“Mati 18–24. Mataio 13; Luka 8; 13: “O Le Ua i ai Taliga e Faalogo Ai, ina Faalogo Mai ia o Ia” Sau, Mulimuli Mai ia te Au—Mo le Peraimeri: Feagaiga Fou 2019 (2019)
“Mati 18–24. Mataio 13; Luka 8; 13,” Sau, Mulimuli Mai ia te Au—Mo le Peraimeri 2019
Mati 18–24
Mataio 13; Luka 8; 13
“O Le Ua i ai Taliga e Faalogo Ai, ina Faalogo Mai ia o Ia”
O faataoto o ni tala faigofie e mafai ona faagauai i ai tamaiti. O lenei otootoga ma le Sau, MulimuliMai ia te Au—Mo Tagata Taitoatasi ma Aiga e mafai ona fesoasoani ia te oe e faaaoga faataoto a le Faaola e aoao atu ai i tamaiti upumoni taua.
Tusifaamaumau Ou Lagona Uunai
Valaaulia le Fefaasoaai
Aumai ni mea eseese e mafai ona fesoasoani i tamaiti e manatua ai ni nai faataoto i le Mataio 13, e pei o se fatu, se penina, po o pusa ‘oa. Valaaulia tamaiti e faasoa mai mea latou te manatua e uiga i faataoto.
Aoao atu Aoaoga Faavae
Tamaiti Laiti Ifo
E manaomia ona ou sauniuni e aoao i aoaoga a Iesu.
Atonu e le malamalama tamaiti laiti ifo i faatusa uma o i le faataoto o le lulu fatu, ae e mafai ona latou aoaoina upumoni faigofie o le talalelei o loo aoao mai ai. E mafai faapefea ona e fesoasoani ia latou malamalama pe faapefea ona fesootai lenei faataoto ia i latou?
Gaoioiga e Mafai Ona Fai
-
Faaali ni ituaiga eleele eseese (po o ni ata o eleele) a o e aoteleina le Mataio 13:3–8. Tuu atu ia tofu le tamaitiiti ma se fatu e toto i le eleele. Fesili i tamaiti po o le a se mea e mafai ona tatou faia e fesoasoani ai ia ola le tatou fatu. Faamalamalama o le faatuatua i le Tama Faalelagi ma Iesu Keriso o se tasi lea o auala tatou te fesoasoani ai ia tatou “fatu” o le molimau ia ola.
-
Faaaoga le itulau o gaoioiga o lenei vaiaso e fesoasoani ai i tamaiti ia malamalama i mea o aoao mai e ituaiga eleele taitasi o loo faamatala mai i le Mataio 3. Fesili i tamaiti pe o le fea ituaiga o loto e manao Iesu latou te maua ina ia latou aoao ai i Ana aoaoga.
-
Faitau le Mataio 13:9, 15, ma valaaulia tamaiti e faasino i itutino eseese o o latou tino pe a latou faalogo o ta’u. E mafai faapefea ona e faaaogaina nei itutino e aoao ai i aoaoga a Iesu?
E finagalo le Tama Faalelagi ia ou filifili le mea sa’o.
O nisi o faataoto a Iesu ua aoao mai ai o le aso mulimuli, o le a tuueseese ai e le Atua e amioleaga mai e amiotonu. E mafai faapefea ona e faaaogaina ia faataoto e musuia ai tamaiti e filifili le mea sa’o?
Gaoioiga e Mafai Ona Fai
-
Tuu atu i tamaiti e faatino mai i taga le faataoto i le saito ma le titania (tagai Mataio 13:24–30). Faamalamalama o le saito e faatusa i tagata o e faia filifiliga amiotonu, a o le titania (vao faataumaoi) e faatusa i tagata e le faia filifiliga amiotonu. E i ai se aso, o le a faapotopoto ai e le Tama Faalelagi ia tagata amiotonu e nonofo faatasi ma Ia.
-
Faamatala ni nai tala faigofie i tamaiti na faia ni filifiliga. Fai i tamaiti e ta’u le “filifili le saito” pe a filifili e tamaiti i le tala le mea sa’o ae ta’u le “filifili le titania” pe a faia e tamaiti se filifiliga sese.
-
Aumai ni ata o ‘au saito, ma tuu i tamaiti e tusi i luga o ata ni auala e mafai ai ona latou amiotonu.
-
Fatufatu se taaloga e faafetaui ai e tamaiti ia faamatalaga mai le faataoto i le lulu saito ma le faauigaga o loo i le Mataio 13:18–23.
O lo’u avea ai ma tagata o Le Ekalesia a Iesu Keriso o le Au Paia o Aso e Gata Ai o se ‘oa.
E mafai faapefea ona e faaaogaina le atafaatusa o le ‘oa ma penina taua e fesoasoani ai i tamaiti ia malamalama i le taua o le avea ma se tasi o le Ekalesia a Keriso?
Gaoioiga E Mafai Ona Fai
-
Nana ni ata o se pusa ‘oa ma se penina i le potu, ma tuu i tamaiti e sue. Faaaoga ia ata e fesoasoani ai ia te oe e aoao atu e uiga i faataoto i le Mataio 13:44–46. O le a se mea e foai atu e tamaiti ina ia maua ai se penina matagofie po o se ‘oa i se fanua? O nisi taimi e tatau ai ona lafoai se mea lelei mo se mea e sili atu le lelei. Ta’u i tamaiti pe aisea e taua ai le talalelei ia te oe.
