Mataupu 2

O Iosefa Samita: Perofeta, Tagatavaai, ma le Tali Faaaliga

O Iosefa Samita, le Perofeta o lenei tisipenisione, sa matuai faamaoni i faaaliga sa ia mauaina mai luga, faataunuuina lona valaauga na muai faauuina ai ma faamaufaailoga ai lana molimau i lona lava toto.

Mai le Soifuaga o Wilford Woodruff

Mai ona uluai aso i le avea ai ma se tagata fou O Le Ekalesia a Iesu Keriso o le Au Paia o Aso e Gata Ai, sa i ai le molimau a Wilford Woodruff i le Perofeta o Iosefa Samita. Sa ia faapea mai: “Sa matua faamalieina atoatoa lo’u loto, o Iosefa o se Perofeta ae ou te lei vaai ia te ia. Sa leai so’u lagona faapito i lo’u mafaufau e faatuiese ia te ia.”¹ Ia Aperila 1834, e tusa o le fa masina talu ona ia papatiso, sa malaga atu ai Uso Woodruff i Katelani, Ohaio, o iina sa ia feiloai ai i le Perofeta o Iosefa mo le taimi muamua. Sa mulimuli ane ona ia faamatala lea:

“O la’u uluai feiloaiga ia te ia sa pei e uiga ese. Sa ou vaai atu ia te ia o loo i le faatoaga ma lona uso o Ailama; sa i [luga o lona ulu] se pulou tuai lava, ma sa pisi o ia i le tafanaina o se faailoga. Sa faafeiloai atu a’u ia te ia ma na ia valaaulia a’u ma te o i lona aiga.

“Sa ou taliaina le valaaulia ma sa ou matauina ma le faaeteete o ia, e vaai ai po o le a se mea e mafai ona ou aoaoina mai ai. Sa ia faapea mai, a o ma savavali atu i lona fale, faapea o le itula muamua lea i se taimi umi lava ua ia faaaluina i ni taaloga faafiafia.

“Sa lei pine ae ma taunuu i lona fale ma sa ia alu atu i le potu e sosoo ai ma aumai i fafo se pa’u-luko, ma faapea mai, ‘Uso Woodruff, ou te manao e te fesoasoani mai ia te a’u e suia lenei pa’u-luko i se pa’u lamolemole,’ sa ou tago loa tatala ese lo’u peleue, ae galue loa ma fesoasoani ia te ia, ma sa ou lagonaina ai lo’u faamamaluina i lo’u faia o lea galuega. … Sa manao o ia i lenei pa’u luko e tuu i luga o le nofoa o lana taavale solofanua. …

“O la’u feiloaiga muamua lea i le Perofeta o Iosefa Samita, le Tagatavaai sili o lenei tisipenisione faaiu.”²

I lona manatuaina o lenei aafiaga, sa faapea mai ai Peresitene Woodruff o nisi tagata atonu e le fiafia i le vaai atu i se taitai lotu o aafia i ni gaoioiga faapea. Ae o lana lava matau ia Iosefa Samita, i lona soifuaga faalauaitele ma lona soifuaga lilo, sa na ona faamalosia ai o lana molimau e uiga i le misiona a le Perofeta. Mai na uluai aso i Katelani seia oo atu i le maliu fasia o le Perofeta i le 10 tausaga mulimuli ane, sa auauna ai ma le faatuatua Wilford Woodruff faatasi ma Iosefa Samita, e ui lava ina liliuese ni uo ma e sa galulue faatasi i le Ekalesia. Sa ia saunoa, “Faatasi ai ma le matautia o le liliuese, ma le tele o faigata ma faafitauli sa matou faafeagai ma ui atu ai, . … e lei avea lava [ia mea] ma faaosoosoga ia te a’u ou te masalosalo ai i lenei galuega pe ou te masalosalo ia Iosefa Samita i le avea ai o se perofeta a le Atua.”³

I le aso 19 o Mati, 1897 sa pueina ai e Peresitene Woodruff e 90 ona tausaga se lipine o lana molimau. O ia o se Peresitene muamua o le Ekalesia ua faia lea tulaga. I lana savali puupuu o le tele lava o le taimi o loo molimau o ia i le misiona a le Perofeta o Iosefa, ma faailoa mai ai lona tuuina atu o lona ola atoa i lana uo ma lona taitai:

