Mataupu 6

Aoao Atu ma le Aoaoina Mai e ala i le Agaga

Tatou te manaomia le taitaiga a le Agaga Paia a o tatou aoaoina le talalelei ma a o tatou aoaoina atu i isi.

Mai le Soifuaga o Wilford Woodruff

Ao sauni atu Elder Wilford Woodruff mo se konafesi ia Oketopa 1855, sa ia tatalo mo se taitaiga, ma fesili atu po o le a le mea e tatau ona aoao atu e ia ma lana usoga i tagata. I le tali i lana tatalo, sa ia mauaina ai le faaaliga lea: “Ia mauaina e a’u auauna le Agaga Paia ma tausia lo’u Agaga ma i latou, ma o le a faatonuina ai i latou i le mea e tatau ona aoaoina atu pea i tagata; ma faatonuina tagata e tausi lo’u Agaga ma i latou, ma o le a mafai ai e i latou ona malamalama i le afioga a le Alii pe a aoaoina atu ia i latou.”¹

Faatasi ai ma se molimau maumaututu o lenei mataupu faavae, sa masani lava ia Peresitene Woodruff ona amata ana lauga faakonafesi i le faaali atu lea o sona naunautaiga e aoao atu i le mana o le Agaga Paia. Faaopoopo atu i ai, sa ia faamanatuina soo lava i le Au Paia o latou tiute e faalogo ma aoao mai e ala i lena lava mana. Sa ia faapea mai i se tasi taimi, “O i tatou uma lava e faalagolago i le Agaga o le Alii, i luga o faaaliga, i luga o musumusuga, i le Agaga Paia, ina ia tatou agavaa e aoao atu tagata ia ua valaauina i tatou e aoao atu, ma afai e le tuuina mai e le Alii ia te a’u le Agaga Paia i le afiafi lenei, ou te folafola atu ia te outou o le a leai se mea tele tou te maua mai ia Uso Woodruff.”²

Aoaoga a Wilford Woodruff

Pau lava le taimi e tatau ai ona tatou aoao atu le talalelei, o le taimi e musuia ai i tatou e le Agaga Paia.

Ou te le agavaa, pe agavaa foi soo se tagata e aoaoina le fanauga a tagata ma sii a’e i latou i le Talalelei a Iesu Keriso e aunoa ma le Agaga Paia, e aunoa ma faaaliga, e aunoa ma musumusuga a le Atua Silisiliese. O le mea lea, ou te manao i le faatuatua o le Au Paia o Aso e Gata Ai, faapena foi a latou tatalo. Ou te manaomia le Agaga o le Atua e fesoasoani mai ia te a’u, e pei lava o tagata uma o e taumafai e aoao atu tagata i mea o le malo o le lagi.³

O lo’u faatuatua lea e faapea e leai se tagata, i le augatupulaga lenei po o se isi lava augatupulaga, e mafai ona aoao atu ma siitia tagata o le lalolagi e aunoa ma le musumusuga a le Agaga o le Atua. I le avea ai ma se nuu ua tuua i tatou i tulaga … ia ua aoao ai i tatou, i a tatou taitaiga ma galuega uma, le manaomia o le faailoaina atu o le aao o le Atua i mea uma. Tatou te lagonaina lenei tulaga manaomia i le aso. Ou te iloa ou te le agavaa e aoao atu le Au Paia o Aso e Gata Ai po o le lalolagi e aunoa ma le Agaga o le Atua. Ou te naunau i mea nei… faapea foi lo outou faatuatua ma tatalo, ina ia taitaiina lo’u mafaufau i manatunatuga e aoga ia te outou. I la’u aoaoga faalauaitele ou te le faatagaina lo’u mafaufau e mulimuli atu i ni manatunatuga vagana ai ua faatonu mai ia te a’u e le Agaga, ma o le tulaga lea e tatau ona tatou tutu ai i taimi tatou te feiloai ai ma le Au Paia, pe a tatou o atu e talai le talalelei.⁴

