Mataupu 22

O Le Faia o Mea Lelei Mo Isi

“Ia atiina ae i totonu o i tatou se agaga o le alofa mama; ia saunia e fai mo isi ia sili atu nai lo mea ua e faamoemoeina mai ia i latou, pe a faapea ua toe liliu o latou tulaga.”

Mai le Soifuaga o Lorenzo Snow

O Lorenzo Snow ma lona aiga sa avea ma vaega o le uluai malaga tele a le Au Paia o Aso e Gata Ai mai Navu, Ilinoi. Faatasi ma se vaega o isi aiga, sa latou agai atu i sisifo i le setete o Iowa ia Fepuari 1846. O tulaga faaletonu o le tau sa faigata ai la latou malaga sopo—mai lea aso i lea aso, sa faigata ia i latou ona malaga i le timu, o le kiona, ma le palapala.

A o malaga le aiga o Snow i se tasi aso, sa fesili atu se tasi o le aumalaga ia i latou mo se fesoasoani. Sa tusia e Lorenzo Snow i lana api talaaga faapea o se alii sa “talosagaina pe mafai ona tuu lana pusa i totonu o la’u taavaletoso, sa ia fai mai ua le mafai lava ona aveina i se isi taavaletoso.” O le taavaletoso sa “matua faatumulia lava i le tele o isi mea ma sa foliga mai o le a le mafai ona matou fesoasoani atu,” na toe manatua ai e Lorenzo, ae ui o lea, “sa ou fai atu ia te ia e tuu le pusa i totonu ma oso mai matou te malaga faatasi.”

O le po na sosoo ai, na feagai ai le aiga ma se tulaga, lea na taua e Lorenzo “o se tulaga sili ona le manaia”: sa faaletonu se pa’u o la latou taavaletoso. Sa ia toe faamatalaina: “Sa matuā malosi timuga ma [sa] matuā malulu lava. Sa faavave ona matou faatuina lo matou faleie [ma] faia se afi lelei i laau o le hikori. … Sa matua loloto le vai ma le palapala, ma sa faigata ona matou o’o atu i le taavaletoso, e aunoa ma le asaina. … Sa tusa o le sefululima maila ua matou mamao ese ai mai le tolauapiga, ma pe iva po o le sefulu mai le fale muamua, ma e leai se tasi o i matou e iloa inisinia, o le faamoemoega mo le toe faaleleia o la matou taavaletoso, sa matuā lē foliga lelei mai.”

Na oo mai e aunoa ma se iloa, le faamama avega mai le tamaloa lea na latou fesoasoani i ai i le aso na muamua atu. “Sa ou tagiaue i lo’u tulaga pagatia,” sa saunoa ai Lorenzo, “ina ua ia sau ia te au ma faailoa mai o lana galuega o le fauina o taavaletoso, ma o le a faigofie ia te ia ona toe faaleleia la’u taavaletoso. … O le taimi lava na toe lelei ai le tau, na faasaga ai loa uso Wilson (o le igoa lena o le tagata sa taua muamua) e galue ma toe faia se laau faalava e sili atu ona lelei nai lo lea na gau, e taavavale ai uili. Na lipea la matou taavaletoso, sa matou tuua lenei nofoaga, ina ua mavae ona nonofo ai iina mo nai aso, ona o le timu ma le palapala.”

Mo Lorenzo Snow, o lenei mea na tupu sa toe faamalosia ai se lesona taua e uiga i le auauna atu ma le faaaumeaina. Sa ia tusia i lana api talaaga, “O le taliaina o se manaoga se tasi, e masani ona taitai atu ai i le mauaina o le isi.”¹ [Tagai fautuaga 1 i le itulau 284.]

Aoaoga a Lorenzo Snow

O i tatou o fanau a le Tama Faalelagi e tasi, ma ua auina mai i tatou i le lalolagi ina ia faia e le tasi ia mea lelei mo le isi.

