Mataupu 17

Galuega Faalemalumalu: Liliuina o o Tatou Loto i o Tatou Aiga ma le Alii

A tatou ulufale ma le agavaa i le maota o le Alii, tatou te mauaina sauniga paia e fesoasoani e saunia ai i tatou, o o tatou tuaa, ma a tatou fanau ina ia ola i luma o le Atua e faavavau.

Mai le Soifuaga o Wilford Woodruff

Ina ua faapaiaina le Malumalu i Katelani ia Mati 27, 1836, sa auauna Wilford Woodruff i se misiona i le Iunaite Setete i saute. I le tolu vaiaso mulimuli ane sa ia maua se tala o fuafuaga faapolokalamaina o le faapaiaga ma tusia ai i lana tusi talaaga faapea o le talafou e “matua silisili ona maoae lona mamalu”.¹ Ina ua maea lana misiona, sa ia toe foi atu i Katelani, “sa savali mai o ia i le mamafa o le afa kiona.” Sa ia tusia, “Na matou oo mai i le iloa atu o le malumalu o le Alii ae matou te lei taunuu lelei atu i totonu o le nuu, ma sa ou matuai lagonaina le olioli i lea vaaiga ona o le taimi muamua lea ua vaai ai o’u mata i le maota o le Alii sa fausiaina e ala i poloaiga ma faaaliga.”²

O le alofa o Wilford Woodruff mo galuega faalemalumalu e lei faavaivai lava. Sa ia auai i vaega uma o le galuega—mai le fausiaina seia oo atu i le faapaiaina faapea galuega o talafaasolopito o aiga e oo atu i galuega o sauniga paia mo e ua oti. Sa olioli foi o ia i sauniga paia o le malumalu sa mauaina e ia ma tagata o lona aiga mo i latou lava.

Sa loa ona saunoa mai Peresitene Woodruff e uiga i le taimi sa ia taliaina ai ona faaeega paia. O le Perofeta o Iosefa Samita, i lona lagonaina ai o le a vave ona iu lana galuega i le fogaeleele, sa ia faatinoina ai faaeega paia o le Korama a le Au Aposetolo e Toasefululua i Navu, e ui lava e lei maea le malumalu. Sa molimau mai Peresitene Woodruff: “Sa muamua lava faailoa mai e Iosefa Samita ia te a’u sauniga paia tonu lava matou te tuuina atu i le Au Paia i a matou faaeega paia. Sa ou maua o’u faaeega paia i lalo o le taitaiga a Iosefa Samita.”³

I le avea ai ma se sui o le Korama a le Au Aposetolo e Toasefululua ma mulimuli ane avea ma Peresitene o le Ekalesia, sa auai Wilford Woodruff i se taumafaiga faaauau pea ina ia fausia malumalu. Sa ia fesoasoani i le galuega i malumalu i Navu, Ilinoi, ma malumalu i aai e fa i Iuta: Logan, St. George, Manti, ma le Aai o Sate Leki. Sa ia fofogaina le tatalo o le faapaiaga i malumalu i Manti ma le Aai o Sate Leki.

O le Malumalu i Sate Leki, lea sa faamaeaina ina ua uma le 40 tausaga o galulue punouai ai le Au Paia, sa i ai sona taua faapitoa ia Peresitene Woodruff. Sa muamua lava tagai i le malumalu i se faaaliga auiliili manino a o lei taunuu le Au Paia i le Vanu o Sate Leki.⁴ I le mavae o aso e fa talu ona taunuu i le vanu, sa i ai o ia ina ua musuiaina Peresitene Polika Iaga ia filifilia le laufanua mo le malumalu.⁵ I le tele o tausaga ae lei taitai maea le malumalu, sa ia faia se miti lea sa tuuina atu ai ia te ia ki o le malumalu ma faatonuina e Peresitene Iaga ina ia “faatagaina uma i totonu o le malumalu i latou o e saili mo le faaolataga.”⁶ Sa le vaivai lava o ia i le lagolago e faamalosiau atu i le faamaeaina o le malumalu, e oo lava i taimi o faafitauli ma sauaga. Ma ina ua iu lava ina faamaeaina le galuega ia Aperila 1893, sa ia mulimuli i faatonuga a Peresitene Iaga i le miti, ma faatulagaina ai le tolu vaiaso o sauniga o le faapaiaga ina ia faamautinoa ai o le a maua uma e le Au Paia atoa le avanoa e auai.

