O Le Liuaina, saunia e Carl Heinrich Bloch.

Aperila 1–14.

Mataio 16–17; Mareko 9; Luka 9

“O Oe o le Keriso”

A o e manatunatu loloto i mataupu o le Feagaiga Fou ma faalogologo i savali o le konafesi aoao, mata’itu ia savali e te manatu e manaomia e tamaiti o lau vasega.

Tusifaamaumau Ou Lagona Uunai

Valaaulia le Fefaasoaai

Afai sa faalogologo pe matamata tamaiti o lau vasega i le konafesi aoao, valaaulia i latou e faasoa mai se mea sa latou faalogo ai pe vaai foi i ai.

Aoao atu Aoaoga Faavae

Tamaiti Laiti Ifo

Mataio 16: 13–17

E mafai ona maua sa’u molimau o Iesu Keriso o le Alo o le Atua

Mafaufau pe mafai faapefea ona e faaaogaina le molimau a Peteru ma le tali a Iesu e aoao atu ai le fanau pe o le a le molimau ma musuia i latou e sailia sa latou lava.

Gaoioiga e Mafai Ona Fai

• Fai i tamaiti e faalogologo po o a tala a Peteru a o e faitauina le Mataio 16:15–17. (Tagai foi “Mataupu 32: Ua Molimau Atu Peteru e uiga i le Keriso,” Tala o le Feagaiga Fou, 76–77, po o le vitio e o faatasi ai i luga o le LDS.org.) Faamalamalama atu sa tuuina atu e Peteru lana molimau e uiga ia Iesu Keriso. Toe faitau fuaiupu. (Pe toe faaali le vitio.) O le taimi lenei fai i tamaiti e faalogologo pe o ai na ta’u atu ia Peteru o Iesu o le Keriso le Alo o le Atua.

• Tuu atu lau molimau e uiga ia Iesu Keriso, ma faamalamalama pe na faapefea ona e mauaina. Valaaulia tamaiti e sailia a latou lava molimau mai le Tama Faalelagi.

Mataio 16:15–19

Ua avatu e Iesu Keriso i perofeta ma aposetolo ia ki o le perisitua e taitai ai Lana Ekalesia.

Sa faatusaina e le Faaola ia faaaliga i se papa ma ki o le pule o le perisitua. E mafai faapefea ona e faaaogaina nei faatusatusaga e fesoasoani ai i tamaiti ia faatuatua i e o taitaia Lana Ekalesia?

Gaoioiga e Mafai Ona Fai

• Faaali i tamaiti se maa a o e faitauina faatasi ma i latou le Mataio 16:18 Toe fai faatasi ma i latou le fasifuaitau “Ou te ati ae foi la’u ekalesia i luga o lenei papa,” faaopoopo i ai ni taga e o faatasi ma upu. Faamalamalama o le Ekalesia ua fausia i luga o le “papa” o faaaliga.

• Faaali i tamaiti ni ki ma fesili i ai po o le a le mea e faaaoga i ai ki. Faamatala atu na maua e Peteru ma isi Aposetolo ki o le perisitua mai ia Iesu. O nei ki ua “tatala” mai ai faamanuiaga mo i tatou ma tatala ai foi le ala i le lagi. Mo se faataitaiga, o ki o le peiristua ua mafai ai ona tatou papatiso aai ma feinu i le faamanatuga. Tuu atu i tamaiti ni ki pepa, ma fai i ai e tusi ai ni faamanuiaga ua “tatala” mai e ki o le perisitua.

• Faaali atu se ata o le Peresitene o le Ekalesia, ma tuu atu lau molimau o loo ia umia ki o le perisitua i aso nei, e pei foi ona sa faia ai e Peteru.

Na tuu atu e Iesu ia ki o le perisitua ia Peteru

Mataio 17:19–20

E mafai e lo’u faatuatua ona faia vavega.

A e faitauina le folafolaga a Iesu e faapea o le faatuatua e faapei o le fatu o le sinapi e mafai ona fulia se mauga, o a lagona uunaia e te maua e uiga i tamaiti o loo e faiaoga ai?

Gaoioiga e Mafai Ona Fai

• Valaaulia tamaiti e feauauai e tusi ni mauga tetele ma ni tama’i fatu i le laupapa a o e faitauina faatasi ma i latou le Mataio 17:19–20. Faamalamalama ia e tatau ona tatou fuliesea o mea masani lava e foliga e faigata ia i tatou ona fai. O a ni mea e mafai ona lagonaina ua pei o ni mauga ia i tatou? Faaaoga le itulau o gaoioiga o lenei vaiaso e fesoasoani ai i tamaiti e mafaufau pe mafai faapefea e le faatuatua ona faia mea e manao le Atua latou te faia.

• Tuu se ata o se mauga i le tasi itu o le potu, ma tusi ai i luga upu e pei o le fefe, masalosalo, po o le popole. Fai i tamaiti e ta’u mai ni mea e mafai ona latou faia ia maua atili ai le faatuatua ia Iesu Keriso. Tuu atu i tamaiti taitasi o e ta’ua maia se mea na te sii ai le mauga faalatalata i le isi itu o le potu. Faitau le Mataio 17:19–20, ma molimau atu i le mana o le faatuatua i lou olaga.

