“6--12 Me Luka 12--17; Ioane; ‘Tatou Olioli Faatasi ma Au; aua Ua Ou Maua La’u Mamoe na Leiloa’” Sau, Mulimuli Mai ia te Au---Mo Tagata Taitoatasi ma Aiga: Feagaiga Fou 2019 2019)
“6--12 Me Luka 12--17; Ioane 11.” Sau, Mulimuli Mai ia te Au---Mo Tagata Taitoatasi ma Aiga: 2019
O Le Atalii Faamaumauoa, saunia e Liz Lemon Swindle
6--12 Me
Luka 12–17; Ioane 11
“Tatou Oliolli Faatasi ma Au; aua Ua Ou Mua La’u Mamoe na Leiloa”
A o e faitauina le Luka 12–17 ma le Ioane 11, saili ma le agaga tatalo mea e finagalo le Tama ia e iloa ma faia. O au suesuega o nei mataupu e mafai ona tatala ai lou loto i savali ua patino mo na o oe lava.
Tusifaamaumau Ou Lagona Uunai
O le tele o taimi, e 99 ma i le 100 e ono manatulia e lelei tele---ae e le o lea pe afai o na fuainumera e mo fanau pele a le Atua (tagai MFF 18:10). I le tulaga lena, e oo lava i se agaga e tasi e manaomia se sailiga maioio, ma le naunautai “seia oo ina[tatou] maua” (Luka 15:4), e pei ona aoao mai e le Faaola i le faataoto i le mamoe na leiloa. Ona mafai lea ona amata le fiafiaga, aua e “faapea foi ona tele o le olioli i le lagi i le tagata agasala e toatasi e salamo, ae itiiti i e amiotonu e toaivagafulu ma le toaiva e le tusa i ai le salamo” (Luka 15:4–7). Afai e foliga mai e le fetaui lena mea, e fesoasoani le manatua, o le mea moni, e leai se tasi e “le tusa i ai le salamo.” Tatou te manaomia uma lava le laveai. Ma e mafai uma lava e i tatou ona auai i le faatinoina o le laveai, olioli faatasi i agaga taitasi e laveai mai (tagai MFF 18:15–16).
Manatu mo Suesuega Faaletagata Lava Ia o Tusitusiga Paia
E tatau ona tuu lo’u loto i mea e taua faavavau nai lo o mea o lenei lalolagi.
Aisea o le a faapea mai ai le Atua “Oe na le vale” i se tagata e galue malosi, ma faamanuiaina, o le sa fauina fale e faaputu ai ana saito ma faatutumu i fua o ana galuega? (tagai Luka 12:16--21). O nei mataupu i le Luka, o loo aoao mai ai e le Faaola ia faataoto e mafai ona fesoasoani e sii a’e ai la tatou vaaiga i luga atu o mea o le lalolagi i mea o le faavavau. O loo lisi atu i i nisi o nei faataoto. E faapefea ona e aoteleina le savali o nei faataoto taitasi? O le a le mea ua e manatu o loo ta’u mai e le Alii ia te oe?
-
O le mauoa faavalevalea (Luka 12:13–21)
-
O le faigaai tele (Luka 14:12–24)
-
O le atalii faamaumauoa (Luka 15:11–32)
-
O le auauna le faamaoni (Luka 16:1–12)
-
O le mauoa ma Lasalo (Luka 16:19–31)
Tagai foi Mataio 6:19–34; 2 Nifae 9:30; Mataupu Faavae ma Feagaiga 25:10.
E olioli le Tama Faalelagi pe a maua i latou o e ua leiloloa.
Pe i ai se taimi sa e taumanatunatu ai pe o a lagona o le Tama Faalelagi mo i latou o e sa agasala pe sa “leiloloa”? Sa faitioina e Faresaio ma le au tusiupu ia Iesu i le fegalegaleai ai ma ia ituaiga o tagata. I le tali atu i ai, sa faamatala e Iesu ni faataoto se tolu, o loo maua i le Luka 15—o faataoto o le mamoe na leiloa, le tupe na leiloa, ma le atalii faamaumauoa.
A o e faitauina nei faataoto, mafaufau e fai se lisi o mea e tutusa ai ma eseesega o nei faataoto. Mo se faataitaiga, e mafai ona e vaavaai po o le a le mea na leiloa, ma pe aisea, na faapefea ona maua, ma pe na faapefea ona latou tali atu ina ua maua. O a savali na ia Iesu mo i latou o e sa “leiloloa”---e aofia ai i latou o e le o manatu ua leiloloa? O a savali na ia te Ia mo tagata o e sailia i latou o e ua leiloloa?
