Mataupu 13

Tusi Talaaga: “E Sili Mamao Atu Lona Taua nai lo le Auro”

O a tatou tusi talaaga e taua ia i tatou lava, ma e mafai ona latou aumaia faamanuiaga i o tatou aiga ma tupulaga uma o le lumanai.

Mai le Soifuaga o Wilford Woodruff

I le 1835 sa amataina ai e Wilford Woodruff lana tusi talaaga muamua, “aua ou te talitonu e aoga e toe tagataga’i ai i o tatou olaga ua tuanai ma e le gata o se avanoa taua ae o se tiute le tausia o se tala sa’o atoatoa o a tatou mea sa fai.” Sa ia tusia, “O le faamoemoe lea o le a ou taumafai ai e amata atu i le taimi lenei e tausia se tusi talaaga o a’u femalagaaiga, afai e manaomia e mafai ona ou tuuina atu se tala o a’u matafaioi.”¹ Sa ia tausia se tusi talaaga mo le isi 63 tausaga na sosoo ai, o lana faamaumauga faaiu o Aokuso 31, 1898, toe lua aso ae maliu. O ana faamaumauga o loo i ai se faamaumauga moni ma le faamaoni o lona lava soifuaga, o loo faaali mai ai lona alofa i lona aiga, o ona manatu i lona siosiomaga, o lona filiga i le faatinoina o galuega o aso taitasi, o lona faatuatua i taimi o faigata, ma lana molimau ma lona malamalamaaga i le talalelei. Ua aumaia foi e faamaumauga se vaaiga i olaga o isi tagata o le Ekalesia i lea vaitaimi.

E faaopoopo ai i ana tusitusiga e uiga i lona lava soifuaga ma lana talaiga, sa tausia foi e Wilford Woodruff ma le faaeteete se faamaumauga o le talafaasolopito o le Ekalesia. Sa ia faamatala mai: “Sa musuia ma uunaia a’u [e le Agaga] ina ia tausia se tusi talaaga ma tusia taualumaga uma a lenei Ekalesia e tusa ai ma lo’u mafai. Ou te lei malamalama pe aisea na matua uunaia ai o’u lagona [i le tausia o tusi talaaga] i le faatoa amata mai o le Ekalesia, ae o lenei ua ou malamalama. Soo se taimi lava ou te faalogo ai ia Uso Iosefa po o le Au Toasefululua o lauga pe aoao atu e matua malosi lo’u lagona e tatau lava ona ou tusia i lalo. [A uma loa ona tusia] faatoa lelei lo’u faalogona. E mafai ona ou tusia se lauga a Iosefa i le atoa o le vaiaso talu ona uma ona tuuina atu toeitiiti lava upu i le upu, ma a maea ona tusia, ona galo foi lea i lo’u mafaufau. O se meaalofa lea mai le Atua ia te a’u.”²

O se vaega o lana taumafaiga e tusitusia le talafaasolopito o le Ekalesia, sa faamaumau ai e Peresitene Woodruff auiliiliga taua mai fonotaga sa ia auai. I se tasi fonotaga, sa ia aoao ai se aoaoga faavae e mafai ona faatatau i tusi talaaga faapea foi ma faamaumauga faitaulia a le Ekalesia: “A o savavali ai i se vaitafe, e le mafai lava ona tatou laa faalua i le vai e tasi. E le mafai foi ona tatou faaalu faalua se taimi e tasi. A tatou te’a atu i fafo ma lena faitotoa, o taualumaga o lena fonotaga o le a tapunia mo i tatou e faavavau. O le a le toe i ai lava lenei afiafi tatou te faaaluina lona taimi. Pe le tatau ea la ona tatou tausia se faamaumauga o a tatou galuega, aoaoga, ma fautuaga o loo tatou tuuina atu i lenei fonotaga? E tatau ia i tatou.”³

