i matou; ae ua valaau mai le Alii, ma sa matou lagona e tali atu, e tusa pe o le a le osigataulaga e aofia ai.⁷

Tatou te faapaiaina o tatou olaga, lea ua sili ona pele ia i tatou, ina ia mafai e le lalolagi ona malamalama o loo i ai se Atua i lalolagi e faavavau; ina ia mafai ona latou malamalama e i ai se mea e finagalo le Atua ia faia i le taimi nei e tusa ma mataupu o le fanauga a tagata. Ua agaigai atu le lalolagi i lagona ma manatu o le masalosalo. E oo lava i ni vaega Kerisiano o le aiga o tagata, e faitau fiasefulu afe i latou, e ui e le o naunau e faailoa mai ona o lo latou le taualoa, ua le talitonu e i ai se matafaioi a le Atua i le fanauga a tagata. E ao ona tatou tutu atu ma faia osigataulaga ina ia oo mai ai lena talitonuga ma malamalama i le fanauga a tagata.⁸

Pe a tatou valaauina a tatou faifeautalai talavou e o atu i malo o le lalolagi, latou te mafaufau loloto i ai i le mataupu, ma, i le maea ai ona faalogo i mea na tutupu ia i latou sa o atu i le lalolagi o ni faifeautalai, e le o se tasi o mea sili ona matagofie mo se tasi e tulimatai, le feagai ma tofotofoga ma faigata, lea o le a mafai ona latou vaaia o le a latou fetaia’i. Ae o le uiga lelei e maua i lo latou naunau e amata ma usitaia mea e manaomia.⁹

E i ai mea e faatatau i se misiona e le taliaina atoatoa e o tatou alii talai talavou. Latou te iloaina o le a ositaulagaina fiafiaga o le aiga, ma ua latou malamalama o le a latou o atu i tagata, o e o le a le lagonaina le agaga faafetai i taimi uma, i mea o le a latou tautatala atu ai ia i latou; peitai, i se isi itu, latou te lagona ua ia i latou fatu o le olaga i o latou lima, ma afai e mafai ona latou sailia se alii po o se tamaitai faamaoni, o le a galue le Agaga o le Alii i o latou loto, ma o le a latou maua ai lenei savali mamalu lea ua ia i latou e tuuina atu. O le faia o lenei mea e maua ai e i latou le fiafia ma le faamalieina. O le tasi mea, latou te vaaia i lenei mea se avanoa mo i latou e maua ai lena mea ua sili lona taua ia i latou i o latou tiute i le lumanai. O se mea uiga ese, faapea i le faitau afe o tusi sa ou mauaina mai ia i latou, o e sa valaauina e o atu i ni misiona—e tele lava o alii talavou—ou te le manatuaina, vagana le tasi le tulaga lea sa faaalia ai le le taliaina. Aisea ua tupu ai lenei mea? Ona o le agaga o le alofa ma le tino ola pea, o le Agaga o le Silisili Ese, ua i ai i luga o nei alii talai talavou, ma sa latou mauaina asiasiga lea sa musuia ai i latou ina ia faia le mea lena e le mafai e se isi lava agaga ona uunaia latou e faia.¹⁰ [Tagai fautuaga 3 i le itulau 252–53.]

E le tatau lava ona galo i faifeautalai o i latou o sui o le lagi, o e tauaveina le tala e lelei.

Tatou te auina atu o tatou Toeaina e talai le talalelei. O ai e auina atu i latou? … O le Atua o Isaraelu ua auina atu i latou. O Lana galuega lenei. E leai se tagata soifua ua faapea ona naunau i le tulaga manuia o se Toeaina, pe a ia talaiina le Talalelei, e pei o le Alii na auina atu o ia e talai i tagata, o e o fanau a le Alii. Sa ia fanauina i latou i le lalolagi i luma atu, ma ua latou o mai iinei ona sa finagalo i ai le Alii mo i latou ina ia o mai.¹¹