“Ou te tuuina atu la’u molimau o Iosefa Samita o se Perofeta moni a le Atua, na faauuina e le Atua e faataatiaina le faavae o Lana Ekalesia ma Lona malo i le tisipenisione faaiu ma le atoatoaga o taimi. … Sa tuuina i lalo e le Perofeta o Iosefa lona soifua mo le upu a le Atua ma le molimau a Iesu Keriso, ma o le a faapaleina o ia o se na maliu fasia i luma o le Atua ma le Tamai Mamoe. I ana molimau uma ia i matou, sa manino ai le faaali mai o le mana o le Atua i le perofeta o Iosefa.”⁴

Aoaoga a Wilford Woodruff

I tulaga faalauaitele ma tulaga patino, sa loto alofa, alofa mutimutivale, faatuatua, ma faamaoni le Perofeta o Iosefa Samita.

Sa ou malaga i le afe ma afe o maila faatasi ma Iosefa Samita. Sa ou iloaina lona agaga.⁵

Sa ia te a’u le lagona ia ou matua olioli i mea na ou vaaia i le uso o Iosefa, aua i lana galuega i tulaga faalauaitele ma tulaga patino, sa ia tauaveina faatasi ma ia le Agaga o le Silisiliese, ma sa ia faaalia se tulaga maoae uigaese o lona agaga lea ou te lei vaai ai lava i se isi tagata.⁶

Sa tumu lona loto i le alofa faaleatua mo le manuia o le fanauga a tagata.⁷

Semanu e fusia e Uso Iosefa le lio atoa o le aiga o le tagata i aoaoga faavae o le faaolataga pe ana ia te ia le mana [e faia ai].⁸

O le augatupulaga sa tofia o ia e tatalaina mai o le [augatupulaga] e matua silisili lona maoae ua tuuina mai i le tagata; ma e manaomia lea lava ituaiga o tagata e taiulu—se tagata o le sa faamaoni i le Atua ma ona uso; o le sa avea ma tagata vaai ma tali faaaliga, ma o lona faatuatua i le Atua sa lei maluelue lava pe masalosalo foi, ae sa tinou ia lava ma faamalosiauina isi e agai i luma i lenei galuega maoae ua i o latou luma.⁹

Sa muai faauuina Iosefa Samita e faavaeina le galuega a le Atua i aso e gata ai.

Sa taofia Iosefa Samita i le lalolagi o agaga mo le afe ma afe o tausaga e soifua mai i le faaletino i le taimi tonu, ma ina ia musuia e le Atua, ina ia asiasia e Ia, ma ina ia agavaa ma saunia mo le misiona ua tuuina atu i ona aao.¹⁰

Sa tofia Iosefa Samita e le Alii a o lei soifua mai e pei lava o Ieremia. Sa tauina atu e le Alii ia Ieremia—“Na a’u iloa oe a o lei faia oe e a’u i le manava; na a’u faapaiaina oe a o lei fanau mai oe, na a’u tofia oe e fai ma perofeta i nuu.” [Ieremia 1:5.] Sa poloaiina o ia e lapatai atu i tagata o Ierusalema e uiga i a latou agasala. Sa ia lagonaina o se galuega faigata, ae na iu lava ina ia faia e pei ona poloaiina ai. O lea la ou te fai atu ai e uiga ia Iosefa Samita, sa ia mauaina lona valaauga mai le taimi ao lei faavaeina le lalolagi, ma sa ia tulai mai i le taimi atofaina a le Alii e faavae lana galuega i le lalolagi.¹¹

Sa aoaoina le Perofeta o Iosefa Samita e le Atua le Tama, Iesu Keriso, le Agaga Paia, ma agelu mai le lagi.

Sa masani ona ta’ua Iosefa Samita o se tagata e le iloa faitau ma tusitusi, e lei a’oga. O ia o se atalii o se faifaatoaga, ma matua laitiiti lava sona avanoa mo aoaoga. O le a se tamai tusi faitau tomua na ia te ia ua faaalia mai ai le atoatoaga o le talalelei i le lalolagi? E leai lava, sa na ona aoaoina o ia e ala i galuega a agelu mai le lagi, e ala i le siufofoga o le Atua ma ala i musumusuga ma le mana o le Agaga Paia. O aoaoga faavae ia sa faaalia mai i le lalolagi e ala mai ia te ia e moni e pei o le afioaga o le Atua. O lo latou malosi ua maea ona faalogoina i le lalolagi, ma o le a faaauau ona tupu tele pea seia oo mai le afio mai o le Atalii o le Tagata.¹²

