Mataupu 12

Oa Tamaoaiga o Loo i Tusitusiga Paia

Pe a tatou suesue i tusitusiga paia i le Agaga e tasi lea na auina mai ai, tatou te maua se malamalamaaga sili atu o le finagalo o le Atua.

Mai le Soifuaga o Wilford Woodruff

Ile aso 1 o Mati, 1846, na maua ai e Elder Wilford Woodruff, o le sa auauna e avea ma pulefaamalumalu o le Ekalesia i le Atu Peretania, se tusi mai sana uo i le Iunaite Setete. Sa aofia faatasi ai ma lena tusi se kopi o se isi tusi, lea sa faataatia mai ai se fuafuaga a se tagata i le lolomiina o le Mataupu Faavae ma Feagaiga i Egelani ma malupuipuia ai le puletaofia iina mo ia lava. O le mea na faia e lenei tagata na semanu e taofia ai le lolomiina o le tusi e le Ekalesia i Egelani. Sa tusia e Elder Woodruff i lana tusi talaaga: “O lenei fuafuaga o se mea matua lototele, le alu atu o le tagata ua liliuese po o le au liliuese latou te lolomiina tusi a le Ekalesia ona gaoi ai loa lea o tupe e maua mai i le faatauina atu o ia tusi. O la’u vaai i ai e le o se isi lava mea ua na o le alofa tunoa o le Atua na faailoa mai ai lenei mea ia te au. Sa ou faaaluina le aso e iloilo ai le tulafono e vaai ai po o le a se mea ou te aoao mai ai e uiga i le malupuipuia o le puletaofia.”¹Sa ia faafaigaluegaina se lomitusi e taina ma lolomi ia kopi e 3,000 o le tusi.² Ina, ua ia mauaina se malamalamaaga e uiga i tulafono a Peretania e faatatau i le puletaofia, o lea sa ia faamalupuipuia ai loa le puletaofia i lona lava igoa i le aso 7 o Iuni, 1845, “i le fasefuluvalu itula talu ona maua itulau mulimuli mai le lomitusi.”³ O lea sa ia faasaoina mai ai ia aia tatau faaletulafono a le Ekalesia e lolomiina ai le tusi i Egelani.

E le o le taimi muamua lea na galue ai Wilford Woodruff ina ia maua e le Au Paia o Aso e Gata Ai ia tusitusiga paia. A o lei taitai lava lolomiina le Mataupu Faavae ma Feagaiga, sa ia kopiina le tele o faaaliga faatusilima ma ave i ana femalagaaiga faafaifeautalai. A o ia auauna i lana uluai misiona i Egelani, mai ia Ianuari 1840 seia oo atu ia Aperila 1841, sa latou galulue ai ma Peresitene Polika Iaga ma isi e lolomi le lomiga muamua o le Tusi a Mamona i fafo o le Iunaite Setete. Sa mulimuli ane ona ia fesoasoani i le Perofeta o Iosefa Samita i Navu, Ilinoi, e faatulaga mataitusi mo le lolomiina o le tusi a le Ekalesia na faaulutalaina Times and Seasons. I le va o Mati 1, 1842, ma Ianuari 16, 1843, sa maua ai i totonu o le Times and Seasons ia tusitusiga ia na faatoa maua i le tele o tausaga mulimuli ane i totonu o le Penina Tau Tele: o le tusi a Aperaamo; Iosefa Samita—Talafaasolopito; le tusi a Wentworth, lea e maua ai Mataupu Faavae o le Faatuatua; ma se vaega o le tusi a Mose.

I lona fesoasoani ai ina ia maua e le Au Paia ia tusitusiga paia, sa uunaia i latou ina ia “teuina i o [latou] loto.”⁴ Sa ia faapea mai: “E tatau ona tatou ola i aoaoga a la tatou lotu. E tatau ona tatou ola i tatou lava i mea tatou te talai atu. E tatau ona tatou teuina upu o le ola. E tatau ona tatou suesue faamaumauga o upumoni paia. E tatau ona tatou saili ia malamalama i le vaitaimi ma le augatupulaga o loo tatou ola ai. O la’u vaaiga lea i lo tatou tulaga i le aso. Ou te le vaai atu i faaaliga ua faamaumauina i nei tusi, o loo aoao mai ai le augatupulaga o le atoatoaga o taimi, e pei o se mea e mavae atu e aunoa ma le faataunuuina.”⁵

Aoaoga a Wilford Woodruff

E tatau ona tatou aoaoina upumoni o loo i tusitusiga paia, faatauaina i o tatou loto, ma faataitai ai i o tatou olaga.