O ana tusi talaaga, sa tuuina atu ai e Peresitene Woodruff se meaalofa tumau i ana fanau ma tagata uma lava o le Ekalesia. Sa matauina e le tusitala o talaaga o Matthias F. Cowley: “O le olaga o Wilford Woodruff sa tumu i mea ofoofogia. O se olaga e matua faigofie lava lea sa saoloto lava ona faaali mai ai lona loto ma ona faamoemoega. O le faamaoni o ona manatu, o lona faaeteete i auiliiliga, ma lona faaeteetega loloto mo le upumoni ua avea ai o ia, atonu, o le faamatala tala aupito sili ona lelei lea i le talafaasolopito atoa o le Ekalesia.”⁴ Na tusia e Elder B. H. Roberts, o se tasi o le Aufono Muamua a Fitugafulu ma o se tusi talafaasolopito iloga a le Ekalesia, e faapea: “Ua tuuina mai e Peresitene Woodruff se auaunaga matua sili ona taua i le ekalesia. O ana Tusi Talaaga, sa tausia i aso uma ma le faaeteete ma le mama ma faapea foi ona malosi le faamaumauina o itulau ma faavaa, … o loo ua aofia ai se oa o faamaumauga faatalafaasolopito moni e taugata. Ua nofo aitalafu le ekalesia i nei Tusi Talaaga mo se faamaumauga faatuatuaina o lauga ma faamatalaga a le Perofeta o le Augatupulaga Fou—o Iosefa Samita—ia ana leai [Peresitene Woodruff] semanu ua leiloa e faavavau. O le tulaga moni lava foi lea i lauga ma faamatalaga a Polika Iaga, ma isi toeaiina iloga o le ekalesia; aemaise o minute o fonotaga taua faaaufono, o faaiuga, faamasinoga, aiaiga, ma le tele o faatinoga aloaia e faalilolilo lo latou natura, ana leai e le mafai e i latou o e faamaumauina talafaasolopito ona maua manatu tonu e tatau ona i ai i le tele o mataupu—i tulaga uma nei ua matua taua ai Tusi Talaaga a Peresitene Woodruff.”⁵

O le tele o faamatalaga i lenei mataupu o loo sii mai lea i faamaumauga a Peresitene Woodruff o lauga sa ia tuuina atu i fonotaga faaleperisitua. E ui lava sa masani ona ia talanoa i toeaiina i nei faamatalaga, o ana aoaoga ua matua aoga i tagata uma o le Ekalesia.

Aoaoga a Wilford Woodruff

A tatou faamaumauina talafaasolopito o o tatou olaga, e aoga ia i tatou, o a tatou fanau, ma le Ekalesia.

O le faamaumauga ma le talafaasolopito o lenei Ekalesia ma lenei malo o le a manaomia i le lumanai. E lei i ai lava se augatupulaga i le lalolagi ua sili atu le maoae o lona tulaga ese nai lo lea tatou te ola ai. …

E moni sa tausia e Iosefa Samita se talafaasolopito o lona ia lava soifuaga ma isi mea sa i ai so latou sootaga ia te ia. Ua maliu nei o ia, ae o lona olaga ma lana molimau lea ua faasalalauina i le lalolagi. … O Peresitene Iaga foi sa i ai le au tusiupu o e sa faamaumauina ana gaoioiga uma o aso taitasi ma lona soifuaga, lea e sa’o ma lelei. Ae o loo faamaumau ai ea iina le talafaasolopito ola faapea ia feutagaiga a le Atua ma le fia afe o Aposetolo ma toeaiina o e o loo i ai pe o le a i ai i le lalolagi atoa i nuu uma i lalo o le lagi? E leai, leai lava. O le mea lea o outou toeaina uma o Isaraelu, ia taitasi ma tusitusia o outou lava talafaasolopito ma feutagaiga a le Atua ma outou i le lalolagi atoa mo lo outou lava lelei ma le lelei o a outou fanau, mo le lelei o le fanauga a Isaraelu, mo le lelei o Iutaia ma Tagata o Nuuese, mo le lelei o tupulaga o le lumanai.⁶

Atonu e manatu nisi e leai se taua o le tusitusia po o le tausia o se faamaumauga o a tatou galuega po o le galuega a le Atua, ae ou te talitonu e taua. Ana leai semanu e le musuia perofeta e apoapoai mai ia i tatou ia tatou faatuatua i le faatinoina o lenei mataupu. Ua ta’uina mai e le Alii ia i tatou e faapea, soo se mea tatou te fusifusia i le lalolagi e fusifusia i le lagi ma o mea uma foi tatou te tusi faamauina i le lalolagi o le a tusi faamauina i le lagi, ma e soo se mea foi tatou te le fusifusia pe tusi faamauina i le lalolagi o le a le fusifusia pe tusi faamauina foi i le lagi [tagai i le MFF 128:7–8]. O le mea lea e foliga mai e matua taua lava lo tatou tausia o se faamaumauga moni ma le faamaoni i mea uma lava.⁷

