O le Faamalologa i Ona Apaau, saunia e Jon McNaughton

Mati 4–10.

Mataio 8–9; Mareko 2–5

“Ua E Ola i Lou Faatuatua”

Amata i le faitauina o le Mataio 8–9 ma le Mareko 2–5. Sau, Mulimuli Mai ia te Au—Mo Tagata Taitoatasi ma Aiga e mafai ona fesoasoani e te malamalama ai i nei mataupu, ma o lenei otootoga e mafai ona e maua ai manatu faafaiaoga.

Tusfaamaumau Ou Lagona Uunai

Valaaulia le Fefaasoaai

Fai i tamaiti e faasoa mai se tala ia Iesu o faatinoina se vavega (tagai i le lisi o vavega i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). E mafai foi ona e faaali atu ata e fesootai i ai (tagai Tusi Ata o le Talalelei, nu. 40, 41, po o le LDS.org).

Aoao atu Aoaoga Faavae

Tamaiti Laiti Ifo

Mataio 8–9; Mareko 2; 5

E i ai le mana o Iesu e faatino ai vavega.

A o e faitau i vavega a le Faaola o le faamalologa, mafaufau pe o a vavega e faasoa atu. E mafai faapefea ona e fesoasoani i tamaiti o loo e faiaoga ai ia malamalama i le matafaioi a le faatuatua i vavega na faatino e Iesu?

Gaoioiga e Mafai Ona Fai

• Faasoa atu le tala i le tamaloa na ma’i supa mai le Mareko 2:1–12 Mo se fesoasoani, tagai “Mataupu 23: O Le Tamaloa Sa Le Mafai ona Savali” Tala o le Feagaiga Fou, 57–58, po o le vitio e o faatasi ai (LDS.org). Fai i tamaiti o le tamaloa ma’i supa sa le mafai ona savali. Fesoaoani ia latou iloa na faamaloloina lenei tagata ma sa faamagaloina e le Faaola.

• Valaaulia tamaiti e faafoliga faapea ua latou “tulai ae” e pei o le afafine o Iairo e pei ona e faitau ai mai le Mareko 5:22–23, 35–43. Fesoasoani ia latou malamalama na faia e Iesu ia mafai ai e i tatou uma ona maua le ola e faavavau.

• Faitau le Mareko 5:34. Fesoasoani i tamaiti e tauloto le fasifuaitau “Ua e ola i lou faatuatua,” atonu e ala i le tuuina atu i tamaiti taitasi o se upu ona ta’u mai lea e tamaiti a latou upu i le faasologa. Pe i ai se tasi latou te iloa na faamaloloina ina ua ma’i?

• Fai i tamaiti e moeiini mata ma faalogologo a o e faitau mai le Mataio 9:27–30. Pe a e faitau e uiga ia Iesu o loo faamaloloina tagata tauaso, valaaulia tamaiti e pupula o latou mata. Mata o a ni lagona o tamaiti pe ana faamalolo e Iesu i latou?

• Valaaulia tamaiti e talanoa e uiga i se taimi na mama’i ai Faamatala se tasi o tala ia Iesu sa faamaloloina ma’i, ma molimau atu e i ai le mana o Iesu e mafai ai ona faamalolo ma faamanuia i tatou a o tatou tatalo ma maua faamanuiaga faaleperisitua. Faamalamalama e ui o nisi taimi e le aumaia e le Alii ia i tatou vavega tatou te mananao ai, ae e alofa o Ia ia i tatou ma ua silafia o tatou manaoga. O le a ia aumai ia i tatou le mafanafana tatou te manaomia.

Mareko 4:35–41

A ou fefe pe i ai i se tulaga matautia, e mafai e Iesu ona fesoasoani mai ia te au ia ou maua le filemu.

O le tala ia Iesu na faafilemuina se matagi e mafai ona fesoasoani i tamaiti ia iloa e mafai e Ia ona avatu ia i latou le filemu pe a latou lagonaina le fefe.

Gaoioiga e Mafai Ona Fai

• Fesoasoani i tamaiti e manatu faapea o loo i ai i luga o se vaa a o e faitauina le Mareko 4:35–41. (Tagai foi “Mataupu 21: Jesus Commands the Winds and the Waves,” Tala o le Feagaiga Fou, 53, po o le vitio e o faatasi ai i le LDS.org.) Fai atu i tagata o le vasega e mafaufau pe o a ni o latou lagona pe ana faapea sa latou i ai iina. O anafea na fefefe ai tamaiti? Na faapefea ona latou maua le mafanafana?

• Valaaulia tamaiti e fai ni leo o se afa ma taofi pe a fai atu se tasi, “Faalologo ia, ina malu ia.” Molimau atu e mafai e Iesu ona aumaia ia i tatou le filemu pe a i ai se afa i fafo, e mafai ona Ia aumaia le filemu i o tatou loto pe a tatou lagona le faaletonu i totonu.

• Mafaufau i ni taga e o faatasi ma le fuaiupu lona tolu o le “Tau Mai Tala Ia Iesu,” Tusipese a Tamaiti, 36.

O Keriso o loo faafilemu le matagi, saunia e Robert T. Barrett

Aoao atu Aoaoga Faavae

Tamaiti Matutua Atu

Mareko 2; 5

E mafai e Iesu ona faia vavega i lo’u olaga pe a ou faatuatua ia te Ia.