Faitau le Tusi Paia, le Tusi a Mamona, le Mataupu Faavae ma Feagaiga ma tusitusiga ua tuuina mai e le Alii ia i tatou, ma faaputuina nei faaaliga ma vaai po o a [mea] ua folafola mai e le Alii ia i tatou. Ona tatou teu ai lea o ni mea taua ia i tatou.⁶

O lo tatou tiute … i le avea ma Au Paia o Aso e Gata Ai le mafaufau loloto, le tomanatu, le faitau o le afioga a le Atua, ma taumafai e malamalama i lo tatou laasaga, lo tatou tulaga, ma lo tatou tiutetauave i luma o le Alii.⁷

O loo mamao le lalolagi mai le Alii. O i tatou lava o se nuu o loo ua mamao tele lava mai le Alii. E tatau ona tatou faalatalata atu i le Alii, ma galulue ina ia maua le Agaga Paia, ia tatou faitauina faaaliga a le Atua ia tatou faitauina e ala i le Agaga lava e tasi lea na tuuina mai ai [na faaaliga]. Ona tatou malamalama ai lea i lo latou [uiga] pe a tuuina atu i le fanauga a tagata.⁸

O le tiapolo o loo i ai i le atulaulau i le lalolagi, ma o le a ia faaumatia tagata uma e mafaia e ia. Suesue tusitusiga paia ia ua aumai sao lava ia i tatou, faapea foi na o loo i le Tusi Paia, ma aoao ia malamalama i le mafaufau ma le finagalo o le Atua, lea e mafai ona tatou faia e ala i le faitauina pe a i ai le malamalama o le Agaga Paia i totonu ia i tatou, ma saunia ai outou lava mo mea uma o le a tutupu i le olaga.⁹

O nei mea [mataupu faavae ua aoao mai i tusitusiga paia] e moni ia. E tatau ona tatou suesueina; teuina i o tatou loto, ma faaaoga i o tatou olaga.¹⁰

O Perofeta, Aposetolo ma Peteriaka ua tuua a latou tusitusiga musuia i tusi mo lo tatou faaaogaina ma lo tatou manuia, ma o le a faamasinoina i tatou i le faaaogaina o lo tatou saolotoga i le ala tatou te taulimaina ai le Afioga a le Atua lea ua tuuina mai ia i tatou.¹¹

O le Tusi Paia ma le Tusi a Mamona ua tuufaatasia e folafola atu ai le atoatoaga o le talalelei.

Ou te le ma e faailoa atu o a’u lava o se tasi e talitonu maumaututu i le faataunuuina patino o le Tusi Paia, faapea ma fesootaiga uma a le Atua i tagata. … Ou te talitonu o alii paia o anamua sa tusitusi ma saunoa e tusa ai ma le uunaiga mai i le Agaga Paia, ma sa faamaoni i latou i mea sa latou ta’u mai, ma … “ua leai se valoaga o i le Tusi e faamatalafuaina.” [2 Peteru 1:20.]¹²

Ou te molimau atu o Iosefa Samita sa faatuina e le Atua Silisiliese e avea ma se Perofeta i le augatupulaga mulimuli ma le atoaga o taimi; sa ia aumaia le Tusi a Mamona ma faaliliuina i le meaalofa ma le mana o le Atua mo le manuia o le lalolagi i aso e gata ai. Ou te iloa o le Tusi a Mamona e moni ma o se tusi sa musuia mai le lagi.¹³

