Mataupu 24

Saunia mo le Afio Mai Faalua o Iesu Keriso

A o tatou faatalitali i le toe foi mai o le Faaola e nofotupu i le lalolagi, e tatau ona tatou saunia i tatou lava taitoatasi, o se aiga, ma se nuu.

Mai le Soifuaga o Wilford Woodruff

I se lauga i se konafesi aoao ia Aperila 1950, sa faapea mai Elder Richard L. Evans o le Korama a le Au Aposetolo e Toasefululua: “Ou te manatuaina se faamatalaga na lipotia mai, e pei ona ou manatuaina, sa faamamaluina ma amanaiaina ai, ia Peresitene Wilford Woodruff. O nisi o le usoga sa i ai i lona taimi sa faapea ona latou oo atu ia te ia… ma fesiligia o ia po o le a sona lagona pe o afea le iuga o le lalolagi—o afea e afio mai ai le Matai? Ou te manatu atonu e le o ana upu tonu ia, ae o loo faaali mai ai le agaga o lana tali na ta’ua mai: “O le a ou ola e faapei o le a oo mai taeao—ae o loo o’u totoina pea a’u laau ‘aina [cherry]!”¹

E ui lava atonu e le o upu tonu ia a Peresitene Woodruff, ae latou te faaataata maia ona lagona e uiga i le Afio Mai Faalua o Iesu Keriso. Sa ia faailoa mai: “Ou te le manatu e mafai e se tasi ona iloa le itula o le afio mai o le Atalii o le Tagata. … Tatou te le tau vaavaai foi mo le taimi o lena tulaga ina ia faailoa mai.”² Ae peitai, sa ia tulimatai i le toe afio mai o le Faaola e nofotupu i luga o le fogaeleele. Faatasi ai ma se molimau ua faavaeina i le Ekalesia i aso gataaga, sa ia aoaoina le Au Paia faatasi ai ma se uunaiga faatopetope, i le apoapoai atu lea ia i latou e saunia mo le Afio Mai Faalua o le Faaola. “O faailoga uma i le lagi ma le lalolagi e faailoaina uma mai le afio mai o le Alii o Iesu Keriso,” o lana saunoaga lea. “Afai e tatalaina lo’u mafaufau i lalo o le uunaiga a le Agaga o le Atua e malamalama i nei mea, e tele taimi ou te maofa ai ma ou manatunatu, ona e le gata i le lalolagi ae ia i tatou lava ia, ona tatou te le o matua popole ma filiga e saunia i tatou lava ma o tatou aiga mo ia mea ua i o tatou faitotoa, aua e ui foi ina mavae atu le lagi ma le lalolagi, a e leai lava se iota po o sina fasi mataitusi o le afioga a le Alii o le a le faataunuuina.”³

Aoaoga a Wilford Woodruff

Ua tatou i ai nei i aso mulimuli, ma e tatau ona tatou mataala mo faailoga o le Afio Mai Faalua o le Faaola.

O le a ou fai atu i le Au Paia o Aso e Gata Ai, i le avea ai ma se toeaina o Isaraelu ma se aposetolo a le Alii o Iesu Keriso, ua tatou agai atu nei i ni faamasinoga sili ona matautia ua sasaaina mai e le Atua i luga o le lalolagi. Ia outou mataala mo faailoga o taimi, le faailoga o le afio mai o le Atalii o le Tagata. Ua amata ona faaali mai i le lagi ma luga o le fogaeleele. … Ua tatou lalata atu i nei mea. E pau lava le mea e faia e le Au Paia o Aso e Gata Ai o le filemu, faaeteete ma faautauta i luma o le Alii, mataala mo faailoga o taimi, ma ia faamaoni ma faatuatua; ma a taunuu outou i ai, o le a outou malamalama i le tele o mea tou te le o malamalama ai i le taimi nei. … Ua tatou i ai nei i le augatupulaga faaiu ma le atoaga o taimi. O se aso matautia, ma o fofoga uma o le lagi o loo i luga o i tatou, faapea ma fofoga o le Atua lava ia ma peteriaka uma ma perofeta. O loo silasila mai i latou i luga ia te outou faatasi ma lagona loloto o le popole alofa, mo lo outou manuia; ma o o tatou perofeta o e sa fasiotia, ma faamaufaailogaina a latou molimau i o latou toto, o loo mau nei ma Atua, ma aioi atu i ai mo o latou uso. O le mea lea, ia tatou faatuatua, ma tuu mea e tutupu i aao o le Atua, ma o le a ia tausia i tatou pe afai tatou te faia lo tatou tiute.⁴

