Aoaoga a Peresitene
Mataupu 18: Galuega Faalemalumalu: O Le Avea ma Faaola i Luga o le Mauga o Siona

Mataupu 18

Galuega Faalemalumalu: O Le Avea ma Faaola i Luga o le Mauga o Siona

O loo tatou umia ki o le faaolataga mo o tatou tuaa o e ua maliliu e aunoa ma lo latou mauaina o le talalelei.

Mai le Soifuaga o Wilford Woodruff

Ile masina o Oketopa i le 1841, ae lei umi talu ona foi atu i Navu mai se misiona i Egelani, sa auai atu ai Elder Wilford Woodruff i se fonotaga lea sa aoaoina ai e le Perofeta o Iosefa Samita le mataupu faavae o le faaolataga i e ua oti. O le taimi muamua lea na faalogo ai Elder Woodruff e mafai e tagata soifua o le Ekalesia ona mauaina sauniga paia faaola mo o latou tuaa o e ua mavae atu. Sa faapea mai o ia: “E pei o se sulu o le malamalama mai le nofoalii o le Atua i o matou loto. Sa tatalaina ai se fanua lautele e pei o le faavavau i o matou mafaufau.”1Sa ia faapea mai: “Sa foliga mai ia te a’u o le Atua o le sa faaalia mai lena aoaoga faavae i tagata e poto, sa’o ma faamaoni, ua i ai ia te ia uma uiga silisili ma le faautauta ma le atamai. Sa ou lagona sa tumau o ia i lona alofa, alofa tunoa, amiotonu ma le faamasinoga tonu, ma sa ou lagonaina ai ia faasili atu lo’u alofa i le Alii nai lo se isi lava taimi muamua i lo’u olaga. … Sa ou lagonaina e fai atu aleluia ina ua oo mai le faaaliga na faaalia mai ai ia i matou le papatisoga mo e ua maliliu. Sa ou lagonaina ua ia i tatou le aia e olioli ai i faamanuiaga o le Lagi.”2

I lona faalogo ai i lenei mataupu faavae, sa mafaufau ai Elder Woodruff i lona tina. “O le mea muamua lava na oo mai i lo’u mafaufau,” sa fai mai ai o ia, “e faapea o loo i ai lo’u tina i le lalolagi o agaga. Sa maliu o ia a o 14 masina o lo’u matua. Ou te le’i iloa lava [lo’u] tina. Sa ou mafaufau ifo ia te a’u, Pe o ia te a’u ea le mana ou te alu atu ai ma faamauina lo’u tina ma lo’u tama? O le upu o le, ioe.”3 Sa ia toe saunoa mulimuli ane e uiga i le taimi na iu ina maua ai e ia le avanoa e faamau ai lona tina i lona tama: “O le a i ai sana vaega i le uluai toetutu; ma ua lava lea e tauia ai a’u galuega uma i lenei olaga.”4 Sa molimau mai foi o ia i le olioli sa lagonaina e ia a o ia faatinoina sauniga paia o le malumalu mo isi tagata o lona aiga ua maliliu: “Ua ou mauaina le faamanuiaga ma le avanoa e togiola ai i totonu o le Malumalu o lo tatou Atua se fa afe o aiga o lo’u tama ma lo’u tina. Ou te talanoa i lenei mea ona o se tasi lea o o tatou faamanuiaga, o le atoatoaga ma le mamalu o le a tatou le iloaina seiloga e tatalaina le veli.”5

