Faamalologa i Ona Apaau saunia e Jon McNaughton

4--10 Mati

Mataio 8–9; Mareko 2–5

“Ua E Ola i Lou Faatuatua”

A o e faitauina le Mataio 8–9 ma le Mareko 2–5, ia nofouta i lagona uunai e te maua mai le Agaga Paia. Fuafua e tusi i lalo uunaiga e te maua ma mea e mafai ona e faia e faatino ai na uunaiga.

Tusifaamaumau Ou Lagona Uunai

E faigata ona faitau le Feagaiga Fou e aunoa ma lagona uunai ma i le tele o tala i le faamaloloina e le Faaola o e mamai ma e puapuagatia---tagata uma mai i se fafine sa maua i se ma’i vevela e oo i se teineitiiti sa faapea ua oti. O a savali atonu o iina mo i tatou i nei vavega o faamalologa faaletino? E moni o se tasi o savali iloagofie o Iesu Keriso o le Alo o le Atua, ua i ai le mana i mea uma, e aofia ai tiga ma le atoatoa faaletino. Ae o se isi faauigaga o loo maua i Ana afioga i le au tusiupu masalosalo: “Ina ia outou iloa o iai ile Atalii o le tagata i le lalolagi le pule e faamagalo ai agasala” (Mareko 2:10). O le mea la lea, a e faitau e uiga i se tagata tauaso po o se lepela ua faamalolo, atonu e te mafaufau i le faamalologa---faaleagaga ma le faaletino---lea e mafai ona e maua mai le Faaola ma faalogo atu o Ia fetalai mai ia te oe, “Ua e ola i lou faatuatua” (Mareko 5:34).

Manatu mo Suesuega Faaletagata Lava Ia

Mataio 8–9; Mareko 2; 5

E mafai e le Faaola ona faamalolo vaivaiga ma ma’i.

O nai mataupu ia o loo tusifaamaumauina ai le tele o taimi o faamalologa ofoofogia na faia e le Faaola. A o e suesueina nei faamalologa, vaavaai mo ni savali e tatau ona i ai mo oe. E mafai ona e fesili ifo ia te oe lava: O le a se mea o aoao mai i le tala e uiga i le faatuatua? O le a se mea ua aoao mai e lenei tala e uiga i le Faaola? O le a se mea o finagalo le Atua ia te au e aoao mai lenei vavega?

• O se lepela (Mataio 8:1–4)

• O se auauna a le taitai o le toaselau (Mataio 8:5–13)

• O le tina o le ava a Peteru (Mataio 8:14–15)

• O alii tauaso e toalua (Mataio 9:27–31)

• O se tagata pipili (Mareko 2:1–12)

• O se tagata na uluitino ai agaga leaga (Mareko 5:1–20)

• Afafine o Iairo (Mareko 5:22–23, 35–43)

• O se fafine na maua i le punatoto (Mareko5:24–34)

Tagai foi Dallin H. Oaks, “Faamaloloina o e Mamai,” Ensign po o le Liahona, May 2010, 47–50.

O Iesu o Loo Faamalolo i e Mamai, saunia e Joseph Brickey, na sosoo ma Heinrich Hofmann

Mataio 8:5--13; Mareko 5:24--34

E mafai ona ou sailia le fesoasoani a le Atua pe afai ou te lagonaina lo’u le onomea.

O le taitai o le toaselau, o se Nuuese, sa lagonaina le le tatau ona i ai le Faaola i lona fale. O le fafine sa maua i le punatoto sa manatu i ai e le mama ma sa faate’aese mai tagata Iutaia. Ae na faamanuiaina i la’ua uma e le Faaola. O le a se mea ua e aoao mai nei tala e lua e uiga ile sailia ole fesoasoani mai le Alii

Mataio 8:18–22; Mareko 3:31–35

O le avea ai o se soo o Iesu Keriso o lona uiga o lo’u tuu faamuamua lea o Ia i lo’u olaga.

I nei fuaiupu, ua aoao mai ai e Iesu e faapea o le avea ai ma Ona soo e moomia ai lo tatou tuufaamuamua o Ia i o tatou olaga, tusa lava pe o nisi taimi e tatau ai ona tatou ositaulagaina isi mea e taua ia i tatou. A o e suesueina nei fuaitau, manatunatu loloto i lou lava tulaga o se soo. Aisea e tatau ai i soo ona naunau e tuu faamuamua le Faaola? Mata o le a se mea e tatau ona e lafoai ina ia tuufaamuamua ai Iesu? (Tagai foi Luka 9:57–62.)

Mataio 8:23–27; Mareko 4:35–41

Ua ia Iesu Keriso le mana e aumaia ai le filemu i le lotolotoi o matagi o le olaga.