O le a afio mai le Alii o Iesu Keriso e nofotupu i luga o le fogaeleele. Atonu e faapea mai le lalolagi o loo faatuai lona afio mai seia oo mai le gataaga o le lalolagi. Ae latou te le iloaina manatu ma ala o le Alii. O le a le faatuai e le Alii lona afio mai ona o lo latou le talitonu, ma o faailoga uma i le lagi ma le lalolagi ua faailoa mai ua latalata mai. O laau o le mati ua tautotogo mai i luma o atunuu uma o le fogaeleele [tagai i le Iosefa Samita—Mataio 1:38–40], ma a na faapea e ia i latou le Agaga o le Atua semanu ua latou vaai ma malamalama ai.⁵

E mafai ona tatou aoao e uiga i faailoga o le Afio Mai Faalua e ala i le suesueina o tusitusiga paia.

Afai o loo manao le lalolagi e fia iloa po o le a le mea o le a faataunuuina, ia latou faitau i le Tusi Paia, o le Tusi a Mamona, ma le Mataupu Faavae ma Feagaiga; ia latou faitau [i] faaaliga a Ioane. A o faapea ona soifua le Atua, o le a faapea foi ona faataunuuina lava. E leai lava se mea e tasi ua ta’u mai o le a le faataunuuina. Ma o le aao o le Atua ua amata ona faaali mai i le lalolagi. Ua i faitotoa le faamasinoga; o loo faatalitali atunuu o le lalolagi mo mala; ae tatau lava ia i tatou ona saunia e tutu i nofoaga paia a o faaalia mai faamasinoga a le Atua i le lalolagi.⁶

Ua ta’u mai ia i tatou i le mataupu e 24 o le Mataio, faapea o Iesu, i se tasi taimi patino, sa ia aoao atu i ona soo le tele o mea e uiga i lana talalelei, o le malumalu, sa Iutaia, o lona afio mai faalua ma le iuga o le lalolagi; ma latou fesili ai ia te ia—Le Matai e, pe se a foi le faailoga o ia mea? Sa tali atu le Faaola ia te i latou, i se auala puupuu lava. Talu ai o lea sa ou manatunatu loloto i lenei mea ua ou lagona ai e faitau atu se vaega o le afioga a le Alii ia i tatou, lea o loo faamatala auiliili mai ai lenei mataupu nai lo le faamatalaina e le Faaola i ona soo. O le vaega lena o le afioga a le Alii lea o le a ou faitauina atu, o se faaaliga na tuuina mai i le Au Paia o Aso e Gata Ai, 7 Mati, 1831. [Ina ua maea lenei faamatalaga, sa faitauina e Elder Woodruff le faaaliga o loo ua i ai nei i le vaega e 45 o le Mataupu Faavae ma Feagaiga.]…

O loo tatou ola i se augatupulaga fou, e ui lava e moni o loo i ai le tele naua o mea taua e tutupu e oo mai i nei aso. Ae tasi lava le mea o loo mautinoa, e ui e lei faaalia mai e le Alii le aso po o le itula o le a afio mai ai le Atalii o le Tagata, ae ua ia tofia le augatupulaga, ma faailoga ua amata ona faaalia mai i le lagi ma le lalolagi e avea ma faata’imuaga o lena mea tele ma le matautia o le a tupu, ma o le a faaauau pea seia oo ina faaatoatoaina. Afai o i tatou, o le Au Paia o Aso e Gata Ai, tatou te mananao i soo se mea e uuna’ia ai i tatou, ia tatou faitau le Tusi Paia, o le Tusi a Mamona ma le Tusi o Mataupu Faavae ma Feagaiga; o loo lava ni mea o i ai e faamalamalama ma aoaoina ai i tatou i mea a le Atua. Ia faatauaina faaaliga a le Atua ma le talalelei a Keriso o loo aofia ai iina.⁷