Ina ua mavae le faapaiaga o le Malumalu i Sate Leki, sa faamamafaina e Peresitene Woodruff le taua o le aiga i le galuega faalemalumalu. Sa ia saunoa: “Matou te mananao i le Au Paia o Aso e Gata Ai mai lenei taimi ina ia sailia o latou gafa i le mamao i tua latou te mafaia, ma ia faamauina i o latou tama ma tina. Ia faamauina fanau i o latou matua, ma faavaeina le laina o o latou tupuaga i le mamao i tua e mafai ona oo i ai.”⁷ (Mo le faitauina o le talafaasolopito o loo i tua o lenei aoaoga, tagai i itulau xxxiii–xxxv i uputomua o lenei tusi.)

I le 1894, sa vaaia atoa e Peresitene Woodruff le faavaeina o le Sosaiete o Gafa o Iuta, lea na amata mai ai le taumafaiga faalauaitele i le lalolagi a le Ekalesia i tagata e saili o latou tuaa. I le selau tausaga mulimuli ane, sa matauina e Elder Russell M. Nelson o le Korama a le Au Aposetolo e Toasefululua faapea “O mea uma na tutupu i lena tausaga na faamautuina ai sailiiliga o talafaasolopito o aiga ma auaunaga faalemalumalu o se galuega e tasi i le Ekalesia.”⁸ O nei fuafuaga sa avea ma vaega o se faaauauina pea ona faataunuuina o le valoaga faapea “o loto foi o fanau o le a liliu i o latou tama” (MFF 2:2; tagai foi i le Malaki 4:5–6).

Ona o le tele o aoaoga taua a Peresitene Woodruff i galuega faalemalumalu, o le muamua lenei o mataupu e lua i lenei autu i totonu o lenei tusi. O lenei mataupu e fitoitonu ma faamanuiaga o le auai i le malumalu ma le natura faavavau o le aiga, a o le mataupu 18 e fitoitonu i le galuega mo e ua maliliu.

Aoaoga a Wilford Woodruff

Tatou te auai i galuega i le malumalu ma le olioli faalelagi, ina ua iloa e fesoasoani e saunia ai i tatou, o a tatou fanau, ma o tatou tuaa ina ia ola faatasi ai i le afioaga o le Atua.

E leai lava se isi galuega e sili atu ona loloto le lagonaina o le fia auai o le Au Paia o Aso e Gata Ai nai lo le fausiaina ma le faamaeaina o malumalu.⁹

A ou tomanatu i le mana ua ia i tatou e faatuina ai Malumalu i le suafa o le Atua Silisiliese … ma avanoa ua ia i tatou e o ai i totonu o na Malumalu ma faia le galuega o loo manaomia mo lo tatou lava faaolataga faapea foi ma le togiolaina o o tatou [tagata] ua maliliu, e maoae tele lo’u olioli, ma ou lagona ai ua maoae lava o tatou faamanuiaga.¹⁰

O le talafaasolopito o nei Malumalu ua i o outou luma. Ua outou iloa sa maliufasia ia Perofeta [Iosefa ma Ailama Samita], ma sa manaomia e le Alii le fausiaina o le Malumalu ai lima o le Au Paia a o lei tulieseina atu i latou i le vaomatua. Sa i ai se faaaliga patino sa tuuina mai sa musuia ai i se tulaga maoae ia Toeaina o le Ekalesia a le Atua ina ia faatinoina lena galuega [tagai MFF 124:25–41]. Sa latou galulue i le mana uma sa ia i latou, ma latou faataunuuina ai lena galuega. Sa latou ulufale atu i lena Malumalu ma taliaina sauniga paia ma faaeega paia a o lei o ese atu i latou i le vaomatua. O nei Malumalu ua tatou fausiaina… e tutu o ni maa faamanatu i luma o le Atua, agelu ma tagata, i le faatuatua ma galuega a le Au Paia o Aso e Gata Ai.¹¹

