Mataupu 10

“O Mai i totonu o Malumalu”

“O le tulaga o mea ua tatala mai e le Atua i la tatou vaaiga e matagofie ma maoa’e; e lē mafai e le mafaufau ona malamalama ai. O mai i totonu o malumalu o le a matou faaali atu ia te outou.”

Mai le Soifuaga o Lorenzo Snow

E le i leva ona mae’a lona papatisoga ma le faamauga, ae amata ona auai atu Lorenzo Snow i fonotaga i le malumalu i Katelani. O iina, faatasi ai ma le Perofeta o Iosefa Samita ma isi taitai o le Ekalesia, sa ia mauaina ai faamanuiaga sili faaleagaga. I totonu o lana tusi o talaaga na ia lipotia ai: “O iina na matou maua ai le meaalofa o valoaga—o le meaalofa o le tautala i gagana—o le faamatalaina o gagana—o faaaliga vaaia ma miti ofoofogia na fefaasoaa’i—o pesega a aufaipese faalelagi sa faalogoina, ma o asiasiga matagofie o le mana faamalōlō, e ala i faauuga a toeaina, sa molimauina. O tagata mama’i sa faamaloloina—o le tutuli sa mafai ona toe lagona mea em}o le tauaso ina ia vaai ma le pipili ina ia savali, i le tele naua o taimi. Sa matuā faaalia manino faapea o se aafiaga paia ma mamana—o se siosiomaga faaleagaga na lilofia atoa ai lena maota paia.”¹

Sa fiafia tele Lorenzo Snow i le malumalu sā o Katelani, i lona silafia ai faapea “o le Atalii o le Atua, i Lona mamalu, sa faamamaluina lena malumalu e ala i Lona afio faatupu ai.” Ona sosoo ai lea mulimuli ane, sa matuā meia lava o ia ina ua tulai mo le taimi muamua i le pulelaa iina e aoao atu. “E le mafai e upu ona faamatalaina o’u lagona,” na ia saunoa ai, “ina ua ou tula’i, mo le taimi muamua, i se tasi o na pulelaa e lauga atu i le aofia—o se pulelaa i luga o le nofoaga tonu lea, e le i leva atu, na tulai ai lenei Tamalii paia—‘o lona lauao e paepae e pei o se kiona sinasina, o ona fofoga e pei o le mumū o se afi’—o le nofoaga foi lava lea na o’o mai ai Mose, Elisaia ma Elia, ma tuuina ifo ki o ō latou tisipenisione ia Iosefa Samita.” [Tagai i le MF&F 110.]²

I le tele o tausaga mulimuli ane, i le aso 6 Aperila, 1892, sa tula’i ai Peresitene Snow i luma o se tasi faapotopotoga, i le taimi la lenei, i luma o le malumalu o Sate Leki, lea toeitiiti mae’a. Pe tusa o le 40,000 le Au Paia o Aso e Gata Ai, na faapotopoto i le lotoā o le malumalu, ma le toeitiiti 10,000 isi “na faatumulia ai luga o fale ma nofoaga lata ane na mafai ona latou maimoa mai ai.”³ O le motu o tagata sa faapotopoto mo se sauniga e faamauina ai le maa aupitoaluga i luga o le malu pito maualuga o le malumalu sā. Mulimuli ane i lena aso, o le a faatuina ai le faatusa o le agelu o Moronae i luga o le maa aupitoaluga. E ala i le tofiga mai le Au Peresitene Sili, o Peresitene Snow, o lē sa avea ma Peresitene o le Korama a Aposetolo e Toasefululua, sa fuafuaina e taitaia le Au Paia i le Alaga o le Osana. A o ia faamalamalamaina le Alaga o le Osana i le faapotopotoga, sa ia faaalia lona fiafia ma lona naunautaiga tele mo galuega i le malumalu.

