Aoaoga a Peresitene
Mataupu 5: O Le Agaga Paia ma Faaaliga mo le Tagata Lava Ia

Mataupu 5

O Le Agaga Paia ma Faaaliga mo le Tagata Lava Ia

E tusa ai ma lo tatou faamaoni, e mafai ona avea le Agaga Paia ma se soa e faamalamalama ma taialaina i tatou i o tatou olaga ma taitai atu ai i tatou i le ola e faavavau.

Mai le Soifuaga o Wilford Woodruff

I le masina o Oketopa 1880, sa ta’u atu ai e Peresitene Wilford Woodruff i le Au Paia faapea e lei leva ona asiasi atu ia te ia Peresitene Polika Iaga, o le sa maliu i le 1877, faapea foi ma Peresitene Heber C. Kimball, o le sa maliu i le 1868. “Ina ua matou taunuu atu i le mea e fai ai le konafesi,” sa faamatala ai Peresitene Woodruff, “Sa ou fai atu ia Peresitene Iaga pe mafai ona ia lauga mai ia i matou. Sa ia saunoa mai, ‘E leai, ua uma la’u molimau i la le tino. Ou te le toe lauga i nei tagata.’ ‘Ae’ sa faapea mai o ia, ‘ua ou sau ou te fia talanoa atu ia te oe; ua ou sau e leoleo ia te oe, ma vaai po o a mea a tagata o loo fai.’ Ona fai mai lea o ia, ‘Ou te loto ina ia e aoao atu i tagata—ma ou te manao lava ina ia e mulimuli ai i lenei fautuaga—ina ia latou galulue ma ola ina ia latou maua le Agaga Paia, aua afai e aunoa ma lea tou te le mafai ona outou atiina ae le malo; afai e aunoa ma le Agaga o le Atua ua outou i ai i le matautia o le savavali i le pouliuli, ma le matautia o le toilalo i le faataunuuina o o outou valaauga o ni aposetolo ma toeaina o le ekalesia ma le malo o le Atua.’ ”1

O lenei fautuaga e le o se mea fou ia Peresitene Woodruff. Sa iloa o ia e lana usoga o “se tagata e mataalia i musumusuga a le Agaga o le Alii, o se tagata e taitaia e musumusuga i le faatinoina o lona tiute, e sili atu nai lo se meaalofa o le atamai po o sana lava filifiliga.”2 Sa masani ona ia faamatalaina se aafiaga sa ia maua i musumusuga a le Agaga. Sa tupu ao malaga o ia ma lona aiga i le Iunaite Setete i sasae, lea sa valaauina o ia e faia ai se misiona. Fai mai a ia:

“Na ui atu la’u taavale solofanua i le tasi afiafi i le fanua o Uso Williams [o se tasi o le Ekalesia]. Na malaga faatasi foi i o’u tafatafa le taavale solofanua a Uso Orson Hyde [se tasi o le Korama a le Toasefululua]. Na i ai lo’u toalua ma la’u fanau i le taavale solofanua. Ina ua uma ona ou tatala ese solofanua mai le taavale solofanua ma ua uma foi la’u meaai o le afiafi, sa ou alu loa ou te moe i totonu o le taavale solofanua. Sa na o ni nai minute lava talu ona ou i ai iina ae faapea mai loa le Agaga ia te au, ‘Nofo i luga e aveese le taavale solofanua lena.’ Na ou fai atu i lo’u toalua e tatau ona ou nofo i luga e aveese le taavale solofanua. Ona faapea mai lea o ia, ‘Aisea? Sa ou faapea atu, ‘Ou te le iloa.’ Pau lava lena o lana fesili ia te a’u i ituaiga mea faapea; na ou ta’u atu loa ia te ia ou te le iloa, ma sa na o le pau lava lena. Sa ou tu i luga ma aveese le taavale solofanua. … Sa ou tilotilo solo i le mea o loo matou i ai ona ou toe moe ai lea. Ona toe fai mai foi lea o le Agaga lava lea e tasi, ‘Alu e aveese au solofanua mai lalo o le laau le la.’ … Sa ou alu ma aveese a’u solofanua ma tuu i se tamai pupuvao. Ona ou toe alu foi lea o’u moe.