Matou te lagonaina faapea o outou [faifeautalai] o le a faamanuiaina tele, aua ua matou lagonaina ma iloa ua valaauina outou e le Atua. O le poto o le tagata o le a le mafai lava ona mafaufauina se galuega e pei o lenei. Ou te ofo lava pe a ou mafaufau atu i lona maoae. E mafai ona ou fai atu o le galuega moni lava lea ua manaomia i lenei taimi: ma ua ou lagonaina o le a outou ulu atu i ai ma o outou agaga atoa. Ia atiina ae le Agaga o Iesu, ina ua ia fetalai sa le mafai ona faia e Ia se mea e tasi, a o le finagalo o lona Tama [tagai Ioane 5:30].

Aua le popole i o outou faigata ma mea ua aveesea; ia tuu ese o outou lava manaoga, ona maoae ai lea ma mamalu lo outou manuia, ma o le a lagonaina e le Ekalesia atoa aafiaga o a outou galuega.

Aua le popole i feeseeseaiga a nisi o i latou o le a e auauna atu i ai, ma nai tulaga le lelei o le a outou feagai; o le a i ai le Agaga o le Alii i o outou luga, ma o le a outou saveuina agaga o i latou o e o le a outou aoaoina, ma faatoilaloina lo latou lē fia faalogo; … o le a faamalieina outou ua outou faataunuuina le galuega na auina atu outou e faatino. …

Ua ia te outou le pule atoatoa ua faaeeina i o outou luga, ae le manaomia lava ona outou talanoa e uiga i lenei mea. O le a outou iloaina, e leai se mafuaaga e talanoa ai fua i ai; o le Agaga o le Alii o le a faamautinoa maia, ma o le a lagonaina e tagata ua outou tauaveina, ma o lenei faamautinoaga ma le lagona o le a avea ma a outou pule.

O le a outou iloaina nisi ua manatu e tele atu mea ua latou iloaina nai lo outou, ae a outou faia lo outou tiute e pei ona fautuaina, ae tou te le i tuua i latou, o le a latou lagonaina ua sili laitiiti atu mea ua outou maua nai lo i latou, ma ua outou faamanuiaina ma fesoasoani ia i latou. …

Taumafai ia taliaina outou e i latou o e ua auina atu i ai outou. O le lotomaualalo o le a outou faaalia, ma le Agaga o le Alii ua i o outou luga, o le a faaalia ai lo outou agavaa mo le tofiga ua valaauina outou e faataunuu. Taumafai ia malamalama i le natura o le tagata ma galue e tusa ai, ina ia mafai ona maua ai e tagata taitasi le fiafia ma mea uma ina ia taliaina. …

E i ai se auala e pa’i atu ai i agaga taitasi o tagata, ma o lau matafaioi o le sailia o se auala i loto o i latou o e ua valaauina oe i ai. …

Ua ou lagona i lo’u loto e faapea atu, ia faamanuia outou e le Atua. O le a vaetofiaina outou ae tou te le i o atu, ma o le a matou tatalo mo outou, ma o le a matou matua popole lava mo outou. Ia agamalu ma lotomaulalo. Pe a outou vaai atu i se faapotopotoga o tagata, atonu e lua ni faamoemoega o le a musuia ai oe; muamua, ina ia lelei lau tautala atu ma ia tuuina se lagona lelei i le aofia, i le avea ai o oe o se failauga; ma, o le isi, o le fesili o le a tulai mai, o le a le mafuaaga ua ou i ai iinei? Ina ia seleseleina fatu o le olataga i totonu o loto o i latou o e ua i ai i lenei aofia; ma e tatau ona tupu a’e se tatalo i lou loto, “Le Alii e, ia faapea ona faia; ia tuuina mai ia te a’u le mana e ala i lou Agaga, e pai atu ai i loto o nei tagata o lou nuu? O lena tatalo puupuu tele, e na o le pau lena o le mea e manaomia e se toeaina na te faia. E na o le pau lava lena o le mea e ao ona e faia. “E mafai ea ona ou fai atu se upu e laveaiina ai nei agaga? O le mea lenei ua finagalo le Au Peresitene Sili … ma o outou uso uma tou te faia.¹²