“O upu o le alaga, Osana!” sa ia saunoa atu ai, “ina ia faia i le taimi e faataatia ai pe mae’a ai ona faataatiaina le maa aupitoaluga i le asō, sa mua’i faailoaina e Peresitene Iosefa Samita i le malumalu i Katelani, ma na faaaoga ai iina i se faatasiga mamana, lea na faaalia ai le mana o le Atua, ma sa tatalaina mai ai i le usoga le faaaliga e uiga i le Silisili Ese. E lē o se faatulagaga masani lenei, ae moni lava—ma, matou te manana’o ina ia manino ona malamalama ai—o se alaga paia, ma e faaaogaina mo na o taimi faapitoa, e pei o lenei ua tatou i ai. Ma, matou te mananao foi ina ia matuā manino, faapea matou te manaomia uso ma tuafafine ina ia lē gata i le ta’u o upu, ae ia faatumulia o latou loto i le faafetai i le Atua o le lagi, o Lē ua ausia, e ala i la tatou filifiliga, lenei galuega mausalī ma le lē ma faatusaina. Tolu sefulu-iva tausaga talu ai i le asō, o le maa faavae—le maa tulimanu—o lenei malumalu sa faataatiaina, ma i le toe tomanatu ai ma le mafaufau loloto ai i faamanuiaga na tuuina ifo e le Atua i ona tagata, i le tele o nei tausaga ua mavae talu mai lena taimi, matou te mananao i le Au Paia ina ia lagonaina, pe a latou alagaina le alaga, ia faapea ona sau mai o latou loto. Ia faatumulia o outou loto i le agaga faafetai.” Sa ia faataitaia le Alaga o le Osana ma toe faapea atu, “O lenei, pe a tatou o atu i luma o le malumalu, ma faalogoina lenei alaga ua faatinoina, matou te mananao i alii ma tamaitai taitasi ina ia alagaina nei upu i le mea e gata ai o latou leo, ina ia gatete fale taitasi o i ai i lenei aai, o tagata o i ai i vaega taitasi o lenei aai ia lagonaina, ma talosia ia o’o atu ai i lalolagi e faavavau”⁴

O le lipoti o loo i lalo o le sauniga o le maa aupitoaluga, ua faaalia ai le migao ma le fiafia tele o le Au Paia i lenei mea na tupu:

“I le aulia ai o le aoauli, na la’a atu i luma o le tulaga Peresitene Wilford Woodruff, i le mea sa mafai ai ona iloa mai uma e le aofia na faapotopoto, o e sa faatalitali ma le filemū toto’a. Sa i ai se fiafiaga sili i loto o tagata, a o ia saunoa atu:

“Faalogo maia, outou uma le aiga o Isaraelu, ma outou malo uma o le lalolagi! O le a tatou faataatia nei le maa pito i luga o le Malumalu o lo tatou Atua, o lona faavae na faataatiaina ma faapaiaina e le perofeta, tagatavaai, ma talifaaaliga o Polika Iaga.’

“Ona oomiina lea e Peresitene Woodruff se ki faaeletise, ma se’e atu ai le maa aupitoaluga o le malumalu, ma mau lelei i lona nofoaga. O le vaaiga na sosoo ai, e lē mafai e upu ona faamatalaina. O le Peresitene o le Toasefululua, le Aposetolo o Lorenzo Snow, na savali mai i luma ma taitaia le fasefulu afe o le Au Paia i le alalaga faatasi ai:

“Osana! osana! osana! i le Atua ma le Tamai Mamoe. Amene, amene, ma amene!

“Osana! osana! osana! i le Atua ma le Tamai Mamoe. Amene, amene, ma amene!’