O se faailoga o le talisapaia e le Au Paia o Aso e Gata Ai o faamanuiaga e mafai ona maua e ala i lenei galuega faale Malumalu. … Ua faatumulia o tatou loto i le agaga fiafia ma e le mafai ona tatou tuua le vivii atu i lo tatou Atua ma Lona agalelei i Lona nuu i le faatagaina o i latou, e ui i le tele o mea faafeagai ma le tele o faigata sa latou fetaiai, ina ia faatuina nei ituaiga fausaga ma ia faapaiaina i latou, e tusa ai ma le mamanu sa Ia tuuina mai mo nei galuega paia.

E leai lava se tasi o le Au Paia o Aso e Gata Ai o i ai ni lagona sa’o e mafai ona manatu i lenei autu e aunoa ma le lagonaina o le fiafia tele ma le olioli faalelagi mo mea ua faia e le Atua mo i tatou i la tatou tupulaga, ma tuuina mai ia i tatou, e pei ona Ia faia, ia auala uma e saunia ai i tatou, o a tatou fanau ma o tatou tuaa mo lena lalolagi faavavau o loo i talaatu o lenei olaga. O le Au Paia o Aso e Gata Ai, e moni, o se nuu sili ona alofagia, ma e tatau ai ona alu a’e mai loto ma malutaga uma taitasi i lo tatou laueleele mo le alofa tunoa matua maoae ma le agalelei ua Ia faaalia mai ia i tatou. Ua ia tuuina mai ia i tatou ni folafolaga e matua silisili ona taua i ona uiga, ma ua Ia faataunuuina ia folafolaga e oo mai i le taimi nei. Ma o le a avea i tatou ma tagata sili ona leai se agaga faafetai ma le agavaa ua ola ai pe afai, i le uma ai ona maua nei faaaliga matagofie o Lona agalelei, ona tatou faatamala lea i lo tatou filiga pe toilalo foi i lo tatou usitai ma lo tatou faamaoni ia te Ia ma Lana galuega maoae.¹²

Tatou te mananao ia faaauau pea i nei malumalu. Tatou te mananao ia faatumulia e le Au Paia o Aso e Gata Ai. Tatou te mananao i o tatou uso ma tuafafine e faaauau pea ona o i ai iina ma faaolaina e ua maliliu ma faamanuiaina e o ola.¹³

Mai le tatalo o le faapaiaga o le Malumalu i Sate Leki: Le Alii e, matou te manatu i le faamaeaina o lenei maota paia ma lagona mamana ma le le mafaamatalaina. Ia e taliaina lenei malumalu lona fa lea o loo e fesoasoani ai i lau fanau o le feagaiga i le faatuina i totonu o nei atumauga. I tupulaga ua mavae sa e musuiaina e ala i lou Agaga Paia au auauna, o Perofeta, e talanoa mai e uiga i se taimi i aso e gata ai pe a faatumauina ai le mauga o i ai le fale o Ieova i tumutumu o atumauga, e faamaualugaina foi e sili i mauga (tagai i le Isaia 2:2; Mika 4:2]. Matou te faafetai ia te oe ua matou maua se avanoa mamalu e aoga ai i le faataunuuina o nei faaaliga a au tagatavaai anamua, ma ua e finagalo e faatagaina i matou e faia sa matou vaega i lenei galuega maoae.¹⁴

O galuega o talafaasolopito o aiga ma sauniga paia o malumalu, ua faamauina ai i tatou i o tatou aiga, ma fausia ai se filifili o loo fesootai ai tupulaga.