O le a outou maua le tele o valoaga e uiga i lona afio mai, e pei o le—“Ou te vave sau,” “Ou te taalise atu i se ituaso e te le manatunatu ai,” “Ua latalata mai lo’u toe sau,” “Ou te sau e pei o le gaoi i le po,” “Ou te sau i le itula e te le o faatalitali ai mo a’u,” ma “Amuia le o loo faatalitali ma tulimatai atu i le afio mai o lo tatou Alii ma lo tatou Faaola o Iesu Keriso.” Ou te fai atu o loo i ai i le atoaga o Tusitusiga Paia—le Feagaiga Tuai ma le Feagaiga Fou, o le Tusi a Mamona ma le Tusi o Mataupu Faavae ma Feagaiga, o loo ta’ua pea lava pea le afio mai faalua o le Alii; ae pe ua folafola mai ea e le Alii nei mea e aunoa ma sona faamoemoe e faataunuuina? E leai, na te lei faia faapena, o le a faataunuuina lava.⁸

I le avea ai ma tagata o le feagaiga a le Alii, o la tatou matafaioi le saunia o le ala mo Lona Afio Mai Faalua.

Ou te fia fesili po o ai o loo saili mo le faataunuuina o nei mea e tutupu, ae o ai i luga o le fogaeleele o loo saunia i latou lava mo le faataunuuina o le afioga a le Alii e ala mai i fofoga o perofeta, peteriaka ma aposetolo mo le ono afe tausaga ua mavae? E leai se tasi ou te iloa, [vagana] le Au Paia o Aso e Gata Ai, ma ou te lagona lava e a’u e le o lava ona tatou mataala e pei ona tatau ona tatou i ai, ma e le o lava foi ona tatou saunia e pei ona tatau ona tatou i ai mo mea matautia e tutupu lea ua oo mai i le lalolagi i nei aso e gata ai. O ai nisi e mafai ona faamoemoe le Alii ua saunia mo lona afio mai faalua nai lo lana Au Paia? E leai lava nisi.⁹

O loo i ai se galuega maoae a le Alii o loo i luma ma o loo ia sauniunia se nuu e faia a o lei oo i lona afio mai. O lenei ua tulai mai le fesili iinei, uso e ma tuafafine, pe o saunia ea i tatou i o tatou loto? Pe o tatou iloa ea nei mea? I le avea ai ma se nuu, pe o tatou iloa ea o tatou tiutetauave i luma o le Alii? Ua faatuina e le Alii se malo o ositaulaga iinei i aso mulimuli e faavaeina lana ekalesia ma lona malo, ma ia saunia ai le ala mo le afio mai faalua o le Atalii o le Tagata, ma o le Atua o le lagi ua tuuina mai i lima o ana auauna ia ki o le malo, ma ua ia faapea mai—“O mea uma ua faatulafonoina e a’u o le a faataunuuina i a’u auauna, aua ua tuuina atu ia te i latou le mana e faamaufaailogaina i le lalolagi atoa ma i le lagi, seia oo i le aso e liligi atu ai e le aunoa le toasa o le Atua Silisiliese i luga o le lalolagi.” [Tagai i le MFF 1:7–9.]

I le tele o taimi ou te manatu ai, o i tatou o toeaiina o Isaraelu ma o le Au Paia o Aso e Gata Ai, tatou te matuai le malamalama lava i lo tatou tulaga i luma o le Alii. O le galuega o loo manaomia i o tatou lima e matautia ma maoae; o le galuega a le Atua Silisiliese. O le a faamasinoina i tatou i le tuuina atu o le talalelei a Keriso i atunuu uma o le lalolagi. … O le a faamasinoina i tatou mo nei mea uma ma le fausiaina o malumalu i le Silisiliese, lea e mafai ai ona tatou ulufale atu ma faataunuuina ai sauniga mo le faaolataga o o tatou tagata ua maliliu. …

