Mataupu 8

Malamalama i le Oti ma le Toetu

Pe a oti tagata e pele ia i tatou ma pe afai tatou te manatunatu loloto i lo tatou lava olaga faaletino, e mafai ona tatou maua le mafanafana ma mautinoa i le talalelei toefuataiina a Iesu Keriso faapea le moni faavavau o le toetu.

Mai le Soifuaga o Wilford Woodruff

I le amataga o Aokuso i le 1839, sa tuua ai e Elder Wilford Woodruff lona aiga i Montrose, Iowa, ona o le usitai i le valaau a le Alii e auauna i se misiona i le Atu Peretania. Sa ia faamavae atu i lona faletua, o Phoebe, ma lona afafine e toatasi, o Sarah Emma e tasi le tausaga. I lea taimi, sa maitaga ai Phoebe ia Wilford Jr., o le sa fanau i le aso 22 o Mati, 1840.

Ina ua mavae ni nai masina talu ona tuua Montrose, sa i ai Elder Woodruff i le Iunaite Setete i sasae, o loo talai atu le talalelei ma sauniuni mo se faigamalaga i Peretania Tele. I lea taimi sa ia tusitusi ai i lana tusi talaaga ni miti eseese se tolu lea sa vaai ai i lona faletua. Ina ua mavae le miti muamua sa ia tusia le faamatalaga lea i lana tusi talaaga: “Sa ou vaai ia Mrs. Woodruff i le mafatiaga loloto i se miti i Montrose. Ou te lei vaai ia Sarah Emma.”¹ O lana lipoti o le miti lona lua sa puupuu foi: “Sa faia la’u miti i le po ma sa faia se talanoaga ma Mrs. Woodruff ae ou te lei vaai ia Sarah Emma.”² O le miti lona tolu sa auiliili: “Sa ma matua fiafia i le talatalanoa o le tasi ma le isi, ae peitai sa filogia a ma’ua feiloaiga i le faanoanoa, aua ina ua uma ona ma talanoa mo sina taimi e uiga i tulaga o le matou aiga, sa ou fesili loa po o fea Sarah Emma. … Sa ia fai mai, a o tagi lotulotu. … ‘Ua oti o ia.’ Sa ma faanoanoa mo sina taimi, ona ou ala lea. … Pe moni ea lenei miti? O le a umi se taimi faatoa ou iloa se tala.”³

I le aso 14 o Iulai, 1840, ua i ai nei Elder Woodruff i Peretania Tele, na ia tusia ai se faamatalaga i lana tusi talaaga e faamamaluina ai se aso taua i lona aiga: “O Sarah Emma ua lua ona tausaga i le aso lenei. Ia faasaoina e le Alii lo’u toalua ma la’u fanau mai faamai ma le oti seia ou foi atu.” Ona o ia o se tasi e faailoaina pea lava le finagalo o le Alii, o lea sa ia faaopoopo ai, “Oi le Alii e, ou te tuuina atu i latou i ou aao; fafaga, faalavalava, ma faamafanafana i latou, ma ia ia te oe le mamalu.”⁴ E tolu aso mulimuli ane, ae maliu si teineitiiti o Sarah Emma.

E lei iloaina e Elder Woodruff le oti o lona afafine seia oo i le aso 22 o Oketopa, 1840, ina ua ia faitauina se tala i se tusi sa maua a se tasi o ona usoga i le Korama a le Toasefululua.⁵ Ina ua mavae aso e fa sa faatoa maua ai se tala mai ia Phoebe, i se tusi na tusia i le aso 18 o Iulai. Sa tusia se vaega o lana [Phoebe] tusi i lana tusi talaaga:

“La’u pele Wilford, o a ni ou lagona pe a ou fai atu o ananafi sa valaauina ai a’u e molimauina le toesea o si a ta pele o Sarah Emma mai lenei lalolagi? Ioe, ua alu o ia. O le lima ma’ema’ea o le oti ua na seiinaese atu o ia mai o’u lima. … Ina ua ou vaavaai atu ia te ia, sa masani ona ou mafaufau pe faapefea ni o’u lagona pe a ma valavala. Sa ou manatu o le a le mafai ona ou ola e aunoa ma ia, aemaise lava i le toesea ai o lo’u toalua. Ae ua alu o ia. Ua aveina atu o ia e le Alii ia te Ia mo se mafuaaga poto.