Sa faia e Iesu vavega e tele i le taimi o Lana galuega i le tino nei. E mafai faapefea ona e fesoasoani ia iloa e tamaiti o loo tutupu lava vavega i aso nei?

Gaoioiga e Mafai Ona Fai

• Fai i tamaiti e piki se vavega se tasi o nei vavega e faitau ai ma tusi se ata: Mareko 2:1–12; Mareko 5:22–23, 35–43; po o le Mareko 5:24–34 Valaaulia i latou e faamatala mai i le vasega a latou ata. O a ni mea ua latou aoao e uiga ia Iesu mai i nei tala?

• Fai i tamaiti e faatino mai pe o a latou lagona pe a mama’i, faanoanoa, fefefe, pe popole. E mafai faapefea ona fesoasoani Iesu ia i tatou pe a tatou maua nei lagona? Molimau atu e mafai e Iesu ona fesoasoani i tamaiti i nei tulaga uma.

• Valaaulia tamaiti e faasoa mai ni aafiaga ina ua latou maua pe maua e se tasi latou te iloa se faamanuiaga faaleperisitua. Na faapefea ona faamaloloina pe faamanuiaina le tagata?

Mataio 8–9; Mareko 2; 5

E mafai ona ou faaali atu le alofa mo isi e pei ona sa faia e Iesu.

Sa faaalia e Iesu le alofa sili e ala i le faamaloloina o e mama’i ma mafatia. Mafaufau pe mafai faapefea ona e aoao atu tamaiti e faaalia le lotoalofa mo tagata e manaomia.

Gaoioiga e Mafai Ona Fai

• Filifili se tasi pe sili atu foi ia vavega e toeiloilo faatasi ma tamaiti, e pei o na e i le Mareko 2:1–12; Mareko 5:22–23, 35–43; po o le Mareko 5:24–34. (Tagai foi i vitio“Jesus Forgives Sins and Heals a Man Stricken with Palsy,” “Jesus Raises the Daughter of Jairus,” and “Jesus Heals a Woman of Faith” i le LDS.org.) Valaaulia tamaiti e faasoa mai se taimi na latou fesoasoani ai i se tasi na manaomia ma pe na faapefea o latou lagona.

• Faaali le vitio “Gordon Hinckley: Lessons I Learned as a Boy” po o le “The Coat” (LDS.org). Na faapefea e tamaiti i nei vitio ona mulimuli i le faataitaiga a Iesu? Valaaulia tamaiti e faasoa mai isi tulaga atonu na i ai se tasi na manaomia se fesoasoani. O le a se mea e mafai ona tatou faia e fesoasoani ai ia i latou?

• Faamanatu i tamaiti o le fesoasoani atu i isi o se vaega o a latou feagaiga i le papatisoga (tagai Mosaea 18:8–10; Alema 34:28).

Mataio 8:23–27; Mareko 4:35–41

A ou fefe pe i ai i se tulaga matautia, e mafai e Iesu ona fesoasoani mai ia te au ia ou maua le filemu.

E tatau i tamaiti ona iloa e mafai e le Faaola ona avatu ia i latou le filemu pe a latou feagai ma afa o le olaga—i le taimi nei ma le lumanai.

Gaoioiga e Mafai Ona Fai

• Fai i se tamaitiiti e faaaoga le Mareko 4:35–41 ma le ata o Jesus Calms the Storm (Tusi Ata o le Talalelei, no. 40 e faamatala ai le tala ia Iesu o faatoafilemu le afa. Fai atu i tagata o le vasega e mafaufau pe o a ni o latou lagona pe ana faapea sa latou i ai iina.

• Valaaulia tamaiti e faasoa mai aafiaga ina ua latou lagonaina le filemu sa latou tatalo ai mo se fesoasoani. Faamanatu ia i latou o lenei filemu e sau mai i le Faaola.

• Usu faatasi ma tamaiti le “Matai e, Ua Sou le Vasa,” Viiga, nu. 58, ma valaaulia i latou e musumusu pe a latou usuina le “Fifilemu”

• Tuu atu i tamaiti taitasi se pepa ua tusi ai se ao o le timu, ma fai i ai e tusi ai i luga se tofotofoga atonu o feagai ma se isi. Tuu uma ao i luga o le laupapa, ufiufi se ata o le Faaola. Valaaulia se tamaitiiti e aveese mai se ao se tasi ma fautua atu ni auala e mafai ona fesoasoani ai i se tasi o i ai lena faigata ina ia maua le filemu. A uma ona aveese uma ao, molimau atu i le mana o le Faaola e faatoafilemu afa i o tatou olaga.

Fautuaina le Aoaoina i le Aiga

Fesoasoani i tamaiti e tusi i lalo se taga o le auauna atu o le a latou faia mo se tasi i lenei vaiaso.

Faaleleia o Lo Tatou Aoao Atu

E tiotio tamaiti. E i ai taimi atonu e te manatu e afaina le aoaoina o tamaiti ona o lo latou malosi. Ae e mafai ona galue i o latou natura tiotio e ala i le valaaulia o i latou e faatino mai se tala pe fai ia taga e o faatasi ma mea na tutupu i le pese po o le ata. (Tagai Aoao Atu i le Ala a le Faaola, 25.)