“29 Aperila--5 Me Ioane 7--10: ‘O Au o le Leoleo Mamoe Lelei’” Sau, Mulimuli Mai ia te Au--Mo Tagata Taitoatasi ma Aiga: Feagaiga Fou 2019 (2019)
“29 Aperila--5 Me Ioane 7--10,” Sau, Mulimuli Mai ia te au--Mo Tagata Taitoatasi ma Aiga: 2019
O Se e leai se Agasala, saunia e Liz Lemon Swindle
29 Aperila–5 Me
Ioane 7--10
“O Au le Leoleo Mamoe Lelei”
A o e faitauina le Ioane 7--10, e mafai ona e maua lagona uunaia mai le Agaga Paia e uiga i mataupu faavae i nei mataupu. Tusifaamaumau ou lagona uunai e mafai ona fesoasoani ia oe e fai ai se fuafuaga e faatinoina.
Tusifaamaumau Ou Lagona Uunai
E ui ina sa afio mai Iesu Keriso e aumai le “filemu [ma] le finagalo alofa i tagata” (Luka 2:14), sa “vaeluaina le motu o tagata ia te ia” (Ioane 7:43). O tagata na molimauina ia lava mea e tasi na faia ni faaiuga eseese e uiga ia Iesu. O faaiuga a nisi “ O Ia o se tagata lelei”, ae fai mai nisi, “Ua na faasese tagata o le nuu” (Ioane 7:12). Ina ua ia faamaloloina se tauaso i le Sapati, sa fai ane nisi, “E le mai le Atua lenei tagata, aua ua le tausia e ia le aso sapati,” ae fesili isi, “Pe mafai faapefea e se tagata agasala ona fai o faailoga faapena?” (Ioane 9:16). Ae ui i nei fenumiaiga uma, o i latou o e sa saili atu mo le upumoni sa latou iloa le mana o Ana upu, aua “e lei tautala lava se tasi e faapei o lenei tagata” (Ioane 7:46). Ina ua fesili le au Iutaia ia Iesu e “ta’u manino mai ia i matou” pe o ia o le Keriso, sa Ia faaali mai se mataupu faavae e mafai ona fesoasoani tatou te iloa ai le mea moni mai le mea sese: “O a’u mamoe e faalogo mai i latou i lo’u leo,” na Ia fetalai mai ai, “ou te iloa foi i latou, ua latou mulimuli mai foi ia te au” (Ioane 10:27).
Manatu mo Suesuega Faaletagata Lava Ia o Tusitusiga Paia
A o ou ola i upumoni na aoao mai e Iesu Keriso, o le a oo ina ou iloa e moni.
Sa maofa Iutaia sa tele naua mea na silafia e Iesu ae e le’i aoaoina o ia (tagai fuaiupu 15)---i se vaaiga lata mai, e le o le ala sa latou masani ai. I le tali atu a Iesu, sa Ia aoao atu i se isi auala e ese e uiga i le iloa ai o le upumoni lea o loo avanoa mo tagata uma, po o le a lava le tulaga faaleaoaoga po o lona talaaga. E tusa ai ma le Ioane 7:14–17, e mafai faapefea ona e iloa e moni le aoaoga faavae na aoao mai e Iesu? Na fesoasoani faapefea lea faiga ia te oe e atinae ai lau molimau i le talalelei?
O loo avanoa le alofamutimutivale o le Faaola mo tagata uma.
Ina o saunoa e uiga i le fegalegaleaiga a le Faaola ma le fafine na molia atu i le mulilua, sa ta’ua e Elder Dale G. Renlund: “E mautinoa lava e lei faatagaina e le Faaola le mulilua. Ae sa Ia le’i faasalaina foi le fafine. Sa Ia faamalosiau ia te ia e toe faafouina lona olaga. Sa faaosofia o ia [le fafine] e sui ona o le agaalofa ma le alofa mutimutivale [o Iesu]. O le Faaliliuga a Iosefa Samita o le Tusi Paia o loo faamaonia ai lona avea mulimuli ane ma soo: ‘Ma sa vivii atu le fafine i le Atua mai lena itula, ma sa talitonu o ia i lona suafa.’ [tagai Ioane 8:11, vaefaamatalaga c]” (“O Lo Tatou Leoleo Mamoe Lelei” Ensign po o le Liahona, Me 2017, 30).
O anafea na e lagonaina ai faapei o le fafine, ua maua le alofamutimutivale nai lo le tausalaina mai le Faaola? O anafea na e pei ai o le au tusiupu ma le au Faresaio, o tuua’ia pe faamasinoina isi tusa lava pe le o aunoa foi oe ma le agasala? (tagai Ioane 8:7 O a isi mea e mafai ona e aoao mai le ala na fegalegaleai ai le Faaola ma le au tusiupu ma le au Faresaio ma le fafine na maua o mulilua? O le a se mea ua e aoao mai e uiga i le faamagaloga a le Faaola a o e faitauina nei fuaiupu?