“E tusa pe tolusefulu minute na va ai ae sau loa ma se asiosio ma gaulele ese ai le laau o le aluna e tusa ma le lua futu i luga a’e o le tafu’e. Na lelea ese atu le laau i luga o ni pa se tolu pe fa ma pau tonu lava i talaane o le taavale solofanua a Uso Orson Hyde, i le mea tonu lava lea sa tu ai muamua la’u taavale solofanua. Faamata o a ni tulaga e oo i ai pe ana fai ou te le faalogo i lena Agaga? Ia, semanu e leai se mea o le a masalomia ai le feoti o a’u ma lou toalua ma la’u fanau. O le leo itiiti ma le filemu lena ia te a’u—e le o se mafuie, e le o se faititili, e le o se uila; ae o le leo itiiti ma le filemu o le Agaga o le Atua. Na faasaoina ai lo’u ola. O le agaga lea o faaaliga ia te a’u.”3

Sa faamamafaina mai e Peresitene Woodruff le manaomia e tagata uma o le Ekalesia ona taitaia e le Agaga Paia—e saili faaaliga faaletagata lava ia. Sa ia faapea mai, “E le mafai ona ola le Ekalesia a le Atua i se luasefulufa itula e aunoa ma ni faaaliga.”4

Aoaoga a Wilford Woodruff

O le Agaga Paia o se peresona o agaga e fai ma molimau a le Atua le Tama, o Iesu Keriso, ma le moni o le talalelei.

O le Agaga Paia o se tasi o peresona o le Aiga Atua. O le Atua le Tama ma le Atua le Alo e i ai malumalu [tino o aano ma ivi], ma o le Atua lava ia sa fausiaina le tagata i Lona lava faatusa; ao le Agaga Paia o se peresona o Agaga, o le avea ma molimau o le Tama ma le Alo i le fanauga a tagata [tagai MFF 130:22].5

O le a le molimau silisili a se alii po o se tamaitai e mafai ona maua e uiga i le avea o lenei [galuega] ma galuega a le Atua? O le a ou ta’uina atu ia te outou le molimau silisili sa ou mauaina, le molimau sili ona maumaututu, o le molimau lena o le Agaga Paia, le molimau o le Tama ma le Alo.6

O o tatou mata ma taliga e ono pepeloina e faiga poto leaga ma taufaasese a tagata; ae o le Agaga Paia e le mafai lava ona faaseseina se tasi.7

Ua ta’u mai e tusitusiga paia o loo i ai se agaga i totonu o le tagata ma o le musumusuga a le Silisiliese e tuuina atu i ai le malamalama [tagai Iopu 32:8]. O luga o lenei aoaoga faavae lea e faamasani ai i tatou ma le upumoni, ma le mana o le talalelei lea ua tatou mauaina. O aoaoga faavae o le ola e faavavau o loo faailoaina mai ia i tatou e le musumusuga a le Agaga Paia, ona o lena Agaga e i luga o i tatou, e aafia ai o tatou mafaufau, ma afai tatou te vaavaai i na aoaoga, ma i ai ia i tatou le lagona sa’o, e mafai ona tatou malamalama ma le manino i mea e pei ona i ai.8

O tagata faatuatua o le Au Paia o Aso e Gata Ai e mafai ona latou mauaina le meaalofa a le Agaga Paia, le meaalofa silisili e mafai ona maua e se tasi i la le tino.

Soo se tagata lava ua salamo i ana agasala, ma ua papatisoina mo le faamagaloga, i le faatulagaga a le Atua, ma le faatusa o Iesu Keriso, o le sa tanumia i le vai i le faatusa o le oti, ma toe tulai mai ai i le faatusa o le toetu, e i ai lana aia i le Agaga Paia; ua folafolaina mai, ma e ana ia lea; o le aia a tagata uma e faafiafiaina ai i lenei [mea], ma afai latou te maua le Agaga Paia ma [Ana] meaalofa o le a latou maua musumusuga, le malamalama ma le upumoni; o le a ia i latou mata e vaai ai, taliga e lagona ai ma loto e malamalama ai.9

