O Le Soifuaga ma Galuega a Wilford Woodruff
“E galue le Atua i se ala e le mafaamatalaina e faatino ai Ana galuega ofoofogia; Na te totoina Ona tulagaaao i le sami ma luga o matagi malolosi.”1 O le amataga lea o le viiga e sili ona fiafia i ai Peresitene Wilford Woodruff, “E Galue le Atua i Ala e Le Mafaamatalaina.”
“E ese le fiafia o ia i [lena viiga],” na saunoa mai ai Peresitene Heber J. Grant, o le sa auauna o se Aposetolo ao avea Wilford Woodruff ma Peresitene o le Ekalesia. “Sa matou usuina, ou te mautinoa, i nisi taimi e faalua i le masina i a matou fonotaga faalevaiaso i le Malumalu, ma e seasea lava ona te’a atu se masina ae lei talosagaina e Uso Woodruff lena pese ina ia usuina. Sa ia talitonu i lenei galuega ma lona loto ma lona agaga atoa, ma galue ai ma le mana atoa lea sa tuuina i ai e le Atua mo lona faaalualuina i luma.”2
O Matthias F. Cowley, o le sa galulue faatasi ma Peresitene Woodruff, sa ia matauina [faapea]: “Atonu e leai se tagata i le Ekalesia e sili atu le loloto o sona lagonaina o le moni o upu, ‘E galue le Atua i se ala e le mafaamatalaina e faatino ai Ana galuega ofoofogia,’ nai lo Wilford Woodruff. Sa matuai tumu o ia i le faaleagaga, matuai punouai i le galuega a le Atua, o lea i lona soifuaga atoa sa matua anoanoai faaaliga faavavega a le Atua na tuuina mai ia te ia. E lei faapea na faavaeina lona faatuatua i vavega, sa na ona faamaonia ai o mea sa ia talitonu i ai ma lona loto atoa ma lagolagoina ona manatu i aoaoga o Tusitusiga Paia.”3
A o matauina e Peresitene Grant ma Uso Cowley, o le viiga e sili ona fiafia i ai Peresitene Woodruff o se autu talafeagai ma lona soifuaga. Sa faamatalaina foi le alualu i luma sa ia molimauina i le Ekalesia a Iesu Keriso o le Au Paia o Aso e Gata Ai. Ua faaauau le viiga:
Au Paia lotovaivai, faamalosi
O ao o loo tou fa’atu ai
E tumu i le alofa tunoa ma e matala mai
Faamanuiaga i luga o outou ulu.
E taunuu vave Lona faamoemoe,
E faailoa i itula uma;
Le fua tautotogo atonu e oona
Ao le fugalaau e suamalie.
Tauaso i le le talitonu e sese lava
Vaai i Ana galuega ae le iloa;
O le Atua lava na te faamatala,
Ma Ia faamaninoina.
O Wilford Woodruff o se sui iloga i le tele o faatinoga taua i le amata mai o le talafaasolopito o le Ekalesia, ma sa ia masani lelei i faafitauli ia sa iu ina auala mai ai faamanuiaga i luga o tagata faatuatua [o le Ekalesia]. Sa ia tofoina le oona o sauaga ma mafatiaga, ae auala mai i na mea uma sa ia tofoina foi le suamalie o le taitaiina e le aao o le Atua. Ma ao ia tagai atu i le fofola atu o le Toefuataiina o le talalelei, sa ia maua ai se malamalamaaga manino i le galuega a le Atua.
O Le Laitiiti ma le Talavou o Wilford Woodruff: O se Faavae Malosi na Fausia i le Aiga
O Wilford Woodruff sa fanau i le aso 1 o Mati, 1807, i Farmington, Connecticut, ia Aphek Woodruff ma Beulah Thompson Woodruff. Ina ua 15 masina lona matua, sa maliu lona tina i le fiva e mafua i ma’i e oso i le tino. E tusa ma le tolu tausaga mulimuli ane, sa toe faaipoipo ai Aphek. Sa tausia Wilford ma ona uso matutua e toalua e lo latou tama ma lo latou tina fai o Azubah Hart Woodruff. Sa maua se isi fanau e toaono a Aphek ma Azubah, e toafa i latou na maliliu a o pepe po o laiti foi.
O tusitusiga a Wilford Woodruff e faailoa mai ai sa tuputupu ae o ia e pei lava o isi tamaiti o lona vaitaimi. Sa alu o ia i le aoga ma galue i le faatoaga a lona aiga. Sa ia galue foi i le ili laupapa a lona tama a o laitiiti lava o ia, sa maua ai ni aafiaga o le a fesoasoani ia te ia i lona matua ina ua faagaoioia lava e ia le ili. O se tasi o ana mea fiafia o le fagota, ma sa latou fagogota soo lava ma ona uso mo i’a i le vaitafe sa tafe ane i talaane o le ili a lo latou tama.
Sa alofa o ia i lona aiga ma sa matua ava tele o ia i ona matua. Faatasi ai ma lona vaai maualuga ma le agaga faafetai, sa ia faamatalaina lona tama o se tagata malosi o le sa faia “le tele naua o galuega” ma o se “tagata e matautia lona alofa mama, amio sao, faamaoni, ma le tonu.”5 Sa ia manatua foi o aoaoga faaletalalelei a lona tina fai sa fesoasoani e taitaiina o ia e saili le Ekalesia moni a le Atua.6
E oo lava i lona tuputupu ae, o le tele o ona fiafiaga sili i lona olaga sa fesootai atu i ona matua ma nai ona tei. Sa ia auai i le Ekalesia i le aso lava e tasi ma lona uso o Azmon. Sa ia matua olioli ina ua mafai ona ia aoaoina ma papatisoina lona tama ma lona tina fai ma le latou aiga atoa. Mulimuli ane i lona olaga sa ia faamautinoaina le faia o galuega i le malumalu mo lona tina, o se avanoa sa ia faapea mai ua lava lava lea e totogi ai ana galuega uma i lona olaga.7
“O Le Puipuiga ma le Alofa Tunoa o le Atua”
