Aperila 15–21.

Eseta

“Le Tuugamau e, O Fea o i ai Lou Manumalo?”

Faaaoga lou taimi ma tamaiti e fesoasoani ai ia latou vaai i le Eseta o se vaitau e olioli ai i le Faaola ma faaloloto ai lo latou lotofaafetai mo Lana taulaga. O manatu o i lenei otootoga e mafai ona fetuunai e fesoasoani ai ia te oe e aoao tamaiti o soo se vaitausaga.

Tusifaamaumau Ou Lagona Uunai

Valaaulia le Fefaasoaai

Ina ia fesoasoani i tamaiti e faasoa mai mea ua latou iloa e uiga ia Iesu Keriso ma Lana Togiola, e mafai ona e faaali atu ata o le Faaola i Ketesemane, i luga o le satauro, ma ina ua mavae Lona Toetu (tagai i le ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma le Tusi Ata o le Talalelei, nu. 56, 57, 58, 59, ma 60).

Aoao atu Aoaoga Faavae

Tamaiti Laiti Ifo

O Iesu Keriso o lo’u Faaola

A o e faitau e uiga i le Togiola a Iesu Keriso, manatunatu loloto pe mafai faapefea ona e fesoasoani i tamaiti ia lagonaina le tele o le alofa o Iesu ia i latou.

Gaoioiga e Mafai Ona Fai

• Aoao tamaiti ona ua tatou agasala uma, ua le mafai ai ona tatou toe foi atu i le Atua e aunoa ma se Faaola o le sa puapuagatia mo a tatou agasala. E mafai e Iesu Keriso ona laveai i tatou mai a tatou agasala pe afai tatou te salamo. Uu i luga se faaata, ma tuu i tamaiti e feauaua’i e tilotilo i ai. A o faia e tamaiti taitasi, fai atu i ai, “E alofa Iesu i a[ta’u le igoa o le tamaitiiti], ma e mafai e Ia ona laveai [igoa o le tamaitiiti].”

• Faaali se ata o Iesu o loo Tatalo i Ketesemane (Tusi Ata o le Talalelei, no. 56) a o e faamatalaina le tala ia Iesu o loo puapuagatia i Ketesemane mo agasala a le lalolagi (tagai Mataio 26:36–46; Luka 22:39–44) Faamalamalama atu ona o Lona puapuagatia, ua mafai ai ona faamagaloina i tatou pe a tatou faia se filifiliga sese. E mafai ona e faaaogaina le “Mataupu 51: Ua Puapuagatia Iesu le Faatoaga o Ketesemane,” Tala o le Feagaiga Fou, 129–32, po o le vitio e o faatasi ai (LDS.org).

• Usu faatasi le “Le Alofa o Lo’u Faaola,” Tusipese a Tamaiti, 42. O a upu o le pese ua faamatala ai le alofa o le Faaola? Fesili i tamaiti pe mafai faapefea ona latou fesoasoani i isi ia lagona le alofa o le Faaola.

Ona sa toetu Iesu, o lea ua mafai ai ona ou toe ola foi.

E mafai faapefea ona e fesoasoani i tamaiti ia malamalama faapea ona o Iesu Keriso, o le a toetutu ai foi i tatou ma e pele ia i tatou i se aso?

Gaoioiga e Mafai Ona Fai

• Aoao i le fanau le tala o le Eseta e faaaoga ai ata o Keriso i Ketesemane, luga o le satauro, ma ina ua mavae Lona Toetu, o loo maua i le Tusi Ata o le Talalelei (nu. 56, 57, 58, 59, ma le 60), ma le ata o i le itulau atoa o le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Tuu atu i ni nai tamaiti e uu i luga ia ata a o e faamatalaina le tala. Ta’u i tamaiti e uiga i nai tagata sa vaai ia Iesu ina ua toetu o Ia, e pei o Maria (tagai Ioane 20:1–18) po o Toma (tagai Ioane 20:24–29).

• Sue pe iloa e tamaiti le mafuaaga ua tatou faamanatu ai le Eseta. Faamalamalama o le Eseta tatou te faamanatuina ai le aso aupito taua i le talafaasolopito—o le aso na toetu ai Iesu Keriso. Fesili pe i ai ni tamaiti e fia faasoa maia mea e fai e o latou aiga e manatua ai le Toetu o Iesu Keriso.

• Faamalamalama o le toetu o lona uiga o le toe ola pe a mavae ona tatou oti. Tuu atu lau molimau e faapea ona o Iesu Keriso, o le a tatou toetutu ai—o le a tatou toe ola pe a mavae ona tatou oti, ma o le a tatou le toe oti lava.

