Salamo

O le salamo o se tasi lea o uluai mataupu faavae o le talalelei ma e taua i lo tatou fiafia i le olaga nei ma le faavavau. E sili atu nai lo na o le faailoa atu o mea sese na fai ma le suia o amioga. O se suiga o le mafaufau ma le loto lea e aumaia ai ia i tatou se vaaiga fou e uiga i le Atua, e uiga ia i tatou lava, ma e uiga i le lalolagi. E aofia ai le liliuese mai le agasala ma liliu atu i le Atua mo le faamagaloga. Ua mafai ona maua le salamo ona o Iesu Keriso ma Lana taulaga togiola.

Vaaiga Aoao

O le salamo o se tasi lea o uluai mataupu faavae o le talalelei ma e taua i lo tatou fiafia i le olaga nei ma le faavavau. E sili atu nai lo na o le faailoa atu o mea sese na fai. O se suiga o le mafaufau ma le loto lea e aumaia ai ia i tatou se vaaiga fou e uiga i le Atua, e uiga ia i tatou lava, ma e uiga i le lalolagi. E aofia ai le liliuese mai le agasala ma liliu atu i le Atua mo le faamagaloga. E faaosofia e ala i le alofa mo le Atua ma le naunau faamaoni e usitai i Ana poloaiga.

Tusifaamaumau Ou Lagona Uunai

O Le Manaomia o le Salamo

Na folafola mai e le Alii, “e lē mafai e se mea ua lē mama ona mautofi i le malo o le lagi” (Alema 11:37). O a tatou agasala tatou te lē mama ai—lē agavaa ai e toe foi atu ma nonofo ai i le afioaga o lo tatou Tama Faalelagi. Latou te aumaia le ita i o tatou loto i lenei olaga.

E ala i le Togiola a Iesu Keriso, ua tuuina mai ai e lo tatou Tama oi le Lagi le ala lava e tasi mo i tatou ina ia faamagaloina ai a tatou agasala (tagai i le Faamagaloga). Na mafatia Iesu Keriso i le faasalaga mo a tatou agasala ina ia mafai ona faamagaloina i tatou pe a tatou salamo faamaoni. A tatou salamo ma faalagolago i Lana laveaiga alofa tunoa, o le a faamamaina i tatou mai agasala.

Elemene o le Salamo

O le salamo o se faagasologa tiga i nisi o taimi, peitai e oo atu ai i le faamagaloga ma le filemu tumau. Na fetalai mai le Alii e ala mai i le perofeta o Isaia, “E ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:18). Ua folafola mai e le Alii i le augatupulaga lenei, “O le ua salamo i ana agasala, e faamagaloina o ia, ma o au, le Alii, ou te le toe manatua lava” (Mataupu Faavae ma Feagaiga 58:42). O le salamo e aofia ai elemene nei:

Faatuatua i lo Tatou Tama Faalelagi ma Iesu Keriso. O le malosi o le agasala e matautia. Ina ia saoloto mai ai, e tatau ona e liliu atu i lo tatou Tama Faalelagi, tatalo i le faatuatua, ma galue pei ona Ia fetalai mai ai. E ono taumafai malosi Satani e faatalitonu i tatou e faapea, tatou te le o agavaa e tatalo—ua matuai le fiafia lo tatou Tama Faalelagi ia i tatou ma o le a le faafofoga mai lava o Ia i a tatou tatalo. O se pepelo lea mea. E saunia pea e le aunoa lo tatou Tama oi le Lagi e fesoasoani ia i tatou pe afai tatou te o atu ia te Ia ma se loto salamo. O loo ia te Ia le mana e faamalolo ai tatou ma fesoasoani ina ia tatou manumalo i le agasala.

O le salamo o se aga o le faatuatua ia Iesu Keriso—o se faailoga aloaia o le mana o Lana Togiola. E nao Ana tuutuuga lava e mafai ona faamagaloina ai i tatou. A o tatou malamalama ma le agaga faafetai i Lana Togiola ma Lona mana e faamama ai tatou mai le agasala, ua mafai ona tatou “faaaoga o [tatou] faatuatua e salamo ai” (Alema 34:17)

Faanoanoa mo le Agasala. Ina ia mafai ona faamagaloina, e tatau ona muamua ona tatou iloa i o tatou lava loto ua tatou agasala. Afai o tatou taumafai malosi e ola i le talalelei, o lena faailoaga o le a taitai atu ai i le “tiga e tusa i le Atua,” lea e “tupu ai le salamo e oo i le ola” (2 Korinito 7:10). O le tiga e tusa i le Atua e le oo mai ona o le taunuuga faalenatura o le agasala pe ona o le fefe i se faasalaga; ae e oo mai mai lo tatou iloa, e ala i a tatou amioga, ua tatou faatiga i lo tatou Tama Faalelagi ma lo tatou Faaola. Pe a e lagonaina le tiga e tusa i le Atua, ua ia i tatou le manao faamaoni mo le suiga ma se naunautaiga e usitai atu i tulaga uma e manaomia mo le faamagaloga.