I lona toe tepa i tua i lona laitiiti ma lona talavou, sa faailoa mai ai e Wilford Woodruff le aao o le Alii i le faasaoina o lona ola i le tele o taimi. I se tusitusiga e faaulutalaina “Mataupu o Faalavelave,” sa ia faamatalaina ai nisi o faalavelave faafuasei sa ia mafatia ai, ma sa ofo tele o ia ona o lona ola pea ina ia faamatala mai ai. Mo se faataitaiga, sa ia faamatalaina se mea uiga ese sa tupu ia te ia i le faatoaga a lo latou aiga: “A o ono o’u tausaga, sa toetoe lava oo le oti ia te a’u ona o se povi pulu loto ita tele. Sa ma fafagaina ma lo’u tama ia povi i ni maukeni, [ma] na sau se pulu ma lona ita tele ma tuliese la’u povi mai le maukeni sa ia ’aina. Sa ou alu ma ave le maukeni ma ou alu ese, ma o lea na ia faasasa’o mai ai loa ia te a’u. Sa fai mai lo’u tama ia te a’u e togi i lalo le maukeni ae ou tamoe. Sa ou tamoe atu agai i lalo o se malifa, ma ave le maukeni, ma lo’u mafaufau e tatau lava ona i ai le aia tatau a le povi. Sa tuli a’u e le pulu. Ina ua latalata atu ia te a’u, sa ou tu i se pu sa i ai se pou ma ou pau ai i lalo; sa puna a’e le pulu i o’u luga, e tuliloa le maukeni, ma ia nutililiiina ai i ona seu, ma semanu o le faiga foi lena o a’u, pe a na ou le pau.”8
Sa ia faamatalaina foi se faalavelave faafuasei sa tupu ia te ia a o 17 tausaga o lona matua: “Sa ou tietie i se solofanua loto ita tele ma sa ou le masani ai; ma a o alu atu agai i lalo o se mati’e papa ma le tifato, sa faaaoga ai e le solofanua le agai i lalo o le laueleele e oso faafuasei ese ai mai le auala, ae tamoe atu agai i lalo o le loloto, i luga o maa, i le matua saoasaoa lava, ma amata ona kiki i luga ona vae, ma taumafai e togi ese a’u mai luga o lona ulu agai atu i maa; ae sa ou mau lelei i luga o lona ulu, ma matua uumau e o’u lima ona taliga e lua e pei o le a ou oti, ma lo’u iloa i soo se taimi lava e mafai ona nutililii a’u pe a tau i maa. Ao ou i ai i lenei tulaga, o lo’u nofo lelei lea i luga o lona ua, e leai se faagutu e faafoe ai o ia vagana ona taliga, sa ia puna atu i lalo mai le matie i se matua saoasaoa tele, seia oo ina agai sao atu lava ma taia i se maa, ma palasi ai loa i lalo. Sa ou lele atu i luga o lona ulu ma luga o maa, i le mamao e tusa ma le lima mita po o le lima ma le afa iata, ma taia a’u i le eleele a o ou tu sao lelei i ou vae, pau lea o le mea na laveaiina lo’u ola; aua, ana faapea na taia i lalo se isi lava vaega o lo’u tino, semanu ua ou oti ai lava i le taimi lena; o le tulaga na i ai, sa nuti o’u ponaivi i le pito i lalo atoa o a’u e pei o ni fasi ofe. E lua vaega o lo’u vae agavale na gau, ma sa lala ese uma o’u tapuvae i se tulaga ofoofogia, ma a o taumafai le solofanua e tu i luga sa toeitiiti lava palasi mai i o’u luga. O le uso o lo’u tama o Titus Woodruff, na vaai mai ia te a’u ua ou pau, na aumaia se fesoasoani, ma sii atu a’u i lona fale. Sa ou taoto mai le 2 i le afiafi e tau i le 10 i le afiafi, e aunoa ma se fesoasoani faafomai; ona taunuu mai lea o lo’u tama, ma aumai Dr. Swift, o Farmington, o le sa faasa’osa’- oa o’u ponaivi, faasima o’u vae, ma aveina atu a’u i lana taavale solofanua mo le valu maila i lena po i le fale o lo’u tama. Sa matua matautia lo’u tigaina. Ae peitai, sa lelei lava lo’u mafaufau, ma ina ua maea le valu vaiaso, ua ou savali i fafo i ou tootoo.”9
Sa faasolo pea ina faasaoina le ola o Wilford Woodruff, e ui lava i le tele o faalavelave faafuasei seia oo lava i lona matua. I le 41 o ona tausaga, sa ia tuuina mai ai se otootoga o faalavelave sa aafia ai o ia, ma faailoa mai ai lona agaga faafetai mo le aao faaola o le Alii:
“Ua gaui uma o’u vae e lua—o le tasi i nofoaga e lua—o lima uma e lua, o le ponaivi o lo’u fatafata ma ivi asoaso e tolu, ma na mapeva uma o’u tapuvae e lua. Sa ou malemo, malo i le aisa, mafoefoe ma ai e maile feai—sa ou i lalo o ni vili vai se lua i lalo o vai tutumu—sa ou sao mai ni ma’i faigata i taimi eseese, ma ou aafia i ni mea oona sili ona leaga—sa ou pau i luga o le faaputuga o uamea ma mea malepelepe o le auala o nofoa afi—sa toetoe lava a ou lavea i ni pulu fana, ma ou sao mai i le tele o nisi faalavelave sa toetoe lava ina a ou le sao mai ai.
“Ua foliga mai ia te a’u o se vavega, ona e ui i o’u manua e tele ma o’u ponaivi gaui uma, e leai lava ma so’u vae po o so’u lima e pi’o, ae o loo mafai ona ou faamaeaina ni galuega sili ona faigata, o le faala ma le faatimu ma faigamalaga—sa masani ona ou savali i le fasefulu, limasefulu, ma i se tasi aso, e onosefulu maila i le aso. O le puipuiga ma le alofa mutimutivale o le Atua o loo i luga ia te a’u, ma o loo ua puipuia lo’u ola e oo mai i lenei taimi; mo nei faamanuiaga ou te lagona ai ina ia tuuina atu le faafetai o lo- ’u loto i lo’u Tama Faalelagi, i le tatalo e le aunoa, o le a faaaogaina o’u aso o totoe i Lana galuega ma i le fausiaina o Lona malo”10
Sailia ma le Mauaina o le Ekalesia Moni a le Alii
Sa talavou Wilford Woodruff ina ua ia muai naunautai e auauna i le Alii ma aoao e uiga ia te Ia. Sa ia saunoa mai, “I se vaitaimi o ou laitiiti lava sa gaoioi lo’u mafaufau i mataupu faalelotu.”11 E ui i lea, sa ia filifili na te le auai i se lotu. Ae sa tinou o ia e sailiili le Ekalesia moni e tasi a Iesu Keriso. I lona musuia i aoaoga a ona matua ma isi uo ma ala i musumusuga a le Agaga, sa ia mautinoa “ai o le Ekalesia a Keriso sa i le vaomatua—ma sa i ai se liliuese mai mataupu faalelotu mama ma le le pisia i luma o le Atua ma o loo lata mai se suiga tele.”12 Sa faapitoa sona uunaiga na ala mai i aoaoga a se alii e igoa ia Robert Mason, o le sa vavalo o Wilford o le a ola e tofo i le fua o le talalelei toefuataiina (tagai i itulau 1–3 i le tusi lenei).