“O alaga taitasi, sa faia faatasi ma le tāloina o solosolo. … O fofoga o le faitau afe o tagata sa susū i loimata ona o le olioli tele. O le fogaeleele sa foliga mai ua gatete i le malosi o le leo sa alu atu ma taia mai i atumauga o loo siomia ai. O se vaaiga sili atu ona matagofie nai lo le sauniga o le faataatiaina o le maa aupitoaluga o le malumalu, e le o faamauina i le talafaasolopito. Sa le i uma lelei atu le alaga osana, ae lagiina e le faapotopotoga tele le viiga musuia ma mamalu, ‘Le Agaga o le Atua, ua pei o le afi.’”⁵

Sa faapaiaina e Peresitene Woodruff le malumalu o Sate Leki, i le atoa ai o le tausaga mulimuli ane, i le aso 6 Aperila, 1893, i le mavae ai ona galulue le Au Paia mo le 40 tausaga e faamae’aina. O Peresitene Lorenzo Snow sa valaauina e avea ma peresitene muamua o lena malumalu, ma sa ia faataunuuina lenei valaauga seia o’o ina avea ma Peresitene o le Ekalesia ia Setema 1898. O se ata tusi o Peresitene Snow o loo tautau i le malumalu i Sate Leki i le asō, e faamanatu ai lona tuutō atu i le mea sa ia ta’ua o le “galuega sili ua tatou faataunuuina” i totonu o le maota o le Alii.⁶ [Tagai fautuaga 1 i le itulau 155.]

Aoaoga a Lorenzo Snow

I totonu o malumalu, tatou te a’oa’o ai e uiga i faamanuiaga ofoofogia ua saunia e le Atua mo le au faatuatua.

O avanoa ua saunia e le Atua mo i tatou, e matagofie ma maoa’e; e lē mafai e le mafaufau ona malamalama i ai. O mai i totonu o malumalu, o le a matou faaali atu ai ia te outou. O le toatele o outou, ou te manatu, sa i ai iina, ma ua faalogoina mea ofoofogia ua saunia e le Atua mo i latou e alolofa ia te Ia, ma tumau ai i le faatuatua e o’o i le gataaga. …

… Ua ia saunia mea uma mo le Au Paia o Aso e Gata Ai e mafai ona latou moomoo i ai ma mafaufauina, ina ia mafai ona faataunuuina lo latou fiafiaga sili i le faavavau atoa.⁷ [Tagai fautuaga 2 i itulau 155.]

E ala i sauniga o le malumalu, tatou te fausiaina ai sootaga paia lea e mafai ona fusia ai faatasi aiga mo le taimi nei ma le faavavau.

Manatunatu i folafolaga e tuuina atu ia te oe i le sauniga matagofie ma mamalu lea e faaaogaina i le feagaiga o le faaipoipoga i le Malumalu. Pe a tuufaatasia ni Au Paia o Aso e Gata Ai se toalua i le faaipoipoga, e tuuina atu folafolaga ia i laua, e faatatau i a laua fanau mai le vavau e o’o i le faavavau.⁸

Ua tatou mauaina le tele o le poto ma le malamalama i mea ia e maofa ai le lalolagi, pe a tatou talanoaina. Ua tatou aoaoina e faapea, i totonu o malumalu, e mafai e i tatou ona fausia sootaga lea e lē matatalaina i le oti, ae, e o’o atu i le faavavau; sootaga paia lea e fusia ai aiga mo le taimi nei ma le faavavau.⁹ [Tagai fautuaga 3 i le itulau 155.]

I totonu o malumalu, tatou te maua ai sauniga o le faaeaga, e fai ma sui o o tatou aiga ua maliliu.

O atalii ma afafine taitasi o le Atua, o le a maua le avanoa manaomia mo le faaeaga ma le mamalu. … E tasi lava le auala e mafai ai ona maua le faaeaga ma le mamalu. E tatau ona papatisoina i tatou mo le faamagaloga o agasala ma faae’e lima i o tatou luga mo le mauaina o le Agaga Paia. O nei sauniga ma isi, e matuā manaomia lava mo le faaeaga ma le mamalu; ma, mo tagata taitoatasi na soifua i nofoaga sa le’i maua ai le talalelei, o nei mea e mafai ona faia e a latou uo. Ua tatou o mai i le lalolagi i le taimi nei ina ia faia nei mea—mo le mea itiiti e mafaia, o se tasi o faamoemoega sili o lo tatou o mai. E lē mafai ona lava lo matou tuuina atu o le faamamafa silisili i le taua o lenei galuega.¹⁰

