Mataupu 13

Aualofa: O Le Alofa Mamā Moni ma le Tapuaiga Mamā

“E leai se isi faalapotopotoga na faavaeina faatasi ma se faamoemoega faatupu. O lona faavae o le alofa mamā moni, o le alofa mamā lea o Keriso.”

Mai le Soifuaga o Lorenzo Snow

I le taumafanafana o le 1901, sa faatulagaina ai e le au peresitene aoao o le Aualofa, se gaoioiga mo le aso atoa, mo tuafafine o le Aualofa i le vanu i Sate Leki. Sa taliaina e Peresitene Lorenzo Snow se valaaulia e auai ma saunoa atu ai i le faatasiga. Sa ia amataina lana tautalaga i lona faapea atu: “Ou te faafetai mo le avanoa e faaaluina se itula, pe lua faatasi ma outou i lenei aoauli, ma ou te talitonu o loo outou fiafia uma i le asō. O mea faafiafia ma faafiafiaga o ni mea lelei, ma ou te fiafia e vaai atu ia te outou tuafafine, o outou faasaga atu mo sina malologa ma faafiafiaga, o outou o e galulue malosi i lea aso ma lea aso i outou aiga, ma i totonu o le Aualofa, ua mautinoa ua tatau ai mo outou le fiafiaga uma e mafai ona outou maua.”

O Peresitene Snow, o lona tuafafine o Eliza R. Snow, o lē sa avea ma peresitene lona lua o le Au Peresitene Aoao o le Aualofa, sa faaalia le agaga faafetai mo galuega a le Aualofa. I le talanoa ai e uiga i tamaitai o le Ekalesia, sa ia saunoa faapea, “E faigata ona mafaufauina le mea sa tatau ona tatou faia, pe, o le a le tulaga ua i ai le alualu i luma o le galuega a le Alii, e aunoa ma i latou.” I le sii maia o se tasi faataitaiga, sa ia talanoa ai e uiga i le polokalama o le talaiga a le Ekalesia i lena taimi, lea sa masani ona valaauina ai alii ua faaipoipo e faataunuuina ni misiona: “Ina ua tatou malaga ese atu i misiona i atunuu ese, o a latou misiona i aiga sa tele lava ina le itiiti ifo le faigata nai lo a tatou misiona i atunuu mamao; ma, i le totonugalemu o tofotofoga ma le fia aai, sa latou faaalia se onosai, se lotomau ma se faalagolago ia i latou lava, sa matuā faagaeetia lava. Faafetai i le Atua mo tamaitai o lenei Ekalesia! O le lagona lena ua ou mauaina i le asō, a o o’u auai ai i lenei faatasiga.”¹ [Tagai fautuaga 1 i le itulau 186.]

Aoaoga a Lorenzo Snow

O sui o le Aualofa latou te faaa’oa’o maia le alofa mamā moni ma le tapuaiga mamā.

Sa faatulagaina le Aualofa … e le Perofeta o Iosefa Samita, i lalo o musumusga a le Alii. … I le aso nei, ua lauiloa ai o se tasi o malosiaga sili mo le lelei i totonu o le Ekalesia. …

O le misiona a le Aualofa, o le fesoasoani lea i e lotovaivai, ia tausi i e mama’i ma vaivai, ia fafaga e matitiva, ia faaoofu i e lē lavalavā, ma faamanuia atalii ma afafine uma o le Atua. E leai se faalapotopotoga na faavaeina muamua faatasi ma sona faamoemoega tautupu. O lona faavae o le alofa mamā moni, le alofa mamā o Keriso [tagai Moronae 7:47], ma o lena agaga ua faaalia i auaunaga uma a le Aualofa i tagata. Sa saunoa mai le Aposetolo o Iakopo “O lenei lava le amio Atua e lelei ma le faamaoni i luma o le Atua, o le Tama lea: ia tauasiasi atu i e matuaoti ma fafine ua oti a latou tane i o latou tiga, ia leoleo foi o ia ia te ia, ina nei pisia mai o ia i le lalolagi.” [Iakopo 1:27.] I le taliaina ai o lena mea moni, o sui o le Aualofa ua latou faaalia moni lava i o latou soifuaga le amio e lelei ma le faamaoni; aua ua latou tausia e ua mafatia, ua latou opoina mai e ua matuaoti ma leai ni taitoalua, ma ua latou tausia i latou lava ia mamā mai agasala a le lalolagi. E mafai ona ou molimau atu faapea, e leai ni tamaitai sili atu ona mama, ma sili atu ona matata’u i le Atua, nai lo i latou ua i ai i vaega uma o le Aualofa.² [Tagai fautuaga 2 i le itulau 186.]

