Mataupu 23

“E Tasi le Loto ma le Manatu”

A tuufaatasia i tatou i le talalelei, ua tatou saunia mo le mauaina o faamanuiaga e silisili ona tamaoaiga o le lagi.

Mai le Soifuaga o Wilford Woodruff

Sa matua fiafia Peresitene Wilford Woodruff i le faaaumea a isi tagata o le Ekalesia. O le tele o faamaumauga i lana tusi talaaga e aofia ai upu o le agaga faafetai mo le “agaga o le lotogatasi ma le alofa” lea sa i ai i sauniga a le Ekalesia.¹ Ina ua mavae se tasi o ia sauniga, sa ia faamaumauina faapea o le toalua o e sa lauga sa tatau ona tuua [le sauniga] mo se isi fuafuaga. Sa faafaigata ona oo atu i laua i lena fuafuaga ona “sa toeitiiti lava a le mafai ona o atu i fafo ma le fale, ona e matua toatele sa moomoo e luluina o la aao.” Na ia tusia e uiga i lena lava sauniga: “Sa faatasi mai le Agaga o le Alii ma i matou. Sa ufitia le au paia i le alofa ma le lotogatasi. Sa faafiafiaina lo’u loto i lo’u vaai atu ua tuufaatasia le toatele o le Au Paia i le feagaiga fou faavavau.”²

Sa faamoemoe Peresitene Woodruff e fia silasila i lenei agaga o le lotogatasi ua faaauauina mai sauniga a le Ekalesia seia oo atu i laasaga uma o le olaga. E ala i ana lauga faalauaitele ma ana faataitaiga i aso uma taitasi, sa ia faamalosiauina ai le Au Paia ina ia lotogatasi i o latou aiga, i o latou tiutetauave i le Ekalesia, faapea a latou galuega faaletino. Sa tusia e Matthias F. Cowley: “I lona mafaufau sa leai lava se avanoa i le Ekalesia mo feeseeseaiga, finauga, feteenaiga. O le galuega o le galuega a le Atua—ua lava lena. Sa i ai taitai sa tofia i le auala tonu. I o latou luga sa tuuina i ai tiutetauave o le malo. Sa le popole o ia po o a manatu o isi i le le lava o le atamai sa ia i latou. Sa le matape’ape’a [faaloloto] o ia; ma o faaletonu tau tupe, i lona mafaufau, e le mafai ona faaleaogaina ai ia faamoemoega o le Atua; ma sa lei popole lava o ia po o le a le aofai o le tamaoaiga o lenei lalolagi na oo mai ia te ia. O se savali mamalu sa tuuina mai i le lalolagi, ma sa manao o ia e iloa e tagata uma lava taitoatasi le taua i le tagata ma ia malamalama i faamanuiaga o le faaolataga e oo mai ia i latou o e usiusitai.

“Sa le lagonaina e Wilford Woodruff i taimi uma lava se fiafia i lona i ai i le lotolotoi o ni feeseeseaiga. Sa ia aloese mai ai, ma sa le manao lava e faifai mea faatasi ma i latou o e fai pona, faitio, ma le fiafia ia i latou lava. Sa le iloa lava e ia se tulaga manaomia o ia mea. Sa lei faigata lava ia te ia ona malilie faatasi ma lana usoga. E lei tuuina mai lava e ia ni faatonuga le tonu, e lei i ai lava ni ona faamoemoega lilo sa fofoaina, e lei tautoai lava foi o ia i taimi e i ai se mea taua e tatau ona faia. Sa faamaoni o ia i le perofeta, ma faamaoni i lana usoga.”³

Aoaoga a Wilford Woodruff

E manumalo le lotogatasi i sui o le Aiga Atua ma totonu o le malo selesitila.