-
Tuu se pusa o ni meafaitino po o ni ata e faatusa i “oa” i Le Ekalesia a Iesu Keriso o le Au Paia o Aso e Gata Ai, e pei o malumalu po o le Tusi a Mamona. Fai i tamaiti taitasi e filifili se meafaitino po o se ata ma talanoa pe aisea ua avea ai ma ‘oa.
-
Usu faatasi le “O Le Ekalesia A Iesu Keriso,” Tusipese a Tamaiti, 48, ma fai i tamaiti e faalogologo mo faamanuiaga e maua mai le avea ma se tasi o le Ekalesia. Molimau atu i faamanuiaga ua e maua ona o le avea ai o oe ma tagata o le Ekalesia.
Aoao atu Aoaoga Faavae
Tamaiti Matutua Atu
E manaomia ona ou saunia lo’u loto e talia aoaoga a Iesu.
E mafai faapefea ona e fesoasoani i tamaiti ia iloa le taua o le i ai o se loto e malu ma naunautai ina ia mafai ai e Iesu ona aoao i latou?
Gaoioiga E Mafai Ona Fai
-
Tofi tamaiti taitasi e faitau e uiga i se tasi o ituaiga eleele e fa o i le Mataio 13:4–8. Valaaulia i latou e vaavaai mo mea na tupu i fatu i ituaiga eleele sa latou faitau ai ma faasoa mai. E mafai faapefea ona avea o tatou loto e faapei o ituaiga eleele eseese? (tagai Mataio 13:19–23).
-
Tuu i tamaiti taitasi ni fatu se lua, ma valaaulia i latou e toto a latou fatu i ni eleele malu ma i se faaputuga maa. O le fea fatu o le a sili atu se avanoa e ola ai? E mafai faapefa ona faamautinoa ua pei o tatou loto o le eleele malu ina ia mafai ai ona tatou talia aoaoga a le Faaola?
-
Valaaulia tamaiti e faitau le Mataio 13:9–17. Tusi se ata o se mata, taliga, ma le fatu i luga o le laupapa. E faapefea ona tatou faaaogaina itutino taitasi e aoao ai i aoaoga a Iesu?
E mafai ona ou fiifilia le mea sa’o pe a le faia e i latou e siomia au.
A e faitauina nei fuaiupu ma e mafaufau i tamaiti, o a ni lagona uunaia e oo mai ia te oe?
Gaoioiga E Mafai Ona Fai
-
Valaaulia tamaiti e tusi ata o ni vaaiga eseese mai le faataoto i le saito ma le titania, o loo maua i le Mataio 13:24–30, ma faasoa mai i le vasega a latou ata. Fai i ai e faaigoa a latou atatusi e faaaoga ai le faauigaga o le faataoto o loo maua i le Mataio 13:36–43. Faamalamalama o le titania o vao faataumaoi.
-
Afai e mafai, faaali se ata o le saito ma le titania. Faamalamalama o le saito ma le titania o le a tutupu faatasi seia oo i le iuga o le lalolagi. Ua aoao mai i lenei mea o loo tatou ola faatasi ma le lelei ma le leaga o siomia ai i tatou, ma e tatau ona tatou faaeteete e filifili le mea sa’o. Fai i tamaiti e faasoa mai pe mafai faapefea ona latou iloa le eseesega i le va o le lelei ma le leaga.
O lo’u avea ai ma tagata o Le Ekalesia a Iesu Keriso o le Au Paia o Aso e Gata Ai o se ‘oa.
Pe o vaai ia tamaiti na e te faiaoga ai i lo latou avea ai ma tagata o le Ekalesia o se ‘oa taua? Atonu e mafai ona fesoasoani le faataoto i le Mataio 13:44–46 ia i latou.
Gaoioiga E Mafai Ona Fai
-
Valaaulia tamaiti e faitau le Mataio 13:44–46 ia i latou lava ma faasoa atu faataoto i a latou lava upu i se tasi o le vasega.
-
‘Oti’oti ni li’o e faatusa i ni tupe siliva, ona tuu lea i se pusa ‘oa. Valaaulia tamaiti e piki se tupe siliva ma tusi ai i luga se mea se tasi ua latou fiafia ai e avea o se tagata o le Ekalesia. Fai i tamaiti e faasoa mai mea sa latou tusia i luga o a latou tupe.
-
Valaaulia se tagata o le uarota e faamatala i tamaiti lana tala o lona liua ma faamatala mai po o le a le mea na ia ositaulagaina ina ia auai ai i Le Ekalesia a Iesu Keriso o le Au Paia o Aso e Gata Ai.
Fautuaina le Aoaoina i le Aiga
Valaaulia tamaiti e aoao o latou aiga e uiga i se tasi o faataoto sa latou aoaoina i le Peraimeri.
Faaleleia o Lo Tatou Aoao Atu
E fia faasoa mai e tamaiti mea ua latou aoaoina. E ui ina laiti tamaiti, e mafai e tamaiti ona faamalolosia tagata o o latou aiga. Fautuaina i latou e faasoa atu i o latou aiga mea na latou aoao i le Peraimeri. (Tagai Aoao Atu i le Ala a le Faaola, 30.)