O lenei, afai e i ai le Agaga Paia faatasi ma outou—ma e tatau i tagata taitoatasi ona i ai—e mafai ona ou fai atu e leai lava se meaalofa e sili atu, e leai se faamanuiaga e sili atu, e leai se molimau e sili atu ua tuuina mai i tagata i le lalolagi. O le a e mauaina galuega a agelu; o le a e vaai i le tele o vavega; o le a e vaai i le tele o mea ofoofogia i le lalolagi; ae ou te ta’utino atu o le meaalofa o le Agaga Paia o le meaalofa silisili e mafai ona faaeeina i luga o tagata. O lenei mana ua tatou faatinoina ai mea ua tatou faia. O le mana lenei e lagolagoina i tatou i taimi o sauaga, lu’itau ma faigata uma e oo mai ia i tatou.10

O alii ma tamaitai uma o e ua ulufale mai i totonu o le ekalesia a le Atua ma papatisoina mo le faamagaloina o agasala e i ai lana aia e maua ai faaaliga, le aia i le Agaga o le Atua, e fesoasoani ia i latou i a latou galuega, i le taitaiina o a latou fanau, i le fautuaina o a latou fanau ma i latou uma o loo i lalo o la latou faamalumaluga. O le Agaga Paia e le faapitoa i alii, po o aposetolo po o perofeta; e i ai i alii ma tamaitai faatuatua taitoatasi, ma tamaiti taitoatasi o le ua lava lona matua e talia ai le talalelei a Keriso.11

E tatau ona faamasani i tatou lava ma le leo itiiti ma le filemu o le Agaga Paia—le leo o faaaliga.

E i ai le auala tofia … o loo mauaina ai faaaliga mai le Alii mo le faafoeina o lana ekalesia. E tasi lava le alii i luga o le fogaeleele, i lea taimi ma lea taimi e na te umia lenei mana. Ae o loo i tagata taitoatasi o le ekalesia le avanoa e mauaina ai faaaliga mai le Alii e taitaiina ai o ia lava mo ana lava fuafuaga, ma ia molimau atu ia te ia e uiga i le tonu o aoaoga faalauaitele ma gaoioiga fuafuaina.12

O le a le faaaliga? O le musumusuga a le Agaga Paia i le tagata. Na saunoa atu Iosefa Samita ia Uso Ioane Teila i ona aso: “Uso Teila, ia e vaavaai i le uunaiga a le Agaga o le Atua; ia e vaavaaia musumusuga a le Agaga ia te oe; ia e faataunuuina i lou olaga, ma o [lenei mea] o le a avea ma aoaoga faavae o le faaaliga ia te oe, ma o le a e iloa ma malamalama i lenei Agaga ma lenei mana.” O le ki lava lea, o le maa faavae o faaaliga uma. … I o’u lava aafiaga, ua ou taumafai ai lava ia ou faamasani i lena Agaga, ma ia aoao i ana faatinoga.13

E toafia outou ua maua ni faaaliga? E toafia outou ua maua le musumusuga a le Agaga o le Atua ia te oe—le leo itiiti ma le filemu? … Ua matua tele lava a’u molimau talu ona ou fesootai ma lenei Ekalesia ma lenei malo. Ua faamanuiaina a’u i taimi eseese i meaalofa faapitoa ma mea silisili, o faaaliga ma taitaiga faapitoa; ae o ia mea uma ou te lei mauaina lava se mea e tasi e mafai ona ou faalagolago i ai nai lo le leo itiiti ma le filemu o le Agaga Paia.14

E i ai taimi e vaavaai maualuga tele ai pe manatu mamao tele ai le tagata i mea silisili atu e tupu ai le aveseseina o le Agaga o le Atua ma le musumusuga a le Silisiliese. E le o i faititili po o taaviliga o matagi lea e tatau ona tatou vaavaai ai mo le Agaga o le Atua, ae i le leo itiiti ma le filemu [tagai 1 Tupu 19:11–12].15

O le meaalofa o le Agaga Paia, tatou te maua ai faamanuiaga e taialaina ai o tatou olaga i le taimi nei ma sauniuni ai i tatou mo le ola e faavavau.