E le’i faafuase’i lo tatou o mai i lenei lalolagi. Sa tatou o mai mo se faamoemoega faapitoa, ma e lē taumateina sa i ai faatulagaga patino i le isi olaga sa tatou ola ai, ina ia tatou o mai i lenei olaga. O le mea lea, i totonu o malumalu, tatou te faataunuuina ai se galuega sili, e tusa ma o tatou auaiga ua maliliu. Tatou te maua, mai lea taimi i lea taimi, asiasiga taua faapea ua faamaoniaina e le Atua lenei galuega o loo tatou faatinoina i totonu o o tatou malumalu. O faaaliga sili ona lē mafaamatalaina, ua maua lea e tagata taitoatasi o loo galulue mo o latou augatamā. O se galuega mausalī lea ua tatou faataunuuina. E faitau afe tagata ua faapea ona papatisoina mo o latou tagata ua maliliu, i le faagasologa o le alualu i luma o a tatou galuega i totonu o malumalu. …

O le taimi nei, i totonu o ō tatou malumalu, tatou te faatagaina ai tagata e o mai i totonu, pe a mae’a ona sailia o ō latou augatamā, po o le a lava le mamao i tua, ma, ina ia papatisoina mo ō latou tamā, tamā matua, ma tamā o tamā o ō latou tama, ma faapena ai lava, po o le a lava le mamao e mafai ona latou sailia ai gafa o ō latou aiga. Se i tatou aumaia le tulaga o se alii talavou amio lelei sa soifua a o le’i tuuina mai le talalelei i le fanauga a tagata. … Sa ia faaipoipo atu i se avā, ma tausia se aiga; ae sa le’i mauaina lava e ia le avanoa o le taliaina o le talalelei, e pei ona maua e oe ma a’u. Peitai, sa ia a’oa’o lona aiga i aoaoga faavae o le ola mamā, ma sa agaalofa ma agalelei o ia i lana avā ma le fanau. O le a se isi mea e mafai ona ia faia? E lē tatau ona faafanoina o ia, ona o lona lē mauaina o le talalelei; aua sa le’i i ai se talalelei. E lē tatau ona ia lē mauaina lana avā, aua ina ua faaipoipo atu ia te ia, sa lē mafai ona ia alu atu i se malumalu, ma faamauina ai lana avā ia te ia mo le taimi nei ma le faavavau. Sa ia faatinoina mea uma, e tusa ma le malamalama sili sa ia mauaina, ma sa faapea ona faaipoipo i laua mo le taimi nei, e tusa ma tu ma aga a lena atunuu. Matou te taliaina lena faaipoipoga, faamamaluina e tusa ma tulafono a lona atunuu. … Matou te faamauina fanau i o latou matua, ma avā i a latou tane, o i latou uma i lena faatulagaga.¹¹

Na fetalai le Faaola i se tasi tulaga patino, “E moni, e moni, ou te fai atu ia te outou, e o’o i le aso, ua o’o nei foi i ai, e faalogo mai ai e ua oti i le leo o le Atalii o le Atua;” ma sa Ia faaauau ma faia lenei faamatalaga matagofie: “o e faalogo ai foi, e ola ai i latou.”[Ioane 5:25.] Ou te talitonu, e toatele i latou, o e o le a lē taliaina le upu moni. O le a latou faalogoina le leo o le Atalii o le Atua; o le a latou faalogo i le leo o le Perisitua a le Alo o le Atua, ma o le a latou mauaina le upu moni ma ola ai. O nei uso ma tuafafine, o e o loo galulue malosi i totonu o malumalu, o le a faamamaluina i le avea ai, i se isi tulaga, ma faaola mo ō latou auaiga ma uo, lea ua latou faatinoina ai nei sauniga.¹² [Tagai fautuaga 4 i le itulau 155.]