Sa musuia Iosefa Samita e le Agaga Paia, ma sa aoaoina o ia, e tali ai i ana tatalo, e le Tama ma le Alo; ma sa fetalai atu le Tama ia te ia, “O Lo’u Atalii Pele lenei, Faalogo ia te ia!” [Tagai Iosefa Samita—Talafaasolopito 2:17.] Sa ia matua faalogo lelei i upu a Iesu Keriso, ma faaauau ai ona faia seia oo atu ina fasiotia o ia, pei foi o le Faaola.¹³

Ou te lei faitau lava i se mea, i lo’u iloa, e uiga i le mana lea e tasi o faailoa mai i se isi lava tisipenisione o le fanauga a tagata, lea sa faailoa mai i le Perofeta a le Atua i le faatulagaina o lenei Ekalesia, ina ua faaali mai le Tama ma le Alo i le Perofeta o Iosefa o le tali i lana talosaga. … O se faaaliga matua taua lenei, lea sa lei tuuina mai i se auala faapenei i se isi lava tisipenisione o le lalolagi, lea ua auina mai e le Atua e faatatau i Lana galuega. I lona faatulagaga la, sa aoaoina le Perofeta a le Atua e agelu o le lagi. O i latou sa avea ma ona faiaoga, o i latou sa avea ma ona taitai, ma o mea uma sa ia faia, ma mea uma sa ia faatinoina mai le amataga, mai lena aso e oo atu i le aso o lona maliu fasia, sa ala mai i le faaaliga a Iesu Keriso.¹⁴

Ou te fai atu lava a’u faapea ou te le talitonu lava sa i ai se tagata. … sa sili ona latalata ma fesootai faatasi ma le Atua le Tama, ma le Atua le Alo, ma le Atua le Agaga Paia, nai lo o le Perofeta o Iosefa Samita. O le mana o faaaliga sa ia te ia mai le aso sa valaauina ai o ia e maua le Perisitua seia oo atu i le taimi ina ua maliu fasia o ia. O le mana o musumusuga sa ia te ia mai lea aso i lea aso. O loo manino lava ona faailoa mai i faaaliga o loo i totonu o le Tusi o Mataupu Faavae ma Feagaiga. Soo se taimi lava e finagalo ai le Alii e tatau ona aoaiina o ia, sa aoaiina foi e Iosefa Samita ia lava, e ala i ana lava upu; ma e lei faatuatuai lava o ia i le tuuina atu o le upu a le Alii, e ui ina [o lena aoaiga e aafia ai] ia lava. Sa tasi o ia ma le Alii; sa tasi o ia ma le Agaga Paia; sa tasi o ia ma agelu i le lagi.¹⁵

O valoaga, faaaliga, ma folafolaga a le Silisiliese, e pei ona sa i ai, sa siosiomiaina lena tagata, ma sa manaomia ona aoaoina o ia, e le mai tagata pe mai le manao o tagata, ae sa ia manaomia agelu a le Atua e o mai ma aoao ia te ia; sa manaomia ai faaaliga a le Atua e aoaoina o ia, ma sa aoaoina o ia mo ni tausaga e ala i miti ma faaaliga, ma e ala i agelu paia na auina mai i le Atua mai le lagi e aoao ma faatonu o ia ma saunia o ia e faataatia le faavae o lenei ekalesia.

… O Iosefa lava ia sa le malamalama, vagana ai ua ufitia o ia i miti o le faavavau, le taua o le galuega lea na ia faataatiaina lona faavae. Ina ua tatalaina lona mafaufau sa mafai ona ia malamalama, faapitoa lava, i fuafuaga a le Atua; ma o nei faaaliga sa siomia ai o ia ma taitaia ai ona ala uma.¹⁶

E ui lava i tofotofoga ma sauaga, sa tumau pea le faamaoni o le Perofeta o Iosefa Samita i lana molimau.

