Ua Manumalo Keriso ia Satani, saunia e Robert T. Barrett

4--10 Fepuari

Mataio 4; Luka 4–5

“Ua i O’u luga le Agaga o le Alii”

Amata i le faitauina o le Mataio 4 ma le Luka 4–5, ma mataitu soo se malamalamaaga e te mauaina. E mafai ona fesoasoani ia te oe manatu suesue o i lenei otootoga e te iloa ai mataupu faavae taua i nei mataupu.

Tusifaamaumau Ou Lagona Uunai

Mai lava i Lona talavou, sa foliga na silafia e Iesu e i ai Sana misiona tulagaese, ma le paia. Ae a o tapenapena Iesu e amata Lana galuega i le lalolagi nei, sa saili le fili e toto le masalosalo i le mafaufau o le Faaola. “Afai o oe o le Alo o le Atua,” na fai atu ai Satani (Luka 4:3, ua faaopoopo le faatusilima). Ae na talanoa felata’i le Faaola ma Lona Tama oi le Lagi. Sa Ia silafia mau, ma sa Ia silafia o Ia lava. Ia te ia, o le ofo a Satani---”Ou te avatua ia te oe lenei pule uma” (Luka 4:6)—o se ofo e gaogao ii, aua o le tapenaga a le Faaola i Lona soifuaga atoa na mafai ai e Ia ona maua “le mana o le Agaga” (Luka 4:14). O le mea lea, e ui i faaosoosoga, tofotofoga, ma le le taliaina, sa lei faaluafesasi lava Iesu Keriso i Lana galuega na tofia i ai: “E tatau ona ou folafola le tala lelei o le malo o le Atua … aua o le mea lea na auina mai ai a’u” (Luka 4:43).

Manatu mo Suesuega Faaletagata Lava Ia o Tusitusiga Paia

Mataio 4:1–2

O le talanoa felata’i ma le Atua e saunia ai au e auauna atu ia te Ia.

Ina ia saunia mo Lana misiona, sa alu Iesu i le vao, “ina ia faatasi ma le Atua” (Faaliliuga a Iosefa Samita, Mataio 4:1 [i le Mataio 4:1, vaefaamatalaga e]) Mafaufau i le mea e te faia ina ia lagona ai le latalata atu i le Atua. E saunia faapefea oe e lena mea mo le galuega e finagalo o Ia e te faia?

Mataio 4:1–11; Luka 4:1–13

Ua faatu e Iesu Keriso le faataitaiga mo au e tetee atu ai i faaosoosoga.

O nisi taimi e lagona ai e tagata le tausalaina pe a faaosoosoina i latou e fai le agasala. Ae peitai e oo lava i le Faaola, o le sa soifua “e leai se agasala” (Eperu 4:15), na faaosoosoina. E mafai ona faamafanafanaina i le iloa ai talu ai na fetaiai foi Keriso ma tofotofoga ma sa Ia faatoilaloina, ua Ia silafia ai tofotofoga tatou te fetaiai ma ua mafai ona fesoasoani ia i tatou e faatoilaloina (tagai Eperu 2:18; Alema 7:11 12).

A o e faitauina le Mataio 4:1–11 ma le Luka 4:1–13, o le a se mea e mafai ona e aoaoina lea e mafai ona fesoasoani ia te oe pe a oulua fetaiai ma tofotofoga? E mafai ona e faatulagaina ou mafaufauga i se siata faapei o lea:

Iesu Keriso	O A’u
Iesu Keriso O le a le mea na tofotofo e Satani ia Keriso e fai? Faaaoga Lona mana e faamalie ai Lona fiaai	O A’u O le a se mea e faaosooso au e Satani ia ou faia?”
Iesu Keriso Aisea na saunia ai Keriso e tetee atu i faaosoosoga? Sa anapogi o Ia; sa alu o Ia ina ia mafuta ma le Atua; Sa Ia iloa tusitusiga paia.	O A’u E mafai faapefea ona ou saunia e tetee atu i faaosoosoga?
Iesu Keriso	O A’u

O a ni malamalamaaga faaopoopo ua e maua mai le Faaliliuga a Iosefa Samita Mataio 4? (tagai vaefaamatalaga o i le Mataio 4).

Tagai foi 1 Korinito 10:13; Alema 13:28; Mose 1:10–22; “Tofotofoga,” Gospel Topics, topics.lds.org.

Luka 4:16–32

O Iesu Keriso o le Mesia na valoia.

Afai e fesili atu se tasi ia te oe pe o le a le mea na auina mai Iesu Keriso i le lalolagi e fai, o le a lau tala? I le Luka 4:18–19, sa faamatala e le Faaola itu o Lana lava misiona i lona sii maia o se tasi o valoaga a Isaia e uiga i le Mesia (tagai Isaia 61:1–2). O le a le mea na e aoaoina e uiga i Lana misiona a o e faitauina nei fuaiupu?

Sa tautino atu e Iesu o Ia o le Mesia.