Na fetalai atu Le Faaola i Ana Aposetolo anamua, ma Aposetolo i o tatou aso: “Ou te fai atu ia te outou, ia tasi; afai e le tasi outou e le a a’u outou.” [MFF 38:27.] “O a’u nei ma le Tama, e tasi lava i maua.” [Ioane 10:30.] O loo i ai se aoaoga faavae e fesootai ma lenei autu ou te manatu e matua taua ia te i tatou o se nuu ma se Ekalesia iinei i luga o le fogaeleele. Faatasi ai ma fevaevaeaiga uma, ma feeseeseaiga uma, ma fefinauaiga ma feteenaiga i mana oi le lalolagi, pe na faaalia mai le lagi, ou te lei faalogo lava faapea ua faaalia mai i le fanauga a tagata sa i ai se fevaevaeaiga i le va o le Atua le Tama, le Atua le Alo ma le Atua le Agaga Paia. E tasi i latou. E tasi lava i latou i taimi uma. O le a tasi lava i latou i taimi uma, mai le vavau e oo i le faavavau. O Le Tama Faalelagi o le taiulu, i le avea o ia ma Mataisau o le faaolataga o le fanauga a tagata, ma foafoaina ma le faaainaina o le lalolagi ma le tuuina mai o tulafono i tagata o le lalolagi.⁴

Sa tasi Iesu ma le Tama. Sa fetalai mai o Ia: “Aua ou te lei alu ifo mai le lagi e fai lo’u lava loto, a o le finagalo o le ua auina mai a’u.” [Ioane 6:38.] O lenei faatasiga sa lei motusiaina lava i le va o le Tama ma le Alo. O le uluai faaaliga sa oo ia Iosefa Samita, o le faaaliga lea i le Tama ma le Alo. Sa tatalaina le lagi, ma o le Tama, faatasi ma Lona Alo, sa oo mai ia Iosefa, i le tali i lana tatalo, ma sa ia tusi i Lona Alo ma fetalai mai, “O lo’u Atalii pele lenei; ia e faalogo ia te Ia.” [Tagai i le Iosefa Samita—Talafaasolopito 2:17.]⁵

O loo i ai se malo selesitila, se malo terasitila, ma se malo telesitila. O loo i ai se mamalu o le la, se mamalu o le masina, ma se mamalu o fetu; ma e pei ona ese o le pupula o le tasi fetu mai le isi fetu, e faapena foi le toetutu o e ua oti [tagai i le 1 Korinito 15:41–42]. I le Malo selesitila o le Atua o loo i ai le lotogatasi, o loo i ai le faatasiga.⁶

O ai lava, na te faia se faatusatusaga, e manatu na te mauaina se fanua fasefulu eka na o ia i le malo o le Atua, po o le lagi, pe a tatou oo atu iina? E leai ma se isi e tatau ona manatu faapena, aua i lena malo, i le lagi po o luga o le fogaeleele, o le a tatou maua ai le lotogatasi, ma o le a manaomiaina e le Alii mai i o tatou lima ia tatou tuufaatasia, e tusa ai ma mataupu faavae o lana tulafono selesitila.⁷

E tatau ona aufaatasi Perofeta ma sui o le Aiga Atua, faatasi ma tagata uma o le Ekalesia o e o sailia lea lava faatasiga.

I le faitauina o le talafaasolopito o fesootaiga a le Atua ma tagata, mai le Tusi Paia, le Tusi a Mamona, ma le Mataupu Faavae ma Feagaiga, e mafai ai ona tatou iloa, mai lava i aso o le Tama ia Atamu, na faatuina ai e le Alii ni tagata, i augatupulaga uma, o e ua Ia faaeeina ai i o latou luga Lana Perisitua, o e ua Ia tuuina i ai i o latou luga le mana ma le pule e faia ai Lana galuega i luga o le fogaeleele i le fanauga a tagata. Ma o nei alii ua ia i latou mataupu faavae o le tuufaatasia ma le Atua, ma le Alo o le Atua ma le Agaga Paia. Sa tuuina atu le Agaga Paia i le Tama ia Atamu; ma sa faatumulia ai o ia, ma ina ua oo i ona toe aso, sa ia faamanuiaina nisi o ona atalii o e sa avea ma Faitaulaga Sili ma e na totoe o lana fanau [tagai i MFF 107:53–56].