A o auauna ai i le avea ma Peresitene o le Ekalesia, sa faapaiaina ai e Wilford Woodruff le Malumalu o Sate Leki. I lena faatasiga sa ia aioi atu ai i le Alii e fesoasoani i le Au Paia i a latou taumafaiga ina ia faaolaina e ua oti: “Ia e … faatagaina au avefeau paia e asiasi mai ia i matou i totonu o nei puipui paia ma faailoa mai ia i matou e tusa ai ma le galuega e tatau ona matou faatinoina mo e ua oti. Ma, e pei ona e faatupuina i loto o le toatele o e e lei ulufale atu i le feagaiga ma oe e sailia o latou gafa, ma i le faia o lea ua latou sailia ai agai i tua gafa o le toatele o lau Au Paia, matou te tatalo ina ia e faateleina lenei faanaunautaiga i o latou loto, ina ia mafai ai i lea auala ona latou fesoasoani i le faataunuuina o lau galuega. Ia e faamanuiaina i latou, matou te tatalo atu ai, i a latou galuega, ina ia aua nei latou pauu atu i ni sese a o saunia o latou gafa; aemaise foi, matou te talosaga atu i lau afio ina ia faailoa atu ia i latou auala fou e maua ai faamatalaga, ma tuuina atu i o latou lima faamaumauga o taimi ua te’a, ina ia le gata ina sa’o a latou galuega a ia atoatoa foi.”6

Aoaoga a Wilford Woodruff

E alofa mutimutivale le Tama Faalelagi i Ana fanau uma ma na te le faasalaina i latou o e oti e aunoa ma le mauaina o le avanoa e maua ai le talalelei.

Afai e lei faalogo e ua oti i le Talalelei, o le a le auina atu i latou i seoli aua latou te lei mauaina. O le Atua o le Tama o tagata uma. E alofa mutimutivale o ia i tagata uma. … E miliona ma miliona tagata sa fananau mai i la le tino, ma sa ola ma ua o atu i le tuugamau, o e e lei vaai lava i le fofoga o se perofeta i o latou olaga; e lei vaai lava i se alii sa valaauina e le Atua ma sa i ai le mana e taitai ai se tasi o sauniga paia o le Maota o le Atua. Pe o le a faasalaina ea i latou e le Atua ona latou te lei mauaina le Talalelei? E leai lava.7

E le faailoga tagata le Atua; o le a ia le tuuina atu avanoa i se tasi tupulaga ae taofia mai le isi tupulaga; ma o le aiga atoa uma lava o tagata, mai lava i le tama ia Atamu e oo mai i o tatou aso, e tatau lava ona i ai le avanoa, i se mea, e faalogo ai i le talalelei a Keriso; ma o tupulaga ua mavae ma tea atu e aunoa ma le faalogo i le talalelei i lona atoatoaga, mana ma le mamalu, o le a le tuuaiina lava e le Atua mo le le usiusitai i ai. Ma o le a ia le aumaia foi i latou i le faasalaga mo le teteeina o se tulafono latou te lei vaai lava i ai pe malamalama ai; ma afai latou te ola e tusa ai ma le malamalama sa ia i latou o le mamao foi lena e faamasinoina ai i latou, ma o le a talaiina ia i latou [le talalelei] i le lalolagi o agaga.8

E avea i tatou ma faaola i luga o le Mauga o Siona ao tatou fausiaina malumalu ma mauaina sauniga faaola mo e ua oti.

O le toatele o o tatou aiga, o loo i ai nei i le lalolagi o agaga, e lei vaai lava i ni fofoga o se aposetolo, perofeta po o alii musuia, ma o loo saisaitia i latou i le falepuipui. E mafai e Iosefa Samita, Heber C. Kimball, George A. Smith ma le afe ma afe o toeaina o Isaraelu ona talai i na agaga, ma mafai ai ona latou mauaina molimau ia e tauaveina e toeaina; ae o le a le papatisoina e alii faifeautalai i latou o e o le a talitonu ai iina; e leai se papatisoga i le lalolagi o agaga e pei lava ona leai se faaipoipoga po o le faaipoipoina.9