I tausaga mulimuli ane, i lona talitonuga o nisi o le Au Paia o Aso e Gata Ai e mafai ona aoao mai i ona aafiaga faaletagata lava ia,13 o lea sa masani ai ona faamatalaina e Peresitene Wilford Woodruff tala o lana sailiiliga mo le upumoni. Sa ia faamatala mai:
“Sa le mafai ona ou mauaina se lotu e tutusa ona mataupu faavae, faatuatua ma galuega, ma le Talalelei a Iesu Keriso, po o sauniga paia ma meaalofa ia sa aoaoina mai e Aposetolo. E ui o faifeau o na aso sa aoao mai o le faatuatua, meaalofa, mea silisili ma sauniga, ia sa olioli ai le Au Paia anamua, sa aveesea ma le toe manaomia, ou te lei talitonu e moni lena mea, vagana ai faapea sa aveesea ona o le le talitonu o le fanauga a tagata. Sa ou talitonu o meaalofa, o mea silisili, vavega ma mana lava e tasi o le a toe faaalia mai foi i se tasi o augatupulaga o le lalolagi e pei lava o se isi, ao i ai se Ekalesia a le Atua i luga o le fogaeleele, ma o le Ekalesia a le Atua o le a toe faatulagaina i luga o le fogaeleele, ma e tatau ona ou ola ou te vaai i ai. O nei aoaoga faavae sa matuai maumaututu i lo’u mafaufau mai a’u aoaoga o le Feagaiga Tuai ma le Feagaiga Fou, faatasi ma le tatalo tauanau ina ia faasino mai e le Alii ia te a’u po o le a le mea e sa’o pe sese foi, ma taitai a’u i le ala o le faaolataga, e aunoa ma so’u popole lava i manatu o tagata; ma o musumusuga a le Agaga o le Alii sa aoaoina a’u mo le tolu tausaga a o toeitiiti faatulagaina lana Ekalesia ma lona malo i luga o le fogaeleele i le aso gataaga.”14
“Sa tatai atu lo’u agaga i nei mea,” fai mai a ia. “Ina ua amata ona ou matua sa ou tatalo i le ao ma le po ina ia ou ola ou te vaai i se perofeta. Semanu ou te alu lava i se afe maila tau ina ia ou vaai i se perofeta, po o se tagata sa ono mafai ona aoaoina mai a’u i mea na ou faitau ai i le Tusi Paia. Sa le mafai ona ou auai i se ekalesia, talu ai sa le mafai ona ou mauaina se ekalesia sa lagolagoina nei aoaoga faavae i lena taimi. Sa faaaluina le tele o itula i le tulua o po ma ao, i tafatafa o le vaitafe, i luga o mauga, ma i la’u ililaau. …, ou te valaau atu ai i le Atua ina ia mafai ona ou ola ou te vaai i se perofeta po o se tagata e mafai ona aoaoina a’u i mea o le malo o le Atua e pei ona ou faitau i ai.”15
Sa faamutaina le sailiiliga a Wilford Woodruff ina ua 26 tausaga o lona matua. I le aso 29 o Tesema, 1833, sa faalogo ai o ia i se lauga na faia e Elder Zera Pulsipher, o se faifeautalai o le Au Paia o Aso e Gata Ai. I lana tusi talaaga sa ia faamatalaina ai ona lagona i le lauga a Elder Pulsipher:
“Sa ia amataina le fonotaga i ni nai upu tomua ona tatalo ai lea. Sa ou lagonaina le Agaga o le Atua ou te molimau atu o ia o le auauna a le Atua. Sa amata loa ona ia lauga, ma na ia faia foi lena mea e pei o i ai le pule, ma ina ua maea lana aoaoga, sa ou matua lagonaina lava o le lauga faaletalalelei muamua lenei ua ou faalogo i ai. Sa ou manatu o se mea tonu lava lea ua leva ona ou sailia. Sa ou lagonaina e le mafai ona ou tuua le fale e aunoa ma le tuuina atu o la’u molimau i luma o tagata. Sa tatala o’u mata ina ia ou vaai, ma ou taliga ina ia ou lagona, ma lo’u loto ina ia ou malamalama, ma o’u faitotoa ina ia ou talimalo ai i le sa taitaiina i matou.”16
Sa valaaulia e Wilford Woodruff ia Elder Pulsipher ma lana soa, Elijah Cheney, e nonofo i le fale o Woodruff. Lua aso mulimuli ane, ina ua maua se taimi e faitauina ai le Tusi a Mamona ma feiloai ma faifeautalai, sa papatisoina ma faamauina ai Uso Woodruff o se tasi O Le Ekalesia a Iesu Keriso o le Au Paia o Aso e Gata Ai. Mai lena aso na suia ai lona olaga. O lona mauaina o le upumoni, sa ia tuuina atu ai atoa ia lava i le aumaia [o le talalelei] i isi.
“O se Naunautaiga e Alu Atu ma Talai le Talalelei”
I lona tinou e tausia feagaiga sa ia faia i le papatisoga, sa avea ai Wilford Woodruff o se mea faigaluega naunautai i le aao o le Alii, sa saunia i taimi uma e faia Lona finagalo. I le faaiuga o le 1834 sa ia te ia “se naunautai e alu ma talai atu le Talalelei,”17 ma ia maua ai se valaauga e auauna i le Iunaite Setete i sautesasae. Sa ia iloa o loo faatali mai ia e faafitauli ma e ono lamatia ai lona olaga a o ia malaga, ae sa maua e ia le malosi i lana molimau ma lona faatuatua. Mulimuli ane sa ia manatua: “Na ou iloaina o le Talalelei lea sa faaalia mai e le Alii ia Iosefa Samita e moni, ma o se mea sili ona matua taua o lea sa ou manao ai e ta’u atu i tagata o e e lei faalogo i ai. Sa matuai lelei ma manino, sa foliga mai ia te a’u e mafai ona ou faatalitonuina ai tagata.”18
Ina ua amata e Wilford Woodruff lana uluai misiona, sa faatoa maea lava ona faauuina o ia o se ositaulaga i le Perisitua Arona. O lana soa, o le sa faauuina o se toeaina, sa faatasi ma ia a o feagai ma uluai faafitauli o le misiona ae sa vave ona faavaivai ma toe foi ai i lona aiga i Katelani, Ohaio. I le tuua ai na o ia i se nuu e le masani ai, sa tatalo Wilford mo se fesoasoani ma faataunuu pea lana galuega faafaifeautalai, e ui atu i vaivai ma taufusi. Sa iu ina taunuu i le aai o Memphis, Tennessee, “ua matua vaivai ma fia ai.”19 I lona uluai aafiaga faafaifeautalai iina, sa ia lauga ai i se faalapotopotoga tele lava. Sa ia faamatala:
“Sa ou alu i le faletalimalo sili ona lelei i le nuu lea, e tausia e Mr. Josiah Jackson. Sa ou ta’u atu ia te ia o a’u o se tagata ese, ma e leai sa’u tupe. Sa ou fesili ia te ia pe mafai ona ou nofo iina i le po e tasi. Sa ia fesili mai ia te a’u po o le a la’u pisinisi. Sa ou ta’u atu ia te ia o a’u o se faifeau o le Talalelei. Sa ata o ia, ma fai mai ou te le foliga i se faifeau. Ou te le faitio foi ia te ia aua o faifeau uma ua masani ai ia e tietie i solofanua mananaia po o totonu foi o taavale solofanua, e oofu i ie taugata, ma tetele o latou totogi, ma e matamata foi i latou a o pau atu lenei lalolagi atoa i seoli a o lei savali atu se isi o latou i se selau fitusefulu maila o le palapala e tau laveaiina ia tagata.
“Sa manao le pule o le faletalimalo i sina mea malie, o lea sa ia fai mai ai e mafai ona ou nofo pe a fai ou te lauga. Sa fia iloa e ia pe ou te iloa lauga. Ou te ta’u sa’o atu lava e oo mai i le taimi lenei ua fai foi sina o’u ulavale teisi, ma sa ou aioi atu ia te ia e aua nei fai mai ou te lauga. O le tele lava o lo’u aioi atu ou te le lauga, o le tele foi lena o le naunau mai o Mr. Jackson e tatau ona ou lauga. …
“Sa ou nofo i lalo i le potu tele lava ou te ai ai. A o lei uma ona ou ’ai, ae amata ona faatumulia le potu i ni tagata mauoa ma faitifiga o Memphis, o loo laei i ie taugata ma silika, ae o ou foliga e pei lava ona outou silafia, i le mae’a ai o la’u faigamalaga mai le palapala lea sa ou ai. Ina ua uma ona ou ’ai, sa sii ese le laulau mai le potu i luga o ulu o tagata. Sa tuu a’u i le tulimanu o le potu, o lo o i ai se pulelaa ma se Tusi Paia, tusi pese ma se moligao i ona luga, ua siosio e ni alii pe toasefulu ma le toalua, faatasi ai ma le pule o le faletalimalo i le ogatotonu. Sa i ai foi iina ma le pe tusa o le lima selau tagata o e na o mai, e lei o mai e faalogologo i se lauga o le Talalelei ae ia maua sina faafiafiaga. …Faamata e faapefea ona e fiafia i lenei tulaga? O loo e i lau misiona muamua, e aunoa ma sau soa po o sau uo, ae valaauina oe e te lauga atu i se faapotopotoga faapea? Ia te a’u o se tasi lea o itula sili ona ou fiafia i ai i lo’u olaga atoa, e ui lava sa ou lagona pei sa tatau ona i ai sa’u soa.
