Mataupu 21

Onosaia ma le Faatuatua o Tofotofoga ma Mea Faafeagai

Afai tatou te faatuatua ma usitai i taimi o tofotofoga, o le a faamalolosia i tatou e le Alii ma faaaoga puapuaga e fesoasoani ia i tatou e sauniuni ai mo le mamalu selesitila.

Mai le Soifuaga o Wilford Woodruff

“Ua tatou saogalemu pe afai lava tatou te faia lo tatou tiute,” o le aoaoga lea a Peresitene Wilford Woodruff. “E le afaina po o a tofotofoga ma faafitauli tatou te ui ai, o le a faatasi mai le aao o le Atua ma i tatou ma lagolago i tatou.”¹ I le aoaoina atu o lenei mataupu faavae, sa saunoa ai Peresitene Woodruff mai ona aafiaga. Sa ia onosaia sauaga faalelotu ma faapolokiki, o sauaga a le au fouvale, o le faatautee i le galuega faafaifeautalai, ma’i, maliliu o tagata o aiga ma uo, ma tofotofoga o aso uma o le olaga. Ae sa ia tali atu ma le faatuatua i na mafatiaga nai lo le le mautonu, ma le talitonu i folafolaga a le Alii ma maua ai le malosi i lana lava molimau i le talalelei.

Ia Novema 1835, a o auauna Wilford Woodruff i se misiona i le itu i saute o le Iunaite Setete, sa maua ai e ia ma ana soa sa latou malaga le taitaiga a le Alii i se taimi o faigata. Sa ia tusia: “A o matou faimalaga i le po. … sa osofaia i matou e se matagi malosi ma le timu. Na matou oo atu i se tamai alia na matuai maualuga lava ona o timuga, lea sa le mafai ai ona matou sopoia e aunoa ma le feausi o a matou solofanua. … Sa matou malilie matou te agai i le ulu o le alia, ma saili se vaega papa’u e mafai ona matou sopo ai; ae o le matou taumafaiga lea na matou se ai i le loloto o le pouliuli ma le malosi tele o le matagi ma le timu, ma le mafiafia o le vaomatua, i le lotolotoi o timuga, matagi, o vaitafe ma laau pau’u. Sa toeitiiti faaluasefulu ona matou sopoia ni vaitafe. … Ae sa alofa mutimutivale le Alii ia i matou i le lotolotoi o o matou faafitauli, aua a o matou ausulusulu solo ma tautagotago i le pogisa, faapea le tulaga lamatia o matou ma nai a matou manu, ma le tataieseina mai o i matou mai ni tifato maualalalo, sa faafuasei ona susulu mai se malamalama ma siomia ai i matou, ma faailoa mai ai le matautia o lo matou tulaga ua oo i ai, o le taimi lea ua matou oo tonu lava i luga o le augutu o se vanu matua loloto lava. Sa faaauau pea ona i ai le malamalama ia i matou seia oo ina ua matou taunuu atu i se fale, ma maua ai le auala sa’o.”²

I sana faamatalaga e uiga i lenei aafiaga, sa faapea mai ai Peresitene Woodruff, “O lea sa matou faimalaga atu ai pea i le ala ma le olioli, e ui lava sa toe oo mai le pouliuli ma faaauau pea timuga.”³ E faailoa mai ai i lenei faamatalaga lana auala e faafetaiaia ai faigata o le olaga. Sa malaga pea o ia i lona ala, ma le olioli i faamanuiaga a le Alii e ui lava sa feagai pea ma faigata.

Aoaoga a Wilford Woodruff

O tofotofoga ma mea faafeagai tatou te maua ai le poto masani ma e fesoasoani foi tatou te sauniuni ai mo le mamalu selesitila.

E le taumateina o se mea e maofa ai i le tele o taimi, i mafaufau o alii ma tamaitai, le mafuaaga na tuuina mai ai e le Atua ia alii ma tamaitai i se lalolagi faapenei, aisea na te tuua ai lana fanau e oo atu i faanoanoaga ma mafatiaga iinei i la le tino. Ua faaalia mai e le Alii se mea ia i tatou e uiga i lenei mataupu, ma ua lava mea ua tatou aoaoina e uiga i ai ma iloa ai le manaomia o lenei mea.⁴

E foliga mai ua matuai manino lava le faamoemoe o le Atua i le faatagaina o Lana Au Paia e matua tofotofoina ma suesueina, ina ia mafai ai ona latou faamaonia lo latou faatuatua ma iloa ai uiga o le faavae o loo fausia ai i latou i luga.⁵