O i tatou, e mai i le Tama e tasi i lalolagi faaselesitila. … Afai sa iloa e le tasi le isi, e pei ona sa tatau ai, … o le a sili atu lo tatou tiga alofa mo isi nai lo le tulaga e pei ona i ai i le taimi nei, ma o le a i ai se naunauga i tagata taitasi e suesue i o latou lava mafaufau auala atonu latou te faia ai mea lelei mo o latou uso, auala e mafai ai ona latou faaitiitia o latou faanoanoaga ma fausiaina i latou i le upu moni, auala [atonu latou te] aveesea ai le pouliuli mai o latou mafaufau. Pe a tatou malamalama le tasi i le isi, ma le sootaga moni lea tatou te mauaina o le tasi i le isi, e tatau ona ese lo tatou lagona ma le mea ua tatou faia nei; ae o lenei malamalamaaga e le mafai ona tatou mauaina, vagana ua tatou maua le Agaga o le olataga ma, a o tatou naunau atu i le fausiaina e le tasi o le isi i le amiotonu.²

Na auina mai i tatou i le lalolagi ina ia faia mea lelei i isi; ma i le faia ai o mea lelei i isi, ua tatou faia ai mea lelei ia i tatou lava. E tatau ona tatou teuina lenei mea i o tatou mafaufau, o le tane i le va ma lana ava, o le ava i lona va ma lana tane, o fanau i le va ma o latou matua, faapea matua i le va ma a latou fanau. E i ai lava i taimi uma se avanoa e faia ai mea lelei e le tasi i le isi.³

Ou te tatalo i le Atua, i le suafa o Iesu, ina ia mafai e oe ma au ona taumafai i aso taitasi ia faatumauina sina faatuatua sili atu, ina ia mafai ona tatou taumafai ia sili atu le aso nei nai lo ananafi, ina ia mafai ona tatou taumafai e maua se alofa ma se uiga alofa sili atu mo o tatou tuaoi, e pei ona tauina mai ia i tatou faapea, i luga o lenei ua autu ai le tulafono ma le au perofeta, “ina ia alofa atu i le Alii, lo tatou Atua, ma o tatou loto atoa, ma lo tatou malosi atoa, ma o tatou tuaoi e pei o i tatou ia i tatou lava.” [Tagai Mataio 22:37–40.] “Ia faapea lava ona outou faia ia te i latou, e faapei ona latou faia ia te i tatou.” O lenei le tulaga e tusa ma le tulafono ma le au perofeta. [Tagai i leMataio 7:12.] O aoaoga faavae nei e tatau, ma e ao ona tatou iloa. … E tatau ona tatou faauo atu i soo se mea ma i tagata uma. E leai se Au Paia o Aso e Gata Ai e ita i le lalolagi: ae, o i tatou o uo i le lalolagi, ua uunaia i tatou ia faapena, e tusa ai ma lo latou tulaga. E ao ona tatou aoao e faalautele atu lo tatou alofa ma galulue mo le manuia o tagata uma. O le misiona lenei a le Au Paia o Aso e Gata Ai—ia le gata ia i tatou lava, ae ia faasalalau atu i fafo atu, e pei ona tatau ai, e ao ona faalautele atu i tagata uma.⁴

Ia amiotonu, faamaoni ma loto alofa, i le faatinoina o se agaga tautupu ma le amioatua i ou faamoemoega ma au folafolaga uma—i au gaoioiga ma fegalegaleaiga uma. Ia atiina ae se agaga o le alofa mama; ia saunia e faia mo isi mea sili atu nai lo mea ua e faamoemoeina mai ia i latou, pe a toe faapea e toe liliu o outou tulaga. Ia i ai se naunauga e avea ma tagata sili, e le o le manatu o tagata faalelalolagi, ae i le silafaga a le Atua, ma ina ia avea ma tagata sili i lenei uiga, “Ia e alofa atu i le Alii lou Atua ma lou loto atoa, manatu ma malosi, ma le lua te tuaoi e pei o oe lava ia te oe.” E ao ona e alofa i tagata uma, aua o i latou o ou uso, o fanau a le Atua. Tatalo ma le filiga mo lenei agaga o le tuuina atu o tupe ma taimi, lenei faalautelega o manatu ma lagona, ma mo le mana ma le agavaa e auauna faamaoni ai mo le manuia o le malo o le Mesia.⁵ [Tagai fautuaga 2 i le itulau 284.]