“Sa ou faitauina se viiga, ma ou talosaga atu ia i latou e pepese. E leai ma se tasi na peseina se upu. Sa ou fai atu ia te i latou e le o i ai sa’u taleni o le pese; ae faatasi ma le fesoasoani a le Alii, o le a ou tatalo ma ou lauga. Sa ou tootuli i lalo ou te tatalo, ma sa taufai punonou uma ulu o alii sa siosioina a’u, i o latou tulivae. Sa ou tatalo i le Alii e auina mai ia te a’u lona Agaga ma faaali mai ia te a’u loto o tagata. Sa ou tautino atu i le Alii i la’u tatalo o le a ou ta’uina atu i le faapotopotoga soo se mea lava Na te tuuina mai ia te au. Sa ou tulai ma lauga mo le itula ma le afa, ma o se tasi lea o lauga silisili i lo’u olaga.
“Sa tatalaina mai olaga o le faapotopotoga i le faaaliga i lo’u mafaufau, ma sa ou ta’uina atu ia te i latou a latou faiga leaga ma le taui latou te mauaina. Sa faapauu ulu o alii sa siosioina au. E tolu minute talu ona uma la’u lauga ae ua toe lava o a’u le tagata sa i totonu o le potu.
“E lei umi ae faasino a’u i se moega, i se potu e sosoo ma le potu tele lea sa faapotopoto ai le toatele o tagata ia sa ou lauga i ai. Sa mafai ona ou lagonaina atu a latou talanoaga. Sa faapea se tasi o alii na te fia iloaina pe faapefea ona iloa e lena tamaitiiti Mamona o latou olaga ua te’a. E lei umi sina taimi ae amata ona fetauai e uiga i ni nai mataupu faavae. Sa fautua atu se isi e valaaulia a’u e fai se tonu o le mataupu. Sa faapea atu le pule o le faletalimalo, ‘leai; ua lava lea mo lenei taimi.’
“I le taeao, sa faia sa’u meaai lelei. Sa fai mai le pule o le faletalimalo afai ae ou toe ui mai iinei ona ou afe lea i lona fale, ma ou nofo ai mo se umi ou te filifili ou te nofo ai.”20
I le masina o Novema 1836, sa faamaeaina le misiona a Wilford Woodruff i le itu i sauté i sasae o le Iunaite Setete. Sa ia faamaumauina i lana tusi talaaga faapea i le 1835 ma le 1836 sa ia malaga ai i le 9,805 maila, sa faia ni fonotaga e 323, faatulagaina paranesi e 4 o le Ekalesia, papatiso le 70 tagata ma faamauina le 62, faatinoina faaeega faaleperisitua e 11, ma faamaloloina tagata e toa 4 i le faaeeina atu o lima ma sa laveaiina mai o ia mai lima o ni vaega se toa 6 a tagata leaga.21 Sa faauuina o ia e avea ma toeaina ia Iuni 1835 ma se Fitugafulu ia Me 1836.
Ina ua toe foi Elder Woodruff i Katelani, sa ia maua atu ua toatele tagata o le Ekalesia iina na pauu atu i le liliuese ma sa tautatala faatuiese i le Perofeta o Iosefa Samita. “I le taimi o le liliuese i Katelani,” sa ia faapea mai ai mulimuli ane, “Sa tau le iloa lava e Iosefa Samita pe a ia feiloai atu i se tagata, vagana ua faaali atu e le Agaga o le Atua ia te ia, po o ia o se uo po o se fili. O le tele lava o alii maualuluga sa faasagatau atu ia te ia.”22
E oo lava “i le lotolotoi o lena pogisa,”23 sa tumau Wilford Woodruff i le faamaoni i le Perofeta ma faamaoni i lona ia lava naunautai e talai le talalelei. Sa valaauina o ia i le Korama Muamua a le Au Fituagafulu, ma i lena tulaga sa faaauau ai pea ona molimau o ia i le upumoni, i le femalagaai lea i konafesi eseese i le eria. A o lei atoa se tausaga talu ona i ai i Katelani, sa mulimuli o ia i se musumusuga e auauna i le misiona i le Fox Islands, e le mamao ma le talafatai o le setete o Maine. Sa ia faapea mai:
“Sa fetalai mai le Agaga o le Atua ia te a’u, ‘Ia e filifili se soa ma o atu sao loa i Fox Islands.’ Ia, e lei sili atu so’u iloaina o se mea o i Fox Islands nai lo se mea o i Kolob. Ae sa ta’uina mai e le Alii ia te a’u ou te alu, ma sa ou alu. Sa ou filifilia Jonathan H. Hale, ma sa ma o faatasi. Sa ma tutuliina temoni iina, talai atu le Talalelei ma faia ni vavega. … Sa ou taunuu i Fox Islands, ma faia se galuega lelei iina.”24 Ina ua taunuu Elder Woodruff ma Elder Hale i Fox Islands, sa la mauaina “se nuu iina sa moomoo mo le faatulagaga anamua o mea.” Sa ia tauina mai mulimuli ane, “E aunoa ma so’u mimita ai, ae ou te fai atu sa ou papatisoina e sili atu i le 100 tagata ao ou i ai iina.”25
Faaauauina o le Auaunaga Faafaifeautalai o se Aposetolo a le Alii o Iesu Keriso
A o auauna pea Elder Woodruff i le misiona i le Fox Islands i le 1838, sa ia mauaina se valaauga lea sa faalauteleina ai lana auaunaga faafaifeautalai mo aso uma o lona soifua. “I le aso 9 o Aokuso, sa ou mauaina ai se tusi,” fai mai a ia, “mai ia Thomas B. Marsh, o le sa Peresitene o le Au Aposetolo e Toasefululua i le taimi lena, e ta’u mai ai ia te a’u faapea o Iosefa Samita, le Perofeta, sa mauaina se faaaliga, e ta’u mai ai igoa o tagata ua filifilia e faatumuina avanoa o e ua pauu: John E. Page, Ioane Teila, Wilford Woodruff ma Willard Richards.
“Sa faaopoopo mai Peresitene Marsh, i lana tusi, ‘Ia e iloa ai, Uso Woodruff, e ala i lenei mea, o oe ua tofia e faatumuina le avanoa o se tasi o le Au Aposetolo e Toasefululua, ma ua talafeagai ma le upu a le Alii, lea sa tuuina mai mulimuli nei lava, faapea ua tatau nei ona e malaga vave mai i Sisifo Mamao, ma i le aso 26 o Aperila o le a sau, e te malaga ese atu ai mai le Au Paia ma malaga atu i isi nuu e ese o latou tau o loo i le isi itu o le sami loloto.’ ”
Sa saunoa mulimuli ane Peresitene Woodruff, “O le aano o lenei tusi sa faaalia mai ia te a’u i ni nai vaiaso i luma atu, ae ou te lei ta’uina lava i se tagata.”26
O le faatonuga ina ia “malaga ese atu mo isi nuu e ese o latou tau o loo i le isi itu o le sami loloto” e faatatau i le poloaiga a le Alii e auauna atu le Toasefululua i ni misiona i Peretania Tele. E lei umi talu ona faauuina o se Aposetolo i le aso 26 o Aperila, 1839, ae malaga ese ai Elder Wilford Woodruff mo Peretania Tele o se tasi o “molimau faapitoa i le suafa o Keriso i le lalolagi atoa” (MFF 107:23).
O le a mulimuli ane auauna Elder Woodruff i isi misiona i le Iunaite Setete ma Peretania Tele. Sa lauiloa o ia o se tasi o faifeautalai sili ona maoae i le talafaasolopito o le Ekalesia. O lenei tusi o loo aofia ai le tele o tala mai i ona aafiaga faafaifeautalai.
