O le faamalama lanu i le Malumalu o Navu Ilinoi, saunia e Tom Holdman

Ianuari 28–Fepuari 3

Mataio 3; Mareko 1; Luka 3

“Ina Teuteu ia Outou le Ala o le Alii”

A o e faitau e uiga ia Ioane le Papatiso ma le papatisoga o Iesu Keriso, tusifaamaumau soo se lagona uunai e te maua. Sau,Mulimuli Mai ia te Au—mo Tagata Taitoatasi ma Aiga e mafai ona fesoasoani e te malamalama ai i nei mau, ma o le a fesoasoani ia te oe e lagolago ai mea o aoaoina e tagata o le vasega e latou lava.

Tusifaamaumau Ou Lagona Uunai

Valaaulia le Fefaasoaai

Ina ia tuu atu i tamaiti se avanoa e fefaasoaai ai mea ua uma ona latou aoaoina, faaali i ai se ata o Iesu o loo papatisoina, ma fai i ai e faamatala mai le mea o loo tupu i le ata ma pe o a latou lagona ina ua papatiso.

Aoao atu Aoaoga Faavae

Tamaiti Laiti Ifo

Mataio 3:13–17

E mafai ona ou papatiso e pei ona faia e Iesu.

E mafai faapefea ona e faaaogaina le tala i le papatisoga o Iesu e fesoasoani ai i tamaiti ina ia saunia e papatiso?

Gaoioiga e Mafai Ona Fai

• Aotele le tala i le papatisoga o le Faaola (tagai Mataio 3:13–17; tagai foi “Mataupu 10: Ua Papatisoina Iesu,” Tala o le Feagaiga Fou, 26–29, po o le vitio e o faatasi ai o i le LDS.org). Faifai pea le tala mo ni nai taimi ma valaaulia tamaiti e faasoa mai ni faamatalaga latou te manatua. Faamalamalama atu na papatiso Iesu e ala i le faatofuina e se tasi sa i ai le pule o le perisitua.

• Faaali se ata o Iesu o loo papatisoina ma le itulau o gaoioiga o lenei vaiaso. Tuu i tamaiti e faasino mai mea e tutusa ai ata e lua.

• E mafai ona outou toe iloiloina folafolaga o le a faia e tamaiti pe a papatisoina (tagai Mosaea 18:8–10; MFF 20:37; Faamaoni i le Faatuatua, 23). Fesili pe o fea o nei mea ua uma ona latou faia.

• Valaaulia se tasi o le au epikopo e ta’u i tamaiti e uiga i le faatalanoaga o le papatisoga e fai a o lei papatisoina i latou,

• Usu faatasi ma tamaiti le “Papatisoga” Tusipese a Tamaiti, 100–101 Mafaufau e fai i se tamaititi e iloa lelei le pese e taitai isi tamaiti a o latou usuina le pese.

E mafai ona tatou mulimuli i le faataitaiga a Iesu Keriso e ala i le papatisoina.

Mataio 3:11, 16

E fesoasoani le Agaga Paia ia te au.

E le gata i le sauniuni mo le papatisoga, ae e saunia foi tamaiti e maua le meaalofa o le Agaga Paia. E mafai faapefea ona e fesoasoani ia i latou?

Gaoioiga e Mafai Ona Fai

• Faaaoga le Mataio 3:11, 16 e aoao atu ai tamaiti faapea na faapepepepe ifo le Agaga Paia i luga o Iesu ina ua papatisoina o Ia (sa faaali ifo se lupe o se faailoga e iloa ai na tupu lenei mea). Faaali le ata O Le Meaalofa o le Agaga Paia (Tusi Ata o le Talalelei, nu. 105), ma faamalamalama atu tatou te maua le meaalofa o le Agaga Paia pe a faamauina i tatou.

• Aumai se pusa o i ai mea e pei o se ata o Iesu, se palanikete mafanafana, ma se tapasa. Valaaulia tamaiti e filifili se mea ona faasoa lea pe faapefea ona faatusa meafaitino taitasi i se ala e mafai ai e le Agaga Paia ona fesoasoani ia i tatou—Na te molimau mai ia Iesu, e faamafanafanaina i tatou (tagai Ioane 15:26), ma e faaali mai ia i tatou le ala sa’o (tagai 2 Nifae 32:5)

• Faasoa mai ou lava aafiaga i le mauaina o le fesoasoani mai le Agaga Paia.

• Valaaulia tamaiti e faalogologo mo auala e fesoasoani ai le Agaga Paia ia i tatou a o latou usuina le “O Le Agaga Paia,” Tusipese a Tamaiti Peraimeri, 56.

Aoao atu Aoaoga Faavae

Tamaiti Matutua Atu

Mataio 3

Ua faamanuiaina au i sauniga o le Perisitua Arona.

Sa umia e Ioane le Papatiso le Perisitua Arona, o lea o se avanoa lelei lenei e aoao ai tamaiti e uiga i le Perisitua Arona ma fesoasoani ia i latou ia iloa faamanuiaga ma le mana e maua e alii ma tamaitai e ala i lenei perisitua.