O se tagata po o ni tagata o loo ola i la le tino e tatau ona faataunuuina le isi vaega lenei o le galuega mo i latou; aua e tutusa lava le tele o galuega manaomia e faasaoina ai se ua oti ae lei mauaina le Talalelei ma le tagata o loo ola pea. Ma o i latou uma lava o e ua tea atu e aunoa ma le Talalelei e i ai le latou aia e talitonu ai e i ai se tasi i la le tino o le a faatinoina ia galuega mo i latou.10

O lo tatou tiute lava le tulai mai ma fausiaina nei Malumalu. Ou te vaai i lenei vaega o la tatou galuega o se misiona e matua tele lava lona taua e pei lava o le talai atu i e o loo ola pea; o le a lagonaina e i latou o e ua oti le leo o auauna a le Atua i le lalolagi o agaga, ma e le mafai e i latou ona tulai mai i le taeao o le [uluai] toetutu, seiloga e faatinoina sauniga paia patino, mo i latou ma suitulaga ia i latou, i Malumalu ua fausiaina i le suafa o le Atua. … E tatau lava i se tasi ona faaolaina i latou, e ala lea i le faatinoina o ia lava sauniga paia mo i latou i la le tino aua e le mafai e i latou ona faia mo i latou lava i la le agaga, ma ina ia mafai ona faataunuuina lenei galuega, e tatau ai ia i tatou ona i ai malumalu e faia ai; ma o le mea ou te moomoo ou te fai atu ai ia te outou, o’u uso ma tuafafine, e faapea o loo manaomia e le Atua o le lagi ona tatou tulai mai ma fausiaina, ina ia faatelevaveina le galuega o le faaolataga. O le a faafetaia’i i tatou e lo tatou taui pe a tatou o atu i talaatu o le veli. …

… Ou te le masalosalo i le saunoaga a Peresitene Polika [Iaga] faapea sa ia lagonaina le musumusuga e valaau atu i le Au Paia o Aso e Gata Ai ina ia faatopetope le fausiaina o nei Malumalu. Sa ia lagonaina le taua o le galuega; ae o lea ua mavae atu o ia, ma ua taatia mai ia i tatou e faaauauina, ma o le a faamanuiaina e le Atua a tatou galuega ma o le a tatou fiafia ai iina. E i ai ni sauniuniga e tatau mo le afio mai faalua o le Faaola; ma a oo ina maea ona tatou fausiaina nei Malumalu e pei ona fuafuaina, o le a amataina ai iina ona tatou vaai i le taua o le fausiaina o isi malumalu, aua e tusa ai ma le maelega o a tatou galuega i lenei itu, o le a mafai ai ona malamalama i le tele o le galuega e tatau ona faia, ma o le taimi lenei ua na o se amataga. A oo ina afio mai le Faaola, e afe tausaga o le a tuuina atu i le faiga o lenei galuega o le faaolataga; ma o le a soo le nuu lenei o Iosefa i Malumalu— Amerika i Matu ma Saute—faapea foi i Europa ma isi nuu uma; ma o gafa uma o Semu, Hamo, ma Iafeta o e e lei taliaina le talalelei i la le tino ae mulimuli ona talia ai, e tatau ona faia o latou galuega i totonu o Malumalu o le Atua a o lei tuuina atu e le Faaola le malo i le Tama, ma faapea atu, “Ua mae’a.”11