Ioe, e sili ai lava le aua nei leiloa. E tusa ai ma le Luka 15:7, na tusia e Elder James E. Talmage “E leai se faamaoniga mo le faaiuga faapea o le tagata agasala ua salamo e tatau ona tuu i ai le faamuamua nai lo le agaga amiotonu o le sa teena le agasala” (Jesus the Christ [1916], 461). Peitai, o i tatou uma lava e agasala e manaomia ona laveai, ma o le savali faamafanafana o faataoto a le Faaola e faapea, e mafai e i tatou uma ona salamo ma toe foi atu i le amiotonu, aua e finagalo le Atua ia le fano lava se agaga e tasi.
Tagai foi Mataupu Faavae ma Feagaiga 18:10–16; Jeffrey R. Holland, “The Other Prodigal,” Ensign, May 2002, 62–64.
O Le Tupe Siliva Na Leiloa, saunia e James Tissot
O le a le mea na aoao mai e Keriso i le faataoto i le auauna le faamaoni?
Na faamalamalama mai e Elder James E. Talmage se lesona e tasi e mafai ona tatou aoao mai i le faataoto: “Ia maelega; aua e le o toe mamao ona mavae lea o le aso e mafai ai ona e faaaogaina au oa faalelalolagi. “… Ia aoao se lesona mai le le faamaoni ma le leaga; afai ua matua fuafua tatau i latou e saunia mo le lumanai e tasi ua mafai ona latou mafaufauina, o le a la le tele e tatau ona e saunia ai, oe lena e talitonu i se lumanai e faavavau? Afai e te lei aoaoina le poto ma le faautauta i le faaaogaina o ‘mamone amioletonu,’ e mafai faapefea ona faatuatuaina oe i oa e sili ona tumau?” (Iesu le Keriso, 464).
O le lotofaafetai mo o’u faamanuiaga o le a ou latalata atili ai i le Atua.
Ana faapea o oe o se tasi o lepela e toasefulu, mata e te manatu o le a e toe foi e faafetai i le Faaola? O a faamanuiaga faaopoopo na maua e le lepela loto faafetai ona sa ia avatu le faafetai? E aafia faapefea lou faaleagaga pe a faaali atu le lotofaafetai? E ono aoga ia te oe le amata ona tusitusi mea e te faafetai ai i se tusi talaaga, e pei ona sa faamatala mai e Peresitene Henry B. Eyring i lana savali “O Remember, Remember” (Ensign po o le Liahona, Nov. 2007, 66–69).
O Iesu Keriso o le Toetu ma le Ola.
O le vavega o le faatuina mai o Lasalo mai le oti o se molimau mamana e le fesiligia o Iesu o le Alo moni o le Atua ma le Mesia folafolaina. O a upu, fasifuaitau, po o faamatalaga o i le Ioane 11:1–46 e faamalosia ai lou faatuatua o Iesu Keriso o “le toetu, ma le ola”? E tosina faapefea lou olaga ma au filifiliga i lea malamalama?
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina mau ma lou aiga, e mafai e le Agaga ona fesoasoani ia e iloa po o a mataupu faavae e faamamafa ma talanoaina ina ia taulima ai manaoga o lou aiga. O ni nai fautuaga nei:
E malamalama tagata o lou aiga pe o a lagona pe a leiloa se mea---pe se foi? O le talanoa e uiga i o latou aafiaga e mafai ona amatalia ai se talanoaga e uiga i faataoto i le mamoe ma le tupe na leiloloa. Pe e mafai foi ona fai se taaloga e lafi ai se tasi ae taumafai isi tagata o le aiga e sue o ia. E fesoasoani faapefea lea gaoioiga tatou te malamalama ai i nei faataoto?
E mafai faapefea ona tatou faapei o le tama i le tala lea pe a i ai ni a tatou fanau e leiloloa? O le a se mea e mafai ona tatou aoao mai le aafiaga o le atalii matua e mafai ona fesoasoani ia tatou avea atili ai faapei o Keriso? O faapefea ona pei le tama i lenei faataoto o lo tatou Tama Faalelagi?
Ina ia fesoasoani i tagata o le aiga e faaaoga le tala i lepela e toasefulu, e mafai ona e valaaulia i latou e tusi se tusi faalilolilo o le lotofaafetai ma tuu solo i le fale. E mafai foi ona outou pepese faatasi “Count Your Blessings,” Hymns, no. 241, ma talanoaina faamanuiaga ua maua e lou aiga.
E mafai e tagata o le aiga ona matamata le vitio “Lazarus Is Raised from the Dead” (LDS.org) ma fefaasoaai a latou molimau ia Iesu Keriso.
Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Faaleleia o Lo Tatou Aoao Atu
Faaaoga tala ma faataitaiga e aoao atu ai mataupu faavae o le talalelei E tele ona aoao mai le Faaola e uiga i mataupu faavae o le talalelei i le faaaogaina o tala ma faataoto. Mafaufau i faataitaiga ma tala mai lou lava olaga e mafai ona faaolaola se mataupu faavae mo lou aiga (tagai Aoao Atu i Ala o le Faaola, 22).
O Fea o I Ai le Toaiva, saunia e Liz Lemon Swindle