O le Tama ia Atamu, Enoka, Mose, Noa, Aperaamo, Isaako, Iakopo, ma na peteriaka ma perofeta anamua sa faafetai i latou i le maua o le fesootaiga vavalalata ma le Atua. Sa i ai i latou i lalo o le tulaga manaomia o le saili atu i le Alii, aua ana leai lenei fesootaiga vavalalata e le agavaa i latou e faia lo latou tiute. Sa faalagolago i latou i le Alii mo faaaliga, mo le malamalama, ma faatonuga ina ia maua le mana e faatinoina ai ia poloaiga a le Atua. O lenei faatasiga lea sa manaomia mai e le Alii mai peteriaka ma perofeta anamua, ma lea sa manaomia e Iesu mai i Ana Aposetolo, sa manaomia foi mai ia Iosefa Samita ma lana usoga. O loo manaomia foi mai i le Au Paia a le Atua talu mai le faavaeina o le lalolagi seia oo mai i lenei taimi.⁸

Ua ou iloa o loo tu le Au Peresitene o lenei ekalesia i le va o lenei nuu ma le Alii, aua o i latou o loo i le ulu, ma ua ou iloa o loo faaalia mai e le Atua ia i latou lona finagalo, ma o lea la e tatau ona tatou vaavaai atu ia i latou mo le malamalama ma faatonuga. Atonu e tumu le ulu i le malamalama, i musumusuga, ma faaaliga ma le mafaufau ma le finagalo o le Atua, ae afai o na taitai o e o loo sosoo atu ia i latou, faapea ma i tatou o loo tulemomoe e tusa ai ma o tatou tiute, ma e le o i ai foi i se tulaga talafeagai e maua ai lena malamalama, pe tou te le o iloaina ea la o loo punitia le vaitafe mai lava i le ulu? E leai lava se vaega tatafe po o se auala e mafai ona tafe mai ai le malamalama i lima ma vae ma itutino o le tino.

Ua ou iloa o le tiute, e le gata o i tatou o e umia le perisitua ae faapea foi le lautele o nei tagata, le tuuina atu o i tatou lava i le lotomaulalo ma le faatuatua i luma o le Alii ina ia mafai ai e i tatou ona maua faamanuiaga ia ua saunia mo i tatou, ma e mafai onatatou mauaina uma le malamalama, le atamai, le faatuatua, le poto ma le mana ia e manaomia mo lo tatou faaolataga e ala i le lotomaulalo, usitai ma le gaua’i atu i le finagalo o le Atua. E tatau ona tatou faataunuuina lenei mea ina ia mafai ai e o tatou mafaufau ona saunia ma o tatou tino ia talafeagai mo le taliaina o le Agaga Paia, ina ia mafai ai ona saoloto le oo mai o le Agaga o le Atua i o tatou tino atoatoa mai le ulu e oo i vae. Afai loa ae oo i se tulaga faapea o le a tutusa uma la tatou vaai, tutusa o tatou lagona, ma tutusa i tatou uma, ma avea i tatou ma e tasi e tusa ai ma le talalelei ma le malo o le Atua, e pei ona tasi o le Tama ma le Alo, ona amata ai lea ona iloa e lenei nuu le tulaga ma le fesootaiga e tatau ona tatou tauaveina i lo tatou va ma isi faapea foi ma le Atua, ma o le a tatou lagonaina le taua o le faataunuuina o o tatou tiute ma o le a tatou naunautai e tulai atu ma faaleleia le faaaogaina o o tatou taimi, ia faaaogaina tatau a tatou taleni ma maua faamanuiaga ua saunia e le Alii tatou te ‘ae’ae ai; ae pe tou te le o iloa ea afai e tulemomoe ma faatamala tagata ma e le o ola ai e tusa ma o latou avanoa, ma afai e amata ona oo mai le Agaga o le Atua mai le ulu e oo atu i le tino e le pine ae faalavelaveina ma punitia?

