Fafaga i Latou, saunia e Jorge Cocco

25--31 Mati

Mataio 14–15; Mareko 6–7; Ioane 5–6

“Aua Le Fefe”

A o e faitauina le Mataio 14–15; Mareko 6–7; and Ioane 5–6, vaavaai mo upumoni e anoa ia te oe. Atonu e te fesili ifo ia te oe lava ni fesili e pei o le “E faapefea ona fetaui ia te au tala o i nei mataupu? “O a savali ua ou mauaina mo lo’u olaga?” po o le “Mata o le a se mea ou te fia faasoa atu i lo’u aiga ma isi?”

Tusifaamaumau Ou Uunaiga

Mata o le a se mea na musuia Peteru e tuua le saogalemu o lona vaa i le totonugalemu o le Sami o Kalilaia i le taimi o se afa matautia? O le a le mea na tata’i atu ai o ia e talitonu afai e mafai e Iesu ona savali i luga o le vai, e mafai foi e ia? E le mafai ona tatou iloa ma le mautinoa, ae peitai atonu na malamalama Peteru na afio mai le Alo o le Atua e le na ona faia o mea ofoofogia mo tagata ae ia faamamanaina foi tagata e faapei o Peteru e faia foi mea ofoofogia. O le valaaulia a Iesu, i lona aotelega, o le “Sau, mulimuli mai ia te au”(Luka 18:22) Na talia faatasi e Peteru lenei valaaulia, ma sa naunau o ia e toe taliaina, tusa pe iu ai ina feagai ma le atuatuvale ma le faia o mea e foliga e le mafai. Atonu o le a le fai mai le Alii ia i tatou e oso ese mai se vaa i le taulotoaiga o se afa pe saofaga atu sina falaoa itiiti pe a fiaafe tagata e fiaaai, ae atonu e fesili mai o Ia ia tatou talia faatonuga e tuuina mai pe a tatou le matuai malamalama atoatoa i ai. Po o a lava Ana valaaulia ia te i tatou, atonu o nisi taimi e foliga mai o se mea e ofo ai pe taufaafefe foi. Ae e mafai ona tutupu vavega pe afai tatou te, pei o Peteru, tuu ese o tatou popolega, o tatou masalosaloga, ma lo tatou malamalama utiuti ae mulimuli atu ma le faatuatua ia te Ia.

Manatu mo Suesuega Faaletagata Lava Ia mo Suesuega o Tusitusiga Paia

Ioane 5:17–47

E faamamalu e Iesu Keriso Lona Tama

O le sootaga a le Tama Faalelagi ma Ana fanau taitoatasi e ao ina o se sootaga e paia. I nei fuaiupu, sa tuu mai ai e Iesu Keriso se faataitaiga musuia e mulimuli ai i la tatou sootaga ma le Tama Faalelagi. Faitau le Ioane 5:17–47, ma maka pe matau taimi taitasi e ta’ua ai le upu Tama Pe faapefea ona faamamaluina e le Alo le Tama, ma pe mafai faapefea ona e mulimuli i Lana faataitaiga? O le a se mea ua e aoao mai pe faapefea lagona o le Tama i le Alo? E mafai faapefea i le faamalosia o lau lua sootaga ma le Tama Faalelagi ona faateleina lou naunautai e saili ma usitai i Lona finagalo?

Tagai foi Ioane 17; Jeffrey R. Holland, “O Le Silisiliese o le Atua,” Ensign po o le Liahona, Nov. 2003, 70–73.

Mataio 14:16–21; Mareko 6:33–44; Ioane 6:5–14

E mafai e le Faaola ona faalauteleina ni taulaga maualalo e faataunuuina ai Ona faamoemoega.

Pe na i ai se taimi na e lagonaina ai lou le agavaa e faafetaiaia manaoga uma e te vaaia i lou siomaga---i lou fale, i au fegalegaleaiga, po o le nuu? Atonu ai na lagonaina e soo o Iesu le faaletonu ina ua Ia fai atu ia te i latou e fafaga le silia ma le lima afe o tagata matelaina i le fiaaai (tagai Mataio 14:21) i le taimi sa na o le lima potoi areto ma i’a e lua na i ai. A o e faitau e uiga i le vavega sa sosoo ai, manatunatu loloto pe na faapefea ona faaaoga e le Atua o taulaga faatauvaa ole auaunaga e faamanuiaina ai i latou i lou siomaga. Pe na faapefea ona Ia faalauteleina au taumafaiga ao e auauna atu i le Ekalesia? Mafaufau i le saunoaga lea a Peresitene James E. Faust: “E toatele tagata e le o ta’ua igoa e i ai meaalofa e tutusa ma le na o le lima o areto ma i’a iti e lua ua faalauteleina o latou valaauga ma auauna atu e aunoa ma se ano atu i ai pe faalauiloaina, o loo fafagaina moni le fiaafe” (“O Areto e Lima ma I’a e Lua,” Ensign, May 1994, 5).