Ina ua tuuina atu e Iosefa i le lalolagi Kerisiano ia mataupu faavae sa faailoa mai e le Atua ia te ia, o le taimi foi lea na ia faatupuina ai o latou lagona sese e le faavaea; sa ia tauivi ma faiga uputuu masani ia sa latou maua mai i o latou tama o e na le iloa le Atua po o ona ala, faiga masani ia sa tuuina mai i lea tupulaga i lea tupulaga, ia sa feteenai ma upumoni laveai o le lagi.¹⁷

Sa tulai mai le lalolagi atoa e tetee atu ia te ia—o faifeau atoa ma tagata. O le a le faafitauli? I lona itu faigofie, o Iosefa Samita sa pei lava o isi perofeta ma aposetolo. Sa ia auina mai se tisipenisione o le talalelei a Iesu Keriso, lea sa oo mai ma fetaui ma faiga masani a tagata—faiga ia sa tuuina mai i lea tupulaga i lea tupulaga.¹⁸

O lona olaga atoa o se tauiviga faifaipea, e fetaiai ma le au faatuiese mai itu uma, aemaise lava faifeau o lotu o na aso; ae sa soifua ai pea o ia [i na taimi faigata] ma matua olioli i ana galuega seia oo ina faamutaina lana molimau i la le tino, ina ua maea ona galue mo se sefulu fa tausaga mo lena faamoemoe. Sa ia matua tigaina i lu’i faigata e tele; ae sa lei faavaivai lava pe lotovaivai e ui lava sa fetaiai ma fili mai fafo o le Ekalesia ma fili mai totonu foi. E lei aveesea lava i lana vaai le mamalu o lona valaauga, po o le paia o lenei galuega; ae sa saunoa ma galue i le lotolotoi o tagata i tulaga uma o lona ituaiga tagata—o le perofeta a le Atua, le tagatavaai ma le tali faaaliga o le tisipenisione faaiu.¹⁹

O lagona uma o lona agaga, o manatu uma o lona mafaufau, o gaoioiga uma o lona soifua, ua faamaonia ai o lea sa matuai tinou tele e faatumauina le aoaoga faavae o le upumoni, e oo lava i le ositaulagaina o lona lava soifua.²⁰

Sa ta’uina atu e le Alii ia Iosefa o le a ia tofotofoina o ia, pe o le a ia tumau i Ana feagaiga pe leai, seia oo lava i le oti. Sa Ia tofotofoina o ia; ma e ui lava ina sa faafeagai o ia ma le lalolagi atoa, ma le tau tetee atu i le taufaa’ole’ole o uo pepelo, e ui o lona soifuaga atoa o se vaaiga o mala ma popolega ma le mata’u, ae peitai, i ona mafatiaga uma, o le faafalepuipuiina o ia, o osofaiga ma faiga faalealofa sa feagai ma ia, sa ia matua faamaoni lava i lona Atua, ma faamaoni i ana uo.²¹

I lona silasila mamao i le taunuuga o le Ekalesia, sa saunia ai e le Perofeta o Iosefa Samita le Au Aposetolo e Toasefululua ma faamanaina i latou e tauave le galuega a le Atua.

Sa faatulagaina le ekalesia i le aso 6 o Aperila, 1830, i tagata e toaono, ae sa i ai le faatuatua o Iosefa o le a amataina faapea le malo, e pei o se tamai fatu o le sinapi, o le a avea ma ekalesia ma malo maoae i luga o le fogaeleele.²²

O Iosefa Samita, na avea lava o ia, e pei ona fai mai ai, o se perofeta a le Atua, o se tagatavaai ma se tali faaaliga. Sa ia faataatiaina le faavae o lenei ekalesia ma le malo, ma lava le umi o lona soifua ina ia tuuina atu ai ki o le malo i toeaina o Isaraelu, i le au aposetolo e toasefulu ma le toalua. Sa ia faaaluina le taumalulu mulimuli o lona soifuaga, sina tolu pe fa masina, faatasi ma le korama a le toasefululua, e aoaoina ai i latou. E le na o ni nai itula faatauvaa sa aoaoina ai i latou i sauniga faavae o le talalelei; ae sa faaaluina e ia mai i lea aso i lea aso, mai i lea vaiaso i lea vaiaso, mai i lea masina i lea masina, i le aoaoina o i latou ma nai isi foi tagata i mea o le malo o le Atua.²³

Mo sina taimi a o lei oo i lona maliu sa musuia le Perofeta e le Alii e mafaufau atu i lona ia lava malaga ese atu mai vaaiga faalelalolagi. Sa faaalia lea tulaga i auala eseese; aemaise lava i le popolega tele sa ia faaalia ina ia faaeeina atu i luga o le Au Aposetolo e Toasefululua ki ma le pule uma o le Perisitua Paia lea sa ia mauaina. Sa ia folafola mai i se tulaga patino ma se tulaga faalauaitele e faapea ua saunia ma le atoatoa ma ua agavaa i latou [le Au Aposetolo], ma o lea ua ia tuuina atu ai le malo o le Atua i luga o tauau o le Au Aposetolo e Toasefululua.