E mafai ona tatou mulimuli i lenei mataupu faavae e ala i le ekalesia ma le malo o le Atua, ma e mafai ona outou tauaveina atu i totonu o le aiga. … E pei o le vine ma ona vaega, o ona lala ma ona la [tagai i le Ioane 15:1–11]. O se faataitaiga lelei tele lenei e aoao maia ia i tatou le aoaoga faavae o le amiotonu.

Ina ia mafai e i tatou ona saunia e faia le finagalo o le Atua ma i ai i se tulaga e atiina ae lona malo i luga o le fogaeleele, ma faataunuuina ona faamoemoega, e le gata e tatau ona tuufaatasia i tatou ma galulue e pei o le loto o le tagata e toatasi, ae e tatau ona tatou mauaina le Agaga Paia o le Atua ma le mafaufau ma le finagalo o le Atua e faatatau ia i tatou, ma puleaina ma faatonutonuina ai i tatou i a tatou gaoioiga uma ma galuega uma ina ia mafai ona saogalemu ma mautinoa ia i tatou le faaolataga.⁹

O le lotogatasi e maua ai le malosi.

Ou te le manatu e manaomia se matuai finauga tele e faamaonia mai ai ia i tatou o le lotogatasi o le malosiaga lea, ma o ni tagata e lotogatasi o loo i ai le mana e le o mafai ona maua e tagata fevaevaeai.¹⁰

E tatau ona tatou lotogatasi ma tutu faatasi i le lotolotoi o mea faafeagai o le a tatau ona tatou fetaiai.¹¹

E lei faauuina e amioleaga ina ia i ai le mana e aumaia ai le leaga i luga o i tatou, pe afai tatou te lotogatasi.¹²

Atonu e fevaevaeai Papelonia; atonu e i ai i tagata uma o le lalolagi ia fevaevaeaiga latou te moomoo i ai; ae o le a latou maua le taui o lo latou fevaevaeai, ma e sa faapena mai lava i taimi uma. Mai lea aai i lea aai, mai lea atunuu i lea atunuu ua faaumatiaina e ala i faamasinoga a le Silisiliese i soo se taimi lava ua matua ai le agasala, e pei o le tulaga o Sotoma ma Komoro, o Papelonia, o Nineva, Turo ma Saitonu, ma le matautia o le tele o isi aai ma atunuu anamua. Ae o le Au Paia a le Atua e le mafai ona manuia vagana ai ua lotogatasi.¹³

A o tupu pea ma faateleina le numera o le ekalesia, ma o loo faaatoatoaina pea ona faavaeina le malo o le Atua, o le taua o le lotogatasi i ona tagata o loo sili pea ona faaalia. E matua manaomia lava le le gata ai ina ta’ua e lotogatasi, ae o le faamausaliina o loto ma agaga e tatau ona i ai i peresitene uma, aufono uma, ma paranesi uma o le ekalesia a Keriso, ina ia mafai ai ona faataunuuina fuafuaga uma a le Atua i le atiina ae o Siona, po o le mauaina o na faamanuiaga ua tatou maua le avanoa e faafiafiaina ai i tatou; aua, ia outou mautinoa, o outou le Au Paia a le Silisiliese, o le a tapunia le lagi i luga o ulu o soo se au peresitene, korama, aufono, po o se paranesi o e ua fevaevaeai i o latou loto, faalogona ma lagona, ma o le a latou tumau ai, ae o faamanuiaga o le a taofia seia aveesea le leaga; aua o le Alii o le a na le sasaaina mai lava ni oa o faamanuiaga silisili ona maoae o le lagi, ma le perisitua ma meaalofa o le talalelei, [vagana] ai lava ua [aufaatasi] i luga o aoaoga faavae o lena lotogatasi o loo manaomia e le tulafono selesitila a le Atua. … E na o taumafaiga tuufaatasi lava a le Au Paia a le Atua, i lenei augatupulaga mulimuli, o le a faataunuuina ai le atiina ae o Siona, ma o le malo o le Atua i luga o le fogaeleele, o le a saunia mo se faatasiga ma le malo o le Atua i le lagi; ma o le filifili sa fusia faatasi ai ‘au o le lagi, o le a faalauteleina ma aofai uma atu ai i lona mana i latou uma o e sa usiusitai i poloaiga a le Atua.¹⁴

E tatau ona tatou lotogatasi i a tatou aoaoga faavae, o a tatou galuega i le malo o le Atua, ma lo tatou fealofani.