• Faaaoga se totinilima e aoao atu ai tamaiti e tofu uma i tatou ma se tino (e faatusa i le totinilima) ma se agaga (e faatusa i se lima). A tatou oti, e ola pea o tatou agaga, ae leai o tatou tino. A tatou toetutu, ona toe o mai faatasi ai lea o o tatou agaga ma tino. Tuu i tamaiti e feauauai e faamaulu le totinilima ma toe aveese.

• Usu faatasi se pese o le Eseta e pei o le “Pe Na Toe Soifua Moni Mai Ea Iesu?” po o le “Ua Toetu Iesu,” Tusipese a Tamaiti, 45, 44, ma faaali atu i tamaiti ata o Iesu ina ua mavae Lona toetu (Tusi Ata o le Talalelei, nu. 59, 60, 61).

• Faaali atu se ata o se tasi e te iloa ua oti. Faasoa atu lau molimau o le a toetu o ia ona o le Togola ma le Toetu o Iesu Keriso.

• Matamata faatasi le vitio “Jesus Is Resurrected” po o le “The Risen Lord Appears to the Apostles” (LDS.org). E mafai ona maua savali faaopoopo o le Eseta i le mormon.org/easter.

Ua Toetu o Ia, saunia e Greg Olsen

Aoao atu Aoaoga Faavae

Tamaiti Matutua Atu

Sa puapuagatia Iesu Keriso mo au i Ketesemane ma luga o le satauro.

A o e suesue i le Togiola a le Faaola, mafaufau pe mafai faapefea ona e fesoasoani i tamaiti e aoao ma manatua na puapuagatia Keriso i Ketesemane ma luga o le satauro mo a latou agasala, ma’i, ma faanoanoaga.

Gaoioiga e Mafai Ona Fai

• Faitau faatasi ma tamaiti le Luka 22:39–44 ma fuaiupu filifilia mai le Mataio 27:29–50. Valaaulia i latou e vaavaai mo upu e fesoasoani ai ia i latou ia malamalama i mea na oo i ai le Faaola i Ketesemane ma luga o le satauro.

• Fesoasoani i tamaiti e tauloto le mataupu faavae lona tolu o le faatuatua. Tuu atu lau molimau o Iesu Keriso o loo i ai le mana e laveai ai i tatou mai agasala ma mai le oti.

• Fesoasoani i tamaiti e sauniuni ni lauga pupuu e uiga i le Togiola a Iesu Keriso e mafai ona latou faasoa atu i isi. Fautuaina i latou e faaaofia ai ma se mau i a latou molimau i a latou lauga. Afai latou te manaomia se fesoasoani faaopoopo, e mafai ona latou faitau mai le “Togiola a Iesu Keriso” i le Faamaoni i le Faatuatua (14–21).

Ona na maliu Iesu ma sa toetu mai, o le a ou toe ola ai foi.

O tamaiti o loo e faiaoga ai o le a i ai se aso e oti ai foi se e pele pe afai e lei tupu mai lena mea. Ia faamalamalama atu ona ua toetu Iesu Keriso, o le a faapea foi ona tatou toetutu uma ai.

Gaoioiga e Mafai Ona Fai

• Faaali le Tusi Ata o le Talalelei, nu. 57, 58, ma le 59, ma fai i tamaiti e faafetaui ia ata ma fasifuaitau nei: Mataio 27:29–38, 59–60; Ioane 20:10–18.

• Valaaulia tamaiti e faitau taitoatasi le “Toetu” i le Bible Dictionary ma tusi ni fesili suesue e mafai ona latou fesili ai e uiga i mea o latou faitauina. Tuu atu i tamaiti se taimi e fesili ai le tasi i le isi i a latou fesili ma sue faatasi ia tali.

• Fesoasoani i tamaiti e vaavaai i le faasino autu o le Tusipese a Tamaiti e sue ai se pese latou te mananao e aoao ai e uiga ia Iesu Keriso po o le Toetu. Usuusu faatasi le pese mo ni nai taimi. Fesili i le vasega po o a mea na latou aoaoina mai lenei pese.

• A o lei amataina le vasega, valaaulia ni nai tamaiti e o mai sauniuni e faasoa mai a latou molimau e uiga i le Togiola a le Faaola ma le Toetu. Valaaulia tamaiti e tusi i lalo a latou molimau e faasoa i le fale.

Fautuaina le Aoaoina i le Aiga

Ina ia fesoasoani i tamaitii e faasoa atu i o latou aiga mea sa latou aoaoina, fautuaina i latou e usu se pese e uiga ia Iesu Keriso i le fale i le vaiaso lenei.

Faaleleia o Lo Tatou Aoao Atu

E manuia tamaiti i le faifaafia. Aua le fefe e faifaafia ia gaoioiga, aemaise ma tamaiti laiti ifo. O le faifaafia o le a fesoasoani i tamaiti e manatua ai mea e te aoao atua.