Na fetalai mai le Alii, e ala mai ia Iosefa Samita: “So o se mea fo’i o le a latou tautala atu ai pe a musuia i latou i le Agaga Paia o le a faia ma tusitusiga pa’ia, ma loto o le Alii, ma mafaufauga o le Alii, ma upu a le Alii, ma leo o le Alii, atoa ma le mana o le Atua i le faaolataga.” [MFF 68:4.] Aisea e faia ai faapea? Talu ai o le Agaga Paia o se tasi o le Aiga Atua, ma o le iuga pe a tautala se tasi e ala i le Agaga Paia, o le upu lea a le Alii. E tatau ona tatou saili ia maua lea Agaga ina ia faatasi mai o ia ma i tatou i taimi uma ma avea o se aoaoga faavae o faaaliga ia i tatou.⁵

O mafaufau o lenei nuu e manaomia ona fafagaina pea lava pea, ma e tatau ona tatou faalagolago uma lava i le Agaga Paia ma le Alii e fafagaina o tatou mafaufau mai i lena punavai e le gata o le atamai lea e sau mai le Atua, aua e le mafai ona tatou mauaina ni meaai mai se isi lava auala e fafagaina ai le mafaufau faavavau o le tagata.⁶

O loo i ai i le tagata se agaga e tatau ona tumau e faavavau, o se agaga e sau mai le Atua, ma afai o le a le fafagaina mai i lena lava mana na faia o ia, o le a le faamalieina o ia ma o le a le mafai lava ona faamalieina.⁷

Afai tatou te le maua le Agaga Paia e leai sa tatou aia tatau e aoao atu ai.⁸

A o tatou aoao atu le talalelei, e tatau ona tatou manatuaina o le upumoni sili ona manino ma sili ona faigofie, e aupito sili foi ona faamalamalamaina ai.

O faaaliga a Iesu Keriso ua aoao mai ai i tatou o le Faaola sa fanau i la le tino, ma o le Tama sa fetalai mai na ia le tuuina atu ia te ia le atoatoaga muamua ae na faia pea lea amioga mama i lea amioga mama seia oo ina maua e ia le atoatoaga ma taua ai o le Alo o le Atua aua na te lei mauaina le atoatoaga muamua [tagai MFF 93:12–14]; o tatou foi i lea lava auala e tatau ona tatou saili ma o tatou agaga atoa e ola ai i amioga mama, malamalama ma le upumoni, ina ia oo mai le taimi ua tatau ai, ua mafai ona tatou maua se atoatoaga [tagai MFF 93:20].

O loo i le Alii le tele naua o mataupu faavae ua saunia mo i tatou, ma o mataupu faavae silisili o loo ia te ia mo i tatou e sili ona faigofie ma manino. O uluai mataupu faavae o le talalelei ia e taitaia i tatou i le ola e faavavau e sili ona faigofie ae peitai e leai lava se tasi o ia [mataupu faavae] e sili atu le mamalu po o le taua ia i tatou. Atonu e galulue tagata ina ia faia se faaaliga matautia o taleni, aoaoga ma le poto i le lomitusi po o se lauga, atonu latou te taumafai e talai mea lilo ma faailoa atu se mea uigaese, matautia ma ofoofogia, ma atonu latou te galulue mo lenei mea i lo latou malosi atoa, i le agaga ma le malosi o le tagata e aunoa ma le fesoasoani a le Agaga Paia o le Atua ae ui lava i lena e le i faamalamalamaina tagata ma o a latou talaiga o le a le maua ai se faamalieina tele. O mea lava e sili ona manino ma sili ona faigofie e sili ona faagaeetia ai i tatou, pe afai e aoaoina e ala i le Agaga o le Atua, ma e leai lava se mea e sili ona taua ma aoga ia i tatou. Afai e nofo i totonu ia i tatou lena Agaga, afai e tumau pea lava pea ia i tatou, e faapupulaina o tatou mafaufau i le ao ma le po—o loo tatou i ai i le ala saogalemu.⁹