“O se lu’i ia te a’u, ae sa tulai mai le Alii i o’u tafatafa i se auala ofoofogia. E mafai ona ou vaai ma lagona ua Ia aveina o ia ma o le a sili lana tausiga ia te ia nai lo so’u mafai mo sina taimi seia ou alu atu foi ma feiloai ma ia. Ioe, Wilford, ua i ai la taua agelu itiiti i le lagi, ma ou te manatu ua uma ona asiasi atu lona agaga ia te oe i luma atu o le taimi lenei.

“E ese le faigata o le ola e aunoa ma ia. … Sa ia tuuina se kisi mo lona tama ia te a’u ae o le a oti o ia. … Sa faaee atu lima o toeaina i ona luga ma faauuina o ia mo ni nai taimi, ae i le aso na sosoo ai sa alu atu lona agaga i se isi lalolagi e le o i ai se faanoanoa.

“O le aso na ma o mai ai ma Wilford [Jr.], faatasi ai ma le toatele o nai uo, i Commerce, [Ilinoi,] e tuuina atu faaaloaloga mulimuli i si a ta pele laitiiti ina ia tanuina faalelei o ia. Sa leai sona aiga e mulimuli atu ia te ia i le fanuatanu pe maligi se loimata mo ia ua na o lona tina ma Wilford laitiiti. … Ua faatoa ou foi mai sa alu sa’u savalivaliga manaia toe faanoanoa i le fanuaoti o Sarah. O loo taotooto filemu na o ia. E mafai ona ou fai atu na aumaia e le Alii ma toe aveeseina e le Alii, ma ia faamanuina foi le suafa o le Alii [tagai Iopu 1:21].”⁶

E ese mai le kopiina o le tusi a Phoebe, sa laitiiti se tusitusiga a Elder Woodruff e uiga i le oti o lona afafine. Sa na ona faapea lava o Sarah Emma ua “aveesea mai lenei olaga” ma ua “alu atu o ia e le toe vaaia i lenei olaga.”⁷

I ona tausaga e 91, sa tumau pea le soifua o Wilford Woodruff ae ua maliliu le toatele o e pele ia te ia, e aofia ai ma nisi o lona aiga ma Aposetolo uma sa latou auauna faatasi i lalo o le taitaiga a le Perofeta o Iosefa Samita. I nei taimi faanoanoa, sa ia maua le mafanafana i lana molimau o le talalelei toefuataiina ma le “tulaga moni e faavavau” o le toetutu.⁸ Sa masani ona ia aoao atu faapea o le oti o se e amiotonu o le Au Paia o Aso e Gata Ai e avea ma taimi faanoanoa ma taimi fiafia. O le mea moni, i le agai atu i le faaiuga o lona soifuaga sa ia tusia ai faatonuga ia e uiga i lona lava maliu: “Ou te le manao i lo’u aiga po o uo e laeiina ni faailoga o le faanoanoa mo a’u i lo’u oti po o tua atu foi, aua afai ou te faamaoni ma faatuatua e oo atu i le oti o le a leai se mafuaaga e faanoanoa ai se tasi mo au.”⁹

Aoaoga a Wilford Woodruff

O le oti e ulufale atu ai agaga o tagata taitoatasi i le lalolagi o agaga, lea e fiafia faatasi ai e amiotonu ma faaauauina ai le galuega a le Alii.

E matua toatele lava [tagata] o e talitonu a oti se tagata o le iuga lena o ia, faapea e leai se olaga i tua atu. E mafai ea e se tagata magafagafa ona talitonu o le Atua o le lagi sa fausiaina le lua po o le tolu selau afe miliona o agaga, ma tuuina atu i ai tino [faaletino], tau lava ina o mai ma ola i luga o le fogaeleele ona toe mou atu lea i le pogisa pe tafiesea? E foliga mai ia te a’u soo se tagata manatunatu loloto lava e le mafai ona faaaogaina nei ituaiga talitonuga. E matua faatuiese i lagona faanatura ma manatunatuga loloto.¹⁰