E faateleina lo tatou fiafia, pe a tatou fesoasoani i isi e maua le fiafia.

E tatau ona ia i tatou se naunauga malosi e faia le lelei i isi. Aua le popole tele ia i tatou. O le a oo mai lava le lelei ia i tatou, pe a tatou mafaufau i isi i fafo atu o i tatou lava i tulaga e tatau ai, ma taumafai ia sili atu le fiafia o isi ma faalatalata teisi atu ai i latou i le Alii. … Pe a e lagonaina sina faanoanoa ma leai se faamoemoe, ia vaavaai i ou autafa ma saili se tagata o loo i ai i se tulaga e sili atu ona leaga nai lo oe lava; alu atu ia te ia ma saili po o le a le faafitauli, ona taumafai lea e faaaoga le poto ua tuuina atu e le Alii ia te oe e aveese ai; ma o le mea muamua o le a e iloaina, ua alu ese lou faanoanoa, ua e lagonaina le māmā, ua i ou luga le Agaga o le Alii, ma e foliga mai ua faamalamalamaina mea uma.⁶ [Tagai i le fautuaga 3 i le itulau 285.]

Pe a tatou vaai muamua i manaoga o isi, o le a sili atu ona vave le faaleleia atili o i tatou lava.

O se tasi o mea sili e mafai ona iloaina e se alii talavou po o se tamaitai talavou, i le taumafai ai ia avea ma tagata sili, o le avea lea o isi ma tagata sili foi; ma aua le amanaia le faaaluina o si taimi laitiiti e faaleleia atili ai isi. O le auala sili e faaleleia atili ai i tatou, o le faaauai lea o i tatou i le faia o mea lelei i isi. Ia teuina lenei mea i mafaufau i taimi uma.⁷

I le tulituliloaina ai o soo se ituaiga o aoaoga, e ao i se tagata ona faaauau ona galue, ma, a maea ona ave se kosi, e ao ona aveina se isi, ma faaauau ona galue ina ia mafai ona ia taulimaina lelei, ma o le a le mafai lava ona ia taulimaina lelei vagana ua ia faasoa atu ma faaaoga na faamatalaga a o ia punouai ia maua mai. Tuu atu ia te ia e alu e galue ma faapotopoto mai ana uo ma faasaga e tuuina atu ia i latou le malamalama e tasi ua ia mauaina, ona amata ai lea e ia ona iloaina o ia lava ua faamalamalamaina i luga o na mea, lea atonu o le a ia le mauaina lava, sei vagana ua faia e ala i le tulituliloaina o lena ala o le aoao atu ma le faasoa atu i isi o faamatalaga lea ua ia mauaina. Soo se tasi lava sa avea ma faiaoga, o le a malamalama lelei ia te au e uiga i lenei manatu. …

Ia manatua e soo se tagata, o loo i ai isi o loo i le pouliuli, ma e le i tele so latou agai i luma i le malamalama, atamai ma le poto, ma ia tuu atu ia te ia e faasoa atu lena malamalama, poto ma le mana i ana uo ma uso, i le tulaga ua sili atu ai lona malamalama nai lo i latou, ma, e ala i le faia o lena mea, o le a ia iloaina vave ai, o lona mafaufau o le a faalauteleina, ma o lena malamalama ma le poto lea sa ia mauaina, o le a faateleina ma vave atu ona faatupulaia. …

Pe a e manao e maua le agaga faauo ma uiga alofa o au uo, ia galue ma faamafanafana i latou faatasi ma lena malamalama ua e mauaina, i le manatua ai o na faamanuiaga na aumai mai le Atua, ma e ala i le faia o lenei mea, ua e faia ai le mea e tatau ona faia e tagata taitasi. …

