“22--28 Aperila Mataio 18; Luka 10: ‘Se a Se Mea Ou Te Faia Ou Te Maua Ai Le Ola Faavavau?’“ Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“22--28 Aperila. Mataio 18; Luka 10,” Sau, Mulimuli Mai ia te Au---Mo Tagata Taitoatasi ma Aiga 2019
O Le Samaria Agalelei, saunia e Dan Burr
22--28 Aperila
Mataio 18; Luka 10
“Se A Se Mea Ou Te Faia Ou Te Maua ai le Ola Faavavau?”
A o e faitauina ma le agaga tatalo ma manatunatu loloto i le Mataio 18 ma le Luka 10, mataitu ia uunaiga filemu a le Agaga Paia. O le a ia ta’u atu ia te oe pe faapefea ona faatatau nei aoaoga ma tala ia te oe. Tusifaamaumau lagona uunai e te mauaina.
Tusifaamaumau Ou Lagona Uunai
Pe a e fai atu se fesili i le Alii, e te ono maua se tali e te lei mafaufauina. O ai lo’u tuaoi? Soo se tasi e manaomia lau fesoasoani ma le alofa. O ai ea e sili i le malo o le lagi? O se tamaitiiti. Pe ua lava ea le faamagalo faafitu o se na faatausuai mai E leai, e tatau ona faafitugafulu ni fitu ona e faamagalo atu. (Tagai Luka 10:29–37; Mataio 18:4, 21–22.) Afai o e sailia le finagalo o le Alii, ia le “faafiatonu [oe lava]” (Luka 10:29), ae ona o lou manao moni e aoao mai ia te Ia, o le a aoao oe e le Alii i le ala e te ola ai i se ala e tau atu ai i le ola e faavavau faatasi ma Ia.
Manatu mo Suesuega Faaletagata Lava ia o Tusitusiga Paia
E tatau ona ou faamagalo i isi pe afai ou te manao ia maua le faamagaloga mai le Alii.
O le fautuaga a Peteru faapea e mafai ona ia faamagaloina faafitu se tasi atonu e foliga mai ua matua agalelei tele, ae na aoao atu e Iesu se tulafono maualuga atu. O Lana tali, “Ou te le fai atu ia te oe, seia atu fitu, a ia fitugafulu ni fitu,” e lei aoao atu e uiga i fuainumera ae o se uiga faa-Keriso o le faamagalo atu. A o e faitauina le faataoto i le auauna le alofa, manatunatu loloto i taimi na e lagonaina ai le alofa ma le alofa mutimutivale o le Atua. Pe i ai se tagata e manao ia lagonaina lou alofa ma le alofamutimutivale?
Na aoao mai e Elder E. Sorensen o le Fitugafulu: “Ou te fia manao e faamanino atu ole faamagaloina o agasala e le tatau ona fenumiai ma le tau onosaia o mea leaga. … E ui e tatau ona tatou faamagalo atu se tuaoi o se na faamanu’alia i tatou, e tatau lava ona tatou galulue feoeoea’i e puipuia mai le toe tupu mai o lena manu’a” (“Forgiveness Will Change Bitterness to Love,” Ensign po o le Liahona, May 2003, 12).
Tagai foi “Forgiveness,” Gospel Topics, topics.lds.org.
O ai Fitugafulu?
I le mulimuli ai i se mamanu sa faavaeina i taimi o le Feagaiga Tuai, (tagai Esoto 24:1; Numera 11:16), na “tofia [e Iesu Keriso] isi toafitugafulu,” e faaopoopo i Aposetolo e Toasefululua, e molimau ia te Ia, folafola le talalelei, ma lagolago atu ia te Ia i Lana galuega. O loo faaauau pea lenei mamanu i le Ekalesia toefuataiina. Ua valaauina Fitugafulu e fesoasoani i le Toasefululua i la latou misona o ni molimau faapitoa a Iesu Keriso i le lalolagi uma. Ua faatulagaina Fitugafulu i ni korama. O uso o korama muamua e lua e vaetofia o ni Fitugafulu o le Pulega Aoao, a o uso o isi korama e vaetofia o ni Fitugafulu Eria. (Tagai foi MFF 107:25–26, 33–34, 97.)
Ina ia maua le ola e faavavau e tatau ona ou alofa i le Atua ma alofa i lo’u tuaoi e pei o a’u lava.
E fesoasoani le manatua o le faataoto i le Samaria agalelei o le auala lea na tali atu ai Iesu i se fesili: “O ai lo’u tuaoi?” A o e faitauina lea faataoto, ia manatua lena fesili. O a tali ua e maua?