O aoaoga faavae o le talalelei a Iesu Keriso e i ai le mana ma le aoga taua i tua atu o le oti; o le a latou aumaia faatasi alii ma a latou ava ma fanau i le faalapotopotoga o le aiga ma o le a toe faatasia ai i latou e faavavau faavavau lava. … Ua faaalia mai i le Au Paia o Aso e Gata Ai ia sauniga paia o le faamauga, ma o le a aoga pe a mavae le oti, ma, e pei ona ou fai atu, o le a toe faatasia alii ma tamaitai e faavavau i le faalapotopotoga o le aiga. O iinei le mafuaaga e avea ai nei mataupu faavae ma vaega o lo tatou faatuatuaga, ma e ala i ia tulaga o le a toe faatasia ai tane ma ava, matua ma fanau seia toe faatasia uma sootaga o le filifili o gafa e tau atu i le Tama ia Atamu. E le mafai ona tatou mauaina se atoatoaga o le mamalu selesitila e aunoa ma lenei sauniga paia o faamauga.¹⁵

Uso e ma tuafafine, o le mamalu o lenei mataupu, a oo ina tatou mavae atu o le a i ai o tatou aiga faatasi ma i tatou—o o tatou tama ma o tatou tina, o o tatou uso ma o tatou tuafafine, o a tatou ava ma a tatou fanau—i le taeao o le toetutu, i le faalapotopotoga o le aiga o le lalolagi selesitila, e ola ai e faavavau faavavau lava. E matua taua ai lava mea uma e te mafai ma mea ou te mafai ona ositaulagaina i nai tausaga itiiti o loo tatou faaaluina iinei i la le tino.¹⁶

Ia taitasi le tagata ma [faamauina] i lona tama; ona e faia tonu ai lava lea o le mea sa fetalai mai ai le Atua ina ua Ia folafola mai o le a Ia auina mai Elia le perofeta i aso amuli [tagai i le Malaki 4:5–6]. Sa oo mai Elia le perofeta ia Iosefa Samita ma ta’u atu ia te ia ua oo mai le aso e tatau ai ona faataunuuina lenei mataupu faavae [tagai MFF 110:13–16]. E lei lava le umi o le soifua o Iosefa Samita e tusia ai nisi vaega e uiga i nei mea. Sa matua tuu atu lona loto atoa i lenei galuega a o lei maliu faamaturo o ia mo le afioga a le Atua ma le molimau ia Iesu Keriso. Sa ia ta’uina mai ia i tatou e tatau ona i ai se sosooina o le filifili o gafa o augatupulaga uma lava ma le galuega a le Atua mai lea tupulaga i lea tupulaga [MFF 128:18]. O lenei mataupu sa sili atu ona loloto i lona mafaufau nai lo le tele o nisi lava mataupu sa tuuina mai ia te ia.

Sa faaalia mai e le Alii ia te a’u i a’u tatalo o lo’u tiute le faapea atu ia Isaraelu uma lava ina ia faataunuuina lenei aoaoga faavae, ma i le faataunuuina o lena faaaliga ou te faataatiaina atu i luma o lenei nuu. … Matou te mananao i le Au Paia o Aso e Gata Ai mai le taimi lenei ina ia sailia o latou gafa agai i tua i le mamao latou te mafai, ma ia faamauina i latou i o latou tama ma tina. Ia faamauina fanau i o latou matua, ma ia faasoloina atu lenei filifili i le mamao e mafai ona outou saili i ai.¹⁷

