15--21 Aperila

Eseta

“Le Tuugamau e, O Fea o i ai Lou Manumalo?”

A o e faitauina molimau i le Toetu o le Faaola i lenei otootoga, ia matau lagona ma uunaiga e te maua mai le Agaga Paia.

Tusifaamaumau Ou Lagona Uunai

I le vaiaso faaiu o le soifuaga o le Faaola, e tele Iutaia na vagavagaia o Ia sa auai i le faatinoga o tu ma aga o le Paseka. Sa latou saunia meaai, lagiina pese, ma sa faapotopoto faatasi e manatua ai le laveaiina o le aiga o Isaaelu mai le nofopologa ia Aikupoto. Sa faalogologo aiga i le tala i le agelu o le faafanoga na pasi a’e i luga o fale o o latou tuaa, o e sa faailogaina o latou faitotoa i le toto o le tamai mamoe. E ui ina matua faatumulia nei faafiafiaga i faailoga o le laveaiiga, ae e toaitiiti lava i latou na iloa o Iesu Keriso, o le Tamai Mamoe a le Atua, ua toeitiiti ona laveaiina lea o i latou mai le nofopologa ai i le agasala ma le oti---e ala i Lona puapuagatia, o Lona maliu, ma Lona Toetu. E ui foi i lea, sa i ai foi i latou o e sa iloaina Iesu o lo latou Mesia folafolaina, o lo latou Faaola e faavavau. Mai lava i lena aso, sa tuuina mai ai lava e soo o Iesu Keriso ia molimau i le lalolagi uma “na maliu Keriso ma sui o a tatou agasala … ; na tanu foi o ia, ma toe tu mai i le aso tolu” (1 Korinito 15:3–4).

Manatu mo Suesuega Faaletagata Lava Ia

Mataio 21-28

Ua i ai ia Iesu Keriso le mana e fesoasoani ia te au e faatoilalo le agasala, oti, tofotofoga, ma vaivaiga

O se tasi auala e taulai atu ai i faamanuiaga o le Togiola a le Faaola i lenei vaiaso, o le faaalu lea o se taimi i aso taitasi e faitau ai e uiga i le toe vaiaso o le soifuaga o Iesu (o se faasologa lea o le faitauga e mafai ona fai). O a mea ua e maua i nei mataupu ua fesoasoani e te lagonaina ai le alofa o le Faaola? O le a le mea ua e aoao e uiga i Lona mana e laveai mai ai oe mai le agasala ma le oti? O le a se mea ua e aoao e uiga i le onosaia o tofotofoga ma faatoilalo ia vaivaiga? O faapefea ona e faaaogaina le faatuatua i Lona mana e laveai ai?

• Aso Sa: O le ulu atu logologoa i Ierusalema (Mataio 21:6--11)

• Aso Gafua: Faamamaina o le malumalu (Mataio 21:12–16)

• Aso Lua: Aoao atu i Ierusalema (Mataio 21–23)

• Aso Lulu: Faaauau ona aoao atu (Mataio 24–25)

• Aso Tofi: O le Paseka ma puapuaga o Keriso i le Faatoaga o Ketesemane (Mataio 26

• Aso Faraile: Faamasinoga, Faasatauroga, ma le tanuga (Mataio 27:1--61)

• Aso Toonai: Ua taoto le tino o Iesu i le tuugamau (Mataio 27:62–66) a o galue Lona agaga i le lalolagi o agaga (MFF 138)

• Aso Sa: O le faaali mai o le Keriso toetu (Mataio 28:1–10)

O Le Tausamaaga Mulimuli, saunia e Carl Heinrich Bloch

Mataio 28:1–10; Luka 24:13–35; Ioane 20:19–29; 1 Korinito 15:1–8, 55

Ua tuu atu e Paulo le faamaoniga o le Toetu o Iesu Keriso.

Manatu pe mata o a ni lagona o le au soo i le matamata atu ia Iesu o tauemuina, soona faia, ma faasatauroina. Sa latou molimauina Lona mana, sa lagonaina le moni o Ana aoaoga, ma sa faatuatua ia te Ia o le Alo o le Atua. O le molimauina o Lona maliu atonu o se tofotofoga o le faatuatua o nisi, ae e lei pine ae avea i latou ma molimau i le vavega sili o Lona Toetu.