Pe na i ai se taimi na e lagona ai le mea na lagona e soo o Iesu i le matagi i le vasa---vaavaai atu i peau o le sami ua faatumulia ai le vaa ma tuufesili ai, “Le Aoao e, e te le manatu mai ea ia te i matou a fano?”

I le Mareko 4:35--41, o le a e maua ai fesili e fa. Tusi fesili taitasi, ma manatunatu loloto i mea o loo aoao mai ai e uiga i le faafetaia’ia ma le faatuatua ia Iesu Keriso, o luitau o le olaga. E faapefea e le Faaola ona aumaia le filemu i matagi o lou olaga?

Mataio 9:1--13; Mareko 2:15--17

E mafai ona ou puipuia o’u talitonuga i le aoao atu o mataupu faavae moni.

O nisi taimi e faigata ai ona iloa pe faapefea ona tali atu pe a faitio mai tagata i o tatou talitonuga ma faiga faalelotu. A o e faitauina le Mataio 9:1–13 ma le Mareko 2:15–17, vaavaaimo faitioga a le aufaitio ma tali a le Faaola. Fuafua e maka ia faitioga ma tali i ni lanu eseese pe tusi foi i lalo. O le a se mea o e matauina e uiga i le ala na aoao mai ai le Faaola? E mafai faapefea i le mulimuli i Lana faataitaiga ona fesoasoani ia te oe pe afai e tatau ona e puipuia se mataupu faavae po o se faiga a le Ekalesia?

Tagai foi i le vitio “Everyday Example: When Beliefs Are Questioned” (LDS.org).

Mataio 9:1--8

Ona o le salamo, ua mafai ai ona ou lototele.

Ina ua aumai se tagata pipili i le Faaola, sa iloagofie e le motu o tagata e manaomia e ia ona faamalolo faaletino. Ae na ta’ua e Iesu le mea o loo sili atu ona manaomia muamua e le tagata---o le faamagaloina o ana agasala. E tusa lava foi pe na lei faamaloloina faaletino le tagata, ae sa mafai lava ona ia mulimulita’ia le fautuaga a Iesu “ina faalototele ia oe” (Mataio 9:2). O anafea na e lagonaina ai le olioli ona ua faamagaloina oe? (Tagai foi Alema 36:18–24.)

Manatu mo Suesuega Faaleaiga o Tusitusiga Paia ma Afiafi Faaleaiga

A o faaauau pea ona e aoao faatasi ma lou aiga e uiga i le galuega a le Faaola, e mafai ona fesoasoani le Agaga ia te oe ia iloa ai pe o a mataupu faavae e faamamafa ma talanoaina ina ia mafai ai ona taulima manaoga o lou aiga. O ni nai fautuaga nei:

Mataio 8–9; Mareko 2; 5

Fuafua e fai se lisi o vavega o loo faamatala i nei mataupu ma sue ata o nisi o ia vavega (tagai i le Tusi Ata o le Talalelei po o le LDS.org). E mafai ona e fesili i tagata taitasi o le aiga e faamatala atu e uiga i se tasi o nei vavega (e faaaoga ai se ata pe a o maua) ma faasoa mai mea latou te aoao mai ai. E mafai ona e faasoa atu nisi o faataitaiga o vavega ua e molimauina pe faitau i ai i le talafaasolopito o le Ekalesia i ona po nei.

Mataio 9:10–13

O le a se mea ua tatou aoao mai le auala na taulima ai e le Faaola telona ma tagata agasala, o e sa inosia e isi? E mafai faapefea ona tatou mulimuli i Lana faataitaiga a o tatou fegalegaleai ma isi tagata?

Mataio 9:36–38

E mafai faapefea ona e fesoasoani i lou aiga ia malamalama i le augani a le Faaola mo nisi tagata faigaluega e fesoasoani e faasoa atu le talalelei? E mafai ona e faia se mea faigofie e pei o le galulue faatasi i se galuega e ono umi se taimi e fai ai e se tagata e toatasi, e pei o le faamamaina o le umukuka pe a uma se taligasua. O le a se mea e mafai ona tatou faia e faasoa atu ai le savali o le talalelei?

Mareko 4:35–41

Mata e mafai ona fesoasoani lenei tala i tagata o le aiga pe a latou lagona le fefefe? Atonu e mafai ona latou faitauina le fuaiupu 39 ma faasoa mai aafiaga i le taimi na fesoasoani ai le Faaola ia i latou ia lagonaina le filemu i taimi o faigata po o le fefefe.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

Ia avanoa ma maua gofie O nisi o avanoa aupito lelei o le aoao atu e amata i fesili po o atugaluga i le loto o tagata o le aiga. Ta’u i tagata o le aiga ia iloa i au upu ma faatinoga ua e naunau e faalogologo atu ia i latou (tagai Aoao Atu i le Ala a le Faaola, 16).

O Keriso ma le Tagata Supa, saunia e J. Kirk Richards