Ua ia i tatou le Tusi Paia—le laau a Iuta—o loo i ai le tulafono a le Atua na auala mai ia Mose ma perofeta ma peteriaka anamua. Ua faasolo mai ia i tatou i le afe ma afe o tausaga ua te’a ma mavae atu. Ina ua faatafunaina ia faletusi, e pei o le fale tusi o Alexandria, [Aikupito], sa faasaoina le Tusi Paia mo i tatou, ma ua i ai ina ia tatou faitauina. Ua tuuina mai ai ia i tatou le tulafono a le Atua sa tuuina atu anamua. Ae e leai lava se suiga i lena tulafono, e tusa ai ma le talalelei, mai lena aso e oo mai i lenei aso. O le Tusi Paia— le Feagaiga Tuai ma le Feagaiga Fou—e aumaia ia i tatou le tulafono lea e mafai ai ona faaeaina i tatou ma toe foi atu i le afioaga o le Atua ma ola ai ma Ia e faavavau faavavau lava. E tuuina mai ia i tatou le ala e tatau ona tatou mulimuli ai ina ia tatou maua se vaega o le uluai toetutu, ina ia tatou tulai mai ua faaofuina i le mamalu, tino ola pea ma le ola e faavavau. E aumaia foi ia i tatou le talafaasolopito, e le gata i mea ua mavae e uiga ia Iutaia, ae faapea foi mea o le a tutupu. Ona i ai foi lea ia i tatou o le Tusi a Mamona—le laau a Iosefa i le lima o Efaraima—lea sa tusiaina i le konetineta [o Amerika] e aposetolo ma perofeta. O loo i ai, faatasi ma isi mea, ia aoaoga a Iesu Keriso ina ua ia faaali mai ina ua mavae lona toetu, i lona tino ola pea ma le mamalu, ma aoao mai le talalelei iinei. O na faaaliga sa i ai le anoanoai o aoaoga faavae. Latou te faaali mai ia i tatou mea o le a tutupu i aso gataaga i le lalolagi, le tulaga o Papelonia le sili ma faamasinoga ia o le a tutupu i aso gataaga ao lei afio mai le Atalii o le Tagata.¹⁴

Ua fai mai Esekielu faapea o aso gataaga o le laau a Iosefa i lima o Efaraima e tatau ona tuu faatasi ma le laau a Iuta, e vaai i ai malo e ala i le aao o le Alii, mo se faamoemoega faapitoa—ina ia faapotopotoina le aiga o Isaraelu i aso e gata ai [tagai Esekielu 37:15–28]. O nei tusitusiga e lua sa tatau foi ona faaaogaina ina ia talai atu ai le atoatoaga o le talalelei e faavavau ia Iutaia ma Nuuese; ma o le a tulai i latou i le faamasinoga faatasi ma le augatupulaga o loo ola i le lalolagi i le taimi e tulai mai ai i latou.¹⁵

O le Tusi Paia lenei, le faamaumauga a Sa Iutaia, sa tuuina mai i le musumusuga a le Alii e ala mai ia Mose ma peteriaka ma perofeta anamua. O se mea pepelo ea, e pei ona fai mai ai le au le talitonu, se galuega ea a se tagata? E leai, e le o i ai i le mana o se tagata ua manavaina le manava o le ola e faia sea tusi e aunoa ma le musumusuga a le Silisiliese. O le tulaga lea o le Tusi a Mamona—o le poto uma o tagata uma i lalo o le lagi e le mafai ona tusia ma tuuina mai i le lalolagi se tusi e pei o le Tusi a Mamona. O ana aoaoga faavae e paia—e mai le Atua. E le mafai lava ona tupu mai i se mafaufau o se tagata pepelo, pe mai le mafaufau o se tagata tusi tala. Aisea? Aua o folafolaga ma valoaga o loo i ai o loo faataunuuina i luga o le fogaeleele uma.¹⁶