Ia liliu atu o outou mafaufau i le faaiilaina o outou ofutau faaleagaga. Ua ou iloaina faapea, pe a ou tuueseina uma au mataupu faalelalolagi, o le a tasi lau vaai i mea faaleagaga. Tatalo, uso e, ma mafaufau i mea e aoga ai le anapogi. … Aua le soona tausua, [ma] ia faaeteete ina ia le faatiga i le Agaga. Sa ou iloaina a o ou i ai i la’u misiona, ina ua mae’a se vaiaso pe lua, sa mafai ona ou faagaloina lo’u aiga, ma sa lagolagoina au e le Agaga o le Atua. E taitai atu e le Agaga i le saolotoga ma le fiafia, ae aua le fiafia tele. … Faaauau i le agaga tatalo ina ia e maua le Agaga o le Atua ina ia i ai i ou luga, mai lou tumuai e oo i ou alofivae.¹³

O Toeaina o loo galulue i le tovine, e ao ona aua ne’i aveesea la latou vaai mai le mea moni faapea o i latou o sui o le lagi, o e aumaia le tala e lelei i tagata o e le iloa le Alii. …

Ina ua auina atu e le Perofeta o Iosefa Samita uluai Toeaina i se nuu mamao, sa ia silafia le auala o le a taliaina ai i latou e tagata, sa ia ta’u atu ia i latou faapea, e ui o sina vaega itiiti o tagata o le a taliaina i latou o auauna a le Atua, o le toatele lava o le a teenaina i latou, ma lē faalogo i la latou savali. O le tulaga lenei sa i ai auauna a le Atua mai le amataga o taimi, ma e ao ona tatou fiafia i taunuuga o auaunaga faamaoni, e tusa lava pe na o se vaega toaitiiti o le a aumaia, e ala ia i tatou, i se malamalama o le upu moni. …

Ou te faamoemoe ma tatalo o le a leai se Toeaina o galue … o le a matua mamao lona faagaloina o ia lava, ma gauai atu i faaosoosoga a le lalolagi. E i ai, ma, na o le tasi lava le auala saogalemu e aloese ai mai na mea, ma o lena mea, o le liliu ese mai le amio leaga, e moni, e oo lava i le foliga mai o mea. O faaosoosoga, o soo se ituaiga, o le a oo mai ia i latou. O le auala lea e galue ai le fili o lo tatou faaolataga; ae o le tiute o toeaina o Isaraelu o le teenaina o faaosoosoga, ma o le auala e mafai ai ona manuia le faatinoina o lenei tulaga, o le tausia lea o i latou lava ia le ponā mai le lalolagi. … O le tele lava o lo latou atiina ae ma olioli i le agaga o la latou misiona, ma mafaufau i le taua o lo latou valaauga ia Keriso Iesu, ma ola i le agaga lava e tasi, o le a mafai ai ona latou tutu o ni taiala ma faaola mo tagata, i le faasusuluina atu ia i latou o le malamalama o le lagi, ma ia le pei o isi tagata; ae a latou faia le agasala ma talia uiga o le lalolagi, o le a aveesea lo latou malosi ma avea faapei o isi tagata, ua talafeagai le toe foi i le aiga ma faanoanoa e pei foi o isi na pauu muamua, ma faatupu le faanoanoa i loto o e pele ia i latou, ona o lo latou tulaga. … Ae ui i lea, afai e faaauau ona latou saili le Alii i le lotomaualalo, faatasi ma le manatu tasi i Lona mamalu, ma i ai le manao i o latou loto mo le faaolataga o agaga o tagata, ma le faia o mea uma latou te mafaia e aumai ai lo latou faaolataga, e ao ona latou maua le olioli e le mafaamatalaina ia latou auaunaga i le tino, ma i le faaiuga, o le a avea ma sui faatasi ma le Tama ma le Alo i mea silisili ma mamalu e faigata mo le olaga faitino ona malamalama pe mafaufau i ai.¹⁴ [Tagai fautuaga 4 ma le 5 i le itulau 253.]

