“25 Fepuari--3 Mati Mataio 6--7: ‘Ua Ia Aoao ia te i Latou e Pei o Se ua I ai le Pule’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“25 Fepuari--3 Mati Mataio 6--7 “ Sau, Mulimuli Mai ia te Au---Mo Tagata Taitoatasi ma Aiga: 2019
Iesu o Loo Aoao Atu Tagata i le Apitaogalu, saunia e James Tissot.
25 Fepuari--3 Mati
Mataio 6–7
“Ua Ia Aoao ia te i Latou e Pei o Se ua I Ai le Pule”
Pe a tatou faitauina tusitusiga paia ma se fesili i le mafaufau ma se naunautaiga faamaoni ia malamalama i mea e finagalo le Tama Faalelagi ia tatou iloa, ua tatou valaaulia le Agaga Paia e musuia i tatou. A o e faitauina le Mataio 6--7, mataitu lagona uunai nei.
Tusifaamaumau Ou Lagona Uunai
O le Lauga i luga o le Mauga o se tasi o lauga aupito sili ona lauiloa i le faaKerisiano. Na aoao mai e le Faaola i faatusa e mau, e pei o se aai ua tu i luga o le mauga, lautalotalo o le vao, ma luko ua faafoliga o ni mamoe. Ae o le Lauga i luga o le Mauga e sili atu nai lo le na o se saunoaga matagofie. O le mana o aoaoga a le Faaola i Ona soo e mafai ona suia o tatou olaga, aemaise pe a tatou ola ai. Ona oo ai lea ina le na o ni upu Ana afioga; ua avea ma faavae mautu mo le olaga, lea ua faapei ai o le fale o le tagata poto, ua mafai ona tatalia matagi ma lologa o le lalolagi (tagai Mataio 7:24–25).
Manatu mo Suesuega Faaletagata Lava Ia o Tusitusiga Paia
Ua ao ona tuu atu lo’u loto i mea faalelagi.
E le faigofie i taimi uma ona faamuamua mea a le Atua i lo mea o le lalolagi. O le fea o aoaoga a le Faaola i le Mataio 6–7 ua fesoasoani ia te oe e taulai atu ai i mea faalelagi? O a mafaufauga po o lagona uunai ua i ai a o e suesue i Ana afioga? O le a se mea ua musuia oe e fai? Mafaufau e tusifaamaumau ou lagona uunai. Mo se faataitaiga:
|
E tatau ona sili atu ona ou popole i le finagalo o le Atua mo au nai lo manatu o isi. | |
E mafai ona ou latalata atili i le Atua e ala i le tatalo faamaulalo ma le loto faamaoni.
O le Lauga i luga o le Mauga o loo i ai autu e tele ma o autu e te matauina o le a faalagolago, i tulaga o i ai nei lou olaga ma mea e finagalo le Alii e ta’u atu ia te oe.
O se tasi autu o le Mataio 6--7 o le tatalo. Faaaoga sina taimi e iloilo ai au tatalo. O le a sou lagona i au taumafaiga e faalatalata atili i le Atua e ala i le tatalo? O a aoaoga i le Mataio 6--7 ua musuia ai oe ia faaleleia le faiga o au tatalo? Tusifaamaumau ou lagona uunai e te maua mai i le Agaga. Mo se faataitaiga:
|
A ou tatalo e tatau ona ou ta’uta’u ma le migao le suafa o le Tama Faalelagi. | |
|
A ou tatalo, e tatau ona ou faailoa atu lo’u naunauga ia faia le finagalo o le Alii. | |
Atonu e te manao e toe faitau tasi le Lauga i luga o le Mauga, a o le taimi la lenei ia vaavaai mo se isi autu po o se savali e faatatau faapitoa lava ia te oe. Tusifaamaumau mea e te mauaina i se tusi talaaga, faatasi ai ma ou mafaufauga ma lagona.
E mafai ona tatou latalata atili atu i le Atua e ala i le tatalo.
O le a le uiga o le faaaoga le “tautu i upu” i le tatalo.
E tele ina malamalama tagata o le “tautu i upu” o lona uiga o le ta’u faafia o upu lava e tasi. Peitai, o le upu tautu e mafai ona faamatalaina o se mea e leai se aoga. O le faaaogaina o le “tautu i upu” i tatalo e mafai foi ona faauiga o le tatalo e aunoa ma se lagona faamaoni, ma le loto i ai (tagai Alema 31:12--23).
Aisea tatou te le taulagiina ai le Tatalo a le Alii?
Na aoao mai Peresitene Russell M. Nelson “Na faatomua e le Alii Lana tatalo i le poloaiina muamua lea o Ona soo ina ia aloese mai le ‘tautu i upu’ [Mataio 6:7] ma ‘ia faapea ona outou tatalo’ [Mataio 6:9]. O lea, ua avea ai le Tatalo a le Alii o se mamanu e mulimulitai ae le o se fatuga e tauloto taulagi faafia. Ua na ona finagalo le Matai ia i tatou e tatalo atu mo le fesoasoani a le Atua a o tatou taumafai ai e le aunoa e tetee atu i le leaga ae ola amiotonu” (“Lesona MaileTatalo a le Alii,” Ensign po o le Liahona, May 2009, 46–47).