A o faanoanoa ai i le toesea o a tatou uo, e tatau ona ou mafaufau faapea i oti uma, o loo i ai se toe fanau mai; e tuua e le agaga le tino ua oti ia i tatou, ae ui atu i le isi itu o le veli o loo ola [i le vaaiga] a lena faatasiga maoae ma le amiotonu o loo galulue foi mo le faataunuuina o faamoemoega o le Atua, i le togiolaina ma le faaolaina o se lalolagi ua pau.¹¹

O loo i ai le fiafiaga pe a ulufale atu le agaga o se tasi o le Au Paia a le Atua Soifua i le lalolagi o agaga ma feiloai ma le Au Paia o e sa o atu muamua.¹²

O nisi e galulue i le itu lenei o le veli, o isi o le isi itu o le veli. Afai tatou te nonofo iinei e tatou te tulimatai e galulue i le faamoemoe o le faaolataga, ma afai tatou te o atu ai [i le isi itu o le veli] tatou te tulimatai e faaauau la tatou galuega seia toe afio mai le Atalii o le Tagata.¹³

O le Togiola a Iesu Keriso, o le a toetutu ai tagata uma, ma faatasiaina ai o latou agaga ma o latou tino faaletino.

Matou te faailoa atu e oti uma lava ia Atamu, ma o lena oti e ala i le pau e tatau ona oo mai i luga o le fanauga uma a tagata, faapea foi i luga o manu uma o le vao, o i’a uma o le sami ma manu felelei o le vanimonimo ma galuega uma a le Atua, e tusa ai ma le fuafuaga o lenei lalolagi. O se tulafono lea e le mafai ona suia pe aveesea. … O le Faaola lava ia sa tofo i le oti; Na maliu o Ia e togiola le lalolagi; O Lona tino sa tuuina i le tuugamau, ae lei oo i ai le pala; ma ina ua mavae aso e tolu sa tulai mai le tuugamau ma faaofuina i le tino ola pea. O ia o le faapolopolo o le toetutu.¹⁴

Ua faamalieina a’u, e pei ona masani ai, e uiga i le toetutu. Ou te alaga fiafia ai. Sa tatalaina mai le ala mo i tatou e le toto o le Alo o le Atua.¹⁵

A oo mai le toetutu, o le a tatou toe tulai mai ma tino ola pea; ma o sauaga, mafatiaga, faanoanoaga, tiga ma le oti, e tusa ai ma olaga faaletino, o le a aveesea e faavavau.¹⁶

O lenei mataupu faavae o le toetutu o e ua oti e sili ona mamalu. O se faamafanafanaga, i lo’u lava agaga, le manatu, faapea, i le taeao o le toetutu, o le a i ai i lo’u agaga le avanoa e nofo ai i le tino lava lea sa i ai iinei. I le avea ai o toeaina o Isaraelu ua tatou faimalaga i le mano o afe o maila i le vaivai ma le lelava, a o galulue ai e talai le talalelei a Iesu Keriso i le fanauga a tagata. O le a ou matua fiafia e maua le tino e tasi i le toetutu lea sa ou tauasa ai i taufusi, aau i vaitafe ma faimalaga ai ma galue ai e fausia le malo o le Atua iinei i luga o le fogaeleele.¹⁷

E maua mai i le talalelei le mafanafana pe a maliliu i latou e pele.

A aunoa ma le talalelei a Keriso o le tuueseeseina e le oti, o se tasi lea o mataupu silisili ona pogisa lea e mafai ona mafaufau i ai; ae ina ua maua loa le talalelei ma aoao ai i mataupu faavae o le toetutu, o le pogisa, faanoanoa ma mafatiaga ia e oo mai i le oti, i se itu uiga ese, ua aveesea. Sa masani ona ou manatu faapea, o le vaai i se tino oti, ma i le vaai atu ua taatia i le tuugamau ma ufiufi i le eleele, o se mea silisili ona pogisa i luga o le fogaeleele; a aunoa ma le talalelei e pei lava [le oti] o le puna atu i le pouliuli. Ae peitai o le vave lava ona tatou mauaina o le talalelei, o le vave [foi] lea ona faapupulaina le agaga o le tagata e ala i le musumusuga a le Silisiliese, [o le vave foi lea] o le a mafai ai e ia ona fai atu faatasi ma se tasi o anamua—“Le tuugamau e, o fea o i ai lou manumalo, Le oti e, o fea o i ai lou tui? O le tui o le oti o le agasala, ma o le meaalofa a le Atua o le ola e faavavau, e ala i le Alii o Iesu Keriso.” [Tagai 1 Korinito 15:55–57.] O le toetutu o e ua oti e faaalia mai o ia lava i luma o le mafaufau faapupulaina o le tagata, ma ua ia te ia le faavae e malolo ai lona agaga. O le tulaga lena o le Au Paia o Aso e Gata Ai i le aso. Tatou te iloa mo i tatou lava, ua tatou le o i ai i le pouliuli e uiga i lenei mataupu; ua faaalia e le Atua ia i tatou ma ua tatou malamalama i aoaoga faavae o le toetutu o e ua oti, ma ua aumaia e le talalelei le ola ma le tino ola pea i le malamalama. [tagai 2 Timoteo 1:10].¹⁸