E tatau ona tatou tauivi e faia galuega o le malumalu ma talafaasolopito o aiga, e tusa lava pe manaomia ai se osigataulaga mai ia i tatou.

O lenei, e tatau ona avea ma se sini autū i mafaufau o alii ma tamaitai taitasi, ina ia o mai i totonu o ō tatou malumalu ma faatinoina lenei galuega. O se galuega sili, ma o se galuega taua fo’i. Pe a tatou toe foi atu i le isi olaga, ma maua ai a tatou uo ua maliliu o ola ai iina, afai tatou te le’i faia le galuega manaomia mo lo latou faaeaga ma le mamalu, o le a lē lagonaina e i tatou le fiafia sili, ma o le a lē avea ma se feiloaiga manaia.

E lē tatau ona tatou faatalitali mo avanoa ina ia fiafia ma malilie faatasi ai i taimi uma; ae e tatau ona tatou tauivi, e tusa lava pe manaomia ai sina osigataulaga mai ia i tatou, ina ia tuuina ai i tatou i se tulaga e faatino lenei galuega. … Matou te matuā mananao lava i uso ma tuafafine ina ia aua ne’i lē amanaiaina lenei galuega taua. Ua outou silafiaina ea, o le a le galuega autū i le taimi o le afe tausaga o le malologa [le Meleniuma]? O le galuega lea ua matou taumafai e uuna’i le Au Paia o Aso e Gata Ai ina ia faatinoina i le taimi nei. O le a fausiaina malumalu i lenei lalolagi, ma o le a o atu i ai uso ma tuafafine, ma atonu e galulue ai i le po ma le ao, ina ia faatelea’iina le galuega ma faataunuuina ai galuega manaomia, a o le i mafai e le Atalii o le Tagata ona tuuina atu Lona malō i Lona Tamā. O lenei galuega e ao ona faataunuuina, a o le i mafai ona afio mai le Atalii o le Tagata ma taliaina Lona malo, ina ia tuuina atu i Lona Tamā.¹³ [Tagai fautuaga 5 i le itulau 155.]

Pe a tatou ulu atu i le malumalu ma se loto mamā, e faamanuiaina e le Alii i tatou e tusa ma mea ua Ia silafiaina e sili ona lelei mo i tatou.

Tatou te lagonaina, pe a tatou ulu atu i nei malumalu, e sili atu ona atoatoa lo tatou fiafia i le Agaga o le Alii iina, nai lo soo se isi lava nofoaga. O maota ia o le Alii, ma o Lana galuega sili ona taua, ua faataunuuina ai i totonu o ō latou puipui. …

… Ua faamalieina a’u faapea, pe a ulu atu tagata i totonu o nei malumalu, latou te lē [tuua] e aunoa ma se lagona sili atu ma se naunautaiga i o latou mafaufau ina ia toe faasili atu a latou galuega nai lo mea na latou faia muamua. O le lagona lena matou te mananao i le Au Paia ina ia latou mauaina. …

… Ia faatuatua, uso e ma tuafafine, ma ia sogasogā; o mai i le malumalu ma faia a outou galuega iina, ma o le a outou maua le olioli, ma saunia lelei ai e teena mea lē manuia a le lalolagi.¹⁴

