“11--17 Fepuari Ioane 2--4: “E Ao Ina Toe Fanau Mai Outou’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 (2019)
“11--17 Fepuari Ioane 2–4,” Sau, Mulimuli Mai ia te Au—Mo Tagata Taitoatasi ma Aiga: 2019
11--17 Fepuari
Ioane 2–4
“E Ao Ina Toe Fanau Mai Outou”
A o e faitauina le Ioane 2--4, o le a aoao atu e le Agaga oe i mea e uiga i lou lava liua. Tusi i lalo Ana uunaiga. E te ono maua ni malamalamaaga faaopoopo faaleagaga mai manatu suesue i lenei otootoga.
Tusifaamaumau Ou Lagona Uunai
I le taumafataga o le faaipoipoga i Kana, sa suia ai e Keriso le vai i le uaina--o se mea na tupu na faaigoa e Ioane o le “uluai faailoga” (Ioane 2:11). E sili atu ma le tasi itu e moni ai lena mea; e ui o le vavega muamua lena na faia e Iesu i nofoaga faitele, ae e mafai foi ona faatusa i se tasi amataga ofoofogia---o le faagasologa o o tatou loto ua toeliuliu a o tatou atili avea atili e faapei o lo tatou Faaola. O lenei vaega o se olaga e amata i le faaiuga e mulimuli ia Iesu Keriso, ia suia ma ola i se olaga e sili atu e ala ia te Ia. O le iuga, o lenei suiga e mafai ona matua atoatoa ma avea ai le “toe fanau mai” ma se tasi o auala sili e faamatalaina ai (Ioane 3:7). Ae o le toefanau mai ua na o le amataga o le ala i le avea ai ma soo. O upu a Keriso i le fafine Samaria i le vaieli ua faamanatu mai ai ia te i tatou afai tatou te faaauau pea i luga o lenei ala, e iu ina avea le talalelei ma “se vaipuna” i totonu ia te i tatou, “e puna i luga i le ola e faavavau” (Ioane 4:14).
Manatu mo Suesuega Faaletagata Lava Ia o Tusitusiga Paia
O le mana o Iesu Keriso e mafai ona suia au.
A o e faitau e uiga i le Faaola o suia le vai i le uaina i le Ioane 2:1--11, o a ni malamalamaaga ua e maua e uiga i le mana o Keriso e suia ai oe?
Atonu ua e maua ni malamalamaaga faaopoopo e ala i le mafaufau i manatu o tagata eseese sa i ai iina, e pei o Maria, o soo, ma isi. Mata na faapefea ona maua e nei tagata ni aafiaga i le vavega? E mafai ona e faatusatusaina mea e te aoaoina e uiga i vavega i nei fuaiupu i mea na aoao atu e Iesu Keriso ia Nikotemo (tagai Ioane3:1–8) ma le fafine i le vaieli (tagai Ioane 4:3–26).
E tatau ona toe fanauina a’u ina ia ou ulu atu ai i le malo o le Atua.
Ina ua sau Nikotemo na o ia ia Iesu, o ia o se tagata matau ma le faaeteete. Peitai, mulimuli ane, sa ia puipuia Iesu i nofoaga faitele (tagai Ioane 7:45–52) ma aufaatasi ma e talitonu i le tanuga o le Faaola (tagai Ioane 19:38–40). O a aoaoga ua e maua i le Ioane 3:1--21 atonu na musuia ai Nikotemo e mulimuli ia Iesu ma toe fanauina ai?
Pei ona aoao mai le Perofeta o Iosefa Samta, “O le toe fanauina, e oo mai lea mai le Agaga o le Atua e ala i sauniga” (Aoaoga a Peresitene o le Ekalesia: Iosefa Samita [2007], 95). O le a le matafaioi a lou papatisoga (ua “fanau i le vai” [Ioane 3:5]) ma le faamauga (ua fanau “i le Agaga” [Ioane 3:5]) e faia i le toe fanauina? O le a sau mea o fai e faaauau ai i lenei gasologa o le suiga? (tagai Alema 5:11–14).
Tagai foi Mosaea 5:7; 27:25–26; “Faaolataga,” Gospel Topics, topics.lds.org; David A. Bednar, “E Ao Ina Toe Fanau Mai Outou,” Ensign Liahona, Me 2007, 19–22.
Ua faaalia mai e le Tama Faalelagi Lona alofa mo au e ala ia Iesu Keriso
Na aoao mai Elder Jeffrey R. Holland, “O le upumoni muamua ma le sili o le faavavau atoa, e alofa le Atua ia i tatou ma Lona finagalo atoa, manatu, mafaufau,ma le malosi atoa” (“O a Taeao e Faia ai e le Alii o Vavega i o Outou Luma,” Ensign po o le Liahona, Me 2016, 127). Na faapefea ona e lagonaina le alofa o le Atua e ala i le meaalofa o Lona Alo?