E ui o nisi taimi tatou te lagona ai e pei foi ona tatou lagona i aso ua te’a ma mavae atu, lo tatou muimui pe a tatou fetaiai ma faiga saua, o sauaga, ma mafatiaga, ae ou te fia faapea atu i o’u uso ma tuafafine o le tofi lenei o le Au Paia a le Atua. … Ou te lei faitau lava e uiga i le nuu o le Atua i soo se augatupulaga o ola ai, e pei ona fai mai ai tagata o isi lotu, i se olaga faigofie ma le matagofie, e aunoa ma se mea faafeagai o soo se ituaiga. … Ua valaauina i tatou ina ia ui atu i tofotofoga i le tele o taimi, ma ou te manatu e le tatau ona tatou muimui, aua afai e leai ni o tatou tofotofoga o le a faigata ona tatou lagonaina lo tatou agavaa e nonofo ai i le isi lalolagi faatasi ma Perofeta ma Aposetolo o e sa vavaeeseina, faasatauroina, ma mea faapena, mo le afioga a le Atua ma le molimau ia Iesu Keriso.⁶

E matua le mafai lava. … ona avea le Au Paia a le Atua ma suli o se malo selesitila e aunoa ma le tofotofoina pe mafai ona latou tumau i feagaiga a le Alii pe leai.⁷

O Iesu… sa matua oo ifo i lalo o mea uma ina ia mafai ona faaeaina o ia i luga o mea uma ma malamalama ai i mea uma. E leai lava se tagata ua oo i se tulaga maualalo ifo nai lo le Faaola o le lalolagi. Na soifua mai i se falepovi, taoto i se moega lauvao, sa malaga mai o ia iina ia oo atu ai i le satauro e ala i mafatiaga e filogia ma le toto ia oo atu ai i se nofoalii o le alofa tunoa; ma i lona soifuaga uma sa leai se mea o se natura faalelalolagi e ono aoga mo ia. O lona soifuaga atoa sa mativa, puapuaga, tigaina, mafatia, galue, tatalo, ootia ma le faanoanoa seia oo ina maliu i luga o le satauro. Ae o ia lava o le alo ulumatua o le Atua ma le Togiola o le lalolagi. E mafai ona fesili pe aisea ua faatagaina ai e le Alii lona Alo e afio mai iinei e soifua ai ma maliu ai e pei ona sa ia faia. O le taimi tatou te oo atu ai i le lalolagi o agaga, ma aveeseina le veli ona mafai loa lea ona tatou malamalama i mafuaaga o nei mea uma.

I mea ua tuuina mai faapea ma le puipuiga ua tuuina mai e le Atua mo le tagata e foliga mai ua tatou fananau mai ina ia tatou mafatia i tiga, mafatiaga, faanoanoaga ma tofotofoga; o le mea lea ua folafola mai e le Atua e tatau ona oo i ai le tagata; ma afai tatou te faaaogaina tatau lenei tulaga e faataitai ai, o le aafiaga tatou te maua mai ai o le a faamaoniaina o se faamanuiaga maoae mo i tatou, ma a tatou mauaina le tino ola pea ma le ola e faavavau, faaeaina, malo, nofoalii, pulega ma mana faatasi ai ma faamanuiaga uma lava o le atoatoaga o le talalelei a Keriso, o le a tatou malamalama ma manino ai i le mafuaaga sa valaauina ai i tatou e ui atu i fetauaiga faifaipea a o tatou ola ai i ni nai tausaga i la le tino.⁸

O le a lava se mea e mafai ona tatou faia pe mafai ona tatou mafatia ai, e ono faatusatusa i le maoae o le tele o malo, nofoalii, ma pulega ua faaalia mai e le Atua ia i tatou?⁹

I le taua i le va o le pouliuli ma le malamalama, o le a manumalo le Alii ma Lona nuu.