O Le Fesoasoani i le Au Paia e Faapotopoto Faatasi
O le taimi nei, o loo faamalosiauina le Au Paia o Aso e Gata Ai e fausia le malo o le Atua i eria o loo latou nonofo ai, ina ia malosi le Ekalesia i le lalolagi atoa. I uluai taimi o le Ekalesia, sa faamalosiauina e faifeautalai o le Au Paia o Aso e Gata Ai i latou sa faatoa liliu mai ina ia malaga atu i le laumua o le Ekalesia, po o fea lava e i ai i Katelani, Ohaio, po o Jackson County, Misuri, po o Navu, Illinois, po o le Aai o Sate Leki, i Iuta.
E tusa ma le lua tausaga talu ona maliu fasia Iosefa ma Ailama Samita, ae tutuli ese faamalosi le Au Paia ina ia tuua o latou aiga i Navu, o lea sa faavaeina ai so latou nofoaga le tumau i Uinita Kuota, Nebraska. O Elder Woodruff, o le sa auauna i le misiona i Egelani, sa toe foi i le mea o loo i ai le aotelega o le Ekalesia. Ina ua latou tuua Uinita Kuota, sa ia fesoasoani e taitaia le Au Paia i la latou faigamalaga tautaua: la latou faigamalaga e ui atu i nofoaga laugatasi ma mauga o le Iunaite Setete agai atu i lo latou nuu folafolaina i le Vanu o Sate Leki. I le avea ai o se vaega o le uluai kamupani o paionia, sa ia aveina atu Peresitene Polika Iaga, o le sa gasegase, i le vaega faaiu o le faigamalaga. Sa auai Elder Woodruff i le taimi na nofo ae ai i luga Peresitene Iaga mai lona moega i totonu o le taavale toso, fua [i lana vaai] le fanua i o latou luma, ma folafola mai: “Ua lava lea. O le nofoaga sao lenei. Alu pea.”27
Sa faaauau pea ona fesoasoani Elder Woodruff i le Au Paia ina ia faapotopoto atu i lo latou nuu folafolaina. I se tasi o ana misiona, sa faaalu ai le lua ma le afa tausaga faatasi ma lona aiga i Kanata ma le Iunaite Setete i matu sasae e fesoasoani ai i tagata o le Ekalesia e malaga atu i le Vanu o Sate Leki. Sa i ai faatasi o ia ma le vaega mulimuli o le Au Paia ina ua tupu lona aafiaga lea, e faaali mai ai le faigofie ona ia lagonaina o musumusuga a le Agaga:
“Sa ou vaaia se setima o loo faapupusa lona asu e sauni o le a alu ese atu. Sa ou alu atu i le kapeteni ma fesili i ai pe toafia lana pasese. ‘Tolu selau ma le limasefulu.’ ‘Faamata e mafai ona e avea se isi selau?’ ‘Ioe.’ ‘Toeitiiti lava a ou fai atu i ai ia te ia matou te mananao matou te o i luga o le vaa ae fetalai mai loa lena Agaga ia te a’u, ‘Aua tou te o i luga o lena vaa, o oe po o lau vaega.’ Ua lelei, sa ou fai atu ai. Sa ou aoaoina ai se mea e uiga i lena leo malu ma le filemu. Ou te lei alu i luga o lena vaa, ae faatalitali seia oo i le taeao na sosoo ai. I le tolusefulu minute talu ona alu ese atu le vaa, ae amata ona mumu ai se afi. Sa faaaoga e le vaa ia maea e faamau ai le foeuli nai lo filifili uamea, ma sa le mafai ona toe uli atu le vaa i le laueleele. O se po pogisa, ma sa leai se tasi na faasaoina. Pe ana ou le usiusitai i le uunaiga a lena tapasa i totonu ia te a’u, semanu ou te i ai foi ma a’u iina, faatasi ma la’u vaega atoa lava.”28
Auaunaga I le Vanu o Sate Leki
Ina ua maea ona faamautu le Au Paia i le Vanu o Sate Leki, sa suia tiute o Elder Woodruff. Sa lei toe auina atu o ia i nuu ese i ni misiona faafaifeautalai. Nai lo lena o ana gaoioiga sa aafia ai le faateleina o lana fesoasoaniga i le Au Paia e malaga mai i le laumua o le Ekalesia, feiloai atu ia i latou o e asiasi mai i le eria, auauna atu o se faitulafono, galue e suaina le eleele ma toto meatoto ma faaalu atu le vai i ai, aemaise le faatupuina o meatoto ma metotia faafaifaatoaga. Sa ia asiasi soo atu i nofoaga o le Au Paia o Aso e Gata Ai i Iuta, Arizona, ma Idaho, ma talai atu le talalelei ma faamalosiauina le Au Paia i o latou tiute.
Sa auauna Wilford Woodruff o se Faamaumau Talafaasolopito Lagolago o le Ekalesia mai le 1856 i le 1883 ma o se Faamaumau Talafaasolopito o le Ekalesia mai le 1883 i le 1889, o se taimi sa aofia ai le tele o lana auaunaga i le Korama a le Au Aposetolo e Toasefululua. E ui lava o lenei tiute sa matua manaomia ai le tele o le taimi, ae sa mafaufau lava ia o se avanoa le au maua, ma lona talitonuga faapea “o le talafaasolopito o lenei Ekalesia o le a tumau i taimi uma ma le faavavau.”29 O lana auaunaga o se faamaumau talafaasolopito o se faaauauina o se galuega sa ia faia talu mai le 1835, ina ua amata ona tausia lana tusi talaaga—o se faamaumauga o lona ia lava olaga ma le talaaga o le Ekalesia (tagai itulau 137–146).
I le faauauina pea o ana taumafaiga e faamalosi le Ekalesia, auauna i le nuu ma ona tagata, ma tausi lona aiga, sa mulimuli Wilford Woodruff i aoaoga faavae sa ia aoao mai i lona tama galue malosi. Sa saunoa mai Elder Franklin D. Richards o le Korama a le Au Aposetolo e Toasefululua faapea, o Elder Woodruff o se tagata sa “tautaua i lona toaga, galue malosi ma le malosi o lona tino e faamae’a galuega mamafa. E ui e le o ia o se tagata e tinoa, ae sa mafai e ia ona faia galuega ia e ono matapogia ai isi tagata e lelei o latou fuaitino.”30
O loo tumu le tusi talaaga a Elder Woodruff i faamaumauga o aso uumi o galuega faigata. Sa ia faamatala e uiga i se tasi taimi a o 67 ona tausaga, sa feaei ai ma lona atalii o Asahel i le apefai 12 futu e tau mai ia peaches mai le laau. Sa amata ona lusi le tu a Asahel. A o taumafai Elder Woodruuf e laveai Asahel, sa pau o ia. Sa ia tusia: “Sa ou pau i lalo o le apefai pe tusa e 10 futu mai le eleele ma tau i lalo lo’u tauau taumatau ma lo’u suilapalapa ma sa ou tigaina ai. E lei lavea tele Asahel. Sa ou matuai tiga ma sa le mafai ona ou savali i le po atoa.”31 I le aso na sosoo ai na ia tusia, “Sa matuai ou tigaina ma sa le mafai ona ou savali i le aso, ae peitai sa ou alu i le faatoaga ma toe foi mai i le fale i le afiafi.”32 I se faamatalaga a Matthias Cowley e uiga i lenei mea na tupu, na ia faapea mai: “O le natura o le tagata le fesili po o a mea a se tagata i lenei taimi o lona olaga e fai i luga o se laau. O le mea muamua lava, o Elder Woodruff e le taitai i ai se fesili e uiga i ona tausaga pe a vaai atu i se mea e tatau ona fai, pe afai lena o se mea e mafai ona ia faia. O mea uma lava e i ai o ia. …E saunia foi o ia mo soo se faalavelave faafuasei i soo se taimi. Afai e vaai atu o ia i le tumutumu o le laau o le apu e tatau ona ili ese, e muamua oo i le tumutumu o le laau ae lei i ai se taimi e mafaufau loloto ai i ai, ma e faigata ia te ia ona fai atu i se isi e fai se mea na te iloa e mafai ona faia lava e ia.”33