Ua uma ona faataatia mai i o outou luma … nisi o mea e faatatau tonu i le faaolataga o o tatou tagata oti, ma o nisi mea e faatatau i le fausiaina o malumalu. Uso e ma tuafafine, o galuega taua nei. O galuega ia tatou te faia mo isi e le mafai ona latou faia mo i latou lava. O le mea lea sa faia e Iesu Keriso ina ua ia tuuina atu Lona soifua mo lo tatou faaolataga, aua e le mafai ona tatou faaolaina i tatou lava. E i ai o tatou tama ma tina ma aiga o loo i le lalolagi o agaga, ma e i ai le galuega e tatau ona tatou faatinoina mo i latou. Ia te a’u lava ia sa i ai se lagona matua faagaeetia i lenei galuega o le faaolaina o e ua oti, ma e faapena foi o’u uso ma tuafafine. O se galuega e tatau ona tatou faaauauina a o i ai le avanoa. … O se galuega lenei o loo taatia mai i luga o le Au Paia o Aso e Gata Ai. Ia outou faia mea uma tou te mafaia mo lea faamoemoe, ina ia oo i le taimi tou te te’a atu ai i le isi itu o le veli o le a faamanuiaina outou e o outou tama, tina, aiga ma uo mo mea ua outou faia mo i latou, ma o le tele lava o le a avea outou ma meafaigaluega i aao o le Atua i le mauaina o lo latou faaolataga, o le a ta’ua outou o Faaola i luma o le Mauga o Siona i le faataunuuina o valoaga (tagai i le Opetaia 1:21].12

Ua faamanuiaina i tatou i le mana ma le pule, o le umiaina o le Perisitua Paia e ala i le poloaiga a le Atua, e tu i luga o le fogaeleele ma faaolaina uma e o ola ma e ua oti. Afai tatou te le faia, e tatau ona faamalaiaina ma vavaeeseina mai le lalolagi, ma o le a faatuina mai e le Atua o Isaraelu se nuu o le a faia.13

Uso e ma tuafafine, ia outou uunaia o outou loto i nei mea. Ia tatou o atu ma a tatou faamaumauga, ua faatumuina ma le amiotonu i luma o le Alii, ma faatinoina lenei aoaoga faavae, ma o le a ia i tatou faamanuiaga a le Atua, ma o i latou o e o le a faaolaina o le a faamanuiaina i tatou i aso o le a sau. Ou te tatalo i le Atua o le a mafai e i tatou o se nuu ona tatalaina o tatou mata ina ia vaai, o o tatou taliga ina ia lagona, ma o tatou loto ia malamalama i le galuega maoae ma le malosi o loo taatia mai i luga o o tatou tauau, ma o loo manaomia e le Atua o le lagi ai o tatou lima. E maoae ma mamalu nei aoaoga faavae ua faaalia mai e le Atua ia i tatou e uiga i le faaolataga o o tatou tagata oti.14

O loo nofo popole e ua maliliu mo i tatou ina ia tatou taliaina sauniga paia mo i latou, ma o loo silasila mai foi le Atua Lava Ia ma le matua naunautai lava i galuega faalemalumalu.

O loo i ai se galuega maoae i o tatou luma i le faaolataga o o tatou tagata ua maliliu. O le auala o loo tatou savalia o loo vaavaaia mai e le lagi faatasi ma lagona faagaeetia.15

O loo vaavaai mai o tatou augatama ia i tatou ia tatou faia lenei galuega. O loo latou vaavaaia i tatou ma le matua popole tele, ma o loo naunautai ma faamoemoe mai ma talitonu o le a tatou faamaeaina nei malumalu ma faia sauniga paia patino mo i latou, ina ia oo atu i le taeao o le toetutu ua mafai ona latou tulai mai ma fiafia ai i faamanuiaga lava ia e tasi o loo tatou fiafia ai.16

“O i latou uma o e oti e aunoa ma le malamalama i lenei talalelei, o e semanu latou te talia pe ana faatagaina e ola pea i le lalolagi, e avea i latou ma suli o le malo selesitila o le Atua; e le gata foi i lea, o i latou uma lava o le a oti e amata atu i le taimi nei e aunoa ma se malamalama e uiga i le talalelei, o e semanu latou te talia ma o latou loto atoa, o le a avea ma suli o lena malo, aua o A’u, le Alii, o le a faamasinoina tagata uma e tusa ma a latou galuega, e tusa ma manaoga o o latou loto.” [MFF 137:7–9.] O le a faapena foi mo o outou augatama. O le a toalaiti, pe afai e i ai, nisi o le a le taliaina le Talalelei. … O le a taliaina e augatama o lenei nuu le Talalelei.17