Mai le tatalo o le faapaiaga o le Malumalu i Sate Leki: Lo matou Tama oi le Lagi, matou te tuuina atu i ou luma ia fata faitaulaga ia ua matou saunia mo au auauna ma auauna tamaitai ina ia maua ai o latou faamanuiaga o faamauga. Matou te faapaiaina i le suafa o le Alii o Iesu Keriso, i lou suafa sili ona paia, ma e matou te talosaga atu i lau afio ina ia faapaiaina nei fata faitaulaga, ina ia lagonaina e i latou o e o mai i ai, le mana o le Agaga Paia o loo faamalumalu mai i o latou luga, ma ia malamalama i le paia o feagaiga latou te ulufale atu i ai. Ma e matou te tatalo o a matou feagaiga ma maliliega ua matou faia ma oe faapea le tasi i le isi o le a taitaia e le Agaga Paia o le a matou tausia ia paia ma o le a e taliaina ma o faamanuiaga uma lava ua folafolaina mai o le a taliaina e le Au Paia uma o e o mai i nei fata faitaulaga, i le taeao o le toetutu o e amiotonu. …

Le Atua e o o matou tama, o Aperaamo, Isaako, ma Iakopo, o e sa e finagalo malie e ta’ua oe o lo latou Atua, matou te faafetai i lau afio ma lagona loloto ua taumasuasua i le agaga faafetai ona ua e faaalia mai mana ia o loo liua ai loto o fanau i o latou tama ma loto o tama i fanau, ma o fanau a tagata, i o latou tupulaga uma o le a mafai ona avea ma tagata e tofo i mamalu ma le olioli i le malo o le lagi. Faamautu mai i o matou luga le agaga o Elia, matou te tatalo atu ai i lau afio, ina ia mafai e i matou ona togiola o matou tagata ua maliliu ma ia faafesootai foi i matou lava ma o matou tama o e ua maliliu, ma faapena foi ona faamauina o matou tagata oti e tulai mai i le taeao o le uluai toetutu ina ia mafai ona faamauina i matou o e ola i luga o le fogaeleele ia i latou o e o loo ola i le lagi. Matou te faafetai i lau afio mo i latou o e ua maea a latou galuega i la le tino, aemaise foi mo i matou lava, ma ua tatalaina faitotoa o le falepuipui, ma ua folafolaina atu le laveai i e noanoatia, ma ua tatalaina fusi o e sa fusifusia. Matou te viia lau afio ona o o matou tama, mai le mulimuli e oo atu i le na muamua, mai le taimi lenei, e oo atu i le amataga, e mafai ona toe faatasia ma i matou i filifili tumau ua faamausaliina e le Perisitua Paia, ma o se aiga maoae e tasi e faatasia i lau afio ma faamausaliina e lou mana o le a mafai ona matou tutu faatasi i ou luma, ma e ala i le mana o le toto togiola o lou Alo o le a laveaiina ai mai mea leaga uma, ma faasaoina ma faamamaina, faaeaina ma faamamaluina.¹⁸

E tatau ona tatou saunia i tatou lava i le faaleagaga ina ia maua faamanuiaga o auaunaga faalemalumalu.

Ae lei o atu outou i le Malumalu, … ia outou o atu i le tatalo faalilolilo. Tuuina atu a outou tatalo i le Alii, ma tatalo ia le gata ia faamagaloina a outou agasala, ae ia outou maua uma foi le Agaga o le Atua ma le molimau i le Alii o Iesu Keriso; ina ia auai le Agaga o le Atua ma i latou o e o le a faapotopoto i le Malumalu. …

Ua ia te a’u le faanaunauga mo le Au Paia ia faia lenei, ona o loo ou moomoo e vaai atu ia i latou o e o atu i totonu o le Malumalu, ia o atu ma loto mama, ma o loo faatasi le Agaga o le Atua ma i latou, ina ia latou lagona le fiafia, ma ia latou lagonaina uma le uunaiga a lena mana.¹⁹

E leai se tasi o le Ekalesia ua ta’ua faapea ua agavaa e ulufale atu i lena maota paia e mafai ona faapea e pogisa i mataupu faavae o le Talalelei. E le faigata lava ona manatu o i latou uma taitoatasi ua iloa lona tiute i le Atua ma ona uso a tagata. E leai lava se tasi e matua lotogalo na te faagaloina ai le apoapoaiga faapea e tatau ia i tatou ona faatumulia i le alofa ma le alofa mama i o tatou uso. Ma o lea la e le mafai ai e se tasi ona masalosalo mo sina taimi puupuu i le matua maoae o le taua o tagata taitoatasi o le au paia i le i ai i se tulaga filemu ma ona uso ma tuafafine uma lava, ma ia lagona le filemu ma le Atua. O le a lava se isi auala tatou te faamoemoe e maua ai faamanuiaga ua Ia folafolaina mai vagana ua tatou usitaia tulaga manaomia ia o loo avea na faamanuiaga ma taui!