E galulue tuafafine o le Aualofa faatasi ma e umia le perisitua, e faalauteleina mea o le malo o le Atua.

Ua avea lava ma pogai o le fiafia mo a’u i taimi uma, le vaai atu i le auala ua tutū ai outou tuafafine o le Aualofa, i autafa o auauna a le Alii i soo se tulaga. Ua maua pea lava outou i tafatafa o le Perisitua, saunia e faamalolosia o latou aao ma faia la outou vaega i le fesoasoani ai e faalautele mea o le malo o le Atua; ma, a o outou fefaasoaai i nei auaunaga, o le a faapena foi ona mautinoa lo outou fefaasoai i le manumalo o le galuega, faapea i le faaeaga ma le mamalu lea o le a tuuina mai e le Alii i Lana fanau faatuatua.

… E leai se Epikopo atamai o le a ia lē faafetaia auaunaga a le Aualofa i totonu o lana uarota. O le a le mea e mafai ona faia e se Epikopo, pe a aunoa ma le Aualofa? Ou te fia fai atu i Epikopo uma i totonu o le Ekalesia, uuna’i tuafafine o le Aualofa, ma sapasapaia i latou i la latou galuega o le alofa mamā ma le loto fesoasoani, ma o le a latou faamaonia o se faamanuiaga mo oe ma tagata.³ [Tagai fautuaga 3 i le itulau 186.]

E lelei le i ai o le uunaiga a le Aualofa i totonu o aiga taitasi.

Ou te fia fautuaina le usoga ina ia uunaia a latou avā e [auai i le] aualofa … ; ona o le a avea ma se mea lelei le i ai o le aafiaga a lenei faalapotopotoga i aiga taitasi. Ou te fai atu ia te outou, o’u tuafafine e, i a outou asiasiga i aiga o le Au Paia o Aso e Gata Ai, ina ia aveina atu lenei aafiaga i soo se mea tou te malaga i ai. Ua faaalia manino mai e le Alii ia te outou le natura o la outou sootaga ia te Ia, ma le mea ua faamoemoeina mai ia te outou, i le avea ai ma avā ma tinā. A’oa’o atu nei mea ia i latou tou te asia, aemaise i tamaitai talavou. …

O outou, o’u tuafafine e, i le avea ai ma sui o le Aualofa, ma le avea ai ma tinā o Isaraelu, e tatau ona faaaogaina la outou faatosinaga uma … mo le mama a’ia’i o le tulaga faatinā, ma le faamaoni i le feagaiga o le faaipoipoga.⁴ [Tagai fautuaga 4 i le itulau 186.]

A o faatupulaia le Ekalesia, o le a i ai i tuafafine o le Aualofa ia avanoa sili atu e auauna ai.