O le tetee i le Atua ma Lana Keriso, o le tetee i le malamalama ma le upumoni sa i ai lava mai i le amataga e oo mai i le taimi nei. O le taua lenei na amataina i le lagi, ma o loo i ai i taimi uma lava, ma o le a faaauau pea seia oo i le aso gataaga, seia oo ina nofo tupu o Ia o le o loo i ai le aia e nofo tupu ai, pe a oo i le taimi e afio mai ai o Ia i ao o le mamalu e tauia tagata taitoatasi uma e tusa ai ma a latou galuega na faia i le tino iuvale.¹⁰

O le agaga o le taua o loo aliali mai i aso nei sa i ai i augatupulaga uma a o i ai le perisitua i luga o le fogaeleele. Sa i ai lava i taimi uma se taua i le va o le malamalama ma le pouliuli, o le Atua ma le tiapolo, o le au paia ma e agasala, mataupu faavae sao ma aoaoga faavae sese. O i tatou foi o loo i ai i se taua faatasi ma uiga faatiapolo o o tatou lava natura.¹¹

E lua lava ni mana o i luga o le fogaeleele ma le lotolotoi o tagata o le lalolagi—o le mana o le Atua ma le mana o le tiapolo. I lo tatou talafaasolopito sa i ai ni a tatou aafiaga uiga ese. Ina ua i ai le nuu o le Atua i luga o le fogaeleele, e le afaina lava po o le a le augatupulaga, o Lusifelo, le atalii o le taeao, ma le miliona ma miliona o agaga sa pauu ma tuliesea mai le lagi, sa faasagatau atu i le Atua, faasagatau i le Keriso, faasagatau i le galuega a le Atua, ma faasagatau i le nuu o le Atua. Ma e le o faavaivai i le faia o lea lava tulaga i o tatou aso ma augatupulaga. Soo se taimi lava e tuu mai ai e le Alii Lona aao e faatinoina se galuega, e galulue foi na mana e faatoilaloina.¹²

E le gata tatou te tau ma mana o le pouliuli, ma malosiaga natia o loo siosiomia ai i tatou, ae e tatau foi ona tatou tau ma le matua tele o tulaga o le lalolagi ma feteenai ma le tele o faigata e tatau ma manaomia ona tatou fetaiai, ma o le tele lava o nei mea e tatau ona tatou fetaiai o le tele foi lea o le tatau ona uunaia i tatou e gaoioi, ma galulue ma le mana uma i luma o le Alii mo le faavaeina o le amiotonu ma le upumoni ma le atiina ae o le galuega a le Atua, ma ia mautinoa o loo faamamaluina lona suafa i luga o le fogaeleele.¹³

Sa iloa e le tiapolo afai e tuuina mai e le agelu [le Tusi a Mamona] ia Iosefa Samita o le faavae lea o se faiga o le a faatoilaloina lona malo. O le tulieseina, ma isi tulaga, na oo i ai lenei nuu e lei faapea ona o i latou o ni tagata e solitulafono—e le faapea sa sili atu lo latou amioleaga nai lo isi, ae ona sa latou faataatiaina le faavae o le malo o le Atua lea o le a tupu, ma faateleina, … ma saunia le ala mo le afio mai o le Alii o Iesu Keriso o le tupu o tupu o le Alii o Alii, o le o le a afio mai ma nofotupu i luga o le fogaeleele atoa, ma o isi malo uma, ma peresitene ma faipule, ma i latou o e mulimuli ia i latou o le a tatau ona latou faailoa atu o Iesu o le Keriso. O le galuega o aso e gata ai lea o loo fai i tatou ma sui o le a saisaitiaina le mana o le tiapolo lea sa manumalo i le fanauga a tagata. … E le o se mea la e fou le tatau ona ita le tiapolo, ma faatupuina ma uunaia e amioleaga ina ia tau e tetee atu i ai. O le a musuia e le Alii Ana auauna ma tuuina atu ia i latou le malosi e faatumauina ai lona malo i luga o le fogaeleele. O loo pulea e ia. E lei i ai so’u faatuatua i lenei galuega o aso e gata ai pe ana le faapea o le Atua lea na foafoaina—e le mafai ona tu e aunoa ma Ia e tetee atu i le mana malosi o loo faasagatau mai i ai.¹⁴

E tatau ia i tatou ona mataala i lo tatou tiute, ma valaau atu i le Alii i le lotomaualalo, ma ola latalata ia te Ia; ma o le a tatalaina o tatou mata, e pei o le alii talavou, le auauna a le Perofeta anamua o Elisaia, ma o le a tatou iloa ai e toatele ua ia te i tatou nai lo e ua tetee ia i tatou [tagai i le 2 Tupu 6:8–17]; ma o le vaega o le faatuiese e tele lava ina faavaveina ai ona faataunuuina faamoemoega o le Atua. Ia tuu atu lo outou faatuatuaga i le Atua ma faalagolago i Ana folafolaga, ma ola ai i le pupula ma le malamalama o loo ia te outou; ma o le a manuia mea uma e tusa pe ola outou pe oti.¹⁵

E leoleo mai le Alii ia i tatou i taimi o faigata, i le faamalosiaina o i tatou e tusa ai ma lo tatou faatuatua, lotomaulalo, ma le usiusitai.

