“18--24 Fepuari Mataio 5: Luka 6; ‘Amuia Outou’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“8--24 Fepuari Mataio 5; Luka 6,” Sau, Mulimuli Mai ia te Au---Mo Tagata Taitoatasi ma Aiga: 2019
Lauga i luga o le Mauga, saunia e Jorge Cocco
18--24 Fepuari
Mataio 5; Luka 6
“Amuia outou”
Mataitu lagona uunai e te mauaina a o e faitauina le Mataio 5 ma le Luka 6, ma tusifaamaumau i se tusi talaaga. E mafai ona fesoasoani lenei otootoga e te faailoa mai ai nisi o mataupu faavae aupito taua ma talafeauga i nei mataupu.
Tusifaamaumau Ou Lagona Uunai
O le taimi lenei o Lana galuega, sa manino lava o aoaoga a Iesu o le a le pei o mea sa masani ona faalogo i ai tagata o Ona taimi. O le a maua e e matitiva le malo o le Atua? O le a fai ma tofi o e agamalu le lalolagi? Amuia e sauaina? Sa lei aoaoina atu e le au tusiupu ma le au Faresaio ia ituaiga o mea. Ae peitai, ia i latou o e na malamalama moni i le tulafono a le Atua, sa sa’o se lagona i nei aoaoga faavae. “O le mata i le mata” ma le “ia inoino i le ua ita mai ia te oe” o tulafono maualalo ia (Mataio 5:38, 43), na tuuina atu i tagata o e sa lei naunau e ola i le tulafono maualuga. Peitai na afio mai Iesu Keriso e faataunuu le tulafono maualalo ma aoao mai le tulafono maualuga (tagai 3 Nifae 15:2–10) lea na mamanuina e fesoasoani ia te i tatou ia i ai se aso tatou te “atoatoa ai e pei o [lo tatou] Tama o i le lagi e atoatoa ona lelei o ia” (Mataio 5:48).
Manatu mo Suesuega Faaletagata Lava Ia o Tusitusiga Paia
O le fiafia tumau e maua i le ola ai i le ala na aoao mai e Iesu Keriso
E mananao tagata uma e fiafia, ae e le o tagata uma o loo su’ea le fiafia i nofoaga lava e tasi. O nisi o loo sailia le fiafia i le malosiaga ma tulaga faalelalolagi, o isi i oa po o le faamalieina o manaoga faaletino. Na afio mai Iesu Keriso e aoao mai le ala i le fiafia tumau, e aoao mai le uiga moni o le faaamuia. O le a le mea ua e aoaoina e uiga i le mauaina o le fiafia tumau mai le Mataio 5:1–12 ma le Luka 6:20–26? Ua ese faapefea lea mai manatu o le lalolagi i le fiafia?
O a fesili po o lagona uunai e oo mai i lou mafaufau a o e faitauina fuaiupu taitasi? O a mea o aoao mai ia te oe e nei fuaiupu e uiga i le avea ma se soo o Iesu Keriso? O le a se mea ua musuia oe e fai e atiinae ai uiga auaumama o loo faamatala mai i nei fuaiupu?
Tagai foi Ioane 13:17; 3 Nifae 12:3–12; “Sermon on the Mount: The Beatitudes” (video, LDS.org).
Aisea na faatusatusa ai e le Faaola Ona soo i le masima?
Ua leva ona faaaoga le masima e faasao ai, faamanogi, ma faamama. Sa i ai foi le uiga faalelotu o le masima mo tagata Isaraelu. Sa i ai se fesootaiga ma faiga anamua o taulaga sa osia i manu i lalo o le tulafono a Mose (tagai Levitiko 2:13; Numera 18:19). A leai se tofo o le masima, ona le aoga lea, pe “leai se mea e toe aoga ai” (Mataio 5:13). E tupu le mea lea pe a faafefiloi pe faaleagaina e isi elemene. I le avea ai ma soo o Keriso, tatou te tusisia lo tatou te faatumauina lo tatou “tofo” i le aloese mai le faaleagaina faaleagaga mai le lalolagi. O lea mea e mafai ai ona tatou faataunuuina la tatou galuega o le faasaoina ma le faamamaina o se masima o le lalolagi---mo se faataitaiga, e ala i le faasoa atu o le talalelei ma le avea o se tosiga mo le lelei i le lalolagi (tagai MF103:9--10)
“O outou o le masima o le lalolagi” (Mataio 5:13).
O le tulafono a Keriso ua suia ai le tulafono a Mose.
