O Le Samaria Agalelei, saunia e Walter Rane

Aperila 22–28.

Mataio 18; Luka 10

“Se a Se Mea Ou Te Faia Ina ia Ou Maua ai le Ola e Faavavau?”

O a upumoni i le Mataio 18 ma le Luka 10 e manaomia ona aoao e tamaiti? Faalogologo mo uunaiga mai le Agaga Paia a o e faitauina nei mataupu. Sau, Mulimuli Mai ia te Au—Mo Tagata Taitoatasi ma Aiga e mafai ona fesoasoani e te malamalama ai i le aoaoga faavae, ma o le otootoga lenei e mafai ona avatu ai ia te oe manatu pe faapefea ona aoao atu nei upumoni.

Tusifaamaumau Ou Lagona Uunai

Valaaulia le Fefaasoaai

Fai i tamaiti e faasoa mai pe na faapefea ona latou faamanatuina le Togiola a Iesu Keriso i le Eseta.

Aoao atu Aoaoga Faavae

Tamaiti Laiti Ifo

Mataio 18:21–35

E tatau ona ou faamagalo atu i isi e le aunoa.

A o e faitauina le Mataio 18:21–35, mafaufau i ou lava aafiaga i le faamagalo atu ma pe o a mea e manaomia ona iloa e tamaiti e uiga i lenei mataupu faavae.

Gaoioiga e Mafai Ona Fai

• Faitau le Mataio 18:21, ma valaaulia tamaiti e fai atu “Ou te faamagaloina oe” faafitu. Fesili, “Pe ua lava le faafitu ona faamagalo atu?” Faitau le fuaiupu 22 ma faamalamalama e manao Iesu ia tatou filifili e faamagalo atu e le aunoa.

• Faamatala le faataoto i le auauna le alofa (tagai Mataio 18:23–35). Afai e tatau ai, faamalamalama a fai mai e se tasi se mea leaga ia i tatou, atonu o le a tatou lagonaina le ita po o le faanoanoa muamua. Ae o le faamagalo atu o lona uiga e mafai ona tatou toe lagonaina le filemu. (E mafai ona lagona ua uunaia oe e fesoasoani ia malamalama tamaiti afai e faatiga i latou e se isi, e tatau ona latou ta’u atua i o latou matua po o se tasi tagata matua faatuatuaina.)

• Tusi le Ua ou faamagaloina oe i le laupapa, ma ta’u atu i tamaiti e mafai ona fesoasoani nei upu e liliu ai taimi faanoanoa i taimi fiafia. Tusi se ata o foliga faanoanoa i le laupapa, ma faasoa ni nai faataitaiga o tamaiti o fefaamagaloa’i. A uma faataitaiga taitasi, valaaulia se tamaitiiti e sui le foliga faanoanoa i se foliga fiafia.

• Usu faatasi ma tamaiti le “Fesoasoani Mai Ia Te Au Tama Pele,” Tusipese a Tamaiti, 52. Fai i ai e tutu i luga pe a latou faalogo i le upu fesoasoani. Faasoa atu lau molimau o le a fesoasoani le Tama Faalelagi ia i tatou e faamagalo atu i isi.

Luka 10:25–37

Na aoao mai au e Iesu ou te vaai atu i tagata uma o o’u lava tuaoi ma alofa ia i latou.

O le faataoto i le Samaria agalelei o se tala e manatua pea lea e mafai ona faaali mai i tamaiti po o ai o tatou tuaoi. Mafaufau i ni auala e mafai ona e musuia ai tamaiti e “alu ma ia faapea ona fai …“ (Luka 10:37).

Gaoioiga e Mafai Ona Fai

• Fesili i tamaiti taitoatasi, “O ai lou tuaoi?” Faamalamalama atu na aoao mai Iesu o soo se tasi lava e manaomia la tatou fesoasoani o so tatou tuaoi foi, tusa lava pe le nofo latalata mai, ma e tatau ona tatou taulimaina tagata taitoatasi ma le alofa.

• Faitau le Luka 10:25–37 a o faatino mai e tamaiti le faataoto i le Samaria agalelei, feauauai i le faatinoina o vaega eseese. A uma faatinoga taitasi, fai i ai e faasoa mai pe mafai faapefea ona latou faapei o le Samaria agalelei.

• Tusi ni nai faataitaiga o tulaga e manaomia ai e se tagata se fesoasoani, ma nana ia pepa faataamilo i le potu. Fai i tamaiti e sue pepa ma faamalamalama mai pe mafai faapefea ona latou faaalia le agalelei i le tagata o i ai i lena tulaga.

• Usu faatasi ma tamaiti le “Fetalai Mai Iesu E Alofa I Tagata Uma” ma le “O Le Agalelei E Amata Ia Te Au,” Tusipese a Tamaiti, 39, 83. Vaevae tamaiti i ni paga, ma valaaulia paga taitasi e mafaufau i ni nai auala e mafai ai ona latou faaali atu le alofa po o le agalelei i isi. Fai i paga taitasi e faasoa mai o latou manatu i le vasega.