E moni, e faigata le valavala ma a tatou uo. … O le natura o i tatou e faaali atu o tatou lagona i loimata i le tuueseina atu o tino o a tatou uo faapelepele, ma e i ai lava le tulaga tatou te oo i ai e sa’o ma tatau; ae e i ai foi tulaga matua soona fai ia e faaloloto ai [isi], ia e le tatau pe sa’o mo le Au Paia o Aso e Gata Ai ona faataitai i ai.¹⁹

Mo nai fuafuaga po o mafuaaga ou te le iloa, ua ou ola ina ia ou auai atu i maliu ma mulimuli atu i le tuugamau o le matua toatele lava o Perofeta ma Aposetolo ma le toatele foi o le Au Paia o e sa galulue i lenei Ekalesia i o latou aso ma tupulaga. … Ou te lei lagona lava se tatau ona ou faanoanoa i lo’u agaga e mulimuli atu i se Perofeta, po o se Aposetolo, po o se tasi o le Au Paia a le Atua soifua i le tuugamau o le sa faamaoni ma faatuatua i le Atua, o le sa faamaoni ma faatuatua i Ana feagaiga, o le ua mauaina le Talalelei a Iesu Keriso ma sauniga paia o le talalelei, ma le Perisitua paia. O ia alii ma tamaitai ua faataunuuina a latou misiona iinei i le lalolagi ma le mamalu, ma sa galulue, ma le alolofa, seia valaauina i latou e foi atu. Ua oti i latou i le faatuatuaga, ma o le a maua e i latou le pale o le mamalu.

O o’u lagona na i le maliu o Peresitene [Polika] Iaga, Uso [Heber C.] Kimball, Uso [Ioane] Teila, le Au Aposetolo e Toasefululua, ma tagata uma o e ua taliaina le Talalelei a Keriso ma sa faamaoni ma faatuatua i lena misiona. O loo i ai se tulaga moni faavavau—lea o le a iloaina e le lalolagi atoa—i le olaga. O loo i ai se tulaga moni faavavau i le oti. O loo i ai se tulaga moni faavavau i le toetutu, ma i le faamasinoga o lumanai, ma i fesootaiga uma a le Atua ma tagata uma i le lumanai e tusa ai ma galuega e faia i le tino; ma a ulufale atu se alii po o se tamaitai i feagaiga ma le Alii, o le ua mauaina le Talalelei ma sauniga o le talalelei, ma sa faamaoni ma faatuatua i ona aso ma tupulaga, ma ua valaauina e foi atu i le aiga i le lalolagi o agaga, o fea la le tagata e malamalama i nei aoaoga faavae ae mafai ona faanoanoa mo lena uso po o lena tuafafine?²⁰

O le Togiola a Iesu Keriso, o le a mauaina ai le malo selesitila e fanau uma o e oti ae lei taunuu i tausaga e mafai ai ona tali atu mo i latou lava.

