Fafaga i Latou, saunia e Jorge Cocco

25--31 Mati

Mataio 14–15; Mareko 6–7; Ioane 5–6

“Aua Tou Te Matatau”

A o e tapenapena e aoao atu mai le Mataio 14–15; Mareko 6–7; ma le Ioane 5–6, vaavaai mo savali talafeauga ma olaga o tamaiti o loo e faiaoga ai. O le a sou manatu o le a se mea o le a fesoasoani ia i latou ia malamalama ai i nei savali? E mafai ona avatu e lenei otootoga ni nai manatu.

Tusifaamaumau Ou Lagona Uunai

Valaaulia le Fefaasoaai

Faaali se ata o Iesu o loo savali i luga o le vai (tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga), ma fai i tamaiti e faasoa mai mea ua latou iloa e uiga i le tala.

Aoao atu Aoaoga Faavae

Tamaiti Laiti Ifo

Ioane 5:1–9

E silafia e Iesu Keriso mea tatou te manaomia ma e mafai ona fesoasoani mai ia i tatou.

A o e faitau e uiga ia Iesu o loo faamaloloina le tagata i le taeelga o Petesa, mafaufau pe mafai faapefea ona e fesoasoani i tamaiti ia iloa le mea o loo aoao mai e le tala e uiga i le agalelei, alofa, ma isi uiga faaleatua o Iesu.

Gaoioiga e Mafai ona Fai

• Faaaoga le ata O Keriso o loo Faamaloloina Ma’i i Petesa (Tusi Ata o le Talalelei, nu. 42) e faamatala atu ai i tamaiti le tala o i le Ioane 5:1–9 Pe faaali foi le vitio “Jesus Heals a Man on the Sabbath”LDS.org). Fai i tamaiti e manatu faapea o i latou o le tagata lea na faamalolo e Iesu. Mata o a ni o latou lagona ina ua faamlolo i latou e Iesu?

• Fai i tamaiti e ta’u mai ni mea e faigata mo i latou pe latou te faanoanoa ai foi. Faamatala i ai se taimi i lou olaga na e maua ai se fesoasoani mai le Faaola i se taimi o se tofotofoga faigata. Molimau atu e silafia e Iesu o tatou faafitauli uma ma e manao e fesoasoani mai ia i tatou.

Mataio 14:13–21

Tatou te mulimuli i faataitaiga a Iesu pe a tatou agalelei atu i isi.

O se tasi o auala sa faaalia ai e Iesu le alofa o le fafaga o tagata sa mulimuli atu ia te Ia pe a fia aai. E mafai faapefea ona e fesoasoani i tamaiti e aoao ia auauna atu i isi e faapei ona sa faia ai e Iesu?

Gaoioiga e Mafai ona Fai

• Faaali atu i tamaiti se ato ma ni nai falaoa a o e faamatalaina le tala i le Mataio 14:13–21. Faamalamalama atu e ui ina sa taumafai Iesu e saili se nofoaga ina ia tau ai lava na o ia, ae sa mananao lava tagata ina ia latalata atu ia te Ia. Faasoa atu le toega o le tala i tamaiti, ma fai i ai e faalogologo pe o a mea na faia e Iesu e faaalia ai le agalelei ma le alofa mo i latou.

• Fai i tamaiti e faasoa mai ni ala sa agalelei atu ai se tasi ia i latou. O le a se mea e mafai ona latou fai i lenei vaiaso e agalelei atu ai i isi? Mo tali uma latou te aumai, tusi se papa falaoa po o se i’a i luga o le laupapa. Ta’u i tamaiti a latou faia nei mea, o loo latou mulimuli i le faataitaiga na faatuina e Iesu ina ua Ia fafagaina tagata e lima afe o e sa fia aai.

Mataio 14:22–33

O le faatuatua ia Iesu Keriso e mafai ona fesoasoani ia tatou le fefefe ai.

Sa faaalia e Peteru le faatuatua tele ina ua savali o ia i luga o le vai agai atu ia Iesu. O a lesona o i ai i lenei tala mo tamaiti?

Gaoioiga e Mafai ona Fai

• Faaali le ata o Iesu o loo Savali i luga o le Vai (Tusi Ata o le Talalelei, nu. 43) a p e faamatalaina le ata i au lava upu. Mafaufau e faaaoga le itulau o gaoioiga o lenei vaiaso e fesoasoani ai i tamiaiti e toe faamatala atu le tala ia te oe. E mafai foi ona e aumaia se tama’i pesini vai ma valaaulia tamaiti e faafoliga faapea o loo “savavali” o latou tamatamailima i luga o le vai.

• Faaali le vitio “Wherefore Didst Thou Doubt?” (LDS.org), ma fai i tamaiti e vaavaai mo mea na afua ai ona fefe ia Peteru. Ona fai lea i ai e faamatala atu ni taimi na latou lagona ai le fefe ma faasoa mai po o le a le mea na fesoasoani ia i latou. Fesoasoani ia latou iloa o le faatuatua ia Iesu Keriso e fesoasoani ia i tatou e faatoilaloina le fefe.