E ao ina ou faamasino ma le amiotonu.
I le Mataio 7:1, e foliga mai o faapea mai le Faaola e le tatau ona tatou faamasino ae i isi mau (e aofia ai isi fuaiupu o le mataupu lenei), o loo Ia tuu mai ai faatonuga ia i tatou i le ala e faamasino ai. Afai e foliga fenumiai lena mea, e ono fesoasoani atu le Faaliliuga a Iosefa Samita o le fuaiupu lenei “Aua nei faamasino atu ma le le tonu, ina ia le faamasinoina outou;; ae ia faia faamasinoga amiotonu” (i le Mataio 7:1, vaefaamatalaga a). O le a se mea ua e maua i le Mataio 7:1--5, faatasi ai ma le vaega o totoe o le mataupu, ua fesoasoani ia te oe ia e iloa ai le ala e “faia ai faamasinoga amiotonu”?
Tagai foi “Judging Others,” Faamaoni i le Faatuatua, 90–91; Lynn G. Robbins, “O Le Faamasino Amiotonu,” Ensign po o le Liahona, Nov. 2016, 96–98.
Ua oo ina ou iloa Iesu Keriso e ala i le faia o Lona finagalo.
O le fasifuaitau “Ou te lei iloa lava outou” i le Mataio 7:23 na suia i le Faaliliuga a Iosefa Samita i le “Tou te lei iloaina lava au” (Mataio 7:23, vaefaamatalaga a). Ua fesoasoani faapefea lea suiga ia te oe e malamalama atili ai i le mea o loo aoao mai e le Alii i fuaiupu 21--22 e uiga i le faia o Lona finagalo? O le a le lelei o lou lagona ua e iloa le Alii? O le a se mea e mafai ona e faia ia iloa aitili ai o Ia?
Tagai foi David A. Bednar, “A na Iloa e Outou o A’u,” Ensign po o le Liahona, Nov. 2016, 102–5.
Manatu mo le Suesuega Faaleaiga o Tusitusiga Paia ma Afiafi Faaleaiga
A o e suesueina ma lou aiga le Lauga i luga o le Mauga, e mafai e le Agaga ona fesoasoani ia te oe ia iloa pe o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga nei:
O se tasi auala e aoao ai o se aiga mai le Mataio 6–7 o le matamata lea i vitio “Lauga i luga o le Mauga: O Le Tatalo a le Alii” ma le “Lauga i luga o le Mauga: O Oa i le Lagi” (LDS.org). E mafai e tagata o le aiga ona mulimuli ai i a latou tusitusiga paia ma taofi le vitio i taimi uma latou te faalogo ai i se mea latou te mananao e talanoaina. E mafai na faia lea gaoioiga i ni aso, pe a manaomia.
O le a se mea e mafai ona tatou aoao e uiga i le tatalo mai le ala sa tatalo ai le Faaola? E mafai faapefea ona tatou faaaogaina Lana tatalo o se faataitaiga e faaleleia ai a tatou tatalo faletagata lava ia ma faaleaiga? (Tagai foi Luka 11:1–13.). Afai e i ai sau fanau e laiti tele, e mafai ona outou faataita’ia faatasi le tatalo.
O le a le uiga ia te oe o le “saili … muamua le malo o le Atua”? O faapefea ona tatou faia o lea mea o se aiga?
E mafai ona e faaaogaina sina tama’i fasi laau ma se fasi laau tele e faatusa i se fasilaau ma se utupoto a o outou talanoaina ia aoaoga a le Faaola e uiga i le faamasinoina o isi. Fuafua e faitau le faaulutala “Faamasinoina o Isi” i le Faamaoni i le Faatuatua, 90–91, o se vaega o lenei talanoaga.
Ina ia fesoasoani i lou aiga ia malamalama atili i le faataoto a le Faaola i le tagata poto ma le tagata valea, e mafai ona e tuu atu ia i latou e liligi se vai i luga o le oneone ona liligi lea i luga o se maa. E mafai faapefea ona tatou fausia o tatou faavae faaleagaga i luga o se papa?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava Ia
Fefaasoaai malamalamaaga. O le talanoaina o mataupu faavae tou te aoaoina mai a outou suesuega faaletagata lava ia e le gata o se auala lelei e aoao atu ai isi, ae e fesoasoani ai foi e faamalosia lou lava malamalama. Taumafai e faasoa atu se mataupu faavae na e aoaoina mai le faitauga faatasi ma se tagata o le aiga i lenei vaiaso pe i a outou vasega i le Lotu.
Sa Ou Tatalo mo Oe, saunia e Del Parson