Aoaoga Faavae

Ou te olioli i taimi uma i lo’u vaai atu i uso a tagata ua i ai so latou malamalama i le upumoni e ala i le usiusitai i le talalelei e pei ona aoaoina atu e auauna a le Alii. A oo ina ulu ifo tagata i le vai o le papatisoga ma mauaina le faaee atu o lima mo le meaalofa o le Agaga Paia, latou te taliaina le upumoni ma le malamalama lava lea e tasi e pei ona tatou mauaina, ma o lea ua avea ai i tatou ma tagata ua tasi le loto, tasi le mafaufau, ma mulimuli atu i le musumusuga a le Agaga Paia, lea o loo tausia Lana talalelei. I le talaiina o le talalelei ma le faia o sauniga i le maota o le Alii, e au faatasi mai ai le agaga o musumusuga o le Lagi ia i latou o e faia sauniga, lea o le a tumau ma i latou, pe afai e faamaoni ma faatuatua, i o latou tiute uma o le olaga.

A ou faalogo i le usoga o talanoa mai e uiga i feutagaiga a le Atua ma le augatupulaga o le taimi nei, ou te manatu o o latou mafaufau e auau faatasi lava; o le tautinoga o loo ia i latou e tasi lava; latou te auai faatasi i la latou molimau; e tasi i latou i lo latou faapea mai o le galuega a le Alii lo tatou Atua o le a manumalo i ona fili uma.¹⁵

E tasi lava se vaega patino e fesootai ma le talaiina o le talalelei: Atonu e mafai ona outou auina atu se afe o faifeautalai ma o le a latou talaiina aoaoga faavae lava e tasi; o le a latou galulue uma lava mo le atiina ae o le Ekalesia lava e tasi, o le a latou lotogatasi; aua o lo latou faatuatuaga, o a latou mataupu faavae, ma le faavaeina o le Ekalesia ua faailoaina atu uma lava ia i latou e ala i faaaliga a le Atua: o le mea lea o le a latou aufaatasi ai e tusa ai ma aoaoga faavae o le talalelei. … O lo tatou aufaatasi faapea ma le tasi o o tatou lagona o se tasi lea o tulaga matagofie ua iloga ai le faatulagaga o le malo o le Atua.¹⁶

O le Galue i le malo o le Atua

E tatau ona tatou atiina ae lenei malo e ala i le lotogatasi ma le faatuatua e mulimuli i na alii ua faatulagaina e taitaia i tatou, a leai o le a taapeape i tatou; ma o le a aveesea faamanuiaga a le Atua mai ia i tatou pe afai tatou te ui i se isi lava auala.¹⁷