Pe ese ea se talalelei o loo i le Tusi a Mamona mai lena o loo i le Tusi Paia? E leai. O loo aumaia ai se talafaasolopito o se nuu lea sa ola i le konetineta [o Amerika] anamua, o loo ta’u mai ai le mea na latou o mai ai ma faapefea ona latou o mai iinei, o loo ta’u mai ai fesootaiga uma a le Atua ma i latou, ma le faavaeina o le Ekalesia a Keriso ia i latou. Sa asiasia i latou e Iesu ina ua mavae Lona toetu. O lea na ia fetalai ai, “O loo ia te a’u foi isi mamoe e le o i lenei lotoa; e tatau ona ou ta’ita’iina mai o i latou foi, e faalogo foi i latou i lo’u leo, ona tasi ai lea o le lafu mamoe, ma le leoleo mamoe e toatasi.” [Ioane 10:16] … O tusi uma e lua o loo i ai le talalelei e tasi. E lei i ai lava nisi ua na o le tasi le talalelei ma o le a le i ai lava nisi e faaalia mai i tagata.¹⁷

O le Mataupu Faavae ma Feagaiga o la tatou molimau i aso e gata ai.

O loo i ai foi ia i tatou le Tusi o Mataupu Faavae ma Feagaiga, lea o loo i ai i o outou fale ma lea e mafai ona outou faitauina. O lenei faatulagaga o faaaliga sa tuuina mai e ala i le fofoga o le Perofeta o Iosefa Samita, e ala i le Urima ma le Tumema ma isi. O lena tusi o loo i ai nisi o mea sili ona mamalu ma faaaliga sili ona faagaeetia ua tuuina mai e le Atua i tagata. E faaali mai ia i tatou mea o loo i o tatou lumanai, o a mea o loo faatali mai i lenei atunuu ma atunuu uma o le lalolagi, ma mea o loo ua i faitotoa o tagata o le lalolagi. O nei mea e manino, e tuusao mai, e malolosi, ma o faaaliga ia mai le Atua, o le a faataunuuina, e tusa pe talitonu i ai tagata pe leai.¹⁸

Ua ou umia i lo’u lima le Mataupu Faavae ma Feagaiga, o loo i ai faaaliga sa tuuina mai e ala i le Perofeta o Iosefa Samita ao soifua o ia i la le tino. Faitau na faaaliga, ma e mai le amataga i le faaiuga latou te faatasia ma augatupulaga uma ua tuuina mai e le Atua i le lalolagi.¹⁹

Ou te mafaufau faapea o le Mataupu Faavae ma Feagaiga, la tatou Molimau, o loo i ai le faatulagaga o folafolaga sili ona mamalu, sili ona faale-Atua ua faia mo le aiga o le tagata. Ou te talanoa e uiga i le “Faaaliga” [i le vaega 76] na o ia, o se faaaliga lea ua sili atu le malamalama, sili atu upumoni ma sili atu aoaoga faavae ua ia aumaia nai lo se isi lava faaaliga o i ai i se isi lava tusi ua tatou faitauina. Na te faamaninoina mai i lo tatou malamalamaaga e uiga i lo tatou tulaga i le taimi nei, o fea na tatou o mai ai, aisea ua tatou i ai iinei, ao fea foi tatou te agai i ai. E mafai ona iloa e soo se tagata e ala i faaaliga lana vaega ma lona tulaga o le a i ai. Aua e iloa e tagata uma tulafono latou te tausia, ma o tulafono e tausia e tagata iinei o le a iloa ai lo latou tulaga mulimuli ane; o le a faasaoina i latou e na tulafono ma maua ai faamanuiaga e o i latou.²⁰

O le Mataupu Faavae ma Feagaiga [o] se faatulagaga o faaaliga ia sa tuuina mai e le Alii ia Iosefa Samita. O lenei tusi o loo i ai nisi o faaaliga silisili ona mamalu e uiga i mataupu faavae, e uiga i aoaoga faavae, e uiga i pulega faalemalo, e uiga i le malo o le Atua ma mamalu eseese, ma uiga i isi mau mea e tele ia e oo atu i le lalolagi faavavau.²¹

O le Penina Tau Tele o loo i ai upumoni mamalu sa faaalia i le Perofeta o Iosefa Samita.

Faaaliga: O le tele lava o le soifuaga o Wilford Woodruff, e lei avea ai le Penina Tau Tele o se tasi o tusitusiga faavae o le Ekalesia. Ae peitai, o aoaoga [o loo i le Penina Tau Tele] sa faitau faalauaitele e le Au Paia, faatasi ai ma isi tusitusiga sa uluai lomia i nisi o mekasini a le Ekalesia. I le aso 10 o Oketopa, 1880, sa avea ai le Penina Tau Tele ma se tusi faavae o le Ekalesia e ala i se fuafuaga a le Au Peresitene Sili ma le palota lagolago i le konafesi aoao.