Mataio 14:22–33; Mareko 6:45–52; Ioane 6:15–21

Ua valaaulia au e Iesu Keriso e tuu ese o’u popolega ma masalosaloga ae faaaoga le faatuatua ia te Ia.

Vaai faalemafaufau i faamatalaga o le vaaiga o loo faamatala mai i le Mataio 14:22–33; Mareko 6:45–52; ma le Ioane 6:15–21. Mafaufau pe mata o a ni lagona o Peteru ma isi soo. O le a se mea ua e aoaoina mai le faataitaiga a le Faaola i nei upu ma faatinoga i nei fuaiupu? O le a se mea ua aoao mai upu ma faatinoga a Peteru? (Tagai foi 1 Nifae 3:7.) O le a se mea o valaaulia oe e le Alii e fai e foliga faapei o le laa ese mai le vaa? O le a se mea ua e maua i nei fuaiupu ua avatu ai ia te oe le lototoa e faaaoga lou faatuatua ia Iesu Keriso?

Ioane 6:22–71

I le avea ai o se soo o Iesu Keriso, e tatau ona ou naunau e talitonu ma talia le upumoni, tusa lava pe faigata ona fai.

O le aso lava na sosoo ma le saunia faavavega e Iesu o areto mo le motu o tagata i le vao, sa maua e Ona soo o Ia ma sa toe saili atu mo nisi meaai. Peitai, sa le fiafia i latou ma sa oo lava ina faatausuai ina ua Ia le avatu ni meaai ae ofo atu ia i latou se ituaiga o meaai faaleagaga—o le “areto o le ola” (Ioane 6:48). E toatele na manatu o se “upu faigata” lea (Ioane 6:60).

Pe ua i ai se taimi na e lagonaina ai se mea na aoao atu e le Faaola po o se tasi o Ana auauna sa “faigata” pe o se aoaoga faavae e faigata ona talia? Mafaufau i na aafiaga a o e faitauina lenei tala, aemaise o upu a Peter i fuaiupu 68--69. O a ni nai “upu o le ola e faavavau” (Ioane 6:68) ua fesoasoani ia te oe e tautino atu e mulimuli i le Faaola?

Tagai foi M. Russell Ballard, “O Ai Ea a Matou O I Ai?” Ensign po o le Liahona, Nov. 2016, 90–92.

Manatu mo le Suesuega Faaleaiga o Tusitusiga Paia ma Afiafi Faaleaiga

A o e faitauina faatasi ma lou aiga mau, e mafai ona fesoasoani le Agaga ia te oe e iloa ai po o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga masani nei:

Mataio 14:16–21

A o e faitau e uiga i le fafagaina o le lima afe, e mafai ona e ‘ai sina falaoa ma se i’a ma mafaufau pe o le a le tele o le a fafagaina ai ni tagata e lima afe. Na faapefea ona fagaina faaleagaga lou aiga e Keriso? Na faapefea ona Ia faaaogaina oe e fafaga ai isi?

Na fafagaina faavavega e Iesu le 5,000 o tagata i areto e lima ma i’a e lua.

Mataio 14:22–33

E ono fiafia lou aiga e toefaatino le tala o i fuaiupu nei. Mata aisea na ono fefefe ai le au soo? Aisea na mafai ai e Peteru ona faatoilalo lona fefe ma tuua le vaa? Na faapefea ona ia faaalia le faatuatua e ui ina ua amata ona magoto? E faapefea ona tatou pei o Peteru i nisi o taimi?

Ioane 5:1–16

Valaaulia tagata o le aiga e matau taimi o loo ta’u mai ai le fasifuaitau “ua e malolo” i nei fuaiupu. Ua mafai faapefea e Iesu Keriso ona faamalolo tagata? O anafea ma sa faapefea foi ona Ia faamalolo i tatou?

Ioane 6:28–58

Tufa ia tofu tagata taitasi o le aiga ma se fasi falaoa e ‘ai, ma talanoaina aoga tatou te maua mai le falaoa ma isi meaai maloloina. Ona sailiili faatasi lea o fuaiupu nei, ma vaavaai pe aisea na faaigoa ai e Iesu Keriso o Ia lava o le “areto o le ola”(Ioane 6:35).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia Suesuega Faaletagata Lava Ia

Sailia ou lava malamalamaaga faaleagaga. I lau lava suesuega ma suesuega faaleaiga, aua nei faatuaoia oe lava i mau o loo ta’u atu i otootoga nei. E ono i ai ni savali a le Alii mo oe inei mataupu e le o aofia ai ii. Ia sailiili i ai ma le agaga tatalo.

Faasaga i le Matagi, saunia e Liz Lemon Swindle