Ua saunoa mai Peresitene Iaga ia i tatou, ma e moni lava, afai e mafai ona tautala mai e ua oti i se gagana leotele e pei o faititili e sefulu afe, e valaau mai i auauna a le Atua e tulai mai ma fausiaina Malumalu, faalautele lo latou valaauga ma faaolaina o latou tagata oti.18

Pe ana [tatou] iloaina ma malamalama i lagona o le Perofeta o Iosefa Samita, ma i latou o lona usoga sa latou galulue faatasi, ma lagona o le miliona ma miliona o le aiga o le tagata o e o loo saisaitia i o latou falepuipui, o le a tatou le faavaivai. … O le a tatou galulue mo le faaolaina o o tatou tagata oti.19

O fofoga uma o le lagi o loo i o tatou luga; o fofoga o le Atua lava ia, o fofoga o Perofeta uma taitoatasi ma Aposetolo i le lalolagi o agaga, o loo vaavaaia outou, o loo vaavaaia lenei Perisitua, ina ia iloa ai po o a mea o loo latou faia ma mea o le a latou faia. E matua sili mamao atu le taua nai lo le mea tatou te iloa ma malamalama ai. Ia tatou iloa le taua o sauniga i le Maota o le Atua ma faia o tatou tiute, ina ia ta’uamiotonuina ai i tatou.20

A oo ina tatou feiloai atu i o tatou tuaa i le lalolagi o agaga, o le a avea ma taimi e fiafia ai pe faanoanoa ai, e fuafua lava i galuega ua tatou faia iinei mo i latou.

Ua ia te outou le mana e … faaolaina ai o outou tagata ua oti. E toatele outou ua faia lenei mea, ma ou te faamoemoe o le a faaauau pea e outou uma pe a o i ai pea nisi ua maliliu ia faaolaina. Aua lava nei faamutaina le galuega a o i ai ia te outou le mana e ulufale atu ai i le Malumalu. … Ua mafai ona ou faatinoina le faaolaina o nai afe o i latou iinei. Ua ou faia papatisoga, faaeega, mulumuluga ma faauuga, faaeega paia ma faamauga mo i latou, o le faiga lava e tasi e pei lava o loo tutu mai i latou i le tino. O le a mafai ona ou alu atu ma faafeiloai i latou i le isi itu o le veli. O le a outou o atu foi ma faafeiloai o outou aiga.21

A oo ina taatia lo’u tino i le tuugamau ma alu atu lo’u agaga i le lalolagi o agaga, o le a ou olioli ma maua le mamalu faatasi ma i latou i le taeao o le toetutu, pe afai latou te taliaina nei aoaoga faavae. “Ia,” atonu o la outou tala lea, “a faapefea pe afai o nei tagata o e sa e papatiso ai o le a le taliaina le Talalelei?” O le a tuuaiina lava i latou, ae le o a’u. O se tiute lenei o loo taatia mai i luga o Isaraelu atoa, e tatau ona latou faia lenei galuega, pe afai lava latou te maua le avanoa iinei i le fogaeleele.22

O a ni o’u lagona, i lo’u ola ai i le umi ou te ola ai, faatasi ai ma avanoa ua ou maua o le ulufale atu lea i nei malumalu, ona ou alu atu ai lea i le lalolagi o agaga e aunoa ma le faia o lenei galuega? Ou te feiloai i le aiga o lo’u tama, ou te feiloai i le aiga o lo’u tina, ou te feiloai i o’u aiga uma, a o latou saisaitia i totonu o le falepuipui; sa ou umiaina ki o lo latou faaolataga, ae peitai ou te lei faia se mea mo i latou; o a ni o’u lagona, pe o a foi ni o latou lagona mai ia te a’u?23