Aoao atu Aoaoga Faavae

Tamaiti Matutua Atu

Ioane 5:17–47

Ua aoao mai e Iesu i tatou e uiga i le Tama Faalelagi.

E mafai faapefea e aoaoga a Iesu Keriso e uiga i Lona Tama Faalelagi ona fesoasoani e aoao ai tamaiti e uiga i le Tama Faalelagi?

Gaoioiga e Mafai ona Fai

• Fai ni seti se lua o kata faafetaui e tusi ai upu sa faaaoga e Iesu e aoao mai ai e uiga i le Tama Faalelagi i le Ioane 5, e pei o le alofa, ola, ma le galuega (tagai Ioane 5:20, 26, 36). Faafao kata, ona fai lea i tamaiti e vaavaai mo kata e fetaui e ala i le faau i luga o kata e lua i le taimi e tasi. A o maua kata e lua e fetaui, faitau le fuaiupu o loo i ai le upu, ona fesili lea i tamaiti po o le a le mea o aoao mai e le upu e uiga i le Tama Faalelagi.

• Fai i tamaiti e faitau le Ioane 5:30, ona faamaea lea o le fuaiupu lenei: “Ou te le usiusita’i i lo’u lava loto, a o le …” Na faapefea ona faia e Keriso le finagalo o Lona Tama Faalelagi? E mafai faapefea ona tatou faia le finagalo o le Tama i le Lagi?

Ioane 6:5–14

O nai mea iti tatou te ofoina atu e mafai ona faia ai se eseesega.

O se tamaitiiti talavou sa tuuina atu falaoa ma i’a ia na faaaoga e Iesu e fafaga ai le lima afe. E mafai faapefea ona e fesoasoani i tamaiti o loo e faiaoga ai ia iloa pe mafai faapefea ona latou saofaga atu i le galuega a le Alii?

Gaoioiga e Mafai ona Fai

• Tofitofi ni nai masi po o se falaoa mo tamaiti. Fesoasoani ia latou manatunatu i le toatele naua o se aofaiga e lima afe tagata. Mata o le a se tulaga e i ai pe a fafagaina lena anoanoai o tagata i le na o le lima ni papa falaoa ma ni i’a se lua?

• Valaaulia se tamaitiiti e faamatala mai le tala i le fafagaina o le lima afe i ana lava upu. E mafai faapefea ona tatou pei o le tamaitiiti i le Ioane 6:9? Valaaulia tamaiti e tusi ni ata o ni falaoa ma i’a i luga o se pepa ma tusi ai ni mea e mafai ona latou faia e foai atu i le Alii e fesoasoani ai i Lana galuega.

• Avatu i tamaiti se tama’i paso e faamaea. O le a se mea e tupu pe afai e misi se fasi paso se tasi? Faamalamalama e pei lava i tatou taitoatasi o se fasi paso—e tofu uma i tatou ma se mea e taua e saofaga atu i olaga o isi. E faapefea ona saofaga atu tamaiti i o latou aiga po o le vasega?

Na fafagaina faavavega e Iesu le 5,000 o tagata i areto e lima ma i’a e lua.

Mataio 14:22–33

O le faatuatua ia iesu Keriso e mafai ona fesoasoani ia tatou le fefefe ai.

O le faatuatua ma le fefe e i ai matafaioi iloga i le tala ia Iesu ma Peteru sa savavali i luga o le sami. O a lesona e mafai ona aoao e tamaiti mai lenei tala?

Gaoioiga e Mafai ona Fai

• Faaali atu le ata o i le otootoga o lenei vaiaso i le Sau, Mulimuli Mai ia te Au—Mo Tagata Taitaoatasi ma Aiga. Fai i tamaiti e sue se fuaiupu i le Mataio 14 o loo faamatala ai le ata.

• Fai i tamaiti e vaavaai mo faailoga o le faatuatua ma faailoga o le fefe a o latou faitauina le Mataio 14:22–33. E mafai foi ona e faaali le vitio “Wherefore Didst Thou Doubt?” (LDS.org). O le a le uiga o le faatuatua ia Iesu Keriso? E faapefea ona tatou suia le fefe i le faatuatua?

• Fai i tamaiti e manatu faapea sa latou i ai ma sa i ai se mea pueata i le taimi na savavali ai Iesu ma Peteru i luga o le sami. O le fea taimi o le a latou filifili ai e pu’e le ata ma pe aisea foi? Fautua atu e saili le Mataio 14:22–23 mo ni manatu. Valaaulia i latou e tusi se ata o le taimi lea na latou filifilia, faasoa mai a latou ata, ma faamalamalama pe aisea na latou filifilia ai lena taimi.

Fautuaina le Aoaoina i le Aiga

A maea le itulau o gaoioiga o lenei vaiaso a tamaiti, valaaulia i latou e faaaoga e aoao atu ai o latou aiga mea sa latou aoaoina i le aso.

Faaleleia o Lo Tatou Aoao Atu

Valaaulia le Fefaasoaai Fesili i tamaiti e uiga i o latou mafaufauga, lagona, ma aafiaga. O le a e iloaina e tele lava ina faigofie ae maoae o latou malamalamaaga.