O lenei, ina ia mafai e se tasi ona mauaina faamanuiaga sili ona maualuga ma silisili mo ia lava, ina ia maua le faamaoniga a le Silisili Ese, ma, ina ia faaauau pea ona alualu i luma i mea na e faatatau i le amiotonu, e ao ona ia faia mea uma i le tulaga sili na te mafaia. Ia alu atu ma galue ma naunau e ositaulagaina mo le manuia o ana uo. Pe a ia manao e atiina ae ia lava, o le aoaoga faavae sili e mafai ona ia faia ai, o le atiina ae lea o ana uo. …

… Ia faalauteleina o outou mafaufau ina ia malamalama ma vaai atu mo le manuia o au uo na o loo siomia ai oe, ma, i le tulaga ua i ai ia te oe le malosiaga e maua ai manuia mo au uo, ia faia lena mea, ma i le faia ai o lena tulaga, o le a e iloaina ai o na mea e te manaomiaina, o le a vave o’o mai i ou lima nai lo lou auauna ai i le taimi atoa e maua i latou mo oe lava, e aunoa ma le mafaufau i manaoga o au uo. Ou te iloa o se aoaoga faavae lelei ma taua lenei.⁸ [Tagai i le fautuaga 4 i le itulau 285.]

Pe a tatou ositaulaga mo le lelei o isi, o le a avea i tatou ma tagata sili atu ona amiotonu.

E tatau ona tatou lagonaina … o loo i ai isi e ese mai ia i tatou; e tatau ona tatou vaai i totonu o loto ma lagona o isi, ma ia sili atu le amioatua nai lo le tulaga o tatou i ai nei.

… E i ai se osigataulaga a i tatou lava e fai mo mea e fiafia i ai i latou ua tatou faifai mea faatasi. Tatou te vaaia lenei mea i le Faaola, faapea foi uso Iosefa, ma tatou te vaaia foi i lo tatou Peresitene o [Polika Iaga]. O Iesu, uso Iosefa, ma uso Polika, sa naunau i taimi uma e ositaulagaina mea uma na latou maua mo le lelei o tagata; o le mea lena na tuuina atu ai ia uso Polika le mana faatasi ma le Atua, ma le mana faatasi ma tagata, o le lagona o le osigataulaga mo ia lava, lea sa ia faaalia i taimi uma. E faapena foi ma isi; e pei lava ona latou naunau e ositaulaga mo isi, o le a faapena ona i ai le Atua i totonu o i latou, ma o faamanuiaga o lalolagi e faavavau ua i o latou luga, ma o i latou na o le a mauaina, e le gata i aia tatau o lenei lalolagi, ae o le a maua faamanuiaga mo le faavavau. E pei lava ona maua sina vaega e pei o oe … ia ositaulaga le tasi mo le isi, e pei o lena vaega, o le a e alualu i luma i mea a le Atua. O lenei, pe afai e te manao ia faateleina lou amioatua, ma, ina ia ulufale atu i le lagi, e te manao e tulituliloa lena ala lea e uia e agelu, o ē oi le lagi. Pe a e manao e fia iloa pe faapefea ona e alualu i luma, o le a ou tauina atu ia te oe, e maua i lou amioatua.

… E mafai e tagata taitoatasi ona fiafia i le i ai o le lagi e siomia i latou i nofoaga uma. E tatau ona tatou o atu e galulue malosi; e ao ona tatou galulue ma faatuina le lagi i luga o lenei fogaeleele, e tusa lava pe o i ai le amioleaga ua siomia ai tatou, o tiapolo ua siomia ai tatou, ma e ui i le amioleaga o loo i ai, e tatau pea lava ona tatou o atu e galulue ma faatuina le lagi i lenei lalolagi.

