11--17 Fepuari

Ioane 2–4

“E Ao Ina Toe Fanau Mai Outou”

E amata lau tapenaga e aoao atu a o e faitauina le Ioane 2–4. Sau, Mulimuli Mai ia te Au—Mo Tagata Taitoatasi ma Aiga e mafai ona fesoasoani e te malamalama ai i nei mataupu, ma e mafai ona avatu e lenei otootoga ia te oe ni manatu faafaiaoga.

Tusifaamaumau Ou Lagona Uunai

Valaaulia le Fefaasoaai

Fautuaina tamaiti e faasoa mai mea o loo latou aoaoina ma oo i ai i le fesili atu i ai pe o a mea sa latou faia talu ai nei e avea ai o ni “fai faiva i tagata” (Mataio 4:19). Atonu e te manaomia le toe iloiloina ma i latou le lesona o le vaiaso na te’a nei.

Aoao atu Aoaoga Faavae

Tamaiti Laiti Ifo

Ioane 3: 1–10

E tatau ona ou papatiso ma faamauina ina ia toe foi atu ai e nonofo faatasi ma le Tama Faalelagi.

O tamaiti o loo e faiaoga ai o loo saunia e faia ni laasaga taua e toe nonofo faatasi ai ma le Tama Faalelagi e ala lea i le papatisoina (fanau i le vai) ma faamauina (fanau i le Agaga). E mafai faapefea ona e fesoasoani ia latou malamalama i le taua o nei sauniga e lua?

Gaoioiga e Mafai Ona Fai

• Aotele le tala ia Iesu o loo aoaoina Nikotemo. Folafola atu i tamaiti a o latou papatiso, o le a tuu atu e le Tama Faalelagi ia i latou le meaalofa o le Agaga Paia.

• Faaaoga le Ioane 3;5 ma le itulau o gaoioiga o lenei vaiaso e aoao atu ai e faapea e manaomia ona tatou papatiso ma faamauina ina ia toe ola faatasi ai ma le Tama Faalelagi.

• Fai i tamaiti e talanoa e uiga i mea latou te fai e fafano ai o latou lima. Faaali le ata o le Teineitiiti o Loo Papatiso (Tusi Ata o le Talalelei, no. 104), ma fesoasoani i tamaiti e faatusatusa le fafano o o tatou lima i le vai i le mama faaleagaga e ala i le papatisoga.

Ioane 3:16

E alofa le Tama Faalelagi ia te au, o lea na Ia auina mai ai ia te au se Faaola.

E mafai faapefea ona e fesoasoani i tamaiti e aoao lenei upumoni taua?

Gaoioiga e Mafai Ona Fai

• Fai i tamaiti e faamaea ia fuaiupu e pei o lea: “Talu ai e alolofa o’u matua ia te au, o lea ua la. …” Faitau le Ioane 3:16. Ona fesoasoani lea i tamaiti taitasi e toe fai le Ioane 3:16, ae sui upu “le lalolagi” i lona lava igoa, ma fai i ai e faalogologo mo le mea na faia e le Tama Faalelagi ona e alofa o Ia ia i tatou. Valaaulia tamaiti e tusi se ata o mea e fesoasoani ia i latou e lagonaina ai le alofa o le Tama Faalelagi mo i latou (e pei o le aiga, natura, o tusitusiga paia, ma isi). Fai atu ia i latou e fefaasoaai a latou atatusi o le tasi ma le isi.

• Tuu i tamaiti e uu i luga se ata o Iesu i taimi uma latou te usuina ai le “Atalii” i le “Na Ia Auina Mai Lona Alo,” Tusipese a Tamaiti, 20.

Ioane 4:5–15

O Iesu Keriso o lo’u “vai ola.”

E mafai e tamaiti o lau vasega ona fesootai i lagona o le fiainu. E mafai faapefea ona e faaaogaina lena aafiaga e fesoasoani ai ia malamalama tamaiti pe o le a le tele o lo tatou manaomia o le vai ola ua ofo mai e Iesu Keriso?

Gaoioiga e Mafai Ona Fai

• Faaoaga le ata o i le otootoga o lenei vaiaso i le Sau, Mulimuli Mai ia e Au—Mo Tagata Taitoatasi ma Aiga e faamatala ai le tala ia Iesu ma le fafine i le vaieli. Fai i tamaiti e toe faamatala mai le tala.

• Faaali atu se ipu vai, ma fesili i tamaiti pe o le a le mea e tupu pe afai ua latou matuai fiafeinu lava ae leai se mea o i ai i le ipu? Aotele faapuupuu le Ioane 4:5–15, ma molimau atu o Iesu ma Lana talalelei e aumaia le ola i o tatou agaga, e faapei foi ona aumaia e le vai le ola i o tatou tino.

Aoao atu Aoaoga Faavae

Tamaiti Matutua Atu

Ioane 2:1–11

E mafai ona ou faamamaluina lo’u tina e faapei ona sa faia e Iesu.

I le faaipoipoga i Kana, na ta’u atu e Maria ia Iesu ua uma le uaina. E tusa le Faaliliuga a Iosefa Samita na tali atu Iesu i Lona tina i le fesili atu,”Funa e, se a ea lau na ia te au? o le mea lea ou te faia” (Ioane 2:4, vaefaamatalaga a). O Iesu o se faataitaiga o le ala e tatau ai i tamaiti ona taulima o latou tina.