Ou te le fia oo atu i le lalolagi o agaga e feiloai ma o’u aiga o e e lei faalogo lava i le Talalelei i o latou aso ma tupulaga, ma latou ta’u maia ia te a’u, “Sa e umiaina i lou lima le mana e te alu atu ai ma faaolaina a’u ae e te le’i faia.” Ou te le manao ou te feiloai atu i se tulaga faapena. Ou te le manao i le Au Paia o Aso e Gata Ai e oo atu i lea tulaga. Ou te manatu o loo lelei mea o loo tatou faia. Ua i ai a tatou malumalu e fa i nei vanu o atumauga [i le 1897], ma o loo lelei lava ona faaaogaina e le Au Paia o Aso e Gata Ai. Ae tatou te mananao e faaauauina lenei galuega seia tatou faaolaina uma e o loo mafai ona oo atu i ai lo tatou mana e faaolaina ai. Afai tatou te faataunuuina lenei aoaoga faavae, o le a tatou maua ona faamanuiaga. O le a i ai faatasi ma i tatou i le taeao o le toetutu, pe a oo ina o ae faatasi i tatou ma o tatou tama ma tina ma o tatou aiga aua ua uma ona tatou faaolaina i latou.24

Afai tatou te le faia mea ua manaomia mai ia i tatou i lenei mea, o le a faasalaina i tatou. Afai tatou te faia lenei, ona oo lea ina tatou feiloai atu i a tatou uo i le malo selesitila, o le a latou faapea mai, “Ua avea oe ma faaola, aua sa ia te oe le mana e faia ai. Sa e faia nei sauniga paia sa manaomia mai e le Atua.”25

Ua valaauina i tatou e avea ma Faaola i luga o Mauga o Siona, a o i le Alii le malo. O mataupu faavae mamalu nei. O le faaolaina o i tatou lava, ma le faaolaina o o tatou uso a tagata, oka se mamalu o lenei mea! O a auro ma ario; o a oa o lenei lalolagi? E pala na mea pe a outou faaaogaina. Tatou te te’a ese atu ae tuua [na oa]. Ae afai tatou te maua le ola faavavau, afai tatou te tausia le faatuatua ma manumalo, o le a tatou olioli pe a tatou o atu i le isi itu o le veli. Ou te olioli i nei mea uma. Toeitiiti lava leai se mataupu faavae ua faaalia mai e le Alii ua sili atu lo’u olioli ai nai lo le faaolaina o e ua oti; o le a tatou faatasi ma o tatou tama, o o tatou tina, o a tatou ava ma a tatou fanau i le faatulagaga faaleaiga, i le taeao o le uluai toetu faapea le Malo Selesitila. O ni mataupu faavae silisili ona maoae nei. E matua aoga ai osigataulaga uma taitasi [tatou te faia]26

Fautuaga mo Suesuega ma le Aoaoina Atu

Mafaufau i nei manatu ao e suesueina le mataupu pe a e sauniuni e aoaoina atu. Mo fesoasoaniga faaopoopo, tagai i itulau v–ix.

  • Sa faapefea lagona o Wilford Woodruff ina ua ia faalogo muamua lava i le mataupu faavae o le faaolataga o e ua maliliu? O a ni ona uluai manatu? (Tagai i le itulau 193.) O le a se mea e mafai ona tatou aoaoina mai i nei lagona?

  • Ua saunoa mai Peresitene Woodruff o galuega faalemalumalu mo e ua maliliu e tutusa lava le taua ma le galuega faafaifeautalai mo e o loo ola pea (itulau 195.) Mafaufau loloto pe talanoaina le taua tele o nei faamatalaga. O a aafiaga ua faaalia atu ia te oe le fesootaiga a le malumalu ma le galuega faafaifeautalai?

