Folasaga

Ua faatulagaina e le Au Peresitene Sili ma le Korama a Aposetolo e Toasefululua le faagasologa o Aoaoga a Peresitene o le Ekalesia e fesoasoani ia te oe ia loloto atili ai lou malamalamaaga i le talalelei toefuataiina ma faalatalata atu ai i le Alii e ala i aoaoga a perofeta o aso e gata ai. A o faaopoopo isi voluma i lenei faagasologa, o le a e faatupuina ai se faaputuga o tusi o punaoa o le talalelei i lou aiga. O voluma o lenei faagasologa ua mamanuina ia faaaoga mo lau lava suesuega faapea aoaoga mo le Aso Sa. E mafai ona fesoasoani ia te oe e saunia isi lesona po o tautalaga ma tali fesili e uiga i aoaoga faavae o le Ekalesia.

O lenei tusi ua faapitoa i aoaoga a Peresitene Lorenzo Snow, o lē sa auauna o le Peresitene o Le Ekalesia a Iesu Keriso o le Au Paia o Aso e Gata Ai mai i le aso 13 Setema, 1898, e oo i le aso 10 Oketopa, 1901.

Suesuega Faaletagata Lava Ia

A o e suesueina aoaoga a Peresitene Lorenzo Snow, saili ma le agaga tatalo ia musumusuga a le Agaga Paia. O fesili i le faaiuga o mataupu taitasi, o le a fesoasoani ia te oe e te malamalama ai i aoaoga a Peresitene Snow, ma faaaoga ai i lou olaga. A o e suesueina nei aoaoga, atonu e te manao e manatunatu i auala e faasoa atu ai na aoaoga i tagata o le aiga ma uo. O lenei faiga o le a faamalosia ai lou malamalamaaga i mea ua e faitauina.

Aoao Atu mai le Tusi Lenei

Ua mamanuina lenei tusi mo le faaaogaina i le aiga ma le lotu. E mafai ona fesoasoani taiala nei ia te oe e aoao atu ai mai le tusi.

Sauni e Aoao Atu

Saili i le taitaiga a le Agaga Paia, a o e sauni e aoao atu. Suesue ma le agaga tatalo mataupu ua atofa atu, ina ia mautu ai lou malamalamaaga i aoaoga a Peresitene Snow. O le a e aoao atu ai ma le loto faamaoni sili atu ma le mana, pe a uunaia oe lava ia e ana upu (tagai MF&F 11:21).

Afai o loo e aoaoina atu se lesona a le Perisitua Mekisateko po o le Aualofa, e le tatau ona e tuu esea le tusi lenei, pe saunia foi lesona mai nisi punaoa. Filifili ma le agaga tatalo mai le mataupu ia aoaoga e te lagona o le a sili ona fesoasoani ai ia i latou o loo e aoaoina. O nisi mataupu e tele atu ‘anomea o loo i ai nai lo mea e mafai ona talanoaina i le taimi faatulagaina o le vasega.

Faamalosiau i tagata auai e suesue le mataupu a o le i faia le lesona ma o mai ma aumai le tusi. Afai latou te faia lena mea, o le a sili atu ona saunia i latou e auai i se talanoaga ma fefaamalamalamaa’i ai e le tasi le isi.

Folasia le Mataupu

A o e folasia atu le mataupu, ma a o faagasolo le lesona, taumafai e fausia se siosiomaga e mafai ai e le Agaga ona pa’i atu i loto ma mafaufau o i latou o loo e aoaoina. Ina ia amata le lesona, fesoasoani ia i latou o loo e aoaoina, e taulai atu i aoaoga o loo i totonu o le mataupu. Mafaufau i manatu nei:

Faitau ma talanoaina le vaega ua faaulutala “Mai le Soifuaga o Lorenzo Snow” i le amataga o le mataupu.
Talanoaina se ata po o se mau mai le mataupu.
Usu faatasi se viiga e fetaui i ai.
Faasoa se aafiaga puupuu faaletagata lava ia e uiga i le autu.

