Iesu o Loo Aoao Atu Tagata i le Apitaogalu, saunia e James Tissot.

Fepuari 25–Mati 3

Mataio 6–7

“Ua Ia A’oa’o ia te i Latou e Pei o Se ua i ai le Pule”

Amata i le faitauina o le Mataio 6–7 a o e mafaufau i tamaiti e te faiaoga ai. O a savali mai nei mataupu latou te manaomia ona faalogo ai? Sau, Mulimuli Mai ia te Au—Mo Tagata Taitoatasi ma Aiga ma o lenei otootoga e mafai ona fesoasoani e avatu ai ia te oe ni manatu faafaiaoga e manaomia.

Tusifaamaumau Ou Lagona Uunai

Valaaulia le Fefaasoaai

Fai i tamaiti e faasoa mai mea sa latou faia i le vaiaso ua tea e avea ai o se malamalama po o se faataitaiga mo se tasi.

Aoao atu Aoaoga Faavae

Tamaiti Laiti Ifo

Mataio 6:5–13

E mafai ona ou tatalo i lo’u Tama Faalelagi e pei ona faia e Iesu.

E mafai e tamaiti ona aoao e tatalo e ala i le faalogologo i isi o tatalo. E mafai faapefea ona e fesoasoani ia i latou e aoao mai le tatalo a Iesu Keriso i fuaiupu nei?

Gaoioiga e Mafai Ona Fai

• Toeiloilo aoaoga a Iesu e uiga i le tatalo o loo maua i le Mataio 6:5–13. E mafai ona e faaaogaina le “Mataupu 20: Ua Aoao Atu Iesu e uiga i le Tatalo,” Tala o le Feagaiga Fou, 51–52, po o le vitio e o faatasi ai i le(LDS.org).

• Faaaoga le itulau o gaoioiga o le vaiaso lenei e fesoasoani ai i tamaiti ia manatua vaega eseese o le tatalo.

• Lolomi ata o lima o tamaiti taitasi i luga o se pepa. Talanoaina pe o a mea e tatau ona tatou faia i o tatou lima ma ogalima a o tatou tatalo. I luga o ata lolomi taitasi, tusi ai se mea tatou te faia e faaalia ai lo tatou migao pe a tatou tatalo (mo se faataitaiga, punonou o tatou ulu, moeiini o tatou mata, ma isi mea).

• Fesoasoani i tamaiti e fai se pepa faasilasila po o se siata o le a fesoasoani latou te manatua ai e tatalo i le taeao ma le po, ma valaaulia i latou e faasoa atu i o latou aiga.

• Usu faatasi se pese e uiga i le tatalo (e pei o le “Matou Te Ifo Atu,” Tusipese a Tamaiti, 18), ma tuu atu lau molimau i le mana o le tatalo. E mafai foi ona e valaaulia tamaiti e faasoa mai o latou aafiaga i le tatalo.

E mafai ona ou tatalo i lo’u Tama Faalelagi e pei ona faia e Iesu.

Mataio 7:12

E tatau ona tatou taulima isi i le ala ou te manao e taulima ai au.

O Iesu o loo aoao atu i le Mataio 7:12—ua lauiloa foi o le Tulafono Auro—o loo maua mai ai se taiala faigofie i le ala e taulima ai isi. O le a le mea o le a fesoasoani i tamaiti e te faiaoga ai ia ola i lenei mataupu faavae?

Gaoioiga e Mafai Ona Fai

• Faitau le Mataio 7:12, ma toe faaupu i ni upu faigofie e mafai ona malamalama ai tamaiti. Fesoasoani i tamaiti e mafaufau i ni auala eseese e faamaea ai se fuaiupu e pei o lea: “Ou te fiafia pe a isi mo au.” A uma fuaiupu taitasi, valaaulia i latou e toe fai faatasi ma oe, “O lea e tatau ai ona ou mo isi.”

• Usu faatasi ma tamaiti “Fetalai Mai Iesu e Alofa i Tagata Uma,” Tusipese a Tamaiti, 39, ma fai ni taga faigofie e o faatasi ma le pese. Fesili i tamaiti pe o a mea ua latou aoao e uiga i le ala e tatau ona tatou taulima ai isi mai le faataitaiga a le Faaola.

• Valaaulia tamaiti e lisi mai ni mea lelei e fai e o latou matua po o isi tagata o le aiga mo i latou. Faitau le Mataio 7:12, ma valaaulia tamaiti e fai se lisi o mea lelei e mafai ona latou faia mo o latou aiga.

Mataio 7:24–27

E mafai ona ou fausia se faavae malosi e ala i le mulimuli ia Iesu.

O le faaaogaina o le faataoto a le Faaola e uiga i le fausiaina o se fale i luga o le oneone po o luga o se papa e mafai ona avea o se ala e le galo e aoao ai tamaiti e uiga i le taua o le faatino o mea tatou te aoaoina.

Gaoioiga e Mafai Ona Fai

• Usu faatasi ma tamaiti le “Tagata Poto Ma le Tagata Valea,” Tusipese a Tamaiti, 132, ma faaaoga taga e o faatasi ma upu.

• Faaaoga le Mataio 7:24 e aoao atu ai e uiga i eseesega o le tagata poto ma le tagata valea. Valaaulia tamaiti e faafoliga faapea o loo latou fauina se fale. E mafai faapefea ona tatou faapei o le tagata poto?

• Tuu i tamaiti e tusi ata o faataoto i le tagata poto ma le tagata valea.