Fausiaina o Malumalu ma Galuega Faale-Malumalu
Soo se taimi lava e nonofo ai le Au Paia mo se taimi umi i se nofoaga tutotonu, sa latou fausia se malumalu. Sa latou mulimuli i lenei mamanu i Katelani, i Navu, ma mulimuli ai i Aai o Sate Leki. E ala i lea faiga, sa latou faamaoni i se faaaliga mai le Alii e ala mai i le Perofeta o Iosefa Samita—o se faaaliga sa faamaumauina e Elder Woodruff i lana tusi talaaga:
“O le a le faamoemoega o le faapotopotoina faatasi o tagata Iutaia, po o le nuu o le Atua i soo se augatupulaga o le lalolagi? O le faamoemoega autu o le fausiaina i le Atua o se maota lea e mafai ona Ia faaalia ai i Ona tagata sauniga paia o Lona maota ma mamalu o Lona malo ma aoao ai tagata i ala o le faaolataga. Ona e i ai sauniga paia faapitoa ma aoaoga faavae ia e aoaoina ma faataunuuina, ma tatau ona faia i se nofoaga po o se maota e fausia mo lena faamoemoe. O lenei sa faamoemoeina i le mafaufau o le Atua a o lei i ai le lalolagi, ma sa faia mo le faamoemoega sa mamanuina e le Atua e faapotopoto faatasi soo ai tagata Iutaia, ae peitai latou te lei faia. E mo le faamoemoe lava e tasi e ala ai ona faapotopotoina faatasi e le Atua tagata i aso e gata ai—ina ia fausiaina i le Atua se maota e saunia ai i latou mo sauniga paia ma faaeega paia, mulumuluga ma faauuga, ma isi.”34
Sa masani lava ona apoapoai Elder Woodruff i ana uo o le Au Paia ina ia tofotofo i faamanuiaga o loo maua i le malumalu. Sa ia saunoa: “Ou te manatu o le fausiaina o malumalu o le tasi lea o mea sili ona taua e manaomia e le Alii mai le Au Paia o Aso e Gata Ai i le augatupulaga o le atoatoaga o taimi, ina ia tatou o atu ai i na malumalu ia le gata i le faaolaina o e o ola mai a o le faaolaina foi o o tatou tagata o e ua oti.”35 O lona lava filiga, sa ia faia ai se faataitaiga o galuega faalemalumalu, e faamautinoaina ai le faia o le galuega mo le afe ma afe o ona tuaa ua mavae.
E pei lava o le toatele o perofeta i ona aso, sa vavalo Elder Woodruff e oo mai le taimi o le a i ai malumalu i le lalolagi atoa.36 Sa ia olioli i le avanoa e vaai ai i le amataga o le faataunuuina o valoaga, e pei ona sa fausia ma faapaiaina malumalu e fa i le Itumalo o Iuta i le vaitaimi o le uluai 46 tausaga ina ua mavae le taunuu atu o le Au Paia i le Vanu o Sate Leki—i aai o St. George, Logan, Manti, ma le Aai o Sate Leki.
Sa faia e Peresitene Woodruff le tatalo o le faapaiaga o malumalu i Manti ma le Aai o Sate Leki. I se feau i tagata uma o le Ekalesia, sa molimauina ai e i latou ma ona fesoasoani i le Au Peresitene Sili e uiga i faamanuiaga ia e oo mai ia i latou o e auai atu i faapaiaga o malumalu i se agaga tapuai moni: “O musumusuga matagofie a le Agaga Paia o le a tuuina atu ia te i latou ma oa o le Lagi, le fesootaiga a agelu, o le a faaopoopoina mai i lea taimi i lea taimi, aua ua tuuina atu le folafolaga a [le Alii] ma e le mafai ona le taunuu!”37 Sa ia tusia e uiga i se tasi o na aafiaga, lea sa ia mauaina i le faapaiaga o le Malumalu i Logan:
“A o ou auai i le faapaiaina o lenei malumalu, sa ou manatuaina le tele o itula sa ou faaaluina i le tatalo i le taimi amata o lo’u tagata matua i lo’u valaau atu i le Atua e faatagaina mai a’u ou te ola i le lalolagi ina ia ou vaai i le Ekalesia a Keriso ua faavaeina ma se nuu e fausiaina o e o le a mauaina le talalelei anamua ma tauivi atu mo le faatuatuaga pe a tuuina mai i le Au Paia. Sa folafolaina mai e le Alii ia te a’u o le a ou ola e mauaina le nuu o le Atua ma i ai se igoa ma se nofoaga… i totonu o lona maota, o se igoa e sili atu nai lo igoa o atalii ma afafine, se igoa o le a le momotu ese ina. Ma i le aso ou te olioli ai i le maua o se igoa faatasi ma lona nuu ma fesoasoani i le faapaiaga o se isi malumalu i lona suafa paia. Vivii atu ia i le Atua ma le Tamai Mamoe e faavavau.”38
Auaunaga a Wilford Woodruff o le Peresitene o le Ekalesia
Ina ua maliu Peresitene Ioane Teila i le aso 25 o Iulai 1887, sa avea le Korama a le Au Aposetolo e Toasefululua ma tino e taitaia le Ekalesia, ma Peresitene Woodruff o le taitai pulefaamalumalu. I le lagonaina o le avega mamafa o le taitaiina o le Ekalesia atoa, sa faamaumauina ai e Peresitene Woodruff mafaufauga ia i lana tusi talaaga: “O lenei mea ua tuuina ai a’u i se tulaga matua faapitoa lava, o se tulaga ou te lei sailia lava i lo’u olaga. Ae i le fesoasoani a le Atua ua tuuina mai i ou luga, ma ou te tatalo i le Atua lo’u Tama Faalelagi e tuuina mai ia te a’u lona alofa tunoa e talafeagai ma o’u tiute. O se tulaga maualuga ma le tele o ona tiute mo soo se tagata e tu ai ma o se tulaga foi e manaomia le tomai maoae. Ou te lei manatu lava e umi atu ona ou ola ia Peresitene Teila. … Ae peitai ua faataunuuina. …Tau ina ou faapea atu, e ofoofogia ou ala uma, le Alii e Le Atua Silisiliese, aua ua e matuai filifilia lava mea faatauvaa o lenei lalolagi e faia lau galuega i luga o le fogaeleele. Tau ina ia saunia lau auauna o Wilford mo le a lava se mea o loo faatali ia te ia i luga o le fogaeleele ma ia i ai le mana e faatinoina ai soo se mea e manaomia i ona lima e le Atua o le Lagi. Ou te ole atu i lenei faamanuiaga mai lo’u Tama Faalelagi i le suafa o Iesu Keriso, le Alo o le Atua Soifua.”39 Na lagolagoina Peresitene Woodruff e fai ma Peresitene O Le Ekalesia a Iesu Keriso o le Au Paia o Aso e Gata Ai i le aso 7 o Aperila, 1889. O ia o le Peresitene lona fa o le Ekalesia i lenei tisipenisione.