E leai se pepe po o se tamaitiiti ua oti ae lei taunuu atu i tausaga e mafai ai ona tali atu mo i latou lava, e le togiolaina, ma o le a le oo atu lava i le faasalaga a seoli. … O le a ou tetee ma le maua’i i soo se tagata e saili i soo se tusitusiga o upumoni paia ni sauniga ua faatulagaina mo le faaolataga o fanau iti o e mama; o le a matua le manaomia e tusa ai ma ia tulaga, ma e pau lava le mea e maua ai o le tulaga na aveina ai e Iesu tamaiti laiti i ona aao ma faamanuia i latou, lea e sa’o ma e matua tonu lava e tusa ai ma le faatulagaga a le Atua. Ae o le papatisoina o tamaiti e ala i le faatulutulu, po o le mataupu faapea o tamaiti e o i seoli i soo se tulaga lava, o se mataupu na faavaeina e tagata ae le o le Atua, ma o lea la e leai se aoga ma e matua sese atoatoa ma mataga i le faafofogaaga a le Atua. E le manaomia se isi faamatalaga e uiga i tamaiti. … Ua faaolaina i latou i le toto o Iesu Keriso.²¹

O tamaiti e mama i luma o le Alii; o latou oti ma o latou mafuaaga, o loo i ai lena i aao o le Atua, ma e le tatau ona tatou faatuiese i le Alii po o ana fesootaiga ma [tagata] e ese mai i le mea na faia e Iopu. … O loo i ai se faamanuiaga e fesootai ma le mataupu—e mama i latou, e le agasala i latou. Ua latou oti e tusa ai ma tulafono o le oti ua uma ona tuuina mai e le Atua ia Atamu ma ana fanau uma; ae ina ua tuua e o latou agaga o latou tino ma oo atu i le lalolagi o agaga ua maea o latou faalavelave ma mafatiaga. … O le a toe tulai mai i latou mai o latou tuugamau i le taeao o le toetutu, … faaofuina i le mamalu, tino ola pea ma le ola e faavavau, i le matagofie ma le tautotogo faavavau ma o le a tuuina atu i latou i lima o o latou matua, ma o le a latou taliaina i latou i lo latou aiga i faatulagaga a le lalolagi selesitila, ma o o latou matua e ana i latou e faavavau. O le a ola i latou i le umi e soifua ai lo latou Atua. O lenei, i le Au Paia o Aso e Gata Ai, o e talitonu i le toetutu, e tatau ona avea ma pogai o le faamafanafanaga ma faamanuiaga.

… Atonu e tulai mai ia te a’u ma oe le fesili—“Aisea ua aveesea ai e le Alii la’u fanau?” Ae e le o se mea lena ou te ta’u atua, aua ou te le iloaina; o loo i aao o le Alii, ma sa i ai mai lava i le foafoaga o le lalolagi ma seia oo mai i le taimi lenei. O tamaiti o loo aveesea a o pepe i latou, e o sa’o lava i latou i le lalolagi o agaga. E o mai i latou iinei e faataunuu le faamoemoe o lo latou o mai, o le faaofuina i le tino faaletino. E o mai i latou ia maua se faataitaiga ma se tofi i le lalolagi; latou te maua tino, po o ni malumalu, ma o lena malumalu o le a faasaoina mo i latou, ma i le taeao o le toetutu o le a tuufaatasia agaga ma tino, ma e faapei ona i ai iinei tatou te maua ai fanau o tausaga eseese i se aiga, mai le pepe o loo susu i le tina e oo atu i le tagata matua, o le a faapena foi i le faatulagaga o le aiga i le lalolagi selesitila. O le a toe tuuina mai ia i tatou a tatou fanau e faapei o le taimi na tuu ifo ai i latou i le tuugamau, pe afai e tausisia pea e i tatou, o o latou matua, le faatuatua ma faamaonia lo tatou agavaa e mauaina le ola e faavavau; ma afai e le faamaonia i tatou, o le a faasaoina lava a tatou fanau ma latou mauaina le mamalu selesitila. O lo’u lea iloa e uiga i tamaiti pepe uma e maliliu, e tusa lava pe fanau mai o se Iutaia po o se Tagata o Nuu ese, pe amiotonu pe amioleaga. Latou te o mai mai lo latou tama e faavavau ma lo latou tina e faavavau na fanaua i latou i le lalolagi e faavavau, ma o le a toefuataiina atu i latou i o latou matua e faavavau; ma o matua uma o e taliaina fanau iinei e tusa ai ma le faatulagaga a le Atua ma le perisitua paia, e tusa lava po o le a le vaitausaga na ola ai i latou, o le a mauaina na fanau i le taeao o le toetutu, ma o le a tuuina atu i latou [fanau ua oti] ia i latou [matua o fanau ua oti] ma o le a latou [fanau ua oti] faamamaluina o latou aiga faatulagaina i le lalolagi selesitila. …