E olioli o tatou agaga, a o tatou fesoasoani i isi ia maua le atoaga o le talalelei.

Ua matou lagonaina … ina ia faataunuuina lenei galuega, e tele le onosai, faatuatua, naunautaiga, filigā, ma le talitiga ua manaomia ona faatinoina ma mauaina; ae i totonu o aai … lea e faitau afe o le a iu ina taliaina le Talalelei, i le tele o aai eseese, e tele masina sa faaaluina i auaunaga na foliga mai ua aunoa ma ni fua mai, a o le i usitaia ma taulai atu mafaufau i le mauaina o na aoaoga faavae. … Atonu tatou te galulue i nisi o [taimi] mo masina, pe atonu e oo lava i tausaga; ae ua tatou mautinoaina, e ala i le faatuatua, tatalo, galuega, ma le faamanuiaga a le Alii, e mafai ai ona tatou manumalo aiai ma faamanuiaina i nei faigata uma, mo le mamalu ma le viiga o le Atua; ma le isi, o le a tatou mauaina foi mo i tatou lava, le faamalieina faapea ua tatou faia lo tatou tiute, ma faamamaina o tatou ofu mai le toto o tagata uma.¹⁵

I se [tasi] taimi, a o le i agai atu i Italia, sa ou asiasi atu ai i Manchester, Macclesfield, Birmingham, Cheltenham, Lonetona, Southampton ma South Conferences [i Egelani]. … Sa ou maua le fiafia i le feiloai ai ma le toatele o e sa avea a’u ma auala e aumaia ai i latou i totonu o le Ekalesia [i le valu tausaga na muamua atu]; ma ou te le tau fai atu ia te outou, o le toe feiloai ai ma nei tagata o se fiafiaga moni lava sa ou fiafia e mafaufau i ai i taimi uma. Sa saunoa le Aposetolo o Ioane i ona aso, “O i tatou, ua tatou iloa ua oo i tatou i le ola sa i le oti, aua o loo alolofa i tatou i le au uso.” [1 Ioane 3:14.] O le alofa lenei o faifeautalai o la tatou Ekalesia mo tagata o le lalolagi, ma le alofa sa faapea ona lagonaina e tagata mo faifeautalai na aumaia ia i latou le savali o le Talalelei, o se molimau lea ua lava e faatalitonuina ai le loto faamaoni faapea o lona puna e paia, ma o loo faatasi le Atua ma i tatou. O lenei lagona paia ma mamalu, ua fagua ai i totonu ia i tatou e le Agaga Paia, ua mae’a ona faailogaina i tatou o se nuu mai le aiga o totoe o tagata; ma o lenei le lagona o le a suia ai le lalolagi atoa, ma faatalitonu ai le tagata le talitonu o le Atua, e le gata o le Tama o i tatou uma, ae o i tatou o Ana uo ma auauna.¹⁶

Ua tuuina atu lo’u ola atoa i le galuega a le Alii; o lo’u tagata atoa ma a’u mea umaua tuuina atu i luga o le fata faitaulaga mo le ositaulagaina, ina ia ou faamamaluina o Ia, faia ma le fiafia Lona finagalo, ma ta’u atu mataupu o le ola i le fanauga a tagata. Pe a ou toe tomanatu i le tuanai, ma toe vaaia le aao o le Alii sa tatalaina ma le ofoofogia lo’u ala, ma faamanuiaina au i mea uma e tusa ma nei misiona, e sili atu nai lo mea sa ou faamoemoeina, ou te lagona le uunaia faapitoa o au e agai pea i luma i le lumanai; ua le lava upu e faamatala ai le loto faafetai loloto o lo’u loto mo ana faamanuiaga. Mo na uso ma le Au Paia, o e sa i ai le agalelei i o latou agaga ma le manao mo le galuega a le Atua, sa faaalia patino lava i nei misiona i o latou luga, tau ina ia liligi ifo faamanuiaga a le Atua Silisili faatasi ma lea lava agaalofa e tasi, ma i tausaga o muamua o le a latou faalogoina ai le leo o le faitau afe, ma sefulu o afe o na malo, ua latou pepese i viiga o le Silisili Ese mo le malamalama o faaaliga, ona faapea foi lea ona olioli o latou loto i le malamalama faapea, sa faapea foi ona latou faia i le aumaia o lenei faaolataga mamalu.¹⁷ [Tagai fautuaga 6 i le itulau 253.]