Atonu e faapea mai nisi [o le tausia o tusi talaaga] o se mea e matua faalavelave tele. Ae e le tatau lava ona tatou taua soo se mea o le a aumaia le lelei o se faalavelave. Ou te avea le vaega o lo’u olaga lea ua faaaluina i le tausia o tusi talaaga ma le tusitusia o talafaasolopito, o se vaega ua matua taua ma ua alu aoga.⁸

E tusa lava foi pe ana le iloa atu se isi lava faamoemoega vagana ai ia maua le avanoa e toe faitau ai i a tatou lava tusi faamaumau ma maua ai foi le avanoa o a tatou fanau e faitau ai, ua lava lena aoga e tauia ai le taimi na faaaluina e tusitusia ai.⁹

E tatau ona tatou faamaumauina faamanuiaga a le Atua ia i tatou ma a tatou gaoioiga aloaia i totonu o le Ekalesia.

E tatau i tagata taitoatasi uma ona tusia se otootoga o le talafaasolopito o lona olaga: o ona matua, o lona fanau mai, o lana ekalesia, le taimi na papatiso ai ma le tagata na faia le papatisoga, o le taimi na faaee ai, i le a le tulaga, ae o ai na faatinoina—ia tuuina mai se otootoga o ana misiona uma ma ana gaoioiga aloaia uma ma ana feutagaiga ma le Atua. Afai e oo i le taimi e maliu ai ma ua mananao le au tusi talafaasolopito e tusia ma faasalalauina lona talafaasolopito, o le a i ai ia i latou se mea e faavae ai a latou tusitusiga. E toatele i latou e manatu o lenei mataupu e le aoga ma e le taua, ae e le faapena ia te a’u.¹⁰

Ou te fautuaina outou ina ia tusitusia uma o o outou faamanuiaga ma teuina. … Ou te lagona e tatau ona ou poloaiina outou e faia se faamaumauga o galuega aloaia uma i o outou olaga. Afai e te papatisoina, faamauina, faaeeina, pe faamanuiaina soo se tagata pe e te faauuina ma’i, ia tusia le tala o lena mea. Afai e faia lenei mea e tagata uma taitoatasi, o le a mafai ona tusia e le Ekalesia se tala sa’o o lena mea. … Afai o loo manino le i ai o le mana ma faamanuiaga a le Atua i le faasaoina o lo’u ola mai faalavelave. … e tatau ona e faia se faamaumauga o lena mea. Ia tausia se tala o a oulua feutagaiga ma le Atua i aso uma. Ua ou tusia faamanuiaga uma lava ua ou mauaina, ma ou te le faatauina i ni auro.¹¹

E le tatau ea ia i tatou ona lava lo tatou ava i le Atua e faia ai se faamaumauga o na faamanuiaga ia Na te sasaaina mai i o tatou luga ma a tatou gaoioiga aloaia ia tatou te faia i Lona suafa i luga o lenei fogaeleele? Ou te manatu e tatau ia i tatou.¹²

O le Au Peresitene o le Ekalesia o loo taitaiina nei i tatou. … o loo tausia se talafaasolopito o fesootaiga a le Atua ma tagata ma i latou … ia o le a aoga i le miliona ma miliona o tupulaga o le lumanai. Ae pe o le a fai ea lena ma ‘alofaga o le tele o afe ma afe o toeaina ma faitaulaga sili ma Aposetolo o e ua femalagaai mo le tele o tausaga ma atiina ae lenei Ekalesia ma le malo ma ia i latou meaalofa a le Agaga Paia na latou maua ai le mana e faamalolo ai ma’i ma tulieseina ai temoni, faapupula mata o e tauaso, faalogona i e logonoa, faasavavali e pipili…, ma poloaiina temoni ma latou usiusitai ai ia i latou, ma maua agelu puipui e faasaoina i latou mai faalavelave ma le oti? Ou te fai atu, pe faamanuiaina ea toeaina i nei mea ae le manatu i le aoga o le tusitusia ma faamaumau? Pe le tau lava o sina tosi o se peni [a toeaina] ina ia tuua ai se tala i se faamaumauga mo a latou fanau ma tupulaga o le lumanai e faitau ai? Ou te fai atu e tatau ia i latou. Ou te manatu o loo manaomia lenei mea e le Alii mai i o tatou lima, ma o se talatuu e tamaoaiga ma paia o loo tatou nofo aitalafu moni ai lava ia tatou fanau.¹³

E tatau ona tatou tusia se faamaumauga o mea tutupu pe a tula’i mai.