O a’u, o Wilford Woodruff, i le avea ai o a’u ma tagata ola mulimuli i la le tino o le sa auai i lena sauniga, ou te lagona o lo’u tiute o loo o’u nofo aitalafu ai i le Ekalesia a Iesu Keriso o le Au Paia o Aso e Gata Ai, i le Aiga o Isaraelu, ma le lalolagi atoa, o le tuuina atu lea o la’u molimau faaiu i nuu uma, faapea i le taumalulu o le 1843–4, sa valaauina faatasi ai e Iosefa Samita, le Perofeta a le Atua, ia le Au Aposetolo e Toasefululua i le Aai o Navu, ma faaaluina aso e tele faatasi ma i matou i le tuuina mai ia i matou o o matou faaeega paia, ma le aoaoina mai o i matou i na aoaoga faavae mamalu ia sa faaalia mai e le Atua ia te ia. Ma i se tasi o na taimi sa ia tu ai i ona aao i le lotolotoi o i matou e toeitiiti atoa le tolu itula, e folafola mai ia i matou le tisipenisione faaiu ma le maoae lea sa tuuina i ai e le Atua Lona aao ina ia faatinoina i luga o le fogaeleele i nei aso mulimuli. Sa faatumulia le potu e pei o se afi mumu; sa faaofuina le Perofeta i le mana tele o le Atua, ma sa susulu ona foliga ma matua manino lava, ma sa ia faaiuina lena tautalaga, e le-mafaiona- galo i taimi uma ma le faavavau, i le gagana lenei:

“Uso e, ua ia te a’u se ootiaga loloto i lo’u loto ona o lo’u popole ina nei aveesea atu a’u ma le lalolagi faatasi ma ki o le malo o le Atua o loo ia te a’u, e aunoa ma le faamauina i luga o ulu o isi taitai. Sa faamauina e le Atua i luga o lo’u ulu ki uma o le malo o le Atua e manaomia mo le faatulagaina ma le fausiaina o le Ekalesia, o Siona, ma le malo o le Atua i luga o le fogaeleele, ma ia saunia ai le Au Paia mo le toe afio mai o le Atalii o le Tagata. O lenei uso e, ou te faafetai i le Atua ua ou ola ou te vaai i le aso ua mafai ai ona ou tuuina atu ia te outou o outou faaeega paia, ma o lenei ua ou faamaufaailogaina i luga o o outou ulu ia mana uma o le perisitua Arona ma le Mekisateko ma le galuega faaaposetolo, faatasi ma ki ma mana uma o i ai, ia sa faamaufaailogaina e le Atua i o’u luga; ma o lenei ou te faataavaleina ese atu le galuega, le avega ma le tausiga o lenei Ekalesia ma le malo o le Atua i luga o o outou tauau, ma ou te poloaiina nei outou i le suafa o le Alii o Iesu Keriso ina ia tuufaatasi o outou tauau, ma tauaveina lenei Ekalesia ma le malo o le Atua i luma o le lagi ma le lalolagi, ma luma o le Atua, agelu ma tagata; ma afai tou te le faia o le a fano outou.”

Ma o le Agaga sa faatumulia ai le potu i lena taimi o loo mumu pea i lo’u loto a o ou tusiaina lenei molimau.²⁴

Sa faamaufaailogaina e le Perofeta o Iosefa Samita lana molimau i lona lava toto.

Sa soifua Iosefa Samita seia ona tuuina atu lana molimau i le lalolagi, ma ina ua ia faamauina ki, mana ma faamanuiaga i luga o le ulu o Polika Iaga ma lana usoga; ina ua ia totoina nei ki i luga o le fogaeleele ina ia le toe aveeseina i latou e faavavau; ina ua maea ona ia faia lea, ma auina mai lena faamaumauga, lena tusi o faaaliga, le folafolaga lea e aafia uma ai le taunuuga o lenei tupulaga atoa—Iutaia, Tagata o Nuu Ese, Siona ma Papelonia, nuu uma o le lalolagi, sa ia faamaufaailogaina lena molimau i lona lava toto i le falepuipui i Karefasi, lea na aveesea ai lona soifua faatasi ma lona uso o Ailama ai lima o tagata agasala ma le amioleaga.²⁵