Atonu na ofo le au soo i le faalogo atu o fetalai Iesu faapea e manaomia ona sili atu o la latou amiotonu i lo tusiupu ma le au Faresaio (tagai Mataio 5:20), o e sa faamaualugaina i latou lava i le lelei o lo latou tausiga o tulafono a Mose. Ae na aoao mai e Iesu se tulafono maualuga e le gata ina siitia ai a tatou faatinoga ae faapea foi mafaufauga ma lagona e musuia ai. (tO lenei tulafono maualuga sa sili atu mea na manaomia ai: o le loto, agaga, ma le mafaufau (tagai Mataio 22:37).
A o e faitauina le Mataio 5:21–48 ma le Luka 6:27–35, fuafua e maka amioga e moomia i le tulafono a Mose (“Ua outou faalogo na …”) ma le mea na aoao mai e Iesu e siitia ai i latou.
Mo se faataitaiga, o le a le mea na aoao mai e Iesu i le Mataio 5:27--28 e uiga i lo tatou tiutetauave i o tatou mafaufauga? E mafai faapefea ona e faafoea atili mafaufauga e oo mai i lou mafaufau ma le loto?” (tagai MFF 121:45).
Tagai foi “Sermon on the Mount: The Higher Law” (video, LDS.org).
Pe o faamoemoe moni mai ea le Tama Faalelagi ia ou atoatoa?
Na aoao mai Peresitene Russell M. Nelson:
“O le upu atoatoa sa faaliliuina mai le faa Eleni teleios, o lona uiga ‘ua atoa.’ … O le fatuga faasino o le veape o le teleiono, o lona uiga o le ‘ia tau i se faaiuga mamao, ia atoatoa ona atiina a’e, ia faamae’a, pe faauma.’ Faamolemole ia matau o le upu e le o faaataata mai i le upu se ‘saolotoga mai mea sese’; o loo aumaia ai le ‘ausia o se faamoemoega mamao.’ …
“… Ua aoao mai le Aliit, ‘E le mafai ona outou gafatia luma o le Atua i le taimi nei … ; o le mea lea, ia outou faaauau pea i le onosai seia faatoatoaina outou’’ [MFF 67:13].
“E le tatau ona tatou lotovaivai pe afai ua foliga mai ua matua faigata ma le maea a tatou taumafaiga faamaoni agai atu i le atoatoaga. O loo faatalitali le atoatoaga. E oo mai lona atoatoaga pe a maea le Toetu ma e na o le Alii lava e ala ai. E faatalitali mai mo i latou uma o e alolofa ia te Ia ma tausia Ana poloaiga” (“Atoatoaga o Loo Faatalitali,” Ensign, Nov. 1995, 86, 88).
Tagai foi Filipi 3:13–15; 2 Peteru 1:3–11; Faaaliga 3:21–22; 3 Nifae 27:27; Moronae 10:32–33; Mataupu Faavae ma Feagaiga 76:69
Manatu mo Suesuega Faaleaiga o Tusitusiga Paia ma Afiafi Faaleaiga
A o faitau faatasi e lou aiga ia mau, e mafai ona fesoasoani le Agaga e te iloa ai pe o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
O a mataupu faavae o loo aoao mai i le Mataio 5:1--9 e mafai ona fesoasoani ia avea lou fale ma se nofoaga e sili ona fiafia? E mafai ona e taulai i se tasi pe lua a o e suesueina le Lauga i luga o le Mauga i nai vaiaso e sosoo ai. Mo se faataitaiga, o a aoaoga e mafai ona fesoasoani i tagata o lou aiga ia avea ai i latou ma e faatupuina le filemu? (tagai Mataio 5:21–25, 38–44). O a sini e mafai ona e faatuina? O le a faapefea ona e tulitataoina?
Ina ia fesoasoani ia malamalama lou aiga i le uiga o le avea ma “malamalama o le lalolagi,” e mafai ona outou suea nisi o faapogai o le malamalama i lo outou fale, o outou tuaoi, ma le lalolagi. E ono fesoasoani le faaali atu o le mea e tupu pe a e nanaina se malamalama. O le a le uiga o le o le fetalaiga a Iesu ina ua Ia fai mai, “O outou o le malamalama o le lalolagi”? Mataio 5:14). O ai na pei o se malamalama mo lo tatou aiga? E mafai faapefea ona avea i tatou ma malamalama i isi? (tagai MFF 103:9--10).
Aisea e finagalo ai le Alii ia tatou tatalo mo i latou o e sa agaleaga ia te i tatou? E mafai faapefea ona tatou ola i lenei mataupu faavae i o tatou aiga?
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Ia Mataala Ao e mataituina mea o loo tupu i olaga o lau fanau, o le a e maua avanoa silisili e aoao atu ai. O manatu ma fesili a lau fanau i le aso atoa e mafai foi ona taitai atu ai i ni taimi lelei e aoao atu ai. (Tagai Aoao Atu i le Ala a le Faaola, 16.)
“O outou o le malamalama o le lalolagi” (Mataio 5:14).