O tatou o le nuu na faauuina e le Atua e faavaeina Lona malo i luga o le fogaeleele, atiina ae Siona, ma saunia le ala mo le afio mai o Iesu Keriso. O lenei, pe le tatau ea ona tatou tausia se tusi talaaga, faamaumauga, ma se talafaasolopito o fesootaiga a le Atua ma i tatou a o tutupu i lea aso ma lea aso i luma o o tatou mata? E tatau ia i tatou. …

… Nai lo le tuulafoaiina o lenei vaega o la tatou galuega ia taitoatasi le tagata na te mafaia, ona tausia se tusi talaaga ma faamaumauina mea tutupu a o tatou vaavaai atu i ai a o tutupu mai i lea aso ma lea aso. O lenei mea o le a avea ma meaalofa e matua taua tatou te tuuina atu ia tatou fanau, ma e matautia lona aoga i tupulaga o le lumanai e ala lea i le tuuina atu ia i latou o se talafaasolopito moni o le siitia ma le alualu i luma o le Ekalesia ma le malo o le Atua i luga o le fogaeleele i lenei augatupulaga faaiu, nai lo le tuu atu i o tatou fili e tusia se talafaasolopito sese o le Ekalesia moni a Keriso.¹⁴

E le vave ona tatou manatu i le taua o mea tutupu a o faapea ona oo mai ia i tatou, ae faatoa tatou lagonaina le taua o ia mea mulimuli ane. O loo tatou ola i le tasi o tupulaga aupito sili ona taua ua ola ai tagata, ma e tatau ia i tatou ona tusia se tala o na fesootaiga o loo tutupu i luma o o tatou mata i le faataunuuina o valoaga ma faaaliga a le Atua. O loo i ai le lolo tele o le faataunuuina o faaaliga i o tatou aso, ma a o tutupu ia mea i luma o o tatou mata tatou te mananao ia tusitusi ni faamaumauga o na mea.¹⁵

E tatau i tamaiti ona vave amata ona tausia tusi talaaga.

Ou te fia fai atu i a’u uo laiti faapea o le a avea ma faamanuiaga sili ia i latou, ma a latou fanau e mulimuli mai ia i latou, pe afai latou te tausia se tusi talaaga o aso uma ma mea e tutupu ia i latou ma siomia i latou. Ia aveane e tama ma teine uma se tama’i tusi, ma tusitusi ai ia toetoe lava o aso uma taitasi.

“O le a se mea e tatau ona ou tusia?” o la outou fesili lea. Ia tusitusia soo se mea lava e aoga ona faasaoina, po o le mea sili o loo ia te outou; ma afai e amataina lenei mea a o outou laiti, o le a matua faigofie lava ia te outou pe a oo ina avea outou ma alii ma tamaitai [matutua]. O le a faamalieina ai outou, ma a outou fanau, i le tolusefulu, limasefulu, po o le valusefulu tausaga mai le taimi lenei, tou te nonofo i lalo ma faitau mea sa tutupu ia te outou i lo outou laiti ma lo outou talavou! Tou te le mananao ea e faitau mea sa tutupu i o outou tama, ma tina, ma tama ma tina matutua, a o laiti i latou ma o latou olaga? Ae o le faamoemoe e le na o le taumafai ia e tausia se tusi talaaga a o e laitiiti, ae o le taumafai ia e faaauauina pea seia oo ina avea outou ma alii ma tamaitai [matutua], e oo lava i le atoaga o o outou olaga. E matua faapitoa lava le manaomiaina i le tupulaga lenei o loo outou ola ai, aua o loo outou ola i se augatupulaga e tulaga ese lona taua nai lo se isi lava [tupulaga] ua vaai i ai le fanauga a tagata, ma e matua sili mamao atu le taua o lo outou vave amata ona tausia tusi talaaga ma mulimuli ai i lena masani a o outou ola, nai lo le faia e isi tupulaga.