E le mafai e se tagata ona olioli i le lagi, seia vagana ua ia aoaoina le auala e maua ai, ma faaaoga ona aoaoga faavae. O lenei, se’i e mafaufau i nisi o tagata, ma se’i e toe mafaufau i tulaga sa siomia ai i latou i le 20 tausaga ua mavae, … ina ua latou mauaina se vaega patino o le olioli, filemu, o le fiafia i lena taimi e ui sa le lelei tulaga o mea na i ai. O le taimi nei, atonu ua latou mauaina ni tulaga lelei ma tupe e faamalieina ai o latou manaoga ma tulaga tatau faaletino, ae ana le mauaina e i latou ia uo, o lagona lelei o o latou uso, e le fiafia i latou, ma o le a sili atu nai lo le 20 tausaga talu ai.

… Tau ina ia faamanuia e le Alii outou uso ma tuafafine, ma tau ina ia outou manatunatu e uiga i nei mea, ma tau ina ia o tatou alolofa le tasi i le isi, ma ola ina ia faaeaina i tatou lava, e tusa ai ma le poto ma le agavaa o le a tuuina mai e le Alii, ma maua ai le loto talitonu o le tasi i le isi.⁹ [Tagai i le fautuaga 5 i le itulau 285.]

Fautuaga mo Suesuega ma le Aoaoina Atu

Mafaufau i nei manatu, a o e suesueina le mataupu, pe a o e sauni e aoao atu. Mo nisi fesoasoaniga, tagai i itulau v–vii.

Toe iloilo le tala o loo i itulau 277–9. O anafea na e vaai ai “o le taliaina o se manaoga se tasi, e masani ona taitai atu ai i le mauaina o le isi”?
Sa toe faamanatu mai e Peresitene Snow faapea o i tatou uma o fanau a le Atua (itulau 279–80). E faapefea e lenei malamalamaaga ona uunaia a tatou taga fai a le tasi i le isi? O a avanoa e ofoina mai e le Aualofa mo tamaitai e faia ai le lelei i isi? O a avanoa e ofoina mai e se korama a le perisitua mo alii e faia ai mea lelei i isi?
Mafaufau loloto i le palakalafa mulimuli i le itulau 281. Aisea e faateleina ai lo tatou fiafia, pe a tatou fesoasoani i isi ia maua le fiafia? E mafai faapefea e matua ona fesoasoani ia latou fanau e aoaoina lenei upu moni?
Aisea e te manatu ai tatou te tuputupu a’e i le poto, pe a tatou faasoa atu lo tatou malamalama i isi? (Mo nisi o faataitaiga, tagai i itulau 282–3.) O a mea na tutupu ia te oe, na faaalia ai le moni o lenei aoaoga faavae?
Suesue le vaega o loo amata i le itulau 283. Aisea e te manatu ai o faatinoga faigofie o le auauna atu, ua i ai le mana e faalatalata atili atu ai tatou i le lagi? A o e mafaufau loloto i savali o loo i lenei mataupu, manatunatu e uiga i auala e mafai ai e oe ona faia lou aiga o se nofoaga faalelagi sili atu.

Mau Talafeagai: Mataio 25:31–45; Luka 6:36–38; Mosaea 2:17; 4:14–27; MF&F 81:5; 82:3

Fesoasoaniga mo le Aoao Atu: “E sili atu le aveina o ni nai manatu lelei laiti, ma maua se talanoaga lelei—ma se aoaoga lelei—nai lo le faatopelau, i le taumafai ai e aoao atu upu taitasi o loo i totonu o le tusi lesona. … O se siosiomaga e le faatopetopea, e matua manaomia lava ona maua, pe afai e te manao ia i ai le Agaga o le Alii e faatasi i lau vasega” (Jeffrey R. Holland, “Aoao Atu ma le Aoaoina Mai i le Ekalesia,” Liahona, Iuni 2007, 56).

A o malaga ai e sopoia le setete o Iowa, sa maua e le aiga o Snow se fesoasoaniga mai se tasi na latou fesoasoani i ai i le aso na muamua atu.

“Ia faalauteleina o outou mafaufau ina ia malamalama ma vaai atu mo le manuia o au uo na o loo siomia ai oe.”