Ta’uta’u Atu. “O lē ua ufiufi lona solitulafono, e le manuia o ia; a o le ua faaali ma lafoaiina, e alofagia o ia” (Faataoto 28:13). E taua mo le faamagaloga, se naunautaiga e faailoa atu mea uma na tatou faia i lo tatou Tama Faalelagi. E tatau ona tatou tootutuli i Ona luma i le tatalo faamaulalo, e faailoa atu a tatou agasala. Tatou te ta’uta’u atu lo tatou maasiasi ma le ta’usalaina, ona aioi atu lea mo se fesoasoani.

O solitulafono matuia, e pei o le solia o le tulafono o le legavia, e ono faaletonu ai le avea o se tagata ma se tagata auai o le Ekalesia. O le mea lea, e tatau ai ona e ta’uta’u atu agasala faapena i le Alii faapea foi ma Ona sui o le perisitua i totonu o le Ekalesia. E faia lenei mea i lalo o le vaavaaiga a se epikopo po o le peresitene o le paranesi, e mafai foi e se peresitene o le siteki po o le misiona, o e ua galulue o ni tagatavaai ma faamasino i totonu o le Ekalesia. E ui e na o le Alii e faamagaloina agasala, ae o nei taitai perisitua latou te faia se matafaioi taua lava i le faagasologa o le salamo. O le a latou le faalaua’iteleina le ta’uta’uina atu o au agasala, ma fesoasoani atu i le faagasologa o le salamo.

Lafoaia o le Agasala. E ui o le ta’uta’u atu o se elemene taua o le salamo, ae e le lava lea. Ua fetalai mai le Alii, “O le mea lenei e mafai ai ona outou iloa pe afai ua salamo se tagata i ana agasala—faauta, e taʼutaʼu atu e ia i latou ma lafoai i ai” (Mataupu Faavae ma Feagaiga 58:43).

E tatau ona tatou faia se tautinoga mausali ma tumau, o le a tatou le toe faia le solitulafono. A tatou tausisia lenei tautinoga, o le a tatou le toe lagonaina lava le tiga o lena agasala. E tatau ona tatou vave sosola ese mai soo se tulaga [tatou te] afaina ai. Afai o lea tulaga e mafua ai ona tatou agasala pe ono mafua ai ona tatou agasala, e tatau ona tatou o ese. E le mafai ona tatou faalatalata i le faaosoosoga ma faamoemoe e faatoilalo ai le agasala.

Toe Faaleleia. E tatau lava ona tatou toe faaleleia i le lelei e mafai ai mea uma na faaleagaina ia tatou amioga, pe o se meatotino a se tagata pe o se igoa tauleleia o se tagata. O le naunautai e toe faaleleia e faaali atu ai i le Alii o le a tatou faia mea uma tatou te mafaia e salamo ai.

Ola Amiotonu. E le lava le na o le taumafai e tetee atu i le leaga pe faagaogaoina foi o tatou olaga mai agasala. E tatau ona faatumuina o tatou olaga i le amiotonu ma auai i gaoioiga e aumaia ai le mana faaleagaga. E tatau ona tatou faatofuina i tatou lava i tusitusiga paia ma le tatalo i aso uma ia tuuina mai e le Alii ia i tatou le malosi e sili atu i o tatou lava malosi. E tatau foi ona tatou anapopogi i nisi o taimi mo faamanuiaga faapitoa.

O le usiusitai atoatoa e aumaia ai le mana atoatoa o le talalelei i o tatou olaga, e aofia ai le malosi faateleina e faatoilalo ai o tatou vaivaiga. O lenei usiusitai e aofia ai amioga atonu tatou te le i manatu i ai muamua o se vaega o le salamo, e pei o le auai i sauniga, totogiina o le sefuluai, tuuina atu o auaunaga, ma le faamagalo atu i isi. Ua folafola mai e le Alii, “O ia o lē e salamo ma faia poloaiga a le Alii o le a faamagaloina” (Mataupu Faavae ma Feagaiga 1:32).