Ua Manumalo Keriso ia Satani, saunia e Robert T. Barrett

Fepuari 4–10.

Mataio 4; Luka 4–5

“Ua i O’u Luga le Agaga o le Alii”.

Amata lau tapenapenaga mo lenei lesona i le faitauina o le Mataio 4 ma le Luka 4–5. Sau, Mulimuli Mai—Mo Tagata Taitoatasi ma Aiga e mafai ona fesoasoani i nei mataupu, ma e mafai ona avatu e lenei otootoga ia te oe ni manatu faafaiaoga.

Tusifaamaumau Ou Lagona Uunai

Valaaulia le Fefaasoaai

Fai i tamaiti e pasi atu se ata o Iesu mai lea tamaitiiti i le isi. A o maua e tamaiti taitasi le ata, valaaulia o ia e faasoa mai se mea na faia e Iesu ina o i ai o Ia i le lalolagi.

Aoao atu Aoaoga Faavae

Tamaiti Laiti Ifo

Mataio 4:1–11; Luka 4:1–13

E mafai ona ou filifilia le mea sa’o pei ona faia e Iesu.

O tamaiti laiti “e le mafai ona agasala” (MFF 29:47). Peitai, o le tala ia Iesu i le teenaina o faaosoosoga a Satani e mafai ona musuia ai tamaiti e amata nei ona filifili le mea sa’o.

O Gaoioiga e Mafai Ona Fai

• Faamatala le tala o faaosoosoga o Iesu mai le Mataio 4:1–11 (Tagai foi “Mataupu 11: Ua Tofotofoina Iesu,” Tala o le Feagaiga Fou, 30–31, po o le vitio e o faatasi ai LDS.org.) Pe a oo i vaega talafeagai i le tala, fesili, “O le a se mea e te manatu e tatau ona fai e Iesu?”

• Faaali se ata o Iesu Keriso, ona faamatala lea o filifiliga a se tamaitiiti e ono faia? Mo filifiliga lelei taitasi, fai i tamaiti e la’a tasi agai i le ata. Mo filifiliga leaga taitasi, fai i tamaiti e la’a tasi ese mai ai.

• Fesoasoani i tamaiti e aoao ia upu o le “Filifili Le Ala Sa’o,” Tusipese a Tamaiti, 82, e faaaoga ai ata, meafaitino, po o isi fesoasoaniga vaaia e o faatasi ma upu.

Luka 4:18–19

O Iesu Keriso o lo’u Faaola

Luke 4:18–19 o loo lisi mai ai itutino o le misiona a Iesu. E mafai faapefea ona e fesoasoani i tamaiti e talisapaia mea sa Ia faia mo i latou?

O Gaoioiga e Mafai Ona Fai

• Faitau le Luka 4:18–19 i tamaiti, ma faamalamalama atu i ai le mea na auina mai Iesu Keriso i le lalolagi e fai (aoao atu, faamafanafana, ma faamalolo tagata). Faasoa pe na faapefea ona Ia faia lenei mea mo oe.

• Valaaulia ni nai tamaiti e faafoliga faapea ua fenumiai, faanoanoa, pe ma’i. Fai i isi tamaiti e faatino i taga mea e mafai ona latou fai e fesoasoani ai ia te i latou. Molimau atu na sau Iesu Keriso e aoao mai, faamafanafana, ma faamalolo i tatou, ma e tatau ona tatou mulimuli i Ana faataitaiga

• Faaali ni ata o Iesu o faataunuuina vaega o Lana misiona (tagai Tusi Ata o le Talalelei), ma fai i tamaiti e faamatala mai mea o loo faia e Iesu. Faaali atu foi ata o tagata o loo taumafai e avea faapei o Iesu (e mafai ona e maua nisi i mekasini a le Ekalesia).

• Tusi i ni fasipepa ia fasifuaitau e amata i le “Ona o Iesu Keriso” (e pei o le “Ona o Iesu Keriso, ua mafai ai e lo’u aiga ona faatasi e faavavau”). Valaaulia tamaiti taitasi e piki se fasipepa, ma fesoasoani ia te ia e faitau le fasifuaitau.

Mataio 4:18–22; Luka 5:1–11

Ua valaaulia Iesu Keriso i tatou e avea ma “fai faiva i tagata.”

O le valaau a le Faaola, “Mulimuli Mai ia te Au, Ou te faia oulua ma fai faiva i tagata” (Mataio 4:19), e faatatau i tagata uma, e aofia ai ma tamaiti.

O Gaoioiga e Mafai Ona Fai

• Valaaulia ni tamaiti se toalua e faafoliga faapea o Simona Peteru ma Aneterea a o e faitauina le Mataio 4:18–22. Fesoasoani i tamaiti e faailoa mai mea na lafoai e nei tagata ae mulimuli ia Iesu.

• Tuu i tamaiti e feauaua’i e faamatala le tala mai nei fuaiupu e faaaoga ai le ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga

• Usu faatasi le “O le a Ou Mulimuli i le Fuafuaga a Le Atua,” Tusipese a Tamaiti 86. O le a se mea ua tatou aoao mai lenei pese e uiga i le mulimuli ia Iesu Keriso?

• Faaaoga le itulau o gaoioiga o le vaiaso lenei e talanoaina ai ma tamaiti pe mafai faapefea ona avea i latou ma “fai faiva i tagata” e ala i le mulimuli ia Iesu. E mafai foi ona fai se taaloga faafetaui: ‘oti mai ni kopi se lua o i’a, tuu faafao i lalo, ma valaaulia tamaiti e fuli i luga ta’itasi i le taimi e faafetaui.