  • Ua saunoa Peresitene Woodruff faapea a oo ina tatou mauaina sauniga paia mo o tatou tagata ua maliliu, ua tatou faia se galuega e “le mafai ona faia [e isi] mo i latou lava” itulau 195. E faapefea ona uunaia o tatou lagona e lenei malamalama e uiga i le galuega faalemalumalu?

  • Toe iloilo le vaega lea e amata i le itulau 197. E tusa ai ma se aoaoga a Peresitene Woodruff, o a lagona o o tatou tuaa e uiga i le galuega faalemalumalu? O le a le finagalo o le Atua le Tama e uiga i le galuega? O a ni ou lagona a o e faitau i nei faamatalaga?

  • Toe iloilo le vaega faaiu o le mataupu, amata mai i le itulau 200. Mafaufau pe faapefea ou lagona pe a e feiloai atu i ou tuaa i le lalolagi o agaga.

  • E faapefea ona tatou faaavanoa le taimi mo galuega faalemalumalu ma le talafaasolopito o le aiga? O a ni punaoa ua saunia e le Ekalesia e taitai ma fesoasoani ai ia i tatou?

  • E faapefea e le auai i le faatinoina o galuega faalemalumalu ma le talafaasolopito o le aiga ona faamalolosia o tatou aiga? O a ni mea e mafai ona tatou faia e fesoasoani ai i le autalavou a le Ekalesia ia maua le olioli i o latou tiutetauave o le faaolaina o e ua oti?

Mau E Faatatau I Ai:1 Korinito 15:29; MFF 128; 138

Faamatalaga

  1. Deseret Weekly, Tesema 25, 1897, 34.

  2. Deseret News, Me 27, 1857, 91.

  3. Deseret Weekly, Tesema 25, 1897, 34.

  4. Deseret Weekly, Fepuari 24, 1894, 288.

  5. Deseret Weekly, Fepuari 1894, 288.

  6. The Discourses of Wilford Woodruff, filifilia e G. Homer Durham (1946), 341.

  7. Deseret Weekly, Aperila 19, 1890, 562.

  8. The Discourses of Wilford Woodruff, 149.

  9. Deseret News: Semi-Weekly, Me 2, 1876, 4.

  10. Deseret News: Semi-Weekly, Me 14, 1878, 1.

  11. Deseret News: Semi-Weekly, Mati 26, 1878, 1.

  12. Millenial Star, Novema 21, 1887, 742–43.

  13. Millenial Star, Me 28, 1894, 324.

  14. Millenial Star, Me 28, 1894, 341.

  15. Deseret News: Semi-Weekly, Oketopa 18, 1881, 1.

  16. The Discourses of Wilford Woodruff, 150.

  17. Millenial Star, Me 28, 1894, 339–40.

  18. Deseret News: Semi-Weekly, Mati 26, 1878, 1.

  19. Deseret News: Semi-Weekly, Oketopa 26, 1880, 1.

  20. I le Lipoti o le Konafesi, Oketopa 1897, 47.

  21. Deseret Weekly, Aokuso 6, 1892, 193.

  22. Deseret Weekly, Aperila 25, 1891, 555.

  23. Millenial Star, Me 14, 1896, 309.

  24. Deseret Weekly, Tesema 25, 1897, 34.

  25. I le Lipoti o le Konafesi, Oketopa 1897, 47.

  26. Deseret Weekly, Aokuso 30, 1890, 308.

Salt Lake Temple

O le Malumalu o Sate Leki, na faapaiaina e Peresitene Wilford Woodruff i le aso 6 o Aperila, 1893.

Winter Quarters Nebraska Temple

O le Malumalu o Uinita Kuota Nebraska, sa fausiaina i le vaega sa toatele le Au Paia sa tolauapi ai i le taumalulu o le 1846–47 a o lumanai le latou malaga agai atu i le Vanu o Sate Leki.

St. George Utah Temple

O le Malumalu o St. George Iuta, lea sa avea ai Peresitene Wilford Woodruff ma peresitene o le malumalu.