E te ono siosiomia se alii po o se tamaitai i oa uma ma mamalu e mafai ona oo i ai le mafaufau o le tagata, ma pe e faamalieina ai ea i latou? E leai. E i ai pea se gaogaoii tiga loloto. I le isi itu, faaali mai ia te a’u se tagata aisi i luga o le alatele, o loo i ai le Agaga Paia, o le o loo faatumulia lona mafaufau i le Agaga ma le mana, o le tagata lena o loo i ai le filemu o le mafaufau, o le o loo i ai oa moni, ma na fiafiaga e le mafai e se tagata ona maua i se isi lava auala.16

A tatou fiafia i le Agaga Paia, ao tatou taumafai e ola i la tatou lotu iinei i le lalolagi, o tatou o tagata sili ona fiafia i luga o le fogaeleele o le mea e tu ai aao o le Atua, e tusa lava po o le a lo tatou tulaga. Ou te le popole pe tatou te mauoa pe matitiva, pe o fiafia po o faafitauli, afai e ola se tagata i lana lotu ma faafiafiaina i le fesoasoani ma le Agaga o le Atua, o le a leai se eseesega ia te ia o mea e tutupu i luga o le fogaeleele. Atonu e i ai mafuie, taua, afi po o le pelu i le nuu, ae na te lagonaina lava o loo lelei mea uma ia te ia. O lo’u lagona lena.17

O tagata taitoatasi e mauaina lena Agaga e i ai se faamafanafana i totonu [ia te ia]—o se taitai e faatonuina ma taitaiina o ia. O lenei Agaga e faailoa mai, i lea aso ma lea aso, i tagata taitoatasi o e faatuatua, mea uma e aoga ia te ia. … O le musumusuga lenei a le Atua i lana fanau i tupulaga uma o le lalolagi o se tasi o meaalofa manaomia e lagolagoina le tagata ma mafai ai e ia ona savali i le faatuatua, ma agai atu i luma ma usitai i faatonuga ma poloaiga ma faaaliga uma ia e tuuina mai e le Atua i Lana fanau e taialaina ma ta’ita’ia i latou i le olaga.18

E tatau i tagata uma ona maua le Agaga o le Atua, ona mulimuli ai lea i ana faatonuga. O le faaaliga lenei. E leai lava se eseesega po o le a le mea e ta’u atu e le Agaga ia te oe e fai; na te le ta’u atua lava ia te oe e te faia se mea sese.19

Ua siosiomia i tatou e … agaga leaga o loo i se taua faasaga i le Atua ma faasaga i mea uma lava o loo agai i le fausiaina o le malo o le Atua; ma e manaomia e tatou lenei Agaga Paia ina ia mafai ai e i tatou ona foia ia uunaiga [leaga]. …

… O le Agaga lenei e tatau ona ia i tatou e mafai ai ona faatinoina faamoemoega o le Atua i luga o le fogaeleele. E sili atu lo tatou manaomia o lena nai lo se isi lava meaalofa. … O loo tatou i ai i le lotolotoi o le fili, i le lotolotoi o le pogisa ma faaosoosoga, ma e manaomia ina ia taitaia i tatou e le Agaga o le Atua. E tatau ona tatou tatalo i le Alii seia tatou maua le Fesoasoani. O lenei le mea sa folafola mai ia i tatou ina ua papatisoina i tatou. O le agaga lea o le malamalama, o le upumoni, ma faaaliga, ma e mafai ona faatasi ma tatou uma lava i le taimi lava e tasi.20

Pe afai tatou te saili e faia se isi lava mea nai lo le faia o faatonuga a le Agaga Paia, o le a tatou ui atu i le puaoa ma oo atu i le pogisa ma faalavelave, ma o le a tatou le iloa le ala o loo tatou tulimatai atu i ai. O aso uma lava tatou te ola ai tatou te manaomia le mana o le Alii—le mana o le Agaga Paia ma le malosi o le perisitua ina ia faatasi ma i tatou e iloa ai le mea e fai. Ma afai tatou te ola ai i luma o le Alii, o le a faaalia mai e le Agaga ia i tatou i aso uma o tatou tiute e fai; ou te le popole po o le a le mea o loo tatou faia, e tatau lava ona muai saili atu le finagalo o le Alii ma faia loa, ona lelei ai lea ona faia a tatou galuega ma talia i luma o le Alii.21