O le faamanatuga e maua ai se taimi e toemanatunatu ai i le alofa o le Atua ma le meaalofa o Lona Alo. O a viiga e fesoasoani e te lagonaina ai lenei alofa? Fuafua e matamata le vitio o le Aufaipese ale Tapeneko o loo lagiina le “Ou Te Tu ma Ofo” (LDS.org). O le a se mea e mafai ona e faia ia atili ai ona taua le faamanatuga?
Pe o se Agaga ea le Atua?
Atonu e fenumiai nisi i le fetalaiga a Iesu faapea o le Atua o se agaga. O le Faaliliuga a Iosefa Samita o lenei fuaiupu ua aumaia ai se faamaninoga taua: “Aua o ia lea ua folafola atu i ai e le Atua lona Agaga” (i le Ioane 4:24, vaefaamatalaga a). Ua aoao mai foi e faaaliga i ona po nei faapea o le Atua e i ai se tino o aano ma ivi (tagai MF 130:22–23; tagai foi Kenese 5:1–3; Eperu 1:1–3).
Ua ofoina mai e Keriso ia te au Lana vai ola.
Mata o le a le mea na faauiga i ai e Iesu ina ua Ia ta’u atu i le fafine Samaria po o ai lava e inu i le vai Na te avatu i ai o le a le toe fiainu lava ia? E faapefea ona pei le talalelei o le vai ola?
O le talalelei a Iesu Keriso o le vai ola lea e faafailele ai o tatou agaga.
O se tasi o savali a le Faaola i le fafine Samaria e faapea, e sili atu le ala tatou te tapuai atu ai nai lo le mea tatou te tapuai ai (tagai Ioane 4:21--24). O le a lau mea o fai e “tapuai ai i le Tama i le agaga ma le faamaoni”? (Ioane 4:23).
Tagai foi i le Taiala i Tusitusiga Paia, “Tapuai”; Dean M. Davies, O Faamanuiaga o le Tapuai,” Ensign po o le Liahona, Nov. 2016, 93–95.
Manatu mo le Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia mau, e mafai e le Agaga ona fesoasoani ia e iloa pe o a mataupu faavae e faamamafa ma talanoaina ina ia taulimaina ai manaoga o lou aiga. O ni nai fautuaga nei:
A o faitauina e lou aiga nei mataupu i lenei vaiaso, ia mataitu le ala na faaaoga ai e le Faaola mea o aso faisoo---fanau, matagi, vai, ma meaai---e aoao atu ai upumoni faaleagaga. O a ni mea o i lou aiga e mafai ona e faaogaina e aoao atu ai upumoni faaleagaga?
A o e aloese mai mea e faaeleelea ai lou fale faaletino ma faaleagaga, e mafai ona avea o se nofoaga paia---e pei o le malumalu. O le a le mea e manaomia e lou aiga ona tuu i fafo o lo outou fale ina ia avea ai o se nofoaga paia? O le a se mea o le a e faia ina ia taofia ai na mea i fafo?
Fai i tagata o le aiga e mafaufau i le vavega o le ma’itaga ma le fanau mai---o le faagasologa o le foafoaina o se tagata ola, gaoioi, ma le atamai. Na aoao mai e Keriso e tatau ona tatou toe fanau mai ae tatou te lei ulu atu i le malo o le Atua. Aisea ua avea ai le toe fanau mai o se upu valiata lelei mo le suiga o loo manaomia mo i tatou a o lei mafai ona tatou ulu atu i le malo o le Atua? Na faapefea ona tatou maua se poto masani i le gasologa o le toefanauina faaleagaga?
Valaaulia tagata o le aiga e toe faaupu mai le fuaiupu lea i a latou lava upu e faapei o loo latou faamalamalamaina atu i se uo. Na faapefea ona fesoasoani Keriso ia tatou lagonaina le alofa o le Atua i o tatou olaga?
O le a le mea na aoao mai e le Faaola ia i tatou ina ua Ia faatusaina Lana talalelei i le vai ola? Fuafua e uu i luga se ipuvai ma fai atu i lou aiga e faamatala mai uiga auaumama o le vai. E manaomia i se a ona tatou inuina vai i aso uma? Mata aisea na faatusa ai e Iesu Keriso Lana talalelei i “se vai e puna i luga i le ola e faavavau”? (Ioane 4:14).
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Suesuega Faaletagata Lava Ia
Vaavaai mo faatusa. O tusitusiga paia e tele ina faaaoga mea faitino, o mea na tutupu, taga e fai, po o aoaoga e faatusa i upumoni faaleagaga. O nei faatusa e mafai ona faamauoa ai lou malamalama i le aoaoga faavae o loo aoaoina. Mo se faataitaiga, na faatusa e le Faaola le liua i le toe fanau mai.
Vai Ola, saunia e Simon Dewey.