E ui ina sa faatalitali Iutaia mo seneturi i le faataunuuina o le valoaga a Isaia, ae toatele e lei taliaina o Iesu o le Mesia ina ua Ia tautino mai, “O le aso nei ua taunuu ai lenei tusi o outou o faalogologo ai” (Luka 4:21). A o e faitauina le Luka 4:20–30 (tagai foi i le Mareko 6:1–6), taumafai e tuu oe lava e sui ai tagata o Nasareta. Pe i ai lava se mea e ono taofia ai oe mai le taliaina atoatoa o Keriso e avea ma ou Faaola patino?

Tagai foi i le Mosaea 3:5–12; “Jesus Declares He Is the Messiah” (video, LDS.org).

Mataio 4: 18--22; Luka 5:1--11

A ou faalagolago i le Alii, e mafai e Ia ona fesoasoani mai ia te au ia ou ausia o’u gafatia paia.

Na aoao mai Peresitene Ezra Taft Benson “O alii ma tamaitai e liliu atu o latou olaga i le Atua o le a iloaina e mafai ona Ia faia le anoanoai o mea i o latou olaga nai lo mea latou te mafaia” (Aoaoga a Peresitene o le Ekalesia: Ezra Taft Benson [2014], 48). O le mea lea na tupu ia Peteru ma ona uso a faifaiva. Sa fesoasoani Iesu ia i latou ia iloa e mafai ona sili atu mea latou te faia nai lo le fagotaina o i’a---e mafai ona avea i latou ma “faifaiva i tagata” (Mataio 4:19; tagai foi Luka 5:10). Ina ia fesoasoani ia latou iloa lenei mea, sa faaaoga ai e Iesu ia poto masani sa latou masani ai.

O anafea na e lagona ai ua valaau mai le Alii ia te oe e te mulimuli atu ia te Ia? E mafai faapefea ona e faaali atu i le Alii ua e naunau e “[lafoai] mea uma” (Luka 5:11) ina ia mulimuli ia te Ia? Manatunatu loloto i fesili nei a o e faitauina le Mataio 4:18–22 ma le Luka 5:1–11.

Tagai foi “Mulimuli Mai ia te Au,” Viiga, nu. 62.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia mau, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:

Mataio 4:1–2; Luka 4:1–2

Sa anapogi Iesu a o lei faaosoosoina o Ia e le fili. O a ni malamalamaaga e mafai ona tatou maua mai lenei tala e uiga i le mana o le anapogi? O faamatalaga o i le “Fasting and Fast Offerings,” Gospel Topics, topics.lds.org e ono fesoasoani ia te oe e taitai ai se talanoaga a le aiga e uiga i le anapogi. E mafai ona e valaaulia tagata o le aiga e faasoa mai aafiaga na latou maua i le anapogi. Atonu e mafai ona faia e lo outou aiga ni fuafuaga ma le loto tatalo e anapogi faatasi mo se faamoemoega patino.

Mataio 4:3–4; Luka 4:3–4

Ina ua faaosoosoina Keriso e Satani e faaliliu se maa e avea o se areto, sa ia luitauina le faasinomaga paia o Keriso i lona fai atu, “Afai o oe o le Alo o le Atua” (Mataio 4:3, ua faaopoopo le faatusilima). Aisea e taumafai ai Satani e faamasalosalo i tatou i o tatou faasinomaga paia? O faapefea ona ia taumafai e fai lenei mea? (Tagai foi Mose 1:10–23.)

Faaliliuga a Iosefa Samita, Mataio 4:11

Ina ua uma ona tofotofoina faaletino ma faaleagaga ia Iesu, sa liliu atu Ona mafaufauga i manaoga o Ioane le Papatiso, o le sa i le falepuipui: “O lenei foi sa silafia e Iesu ua lafoina Ioane i le falepuipui, ma sa ia auina atu agelu, ma, faauta, sa latou o mai ma auauna atu ia te ia [Ioane]” (Faaliliuga Iosefa Samita, Mataio 4:11 [i le Mataio 4:11, vaefaamatalaga a). O faamanuiaina faapefea i tatou a o tatou mulimuli i le faataitaiga a Keriso o le mafaufau muamua i isi nai lo i tatou? E mafai faapefea ona tatou mulimuli i Lana faataitaiga?

Luka 4: 16--21

Pe tatou te iloa se tasi ua lotonutimomoia pe o se o manaomia ia “tuusaoloto”? (Luka 4:18). E mafai faapefea ona tatou fesoasoani i isi ia maua le faamalologa ma le tuusaolotoina e le Faaola? Atonu foi e te manao e talanoaina pe faapefea e le faatinoina o sauniga o le malumalu ona fesoasoani e aumaia le “tuusaolotoina o e faasauaina” (Luka 4:18

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Faaleleia o Lo Tatou Aoao Atu

Ola i le talalelei a Iesu Keriso. “Atonu o le mea aupito taua e mafai ona e faia o se matua po o se faiaoga] o le … ola i le talalelei ma lou loto atoa… O le ala autu lea e agavaa ai mo le mafutaga a le Agaga Paia. E te le tau atoatoa, na o le taumafai ma le filiga—ma saili le faamagaloga e ala i le Togiola a le Faaola i soo se taimi e te tautevateva ai” (Aoao Atu i le Alaa le Faaola, 13).

O Le Valaau, saunia e Jorge Cocco