Fautuaga mo Suesuega ma le Aoaoina Atu

Mafaufau i manatu nei, a o e suesueina le mataupu, pe, a o e sauni e aoao atu. Mo nisi fesoasoaniga, tagai i itulau v–vii.

Faitau itulau 243–5, ma mafaufau i tali a Lorenzo Snow i le fesili “Aisea ua ou i ai iinei?” O a auala atonu e uunaia ai e lenei fesili tagata uma o le Ekalesia, i o tatou avanoa e faasoa atu ai le talalelei?
Mafaufau loloto i le fautuaga a Peresitene Snow, o loo i totonu o le vaega lea e amata i le pito i luga o le itulau 245. Mafaufau pe faapefea ona e mulimuli i lenei fautuaga, e fesoasoani ai i se tasi ina ia fiafia moni.
Sa tauina mai e Peresitene Snow osigataulaga sa ia faia, faatasi ma isi tagata, ina ia mafai ona latou faasoaina atu le talalelei (itulau 246–8). O a faataitaiga ua e vaaia o tagata o loo faia osigataulaga ina ia faasoa atu ai le talalelei? Aisea e te manatu ai ua naunau nei tagata e faia ia osigataulaga?
E faapefea e faamautinoaga o i itulau 246–8 ona fesoasoani ai i se faifeautalai faamisiona? E faapefea ona fesoasoani ia i tatou taitoatasi, a o tatou faasoa atu le talalelei? O a ni auala atonu tatou te faaaogaina ai nei aoaoga e fesoasoani ai i se tasi, o faalotolotolua e faia se misiona?
A o e toe iloiloina le fautuaga a Peresitene Snow o loo i itulau 248–51, manatunatu pe faapefea ona faatatauina i olaga o tagata uma o le Ekalesia. Mo se faataitaiga: O le a sou manatu o le a le uiga o le “tuu ese o outou lava manaoga”? O a nisi o auala eseese atonu tatou te mauaina e “pai atu ai i agaga o tagata taitasi”?
Faitau le palakalafa faaiu i totonu o le mataupu, lea e tauina mai ai e Peresitene Snow le olioli e le iu o le galuega faafaifeautalai. O anafea na e lagonaina ai le olioli o le galuega faafaifeautalai? Aisea tatou te manaomia ai i nisi taimi ia onosai ae tatou te le i mauaina atoa lenei olioli?

Mau Talafeagai: Alema 26:1–8, 35–37; MF&F 12:7–8; 18:10–16; 84:88

Fesoasoaniga mo le Aoao Atu: “Fai atu i sui auai e filifili se vaega se tasi, ona faitau lemu lea. Valaaulia i latou e faapotopoto i vaega taitoalua, po o le taitoatolu, o e sa filifilia le vaega e tutusa ma talanoaina mea na latou aoaoina” (mai le itulau vii i totonu o lenei tusi).

“Pe a maua e se tagata le malamalama, o le a uunaia o ia e faasoa atu i isi; pe a o’o ina fiafia se tagata, o le agaga ua siomia ai o ia, o le a aoao ai o ia e tauivi ina ia fiafia isi.”

“Ia tuu ese o outou lava manaoga, ona maoae ai lea ma mamalu lo outou manuia, ma o le a lagonaina e le Ekalesia atoa aafiaga o a outou galuega.