Pe mafai ea e alii ma tamaitai e le o tausia se tulafono a le Atua, po o e o loo faatamala i le usitaia o Ana poloaiga, ona manatu faapea tau lava o le alu atu i totonu o Lona maota paia… o le a ta’uagavaaina ai i latou e mauaina, ma mafua ai ona latou mauaina Ana faamanuiaga?

Pe latou te manatu ea o le salamo ma le liliuese mai le agasala o se mea e faigofie ona tuulafoaia?

Pe latou te le fefefe ea, e oo lava i o latou manatu, e tuuaiina lo tatou Tama mo le le sa’o ma le manatu faapito, ma faapea e le popole o Ia i le faataunuuina o Ana lava afioga?

Ou te talitonu e leai lava se tasi e faapea mai o ia o se tasi o Lona nuu ae ta’usalaina i se mea faapea.

O lea la e tatau ai ia i latou o e le agavaa ona taofia lo latou manatu e maua se faamanuiaga mai lo latou auai atu i le Malumalu a o i ai a latou agasala e lei salamoina o loo faaleagaina pea i latou, ma a o i ai pea lagona oona ma le tiga po o le i ai pea lava o ni uiga o le le faamagalo atu i o latou loto mo o latou uso ma tuafafine.

E uiga i lenei mataupu lona lua ua ta’ua, matou te lagona e tele naua ni faamatalaga e tatau ona tuuina atu. A o taumafai ai ina ia ogatasi ma mea silisili o le tulafono, o loo i ai se avanoa e ono manatu mama ai [ma le faatauaina ai] le agaga lea o le alofa ma le agalelei ma le alofa mama. …

… A o lei ulufale atu i tatou i le Malumalu e tuuina atu i tatou lava i luma o le Alii…, e tatau ona fofo’e ese mai ia i tatou lava ia lagona o le agaleaga ma le le alofa faasaga i isi; e le gata ina tatau ona taofia lo tatou fe’aina’i, ae e tatau foi ona tuuese le mafuaaga o ia uiga, ma o lagona uma na amataina ma faatumauina ai nei lagona ua tatau ona lafoa’i; ina ia mafai ona tatou ta’uta’u atu a tatou agasala o le tasi i le isi, ma talosaga atu mo le faamagaloga a le tasi i le isi; ina ia tatou faatauanau atu i le Alii mo le agaga o le salamo, ma, pe a maua, o le a mulimuli ai i musumusuga; ma a oo ina faamaualaloina i tatou lava i Ona luma ma saili atu le faamagaloga mai le tasi i le isi, e tatau ona tatou tatala atu lena alofa mama ma le alofa mau i e o loo manaomia la tatou faamagaloga lea foi o loo tatou talosaga atu ai ma manaomia mai le Lagi.

O le mea lea ia tatou o atu ai i lea nofoaga paia ma o tatou loto ua saoloto mai uiga leaga ma ia saunia o tatou agaga mo le aoaoga ua folafolaina mai! O le mea lea ia faia a tatou talosaga, ma le le faalavelavea i ni manatu o feeseeseaiga, a ia oo atu faatasi i fofoga o Ieova ma toina mai ai faamanuiaga maoae a le Atua o le Lagi! …