Gaoioiga e Mafai Ona Fai

• Valaaulia tamaiti e faitau le Ioane 2:1–11 ma feauauai e toe faamatala vaega o lea tala i a latou lava upu.

• Fai i tamaiti e lisi mai ni mea e ono manaomia ai e o latou tina se fesoasoani. Valaaulia i latou e faata’ita’i mea e mafai ona latou fai atu ia te ia e faaaoga ai nisi o upu a Iesu: “Funa e, se a lau na ia te au?” (Ioane 2:4, vaefaamatalaga a).

• Valaaulia nisi o tina e asiasi ane i lau vasega ma faasoa mai mea e fai e a latou fanau e faailoa ai lo latou faaaloalo ia i latou.

Na fai atu Iesu i lona tina, “Funa e, se a lau na ia te au?” (Faaliliuga a Iosefa Samita, Ioane 2:4 [i le Ioane 2:4, vaefaamatalaga a]).

Ioane 3:1–8

O le papatisoina ma faamau e pei ua toefanau mai

A papatisoina i tatou, lea sa ta’u e Iesu o le “fanauina i le vai,” ua tatou maua se faamagaloga o a tatou agasala ma mafai ona “ulu atu i le malo o e Atua” (Ioane 3:5). E mafai faapefea ona e fesoasoani i tamaiti o loo e faiaoga ai ia malamalama i le uiga o le toefanauina?

Gaoioiga e Mafai Ona Fai

• Faafefiloi upu a le Faaola i le Ioane 3:3 ma tuu i tamaiti e faavasega i le faatulagaga sa’o. E faapefea e le papatiso ma faamau ona pei o le toefanauina?

• Faaali se ata o se pepe faatoa fanau ma se tasi o le a papatiso ma faamauina (tagai Tusi Ata o le Talalelei, nu. 104 ma le 105). E faapefea ona pei i tatou o se pepe fou pe a uma ona tatou papatiso ma faamau? (tagai Ioane 3:3–5).

• Valaaulia tamaiti e faasoa mai mea latou te manatua i o latou papatisoga. Faitau le Mosaea 18:8–10 ma le Mataupu Faavae ma Feagaiga 20:37 e toeiloilo le feagaiga o le papatisoga. Aoao tamaiti o le aai ma feinu i le faamanatuga ma le migao i vaiaso taitasi o se ala lea e faaauau ai pea le aga o le toefanauina.

• Fesoasoani i tamaiti e tauloto le Mataupu Faavae o le Faatuatua 1:4.

Ioane 3:16-17

E alofa le Tama Faalelagi ia te au, o lea na Ia auina mai ai Lona Alo.

E mafai faapefea ona e fesoasoani i tamaiti ia iloa o Iesu na auina mai i le lalolagi o se faaaliga o le alofa o le Tama Faalelagi?

Gaoioiga e Mafai Ona Fai

• Fai i tamaiti e tusi se ata o la latou meaalofa e fiafia i ai ma le tagata na avatu ai lena meaalofa Fai i se tamaitiiti e faitau le Ioane 3:16 O le a le meaalofa na tuuina mai e le Tama Faalelagi ia i tatou? O faapefea ona faaalia mai e lenei meaalofa Lona alofa?

• Fai i tamaiti e faalogologo mo tali i le fesili, “Aisea na auina mai ai e le Tama Faalelagi Iesu Keriso ia i tatou?” a o latou usuina le “Na Ia Auina Mai Lona Alo,” Tusipese a Tamaiti, 20.

Ioane 4:6–23

Ua ofoina mai e Iesu Keriso le “vai ola.”

E faapei ona sa faaaoga e Iesu le vai e aoao ai le fafine o Samaria, e mafai foi ona e faaaogaina le vai e aoao ai tamaiti pe aisea tatou te manaomia ai le talalelei a Iesu Keriso.

Gaoioiga e Mafai Ona Fai

• Tuu atu i tamaiti se vai e feinu ai, ma fai i ai e faasoa mai o latou aafiaga ina ua latou fia feinu. Talanoa pe o a ni lagona ina ua maua se vai e inu.

• Tusi fuaiupu e aotele ai mai le tala i le fafine i le vaieli, ma fai i tamaiti e faasino i le Ioane 4:6–23 e faatulaga sa’o ia fuaiupu. O le a le mea sa taumafai Iesu e aoao atu i le fafine?

• Tusi i le laupapa se ipu vai ma se vaipuna. Valaaulia tamaiti e faaigoa mai mea, e pei o se ipuvai, e faamalie ai i tatou mo sina taimi. O a mea e pei o le “vai ola” e mafai ona faamalie ai i tatou e faavavau?

• Tusi i le laupapa le E faape’i faapefea le talalelei o le vai? Fai i tamaiti e mafaufau pe faapefea ona latou taliina le fesili lea a o latou faitauina le Ioane 4:6–23.

Fautuaina le Aoaoina i le Aiga

Mafaufau e fai i tamaiti e avatu i tagata o o latou aiga se ipuvai e inu pe a latou taunuu i le fale. A latou faia, e mafai ona latou faasoa atua mea sa latou aoaoina e uiga i le vai ola.

Faaleleia o Lo Tatou Aoao Atu

Faaaoga itulau o gaoioiga. A maea ona faaaoga e tamaiti ia itulau o gaoioiga, faaaoga le taimi e toeiloilo ai mataupu faavae mai le lesona.