Taitai se Talanoaga e Uiga i Aoaoga a Peresitene Snow

A o e aoao atu mai lenei tusi, valaaulia isi e faasoa mai o latou manatu, fai ni fesili, ma aoao e le tasi le isi. Pe a latou auai ma le mataalia, o le a sili atu ona latou saunia e aoao ma maua faaaliga faaletagata lava ia. Ia faatagaina talanoaga lelei e faaauau, ae le o le taumafai ia faia e oe aoaoga uma. Ina ia uunaia talanoaga, faaaoga fesili o loo i totonu o mataupu taitasi. O faamatalaga o loo i ai i mataupu taitasi, e faatatau i na fesili. Atonu foi e te manao e faia ni au lava fesili, aemaise mo i latou o loo e aoaoina.

O vaega ia e filifili mai ai e te ono maua ai ni manatu faaopoopo:

Talosagaina tagata e auai e faasoa mai mea ua latou aoaoina mai a latou suesuega faaletagata lava ia o le mataupu. E ono fesoasoani le faafesootai o nisi o le vasega a o faagasolo le vaiaso ma talosagaina i latou e sauniuni e faasoa mai mea ua latou aoaoina.
Tofia tagata auai e faitau fesili filifilia mai le faaiuga o le mataupu (taitoatasi pe i ni vaega laiti). Talosaga ia i latou e saili aoaoga o i le mataupu e fesootai ma fesili. Ona valaaulia lea o i latou e faasoa mai o latou manatu ma lagona i le vasega.
Faitau faatasi ni saunoaga filifilia a Peresitene Snow mai le mataupu. Talosagaina tagata auai e faasoa mai faataitaiga mai tusitusiga paia ma mai o latou lava aafiaga e faapupula mai ai mea sa aoao mai e Peresitene Snow.
Fai atu i tagata auai e filifili se vaega e fiafia i ai ma faitau leleoa. Valaaulia i latou i ni vaega taitoalua pe taitoatolu, ma i latou o e sa filifiliaina foi le vaega lena, ma talanoa i mea na latou aoaoina.

Uunaia le Fefaasoaai ma le Faaaogaaga

O aoaoga a Peresitene Snow o le a sili atu ona i ai lona uiga mo tagata auai, o ē faasoaina atu na aoaoga i isi, ma faaaoga i o latou olaga. Mafaufau i manatu nei:

Fesili atu i tagata auai pe mafai faapefea ona latou faaaogaina aoaoga a Peresitene Snow i o latou tiutetauave o ni matua, po o faiaoga o aiga, po o faiaoga asiasi.
Uunai tagata auai e faasoa atu nisi o aoaoga a Peresitene Snow i tagata o le aiga ma uo.
Valaaulia tagata auai e faaaoga mea ua latou aoaoina, ma faasoa mai o latou aafiaga i le amataga o le vasega e sosoo ai.

Faaiu le Talanoaga

Otooto faapuupuu le lesona, po o le fai atu i ni tagata auai se toatasi pe toalua e faia lena mea. Molimau atu e uiga i aoaoga sa outou talanoaina. E mafai foi ona e valaauliaina isi e faasoa mai a latou molimau.

Faamatalaga e faatatau i Punaoa o Loo Ta’ua i Lenei Tusi

O aoaoga i totonu o lenei tusi, o upusii sao ma lauga a Peresitene Lorenzo Snow, o tusiga na lolomia, tusi, ma api talaaga. I upusii uma lava mai ana tusi ma api talaaga, o faailoga o le gagana, sipelaga o upu, faaaogaina o mataitusi talafeagai, ma le faapalakalafaina, ua uma ona faatulagina tutusa. O upusii mai punaoa lolomi, ua faatumauina le faaaogaina o faailoga, sipelaga o upu, faaaogaina o mataitusi talafeagai, ma le faapalakalafaina o punaoa autu, vagana ua tatau ona faia ni suiga faalefaatonu po o le faalomitusi ina ia faamanino atili ai le faitauina. Mo lea mafuaaga, atonu ua e vaaia nai eseesega laiti i le tusi. Mo se faataitaiga, o le upu talalelei o loo i mataitusi laiti i nisi upusii ma mataitusi tetele i isi.

E le gata i lea, e masani ona faaaogaina e Peresitene Snow upu e pei o le tamaloloa, tamaloa, po o le tagata e faasino i tagata uma, o alii ma tamaitai. E faaaoga soo lava e ia soanauna ia (he), lana/lona (his), ma leia (him) e faasino i itupa uma e lua. O se faiga masani lea i le gagana o lona vaitaimi. E ui i eseesega i nei tulafono o gagana ma faaaogaaga e sili ona lata mai, o aoaoga a Peresitene Snow e faatatau lava i tamaitai ma alii.