Molimauina o le Galuega a le Alii i Aso e Gata Ai
I ana savali i tagata o le Ekalesia, sa saga molimau ai pea Peresitene Woodruff i le toefuataiina o le talatelei, e pei lava ona sa ia faia i lana talaiga atoa. Ae peitai, sa ia tuuina atu lana molimau ma le faateleina o le uunaiga [i le Au Paia] i na tausaga e iva faaiu o lona soifuaga. O ia o le auauna soifua mulimuli o e sa auauna o se Aposetolo faatasi ma Iosefa Samita, ma sa lagona e ia se uunaiga malosi i le manaomia ona tuuina atu o se molimau manino ma le maumaututu o le Perofeta ma le Toefuataiga. E tusa o se tausaga a o lei maliu, sa ia faapea mai:
“O loo i ai le tele o mea ou te le malamalama ai, ma o le tasi o le, pe aisea ua ou i ai iinei i lenei augatupulaga. Ou te le malamalama pe aisea sa faasaoina ai a’u mo le umi ua faasaoina ai a’u ae ua matua toatele Aposetolo ma Perofeta ua valaauina e toe foi atu. …Ua na o a’u le tagata ola i le tino lea sa mauaina faaeega paia mai i aao o le Perofeta o Iosefa Samita. Ua na o a’u le tagata ola i le tino lea sa faatasi ma le Au Aposetolo e Toasefululua ina ua ia tuuina mai le malo o le Atua ia te i latou ma tuuina atu i luga ia te i latou le poloaiga ina ia tauaveina lenei malo. Sa ia tu mo se tolu itula i totonu o le potu ma tuuina mai lana lauga mulimuli. Sa faatumuina le potu e pei o se afi mumu. O lona fofoga sa manino e pei o le pulu manino o le laau o le paina, o ana upu e pei o le emo o le uila ia i matou. Sa matua tofatu ana upu i vaega uma o o matou tino mai le tumutumu o o matou ulu e oo atu i o matou alofivae. Sa ia faapea mai, ‘Uso e, ua faamauina e le Alii Silisiliese i luga o lo- ’u ulu Perisitua uma, ki uma, mana uma, aoaoga faavae uma ia e aofia i le tisipenisione faaiu o le atoatoaga o taimi, ma i le fausiaina o le malo o le Atua. Ou te faamauina i luga o o outou ulu na aoaoga faavae, Perisitua, tofi aposetolo, ma ki uma o le malo o le Atua, ma o lenei ua tatau ia te outou ona faamalosia o outou tauau ma tauaveina lenei malo [a leai] o le a fano outou.’ E le galo ia te a’u na upu—e le galo lava ia te a’u a o ou ola. O le saunoaga mulimuli lena sa ia faia i la le tino nei. E lei umi se taimi mulimuli ane ae maliu fasia o ia ma valaauina e foi atu [i le lagi] i le mamalu.”40
I lona avea ai ma Peresitene o le Ekalesia, sa uunaia e Peresitene Woodruff le Au Paia e saili ma mulimuli i le taitaiga a le Agaga Paia, ia faamaoni i a latou feagaiga, talai le talalelei i o latou lotoifale ma nuu ese, faamaoni i o latou tiute faaletino, ma galulue malosi i le galuega faalemalumalu ma talafaasolopito o aiga. O lana fautuaga e faalogoina ai pea lava pea se faamatalaga sa ia faia a o avea o ia ma se tasi o le Korama a le Toasefululua: “E tusa lava po o le a le lelei ua tatou i ai e tatau ona tatou tulimatai pea lava pea e alualu i luma ma faalelei atili. Tatou te usitaia se tulafono ese ma se talalelei e ese mai lea e usitaia e isi tagata, ma e ese le malo o loo tatou vaai i ai, o lo tatou faamoemoe foi e tatau ona talafeagai i ai le maualuga i luma o le Alii lo tatou Atua, ma e tatau ai ia i tatou ona faapena ona taitaia ma pulea i tatou lava, ma ou te tatalo i le Atua lo’u Tama Faalelagi ia i ai lona Agaga i luga ia i tatou ina ia mafai ai ona tatou faia.”41
Auina atu o le Folafolaga
I le faamalosia e le aao taitai o le Alii, sa taitaiina ai e Peresitene Woodruff le Au Paia o Aso e Gata Ai i se tasi o vaitaimi matuai sili ona fesouaiina i lenei tisipenisione. A o faaiuiu augatausaga o le 1880 sa faaauauina pea e le Ekalesia ona faatinoina faaipoipoga faaautaunonofo i le usiusitai i le poloaiga a le Alii i le Perofeta o Iosefa Samita. Ae peitai, sa faatoa uma ona faatuina se tulafono e faatuiese ai i lenei masani, faatasi ai ma faasalaga matuia mo le soliaina o na tulafono, e aafia ai le ave faamalosia o meatotino a le Ekalesia ma le faasaina o aia faavae faaletagata a tagata o le Ekalesia, e pei o le aia e palota ai. O nei atinae sa tatalaina ai foi ma avanoa faaletulafono e molia ai tagata o le Au Paia o Aso e Gata Ai o e sa faataunuuina pea lea masani o faaipoipoga faaautaunonofo. Sa faia e le Ekalesia ni talosaga faaletulafono, ae lei faamanuiaina.
O nei tulaga sa matua mamafa i luga o Peresitene Woodruff. Sa ia saili atu le finagalo o le Alii i le mataupu ma iu ina maua ai se faaaliga faapea ua tatau i le Au Paia o Aso e Gata Ai ona faamutaina le masani o le ulufale atu lea i faaipoipoga faaautaunonofo. Ona o le usitai i le poloaiga a le Alii, sa ia faasalalauina ai le mea ua ta’ua o le Tautinoga Tonu—o se saunoaga musuia o loo tumau o le faavae o le tulaga o le Ekalesia i le mataupu o faaipoipoga faaautaunonofo. I lenei folafolaga faalauaitele, sa tusia i le aso 24 o Setema, 1890, sa ia faamanino mai ai lona faamoemoe ina ia uai atu i tulafono o le laueleele. Sa ia molimau atu foi ua faamutaina e le Ekalesia le aoaoina o le masani o faaipoipoga faaautaunonofo.42 I le aso 6 o Oketopa, 1890, i se sauniga o le konafesi aoao, sa lagolagoina ai e le Au Paia o Aso e Gata Ai le tautinoga tonu a le perofeta, i le lagolagoina autasi lea o se saunoaga sa ia “faamaonia atoatoa e tusa ai ma lona tulaga, le tuuina atu o le Tulafono.”43
Toe Faamautuina o le Natura Faavavau o le Aiga
E tusa o le tolu masina a o lei maliu fasia le Perofeta o Iosefa Samita, sa ia tuuina atu ai se saunoaga umi i se faalapotopotoga tele a le Au Paia. O Elder Wilford Woodruff, o le sa faamaumauina se aotelega o lea lauga, sa faapea mai sa saunoa le Perofeta i le “tasi o mataupu matua silisili ona taua ma faatupu manatu o mataupu uma ua tuuina atu i le Au Paia.”44 O se tasi o vaega o lea lauga, sa molimau ai le Perofeta e uiga i le natura faavavau o aiga. Sa saunoa e uiga i le manaomia ona faamauina i matua ma le faaauauina o lena sauniga o faamauga i augatupulaga uma:
“O le agaga lenei o Elia, ia tatou faaolaina o tatou tagata ua maliliu ma faafesootai atu i tatou ma o tatou tama o e oi le lagi ma faamauina i tatou i o tatou tagata ua maliliu ina ia toetutu mai i le uluai toetutu, ma o iinei tatou te mananao i le mana o Elia e faamauina i latou o e o loo nonofo i le lalolagi ia i latou o e o loo nonofo i le lagi. … O atu ia ma faamau i luga o le fogaeleele o outou atalii ma afafine ia te outou lava ma faamau outou lava i o outou tama i le mamalu e faavavau.”45