Ou te fia fai atu faapea i a’u faamasaniga i totonu o lenei Ekalesia, ua ou vaai i alii, mai lea taimi i lea taimi o tulai mai ma taumafai e avea ma auauna a le Atua. E taumafai i latou e faamatala mea latou te le iloa lava se mea e uiga i ai, ina ia faafoliga o i latou e popoto. O loo matua tele lava lenei ituaiga mea i le augatupulaga lenei. Sa i ai se tasi o Toeaina taitai o le Ekalesia o le sa tulai i luma o tagata ma taumafai e aoao atu ni mataupu faavae faapitoa. Sa faafofoga i ai Iosefa ma augani atu ia te ia ina ia faamatala mai ia te ia lea mataupu faavae i se tusitusiga. Sa ia tusia, ma ina ua maea ona ia faia sa ia faitauina atu i le Perofeta. Sa ia fesili atu ia Iosefa po o le a sona manatu i ai. “Ia,” o le tala lea a Iosefa, “o se faatulagaga matagofie, ae tasi lava le faaletonu o loo ou iloaina i ai—.” “O le a lena, Uso Iosefa?” Ona fai atu lea o Iosefa—“E le moni.” Ou te fai atu, mai lea taimi i lea taimi e i ai lava se tasi, e manatu lava ua poto o ia, ua taumafai e aoao se mea e le o i ai i totonu o le Mataupu Faavae ma Feagaiga ma tusi a le Ekalesia, ma e le moni. …

… Aoao atu le upumoni e pei ona e malamalama i ai. Aua e te taumatemate i mea e te le iloa se mea e uiga i ai, aua e le aoga lava i se tasi. Afai e te faalogo i aoaoga faavae sese, o le a taitaieseina oe e agaga sese. Ia manatua ma tausisi lenei mea, ma o le a lelei mea uma ia te oe. Tumau i ala o le upumoni, ma o le a lelei mea uma ia te oe.¹⁰

Pe a tatou potopoto e aoao le talalelei, tatou te manaomia le Agaga e pei lava ona manaomia e le faiaoga.

Ou te talitonu e faatasi atu le Agaga o le Atua e le gata i e lauga ma aoao atu. …, ae faapena foi i e nonofo ma faalogologo.¹¹

Tatou te manaomia uma lava le musumusuga a le Silisiliese. …, pe tatou te aoao atu pe [tatou te] faalogologo foi.¹²

Ou te fai atu i o’u uso e ma tuafafine, ia tatou taumafai e saunia o tatou mafaufau ma loto e ala i le tatalo atu i le Alii, ina ia lava le malamalama o le Agaga ma le uunaiga a le Agaga Paia tatou te mauaina, tatou te vaai ai ma faasaoina ai i tatou i le ala o le olaga, a tatou maua loa ia aoaoga ma fautuaga a auauna a le Atua, o le a tatou naunau e manatua ma faatauaina ia mea i o tatou loto ma faataitai ai i o tatou olaga.¹³

Afai tatou te maua lena vaega o le Agaga o le Atua lea e avea ma faamanuiaga tatou te fiafia ai, ma faalauteleina lo tatou valaauga, o le a i ai ia i tatou lena molimau lea e tatau ona i totonu ia i tatou pe a oo ina tuuina mai soo se aoaoga faavae fou lava, po o aoaoga faavae ua leva ua toe faamalamalamaina atili. I lea auala e mafai ai ona tatou maua se mea aoga e ala i aoaoga a le usoga, ma ia mafai ai ona tatou faatauaina ia aoaoga faavae o le ola e faavavau.¹⁴

Ou te faamoemoe ma tatalo a o tatou faapotopoto faatasi o le a fiafia i tatou i le Agaga o le Atua ma o le a fusia faatasi o tatou loto e pei o le loto o le tagata e toatasi; o le a tuuina atu a tatou tatalo i luma o le Alii, ma o le a i ai foi Ana faamanuiaga ia i tatou, ma o i latou foi e lauga mai ia i tatou o le a latou faia e ala i le musumusuga a le Agaga Paia ma le mana o le Atua.¹⁵