E le manaomia mo a’u le auiliili atu o mea ua faia e le Aualofa i le tuanai; o lana galuega matagofie ua lauiloa i Siona atoa, faapea le tele o vaega o le lalolagi. Ua lava le faapea atu, sa faamaoni i lana misiona, ma e le’i gausia lava lana matati’a, pe afai e faatusalia, e se isi lava faalapotopotoga o le alofa. Ua faafiafiaina le Au Paia o Aso e Gata Ai mo le Aualofa ma mea lelei ua latou ausia, ma faafetaia lo tatou Tama i le Lagi, sa Ia musuia Lana auauna, le Perofeta, e faatuina lea ituaiga faalapotopotoga. O le lumanai o le Aualofa e tumu i folafolaga. A o faatupulaia le Ekalesia, o lona aogā o le a faapea foi ona faalauteleina, ma o le a sili atu lona malosiaga mo le lelei nai lo se isi lava taimi ua tuanai. Pe a auaufaatasi tuafafine uma mo le lagolagoina o le Aualofa, o le a faataunuuina se galuega mausalī ma avea ma se faamanuiaga faifai pea mo le Ekalesia. O le a avea ma faafiafialoto le vaai atu i tamaitai faaleogolua o fiafia i lenei faalapotopotoga, e pei ona faia e le aumatutua, ma i le avea ai faapea, o le a latou iloa ai o le a faamalolosia lo latou faatuatua, tuuina ia i latou manatu sili atu ona lautele o le olaga ma ona tiutetauave, ma faalauteleina i latou faaletino, i le ala o le alualu i luma ma le atoatoa.⁵

Mai le amataga o la latou galuega, sa tuuina mai ai le faamanuiaga a le Atua i luga o [tamaitai o le Ekalesia], ma ua ou matauina ma le tele o le fiafia ma le faamalieina, faatasi ma le naunau loloto i lo latou alualu i luma. … Ua faamanuiaina tele i latou, ma, e ofoofogia le auala ua faamanuiaina ai i latou e le Atua, ma le liligiina mai i o latou luga o Lona Agaga. Ua avea i latou, pe a mafai ona ou fai atu ai ma le faaaloalo, faapei o agelu ua tutu i luma o tagata o le lalolagi.⁶ [Tagai fautuaga 5 i le itulau 186.]

O tuafafine o le Aualofa, o e faalagolago i le Atua ma auauna ia te Ia, o le a faamanuiaina i lenei olaga, faapea i le faavavau.

O le mea lenei matou te mananao e faamautu i loto o tuafafine—ia aoga i lo latou lalolagi ae aua nei faalotovaivaia ona o faigata i le ala, ae ia faalagolago i le Atua ma vaavaai atu ia te Ia, ma Ana faamanuiaga ofoofogia, ou te folafola atu ia te outou, o le a liligi mai i o outou luga. O le mea lenei o le a avea ma ō outou aafiaga. … Se i o’u toe faamanatu atu, aua ne’i faavaivai, ae ia o atu i luma ma faataunuuina le lelei, faatino le faatuatua, ma, o soo se avanoa lava e o’o mai, saili ia faaleleia atili ai. Matou te manana’o ia te outou e faaaoga taleni uma ua tuuina mai e le Atua i o outou luga. Ma, e i ai le mea lenei, e faatatau i o outou faamoemoega mo le manuia. Pe a amata e se tagata ona malaga i luga o se ala ua faailogaina mai e le Alii, ma ia mafai ai ona faataunuuina le lelei i mea ua Ia finagalo ai, o le a mautinoa lava lona faamanuiaina. Ua i ai tonu o ia i le mea e finagalo le Atua e tatau ona i ai, ma, o iina le nofoaga lea e mafai ai, faatasi ma le faaaloalo silisili, ona e talosagaina le Atua mo Lana faamanuiaga.⁷

Ua ou lagonaina e faapea atu, ia faamanuia e le Atua le au mautofi ma sui auai o le Aualofa. O loo outou faatinoina se misiona maoa’e, ma ou te apoapoa’i atu ia te outou, ina ia aua le faavaivai i le faia o mea lelei [tagai MF&F 64:33]. O loo tatou taula’i atu mo le mamalu faaselesitila, ma o le maoa’e o faamoemoega ua i o tatou luma e lē mafai ona faamatalaina i le gagana a tagata. Afai o le a outou faaauau i le faamaoni i le galuega ua outou auai, o le a outou mauaina le mamalu i o outou luga, ma olioli e faavavau i le afioaga o le Atua ma le Tamai Mamoe. O le mea lenei ua tatau i ai le tauiviga, e tatau i ai le ositaulaga, ma amuia le alii po o le tamaitai, o lē faamaoni seia o’o ina mauaina. Ia faamanuia e le Atua outou uma.⁸ [Tagai fautuaga 6 i le itulau 186.]