… Ua faafia ona aioi mai le Alii i atunuu o le lalolagi e tuuina atu ia i latou le mamalu selesitila, ma le mamalu, ma le tino ola pea, ma le ola e faavavau? Ua ia aioi mai ia i latou mo le ono afe tausaga ua mavae, ma ua ia faatuina mai ana auauna mai lea taimi i lea taimi ma valaau mai i tagata o le lalolagi e saunia i latou lava mo le aso tele o lona toe afio mai faalua, o loo ua latalata mai. O loo valaau atu o ia ia i latou ma le leotele i le taimi nei; ma e pei ona ou fai atu nei i nisi o o’u uso, o loo fia silafia nei e le Alii pe o naunau le Au Paia o Aso e Gata Ai e galulue faatasi ma ia pe leai. O se aso lava o le faia o faaiuga.¹⁰

A o lei afio mai Keriso ua matua tatau lava ona saunia se nuu e ala i le faapaiaina i luma o le Alii. Ua matua tatau ona fausia malumalu; ua matua tatau ona atiina ae Siona; e tatau lava ona i ai se nofoaga o le saogalemu mo le nuu o le Atua a o faapea ona oo atu lana faamasinoga i nuu uma o le lalolagi, aua o faamasinoga a le Atua o le a oo atu i le lalolagi, e leai se faaletonu o lena tulaga; o faaaliga o loo tumu i folafolaga e faatatau i lenei mea, ma e pei ona folafola mai e le Alii, o le a ia le toilalo lava i le tausia o lana afioga.¹¹

Ou te manatu tatou te le o malamalama i le tele o lenei galuega. O se mataupu faigata ona tatou malamalama ai i le tiutetauave o loo ia i tatou i le Atua, i lagi, i e ua oti, faapea foi e o loo ola o o tatou uso a tagata.

O lenei, a ou vaai atu i nei mea, ou te vaai foi po o le a le mea o loo i o tatou luma. O faalapotopotoga, ua faavaeina i lenei Ekalesia mai le amataga, o feasoasoaniga uma ma pulega, o loo fesootai faatasi ina ia tauaveina atu lenei galuega maoae. O fofoga o le lagi o loo i luga o i tatou. O le Alo o le Atua ma Perofeta ma Peteriaka uma sa soifua i luga o le fogaeleele o loo vaavaaia lenei galuega maoae—i lenei faalapotopotoga maoae o loo saunia mo le afio mai o le Atalii o le Tagata.¹²

E tatau ona saunia i tatou lava taitoatasi mo le Afio Mai Faalua o Iesu Keriso.

O loo tatou ola i se augatupulaga taua. O valoaga e faatatau i o tatou taimi ua oo mai ia i tatou; pe ua tatou saunia ea e faafetaiaia?¹³

O le Faaola… sa faatusatusaina le malo o le Atua i taupou e toasefulu, o e na ave a latou lamepa ma latou o atu e faafetaiai i le faatoafaiava [tagai i le Matai 25:1]. “Ma ua popoto le toalima o i latou, a e valelea le toalima. O e valelea ua ave a latou lamepa, a e lei avea ma ni suauu. A o e popoto ua ave ni suauu i a latou fagu faatasi ma a latou lamepa. Ua tuai mai le faatoafaiava, ona taufai tulemomoe ai lea o i latou uma, ua momoe lava. A ua oo i le tulua o po, ona sau ai lea o le alaga, Faauta, ua sau le faatoafaiava; ina o ia outou e faafetaiai ia te ia. Ona tutu ai lea o ia taupou uma lava, ma saunia a latou lamepa. Ona fai atu ai lea o e valelea i e popoto, Au mai ni a outou suauu ma matou; aua o le a mamate a matou lamepa. A ua tali mai o e popoto, ua faapea mai, Ne’i le lava ia i matou ma outou; a e lelei ona outou o i e faatau ma faatau mai ai ni a outou. Ua latou o e faatau, ona sau ai lea o le faatoafaiava; o e ua saunia foi ua latou ulufale atu faatasi ma ia i le tausamaaga, ona pupuni ai lea o le faitotoa. E mulimuli ane, ona o mai ai lea o isi taupou, ua faapea mai, Le alii e, le alii e, ia e tatala mai le puipui mo i matou. A ua tali atu o ia, ua faapea atu, E moni, ou te fai atu ia te outou, ou te le iloa outou.” [Mataio 25:2–12.] O lenei, o i latou o e o loo i ai suauu i a latou lamepa, o tagata ia o e ola i lo latou faatuatuaga, totogi a latou sefuluai, totogi a latou aitalafu, tausia poloaiga a le Atua, ma latou te le upuleaga i lona suafa; o alii ma tamaitai o e savavali i le malamalama o le Alii, o alii ma tamaitai o e le faatauina atu lo latou tofi o le ulumatua mo se meaai po o sina auro po o se ario; o i latou na o le a totoa i le molimau ia Iesu Keriso.