O le a se mea ua mafai ona e aoao mai tala a i latou o e sa molimauina le Toetu o le Faaola? Maka pe matau aafiaga o tagata taitasi i le Mataio 28:1–10; Luka 24:13–35; Ioane 20:19–29; ma le 1 Korinito 15:1–8, 55. (Manatua o isi molimau i le Keriso toetu e mafai ona maua i le 3 Nifae 11; Mamona 1:15; Eteru 12:38–39; Mataupu Faavae ma Feagaiga 76:19–24; 110:1–10; ma le Iosefa Samita—Talafaasolopito 1:15–17.) I nei tala, o le a le mea ua faamalosia ai lou faatuatua i le Toetu moni mai o le Alii? Ina ua mavae le Toetu o le Faaola, sa toetutu mai isi ma faaali atu i le toatele (tagai Mataio 27:52–53; 3 Nifae 23:9). Aisea e te manatu ai e taua le tusifaamaumauina o lenei mea i le Tusi Paia faapea foi le Tusi a Mamona?

Tagai foi “Ua Toetu mai Iesu,” “O le Alii Toetu ua Faaali atu i le Au Aposetolo,” “Amuia i Latou O E Lei Vaai, Ae Talitonu Mai Pea” (videos, LDS.org).

1 Peteru 1:3–11

Ua aumaia e Iesu Keriso ia te au le faamoemoe ma le olioli.

Sa faaalia e Alisa, le alo tamaitai a Elder Paul V. Johnson, o le na mafatia i le kanesa ma sa onosaia le tele o taotoga, le “faamoemoe ua ola” lea na faamatala e Peteru i le 1 Peteru 1:3–11. Sa faasoa mai e Elder Johnson se tusi na tusia e Alisa i le taimi o le Eseta, a o lei pine ae maliu. “O le Eseta o se faamanatu lea o mea uma sa ou faamoemoe i ai mo a’u lava ia.” E i ai se aso o le a faamaloloina ai au e i ai se aso o le a ou atoatoa ai. E i ai se aso ou te le maua ai se uamea po o se palasitika i totonu ia te au. E i ai se aso o le a ou saoloto ai lo’u loto mai le fefe ma lo’u mafaufau mai le popole. … Ua ou matua fiafia lava i lo’u talitonu moni e i ai se olaga matagofie pe a mavae lenei olaga” (“And There Shall Be No More Death,” Ensign po o le Liahona, May 2016, 121).

O a upu po o fasifuaitau o i le 1 Peteru 1:3–11 ua avatu ai le faamoemoe ona o Iesu Keriso? O anafea na e lagona ai lena faamoemoe? E mafai faapefea ona e faasoa atu le faamoemoe ua ia te oe e ala i a Iesu Keriso ia i latou e te alofa i ai?

Tagai foi Alema 27:28; 36:1–24; 3 Nifae 9:11–17; Moronae 7:40–41.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina mau faatasi ma lou aiga, e mafai ona fesoasoani le Agaga ia te oe e iloa ai po o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga nei:

Mormon.org

O le “Vaiaso Paia” o se vaega o le mormon.org/easter o loo i ai se faasologa o taimi ma faamatalaga o mea na tutupu i aso taitasi o le toe vaiaso o le soifuaga o le Faaola. O aso taitasi o le vaiaso e mafai e lou aiga ona toe iloilo nei faamatalaga ia iloa ai mea na faia e le Faaola i lena aso, pe e mafai foi ona outou faitau o se aiga i mau e uiga i Lona toe vaiaso (tagai i se lisi fautuaina o loo i le vaega o “Manatu mo Suesuega Faaletagata Lava Ia o Tusitusiga Paia”).

Viiga ma le Tusipese a Tamaiti

Mafaufau e usu faatasi ni pese e uiga i le Togiola ma le Toetu o le Faaola i le vaiaso lenei, e aofia ai ni pese tou te le iloa (tagai i le faasino autu o Viiga po o le Tusipese a Tamaiti, i lalo o ulutala e pei o le “Togiola,” “Eseta,” po o le “Toetu”). Ina ia fesoasoani i tagata o le aiga e aoao ia pese, e mafai ona e faaali i ai ata e o faatasi ma upu.

“O Le Keriso Soifua: O Le Molimau a Aposetolo,”

Faitau o se aiga, “O Le Keriso Soifua: O Le Molimau a Aposetolo” (Ensign po o le Liahona, Ape. 2000, 2–3; tagai foi LDS.org), ma valaaulia tagata taitasi o le aiga e filifili se savali o le Eseta mai lenei molimau e faasoa atu i isi. Mo se faataitaiga, e mafai ona e faia ni pepa e faaali ai i luga o le upega tafailagi, i luga o lou faitotoa, po o luga o se faamalama.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Suesuega Faaletagata Lava Ia

Faatutu ni sini e mafai ona ausia. O le faaalu o ni nai minute faaopoopo i se aso e suesue ai i tusitusiga paia e mafai ona faamanuia ai lou olaga. Tautino atu e suesue i aso taitasi, sue se ala e faamanatu ai ia te oe lava lau tautinoga, ma faia le mea sili e te mafaia e mulimulita’i ai i ai.

O Ketesemane, saunia e Adam Abrams