… O le a ou fai atu i a tatou uo faanoanoa, o a outou fanau ua aveesea ma outou ma e leai se mea e mafai ona outou faia, e le mafai e se isi o i tatou ona faia i ai se mea; e leai se faasalaga e tuuina atu i matua pe afai latou te faia le lelei latou te mafaia. E le tatau ona faasalaina le tina ona ua le mafai ona ia laveaiina lana tama ma’i, ma e tatau ona tatou tuuina atu nei mea i aao o le Atua. E le umi se taimi ae toe tuuina mai i latou ia i tatou. …

E tusa ai ma le tuputupu ae, mamalu ma le faaeaina o fanau i le olaga a sau e lei faaalia mai e le Atua se mea e uiga i lena mataupu ia te au, pe uiga i a outou fanau, o la’u fanau po o se fanau lava a se isi, e leai lava se isi mea vagana o le a faasaoina i latou. Ma ou te lagona e tatau ona tuuina atu lo tatou faatuatuaga i le Alii i nei mafatiaga, e tatau ona tatou faalagolago atu i lona aao ma vaai atu ia te ia mo le faamafanafanaga ma le faamanuiaga. Tatou te le faanoanoa ona o nei mafatiaga e pei o e e leai se faamoemoe; tatou te le faanoanoa ona o le aveesea o a tatou fanau e pei o le a tatou le toe vaai lava ia te i latou, aua ua uma ona tatou iloa le sa’o. Ua sili atu le aoaoina o i tatou e le Alii, ma faapena foi [ona faia] e le talalelei; o faaaliga a Iesu Keriso ua faaalia mai ia i tatou o le a toefuataiina mai i latou ia i tatou i le toetutu o e amiotonu. …

… Ou te tatalo i lo’u Tama Faalelagi ina ia faamanuia Uso ma Tuafafine Wheeler [o se ulugalii na faatoa maliliu talu ai nei le la fanau tama e fa tausaga ma le ono tausaga] i o la’ua mafatiaga, ma tuuina atu ia te i la’ua lona Agaga Paia, ina ia la taooto i lalo i le po ma tulai mai i le taeao ma misia la la’ua fanau, ae o le a la lagonaina ua tuuina atu [fanau ua maliliu] i aao o le Alii, ma iloa ai o lo latou tuueseesea ma le la fanau iti e le o se mea faavavau, ae mo se taimi puupuu o le a toe tuuina mai i ia te i la’ua. E faasino lea ia i tatou uma i le toesea o a tatou fanau. Tatou te tuuina atu i latou i le tuugamau, ae o le a latou tulai mai i le taeao o le toetutu, ma afai tatou te faatuatua i le upumoni, o le a tatou mauaina i latou ma alalaga fiafia faatasi ai ma i latou.²²

E tatau ona tatou ola i se auala o le a tatou saunia ai e mauaina faamanuiaga a le Atua o loo teuina mo i tatou pe a tatou oti.

O lo tatou taunuuga i le lumanai o loo i le isi itu o le veli. A ou oti ou te manao i le avanoa e alu atu ai i le mea o loo i ai le Atua lo’u Tama Faalelagi, ma o loo i ai Iesu Keriso, le Faaola o le lalolagi.²³

E tatau ona tatou taumafai e faaaoga tatau o tatou taimi, a tatou taleni ma o tatou avanoa a o tatou i ai i le lalolagi. Ua ou iloa o lenei lalolagi e le o so tatou nofoaga tumau. O loo i ai se faamaoniga o lenei tulaga i aso uma o o tatou olaga. E tatau ona tatou falelauasia o tatou perofeta, aposetolo, toeaina, tama, tina, taitoalua ma fanau, o ia mea uma o loo faaali mai ia i tatou e leai so tatou folafolaga e faaauau pea le olaga faaletino. Ua tatau ai nei la ona faaleleia atili le faaaogaina o o tatou taimi i le aso.²⁴