O lo’u tiute le faifai mea faatasi ma le Atua, i le avea ai o a’u ma auupega vaivai i aao o le Atua. O lo’u tiute le i ai ia te a’u o le mana faatasi ma le Atua. Ma afai e ia te a’u lenei tulaga, ona tatau lea ona tulai mai o’u fesoasoani i o’u tafatafa ma tutu faatasi ma a’u. E tatau ia i matou ona tasi le loto ma le manatu i mataupu uma lava, faaletino ma le faaleagaga, e oo mai i o matou luma i le galuega o le Ekalesia ma le malo o le Atua. Ma ou te faafetai ai e faapea atu o le tulaga lava lea ua i ai talu ona valaauina a’u i lenei tulaga, pe talu le faatulagaina o [lenei] Au Peresitene o le Ekalesia. O loo tutu ai ma fesootai mai ma i matou iinei le Au Aposetolo e Toasefululua. O lo latou tiute o le tasi o le loto ma le manatu. E leai sa latou aia e tutu ai i se isi tulaga. E le mafai ona latou tutu i se isi lava tulaga ma manuia i luma o le Atua. E tatau ona tasi i latou ma i matou, ma tasi fo’i i matou ma i latou. E i ai a latou aia tatau; e i ai o latou saolotoga. Ae afai e faapea atu le Au Peresitene o le Ekalesia i soo se isi lava o i latou, “O le afioga lenei a le Alii,” po o le “O le mea lea e sa’o,” e tatau ona latou taliaina ma le atoatoa ma galulue faatasi ma i matou. O le tulafono a le Atua e manaomia ai lenei aufaatasi ia i tatou. O le tiute foi lea o le au fitugafulu ina ia lotogatasi ma le Au Aposetolo e Toasefululua. Ua valaauina le au fitugafulu e le au aposetolo ina ia o atu ma galulue i le tovine a le Alii, ma latou te galulue ai faatasi. O le tulaga lava lea, uso e ma tuafafine, ua i ai i faalapotopotoga uma i totonu o lenei Ekalesia. E tatau ona i ai le aufaatasi. E le tatau ona i ai se feeseeseaiga, leai se fevaevaeaiga. Afai e i ai, o le a le fiafia le Alii, ma ua faalavelavea i tatou i la tatou galuega.¹⁸

I soo se mea lava i luga o le fogaeleele o loo mafai ona tatou vaaia ai aafiaga o le fevaevaeai. O le tele lava o le fevaevaeai o atunuu, nuu, aiga, po o faalapotopotoga o tagata i soo se tulaga lava i lalo o le lagi, o le laitiiti foi lea o le mana o loo ia i latou e tauave ai soo se faamoemoega po o soo se mataupu faavae e mafai ona manatu i ai; ae o le tele lava o lo latou lotogatasi, pe o se faigamalo po o soo se isi lava tulaga, o le tele foi lena o le mana latou te maua e faataunuuina ai mea latou te naunautai i ai. O loo mafai ona tatou iloa atu o tagata o le lalolagi o loo faasolo lava ina tele atu le fevaevaeai i aso uma taitasi, ma o mea leaga o loo fai ma taunuuga o na tulaga o loo manino lava i soo se mea. Ua valaauina i tatou e atiina ae Siona, ma e le mafai ona tatou atiina ae vagana ua tatou lotogatasi; ma i lena faatasiga ua tatau ona tatou tauaveina poloaiga a le Atua ia i tatou; ma ua tatau lava ona tatou usiusitai ia i latou o e ua faatulagaina e taitaiina ma faatonutonuina mataupu uma o le Malo o le Atua. …

… O mataupu faavae o le talalelei a Iesu Keriso ia ua faaalia mai i o tatou aso o le mana lea o le Atua i le faaolataga ia i latou uma o e talitonu, e le gata o Iutaia ae faapea foi i nuu ese, i lenei augatupulaga o le lalolagi e pei lava o soo se isi; ma e afai lava o le a tatou lotogatasi i le tauaveina o fautuaga ua tatou mauaina, e mafai ona tatou foia mea leaga uma o loo taatia mai i o tatou luma, fausiaina le Siona a le Atua, ma tuu i tatou i se tulaga e mafai ai ona faasaoina i tatou.¹⁹

O le alofa o le tasi mo le isi

Ia agalelei le tasi i le isi. Aua le fai pona le tasi i le isi. … Ia fesoasoani le tasi i le isi.²⁰