Atonu e mafai ona ou fai atu faapea e foliga uiga ese ia te a’u i le taimi lena le mafuaaga na faatagaina ai le Perofeta ma lona uso o Ailama ina ia aveeseina atu i la’ua mai le lotolotoi o i matou. Ae o Iosefa Samita, e ala i le poloaiga a le Atua ma ala i le mana ma faaaliga o le lagi, sa faauuina ma ia faataatiaina le faavae o lenei tisipenisione maoae ma le atoatoaga o taimi. Sa aumaia o ia i lenei lalolagi ma faauuina e faatulagaina le Ekalesia a Keriso mo le toe taimi i luga o lenei fogaeleele, e saunia ai mo le toe afio mai o le Atalii o le Tagata. Pe a ou toe tomanatu i ai, ina ua mavae lona maliu, sa ou matua talitonu lava sa faauuina o ia ina ia maliu—ina ia faamasaaina lona toto o se molimau o lenei tisipenisione.²⁶

O Iosefa … sa faamaoni, faatuatua ma toa i le molimau e uiga ia Iesu e oo i le aso o lona maliu.²⁷

Sa folafolaina atu lana molimau, faamaumauina i tusitusiga faalauaitele, ma faamaufaailogaina ai i lona toto ma tuuina atu lona soifua, ma o lena molimau o loo malosi pea e oo mai i le aso i luga o le lalolagi atoa, ma o le a tumau ai faapena e oo atu i le faaiuga o taimi.²⁸

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

O le a se mea na uiga ese ai le faatoa feiloai ai o Wilford Woodruff ia Iosefa Samita? (Tagai itulau 13–14.) O le a se mea ua aoao mai e lenei tala e uiga i le Perofeta o Iosefa Samita?
Tagai i itulau 14–15, ma toe iloilo le vaega e faatatau i uiga faaletagata o Iosefa Samita. Aisea e mafai ai ona fesoasoani ia i tatou le iloa o uiga faaletagata o Iosefa Samita i le taimi na o ia ma luma o tagata lautele? E faapefea e a tatou amioga i taimi e na o i tatou ai, ona aafia lo tatou agavaa e aoao ma taitai atu?
O le a se mea o iloga na aafia ai ou lagona e uiga i le auala na aoao ai e Iosefa Samita le atoatoaga o le talalelei? (Tagai i itulau 15–17.)
Na faapefea ona tali atu le Perofeta o Iosefa i puapuaga? (Tagai i le itulau 18) Faamata e faapefea ona tatou manuia mai ana faataitaiga?
Aisea na tuuina atu ai e le Perofeta o Iosefa Samita ia ki o le malo i le Au Aposetolo e Toasefululua? (Tagai i itulau 19–21) Aisea e taua ai lo tatou iloa sa tupu lenei mea?
Toe iloilo upu a Peresitene Woodruff e uiga i le maliu o Iosefa Samita (itulau 21–22). O a ni ou lagona ao e mafaufau e uiga i le osigataulaga sa faia a Iosefa ma Ailama?
O le a se mea sa iloga ona aafia ai ou lagona a o e faitauina upu a Peresitene Woodruff e uiga i le Perofeta o Iosefa Samita?
Aisea e taua ai le mauaina o se molimau i le Perofeta o Iosefa Samita? O le a se mea e mafai ona tatou faia e faamalosia ai a tatou molimau i le Perofeta?

Mau E Faatatau I Ai: 2 Nifae 3:6–15; MFF 5:10; 135; Iosefa Samita–Talafaasolopito

Prophet Joseph Smith — “Sa ta’ua e Peresitene Woodruff e uiga i le Perofeta o Iosefa, “I lana galuega mo tagata lautele ma na o ia foi, sa ia tauaveina faatasi ma ia le Agaga o le Silisiliese, ma sa ia faaalia foi se tulaga maoae uigaese o lona agaga lea ou te lei vaai lava i ai i se isi tagata.”

stained glass — O Iosefa Samita sa “faaali atu i ai, e tali ai ana tatalo, ia le Tama ma le Alo.”

Joseph Smith teaching — Sa i ai Elder Wilford Woodruff ina ua tuuina atu e le Perofeta o Iosefa Samita ia ki o le malo i le Korama a le Au Aposetolo e Toasefululua.