I faamatalaga nei mai lana tusi talaaga, sa faaalia ai e Elder Woodruff lana molimau e uiga i le tusi a Aperaamo, lea sa faaliliuina e le Perofeta o Iosefa Samita e ala i le mana o le Atua ma lea sa faaopoopo mulimuli ane ai i le Penina Tau Tele.

O loo ua faamanuiaina e le Alii ia Iosefa i le mana e faaali mai ai mea lilo o le malo o le Atua, e faaliliu … faamaumauga anamua ma tusitusiga i ata faaAikupito anamua ua leva e pei o Aperaamo po o Atamu, lea e faapogai ai le mu o o tatou loto a o tatou vaaia le tatala mai o nei upumoni mamalu ia i tatou. O Iosefa le Tagatavaai ua ia tuuina mai ia i tatou ni vaega o le tusi a Aperaamo, lea sa tusia i le aao o [Aperaamo] lava ia ae sa natia mai le iloa o tagata mo le fa afe tausaga ua tuanai ae o lea ua aumaia i le malamalama e ala i le alofa tunoa o le Atua.²²

O upumoni o loo i le tusi a Aperaamo e matua faagaeetia, matautia, ma mamalu, ia o loo i ai faatasi ma oa maoae ia ua faaalia mai ia i tatou i aso gataaga.²³

O valoaga o loo i tusitusiga paia e mafai ona fesoasoani ia i tatou e saunia ai mo mea o le a tutupu i aso mulimuli.

Uso e ma tuafafine, ia tatou faitau faaaliga a le Atua mo i tatou lava, ma pe a tatou faitauina, ia tatou talitonu i ai ma taumafai e ola i se auala o le a saunia ai i tatou mo soo se faamanuiaga lava ua saunia e le Alii mo i tatou, ma ia mafai ai ona tatou faailoaina lona aao e pei ona faia e Iopu, ma ia aua nei o tatou tauseseina o ia ona o ana faatinoga o soo se mea mo i tatou. Afai e le mafai ona tatou malamalama ai i le taimi lenei, o le a mafai ona tatou malamalama i se taimi lata mai.²⁴

“O ai ea a’u, ua faapea mai ai le Alii, e ta’umamaina ai le le tausia o a’u poloa’iga? Po o ai ea a’u, ua faapea mai ai le Alii, ua folafola atu a e le faataunuuina?” [Tagai MFF 58:30–32.] … Ua tatou faapea, mai lea taimi i lea taimi, mai lea tausaga i lea tausaga, faapea o loo tatou ola i se tupulaga ma augatupulaga matua tulaga ese, ma e moni lava lea. E mavae atu taimi, ma mou atu ai ma ona mea tutupu, ma faataunuuina faaaliga a le Atua, aemaise lava ia i tatou. O loo tatou ola i se vaitaimi o le pouliuli; o loo ua ufitia le lalolagi i le le talitonu ma le le faatuatua. … Ua maofa le Au Paia o Aso e Gata Ai i le vaai atu i le tele o le pouliuli ma le le faatuatua o loo ua i le atulaulau i le lalolagi. O le mea lea, i le avea ai ma Au Paia o Aso e Gata Ai, ou te manatu ua manaomia i la tatou vaega ona faateleina le faatuatua i le faatinoina o o tatou talitonuga, faapea foi i faaaliga eseese a le Atua ua i totonu o le Tusi Paia, Tusi a Mamona ma le Tusi o Mataupu Faavae ma Feagaiga.