E moni lava tatou te lei uia ni [faigata] e pei ona sa oo i ai le Faaola, pe tele foi faapena. Ae i Lona soifuaga atoa sa Ia tumau i le faamaoni ma le faatuatua i Lona Tama ma Lona valaauga o le Faaola o le lalolagi. Sa tele ona tatalo o ia i taimi uma, ma sa momomo Lona finagalo i luma o le Alii ona o agasala a le lalolagi. O le taimi nei o loo i ai o Ia i le lotolotoi o i tatou. O ia o lo tatou Fautua i le Tama. [Tagai i le MFF 29:5.] O loo ia leoleoina i tatou, ma o le a Ia faia mea uma Na te mafaia mo lo tatou faaolataga.¹⁶

Sa sauaina i tatou, sa tatou mafatia, ma sa tatou oo atu i ni tofotofoga mamafa i o tatou taimi; ae sa tauaveina i tatou e le Alii i nei mea uma lava.¹⁷

O mala ma faigata ua faateteleina i le lalolagi, ma e i ai le uiga o nei mea uma. Ia manatua le mea lenei, ma tomanatu i nei mataupu. Afai e fai lou tiute, ma faia lo’u tiute, o le a tatou maua le puipuiga, ma o le a tatou sao atu i mafatiaga i le filemu ma le saogalemu.¹⁸

E manaomia ai le tutoatasi o le mafaufau, faamaoni o le loto, faatuatua i le Atua ma le maumaututu o uiga e ola ai i le olaga o se tagata o le Au Paia o Aso e Gata Ai, i le faafeagai ai ma se lalolagi e matamataita mai ia i tatou, faapea i le lotolotoi o tofotofoga ma faigata ma sauaga.¹⁹

Sa saunia Tanielu e ulufale atu i le lua o liona; o fanau Eperu e toatolu [Sataraka, Mesako, ma Apeteniko] sa le fefefe i le mala sa faatali mai mo i latou; o le Au Aposetolo sa filiga i le upumoni ma e lei aloese mai le oti mo le upumoni, aisea na mafai ai e na tagata faapea ma isi i ni tulaga faapea ona tutumau i o latou talitonuga e aunoa ma le solomuli ai? Aua, o le mea muamua lava, sa ia i latou le upumoni ma e na latou iloaina mo i latou lava; o le mea lona lua, o le Agaga Paia, le Fesoasoani, sa lagolagoina i latou aua e mafaia lava e lena mana na o ia ona faia, i taimi uma o faigata ia na oo i ai le nuu o le Atua. Ma e faapena foi lava i le taimi nei.²⁰

Sa masani lava ona ou manatu faapea ou te lei vaai lava muamua i lenei nuu o sili atu lo latou fiafia nai lo le vaitau o lo latou matua matitiva lava, o le tuliesea o i latou faapea ma mafatiaga, ona o le afioga a le Atua ma le molimau o Iesu. Sa faatasi le Agaga o le Atua ma i latou, ma i lo latou lotomaulalo ma puapuaga, sa avea ai le Agaga Paia, o le Fesoasoani lea, ma a latou soa tumau, ma sa faatumuina i latou i le olioli ma le faamafanafanaga, ma sa latou olioli i luma o le Alii mo nei mea uma lava. Semanu e le faapea se mea latou te lagonaina pe ana latou le taumafai e tausia poloaiga a le Alii.²¹

O loo i ai se tulaga manaomia mo i tatou ina ia salamo ma faamaualaloina i tatou lava i luma o le Alii lo tatou Atua, ina ia mafai ona i ai ia i tatou ma faateleina lo tatou ‘ae’ae ai i le Agaga Paia e saunia ai i tatou mo lena laasaga o loo i o tatou luma.²²