I lo’u olaga atoa ma a’u galuega uma, soo se taimi lava e faatonu ai a’u e le Agaga o le Alii i se mea e faia, sa ou iloa ai e sili lava le faia. Sa puipuia a’u e lena mana. … Ia i ai ia te oe le Agaga o faaaliga. Ma a e mauaina lena, o le a puipuia oe, ma o le a e faia tonu lava le mea o loo finagalo le Alii e te faia.22

O le manatu lea e mafai ona tatou usitai ma faapaiaina i tatou e le talalelei, ma saunia ai lea o i tatou e mauaina le ola e faavavau, o se tasi lea o aoaoga faavae sili ona paia ua faaalia mai i le tagata. … Ua ia i tatou le faamoemoega e le iloa e le lalolagi, ma e le mafai ona ulufale i o latou mafaufauga. A le fanaufouina i latou e le Agaga o le Atua e le mafai lava ona vaai i le malo o le Atua, ma e le mafai foi e i latou ona oo atu i ai vagana ua fanauina i le vai ma le Agaga [tagai Ioane 3:5], o le mea lea e le mafai ona latou lagonaina le faatalitali fiafia ma faamoemoega ia o loo ia i tatou. E le o tatalaina o latou mata, taliga ma loto ina ia iloa ma faalogo ma lagona le mana o le talalelei a Keriso.23

O lo tatou faamanuiaga le mulimuli atu i faatonuga a le Agaga o le Alii, ma ia avea ma o tatou taitai ma a tatou soa, ma o le faia o lenei mea o le a oo mai ai i o tatou luga faamanuiaga o le lagi i le vave lava tatou te sauni e talia ai.24

O le avea o le Agaga ma soa tumau e manaomia ai le tumau o lo tatou galulue ma lo tatou faatuatua.

Ou te naunautai. … i le avea ai o i tatou o se nuu, ia faia o tatou tiute, ma ola i la tatou lotu, ma tausi le faatuatua, ma savavali ai i luma o le Alii ina ia avea le Agaga Paia ma o tatou soa tumau e taitaiina i tatou i aso o loo i o tatou luma. O la’u tatalo lea ma lo’u faanaunauga.25

Ou te iloa e manaomia le tumau i le tauivi, galue ma faatuatua i luma o le Alii ina ia faatumauina i tatou i le avea ma soa a le Agaga Paia, ma ia ola i se tulaga e mafai ai ona tatou maua ia faamanuiaga.26

E leai se mea e tatau ona sili atu lo tatou galulue ina ia maua i la le tino nai lo le Agaga o le Atua, le Agaga Paia, le Fesoasoani, lea ua tatou agavaa i ai e maua e ala i lo tatou usiusitai i tulaga manaomia o le Talalelei.27

O le folafolaga maoae o loo aumai faatasi ma le folafolaina o le Talalelei, e pei ona faaalia mai i le lagi i o tatou aso, e faapea o le Agaga Paia o le a faaeeina atu i luga o e ua salamo ma le atoatoa e usitaia ana sauniga paia. O le Agaga Paia o le a faailoa mai ai le poto o mea ua te’a, o le taimi nei ma mea o le a oo mai ma o le a faailoa mai ai foi le mafaufau ma le finagalo o le Tama. I le auala lea o le a faaalia mai e le Silisiliese Ona faamoemoega i e usitaia Ana poloaiga ma e mama o latou olaga ma agavaa i Ona luma, ina ia mafai ona saunia i latou mo mea uma e tutupu, ma lu’i e ono tulai mai i o latou ala.

Afai e i ai nisi o le Ekalesia o e le iloa e ala i o latou lava aafiaga le moni o lenei mea, ia latou iloa lelei latou te le o agavaa mo o latou avanoa. O le Au Paia uma e tatau ona felatai fesootaiga ma le Agaga Paia, ma e ala atu ai foi, ma le Tama, a leai o le a lamatia i latou i le faatoilaloina e le tiapolo ma pauu ese atu ai ma le ala.