O outou o le fanau a Siona, ma o o outou matua ua valaauina e le Atua e atiina ae le Ekalesia a Keriso ma le Malo o le Atua i luga o le fogaeleele i aso gataaga, ma ua lata mai le taimi e oti ai o outou matua, ma o le a outou suitulaga ia te i latou. O le a avea outou ma tama ma tina, ma o [outou] alii laiti … o le a avea ma perofeta, aposetolo ma toeaiina, ma o le a outou femalagaai ma talai le talalelei, ma o le a ola e talia le afioga a le Alii. Ona matua manaomia ai lava lea ona tatau ona outou tausia ni tusi talaaga ma tusia tala o fesootaiga a le Alii ma outou. …

… O loo avea i le taimi lenei ma mea e sili ona ou fiafia i ai ma lo’u aiga le nonofo i lalo ma faitau se tala o a matou femalagaaiga, o mea na matou i ai, ma mea ua matou faia, ma fesootaiga a le Atua ma i matou, ma le tele o taimi fiafia ua matou faaaluina faatasi ma a matou uo. E mafai ona ou faitau i a’u tusi talaaga i ni aoaoga matagofie sa ou faalogo i ai i le tele o tausaga ua te’a mai ia Peresitene Iosefa Samita, Polika Iaga, ma Heber C. Kimball, le Au Aposetolo e Toasefululua, ma le toatele o isi toeaina lelei, ma taimi fiafia sa matou faaaluina faatasi. Afai o le a amataina e a’u uo laiti ona faia lenei [mea] ma faaauauina, o le a avea ma mea sili mamao atu lona taua ia i latou i le lumanai nai lo le auro.¹⁶

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Aisea ua taua ai tusi talaaga a Peresitene Woodruff i le Ekalesia? (Tagai i itulau 129, 131.) Faamata o le a se saunoaga a Peresitene Woodruff i tagata e manatu e le aoga a latou tusi talaaga e maua ai se eseesega i se isi tagata?
O a ni mea ua tutupu i le Ekalesia i le vaitaimi o lou olaga? Faamata e faapefea ona fesoasoani au faamaumauga o nei mea i au fanau ma fanau a au fanau?
Toe iloilo le parakalafa muamua o loo i le itulau e 131. E faapefea e le faamatalaga a Peresitene Woodruff i lenei parakalafa ona aoga i le tausia o tusi talaaga? Mafaufau loloto i le aafiaga iloga o mea taua ua tutupu o loo “le iloa uma e le [tupulaga] lenei ma tupulaga uma lava o le lumanai” (itulau 132).
Faasolo lau vaai i le mataupu, ma vaavaai ituaiga o faamatalaga eseese e tatau ona aofia i totonu o a tatou tusi talaaga. E faapefea ona aoga ia i tatou lava nei ituaiga o faamaumauga? O a ni auala e aoga ai i o tatou aiga?
O le a se mea tou te fia iloaina e uiga i olaga o outou tuaa? O le a la se fautuaga mai lenei tulaga e uiga i mea e mafai ona outou tusitusia i a outou tusi talaaga?
Aisea e taua ai le tusitusia [o tala] e uiga i mea tutupu i le taimi lava e uma ai ona tupu? (Tagai i itulau 134–135.) O le a se mea e mafai ona tatou faia e maua ai le taimi mo le tausia o a tatou tusi talaaga?
Susue i itulau e 135–137 ma toe faitau le fautuaga a Peresitene Woodruff i tamaiti ma le autalavou. E faapefea e matua ma matua o matua ona fetufaai o latou manatu ma a latou fanau ma fanau a fanau? Faamata e faapefea ona outou faaaogaina nei manatu i se afiafi faaleaiga po o le fonotaga faaleaiga?

Mau E Faatatau I Ai: 1 Nifae 1:1; Ominae 1:17; Mosaea 1:1–6; Alema 37:1–9; Mose 6:5–6

Wilford Woodruff’s journal — I le itulau lea o lana tusi talaaga, o loo faamaumauina ai e Wilford Woodruff ona lagona e uiga i la la’ua faaipoipoga ma Phoebe Whittemore Carter.

mother and daughter with journal — “Ia tofu tama ma teine uma ma se tama’i tusi, ma tusitusi ai toetoe o aso uma taitasi.”