Gaoioiga e Mafai Ona Fai

• Valaaulia tamaiti e fai se lisi o tiute o le Perisitua Arona, e faaaoga ai le Mataupu Faavae ma Feagaiga 20:46, 58–60; 84:111. Faamalamalama o ositaulaga i le Perisitua Arona e mafai ona “faatino le papatisoga, ma faatautaia le faamanatuga.” O ositaulaga, aoao, ma tiakono e tatau ona “aoao atu, ma valaaulia tagata uma e o mai ia Keriso”(MFF 20:46, 59). Fai i tamaiti e vaavaai i le Mataio 3 mo faataitaiga a Ioane i le faataunuuina o nei tiute. E mafai faapefea e i tatou uma ona valaaulia isi e o mai ia Keriso, e pei ona faia e Ioane?

• Faaali ni nai ata o i latou o umia le Perisitua Arona o faatinoina sauniga o le papatisoga ma le faamanatuga (tagai Tusi Ata o le Talalelei, nu. 103, 108). Talanoaina pe faapefea ona saunia e nei sauniga i tatou e talia Iesu Keriso ma Lana Togiola.

• Faitau faatasi le Mataupu Faavae ma Feagaiga 13:1, ma faamalamalama atu o Ioane le Papatiso na toefuatai maia le Perisitua Arona ia Iosefa Samita. Fesili i tamaiti pe ua faapefea ona faamanuiaina i latou ona ua toefuatai mai le Perisitua Arona.

Mataio 3:13–17; Luka 3:2–18

E mafai ona ou tausia au feagaiga o le papatisoga.

O le tala i le papatisoga o Iesu o se avanoa lelei lea e fesoasoani ai i tamaiti e toeiloilo a latou feagaiga o le papatisoga ma toe tautino atu ai i latou e tausia.

Gaoioiga e Mafai Ona Fai

• Fai i ni tamaiti se toalua e faitau le Luka 3:7–9, 15–17, e faitau e le tasi ia upu a Ioane le Papatiso, ma le isi e faitauina upu o totoe. A uma fuaiupu taitasi, taofi ma fesoasoani ia malamalama tamaiti i le uiga o le fuaiupu.

• Toe iloilo ia feagaiga na osia e tamaiti i le papatisoga, o loo maua i le Mosaea 18:8–10 ma le Mataupu Faavae ma Feagaiga 20:37. Tagai foi i le Faamaoni i le Faatuatua, 23–26.) Valaaulia tamaiti e tusi nisi o nei mau i le itulau o gaoioga o lenei vaiaso.

• Sauniuni ni kata ta’ilua o i ai fasifuaitau e fetaui po o ni ata e faatusa i feagaiga o le papatisoga. Tuu faafao kata. Valaaulia tamaiti e feauaua’i e fuli i luga kata e lua i le taimi e tasi, ma vaavaai mo kata e fetaui lelei. A uma ona faafetaui, valaaulia tamaiti e faasoa mai auala na latou tausia ai lena feagaiga.

• Faasoa atu pe ua faamanuiaina faapefea oe i le tausia o au feagaiga o le papatisoga.

Mataio 3:11, 16

E mafai e le Agaga Paia ona taiala au.

O loo aoao e tamaiti le ala e iloa ai ma mulimuli i le taitaiga a le Agaga Paia. E mafai faapefea ona e aoao atu i latou o le tausia o feagaiga o le papatisoga o le a fesoasoani latou te agavaa ai e maua lenei taitaiga?

Gaoioiga e Mafai Ona Fai

• Fai i tamaiti taitoatasi e filifili se tasi o mau nei e faitau ma faamalamalama pe faapefea ona talanoa mai le Agaga paia ia i tatou: Mataupu Faavae ma Feagaiga 6:23; 8:2–3.

• Fai i se tamaitiiti e faitau le Mataio 3:11. E faapefea ona pei le Agaga Paia o le afi? Mo se faataitaiga, o le afi e mafanafana, ma na te aumaia le malamalama e taiala ai i tatou (tagai Ioane 15:26; 2 Nifae 32:5).

• Valaaulia tamaiti e moeiini ma tuu i luma o latou lima. Ona salo lemu lea o o latou alofilima i se fulumoa po o se manoa. Valaaulia i latou e ta’u atu pe a latou lagonaina. O le a se mea o aoao mai e lenei gaoioiga e uiga i le iloaina o lagona uunaia e le Agaga Paia?

• Valaaulia tamaiti e faasoa mai aafiaga na latou oo i ai ma le Agaga Paia. Aisea e fesoasoani ai ia i tatou le tausia o feagaiga e maua ai le taitaiga a le Agaga Paia?

Fautuaina le Aoaoina i le Aiga

Fautuaina tamaiti e fesili i o latou matua po o isi tagata o le aiga e uiga i o latou papatisoga.

Faaleleia o Lo Tatou Aoao Atu

Sailia au lava musumusuga Aua nei vaai atu i nei otootoga faapea o ni faatonuga e tatau ona e mulimuli ai a o aoao atu. Ae, faaaoga e fai ma manatu e amotiina au lava musumusuga a o e manatunatu loloto i manaoga o tamaiti e te faiaoga ai. (Tagai Aoao Atu i le Ala a le Faaola, 7.)