Aisea na tiga ai le au Iutaia ina ua fetalai Iesu, “Sa a’u i ai, a o lei leai se Aperaamo”?
“O A’u” o le faaupuga sa faaaoga e Ieova e faailoa ai Ia lava ia Mose, e pei ona tusia i le Esoto 3:14. O lea ina ua fetalai Iesu, “O a’u,” sa Ia faailoa mai o Ia lava o Ie Ieova, o le Atua o le Feagaiga Tuai. Sa manatu Iutaia o le upuleaga lea, ma i lalo o le tulafono a Mose, o le faasalaga o le fetogia lea ia oti.
E ala mai i o tatou luitau, e mafai ai e le Atua ona faaalia mai o Ia lava i o tatou olaga.
Ona o taunuuga le lelei e tele ina sosoo ma le agasala, atonu tatou te manatu ai i nisi o toatuga tatou te feagai faapea o taunuuga o mea sese ua fai. Peitai, ina ua manatu soo o le Faaola sa i ai se tagata na fanau mai o tauaso ona ua agasala o ia po o ona matua, sa faasa’oina i latou e Iesu. O faapefea i upu a le Faaola o i le Ioane 9:3 ona suia lau vaaiga e uiga i ou luitau ma luitau o isi? A o e faitauina le Ioane 9, manatunatu loloto pe na faapefea “ona faaalia galuega a le Atua” (Ioane 9:3). Pe na faapefea ona faaalia a o e fetaiai ma luitau?
E malie foi le manatua o fesili a le au soo o i le Ioane 9:2 na faaalia ai sa latou talitonu i le muai olaga, o se aoaoga faavae sa le maua e le au Kerisiano i le taimi o le Liliuese Tele ae sa toefuatai mai e ala i le Perofeta o Iosefa Samita , (tagai MFF 93:29; Mose 4:1–4; Aperaamo 3:22–26).
O ai “isi mamoe” na faasino i ai le Faaola i le Ioane 10:16?
Ina ua asiasi atu le Faaola i Amerika ina ua mavae Lona Toetu, sa Ia faamalamalamaina isi o Ana mamoe (tagai 3 Nifae 15:21–16:5).
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina faatasi ma lou aiga ia mau, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga nei:
E mafai faapefea ona e fesoasoani ia malamalama lou aiga i aoaoga a Iesu o i le Ioane 7:24? O se tasi auala o le o i fafo ma faapalapala se tagata se toatasi o le aiga. Mata o a ni manatu o tagata ese i lea tagata o le aiga pe a vaavaai atu ia te ia i ona foliga vaaia? (Lisi ni uiga auaumama lelei o le tagata lea e le o mafai ona vaaia i lena o le tilotilo atu ia te ia (tagai foi 1 Samuelu 16:7).
E faapefea i nisi taimi ona avea i tatou ma auauna i le agasala? O a upumoni ua aoao mai e Iesu e mafai ona faasaolotoina i tatou?
Ua Faamalolo e Iesu se Tagata Tauaso, saunia e Carl Heinrich Bloch
E mafai faapefea ona e fesoasoani i lou aiga ia vaai i le tala ia Iesu o loo faamalolo le tagata tauaso i le Ioane 9? E mafai ona outou faatinoina faatasi le tala pe faaali le vitio “Jesus Heals a Man Born Blind” (LDS.org). Taofi i nisi taimi le tala ina ia mafai e tagata o le aiga ona faitau ia fuaiupu e fetaui i ai mai le Ioane 9 Valaaulia i latou e mataitu ni lesona latou te aoaoina ma i le tala, e pei o le a le uiga o le liua i le talalelei a Iesu Keriso.
Ina ia faaaofia ai tagata o le aiga i le aoaoina mai le faataoto i le Samaria Agalelei, fai i se tasi e tusi se ata o se tasi o mea nei: se tagata gaoi, se faitotoa, se leoleo mamoe, se auauna (tagata faigaluega totogi), se luko, ma se mamoe. Valaaulia i latou e faitau le Ioane 10:1–18, 27–29, ona talanoaina lea o se aiga mea na aoao mai e le Faaola e uiga i mea sa latou tusia ata.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava Ia
Tagai mo ni upu ma fasifuaitau musuia. A o e faitau, atonu e aumai e le Agaga na upu patino po o fasifuaitau e musuia ma faaosofia ai oe pe foliga mai na tusia lava mo oe. Mafaufau e tusi soo se upu po o fasifuaitau e musuia ai oe i le Ioane 7--10.
Le Toe Leiloloa, saunia e Greg K. Olsenn