Mo le isi fiasefulu o tausaga na sosoo ai, sa iloa e le Au Paia o Aso e Gata Ai o loo i ai se “ituaiga o sootaga i le va o tama ma fanau” (MFF 128:18). Ae peitai, e lei matua atoatoa le faamaopoopoina o a latou faatulagaga; e pei ona matauina e Peresitene Woodruff, e lei lava ona soifua le Perofeta o Iosefa na te “tuuina mai ai nisi faamatalaga e uiga i ia mea.”46 I le faia ai e tusa ma le “malamalama ma le poto uma sa ia i [latou],”47 sa masani ona faamauina i latou, pe “vaetama,” i a Iosefa Samita, Polika Iaga, po o isi taitai o le Ekalesia i o latou vaitaimi nai lo le faamauina i o latou tama ma tina. I le avea ai ma Peresitene o le Ekalesia, sa tagai Peresitene Wilford Woodruff i lea masani, ma faapea mai: “E lei atoatoa ona tatou faatinoina na aoaoga faavae i le faataunuuina o faaaliga a le Atua ia i tatou, i le faamauina o loto o matua i fanau ma fanau i matua. E lei faamalieina lo’u lagona, e lei faamalieina foi Peresitene [Ioane] Teila, e lei faamalieina foi soo se tagata talu mai le Perofeta o Iosefa o e ua ulufale atu i le sauniga o le vaetamaina i totonu o malumalu o lo tatou Atua. Sa matou lagonaina lava e i ai nisi mea o le a faaalia mai e uiga i lenei mataupu nai lo mea ua uma ona matou mauaina.”48
O lena faaaliga faaopoopo sa oo mai ia Peresitene Woodruff i le aso 5 o Aperila, 1894.49 I le tolu aso mulimuli ane, i sana lauga i le konafesi aoao, sa ia faamatalaina ai e uiga i le faaaliga: “Ina ua ou alu atu i luma o le Alii ina ia ou iloa po o ai e tatau ona vaetama i ai au. …, sa fetalai mai le Agaga o le Atua ia te a’u, ‘E leai ea sou tama, o le sa fanaua oe?’ ‘Ioe, e i ai.’ ‘Aisea la e te le faaeaea ai ia te ia? Aisea e le vaetama ai oe ia te ia?’ ‘Ioe,’ na ou fai atu ai, ‘e sa’o lena.’ Sa vaetamaina a’u i lo’u tama, ma sa tatau ona faamauina lo’u tama i lona tama, ma faasolo atu ai lava i tua; ma o le tiute foi lea ou te manao i alii uma o e pulefaamalumalu i se malumalu ina ia vaai o faatinoina mai lenei aso seia oo atu lava i le faavavau, seiloga e poloai mai le Alii Silisiliese i se isi mea, o lea, ia taitoatasi ai le tagata ma vaetamaina i lona tama. … O le finagalo lena o le Atua i lenei nuu. Ou te manao i alii uma o e pulefaamalumalu i nei malumalu i nei mauga o Isaraelu ina ia tautuana ma i latou. O le a lau aia ou te aveeseina ai le aia tatau o le gafa o se isi tagata? O le a se aia a soo se tagata e faia ai lenei mea? E leai; ou te fai atu ia taitoatasi le tagata ma vaetamaina i lona tama; ona outou faia tonu ai lava lea o le mea ua fetalai mai ai le Atua ina ua ia folafola mai o le a Ia auina mai Elia le perofeta i aso o le gataaga. [tagai Malaki 4:5–6]. …
“Matou te mananao i le Au Paia o Aso e Gata Ai mai lenei taimi ia saili o latou gafa i le mamao e mafai ona latou faia, ma ia faamauina i o latou tama ma tina. Ia faamauina fanau i o latou matua, ma faasolo atu lenei fesootaiga ia oo atu i le mamao e mafai ona oo i ai. …
“Uso e ma tuafafine, ia talia nei mea i o outou loto. Ia tatou agai i luma i a tatou famaumauga, ia faatumu [faamaumauga] i le amiotonu i luma o le Alii, ma faataunuuina lenei aoaoga faavae, ma o le a ia te i tatou faamanuiaga a le Atua, o i latou foi o e ua faaolaina o le a faamanuiaina i tatou i aso a sau. Ou te tatalo i le Atua, i le avea ai o i tatou o se nuu [o le Atua], ia tatou tatalaina o tatou mata ina ia tatou vaai, o o tatou taliga ina ia lagona, ma o tatou loto ina ia malamalama i le galuega maoae ma le mamana lea o loo i luga o o tatou tauau, ma o loo finagalo le Atua o le lagi tatou te faia.”50
“Matou te Tatalo Pea mo Oe”
I le aso 1 o Mati, 1897, sa faatumulia le Tapeneko i Sate Leki e le Au Paia o Aso e Gata Ai i le faailogaina o le aso soifua lona 90 o Peresitene Wilford Woodruff. O iina sa latou faalogoina ai se viiga fou: “Matou Te Tatalo Pea mo Oe.” Sa faia ni nai suiga e Evan Stephens o nota o se pese sa i ai ma tusia ai ni upu fou e aualofa atu ai i le perofeta faapelepele a le Ekalesia:
Matou te tatalo pea mo oe, lo matou perofeta pele,
Ia aumai e le Atua ia te oe le filemu ma le fiafia;
A o faasolosolo pea i tausaga ona matua lou soifua,
Ae ia susulu pea le pupula mai totonu e pei o le aso,
Ae ia susulu pea le pupula mai totonu e pei o le aso.
Matou te tatalo pea mo oe ma o matou loto atoa,
Ia maua pea e oe le malosi e te galue ai,
E taitai ma fautua ia i matou i aso uma,
E faasusulu se sulu paia i o matou ala,
E faasusulu se sulu paia i o matou ala.
Matou te tatalo mo oe ma le alofa mutimutivale;
Ma a o lagonaina le tatalo a le fanau i luga,
Ia manuia pea oe, ma ia tuuina atu e le Atua
Mea uma e tatau ma sili a o e soifua pea,
Mea uma e tatau ma sili a o e soifua pea.51
E sefuluvalu masina mulimuli ane, i le aso 2 o Setema, 1898, na maliu ai Peresitene Wilford Woodruff, ma oo ai ina faatasi atu i ona uso o le Au Paia o e sa muamua ia te ia ua maliliu. I lona sauniga, lea sa faia i le Tapeneko i Sate Leki, sa i ai “le agaga o le filemu… sa faamalumalu mai i luga o fuafuaga uma, ma faatumuina le faapotopotoga ma tumau ai le faamafanafanaga i lagona o tagata uma.” O totonu o le Tapeneko sa “matua matagofie ona teuteuina i ie papae,” faatasi ai ma le “tele ma le matagofie” o teu fugalaau ma fusi saito ma fusi karite. “I itu taitasi o le okeni sa i ai fuainumera 1847 ma fusi tetele lava o sagebrush ma mataolela [ma] tumutumu o laau o le paina,” e faamanatuina ai le ulufale mai o paionia i le Vanu o Sate Leki i le masina o Iulai 1847. “I luga ae o se ata lapoa lava o Peresitene Woodruff, sa malama mai ai le folafolaga “E ui ina oti ae tautala mai pea,” o se saafiafiga i se perofeta a le Atua e ana aoaoga ma faataitaiga ia o le a faaauau pea ona musuia ai le Au Paia o Aso e Gata Ai i a latou taumafaiga uma e fesoasoani ai e fausia le malo o le Atua.52
I le 1839, na tuua ai e Elder Wilford Woodruff (i luma), Elder Polika Iaga (i tua), ma isi uso o le Korama a Aposetolo e Toasefululua o latou aiga e talai atu le talalelei i Egelani.
Elder Wilford Woodruff ma lona aiga sa nonofo i le fale lenei i Navu, Ilinoi.
O le Malumalu i Manti Iuta, sa faapaiaina e Peresitene Wilford Woodruff i le 1888.
O Peresitene Wilford Woodruff, ogatotonu, faatasi ma ona fesoasoani i le Au Peresitene Sili: Peresitene George Q. Cannon, itu tauagavale, ma Peresitene Iosefa F. Samita, itu taumatau.