• Fai i tamaiti e usu le “Faatuatua” Tusipese a Tamaiti, 50, ona tuu atu lea i tamaiti taitasi se fatu e ave i le fale. Valaaulia i latou e toto le fatu i se mea e mafai ona latou matauina a o ola ae e fesoasoani latou te manatua ai ia faatuatua i le Tama Faalelagi ma Iesu Keriso.

Aoao atu Aoaoga Faavae

Tamaiti Matutua Atu

Mataio 16:13–17

O se molimau ia Iesu Keriso e maua e ala mai i faaaliga mai le lagi.

E mafai faapefea ona fesoasoani le molimau a Peteru o i le Mataio 16:13–17 i tamaiti a o latou fausiaina a latou molimau?

Gaoioiga e Mafai Ona Fai

• Fesili i tamaiti pe o le a sa latou tala pe a fesili atu se tasi, “O ai Iesu?” Valaaulia tamaiti e faitau le Mataio 16:13–17 e iloa ai pe na faapefea ona tali atu Peteru i lena fesili. Na faapefea ona maua lana molimau ia Iesu? O a ni mea e mafai ona tatou faia e faamalosia ai a tatou molimau?

• Fesoasoani i tamaiti e faatusatusa le ala tatou te iloa ai upumoni faaleagaga ma ala tatou te iloa ai isi upumoni. Mo se faataitaiga, e faapefea ona tatou iloa pe o le a le umi o se tagata po o a uiga o le tau? E faapefea ona tatou iloa o Iesu Keriso o le Alo o le Atua?

• Tuu atu lau molimau ia Iesu Keriso, ma lu’i tamaiti ia maua pe faamalolosia a latou lava molimau.

Mataio 16:15–19

O le Ekalesia a Iesu Keriso o loo taitaia e i latou o e umia ki o le perisitua.

O le suesueina o le Mataio 16:15–19 e mafai ona fausia ai le faatuatua o tamaiti e faapea O Le Ekalesia a Iesu Keriso o le Au Paia o Aso e Gata Ai o se toefuataiga o le Ekalesia lava e tasi na faavaeina e Iesu a o nofo ai i lenei lalolagi.

Gaoioiga e Mafai Ona Fai

• Tusi le Mataio 16:19 i le laupapa, aveese ni nai upu, e aofia ai ma le upu “ki.” Fai i tamaiti e sue upu o loo misi.

• Faaali le vitio “Ki o le Perisitua: O Le Toefuataiga Mai o Ki o le Perisitua” (LDS.org) pe toeiloilo le faamatalaga e uiga i ki o le perisitua o i le Faamaoni i le Faatuatua, 126–27. O a ki o le perisitua? E faapefea ona pei ki o le perisitua o ki mao’i?

• Fesoasoani i tamaiti e lisi i le laupapa ia tagata o i ai ki o le perisitua. (Faamaoni i le Faatuatua, 126–27, o loo i ai se lisi e mafai ona fesoasoani ia i latou.) Valaaulia se tasi i lau uarota o loo umia nei ki e talanoa i le vasega e uiga i le taua o ki o le perisitua.

• Nana ni ki (po o ata o ki) i le potu, ma valaaulia tamaiti e sue mai. A maua uma ki, fesoasoani ia latou e mafaufau i faamanuiaga tatou te olioli ai ona o ki o le perisitua (mo se faataitaiga, aiga e faavavau, papatisoga, ma le faamanatuga).

Luka 9:28–36

O Iesu Keriso o le Alo o le Atua.

O le Liuaina o Keriso o se tasi o nai taimi i tusitusiga paia na faalogoina ai le siufofoga o le Atua o molimau mai i Lona Alo Pele. O le suesueina o lenei tala ma tamaiti e mafai ona fausia ai lo latou faatuatua ia Iesu Keriso.

Gaoioiga e Mafai Ona Fai

• Valaaulia tamaiti e tusi ni ata o le Liuaina o Keriso, e pei ona maua i le Mataio 17:1–9. Fai atu ia i latou e faamalamalama a latou ata i le tasi ma le isi. (Tagai foi otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga.)

• Tuu i tamaiti se taimi e manatunatu loloto ai pe o le a se mea o aoao atu e lenei tala ia i latou e uiga ia Iesu Keriso. Valaaulia ni nai tamaiti e tusi o latou mafaufauga i luga o le laupapa. Valaaulia ni nai tamaiti e faasoa mai pe na faapefea ona latou iloa o Iesu Keriso o le Alo o le Atua.

Fautuaina le Aoaoina i le Aiga

Valaaulia tamaiti e fesili i o latou matua po o isi tagata o le aiga pe na faapefea ona maua a latou molimau ia Iesu Keriso.

Faaleleia o Lo Tatou Aoao Atu

Faaaoga musika. E mafai ona fesoasoani pese a le Peraimeri ma viiga i tamaiti o vaitausaga uma e malamalama ai ma manatua upumoni o le talalelei. O le usu o pese e mafai ai foi ona faagauai atoatoa mai tamaiti i se aafiaga e aoao ai. (Tagai Aoao Atu i le Ala a le Faaola, 22.)