E faapea o’u lagona i le aso. Ou te lagona e ao ona lapatai atu i o’u uso ma tuafafine, le Au Paia o Aso e Gata Ai, ina ia ola i lo latou faatuatuaga, ma sauniuni a latou lamepa, aua e pei ona soifua le Alii o le a faataunuuina uma lava ana afioga. O le afio mai o Iesu ua i faitotoa. … O le tagata e amiotonu e le mafai ona ia faasaoina le amioleaga. Ua matua tatau lava ona ola i tatou i la tatou lava amiotonu, o le tausia lea o poloaiga a le Atua.¹⁴

O le faataoto i taupou e toasefulu ua faamoemoe e faatusatusa i ai le afio mai faalua o le Atalii o le tagata, le afio mai o le Faatoafaiava e faafetaiai le faatoanofotane, o le ekalesia lea, o le faletua o le Tamai Mamoe, i aso mulimuli; ma e ou te talitonu sa tonu lava le Faaola ina ua ia fetalai mai, e faatatau i tagata o le ekalesia, faapea o le toalima o i latou sa popoto ma le toalima sa valelea; aua a oo ina afio mai le Alii o le lagi i le mana ma le mamalu tele e tauia i tagata uma e tusa ai ma a latou galuega i le tino, afai na te maua mai le ‘afa o i latou o e ua faapea mai o i latou o tagata o lana ekalesia ua saunia mo le faaolataga, o le toatele lava lena o le a i ai e pei ona faamoemoeina e fua i le ala o loo sailia e le toatele.¹⁵

O le afioga a le Alii ia te a’u e faapea o lea ua oo mai le taimi mo Siona e tulai mai ai ma faasusulu atu lona malamalama; ma le molimau o le Agaga o le Atua ia te a’u e faapea o lenei malo atoa, o lenei malo maoae o ositaulaga … o e ua umiaina le perisitua, ua atoatoa ona faataunuuina le tasi vaega o le faataoto o taupou e toasefulu. O le a lena? Ina ua tuai mai le Faatoafaiava sa tatou tulemomoe uma lava ma momoe; i le avea ai ma se ekalesia ma se malo ua tatou tulemomoe ma momoe, ma o le afioga a le Alii ia te a’u ua faapea mai, ua fai si umi o tatou momoe; ma ua tatou maua nei le avanoa e tulai mai ai ma teuteuina a tatou lamepa ma utu le suauu i totonu o a tatou fagu. O le afioga lea a le Alii ia te a’u.¹⁶

O le fesili la lenei, e faapefea ona tatou faatumauina le suauu i totonu o a tatou lamepa? E ala lea i le tausia o poloaiga a le Atua, manatuaina o a tatou tatalo, o le faia e pei ona faatonuina ai i tatou i faaaliga a Iesu Keriso, ma le fesoasoani i soo se mea i le atiina ae o Siona. Afai tatou te galulue mo le malo o le Atua, o le a i ai le suauu i totonu o a tatou lamepa, o le a susulu atu lo tatou malamalama ma o le a tatou lagonaina le molimau a le Agaga o le Atua. I le isi itu, afai e pupu o tatou loto i mea o le lalolagi ma saili le viiga mai tagata, o le a tatou savavali i le pogisa ae le o le malamalama. Afai tatou te le faatauaina lo tatou perisitua, ma le galuega o lenei perisitua, o le atiina ae o le malo o le Atua, le fausiaina o malumalu, le togiolaina o o tatou tagata oti, ma le tauaveina o le galuega maoae i e ua uma ona faauuina ai tatou e le Atua o Isaraelu—afai tatou te le lagonaina o nei mea e sili atu ona taua ia i tatou nai lo mea o le lalolagi, o le a leai se suauu i a tatou lamepa, leai se malamalama, ma o le a tatou le auai i le tausamaaga a le Tamai Mamoe.¹⁷