Ua tatou vaai atu i o tatou luma, mai lea tausaga i lea tausaga, i faailoga o le lagi ma le lalolagi, ma le faataunuuina o valoaga, ae i le avea o se nuu, o le a le tele o loo faatupuina ai lo tatou faatuatua i le Atua? O loo faateleina ea lo tatou faatuatua ia talafeagai ma le faateleina o le le faatuatua i le lalolagi? Atonu e le o a’u o se faamasino, ae e foliga mai ia te a’u tatou te le o malamalama. O le galuega o loo ua tatou i ai, ma le Tusi Paia, Tusi a Mamona ma le Tusi o Mataupu Faavae ma Feagaiga ua moni i le aso e pei lava ona sa i ai i le luasefulu, tolusefulu, po o le fasefulu tausaga talu ai. … Ou te fai atu o lenei galuega ua moni i le taimi lenei e pei lava o taimi na, ma faapena foi le faaupuga lea sa ou siiina mai—“O ai ea a’u, ua faapea mai ai le Alii, ua ta’umamaina ai le le tausia o a’u poloa’iga? Po o ai ea a’u, ua faapea mai ai le Alii, ua folafola atu ae le faataunuuina?” Ou te talitonu o le a faataunuuina e le Alii mea ua ia fetalai mai ai; ou te talitonu o le a ia faataunuuina ana folafolaga i le Au Paia o Aso e Gata Ai mai le lalolagi, ia Siona ma Papelonia; ma afai e faia e ia ua i ai foi se mea i le faitotoa, se mea mo i tatou, o le Au Paia o Aso e Gata Ai, e faia.²⁵

Ou te fia faapea atu i le Au Paia o Aso e Gata Ai: Faatino le faatuatua i le Atua, ma faatino le faatuatua i Ana faaaliga, ma faitau na faaaliga ma manatunatu loloto i ai ma tatalo faatauanau ina ia outou maua le malamalamaaga sa’o o mea uma ua faaalia e le Atua, ina ia outou ola i le malamalama ma le atamai o le Atua, ma iloa le taua o le ola i le talalelei ma le ola ma le amiotonu i Ona luma.²⁶

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

O le a sou manatu o le a le uiga o le faitau ia tusitusiga paia ‘e ala i le Agaga lava e tasi lea na tuuina mai ai i latou”? (tagai itulau 120–121).
Toe iloilo le parakalafa muamua i le itulau 121. E faapefea ona ofoina mai e tusitusiga paia le puipuiga mai i uunaiga a le tiapolo?
I le parakalafa lona lua i le itulau 121, ua fautua mai Peresitene Woodruff ia i tatou e faia mea e tolu i tusitusiga paia. Aisea ua taua ai ia gaoioiga?
Aisea e taua ai le suesue uma o le Tusi Paia ma le Tusi a Mamona? (Tagai i itulau 121–123; tagai foi i le 1 Nifae 13:40; 2 Nifae 3:12.)
O le a se mea e uiga i le molimau a Peresitene Woodruff o le Mataupu Faavae ma Feagaiga ua iloga na aafia ai ou lagona? (Tagai itulau 123–124). O a ni ala ua avea ai le Mataupu Faavae ma Feagaiga ma a “tatou Molimau”?
Na saunoa mai Wilford Woodruff o upumoni o loo i le tusi a Aperaamo o “oa maoae” (itulau 125). O a ni oa ua e maua i le Penina Tau Tele?
E faapefea ona fesoasoani tusitusiga paia e saunia i tatou “mo mea uma o le a tutupu i le olaga”? (Tagai itulau 121, 125–126).
O le a se mea ua e faia e avea ai au suesuega o tusitusiga paia ia loloto atu? O a ni mau ua sili lava ona fesoasoani ia te oe? E faapefea ona fesoasoani nei mau ia te oe?
E mafai faapefea e matua, matua o matua, ma faiaoga ona fesoasoani i fanau iti ma le autalavou e aoao tusitusiga paia ma faaaoga i o latou olaga?

Mau E Faatatau I Ai: 1 Timoteo 4:13–16; 2 Timoteo 3:16; 1 Nifae 15:24; Helamana 3:29–30; Moronae 10:3–5

woman studying scriptures — “E tatau ona tatou faatauaina upu o le ola. E tatau ona tatou suesue i faamaumauga o upumoni paia.”

Wilford Woodruff’s signature in the Book of Commandments — O le Tusi o Tulafono, o se tuufaatasiga muamua o faaaliga ia Iosefa Samita. O lenei kopi o le tusi o loo i ai le saini a Wilford Woodruff.