Ou te fia tuuina atu la’u molimau i le Au Paia o Aso e Gata Ai. O loo i ai le Atua ma lenei nuu. O loo ia faatulagaina lo tatou ala, ma o le a faaauau pea ona faia pe afai na o lo tatou faalogo i Lona siufofoga, ma o le a Ia faaauau pea ona tuuina mai ia i tatou le alofa tunoa e lava ina ia mafai ai ona tatou tatalia tofotofoga ma faatifauli. O loo alofa mutimutivale le Alii i Lona nuu i augatupulaga uma taitasi o le lalolagi; ae e pei ona puapuaga Keriso, e pei ona puapuaga le Au Aposetolo—o nisi o i latou sa oo lava i le oti—mo le molimau ia Iesu, ua faapena foi ona puapuagatia le Au Paia o Aso e Gata Ai, ma o nisi o i latou ua faamaufaailogaina a latou molimau i le toto o o latou ola. Ua valaauina i latou e sopoia atu mafatiaga sili ona tiga ona o le Talalelei, ae e lei manaomia lava i tatou e onosaia ni mea e sili atu nai lo mea tatou te mafaia, ma o le a le oo lava i ai pe afai o le a tatou mulimuli pea i fautuaga a le lagi.²³

Ua faaloaloa mai le aao o le Atua mo le faaolataga o lenei nuu, ma e le afaina po o le a le pogisa o ao; e le afaina po o le a le malosi o sauaga, pulega saua ma faafitauli e feagai ma lenei galuega, o le Alii lava ia, mai lava i lona amataga mai, seia oo mai i le taimi nei, o loo leoleoina lenei galuega, ma lagolagoina ma faasaoina, ma o le ia faaauau pea ona faia seia taunuu i lona taunuuga; seia tulai mai Siona ma ofu i ona laei matagofie, ma o mea matautia tetele uma o le a tutupu i aso o le gataaga o le a faataunuuina.²⁴

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Faitau le tala i itulau 225–227. O le a se mea e te aoaoina mai i lenei tala?
E toatele tagata e maofa pe aisea e faatagaina ai e le Atua Lana fanau ina ia “ui atu i faanoanoaga ma mafatiaga” (itulau e 237). Sa faapefea ona tali e Peresitene Woodruff lenei fesili? (Tagai i itulau e 227–228).
Aisea na manaomia ai le puapuaga o Iesu? (Tagai i le itulau 228); toe tagai i le Alema 7:11–12; MFF 88:6.) Sa faapefea ona tali atu o Ia i mea faafeagai? (Tagai i itulau 229–231). E mafai faapefea ona tatou mulimuli i Ana faataitaiga?
Sa aoaoina atu e Peresitene Woodruff faapea o le taua i le va o le malamalama ma le pouliuli “sa i ai lava i taimi uma” (itulau 229). O faapefea ona e iloa le faaauauina pea o lenei taua i aso nei? O le a se mea e mafai ona tatou faia e puipuia ai i tatou lava ma o tatou aiga mai lenei taua? (Tagai i itulau 230–231).
O a ni auala ua mafai ona “uunaia [oe e te] faatino” (itulau 231) o se taunuuga o ou tofotofoga?
Suesue le 2 Tupu 6:8–17. O le a se mea na faagaeetia ai oe i lenei tala? O le a le mea na aoao mai e Peresitene Woodruff ina ua ia ta’ua lenei tala? (Tagai i le itulau 231).
O a auala e fesoasoani mai ai le Alii ia i tatou e faafetaiaia o tatou tofotofoga? (Tagai i itulau e 232–233); toe tagai i le Mosaea 24:13–16. O a mea e tatau ona tatou faia ina ia maua ai le mafanafana ma le malosi o loo ofoina mai e le Alii? O faapefea ona fesoasoani mai le Alii ia te oe ia e tatalia ia faigata?

Mau E Faatatau I Ai: 2 Nifae 2:11–24; Alema 36:3; MFF 58:2–5; 101:1–5; 121:7–8, 29; 122:5–9

covered wagons — E pei lava o le uluai Au Paia o Aso e Gata Ai, tatou te feagai uma lava ma tofotofoga. Sa aoao mai Peresitene Woodruff e faatagaina e le Atua Lana Au Paia ina ia tofotofoina “ina ia mafai ai ona latou faamaonia atu lo latou faatuatua, ma iloa ai uiga o le faavae o loo fausia ai i latou i luga.”

Mary, Joseph and baby Jesus — “Na soifua mai i se falepovi, taoto i se moega lauvao, sa malaga mai o ia iina ma oo atu ai i le satauro e ala i mafatiaga e filogia ma le toto ia oo atu ai i se nofoalii o le alofa tunoa.”