I ona po o Iesu, sa tele seneturi na i ai le feitaga’i i le va o Iutaia ma tagata Samaria. O tagata Samaria o ni e tupuga mai Iutaia sa nonofo i Samaria oe sa fenonofoa’i ma tagata o Nuuese. Sa manatu Iutaia ua leaga tagata Samaria i lo latou faapaaga ma Nuuese ma ua latou liliuese ai. E faimalaga tagata Iutaia i le tele o maila ina ia alofia ai lo latou ui atu i Samaria. (Tagai foi Luka 9:52–54; 17:11–18; Ioane 4:9; 8:48.)
O le a sou manatu aisea na filifili ai e le Faaolaia Samaria, o se sa inosia e Iutaia, e fai ma faataitaiga o le lotoalofa ma le alofa i se tuaoi? O le a se mea o musuia ai oe i lenei faataoto e fai e faaalia ai le mutimutialofa tele i isi?
Tagai foi Mosaea 2:17; “Parable of the Good Samaritan” (video, LDS.org); “Lord, I Would Follow Thee,” Hymns, no. 220.
Tatou te filifili “lena mea lelei” i le faia o filifiliga e tau atu i le ola e faavavau.
Na aoao mai e Sister Bonnie D. Parkin, o se Peresitene Aoao o le Aualofa ua mavae: “O Maria ma Mareta o oe lea ma a’u. … E alolofa le toalua lenei i le Alii ma sa mananao e faali atu lena alofa. I le taimi lea, e foliga mai sa faaali atu e Maria lon alofa e ala i le faalogologo i Lana upu, a o Mareta sa faaali atu lona i le tautuaina o Ia. … E lei faapasia e Iesu le popolega o Mareta, ae sa ia toetata’i lana tulimata’iga i le faapea atu e filifili “lena mea lelei.’ O le a la lena mea?… O le mea e tasi e manaomia o le filifili lea o le ola e faavavau (tagai 2 Nifae 2:28]. Tatou te filifili i aso taitasi” (“Filifiliaina o le Alofa Moni: O Lea Mea Lelei,” Ensign po o le Liahona, Nov. 2003, 104). E faapefea ona e aoteleina le fautuaga a le Alii ia Mareta i au lava upu? Iloilo le faasologa o lau fuafuaga---pe o i ai se mea “e manaomia” e tele atu se mataituuga e tuu i ai
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina faatasi ma lou aiga ia mau, e mafai ona fesoasoani le Agaga ia te oe e iloa ai po o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga nei:
O a ni viiga e mafai ona usu e lou aiga lea e faia i upumoni na aoao i nei mataupu? O faataitaiga e lua o “Lord, I Would Follow Thee” and “Have I Done Any Good?” Hymns, nos. 220, 223, ae e tele isi. E fesoasoani faapefea upu o nei viiga i lou aiga e malamalama atili ai i aoaoga a le Faaola?
Aisea e manao ai Iesu ia tatou avea faapei o se tamaitiiti? O a ni uiga o tamaiti e avea atili ai i tatou faapei o Keriso pe a tatou tuuina i o tatou olaga? (tagai Mosaea 3:19).
E finagalo Iesu i Ona soo ia avea e faapei o tama iti.
O le a se mea e mafai ai ona olaola le faataoto i le Samaria agalelei mo lou aiga? Mata e fiafia e fai ni ofu e faatino ai? Ia mautinoa ua vaai tagata o le aiga i le ala e mafai ai ona avea i latou o ni Samaria agalelei. Pe o i ai se tasi e manaomia se fesoasoani ile aoga po o le lotu atonu tatou te le o amanaiaina? O le a se mea e mafai ona tatou fai i lea tagata?
Pe faigata ea ona tuu mea faaleagaga i le fuafuaga o mea fai a lou aiga? O le tala ia Maria ma Mareta e mafai ona musuia ai se fono faaleaiga po o se afiafi faaleaiga i le ala e fai ai lenei mea. I le avea ai o se aiga, e mafai ona e faia se lisi o auala e filifili ai lena mea lelei” (tagai Luka 10:42).
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Faafailele se siosiomaga alofa. O lagona o tagata o le aiga ma le ala e taulima ai e le tasi le isi e mafai ona matua tosina ai le agaga i lo outou fale. Fesoasoani i tagata uma o le aiga e fai a latou vaega ile atinaeina o se aiga alofa, ma le faaaloalo ina ia lagona ai e tagata uma le saogalemu e fefaasoaai aafiaga, fesili, ma molimau. (Tagai Aoao Atu i le Ala a le Faaola, 15.)
Keriso i le Fale o Maria ma Mareta, saunia e Walter Rane