O le mea lea, matou te fai atu ai i le Au Paia o Aso e Gata Ai: O le Agaga Paia e le mafai ona nofo i malumalu e le paia. Afai e te fiafia i le mana ma meaalofa atoatoa a lau lotu, e tatau ona e mama. Afai e te sese i ou vaivaiga, lou valea ma agasala, e tatau ona e salamoina na mea; o lona uiga e tatau ona e matua lafoa’ia na mea. E leai lava se isi auala e mafai ona faamalieina ai le Atua. O le “Tagata Paia” Lona suafa [tagai Mose 6:57], ma e fiafia o Ia i taumafaiga a Lana fanau ina ia mama.28

Afai tatou te le maua faaaliga, e mafua ona ua tatou le ola ai e pei ona tatau ona tatou ola ai, e mafua ona ua tatou le faalauteleina lo tatou valaauga i le perisitua e pei ona tatau ai; ana tatou faia semanu e le mafai ona le i ai ni faaaliga, e leai se isi e ola noa pe le fua mai i ni fua lelei.29

Ia tatou tuu ese faiga faatiapolo uma, o masani uma na e taofia ai lo tatou fesootai ma le Atua. … Afai e mafai e na mea laiti ona faaleagaina lo tatou fiafia ma faatoilaloina i tatou i fofoga o le Alii, ua tatau loa ona tatou tuueseina ae faailoa mai se maelega e fai le finagalo o le Tama i le Lagi, ma faataunuu lena galuega ua tuu mai i o tatou luga ina ia faatinoina. … A ou faia soo se mea e taofia a’u mai le fiafia i le Agaga o le Alii, ma a ou mautinoa loa lena mea, ou te tiaieseina vave lava.30

O loo tatou taumafai e ola i le tulafono selesitila a le Atua; o loo tatou talaiina le talalelei a Iesu Keriso ma taumafai pea e tauaveina ana aoaoga faavae. O le fesili la, pe tauia ea i tatou i lo tatou faia o lenei mea? Pe tauia ea i tatou pe a faamaoni i ai? Pe tauia ea i tatou pe a tatou laasia soo se lu’i ma soo se faigata, po o sauaga, po o le oti lava ia, mo le malo o le Atua, mo le faaolataga ma le ola e faavavau, le meaalofa silisili o meaalofa uma ia e mafai ona faaee mai e le Atua i luga o le fanauga a tagata? Ou te fai atu ioe, ma ou te faamoemoe o le Au Paia o Aso e Gata Ai, o alii uma o loo i ai le pule—o le a tatou faatuatua uma i le Alii, o le a tatou manatua a tatou tatalo, galulue mo le Agaga Paia, galulue ia iloa le mafaufau ma le finagalo o le Atua, ina ia iloa e i tatou le ala e savavali ai, ia tatou maua ai le Agaga o le Alii ma le Agaga Paia, ma ia mafai ai ona tatou faatoilalo le lalolagi ae faalauaitele o tatou valaauga seia maea ona tatou ui atu i lenei olaga faataitai.31

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau v–ix.

  • O le a se mea ua e aoaoina mai i tala i le itulau 47–49?

  • A o e suesueina lenei mataupu, o a ni mea ua e aoaoina mai e uiga i le Agaga Paia ma Ana galuega?

  • Toe faitau le parakalafa atoa lona lua i le itulau 50. Aisea e tatau ai ona tatou mafaufau i le meaalofa a le Agaga Paia e avea “o le meaalofa silisili” e mafai ona tatou mauaina i le olaga faaletino? Toe faitau le parakalafa faaiu i le mataupu, i itulau 56. E faapefea e le meaalofa o le Agaga Paia ona saunia i tatou mo le ola e faavavau, “le meaalofa silisili o meaalofa uma”?

  • E mafai faapefea e aoaoga a Peresitene Woodruff ona fesoasoani ia i tatou e matauina le musumusuga a le Agaga Paia? (Tagai itulau 55; tagai foi MFF 6:15, 22–23; 11:12–14.) Aisea e taua ai le manatua o le Agaga Paia e masani ona fesootai mai i se “leo itiiti ma le filemu”?