O ai o le a saunia mo le afio mai o le Mesia? [O i latou] o e o loo fiafia i le Agaga Paia ma ola e tusa ma musumusuga a le Silisiliese, o e tumau ia Iesu Keriso ma fuaina mai fua viia ma faamamaluina ai le Atua. E leai lava nisi tagata o le a saunia.¹⁸

Ou te tatalo o le a tatou ola i ni olaga ina ia tatou le i ai faatasi ma taupou valelea, ae ia tatou malamalama i faailoga o taimi, faia o tatou tiute, faatumauina lo tatou faamaoni, faatoilaloina le lalolagi, ma ia saunia e talia lo tatou Togiola pe a afio mai o ia, i le olioli, ae le o le faanoanoa ma le maasiasi.¹⁹

Ia faatuatua i le Atua. Ia faia o outou tiute. Ia manatua a outou tatalo. Ia maua le faatuatua i le Alii, ma taofimau ma atiina ae Siona. O le a tonu mea uma. O le a asiasi mai le Alii i lona nuu, ma o le a ia faapuupuuina lana galuega i le amiotonu, ina ne’i le faaolaina se tasi [tagai MFF 84:97; Mataio 24:22]. Ou te fai atu ia te outou, mataala mo faailoga o taimi, ma saunia outou lava mo lena aso o le a oo mai.²⁰

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Toe iloilo le parakalafa muamua i le itulau 261. O a ni lesona ua e aoaoina mai i faamatalaga a Elder Evans ua ia faamamaluina ai Peresitene Woodruff?
E faapefea ona tatou aoao e uiga i faailoga o le Afio Mai Faalua o le Faaola? (Tagai i itulau e 262–263).
O a faamoemoega o faailoga o le Afio Mai Faalua? (Tagai i itulau 262–263); tagai foi i le MFF 45:34–39. O a ni molimau ua e vaai ai i le faataunuuina o nisi o nei faailoga? E mafai faapefea ona tumau lo tatou “filemu, faaeteete ma faautauta i luma o le Alii,” e ui lava o nisi o nei faailoga e aofia ai mala matuia?
Toe iloilo aoaoga a Peresitene Woodruff e uiga i le tiute o le Ekalesia i le sauniaina o le ala mo le Afio Mai Faalua (itulau 263–264). E mafai faapefea ona tatou auai i lenei galuega?
Aisea e tatau ai ona tatou popole e uiga i lo tatou lava saunia nai lo le popole i le taimi tonu lava o le Afio Mai Faalua? O a ni auala e mafai ai ona tatou fesoasoani i o tatou aiga e saunia? E mafai faapefea ona tatou “tutu i nofoaga paia a o faaalia mai faamasinoga a le Atua i le lalolagi”? (itulau 263).
I le faataoto i taupou e toasefulu, o ai o loo faatusa i ai taupou popoto ma taupou valelea? le faatoafaiava? le faatoanofotane? O le a le mea ua faaalia mai e ala i le tausamaaga? e ala i le suauu i lamepa? A o tatou sauniuni mo le Afio Mai Faalua, o a ni mea e mafai ona tatou faia e “faatumauina ai le suauu i totonu o a tatou lamepa”? (Tagai i itulau e 265–267, 269; tagai foi i le MFF 45:56–57.)

Mau E Faatatau I Ai: MFF 45:15–75; Iosefa Samita–Mataio 1:21–55

Second Coming of Christ — “O le a afio mai le Alii o Iesu Keriso e nofotupu i le lalolagi. … O le a le faatuai e le Alii lona afio mai.”

virgin with oil lamp — “Afai tatou te galulue mo le malo o le Atua, o le a i ai suauu i totonu o a tatou lamepa, o le a susulu atu lo tatou malamalama ma o le a tatou lagonaina le molimau a le Agaga o le Atua.”