… Matou te valaau atu [i tagata taitoatasi uma o le Ekalesia] ina ia saili e maua se faauoga ma o latou uso ma o latou tuafafine, ma lo latou lotofuatiaifo ma le alofa atoatoa; ae sili atu foi i lena ia saili ina ia maua le faauoga ma le faatasiga ma le Agaga Paia. Ia sailia lenei Agaga ma teufatuina ma le filifiliga ia tutusa i totonu o le aiga sili ona laitiiti ma faatauvaa ma le faalapotopotoga ma le korama sili ona maualuga. Ia ati i loto o uso ma tuafafine, o matua ma fanau o le aiga, faapea foi ma loto o le Au Peresitene Sili ma le Au Toasefululua. Ia faamamaina ma faaitiitia eseesega uma i le va o sui o le Au Peresitene o Siteki ma Aufono a Fautua Maualuga, aemaise foi i le va o tuaoi o loo nonofo i le uarota e tasi. Ia faatasia le autalavou ma le aumatutua, alii ma tamaitai, lafu mamoe ma le leoleo mamoe, tagata ma le Perisitua i noataga o le agaga faafetai ma le faamagaloga ma le alofa, ina ia mafai ai e i [tatou] ona lagona ua ta’uagavaaina e le Alii, ma ia mafai ai ona tatou o atu i Ona luma ma se lotofuatiaifo e mama mai ni agasala i luma o tagata uma. Ona leai ai lea o se le faamalieina e tusa ai ma faamanuiaga ua folafolaina mai ia i latou o e tapuai atu ia te Ia ma le loto atoa. O musumusuga malie a le Agaga Paia o le a tuuina atu ia i latou ma oa uma o le Lagi, le fesootaiga a agelu, o le a faaopoopoina mai i lea taimi i lea taimi, aua o Ana folafolaga ua uma ona tuuina mai ma e le mafai ona faaletonu!²⁰

Mai le tatalo o le faapaiaga o le Malumalu i Sate Leki: Lo Matou Tama e oi le Lagi, o lau afio sa e faia le lagi ma le lalolagi, ma mea uma lava o loo i ai; o oe le Toatasi e sili lou mamalu, e atoatoa i le alofa tunoa, alofa, ma le upumoni, o i matou, o lau fanau, matou te o atu i ou luma i totonu o lenei maota ua matou fausiaina i lou suafa sili ona paia matou te aioi atu ma le lotomaualalo mo le toto togiola a lou Alo Pele e Toatasi, ina ia le toe manatuaina a matou agasala e faasaga ia i matou e faavavau, ae ia oo atu a matou tatalo i lau afio ma saoloto ai lo matou avanoa i lou nofoalii, ina ia lagonaina i matou i lou afioaga paia. Ma ia faamalieina lau afio ma lou agalelei e te faafofoga mai ai ia matou talosaga, ma taliaina i latou e tusa ai ma lou poto e le gata ma lou alofa, ma auina maia i o matou luga ia faamanuiaga o loo matou sailia, e oo i le taisautuaselau, e tusa ai ma lo matou saili atu ma le loto mama ma le faamoemoe atoa e faia lou finagalo ma faamamaluina lou suafa. …

Ua matou o atu i luma o lau afio ma le olioli ma le agaga faafetai, ma agaga ua tutumu i viiga, ona ua e faatagaina i matou e vaai i lenei aso, lea sa matou faamoemoe, ma galulue, ma tatalo, i le gasologa o lenei fasefulu tausaga, mo le taimi e mafai ai ona matou faapaiaina i lau afio lenei maota ua matou fausiaina i lou suafa mamalu. I le tausaga e tasi talu ai sa matou faatulagaina ai le maa aupitoaluga ma le alalaga Osana i le Atua ma le Tamai Mamoe. Ma o le aso matou te faapaiaina ai lenei malumalu atoa i lau afio, ma mea uma lava e tatau i ai, ina ia mafai ona paia i lau silafaga; ina ia mafai ona avea ma maota o le tatalo, se maota o viiga ma tapuaiga; ina ia mafai ona i ai lou mamalu; ina ia faaauauina pea ona e faatasi mai i ai; ina ia avea ma afioaga o lou Alo sili ona pele, lo matou Faaola; ina ia asiasi mai i ai au agelu o e ua avea ma au avefeau paia, ma aumai ai ia i matou ou moomooga ma lou finagalo ina ia faamamaina ma faapaiaina i ona vaega uma ia paia i lau afio, le Atua o Isaraelu, o le Faipule Silisiliese o tagata. Ma e matou te tatalo i lau afio ina ia lagona foi lou mana e tagata uma o le a ulufale i le faitotoa o le fale o le Alii, ma lagona le uunaiga e tautino atu ua e faapaiaina ai, ma o lou lava lea maota, o se nofoaga o lou paia.²¹