Fautuaga mo Suesuega ma le Aoaoina Atu

Mafaufau i manatu nei a’o e su’esu’eina le mataupu, pe, a’o e sauni e a’oa’o atu. Mo nisi fesoasoaniga, tagai i itulau v–vii.

Na tautino mai e Peresitene Snow faapea, o le a faigata ona mafaufau i le alualu i luma o le galuega a le Alii, e aunoa ma tamaitai o le Ekalesia (itulau 181–2). O a auala ua saofagā ai tamaitai i le galuega a le Alii i aso nei?
Mafaufau loloto i upu a Peresitene Snow e uiga i le misiona a le Aualofa (itulau 182). Manatunatu i se taimi na faataunuuina ai e tuafafine o le Aualofa lenei misiona e ala i le fesoasoani ai ia te oe, po o lou aiga. Na faapefea ona aafia lou olaga ona o nei ituaiga gaoioiga?
Toe iloilo le vaega o loo amata i le pito i lalo o le itulau 182–3. O a auala ua fesoasoani ai tuafafine o le Aualofa e “faalautele mea o le malo o le Atua”? O a faataitaiga ua outou molimauina ai tuafafine o le Aualofa ma le au perisitua o galulue faatasi?
Mafaufau loloto i le augani a Peresitene Snow mo tuafafine o le Aualofa, ina ia faatinoina lo latou aafiaga mo le “tiute faatinā mamā ma le faamaoni i le feagaiga o le faaipoipoga” (itulau 183). Aisea ua manaomia ai lenei uunaiga i le lalolagi i aso nei? O a auala e mafai ai e tuafafine o le Aualofa ona fesoasoani i tamaitai talavou, e saunia mo faaipoipoga i le malumalu ma le tulaga faatinā?
Na saunoa mai Peresitene Snow, “A o faatupulaia le Ekalesia, o le aogā [o le Aualofa] o le a fesoota’i ma lona faateleina, ma o le a faapea ona sili atu lona lelei, nai lo soo se isi taimi ua tuanai” (itulau 183). I le lalolagi i aso nei, o a mea e mafai e tuafafine o le Aualofa ona faia e faateleina ai la latou uunaiga mo le lelei?
Su’esu’e le vaega o loo amata i le itulau 184. Mafaufau loloto i auala sa taitaiina ai oe ina ia i ai “i le mea e finagalo le Atua ina ia [e] i ai.” Sa faapefea ona fesoasoani le Atua ia te oe i nei taumafaiga?

Mau Talafeagai: Isaia 1:17; Mataio 25:34–40; Mosaea 4:26–27; Alema 1:29–30; Moronae 7:44–48

Fesoasoaniga mo le Aoao Atu: “A o e sauni e a’oa’o atu, ia mautinoa ua e faaaogaina ni metotia eseese faafaiaoga mai lea lesona i lea lesona. Atonu o le uiga o lenei mea, o le faaaogaina o se mea sili ona faigofie e pei o se pepa o ata, po o se siata i le tasi lesona, ma se lisi o fesili i luga o le laupapa i se isi lesona” O Le A’oa’o Atu, E leai se Isi Valaauga e Sili Ai, 89).

Mai ulua’i aso o le Ekalesia, o tuafafine o le Aualofa, sa galulue faatasi ma faamalolosia e le tasi le isi i le faaletino ma le faaleagaga.

“O sui auai o le Aualofa ua latou faaa’oa’o moni maia i o latou olaga le amio Atua e lelei ma le faamaoni.”