O lenei apoapoaiga e matua malosi le aafia ai o e o loo soifua, “O le mea lea ia outou nofo sauni ai.” [Mataio 24:44.] Ma e faatatau ia i tatou uma. Ua ia i tatou [le tiute] i le avea ma matua ma toeaina o Isaraelu e galulue i le galuega a le Atua, a o faatagaina i tatou e ola; ia ola ai i le malamalama ma le poto ua faamanuiaina ai i tatou. Aua ua i ai le taimi ua atofaina mo tagata uma; ma na te aveesea le toatele e tusa ai ma lona lava finagalo. O le a ia aveina le ua ia finagalo e ave, ae tuua e ua ia finagalo e tuua mo sana fuafuaga poto o loo ia te ia lava.²⁵

Pe a uma ona tatou ui atu i faanoanoaga o le olaga faaletino ma maua le olioli ma le mamalu o le malo selesitila ua tuuina mai i o tatou luga e mafai ona tatou iloa ai o mafatiaga o le olaga faaletino ua saunia i tatou ma faamalosia i tatou e talisapaia faamanuiaga ia ua saunia e le Atua mo le au faatuatua.²⁶

O la’u tatalo ia salamo lenei nuu i a latou agasala uma ma ia ola ai faaleagaga ma maua le mana e tulai mai i luma o le Alii, ina ia faafofogaina a latou tatalo, ia saunia e puipuia le malo ma aua lava nei tuulafoa’ia a latou feagaiga ma o latou uso pe faafitia foi le talalelei, ae ia mafai ona manumalo i le lalolagi ma saunia e avea ma suli faatasi ma Keriso, e tusa ai ma le atoatoaga o le uluai toetutu, lea ua saunia mo e tausia poloaiga a le Atua, o la’u tatalo lena.²⁷

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau v–ix.

Toe iloilo le faamatalaga e uiga i le maliu o Sarah Emma Woodruff (itulau 77, 79–80). O a mataupu faavae sa faamafanafanaina ma faamalosia Elder ma Sister Woodruff? O a ni mea e mafai ona tatou aoaoina mai i lenei tala?
E tusa ai ma aoaoga a Peresitene Woodruff, o a aafiaga e mafai ona tatou tulimatai i ai i le lalolagi o agaga? (Tagai itulau 80–81). E faapefea e lenei malamalamaaga ona fesoasoani ia te oe?
A o e faitau i le fautuaga a Peresitene Woodruff e uiga i le faanoanoa i le oti o e pele ia i tatou, o a aoaoga faavae o loo e iloa mai ai? (Tagai itulau 81–82) O faapefea ona e maua le filemu pe a oti i latou [tatou] te alolofa i ai? E faapefea ona tatou fesoasoani atu i isi o e faanoanoa i taimi o le oti?
E faapefea ona aveesea e le Togiola a Iesu Keriso le tui o le oti? (Tagai i itulau 81–82; tagai foi i le 1 Korinito 15:55–57; Mosaea 16:6–9.)
O a mea ua e aoaoina mai i aoaoga a Peresitene Woodruff e uiga i tamaiti laiti o e oti? (Tagai itulau 84–87.)
Toe faitau itulau 87–88. Taumafai e manatua tagata o aiga po o uo o e na foliga ua saunia ina ua oo mai lo latou taimi e oti ai. O a mea e mafai ona tatou aoaoina mai nei tagata? E tusa ai ma le aoaoga a Peresitene Woodruff, o a mea e tatau ona tatou faia e saunia ai mo le olaga i tua atu o le oti? (Tagai i itulau 87–88.)
E faapefea ona i ai se sao o aoaoga a Peresitene Woodruff i lou malamalamaaga i le oti ma le toetu?

Mau E Faatatau I Ai: 1 Korinito 15; Alema 11:42–45; 28:12; 34:32–41; Moronae 8:12–19; MFF 42:45–47; 76:50–70; 138:57

Christ emerging from tomb — Sa molimau mai Peresitene Woodruff o le Faaola o le “faapolopolo o le toetutu.”

Christ appearing to the five hundred — “O le taimi lava tatou te mauaina ai le talalelei ma aoao i le mataupu faavae o le toetu, o le a faapea loa ona aveesea le pogisa, faanoanoa ma mafatiaga lea e oo mai ona o le oti.”

Temple Hill Cemetery — I lana molimau i le Togiola a le Faaola, sa aumaia ai e Wilford Woodruff le mafanafana i matua o e ua oti a latou fanau iti.