Aoao atu Aoaoga Faavae

Tamaiti Matutua Atu

Mataio 6–7

O le Lauga i luga o le Mauga o loo i ai savali mo au.

O nei mataupu e tele savali e mafai ona faatatau i tamaiti o loo e faiaoga ai. Faitau i ai a o e mafaufau i tamaiti. O le a se mea na taua ia te oe?

Gaoioiga e Mafai Ona Fai

• Faamanatu i tamaiti sa latou aoaoina mea na aoao mai e Iesu i le Lauga i luga o le Mauga. O a upumoni e mafai ona latou manatua na latou aoaoina i le vaiaso ua ua te’a?

• Tusi i le laupapa ni nai fasifuaitau mai le Lauga i luga o le mauga ma ni nai fasifuaitau e le aumaia mai le mau. Valaaulia tamaiti e faailoa mai pe o le fea fasifuaitau e mai le Lauga i luga o le Mauga ma faasoa mai mea ua latou aoaoina mai ai.

• Filifili na fuaiupu eseese mai le Mataio 6–7 e te manatu o le a aoga i tamaiti. Tusi mau i luga o kata, ma nana solo i le potu. Tuu i tamaiti e sue, faitau fuaiupu, ma faamalamalama pe aisea ua taua ai nei aoaoga ia i latou.

• Faasoa atu se fuaitau e fiafia i ai mai le Mataio 6–7, ma faamalamalama pe aisea e te fiafia ai i ai. Afai e i ai se fuaitau e fiafia i ai tamaiti, valaulia i latou e faasoa mai pe aisea e fiafia ai i ai ma pe o le a se mea ua latou aoao mai ai.

• Usu faatasi ma tamaiti le “O loo Ou Taumafai e Avea e Pei O Iesu,” Tusipese a Tamaiti, 40, ma taofi le pese pe a oo i se fasifuaitau e fesootai i se mataupu faavae o loo aoao mai i le Mataio 6–7 (e pei o le aoao e auauna i a’u uo”). Fesoasoani i tamaiti e fai fesootaiga i mea o loo latou aoaoina mai nei mataupu.

Mataio 6:5–13; 7:7–11

O le a faafofoga mai le Tama Faalelagi ia te au ma tali mai pe a ou tatalo.

A o e suesueina le Mataio 6:5–13; 7:7–11, o le a sou lagona o le a le mea e manaomia ona malamalama iai tamaiti e uiga i le tatalo?

Gaoioiga e Mafai Ona Fai

• Valaaulia tamaiti e faitau leotele le Mataio 6:9–13 ona lisi mai lea o mea na ta’ua e le Faaola i Lana tatalo. E mafai faapefea ona tatou mulimuli i Lana faataitaiga pe a tatou tatalo?

• Usu faatasi ma tamaiti se pese e uiga i le tatalo, e pei o le “Pe Na Faia Sau Tatalo?” Viiga, nu. 75. Fesoasoani i tamaiti e sailiili ia upu e sue ai mafuaaga tatou te tatalo ai ma faamanuiaga e maua mai i le tatalo.

• Fesoasoani i tamaiti e tauloto le Mataio 7:7 i le faia o se taaloga e pei o lea: Tauloto e se tamaitiiti le upu muamua po o le fasifuaitau mai le fuaiupu ona togi lea o se polo i le isi tamaitiiti, o ia lena e taulotoina le isi upu po o le fasifuaitau.

• Faatino ma tamaiti i taga le Mataio 7:9–10 e faaaoga ai ni ofu ma anomea faigofie. Fesili i tamaiti e faasoa mai mea ua aoao atu e lenei mea ia i latou e uiga i le tatalo.

• Faasoa atu se aafiaga na tali ai au tatalo.

Mataio 6:19–21.

E mafai ona ou sailia ni ‘oa faavavau nai lo ‘oa faalelalolagi.

E faapefea ona e fesoaosani i tamaiti e te faiaoga ai ia tele atu le faatauaina o mea o le faavavau nai lo mea o le lalolagi?

Gaoioiga e Mafai Ona Fai

• Aumai se pusa “oa” e tumu ini meafaitino poo ata e faatusa i mea e faataua e le lalolagi—mo se faataitaiga, tupe po o meataalo. Faitau faatasi le Mataio 6:19–21 ona fesili lea i tamaiti e fesoasoani atu ia e mafaufau i oa faalelagi e mafai ona suia ai mea faalelalolagi o loo i le pusa.

• Valaaulia tamaiti e faaigoa pe tusi ni ata o ni mea e mafai ona latou faia e “tolo’a’i ai … oa i le lagi” (Mataio 6:20).

Fautuaina le Aoaoina i le Aiga

Valaaulia tamaiti e faasoa atu i o latou aiga mea e fiafia i ai i le aoaoga mai le Lauga i luga o le Mauga.

Faaleleia o Lo Tatou Aoao Atu

Saili ia malamalama i tagata o lau vasega. Ia e iloa tamaiti e te faiaoga ai. O manatu i nei otootoga e ono manaomia ona fetuunai ina ia taulima lelei ai manaoga o lau vasega. Atonu e te manao e toeiloilo gaoioiga o loo lisi atu i lenei otootoga, ae le na o gaoioiga ua atofa mo vaitausaga o tamaiti e te faiaoga ai, ina ia maua ai manatu mo lau vasega. (Tagai Aoao Atu i le Ala a le Faaola, 7.)