E tatau ona tatou tuuina atu i [le faiaoga] o tatou mafaufau, tatalo ma le faatuatua, ma afai tatou te faia lea mea o le a tatou mauaina mai mea e tele o i lona loto, mea o le a aoga ia i tatou.¹⁶

Pe a oo ina tulai soo se tasi o le Au Peresitene o lenei Ekalesia, po o [se tasi] o le Korama a le Toasefululua, po o se tasi o Toeaina … e lauga, o le a faatuatuaina i latou e lenei nuu, ma o le a latou tulimatai atu, o le a lava ona fiafia i latou i le Agaga Paia e fai atu se mea o le a faagaeetia ai i latou; toetoe lava a tulimatai faatasi atu i latou i lea mea. I le isi itu ou te fai atu o le Au Peresitene, o le Toasefululua, ma Toeaina … e tulimatai atu [foi] o le a i ai i tagata le Agaga o le Alii ina ia latou oo atu i se malamalamaaga, ma o lenei tulaga e tutusa lava ona manaomia, ina ia latou malamalama ai i mea ua fai atu ia i latou e pei lava ona manaomia e le usoga o e lauga atu e aoaoina mataupu faavae, aoaoga faavae, upumoni ma faaaliga a Iesu Keriso.

A oo ina faaolaina mafaufau o tagata, ma faapupulaina e ala i le mana o le Atua ma le meaalofa o le Agaga Paia ina ia mafai ai e i latou ona talisapaia ma faatauaina aoaoga faavae o le upumoni faavavau ma faaaliga ia ua tuuina mai e le Atua … ona saunia loa lea o i latou ia aoga ia i latou na faamanuiaga ia o loo liligi mai i o latou luga. So o se isi lava o outou ua aafia i lea faamanuiaga, ma ou te manatu ua oo uma lava [ia te outou] i taimi eseese, ua maofa i vaitaimi patino i o latou olaga sa i ai lava lea ituaiga o eseesega i o latou mafaufau. Ou te iloa o le tulaga lea ia te a’u ma e le taumate foi e faapena i isi.

Ua i ai taimi ua matala ai le vaaiga faaleagaga o lo’u mafaufau ina ia malamalama i le afioga a le Atua ma aoaoga a ana auauna—Ua matala ma faaolaina le vaaiga faaleagaga o lo’u mafaufau i le mana o le Atua ma le meaalofa o le Agaga Paia. O lea la i taimi ua ou nofo ai iinei ma faalogo i le Au Peresitene, ma auauna a le Atua o aoao mai aoaoga faavae o le amiotonu, ma le upu a le Atua ia i tatou, ua ou lagonaina le malosi, le mana ma le taua tele o ia upumoni faavavau ia ua latou tuuina mai i o tatou mafaufau, ae o isi taimi o nei lava upumoni e tasi atonu sa aoaoina, ae sa o ese atu [ma a’u] e aunoa ma le oo mai ai o se uunaiga faapea i lo’u mafaufau.

… Ou te mafaufau e taua lo tatou galulue ia maua lena Agaga, ina ia faateleina i o tatou luga ma tatou tauaveina ai ina ia tatou faalogo ai i aoaoga ae o le a saunia o tatou mafaufau e taliaina ai. …