• Fai i paga taitasi e tusi i lalo auala e mafai ona latou faaali atu ai le alofa mo isi i nai fasipepa laiti. Fai se fllifili pepa mai nei fasipepa ma valaaulia tamaiti e faatautau le filifili pepa i o latou fale, i se mea e mafai ona faamanatu atu ai ia i latou ia agalelei.

Aoao atu Aoaoga Faavae

Tamaiti Matutua Atu

Mataio 18:21–35

O le a faamagalo a’u e le Tama Faalelagi pe a ou faamagalo atu i isi.

A o faasolo ina matutua tamaiti, atonu o le a faigata atu ona faamagalo atu. O le faataoto i le auauna le alofa e mafai ona avea o se ala e le galo e aoao atu ai i latou e manao le Tama Faalelagi ia tatou faamagalo atu i tagata uma.

Gaoioiga e Mafai Ona Fai

• Faitau faatasi ma tamaiti le Mataio 18:23–35 faamalamalama o le alii po o le upu ua faatusa i le Tama Faalelagi, o le auauna ua faatusa ia i tatou, ma o le uso a auauna ua faatusa ia i latou o e faatiga mai ia i tatou. Fesili i tamaiti, “O anafea na faigata ai ia te oe ona faamagalo atu i se tasi? Na faapefea ona e lafoai ese na lagona tiga? O anafea na e manaomia ai le faamagaloina ona o se filifiliga sese?”

• Faaali le vitio “Forgive Every One Their Trespasses: The Parable of the Unmerciful Servant” (LDS.org)

• Tusi i le laupapa le faatele 70 × 7, ma fesoasoani i tamaiti e tali. Fai i se tasi e faitau le Mataio 18:21–22, ma faamalamalama sa faaaoga e Iesu lenei fuainumera e aoao ai i tatou e tatau lava ona tatou faamagalo atu e le aunoa.

• Tuu atu i tagata uma se fasipepa, ma valaaulia tamaiti e tusi se ata o se tamaitiiti ua agaleaga i se isi tamaitiiti. Ona fai atu lea i ai e faafesuiai a latou pepa ma o latou tuaoi ma tusi ai i tua o le pepa fou se auala e mafai ai ona faaali atu le lotofaamagalo i isi.

• Fai i tamaiti e fesoasoani atu ia e mafaufau i ni nai tulaga e ono manaomia ai e se tagata ona faamagalo atu i se isi tagata. Valaaulia tamaiti e faatino mai pe faapefea ona e faaali atu le lotofaamagalo i na tulaga.

• Usu faatasi ma tamaiti le “Fesoasoani Mai Ia Te Au Le Tama Pele,” Tusipese a Tamaiti, 92. Fesoasoani i tamaiti ia malamalama i laina taitasi o le pese ma mea o loo aoao mai e uiga i le faamagalo atu o isi.

Luka 10:30-37

E mafai ona ou alofa ma auauna atu i isi, aemaise i latou e manaomia.

Manatunatu loloto i taimi i lou lava olaga sa avea ai se tasi ma “Samaria agalelei” ia te oe. E mafai faapefea ona e musuia tamaiti ia avea ma “Samaria agalelei” i isi?

Gaoioiga e Mafai Ona Fai

• Tofitofi atu i tamaiti taitasi se vaega o le faataoto i le Samaria agalelei e tusi se ata. Valaaulia i latou e tuufaatasi ata i le faasologa ma faaaoga e faamatala ai le tala.

• Faamalamalama i tamaiti o tagata Iutaia e matua le fiafia lava tagata Samaria ma a oo la ina latou faimalaga mai Ierusalema i Kalilaia, latou te ui mamao ese mai Samaria ina ia le fetaui ai ma ni tagata Samaria (tagai Faafanua ole Tusi Paia, nu. 1, “Faafanua Faaletino o le Nuu Paia”). Aisea ua faaaoga ai e Iesu se tagata Samaria o se faataitaiga o le agalelei i lenei faataoto? O le a se mea ua aoao mai e lenei tala e uiga i le fesoasoani atu i isi e manaomia? (Tagai foi i le Mosaea 4:16–22.)

• Fai i tamaiti e faasoa mai se aafiaga ina ua i ai se tagata na faapei o le Samaria agalelei ia te i latou.

• Lu’i tamaiti e faatu se sini ia faapei o le Samaria agalelei i lenei vaiaso. Mo se faataitaiga, pe o latou iloaina se tasi o ma’i pe tuuatoatasi? po o se tasi e seasea sau i le lotu? Fesili i tamaiti pe mafai faapefea ona latou fesoasoani i lena tagata.

Fautuaina le Aoaoina i le Aiga

Valaaulia tamaiti e faasoa atu i o latou aiga a latou sini ia avea o se Samaria agalelei i lenei vaiaso.

Faaleleia o Lo Tatou Aoao Atu

Aoao atu tamaiti ia tusifaamaumau o latou lagona uunai. Afai e mafai e tamaiti ona aoao le mausa o le tusifaamaumau o lagona uunai, o le a fesoasoani ia i latou e iloa ai ma mulimuli i le Agaga. E mafai ona tusifaamaumau e tamaiti ia lagona uunai i le makaina lea o tusitusiga paia, tusi ia ata, pe fai ni faamatalaga faigofie i a latou tusitalaaga.