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu ma pe a e sauniuni e aoao atu. Mo fesoasoaniga faaopoopo, tagai i itulau v–ix.

Sa faapefea ona tali atu Elder Wilford Woodruff ina ua ia faalogo i le faapaiaina o le Malumalu i Katelani ma ina ua ia vaai i le malumalu mo le taimi muamua lava? (Tagai i le itulau 179.) Ua e maua ea ni aafiaga faapea e tatau mo le fetufaai atu?
O a ni auala na faaalia ai e le uluai Au Paia o Aso e Gata Ai lo latou lagona faagaeetia i malumalu? (Tagai i itulau 181–182.) Aisea e tatau ai ona “matua loloto o tatou lagona o le fia auai” i galuega faalemalumalu?
Toe iloilo le parakalafa mulimuli i le itulau 185. O a ni auala o e iloa atu ai o le auaunaga faalemalumalu ma le sailiga o talafaasolopito o aiga o le “galuega e tasi”? (Tagai i itulau 184–186.) O faapefea ona fesoasoani lenei galuega ia te oe e liliu atu ai lou loto i ou tuaa ma au fanau?
Aisea e manaomia ai e i tatou sauniga paia o faamauga mo le “mauaina o le atoatoaga o le mamalu selesitila”? (Tagai i itulau 184–186; tagai foi i le MFF 131:1–4.)
Faasolo lau vaai i le mataupu atoa, ma vaavaai ni faamatalaga e uiga i sootaga faaleaiga. O a ni mea e mafai ona tatou aoaoina mai nei aoaoga? E faapefea e lo tatou malamalama i le maota o le Alii ona uunaia o tatou lagona e uiga i o tatou lava aiga?
O a ni auala ua faamanuiaina ai oe ma lou aiga e ala i lou auai i le malumalu? E mafai faapefea e matua ona aoao a latou fanau e ava ma faaaloalo i le malumalu ma saunia ai e mauaina sauniga paia faalemalumalu?
O loo i itulau 187–189 nisi o fautuaga a Peresitene Woodruff e fesoasoani i le Au Paia e saunia mo le faapaiaga o le Malumalu o Sate Leki. E faapefea e lenei fautuaga ona fesoasoani ia i tatou i taimi uma tatou te ulufale ai i le malumalu?
O a nisi o aoaoga faavae o loo aoaoina mai i le tatalo o le faapaiaga o le Malumalu o Sate Leki? (Tagai i itulau 185–186, 189–190.) Mafaufau loloto pe talanoaina pe faapefea e upu o loo i lenei tatalo ona fesoasoani ia i tatou i a tatou taumafaiga e faia galuega faalemalumalu ma talafaasolopito o aiga.

Mau E Faatatau I Ai: Salamo 24:3–5; Mataio 16:18–19; MFF 27:9; 97:10–17; 109; 110; 138:46–48

family heirlooms — “Matou te mananao i le Au Paia o Aso e Gata Ai … ina ia sailia o latou gafa e tau atu i tua i le mamao latou te mafaia, ma ia faamauina i latou i o latou tama ma tina.”

Salt Lake Temple dedication ticket — O pepa faataga o le malumalu e pei o lenei sa tufaina atu i tagata o le Ekalesia o e sa agavaa e auai atu i sauniga o le faapaiaga i totonu o le Malumalu o Sate Leki.