E le tatau lava ona i ai ni lagona faapito i se tasi o se vaega o se aiga,—“Ou te le popole lava po o le a le mea e tupu i le mea lea, po o lena po o se isi lava mea pau lava le mea ia mafai ona maua le mea ou te manao lava a’u i ai.” O le manatu faapito lea, e tupu mai ai le fevaevaeai ma e le ogatasi ma le tautinoga faalauaitele a se tagata paia o le Atua. E tatau ona tatou galulue, i tatou uma lava taitoatasi, ina ia aveesea ia lagona faapenei mai o tatou loto, ona tatau ai lea ia i tatou, i le faalapotopotoga o o tatou aiga, ona tauivi e faamalosia faalauaitele le lagona naunau o tagata o le ekalesia ia faia faapea.²¹

Afai e le taitai atu i tatou e lo tatou faatuatuaga ia alolofa i lo tatou Atua ma o tatou uso a tagata ma ia faia fesootaiaga i le tonu ma le sao ma tagata uma lava, ona leai lava lea o se aoga o a tatou tautinoga. Ua saunoa mai le aposetolo:

“Afai e faapea mai se tasi, ou te alofa i le Atua, ae ita i lona uso, o le pepelo lava ia: aua o le le alofa i lona uso ua vaai atu i ai, pe mafai faapefea ona alofa o ia i le Atua ua le vaai atu i ai?” [1 Ioane 4:20.]

E sili atu ona mafai ona tatou faataitaia lo tatou alofa mo lo tatou Atua e ala lea i le ola i lo tatou faatuatuaga. E le aoga le tautino o se alofa mo le Atua a o tatou faia upuleaga pe faia mea sese i Lana fanau. O feagaiga paia ua tatou osia ma Ia e maumaututu le faamalosia ai o i tatou e faia tiute e tatau ona tatou faia e le tasi i le isi; ma o le matafaioi maoae o le lotu o le aoao mai lea ia i tatou o le auala e faatinoina ai na tiute ina ia maua ai le fiafiaga sili ona maoae mo i tatou lava ma o tatou uso a tagata. A tatou tausisi i tiutetauave o lo tatou faatuatuaga, e leai ni upu e tautalaina po o ni gaoioiga e faia o le a afaina ai se tuaoi. Afai e ola le Au Paia o Aso e Gata Ai e pei ona tatau ai i latou, ma e pei ona aoaoina ai i latou i la latou lotu e tatau ona faia, o le a leai lava nisi lagona i se loto ua na o faalogona o le alofa faaleuso ma faaletuafafine. O le faatuaupua po o le tautala leaga o le a leai se nofoaga i totonu ia i tatou; ae o le filemu ma le alofa ma le agalelei o le a manumalo i o tatou loto uma ma nofoaga ma nuu. O le a avea i tatou ma tagata silisili ona fiafia i luga o le fogaeleele, ma o faamanuiaga ma le filemu o le lagi o le a i o tatou luga ma luga o mea uma e a tatou ia.

Afai e i ai se le fiafia ma ni lagona malolosi o le loto matau’a ma fefinauaiga ma le ita i totonu ia i tatou, e tupu ona tatou te le o tausisia le faatuatuaga ua tuu atu i ai la tatou tautinoga. E le o ni ona fua ia. O le mea o loo i ai nei mea leaga, o loo i ai se tulaga manaomia tele o le salamo. …

I le avea ai ma Au Paia o Aso e Gata Ai, o la tatou tu ma aga masani le auai i le faamanatuga e faatasi i le vaiaso. Afai o aoaoga a lo tatou Alii, i le manatuaina o le ua mafua ai ona tatou tausia lenei sauniga paia, e leai lava se tasi ua agasala e mafai ona faatagaina e auai seiloga ua faia se faaleleiga. O le poloaiga patino a le Alii o Iesu ina ia aua ne’i faatagaina se tasi e ai i Lona tino pe inu i lona toto ma le faaletatau [tagai i le 3 Nifae 18:28–32]. O se polokalama sili atu ona atoatoa e puipuia ai le i ai o lagona faaletatau ma sese i le va o uso ma tuafafine e le mafai ona manatu faalemafaufau i ai. Ae afai o faia e le Au Paia o latou tiute, e le mafai ona tumau ni faigata e le faaleleia i tua atu o le sapati o le Alii pe a latou faapotopoto e aai ma feinu e manatua ai o Ia.²²