O le a ou fai atu nei e tusa ai ma le toatele o i tatou ua mauaina le talalelei ma faatasi ai ma le Au Paia a le Atua, e taua lo tatou galulue nei, ia tatou ola i le uunaiga a le Agaga ina ia faaauau ai ona faateleina ma puleaina i tatou i a tatou galuega i le lotolotoi o le fanauga a tagata.—O lenei a i ai i se tagata le Agaga Paia ma lagonaina le upumoni manino ma le faigofie o le faaolataga o le a foliga mai e sili atu le taua o ia mea nai lo se isi lava mea, ma o le a saunia o ia e ositaulagaina mea uma o le natura faaletino ina ia faamautuina ai mo ia le faaolataga, ae a faapogisaina mafaufau o tagata, o le a leai ai ma i latou le Agaga Paia ma le taua o le talalelei, ma o le a latou le iloa ai le faamanuiaga ma le mamalu o le i ai faatasi ma le Au Paia a le Atua. … o le a le mafai foi ona faatumauina lo latou faatuatua i le Tama i le Lagi, ma faamamaluina lona suafa i luga o le fogaeleele pe faatauaina la latou fesootaiga ma i latou o e umiaina le perisitua paia, ma o le mea lea latou te o atu ai i le pouliuli. … Tatou te ofo ma maofa pe a faapupulaina i tatou e le Agaga o le Atua ma faaaliga ia ua ia tuuina mai ia i tatou, ma pe a faatupuina ia i tatou se lagona o le taua o nei mea o le a tatou iloa atu ai le aafiaga ma le uunaiga latou te tuuina mai ia i tatou, e le gata i le saunia o o tatou mafaufau e o atu i le lalolagi o agaga, ae e saunia ai foi i tatou e faafeiloai ai i lo tatou Tama i le Lagi.¹⁷

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau v–ix.

Faitau saunoaga a Peresitene Woodruff i parakalafa muamua e lua i lenei mataupu (itulau 59). O a ni manatu ua tuuina mai e nei faamatalaga e uiga ia te ia? O a ni manatu o tuuina mai ai e uiga i le aoao atu ma le aoaoina mai?
O a ni mea ua e aoaoina mai i upu a Peresitene Woodruff e uiga i le aoao atu e ala i le mana o le Agaga? (Tagai itulau 59, 61); tagai foi 2 Nifae 33:1–2.) E faapefea ona tatou saunia ina ia maua le taitaiga a le Agaga Paia pe a tatou aoao atu?
O a ni aafiaga ua e maua i le aoao atu ma le aoaoina e ala i le Agaga?
Toe faitau le vaega lea e amata i le itulau 62. Aisea e matautia ai le leaga o le taumatemate o mea tatou te le malamalama ai? Aisea e sili ai ona faagaeetiaina i tatou i upumoni manino ma faigofie?
O a ni tiute o le tagata suesue? (Tagai itulau 62–65.) E faapefea ona tatou mauaina se mea aoga silisili mai se lesona faaletalalelei po o se lauga? Manatunatu loloto pe talanoaina ni auala e mafai ai ona e saunia ina ia aoaoina oe e ala i le Agaga.
Toe faitau le parakalafa muamua i le itulau 63. I ni au lava aafiaga i tulaga tau i le aoaoina atu i le talalelei, sa faapefea ona aoga ia te oe le “tuuina mai o mafaufau, tatalo ma le faatuatua” o e sa e aoaoina?
E mafai faapefea ona fesoasoani aoaoga faavae o loo i lenei mataupu ia i tatou i lo tatou suesueina o lenei tusi? (Tagai foi itulau v–ix). E faapefea ona faaaogaina nei aoaoga faavae a o tatou aoaoina ma aoao atu le talalelei i o tatou aiga?

Mau E Faatatau I Ai: Eperu 4:2; 2 Peteru 1:21; 2 Nifae 31:3; Alema 17:2–3; MFF 11:18–21; 42:14; 50:13–22; 52:9; 100:5–8

Mary learning at Jesus’ feet — I le avea ai ma faiaoga o le talalelei, e tatau ona tatou saili le Agaga ina ia tatou mulimuli i le faataitaiga a Iesu. A tatou feiloai e aoaoina le talalelei, e tatau ona tatou faalogo ma faatuatua, e pei o Maria i le taimi “ua nofo o ia i lalo i tafatafa o vae o Iesu, ma faalogo i lana fetalaiga” (tagai Luka 10:38–42).

Gospel Doctrine class — “Tatou te manaomia uma lava musumusuga a le Silisiliese. …, pe tatou te aoao atu pe [tatou te] faalogologo foi.”