  • Faitau le parakalafa lea e amata i le pito i lalo o le itulau 52. O a nisi o “oa moni” ia e mafai ona tatou mauaina pe a i ai le Agaga Paia faatasi ma tatou? (Tagai itulau 52–54.).

  • Mafaufau i se aafiaga a o taitaiina oe e le Agaga Paia. O a ni auala ua faamanuiaina ai oe e ala i le avea o le Agaga Paia ma a’u soa?

  • Toe faitau le vaega faaiu o le mataupu (itulau 56). Aisea e tatau ai ona tatou galulue tumau pea ina ia maua ai le avea o le Agaga Paia ma a tatou soa tumau? O le a le mea e mafai ona taofia i tatou mai le lagonaina o le uunaiga a le Agaga Paia? O le a se mea e fesoasoani ia i tatou e lagonaina ai le uunaiga a le Agaga Paia?

Mau E Faatatau I Ai: Ioane 14:26; 15:26; 16:13; 1 Korinito 2:9–14; 1 Nifae 10:17–19; 2 Nifae 32:1–5; Moronae 10:5; MFF 8:2–3; 14:7

Faamatalaga

  1. The Discourses of Wilford Woodruff, filifilia e G. Homer Durham (1946), 290; tagai foi itulau 289.

  2. Joseph F. Smith, Gospel Doctrine, lominga lona 5. (1939), 117.

  3. Deseret Weekly, Setema 5, 1891, 323.

  4. The Discourses of Wilford Woodruff, 61.

  5. Deseret Weekly, Setema 21, 1889, 393.

  6. Deseret News: Semi-Weekly, Setema 7, 1880, 1.

  7. Deseret News: Semi-Weekly, Iulai 30, 1878, 1.

  8. Deseret News, Iuni 26, 1861, 130.

  9. Deseret News: Semi-Weekly, Me 2, 1876, 4.

  10. Deseret Weekly, Aperila 6, 1889, 451.

  11. The Discourses of Wilford Woodruff, 53.

  12. The Discourses of Wilford Woodruff, 54.

  13. The Discourses of Wilford Woodruff, 45–46.

  14. The Discourses of Wilford Woodruff, 45.

  15. Journal of Wilford Woodruff, Archives of The Church of Jesus Christ of Latter-day Saints, Ianuari 20, 1872.

  16. The Discourses of Wilford Woodruff, 5.

  17. Deseret News: Semi-Weekly, Iulai 20, 1875, 1.

  18. The Discourses of Wilford Woodruff, 7–8.

  19. The Discourses of Wilford Woodruff, 293–94.

  20. Deseret Weekly, Novema 7, 1896, 643.

  21. Deseret News, Mati 4, 1857, 411.

  22. I le Lipoti o le Konafesi, Aperila 1898, 31.

  23. Deseret News: Semi-Weekly, 4 Mati 1873, 3.

  24. Deseret News, Tesema 26, 1860, 338.

  25. Deseret Weekly, Mati 6, 1897, 371.

  26. Deseret News: Semi-Weekly, Iulai 20, 1875, 1.

  27. Contributor, Aokuso 1895, 637.

  28. “Epistle,” Woman’s Exponent, Aperila 15, 1888, 174; mai se tusi na tusia e Peresitene Woodruff e fai ma sui o le Korama a le Toasefululua.

  29. The Discourses of Wilford Woodruff, 51.

  30. Deseret News, Fepuari 26, 1862, 274.

  31. The Discourses of Wilford Woodruff, 129.

gift of the Holy Ghost

O le meaalofa o le Agaga Paia e mafai ona tuuina atu “i alii ma tamaitai faatuatua taitoatasi, ma tamaiti taitoatasi o le ua lava lona matua e talia ai le talalelei a Keriso

two men conversing

O e agavaa o le Au Paia o Aso e Gata Ai e mafai ona mauaina le Agaga Paia “e fesoasoani ia i latou i a latou galuega, i a latou taitaiga i a latou fanau, i le fautuaina o a latou fanau ma i latou uma o loo i lalo o la latou faamalumaluga.”