Ou te apoapoai atu i le Au Paia uma, ina ia tatou tausisia ma le lotogatasi le fetalaiga a lo tatou Alii e pei ona tusia i fuaiupu 12, 13, ma le 14 o le [mataupu e 15] o Ioane—afai tatou te fealofani e pei ona alofa Keriso ia i tatou, e faigofie lava ona mafai ona faaleleia tulaga faigata uma e ono tupu mai i lo tatou lotolotoi, ia faamagalo le tasi i le isi, ma ia faatumuina i le alofa tunoa, ma le malamalama, alofa, olioli, lotogatasi, filemu, ma le faaaumea o le a avea ma faavae mautu o lo tatou vaitaimi, ia e sili atu ona lelei i le silafaga a le Atua, o agelu, ma tagata, nai lo fefinauaiga i luga o sese o lo tatou usoga.²³

E tatau ia i tatou ona tasi i le loto ma tasi i le manatu, ma aua ne’i faatagaina soo se mea lava o le natura faaletino po o le faaleagaga e tuueseesea i tatou mai le alofa o le Atua ma tagata.²⁴

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau v–ix.

Toe faitau le parakalafa muamua i le itulau 249. O a ni aafiaga faapea ua e maua?
O a ni auala o loo “tasi” ai le Tama Faalelagi, Iesu Keriso, ma le Agaga Paia? (Tagai i itulau 250–251.)
O a ni auala o loo lotogatasi ai perofeta faatasi ma le Aiga Atua? (Tagai i itulau 251–252.) E mafai faapefea ona tatou ausia uma lea ituaiga lotogatasi? (Tagai i itulau 253.)
Toe faitau itulau 251–253, ma vaavaai ni faamatalaga a Peresitene Woodruff e uiga i le fanua e 40 eka, o se vaitafe, ma se vine. O a ni mea e mafai ona tatou aoaoina mai nei faatusatusaga?
Faitau le parakalafa muamua i le itulau 253. O a ni aafiaga ua faaalia atu ia te oe o le “lotogatasi o le malosiaga lea”?
Mafaufau i ai ma talanoaina talaaga eseese, uiga, mea e fiafia i ai, taleni, ma tiute eseese o tagata i lau uarota, paranesi, po o lou aiga. E te manatu e faapefea ona tuufaatasia ia tagata taitoatasi mo le lelei?
O a nisi o faamanuiaga tatou te maua pe a tatou lotogatasi mo le lelei i totonu o o tatou aiga? i totonu o faalapotopotoga faale-Ekalesia? O a nisi o aafiaga o le fevaevaeai i le aiga ma le ekalesia?
O a ni puna’oa ua saunia e le Ekalesia e fesoasoani ia i tatou ina ia tuufaatasia i tatou i aoaoga faavae o loo tatou aoao atu? O a ni mea e mafai ona tatou faia e faamautinoa ai o loo aufaatasi a tatou aoaoga ma aoaoga a perofeta o aso e gata ai?
Aisea e faigata ai ona faapea atu tatou te alolofa i le Atua ae tatou ita i o tatou uso? (Tagai i le itulau 257).
Suesue atoa le parakalafa lona lua i le itulau e 258. E faapefea ona fesoasoani le faamanatuga i le tuufaatasia o i tatou?

Mau E Faatatau I Ai: Salamo 133:1; Mosaea 18:21; 3 Nifae 11:28–29

grape vines — I le faamamafaina o le tulaga manaomia o le lotogatasi, sa faatusatusaina ai e Peresitene Wilford Woodruff le Ekalesia ma le pulega faaleaiga i le ‘vine ma ona vaega, o ona lala ma ona la.”

First Presidency in 1894 — O Le Au Peresitene Sili i le 1894. Mai le tauagavale i le taumatau, Peresitene George Q. Cannon, Fesoasoani Muamua; Peresitene Wilford Woodruff; ma Peresitene Iosefa F. Samita, Fesoasoani Lua.