O i latou o e [ulu atu i le] malumalu ma se loto mamā ma se agaga maualalo [o le a] lē o ese mai ai e aunoa ma le mauaina o faamanuiaga ese, e ui lava o nei faamanuiaga i nisi, pe atonu o le tele o taimi atonu e ese ai mai mea ua faamoemoeina e nisi. … O nisi o le Au Paia, atonu o loo vaai atu mo le o’o mai o asiasiga a agelu … po o le faamoemoe e vaaia fofoga o le Atua. Atonu e lē aogā mo oe ia mauaina ia ituaiga asiasiga. Ua silafia e le Alii le mea e sili ona lelei mo tagata taitoatasi, ma o le a fetuunaia Ana meaalofa mo le mauaina o le lelei silisili mo i latou e taliaina. Atonu e alagatatau ona tulimatai atu, faapea o tagata faatuatua taitasi o le Au Paia, e ulu atu i lena maota, o le a maua se faamanuiaga, lea o le a tuuina atu ai le tulaga faamalieina i lē mauaina lena faamanuiaga. A o le’i malaga ese atu i latou o e ulufia le malumalu, e i ai se mea o le a tupu a’e i o latou loto ma malamalamaaga, lea [o le a] aogā i o latou olaga i le lumana’i. Mo lenei, i le avea ai ma Au Paia o Aso e Gata Ai faamaoni, ua tatau ai mo i latou.¹⁵ [Tagai fautuaga 6 i le itulau 155.]

Fautuaga mo Suesuega ma le Aoaoina Atu

Mafaufau i manatu nei, a o e suesueina le mataupu, pe, a o e sauni e aoao atu. Mo nisi fesoasoaniga, tagai i itulau v–vii.

Faitau le tala i le sauniga o le maa aupitoaluga o le malumalu o Sate Leki (itulau 147–50). Afai sa e auai i se faapaiaga o se malumalu, manatunatu e uiga i le tulaga o lou lagona i lena taimi. Pe a tatou auai i se Alaga o le Osana, o le a le mea tatou te ta’uina atu i le Alii?
Toe iloilo le valaaulia a Peresitene Snow e “o mai i totonu o malumalu” (itulau 150). Manatunatu e uiga i le auala e mafai ai ona e taliaina lenei valaaulia, ma le auala atonu e mafai ai ona e tuuina atu lenei valaaulia i auaiga ma uo.
A o e suesueina le vaega lona lua i le itulau 150, mafaufau loloto i faamanuiaga e mafai ona o’o mai e ala i le mauaina o sauniga o le malumalu, ma le osia o feagaiga faale-malumalu. E faapefea ona uunaia e nei faamanuiaga oe ma lou aiga?
Faitau le vaega lea e amata i le pito i lalo o le itulau 151. O a auala tatou te galulue ai faapei o “faaola mo o [tatou] auaiga ma uo” pe a tatou faatinoina lenei galuega? O a punaoa ua tuuina mai e le Ekalesia e fesoasoani ai ia i tatou?
O a mea e mafai ona tatou faia ina ia tuu atu ai i galuega faalemalumalu ma talafaasolopito o aiga, le mafaufau ma le taimi, e tatau ai? (Toe iloilo le vaega o loo amata i le pito i luga o le itulau 153.)
O a nisi o faamanuiaga faaleagaga tau le tagata lava ia, e mafai ona tatou mauaina pe a tatou auai i galuega faalemalumalu? (Mo nisi o faataitaiga, tagai i itulau 153–4.)

Mau Talafeagai: MF&F 97:15–17; 109:1–23; 128:15–18; 132:19; 138:57–59

Fesoasoaniga mo le Aoao Atu: “E mafai ona e fesoasoani ia i latou o loo e aoaoina ia lagonaina le talitonu sili atu ia i latou lava, e uiga i lo latou agavaa e auai i se talanoaga, pe a e tali atu i se tulaga lelei i soo se faamatalaga faamomoiloto e tuuina mai. Mo le faataitaiga, atonu e mafai ona e faapea atu, ‘Faafetai lava mo lau tali. E ese lou magafagafa’ … po o le, “O se faataitaiga lelei tele lenā’ po o le, Ou te faafetai lava mo mea uma sa e talanoa mai ai i lenei aso’” O Le Aoao Atu, E leai se Isi Valaauga e Sili Ai, 64).

I le aso 6 April, 1892, e faitau afe tagata na faapotopoto e molimauina le faatuina o le maa aupitoaluga, i luga o le tumutumu aupito maualuga o le malumalu i Sate Leki.

E mafai e matua ona fesoasoani i a latou fanau ina ia saunia e talia le valaaulia, e o mai i totonu o le malumalu.