Ua Valaau e Keriso So’o e Toalua, saunia e Gary Earnest Smith

Aoao atu Aoaoga Faavae

Tamaiti Matutua Atu

Mataio 4:1–11; Luka 4:1–13

Ua faatuina e Iesu le faataitaiga mo au e teena faaosoosoga.

E oo lava ia Iesu Keriso sa faaosoosoina e Satani, ae sa le’i faamatuu atu lava o Ia i ai. E mafai faapefea ona e fesoasoani i tamaiti e mulimuli i Lana faataitaiga?

Gaoioiga e Mafai Ona Fai

• Fai se siata i le laupapa ma faaigoa O Faaosoosoga a Satani ma le O Tali a Iesu. Fesoasoani i tamaiti e faatumu le siata e faaaoga ai le Mataio 4:1–11 ma le Luka 4:1–13. Fesili i tamaiti pe mafai faapefea ona latou mulimuli i le faataitaiga a Iesu.

• Tusi ni nai tulaga faataitai lea e ono tofotofoina ai se tamaitiiti e fai se faaiuga sese. Tuu atu i se tamaitiiti e filifili se tulaga faataitai se tasi e faitau, ma talanoaina ma le vasega pe mafai faapefea ona latou teena le tofotofoga i lea tulaga.

Mataio 4:1–2

E mafai ona fesoasoani le anapogi ma lagona ai le latalata atu i le Tama Faalelagi.

A o lei amataina Lana galuega, na anapogi Iesu ma fesootai atu i le Atua” (Faaliliuga Iosefa Samita, Mataio 4:2 [i le Mataio 4:2, vaefaamatalaga c]). Fesoasoani i tamaiti ia iloa pe mafai faapefea e le anapogi ona latou maua ai le malosi faaleagaga ma fesoasoani ia latou lagona le latalata atu i le Tama Faalealagi.

Gaoioiga e Mafai Ona Fai

• Valaaulia se tamaitiiti e faitau leotele le Mataio 4:1–2 e faaaoga ai le faafouga o le Faaliliuga a Iosefa Samita o loo maua i le vaefaamatalaga. O le a le mea na faia e Iesu ina “ia faatasi ma le Atua”? Faasoa atu pe na faapefea ona fesoasoani le anapogi ia te oe e latalata atili ai i le Tama Faalelagi.

• Valaaulia tamaiti na anapopogi muamua e faasoa mai o latou aafiaga. E faapefea ona latou faamatalaina le anapogi i se tasi e lei anapogi lava muamua?

• Tusi fesili e uiga i le anapogi (e pei o le aisea, o anafea, po o le pe faapefea ona tatou anapogi) i ni fasipepa, ona tuu lea i se pesini. Valaaulia tamaiti e piki se fesili ma taumafai e tali. O a aafiaga e mafai ona e faasoa mai pe faasoa mai e tamaiti e uiga i le anapogi?

Luka 4:1–62, 28–30

O Iesu Keriso o lo’u Faaola

Mafaufau loloto pe o faapefea ona faamanuiaina lou olaga e le Faaola. E mafai faapefea ona e fesoasoani i taimi ia talisapaia atili Ana tosinaga i o latou olaga?

Gaoioiga e Mafai Ona Fai

• Valaaulia se tamaitiiti e sau sauni i le vasega e aotele le Luka 4:16–30. E ono fesoasoani le faaaoga o le “Mataupu 17: Angry People in Nazareth,” Tala o le Feagaiga Fou, 42–43; le vitio e o faatasi ai (LDS.org); po o le vitio o “Jesus Declares He Is the Messiah” (LDS.org).

• Faitau leotele le Luka 4:18 a o mulimuli atu ai tamaiti. Fai i ai e fatu se lisi o mea na fai mai le Faaola na sau o Ia e fai. Valaaulia tamaiti e faasoa mai faataitaiga o taimi na faia ai e Keriso nei mea, i tusitusiga paia po o o latou olaga.

Mataio 4:18–22; Luka 5:1–11

Ua valaaulia i tatou e Iesu Keriso e mulimuli atu ia te Ia ma avea o “fai faiva i tagata.”

E tele auala e mafai ai e tamaiti ona mulimuli i le Faaola ma avea ma “fai faiva i tagata” (Mataio 4:19). E faapefea ona e fesoasoani ia i latou ia iloa le tosinaga lelei e mafai ona latou fai i isi?

Gaoioiga e Mafai Ona Fai

• Valaaulia tamaiti e faitau le Mataio 4:18–22 ma le Luka 5:1–11 Na faapefea ona tali atu soo o Ie.su i Lana valaau e mulimuli atu ia te Ia? O le a se mea e mafai ona tatou faia e mulimuli atili ai i la latou faataitaiga?

• Faaali atu i tamaiti ni nai mea fagota po o se ata o se faifaiva. O le a le uiga o le avea ma “faifaiva i tagata”? O a meafaigaluega o i ai e fesoasoani ai e avea ma fai faiva i tagata?

Fautuaina le Aoaoina i le Aiga

Valaaulia tamaiti e faasoa atu i o latou aiga mea sa latou aoaoina e uiga i le avea ma fai faiva i tagata.

Faaleleia o Lo Tatou Aoao Atu

E mafai ona iloa e tamaiti le tosinaga a le Agaga. Aoao atu i tamaiti o lagona o le filemu, alofa, ma le mafanafana latou te mauaina, pe a latou talanoa po o le usu le pese e uiga ia Iesu Keriso ma Lana talalelei e mai le Agaga Paia. E mafai e nei lagona ona fausia a latou molimau.